Read Tulu ಮಾರ್ಕೆ 2 Bible Online

ಮಾರ್ಕೆ 2 - Tulu bible

ಮಾರ್ಕೆ 2

¹ಒಂತೆ ದಿನೊಡ್ದು ಬೊಕ್ಕ ಯೇಸು ಕಪೆರ್ನೌಮುಗು ಬತ್ತೆ. ಆಯೆ ಇಲ್ಲಡ್ ಉಲ್ಲೆ ಪನ್ಪಿನ ಸುದ್ಧಿ ಜನೊಕುಲೆಗ್ ತೆರಿಂಡ್.

²ಜನೊಕುಲು ಗುಂಪಾದ್ ಸೇರ್ದ್ ಬತ್ತಿನೆಡ್ದ್ ಬಾಕಿಲ್‌ದ ಬರಿಟ್ಟ್‌ಲಾ ಜಾಗ್ ಇತ್ತ್‌ಜಿ. ಅವುಲು ಯೇಸು ಅಕ್ಲೆಗ್ ದೇವೆರೆ ಪಾತೆರೊನು ಸಾರಿಯೊಂದಿತ್ತೆ.

³ಅಪಗ ನಾಲ್ವೆರ್ ಒರಿ ಪಕ್ಷವಾತದಾಯನ್ ತುಂಬೊಂದು ಯೇಸು ಕೈತಲ್‌ ಕನತೆರ್.

⁴ಆಂಡ ಜನೊಕುಲೆ ಮಲ್ಲ ಗುಂಪು ಇತ್ತಿನೆಡ್ದಾವರ ಅಕ್ಲೆಗ್ ಯೇಸುನ ಕೈತಲ್‌ ಕನವೆರೆ ಸಾದ್ಯ ಆಯಿಜಿ, ಅಂಚಾದ್ ಯೇಸು ಇತ್ತಿನ ಇಲ್ಲದ ಮಾಡ್‌ನ್ ಗಿರ್ತ್‌ದ್ ಪಕ್ಷವಾತದಾಯೆ ಜೆತ್ತ್‌ದಿತ್ತಿ ಪಜೆನ್ ತಿರ್ತ್ ಜಪುಡಾಯೆರ್.

⁵ಯೇಸು ಅಕ್ಲೆನ ನಂಬಿಕೆನ್ ತೂದು, ಆ ಪಕ್ಷವಾತದಾಯಡ, “ಮಗಾ, ನಿನ ಪಾಪೊಲು ಮಾಪು ಆತ್ಂಡ್,” ಅಂದ್‌ದ್ ಪಂಡೆ.

⁶ಅಲ್ಪ ಶಾಸ್ತ್ರಿಲೆಡ್ ಕೆಲೆವೆರ್ ಕುಲ್ಲುದಿತ್ತೆರ್. “ಇಂಬೆ ದಾಯೆಗ್ ಇಂಚ ಪಾತೆರ್‌ವೆ? ಉಂದು ದೇವದೂಷಣೆ, ದೇವೆರ್ ಒರಿಯೇ ಅತ್ತಂದೆ ಏರ್ಲಾ ಪಾಪೊಲೆನ್ ಬುಡುಗಡೆ ಮಲ್ಪೊಲಿಯಾ?” ಅಂದ್‌ದ್ ಅಕ್ಲೆ ಉಡಲ್‌ಡೇ ಎನ್ನೊಂದಿತ್ತೆರ್.

⁸ಇಂಚ ಎನ್ನೊಂದುಪ್ಪುನೆನ್ ಕೂಡ್ಲೆ ಯೇಸು ತನ ಆತ್ಮೊಡು ತೆರಿದ್ ಅಕ್ಲೆಡ, “ನಿಕುಲು ನಿಕ್ಲೆನ ಉಡಲ್‌ಡ್ ದಾಯೆಗ್ ಇಂಚ ಆಲೋಚನೆ ಮಲ್ತೊಂದುಲ್ಲರ್?

⁹ಒವು ಸುಲಭ? ಪಕ್ಷವಾತದಾಯಗ್ ‘ನಿನ ಪಾಪೊಲು ಮಾಪು ಆತ್ಂಡ್ ಪನ್ಪಿನವಾ,’ ಇಜ್ಜಿಂಡ, ‘ಲಕ್ಕ್‌ದ್ ನಿನ ಪಜೆನ್ ಪತ್ತೊಂದು ನಡಪು ಪನ್ಪಿನವಾ?’

¹⁰ಆಂಡ ಪಾಪೊಲೆನ್ ಮಾಪು ಮಲ್ಪೆರೆ ನರಮಾನಿ ಮಗಕ್ಕ್ ಭೂಲೋಕೊಡು ಅಧಿಕಾರ ಉಂಡು ಪನ್ಪಿನವು ನಿಕ್ಲೆಗ್ ತೆರಿಯೊಡು,” ಅಂದ್‌ದ್ ಪಕ್ಷವಾತದಾಯನ್ ತೂದು,

¹¹“ಲಕ್ಕ್‌ದ್ ನಿನ ಪಜೆನ್ ದೆತ್ತೊಂದು ಇಲ್ಲಗ್ ಪೋಲ,” ಅಂದ್‌ದ್ ನಿಕ್ಕ್ ಪನ್ಪೆ ಪಂಡ್ದ್ ಪಂಡೆ.

¹²ಆಯೆ ಲಕ್ಕ್‌ದ್ ಅಪಗನೇ ತನ ಪಜೆನ್ ಪತ್ತೊಂದು ಮಾತೆರೆ ಎದುರುಡ್ದು ಪಿದಾಡ್ದ್ ಪೋಯೆ. ಉಂದೆನ್ ತೂದು ಮಾತೆರ್ಲಾ ಅಚ್ಚಿರೊಡು, “ಈತ್‌ನೆಟ್ಟ ಎಂಕುಲು ಇಂಚಿನ ಕಾರ್ಯೊನು ತೂತಿನೆ ಇಜ್ಜಿ,” ಪನೊಂದು ದೇವೆರೆನ್ ಪುಗರಿಯೆರ್.

¹³ಯೇಸು ಕುಡ ಕಡಲ ಬರಿಕ್ಕ್ ಪೋಯೆ. ಜನೊಕುಲೆ ಗುಂಪು ಆಯನ ಕಡೆಕ್ಕ್ ಬತ್ತಿನಪಗ ಆಯೆ ಅಕ್ಲೆಗ್ ಬೋಧನೆ ಮಲ್ತೆ.

¹⁴ಅಲ್ಪಡ್ದ್ ಯೇಸು ಕಡಲ್ದ ಬರಿಟ್ಟೇ ಪೋವೊಂದುಪ್ಪುನಗ ಸುಂಕ ವಸೂಲಿ ಮಲ್ತೊಂದಿತ್ತಿ ಅಲ್ಫಾಯನ ಮಗೆ ಲೇವಿನ್ ತೂದು, “ಎನ ಬೆರಿಯೆ ಬಲ,” ಅಂದ್‌ದ್ ಲೆಪ್ಪುನಗ, ಆಯೆ ಲಕ್ಕ್‌ದ್ ಯೇಸುನ ಬೆರಿಯೆ ಪೋಯೆ.

¹⁵ಐಡ್ದ್ ಬೊಕ್ಕ ಯೇಸು ಲೇವಿನ ಇಲ್ಲಡ್ ವಣಸ್‌ಗ್ ಕುಲ್ಲೊಂದುಪ್ಪುನಗ ಮಸ್ತ್ ಜನ ಸುಂಕದಾಕುಲುಲಾ ಪಾಪಿಷ್ಟೆರ್‌ಲಾ ಯೇಸು ಬೊಕ್ಕ ಆಯ ಶಿಷ್ಯೆರೆ ಪಂತೆಡ್ ವಣಸ್‌ಗ್ ಕುಲ್ಲುದಿತ್ತೆರ್. ಮೊಕ್ಲೆಡ್ ಮಸ್ತ್ ಜನ ಯೇಸುನ ಬೆರಿಯೆ ಪೋಪಿನಾಕುಲು ಆದಿತ್ತೆರ್.

¹⁶ಪರಿಸಾಯೆರಾಯಿ ಶಾಸ್ತ್ರಿಲು, ಆಯೆ ಪಾಪಿಲು ಬೊಕ್ಕ ಸುಂಕದಾಕುಲೆಡೊಪ್ಪ ವಣಸ್ ಮಲ್ಪುನೆನ್ ತೂದು, ಆಯನ ಶಿಷ್ಯೆರೆಡ, “ಆಯೆ ಸುಂಕದಾಕುಲೆಡೊಪ್ಪಲಾ ಪಾಪಿಲೆಡೊಪ್ಪಲಾ ದಾಯೆಗ್ ವಣಸ್ ಮಲ್ಪುವೆ ತೂಲೆ.” ಅಂದ್‌ದ್ ಪಂಡೆರ್.

¹⁷ಯೇಸು ಅವೆನ್ ಕೇಂಡ್ದ್ ಅಕ್ಲೆಡ, “ಸೌಖ್ಯೊಡು ಉಪ್ಪುನಾಕುಲೆಗ್ ವೈದ್ಯೆ ಬೊಡ್ಚಿ, ಸೌಖ್ಯದಾಂತಿನಾಕುಲೆಗ್ ಮಾತ್ರ ಬೋಡು. ಯಾನ್ ನೀತಿವಂತೆರೆನ್ ಲೆಪ್ಪೆರೆ ಬೈದಿನಿ ಅತ್ತ್, ಪಾಪಿಷ್ಟೆರೆನ್ ಲೆಪ್ಪೆರೆ ಬೈದಿನಿ,” ಪಂಡೆ.

¹⁸ಯೋಹಾನನ ಶಿಷ್ಯೆರ್‌ಲಾ ಪರಿಸಾಯೆರ್‌ಲಾ ಉಪವಾಸೊಡುಪ್ಪುನಗ, ಕೆಲೆವೆರ್ ಯೇಸುನ ಕೈತಲ್‌ ಬತ್ತ್‌ದ್, “ಯೋಹಾನನ ಶಿಷ್ಯೆರ್ ಬೊಕ್ಕ ಪರಿಸಾಯೆರೆ ಶಿಷ್ಯೆರ್‌ಲಾ ಉಪವಾಸ ಮಲ್ಪುವೆರತ್ತಾ? ನಿನ ಶಿಷ್ಯೆರ್ ದಾಯೆಗ್ ಉಪವಾಸ ಮಲ್ಪುಜೆರ್?” ಅಂದ್‌ದ್ ಕೇಂಡೆರ್.

¹⁹ಐಕ್ ಯೇಸು ಅಕ್ಲೆಡ, “ಮದ್ಮೆದ ದಿಬ್ಬಣದಾಕುಲು ತನ್ಕುಲೆಡೊಪ್ಪ ಮದ್ಮಯೆ ಉಪ್ಪುನಗ ಉಪವಾಸ ಮಲ್ಪೊಲಿಯಾ? ಮದ್ಮಯೆ ತನ್ಕುಲೆಡೊಪ್ಪ ಉಪ್ಪುನ ಮುಟ್ಟ ಅಕುಲು ಉಪವಾಸ ಮಲ್ಪಯೆರ್.

²⁰ಆಂಡ ಮದ್ಮಯನ್ ಅಕ್ಲೆನ ಕೈತಲ್‌ಡ್ದ್ ದೆತ್ತೊಂದು ಪೋಪಿನ ಕಾಲ ಬರ್ಪುಂಡು, ಆ ಕಾಲೊಡು ಉಪವಾಸ ಮಲ್ಪುವೆರ್.

²¹“ಏರ್ಲಾ ಪೊಸ ಕುಂಟುದ ತುಂಡುನು ಪರ ಕುಂಟುಗು ಪತ್ತೆ ಪಾಡುಜೆರ್, ಪಾಡ್‌ಂಡ ಆ ಪೊಸ ಪತ್ತೆ ಪರ ಕುಂಟುನು ಒಯ್ತ್‌ದ್ ಪರ್ತೆಲ್ ಹೆಚ್ಚಾವು.

²²ಅಂಚೆನೇ ಪರ ಚರ್ಮದ ಚೀರವುಡು ಪೊಸ ದ್ರಾಕ್ಷಾರಸೊನು ದಿಂಜಾವುಜೆರ್. ದಿಂಜಾಂಡ ದ್ರಾಕ್ಷಾರಸ ಚೀರವು ಪುಡಾದ್ ದ್ರಾಕ್ಷಾರಸಲಾ ಚೀರವುಲಾ ಹಾಳಾದ್ ಪೋಪುಂಡು. ಅಂಚಾಯಿನೆಡ್ದ್ ಪೊಸ ದ್ರಾಕ್ಷಾರಸೊನು ಪೊಸ ಚೀರವುಡು ಪಾಡ್ದ್ ದೀವೊಡು,” ಅಂದ್‌ದ್ ಪಂಡೆ.

²³ಯೇಸು ಸಬ್ಬತ್‌ದಿನೊಟು ಬುಲೆತ ಕಂಡೊಲೆನ್ ದಾಂಟ್‌ದ್ ಪೋವೊಂದುಪ್ಪುನಗ ಆಯನ ಶಿಷ್ಯೆರ್ ಕೊರಲ್ ರುಂಬುದು ತಿನೊಂದಿತ್ತೆರ್.

²⁴ಪರಿಸಾಯೆರ್ ಯೇಸುಡ, “ತೂಲ, ಮೊಕುಲು ಸಬ್ಬತ್‌ದಿನೊಟು ಮಲ್ಪಂದಿ ಬೇಲೆನ್ ದಾಯೆಗ್ ಮಲ್ಪುವೆರ್?” ಅಂದ್‌ದ್ ಕೇಂಡೆರ್.

²⁵ಅಪಗ ಯೇಸು ಅಕ್ಲೆಡ, “ದಾವೀದೆ, ತಾನ್‌ಲಾ ತನಡೊಪ್ಪ ಇತ್ತಿನಾಕುಲುಲಾ ಬಡವು ಆಯಿನಪಗ ದಾದ ಮಲ್ತೆರ್ ಪನ್ಪಿನೆನ್ ನಿಕುಲು ಓದುದಿಜರಾ?

²⁶ಪ್ರಧಾನಯಾಜಕೆ ಆಯಿ ಅಬಿಯಾತರನ ಕಾಲೊಡು ದಾವೀದೆ ದೇವೆರೆ ಆಲಯದ ಉಲಯಿ ಪೋದು ಯಾಜಕೆರ್ ಅತ್ತಂದೆ ಬೇತೆ ಏರ್ಲಾ ತಿನಂದಿನ ನೈವೇದ್ಯದ ರೊಟ್ಟಿನ್ ತಾನ್ ತಿಂದ್‌ದ್, ತನಡೊಪ್ಪ ಇತ್ತಿನಾಕುಲೆಗ್ಲಾ ಕೊರಿಯೆ ಅತ್ತಾ?”

²⁷ಬೊಕ್ಕ ಅಕ್ಲೆಡ, “ಸಬ್ಬತ್‌ದಿನೊನು ದೇವೆರ್ ನರಮಾನಿಲೆಗಾದೇ ಉಂಡು ಮಲ್ತ್‌ದಿನಿ ಅತ್ತಂದೆ ನರಮಾನಿಲೆನ್ ಸಬ್ಬತ್‌ದಿನೊಕಾದ್ ಮಲ್ತ್‌ದಿನಿ ಅತ್ತ್.

²⁸ಅಂಚಾಯಿನೆಡ್ದ್ ನರಮಾನಿ ಮಗೆ ಸಬ್ಬತ್‌ದಿನತಲಾ ಕರ್ತವೆ ಆದುಲ್ಲೆ,” ಅಂದ್‌ದ್ ಪಂಡೆ.