Read Tulu ಮಾರ್ಕೆ 16 Bible Online

ಮಾರ್ಕೆ 16 - Tulu bible

ಮಾರ್ಕೆ 16

¹ಸಬ್ಬತ್‌ದಿನ ಆಯಿ ಬೊಕ್ಕ, ಮಗ್ದಲದ ಮರಿಯಲಾ ಯಾಕೋಬುನ ಅಪ್ಪೆ ಮರಿಯಲಾ ಸಲೋಮಿಲಾ ಯೇಸುನ ಶರೀರೊಗು ಪೂಜೆರೆಗಾದ್ ಕಮ್ಮೆನದ ಎಣ್ಣೆನ್ ಕ್ರಯೊಕು ದೆತ್ತೊಂಡೆರ್.

²ವಾರದ ಸುರುತ್ತ ದಿನತ ಪುಲ್ಯಕಾಂಡೆ ಪೊರ್ತು ಮೂಡುನಗ ಅಕುಲು ಸಮಾಧಿಗ್ ಬತ್ತೆರ್.

³ಅಕುಲು ಪೋವೊಂದುಪ್ಪುನಗ, “ಸಮಾಧಿದ ಬಾಕಿಲ್‌ಡ್ ಮುಚ್ಚಿದಿತ್ತಿನ ಕಲ್ಲ್‌ನ್ ನೂಕುದು ಪುರೆಲ್ಪಾವುನಾಕುಲು ಏರುಲ್ಲೆರ್?” ಅಂದ್‌ದ್ ಒರಿಯಗ್ ಒರಿ ಪಾತೆರೊಂಡೆರ್.

⁴ಅಕುಲು ಸಮಾಧಿದಡೆಗ್ ಬತ್ತಿನಪಗ ಆ ಮಲ್ಲ ಕಲ್ಲ್ ಪೊರೆಲ್ಪಾದಿತ್ತಿನೆನ್ ತೂಯೆರ್.

⁵ಅಕುಲು ಸಮಾಧಿದ ಉಲಯಿ ಪೋನಗ, ಒರಿ ಜವ್ವನೆ ಬೊಲ್ದು ಅಂಗಿನ್ ಪಾಡೊಂದು ಬಲತ್ತ ಮರ್ಗಿಲ್‌ಡ್ ಕುಲ್ಲುದಿನೆನ್ ತೂದು ಪೋಡಿಯೆರ್.

⁶ಆಯೆ ಅಕ್ಲೆಗ್, “ಪೋಡ್ಯಡೆ, ಕ್ರುಸ್ಸುಗು ಪಾಡ್ದಿತ್ತಿನ ನಜರೇತ್‌ದ ಯೇಸುನು ನಾಡುವರತ್ತಾ. ಆಯೆ ಜೀವಾದ್ ಲಕ್ಕ್‌ದೆ. ಮುಲ್ಪ ಇಜ್ಜೆ. ಆಯನ್ ದೀತಿನ ಜಾಗ್ ಉಂದೇ ತೂಲೆ.

⁷ಇತ್ತೆ ನಿಕುಲು ಪೋದು, ಆಯನ ಶಿಷ್ಯೆರೆಗ್ಲಾ ಪೇತ್ರಗ್ಲಾ, ‘ಆಯೆ ನಿಕ್ಲೆಗ್ ಪಂಡಿಲೆಕ್ಕ ನಿಕ್ಲೆಡ್ದ್ ದುಂಬು ಗಲಿಲಾಯೊಗು ಪೋವೊಂದುಲ್ಲೆ, ನಿಕುಲು ಆಯನ್ ಅವುಲು ತೂವರ್,’ ಅಂದ್‌ದ್ ತೆರಿಪಾಲೆ,” ಪಂಡ್ದ್ ಪಂಡೆ.

⁸ಆ ಪೊಂಜೊವುಲು ಅಚ್ಚಿರ ಆದ್ ನಡುಗೊಂದು, ಕೂಡ್ಲೆ ಪಿದಯಿ ಬತ್ತ್‌ದ್, ಸಮಾಧಿಡ್ದ್ ಪಾರ್‌ಪೋಯೆರ್. ಅಕುಲು ಪೋಡಿನೆಡ್ದ್ ಏರೆಗ್ಲಾ ದಾಲಾ ಪಂಡಿಜೆರ್.

⁹(ವಾರದ ಸುರುತ್ತ ದಿನತ ಪುಲ್ಯಕಾಂಡೆ ಯೇಸು ಜೀವ ಆದ್ ಲಕ್ಕಿ ಬೊಕ್ಕ ಮಗ್ದಲದ ಮರಿಯಗ್ ಸುರುಟ್ಟು ತೋಜಿದ್ ಬತ್ತೆ. ಯೇಸು ಆಲೆಗ್ ಪತ್ತ್‌ದಿತ್ತಿ ಏಳ್ ದೆವ್ವೊಲೆನ್ ಬುಡ್ಪಾದಿತ್ತೆ.

¹⁰ಆಲ್ ಪೋದು ಆಯೆ ತೋಜಿದ್ ಬತ್ತಿನೆನ್ ಆಯಡೊಪ್ಪ ಇತ್ತಿನಾಕುಲೆಗ್ ತೆರಿಪಾಯಲ್. ಮೊಕುಲು ದುಃಖೊಡು ಬುಲ್ತೊಂದಿತ್ತೆರ್.

¹¹ಆಯೆ ಬದ್‌ಕ್‌ದೆ, ಎಂಕ್ ತೋಜಿಯೆ ಪನ್ಪಿ ಪಾತೆರೊನು ಪನ್ನಗ, ಅಕುಲು ನಂಬಿಜೆರ್.

¹²ಉಂದಾಯಿ ಬೊಕ್ಕ ಶಿಷ್ಯೆರೆಡ್ ಇರ್ವೆರ್ ಒಂಜಿ ಹಳ್ಳಿಗ್ ನಡತೊಂದು ಪೋವೊಂದುಪ್ಪುನಗ, ಯೇಸು ಅಕ್ಲೆಗ್ ಬೇತೆ ರೂಪೊಡು ತೋಜಿದ್ ಬತ್ತೆ.

¹³ಅಕುಲು ಪೋದು ಒರಿದಿನಾಕುಲೆಗ್ ತೆರಿಪಾಯೆರ್. ಆಂಡ ಅಕುಲುಲಾ ನಂಬಿಜೆರ್.

¹⁴ಕೆಲವು ದಿನೊಡ್ದು ಬೊಕ್ಕ ಪತ್ತೊಂಜಿ ಶಿಷ್ಯೆರ್ ವಣಸ್‌ಗ್ ಕುಲ್ಲುದಿತ್ತಿನಪಗ ಯೇಸು ಅಕ್ಲೆಗ್ಲಾ ತೋಜಿದ್ ಬತ್ತೆ. ತಾನ್ ಜೀವ ಆದ್ ಲಕ್ಕಿ ಬೊಕ್ಕ ತನನ್ ತೂಯಿನಾಕುಲೆನ ಪಾತೆರೊನು ಅಕುಲು ನಂಬಂದೆ ಇತ್ತಿ ಕಾರಣೊಗು ಆಯೆ ಅಕುಲು ನಂಬಂದಿನೆಕ್ಕ್‌ಲಾ ಅಕ್ಲೆನ ಕಠಿಣ ಉಡಲ್‌ಗಾದ್‌ಲಾ ದಟ್ಟಿಯೆ.

¹⁵ಯೇಸು ಅಕ್ಲೆಡ, “ನಿಕುಲು ಲೋಕದ ಮಾತ ಕಡೆಕ್ಕ್ ಪೋದು ಸುವಾರ್ತೆನ್ ಮಾತ ಸೃಷ್ಟಿಗ್ ಸಾರಿಲೆ.

¹⁶ನಂಬುದು ದೀಕ್ಷಾಸ್ನಾನ ಮಲ್ಪಾವೊನುನಾಯಗ್ ರಕ್ಷಣೆ ತಿಕ್ಕುಂಡು. ನಂಬಂದಿನಾಯೆ ತೀರ್ಪುಗು ಒಳಗಾಪೆ.

¹⁷ಉಂದತ್ತಂದೆ ನಂಬುನಾಕುಲೆಡ್ದ್ ಈ ಕಾರ್ನಿಕೊಲು ಆಪುಂಡು. ಅಕುಲು ಎನ ಪುದರ್‌ಡ್ ದೆವ್ವೊಲೆನ್ ಬುಡ್ಪಾವೆರ್. ಪೊಸ ಭಾಷೆಲೆನ್ ಪಾತೆರುವೆರ್,

¹⁸ಅಕುಲು ಸರ್ಪೊಲೆನ್ ಪತಿಯೆರ್ಡಲಾ ವಿಷತವು ಒವ್ವೆನ್ಲಾ ಪರಿಯೆರ್ಡಲಾ ಅಕ್ಲೆಗ್ ದಾಲಾ ಆವಂದ್. ಅಕುಲು ಸೀಕ್‌ದಾಕುಲೆ ಮಿತ್ತ್ ಕೈ ದೀಂಡ ಗುಣ ಆವು,” ಅಂದ್‌ದ್ ಪಂಡೆ.

¹⁹ಕರ್ತವೆ ಆಯಿ ಯೇಸು ಅಕ್ಲೆಡ ಪಾತೆರಿ ಬೊಕ್ಕ ಪರಲೋಕೊಗು ಏರ್ದ್ ಪೋದು ದೇವೆರೆ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂಡೆ.

²⁰ಐಡ್ದ್ ಬೊಕ್ಕ ಶಿಷ್ಯೆರ್ ಪಿದಾಡ್ದ್ ಪೋದು, ಮಾತ ಕಡೆಕ್ಲಾ ಸುವಾರ್ತೆನ್ ಸಾರಿಯೆರ್. ಬೊಕ್ಕ ಕರ್ತವೆ ಅಕ್ಲೆ ಒಟ್ಟುಗು ಬೇಲೆ ಮಲ್ತೊಂದು, ಕಾರ್ನಿಕೊಲೆಡ್ದ್ ಸುವಾರ್ತೆನ್ ಬಲ ಮಲ್ತೊಂದಿತ್ತೆ.) [7]