Read Tulu ಮಾರ್ಕೆ 15 Bible Online

ಮಾರ್ಕೆ 15 - Tulu bible

ಮಾರ್ಕೆ 15

¹ಬೊಲ್ಪಾಯಿ ಕೂಡ್ಲೆ ಪ್ರಧಾನಯಾಜಕೆರ್‌ಲಾ ಸಭೆತ ಹಿರಿಯಾಕುಲುಲಾ, ಶಾಸ್ತ್ರಿಲುಲಾ, ಹಿರಿಸಭೆತಾಕುಲುಲಾ ಮಾತೆರ್ಲಾ ಒಟ್ಟು ಸೇರ್ದ್ ಪಂಚಾತಿಕೆ ಮಲ್ತ್‌ದ್ ಯೇಸುನ ಕೈಕಟ್ಟ್‌ದ್ ಲೆತ್ತೊಂದು ಪೋದು ಪಿಲಾತಗ್ ಒಚ್ಚಿದ್ ಕೊರಿಯೆರ್.

²ಪಿಲಾತೆ ಆಯಡ, “ಈ ಯೆಹೂದ್ಯೆರೆ ಅರಸು ಅಂದಾ?” ಪಂಡ್ದ್ ಕೇನ್ನಗ “ಈಯೆ ಪನೊಂದುಲ್ಲತ್ತಾ,” ಅಂದ್‌ದ್ ಉತ್ತರ ಕೊರಿಯೆ.

³ಪ್ರಧಾನಯಾಜಕೆರ್ ಆಯನ ಮಿತ್ತ್ ಮಸ್ತ್ ದೂರು ಪನೊಂದಿತ್ತೆರ್. ಅಪಗ ಪಿಲಾತೆ ಕುಡೊರ ಕೇನ್ವೆ, “ಈ ದಾಲಾ ಉತ್ತರ ಕೊರ್ಪುಜನಾ? ತೂಲ, ಮೊಕುಲು ನಿನ ಮಿತ್ತ್ ಏತ್ ದೂರು ಪಾಡೊಂದುಲ್ಲೆರ್.”

⁴

⁵ಆಂಡ ಯೇಸು ದಾಲಾ ಪಾತೆರಿಜೆ. ಅವೆನ್ ತೂದು ಪಿಲಾತಗ್ ಅಚ್ಚಿರ ಆಂಡ್.

⁶ಪ್ರತಿ ವರ್ಸ ಪರ್ಬದಾನಿ ಜನೊಕುಲು ನಟ್ಟೊಂಡಿಲೆಕ್ಕ ಸೆರೆಮನೆಡ್ದ್ ಒರಿಯನ್ ಬುಡ್ದು ಕೊರ್ಪಿನವು ಪಿಲಾತನ ಅಧಿಕಾರೊಡು ಒಂಜಿ ಕ್ರಮ ಇತ್ತ್ಂಡ್.

⁷ಅಪಗ ಬರಬ್ಬೆ ಪನ್ಪಿನಾಯೆ ಒರಿ ಇತ್ತೆ, ಆಯನ್ ಲಡಯಿಡ್ ಮಾನೆ ಕೆರ್ಪಿನಾಕುಲೆಡೊಪ್ಪ ಸೆರೆಮನೆಡ್ ಪಾಡ್ದ್ ಇತ್ತೆರ್.

⁸ಜನೊಕುಲು ಪಿಲಾತನ ಕೈತಲ್‌ ಪೋದು, “ಈ ಎಂಕ್ಲೆಗ್ ಮಲ್ತೊಂದು ಬತ್ತಿಲೆಕ್ಕ ಒರಿಯನ್ ಬುಡುಗಡೆ ಮಲ್ತ್‌ದ್ ಕೊರೊಡು,” ಅಂದ್‌ದ್ ಕೇನೊಂದಿತ್ತೆರ್.

⁹ಪ್ರಧಾನಯಾಜಕೆರ್ ಕಿಚ್ಚಿಮಚ್ಚರೊಡು ಯೇಸುನು ಒಚ್ಚಿದ್ ಕೊರ್ತೆರ್ ಅಂದ್‌ದ್ ಪಿಲಾತಗ್ ಗೊತ್ತಾಯಿನೆಡ್ದ್, “ಯಾನ್ ಯೆಹೂದ್ಯೆರೆ ಅರಸುನು ನಿಕ್ಲೆಗ್ ಬುಡ್ದು ಕೊರೊಡಾ?” ಅಂದ್‌ದ್ ಅಕ್ಲೆಡ ಕೇಂಡೆ.

¹⁰

¹¹ಅಲ್ಪ ಪ್ರಧಾನಯಾಜಕೆರ್ ಬರಬ್ಬನೇ ಬುಡ್ದು ಕೊರೊಡು ಅಂದ್‌ದ್ ಜನೊಕುಲೆನ್ ಲಕ್ಕಾಯೆರ್.

¹²ಐಕ್ ಪಿಲಾತೆ ಕುಡ ಅಕ್ಲೆಡ, “ಅಂಚಾಂಡ ನಿಕುಲು ಪನ್ಪಿನ ಯೆಹೂದ್ಯೆರೆ ಅರಸುನು ಯಾನ್ ದಾನೆ ಮಲ್ಪೊಡು?” ಅಂದ್‌ದ್ ಕೇನ್ನಗ ಅಕುಲು,

¹³“ಆಯನ್ ಕ್ರುಸ್ಸುಗು ಪಾಡ್ಪಾಲ,” ಅಂದ್‌ದ್ ಕುಡ ಬೊಬ್ಬೆ ಪಾಡಿಯೆರ್.

¹⁴ಐಕ್ ಪಿಲಾತೆ, “ದಾಯೆಗ್? ಅಂಚಿನ ದಾದ ಹಾಳ್ ಬೇಲೆ ಮಲ್ತ್‌ದೆ?” ಪಂಡೆ. ಆಂಡ ಅಕುಲು, “ಆಯನ್ ಕ್ರುಸ್ಸುಗು ಪಾಡ್ಪಾಲ,” ಪಂಡ್ದ್ ಬೊಕ್ಕಲಾತ್ ಬೊಬ್ಬೆ ಪಾಡಿಯೆರ್.

¹⁵ಐಕ್ ಪಿಲಾತೆ ಜನೊಕುಲೆ ಮನಸ್‌ನ್ ಸಮಾಧಾನ ಮಲ್ಪೊಡು ಪಂಡ್ದ್, ಬರಬ್ಬನ್ ಅಕ್ಲೆಗ್ ಬುಡ್ದು ಕೊರ್ದು, ಯೇಸುನು ಚಾಟಿಡ್ ಹಾಕಾದ್, ಕ್ರುಸ್ಸುಗು ಪಾಡಿಯೆರೆ ಒಚ್ಚಿದ್ ಕೊರಿಯೆ.

¹⁶ಸಿಪಾಯಿಲು ಆಯನ್ ಅಧಿಪತಿನ ಅರಮನೆಕ್ ಸೇರ್ದಿನ ಜಾಲ್‌ದ ಉಲಯಿ ಕೊನೊದು, ಇಡೀ ಸಿಪಾಯಿಲೆ ದಂಡ್‌ನ್ ಒಟ್ಟುಗು ಲೆತ್ತೆರ್.

¹⁷ಸಿಪಾಯಿಲು ಆಯಗ್ ಕೆಂಪುದ ಒಲ್ಲಿನ್ ಪೊದಿಪಾದ್ ಮುಳ್ಳುದ ಕಿರೀಟ ಮುಡೆದ್ ಆಯಗ್ ದೀದ್,

¹⁸“ಯೆಹೂದ್ಯೆರೆ ಅರಸೋ!” ನಿಕ್ಕ್ ಸೊಲ್ಮೆಲು ಅಂದ್‌ದ್ ಆಯಗ್ ವಂದನೆ ಮಲ್ತ್‌ದ್

¹⁹ಕೋಲುಡು ಆಯನ ತರೆಕ್ ಹಾಕ್‌ದ್, ಆಯನ ಮಿತ್ತ್ ಉಬ್ಬಿದ್, ಆಯನ ಎದುರುಡು ಮೊರಂಪೂರ್ದು ಅಡ್ಡ ಬೂರಿಯೆರ್.

²⁰ಇಂಚ ಆಯನ್ ಗೇಲಿ ಮಲ್ತಿ ಬೊಕ್ಕ ಆ ಕೆಂಪು ಒಲ್ಲಿನ್ ದೆತ್ತ್‌ದ್ ಆಯನ ಕುಂಟುನು ಪಾಡ್ದ್ ಆಯನ್ ಕ್ರುಸ್ಸುಗು ಪಾಡಿಯೆರೆ ಲೆತ್ತೊಂದು ಪೋಯೆರ್.

²¹ಅಪಗ ಕಂಡೊಡ್ದು ಪಿದಾಡ್ದ್ ಆ ಮಾರ್ಗೊಡು ಬರೊಂದಿತ್ತಿ ಒರಿಯನ್ ಯೇಸುನ ಕ್ರುಸ್ಸುನು ತುಂಬೊಂದು ಕೊನೆಯೆರೆ ಒತ್ತಾಯ ಮಲ್ತೆರ್. ಉಂಬೆ ಏರ್ ಅಂದ್ಂಡ, ಅಲೆಕ್ಸಾಂದ್ರ ಬೊಕ್ಕ ರೂಫು ಇನ್ಪಿನರೆನ ಅಮ್ಮೆರ್ ಆದುಪ್ಪು ಕುರೇನ ಪಟ್ಟಣದ ಸೀಮೋನೆ.

²²ಬೊಕ್ಕ ಯೇಸುನು ಗೊಲ್ಗೊಥಾ ಪನ್ಪಿ ಜಾಗ್‌ಗ್ ಲೆತ್ತೊಂದು ಬತ್ತೆರ್. ಗೊಲ್ಗೊಥಾ ಅಂದ್ಂಡ ಕಪಾಲದ ಜಾಗ್.

²³ಅಲ್ಪ ಆಯಗ್ ರಕ್ತಬೋಳ ಬೆರಕೆ ಮಲ್ತಿ ದ್ರಾಕ್ಷಾರಸೊನು ಕೊರಿಯೆರ್, ಆಂಡ ಯೇಸು ದೆತ್ತೊನ್‌ಜೆ.

²⁴ಅಕುಲು ಆಯನ್ ಕ್ರುಸ್ಸುಗು ಪಾಡ್ದ್ ಆಯನ ಕುಂಟುನು ಒವ್ವು ಏರೇರೆಗ್ ಆವೊಡು ಅಂದ್‌ದ್ ಚೀಟಿ ಪಾಡ್ದ್ ಪಾಲ್ ಮಲ್ತೊಂಡೆರ್.

²⁵ಆಯನ್ ಕ್ರುಸ್ಸುಗು ಪಾಡ್ನಗ ಕಾಂಡೆ ಒಂರ್ಬ ಗಂಟೆ ಆದಿತ್ತ್ಂಡ್.

²⁶ಉಂದತ್ತಂದೆ, ಅಕುಲು ಪಡ್ಪಾಯಿ ಅಪರಾಧೊನು ತೆರಿಪಾವುನ ಪತ್ತೆ ಅಂದ್‌ದ್ ಕ್ರುಸ್ಸುದ ಮಿತ್ತ್ ಬರೆದಿತ್ತ್‌ಂಡ್. ಅವು ದಾನೆಂದ್ಂಡ, “ಯೆಹೂದ್ಯೆರೆ ಅರಸು,” ಪನ್ಪಿನವೇ.

²⁷ಅವತ್ತಂದೆ ಇರ್ವೆರ್ ಕಲ್ವೆರೆನ್ ಕನತ್‌ದ್ ಒರಿಯನ್ ಆಯನ ಬಲತ್ತ್‌ಡ್ ಬೊಕ್ಕೊರಿಯನ್ ದತ್ತ ಮರ್ಗಿಲ್‌ಡ್ ಆಯಡೊಪ್ಪ ಕ್ರುಸ್ಸುಗು ಪಾಡಿಯೆರ್.

²⁸[6]

²⁹ಅಲ್ಪ ಪೋಪಿನಾಕುಲು ತರೆ ಆಡಾದ್, “ಆಹಾ! ದೇವಾಲಯೊನು ಬೂರ್ಪಾದ್ ಮೂಜಿ ದಿನೊಟು ಕುಡ ಕಟ್ಟುನಾಯಾ, ಕ್ರುಸ್ಸುಡ್ದು ಜತ್ತ್‌ದ್ ನಿನನ್ ಬಚವು ಮಲ್ತೊನ್ಲ,” ಅಂದ್‌ದ್ ಆಯನ್ ಗೇಲಿ ಮಲ್ತೊಂದಿತ್ತೆರ್.

³⁰

³¹ಐತ ಲೆಕ್ಕನೇ ಪ್ರಧಾನಯಾಜಕೆರ್‌ಲಾ ಶಾಸ್ತ್ರಿಲುಲಾ, “ಆಯೆ ಬೇತೆಕ್ಲೆನ್ ಬಚವು ಮಲ್ತೆ, ತನನ್ ಬಚವು ಮಲ್ತೊನೆರೆ ಆಯಿಜಿ? ಇಸ್ರಾಯೇಲ್ಯೆರೆ ಅರಸು ಆದುಪ್ಪು ಈ ಕ್ರಿಸ್ತೆ, ಇತ್ತೆ ಕ್ರುಸ್ಸುಡ್ದು ಜತ್ತ್‌ದ್ ಬರಡ್, ಜತ್ತ್‌ದ್ ಬತ್ತ್ಂಡ ಎಂಕುಲು ನಂಬುವ,” ಅಂದ್‌ದ್ ತನ್ಕುಲೆ ಉಲಯಿ ಗೇಲಿಡ್ ಪಾತೆರೊಂದಿತ್ತೆರ್. ಆಯಡೊಪ್ಪ ಕ್ರುಸ್ಸುಗು ಪಾಡ್ದಿತ್ತಿನಾಕುಲುಲಾ ಅಂಚೆನೇ ಆಯನ್ ನಿಂದನೆ ಮಲ್ತೊಂದಿತ್ತೆರ್.

³²

³³ಮಧ್ಯಾಹ್ನದ ಪೊರ್ತು ಇಡೀ ದೇಶದ ಮಿತ್ತ್ ಮೂಜಿ ಗಂಟೆ ಮುಟ್ಟ ಕತ್ತಲೆ ಆಂಡ್.

³⁴ಮೂಜಿ ಗಂಟೆಗ್ ಯೇಸು, “ಎಲೋಹಿ, ಎಲೋಹಿ, ಲಮಾ ಸಬಕ್ತಾನಿ,” ಪಂಡ್ಂಡ “ಎನ ದೇವೆರೇ, ಎನ ದೇವೆರೇ ದಾಯೆಗ್ ಎನ ಕೈ ಬುಡ್ತ,” ಅಂದ್‌ದ್ ಮಲ್ಲ ಸ್ವರೊಟ್ಟು ಬುಲ್ತೆ.

³⁵ಕೈತಲ್‌ ಉಂತುದಿನಾಕುಲೆಡ್ ಕೆಲೆವೆರ್ ಅವೆನ್ ಕೇಂಡ್ದ್, “ತೂಲೆ ಆಯೆ ಎಲೀಯನ್ ಲೆಪ್ಪುವೆ,” ಅಂದ್‌ದ್ ಪಂಡೆರ್.

³⁶ಅಪಗ ಒರಿ ಪಾರ್‌ಪೋದು ಸ್ಪಂಜಿನ್ ಪುಳಿರಸೊಟು ಮುರ್ಕಾದ್, ಕೋಲುಗು ತಿಕ್ಕಾದ್ ಆಯಗ್ ಪರಿಯೆರೆ ಕೊರ್ದು, “ಬುಡ್ಲೆ, ಎಲೀಯೆ ಉಂಬ್ಯನ್ ಜಪುಡಾಯೆರೆ ಬರ್ಪೆನಾ ದಾನ್ನ ತೂಕ,” ಅಂದ್‌ದ್ ಪಂಡೆರ್.

³⁷ಆಂಡ ಯೇಸು ಮಲ್ಲ ಸ್ವರೊಟ್ಟು ಬುಲ್ತುದು ಪ್ರಾಣ ಬುಡಿಯೆ.

³⁸ಅಪಗ ದೇವಾಲಯದ ಪರದೆ ಮಿತ್ತ್‌ಡ್ದ್ ತಿರ್ತ್ ಮುಟ್ಟ ಪರಿದ್ ರಡ್ಡ್ ಪಾಲ್ ಆಂಡ್.

³⁹ಆಯೆ ಇಂಚ ಪ್ರಾಣ ಬುಡಿನೆನ್ ತೂದು ಆಯನ ಎದುರುಡು ಉಂತುದಿತ್ತಿ ಶತಾಧಿಪತಿ, “ನಿಜಾದ್‌ಲಾ ಈ ನರಮಾನಿ, ದೇವೆರೆ ಮಗೆನೇ,” ಅಂದ್‌ದ್ ಪಂಡೆ.

⁴⁰ಉಂದತ್ತಂದೆ ಅಲ್ಪ ಪೊಂಜೊವುಲುಲಾ ದೂರೊಡ್ದು ತೂವೊಂದಿತ್ತೆರ್. ಅಕ್ಲೆಡ್ ಆಯೆ ಗಲಿಲಾಯೊಡಿತ್ತಿನಪಗ ಆಯನ ಬೆರಿಯೆ ಪೋವೊಂದು ಸೇವೆ ಮಲ್ತೊಂದಿತ್ತಿ ಮಗ್ದಲದ ಮರಿಯಲಾ ಎಲ್ಯ ಯಾಕೋಬು ಯೋಸೆನ ಅಪ್ಪೆ ಆಯಿ ಮರಿಯಲಾ, ಸಲೋಮಿಲಾ ಇತ್ತೆರ್. ಆಯಡೊಪ್ಪ ಯೆರೂಸಲೇಮುಗು ಬೈದಿನ ಬೇತೆ ಮಸ್ತ್ ಪೊಂಜೊವುಲುಲಾ ಇತ್ತೆರ್.

⁴¹

⁴²ಅಪಗನೆ ಬೈಯ ಆದಿತ್ತ್ಂಡ್. ಆ ದಿನ ಸಬ್ಬತ್‌ದ ದುಂಬಿನಾನಿ ಆದಿತ್ತ್ಂಡ್.

⁴³ಅಪಗ ಅರಿಮಥಾಯದ ಯೋಸೇಫೆ ಹಿರಿಸಭೆಟ್ ಪುದರ್ ಇತ್ತಿನಾಯೆ ದೇವೆರೆ ರಾಜ್ಯೊನು ಕಾತೊಂದಿತ್ತಿನಾಯೆಲಾ ಆದಿತ್ತ್‌ದ್ ಆಯೆ ಧೈರ್ಯೊಡು ಪಿಲಾತನ ಕೈತಲ್‌ ಪೋದು ಯೇಸುನ ಶರೀರೊನು ಎಂಕ್ ಕೊರ್ಲೆ ಅಂದ್‌ದ್ ನಟ್ಟೊಂಡೆ.

⁴⁴ಪಿಲಾತೆ, ಯೇಸು ಈತ್ ಬೇಗ ಸೈತೆ ಅಂದ್‌ದ್ ಅಚ್ಚಿರ ಆಯೆ. ಶತಾಧಿಪತಿನ್ ಲೆಪುಡಾದ್ ಯೇಸು ಸೈತೆನಾ ಅಂದ್‌ದ್ ಆಯಡ ಕೇಂಡೆ.

⁴⁵ಆಯೆ ಸೈತಿನೆನ್ ಶತಾಧಿಪತಿಡ್ದ್ ತೆರಿದ್ ಪುಣೊನು ಯೋಸೇಫಗ್ ಕೊರ್ಪಾಯೆ.

⁴⁶ಯೋಸೇಫು ನಾರ್‌ಮಡಿತ ಕುಂಟುನು ಕ್ರಯೊಕು ದೆತ್ತೊಂದು ಯೇಸುನ ಪುಣೊನು ಕ್ರುಸ್ಸುಡ್ದು ಜಪುಡಾಯೆ. ಪುಣೊನು ನಾರ್‌ಮಡಿತ ಕುಂಟುಡು ಸುತ್ತುದು ಪಾದೆಡ್ ಕುರೆದಿತ್ತಿ ಸಮಾಧಿಡ್ ದೀದ್ ಸಮಾಧಿದ ಬಾಕಿಲ್‌ಗ್ ಕಲ್ಲ್‌ನ್ ಪೊರೆಲ್ಪಾಯೆ.

⁴⁷ಮಗ್ದಲದ ಮರಿಯಲಾ ಯೋಸೆನ ಅಪ್ಪೆ ಮರಿಯಲಾ ಯೇಸುನು ದೀತಿನ ಜಾಗ್‌ನ್ ತೂಯೆರ್.