Read Tulu ಮಾರ್ಕೆ 4 Bible Online

ಮಾರ್ಕೆ 4 - Tulu bible

ಮಾರ್ಕೆ 4

¹ಯೇಸು ಕುಡ ಕಡಲ ಬರಿಟ್ಟ್ ಬೋಧನೆ ಮಲ್ಪೆರೆ ಸುರು ಮಲ್ತೆ. ದಿಂಜ ಜನ ಆಯನ ಕೈತಲ್‌ ಸೇರ್ದ್ ಬತ್ತಿನೆಡ್ದ್ ಆಯೆ ಕಡಲ್‌ಡಿತ್ತಿ ಓಡ ಮಿತ್ತಾರ್ದ್ ಕುಲ್ಲಿಯೆ.

²ಆ ಜನೊಕುಲೆ ಗುಂಪು ಕಡಲ್ದ ಕರೆಟ್ ಇತ್ತೆರ್. ಅಪಗ ಆಯೆ ಅಕ್ಲೆಗ್ ಉಪಕತೆತ್ತ ರೂಪೊಡು ಕೆಲವು ಬೋಧನೆ ಮಲ್ತೆ. ಆ ಬೋಧನೆಡ್ ಪಂಡಿನಿ ದಾನೆಂದ್ಂಡ,

³“ಕೇನ್ಲೆ, ಬಿತ್ತುನಾಯೆ ಬಿತ್ತಿಯೆರೆ ಪಿದಾಡಿಯೆ.

⁴ಆಯೆ ಬಿತ್ತ್‌ನಗ ಕೆಲವು ಬಿತ್ತುಲು ಸಾದಿದ ಬರಿಟ್ಟ್ ಬೂರ್‌ಂಡ್. ಪಕ್ಕಿಲು ಬತ್ತ್‌ದ್ ತಿಂದ್‌ದ್ ಬುಡಿಯ.

⁵ಕೆಲವು ಬಿತ್ತ್ ಮಣ್ಣ್‌ದಾಂತಿ ಪಾದೆದ ನೆಲೊಟ್ಟು ಬೂರ್‌ಂಡ್. ಮಣ್ಣ್ ತೆಲ್ಪು ಇತ್ತಿನೆಡ್ದ್ ಬೇಗ ಮುಂಗೆ ಬತ್ತ್ಂಡ್.

⁶ಆಂಡ ಸೂರ್ಯನ ದೊಂಬು ಅರ್ಲುನಗ ಬೇರ್ ದಿಂಜ ಅಡಿಕ್ ಪೋವಂದಿನೆಡ್ದ್ ನುಂಗುದು ಪೋಂಡು.

⁷ಬೊಕ್ಕ ಕೆಲವು ಬಿತ್ತ್ ಮುಳ್ಳುದ ಪುದೆಕ್ಲೆಡ್ ಬೂರ್‌ಂಡ್. ಮುಳ್ಳುಗಿಡೊಕ್ಲು ಬುಲೆದ್ ಅವೆನ್ ದೆಂಗಾಯಿನೆಡ್ದ್ ಅವು ಫಲ ಕೊರ್ಜಿ.

⁸ಕೆಲವು ಬಿತ್ತ್ ಎಡ್ಡೆ ಭೂಮಿದ ಮಿತ್ತ್ ಬೂರ್ದು, ಅವು ಕೊಡಿದ್ ಬುಲೆದ್ ಫಲ ಕೊರ್ದು ಐಟ್ಟ್ ಕೆಲವು ಮುಪ್ಪದಾತ್, ಕೆಲವು ಅಜ್ಪದಾತ್, ಕೆಲವು ನೂದೆದಾತ್ ಫಲ ಕೊರ್ಯ.”

⁹ಬೊಕ್ಕ ಅಕ್ಲೆಡ, “ಕೇನಿಯೆರೆ ಕೆಬಿ ಇತ್ತಿನಾಯೆ ಕೇನಡ್,” ಪಂಡೆ.

¹⁰ಆಯೆ ಒರಿಯೇ ಉಪ್ಪುನಗ, ಆಯನ ಕೈತಲ್‌ದ ಪದ್ರಾಡ್ ಶಿಷ್ಯೆರ್‌ನಾಕುಲು ಆ ಉಪಕತೆತ್ತ ಸಂಗತಿಡ್ ಆಯಡ ಕೇಂಡೆರ್.

¹¹ಆಯೆ ಅಕ್ಲೆಡ ಪಂಡಿನಿ, “ದೇವೆರೆ ರಾಜ್ಯದ ಗುಟ್ಟು ನಿಕ್ಲೆಗ್ ಕೊರ್ತುಂಡು. ಆಂಡ ಪಿದಯಿದ ಜನೊಕುಲೆಗ್ ಉಪಕತೆತ್ತ ರೂಪೊಡು ತೆರಿಪಾವೆ,

¹²ದಾಯೆಗ್ ಪಂಡ, ‘ಅಕುಲು ಕಣ್ಣ್‌ಡ್ ತೂಂಡಲಾ ಅಕ್ಲೆಗ್ ಗೊತ್ತಾಪುಜಿ, ಕೆಬಿಟ್ ಕೇಂಡಲಾ ಅಕ್ಲೆಗ್ ಅರ್ಥ ಆಪುಜಿ, ಅಂಚ ತೂದು ತೆರಿಯೊಂದು ಅಕುಲು ದೇವೆರೆ ಕಡೆಕ್ಕ್ ತಿರ್ಗಿಯೆರ್ಡ, ಪಾಪೊಡ್ದು ಮಾಪು ಅಕ್ಲೆಗ್ ಆಪುಂಡು.’”

¹³ಐಡ್ದ್ ಬೊಕ್ಕ ಆಯೆ ಅಕ್ಲೆಗ್ ಪಂಡಿನಿ ದಾನೆಂದ್ಂಡ, “ಈ ಉಪಕತೆತ್ತ ಅರ್ಥ ನಿಕ್ಲೆಗ್ ಗೊತ್ತಾಯಿಜಾ? ಅಂಚಾಂಡ ಬೇತೆ ಉಪಕತೆತ್ತ ಅರ್ಥ ನಿಕುಲು ಎಂಚ ತೆರಿಯೊನ್ವರ್?

¹⁴ಬಿತ್ತುನಾಯೆ ಪಾತೆರೊನು ಬಿತ್ತುವೆ.

¹⁵ಕೆಲೆವೆರ್ ಪಾತೆರೊನು ಕೇಂಡಿ ಕೂಡ್ಲೆ ಸೈತಾನೆ ಬತ್ತ್‌ದ್ ಅಕ್ಲೆಡ್ ಬಿತ್ತ್‌ದಿತ್ತಿ ಪಾತೆರೊನು ದೆತ್ತ್‌ದ್ ಬುಡ್ಪೆ. ಮೊಕುಲೇ ಸಾದಿದ ಬರಿಟ್ಟ್ ಬೂರ್ದಿತ್ತಿ ಬಿತ್ತುಲು ಆದುಪ್ಪುವೆರ್.

¹⁶ಅವ್ವೇ ಪ್ರಕಾರ ಬೇತೆ ಕೆಲೆವೆರ್ ಪಾತೆರೊನು ಕೇಂಡಿ ಕೂಡ್ಲೆ ಸಂತೋಷೊಡು ಅವೆನ್ ಸ್ವೀಕಾರ ಮಲ್ಪುವೆರ್. ತನ್ಕುಲೆನ ಬೇರ್ ದಿಂಜ ಅಡಿಕ್ ಪೋವಂದಿನೆಡ್ದ್, ಮೊಕುಲು ಒಂತೆ ಕಾಲ ಮಾತ್ರ ಇತ್ತ್‌ದ್ ಆ ಪಾತೆರೊಡ್ದು, ಕಷ್ಟ ಆವಡ್ ಭಂಗ ಆವಡ್ ಬತ್ತ್ಂಡ, ಬೇಗನೇ ದಂಟ್‌ದ್ ಬೂರ್ವೆರ್. ಮೊಕುಲು ಪಾದೆ ಜಾಗ್‌ಡ್ ಬಿತ್ತ್ ಬೂರ್ದಿನಾಕುಲು ಆದುಪ್ಪುವೆರ್.

¹⁸ನನ ಕೆಲೆವೆರ್ ಪಾತೆರೊನು ಕೇಂಡಲಾ ಲೋಕದ ಚಿಂತೆಲಾ, ಐಶ್ವರ್ಯೊಡ್ದು ಆಪಿನ ಮೋಸಲಾ, ತರತರತ ಇಚ್ಚೆಡ್ ಆ ಪಾತೆರೊನು ದೆಂಗಾವುನೆಡ್ದ್ ಫಲ ಕೊರಂದೆ ಉಪ್ಪುವೆರ್. ಮೊಕುಲೇ ಮುಳ್ಳುಗಿಡೊಕ್ಲೆಡ್ ಬಿತ್ತ್ ಬೂರಿ ನೆಲ ಆದುಪ್ಪುವೆರ್.

²⁰ಬೊಕ್ಕ ಕೆಲೆವೆರ್ ಪಾತೆರೊನು ಕೇಂಡ್ದ್ ಅಂಚೆನೆ ನಡತ್‌ದ್ ಮುಪ್ಪದಾತ್, ಅಜ್ಪದಾತ್, ನೂದೆದಾತ್ ಫಲೊನು ಕೊರ್ಪೆರ್. ಮೊಕುಲೇ ಬಿತ್ತ್ ಬೂರ್ದಿನ ಎಡ್ಡೆ ನೆಲ ಆದುಲ್ಲೆರ್.” ಅಂದ್‌ದ್ ಯೇಸು ಪಂಡೆ.

²¹ಬೊಕ್ಕ ಯೇಸು ಅಕ್ಲೆಡ, “ತುಡರ್‌ನ್ ಕನತ್‌ದ್ ಕಲಸೆದುಲಯಿ ಇಜ್ಜಿಂಡ ಮಂಚವುದ ಅಡಿಟ್ಟ್ ದೀಪಿನ ಉಂಡಾ? ಅವೆನ್ ದೀಪಕಂಬದ ಮಿತ್ತ್ ದೀಪೆರತ್ತಾ?

²²ಮದೆ ಆದುಪ್ಪುನ ಮಾತಲಾ ಬೊಲ್ಪುಗು ಬರ್ಪುಂಡು, ಬೊಕ್ಕ ದೆಂಗಾದಿತ್ತಿನ ಒವಾಂಡಲಾ ಬೊಲ್ಪುಗು ಬರಂದೆ ಉಪ್ಪುಜಿ.

²³ಕೇನಿಯೆರೆ ಕೆಬಿ ಇತ್ತಿನಾಯೆ ಕೇನಡ್,” ಅಂದ್‌ದ್ ಪಂಡೆ.

²⁴ಬೊಕ್ಕ ಆಯೆ ಅಕ್ಲೆಡ, “ನಿಕುಲು ಕೆಬಿ ಕೊರ್ಪಿನ ಸಂಗತಿಡ್ ಜಾಗ್ರತೆಡುಪ್ಪುಲೆ. ನಿಕುಲು ಲಪ್ಪುನ ಆಳತೆಡ್ದೇ ನಿಕ್ಲೆಗ್ಲಾ ಲಪ್ಪುವೆರ್. ನಿಕ್ಲೆಗ್ ನನಲಾ ಸೇರಾದ್ ಕೊರ್ಪೆರ್.

²⁵ದಾಯೆ ಪಂಡ ಇತ್ತಿನಾಯಗ್ ದೇವೆರ್ ಹೆಚ್ಚಾದ್ ಕೊರುವೆ, ಇಜ್ಜಾಂದಿನಾಯಡ ಇತ್ತಿನವುಲಾ ದೆತ್ತ್‌ದ್ ಬುಡ್ಪುಂಡು,” ಅಂದ್‌ದ್ ಪಂಡೆ.

²⁶ಬೊಕ್ಕ ಆಯೆ ಕುಡ ಅಕ್ಲೆಡ, “ಒರಿ ನರಮಾನಿ ಭೂಮಿಡ್ ಬಿತ್ತ್ ಬಿತ್ತ್‌ದ್, ರಾತ್ರೆ ನಿದ್ರೆ ಮಲ್ತ್‌ದ್ ಪಗೆಲ್ಡ್ ಲಕ್ಕ್‌ದ್ ತೂನಗ ಆಯಗ್ ತೆರಿಯಂದಿಲೆಕ್ಕ ಬಿತ್ತ್ ಕೊಡಿದ್ ಬುಲೆಯುಂಡು. ಅಂಚೆನೇ ದೇವೆರೆ ರಾಜ್ಯಲಾ ಉಂಡು.

²⁸ಭೂಮಿ ದುಂಬತ್ತ ದೈ ಆದ್ ಬುಲೆದ್ ಪೈರ್ ಆದ್ ದಿಂಜಿದ್ ಕೊರಲ್ ತನ್ನಾತಿಗೆ ತಾನೇ ಬುಲೆಯುಂಡು.

²⁹ಕೆಯಿ ಬುಲೆಯಿ ಬೊಕ್ಕ ಕೊಯ್ಪಿನ ಕಾಲ ಬತ್ತ್ಂಡ್ ಅಂದ್‌ದ್, ಆಯೆ ಪರ್ಕತ್ತಿಡ್ದ್ ಕೊಯ್ಪಾವೆ,” ಪಂಡೆ.

³⁰ಬೊಕ್ಕ ಆಯೆ ಪಂಡಿನಿ, “ದೇವೆರೆ ರಾಜ್ಯೊನು ಒಯಿಕ್ ಸಮ ಮಲ್ಪುಗ? ವಾ ಉಪಕತೆಡ್ದ್ ಅವೆನ್ ತೋಜಾದ್ ಕೊರ್ಕ?

³¹ಅವು ದಾಸೆಮಿದ ಬಿತ್ತ್‌ದ ಲೆಕ್ಕ ಉಂಡು. ಅವು ಭೂಮಿಡ್ ಉಪ್ಪು ಮಾತ ಬಿತ್ತ್‌ಲೆಡ್ದ್‌ಲಾ ಎಲ್ಯದವು ಆದುಂಡು.

³²ಬಿತ್ತಿ ಬೊಕ್ಕ ಅವು ಬುಲೆದ್ ಮಾತ ಕಾಯಿಕಜಿಪು ದೈಕ್ಲೆಡ್ದ್ ಮಲ್ಲ ಆದ್ ಮಲ್ಲ ಮಲ್ಲ ಗೆಲ್ಲ್‌ಲೆಡ್ದ್ ಬುಲೆದ್ ಐತ ಗೆಲ್ಲ್‌ಲೆಡ್ ಬಾನೊಡು ರಾಪಿನ ಪಕ್ಕಿಲೆಗ್ ಐತ ನಿರೆಲ್‌ಡ್ ಗೂಡು ಕಟ್ಟ್‌ದ್ ವಾಸ ಮಲ್ಪೆರೆ ಆಪುಂಡು,” ಅಂದ್‌ದ್ ಪಂಡೆ.

³³ಆಯೆ ಇಂಚಿತ್ತಿ ಮಸ್ತ್ ಉಪಕತೆಲೆಡ್ದ್ ಜನೊಕುಲೆಗ್ ಅರ್ಥ ಆಪಿಲೆಕ್ಕ ದೇವೆರೆ ಪಾತೆರೊನು ಪನೊಂದಿತ್ತೆ.

³⁴ಉಪಕತೆದಾಂತೆ ಆಯೆ ಒಂಜೆನ್ಲಾ ಪಂಡಿಜೆ. ಆಂಡ ಆಯೆ ತನ ಶಿಷ್ಯೆರೆಡೊಪ್ಪ ಪ್ರತ್ಯೇಕಾದ್ ಉಪ್ಪುನಗ ಮಾತಲಾ ಬುಡ್ಪಾದ್ ಪನೊಂದಿತ್ತೆ.

³⁵ಅವ್ವೇ ದಿನೊಟು ಬೈಯದಗ ಯೇಸು ಶಿಷ್ಯೆರೆಡ, “ನಮ ಆಪೆದ ಬರಿಕ್ಕ್ ಪೋಯಿ,” ಅಂದ್‌ದ್ ಪಂಡೆ.

³⁶ಅಕುಲು ಆ ಜನೊಕುಲೆನ ಗುಂಪುನು ಬುಡ್ದು ಯೇಸುನು ಅವ್ವೇ ಓಡೊಡು ಲೆತ್ತೊಂದು ಪೋಯೆರ್. ಬೇತೆ ಓಡೊಲುಲಾ ಅಲ್ಪ ಇತ್ತ್ಂಡ್.

³⁷ಅಕುಲು ಆ ಓಡೊಡು ಪೋವೊಂದುಪ್ಪುನಗ, ಒಂಜಿ ಮಲ್ಲ ಬಿರುಗಾಳಿ ಲಕ್ಕ್‌ದ್, ಶೆರೆಕ್ಕುಲು ಆ ಓಡೊಗು ಹಾಕ್‌ದ್, ನೀರ್ ಓಡದುಲಯಿ ದಿಂಜೆರೆ ಸುರು ಆಂಡ್.

³⁸ಯೇಸು ಓಡದ ಒಂಜಿ ಮೂಲೆಡ್ ತಲೆಂಬುಡು ತರೆ ದೀದ್ ನಿದ್ರೆ ಮಲ್ತೊಂದಿತ್ತೆ. ಅಕುಲು ಆಯನ್ ಲಕ್ಕಾದ್, “ಗುರು, ಎಂಕುಲು ಮುರ್ಕೊಂದುಲ್ಲ ನಿಕ್ಕ್ ಚಿಂತೆ ಇಜ್ಜಾ?” ಅಂದ್‌ದ್ ಕೇಂಡೆರ್.

³⁹ಆಯೆ ಲಕ್ಕ್‌ದ್ ಗಾಳಿನ್ ದಟ್ಟಿಯೆ ಕಡಲ್‌ಗ್, “ಗೌಜಿ ಮಲ್ಪಡ, ಶಾಂತ ಆಲ,” ಅಂದ್‌ದ್ ಅಪ್ಪಣೆ ಕೊರಿಯೆ, ಅಪಗನೆ ಗಾಳಿ ಉಂತುದು, ಕಡಲ್ ಶಾಂತ ಆಂಡ್.

⁴⁰ಯೇಸು ತನ ಶಿಷ್ಯೆರೆಡ, “ನಿಕುಲು ದಾಯೆಗ್ ಪೋಡಿವರ್ ನನಲಾ ನಿಕ್ಲೆಗ್ ನಂಬಿಕೆ ಇಜ್ಜಾ?” ಅಂದ್‌ದ್ ಕೇನ್ನಗ,

⁴¹ಅಕುಲು ದಿಂಜ ಪೋಡಿದ್, “ಉಂಬೆ ಏರಾದುಪ್ಪೆ? ಗಾಳಿಲಾ ಕಡಲ್‌ಲಾ ಆಯೆ ಪಂಡಿ ಪಾತೆರೊನು ಕೇನುಂಡತ್ತಾ,” ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್.