Read Tulu ಮಾರ್ಕೆ 5 Bible Online

ಮಾರ್ಕೆ 5 - Tulu bible

ಮಾರ್ಕೆ 5

¹ಯೇಸು ಬೊಕ್ಕ ಆಯನ ಶಿಷ್ಯೆರ್ ಕಡಲ್ ದಾಂಟ್‌ದ್ ಆಪೆದ ಬರಿಕ್ಕ್ ಗೆರಸೇನೆರೆ ಸೀಮೆಗ್ ಮುಟ್ಟಿಯೆರ್.

²ಯೇಸು ಓಡೊಡ್ದು ಜತ್ತಿ ಕೂಡ್ಲೆ, ಒರಿ ದೆವ್ವ ಪತ್ತ್‌ದಿನಾಯೆ ಸಮಾಧಿದ ಮಾಟೆದುಲಯಿಡ್ದ್ ಆಯ ಎದುರು ಬತ್ತೆ.

³ಸಮಾಧಿದ ಮಾಟೆಲು ಆಯನ ಇಲ್ಲ್ ಆದಿತ್ತ್ಂಡ್. ಆಯನ್ ಕುಂಟೊಲೆಡ್ಲಾ ಸಂಕಲೆಡ್ಲಾ ಕಟ್ಟ್‌ದಿತ್ತ್ಂಡಲಾ ಆಯೆ ಸಂಕಲೆನ್ಲಾ ಕುಂಟೊಲೆನ್ಲಾ ಪೊಲ್ತೊಂದುದಿತ್ತೆ. ಆಯನ್ ಏರೆಗ್ಲಾ ಸಂಕಲೆಡ್ದ್ ಕಟ್ಟಿಯೆರೆ ಆವಂದೆ ಪೋಯೆರ್. ಆಯನ್ ಪತ್ತಿಯೆರೆ ಏರೆಡ್ದ್‌ಲಾ ಆಯಿಜಿ.

⁴

⁵ಆಯೆ ರಾತ್ರೆ ಪಗೆಲ್ ಸಮಾಧಿ ಮಾಟೆಲೆಡ್ಲಾ ಗುಡ್ಡೆಲೆಡ್ಲಾ ಬೊಬ್ಬೆ ಪಾಡೊಂದು, ಕಲ್ಲ್‌ಡ್ ತನನ್ ಕಡ್ತೊಂದಿತ್ತೆ.

⁶ಯೇಸುನು ಆಯೆ ದೂರೊಡ್ದು ತೂದು ಪಾರ್ ಬತ್ತ್‌ದ್ ಆಯಗ್ ಅಡ್ಡಬೂರ್ಯೆ.

⁷ಮಲ್ಲ ಸ್ವರೊಟ್ಟು ಅರಬಾಯಿ ದೀದ್, “ಯೇಸೋ ಪರಾತ್ಪರೆ ಆದುಪ್ಪು ದೇವೆರೆ ಮಗಾ ಎನ ಸುದ್ಧಿ ನಿಕ್ಕ್ ದಾಯೆಗ್? ದೇವೆರೆ ಆಜ ಪಾಡ್ವೆ, ಎಂಕ್ ಭಂಗ ಕೊರೊಡ್ಚಿ .”

⁸ಆಯೆ ಇಂಚ ಪಂಡಿನಿ ದಾಯೆಗಂದ್ಂಡ, ಯೇಸು, “ಓ ದೆವ್ವನೇ, ಇಂಬ್ಯನ್ ಬುಡ್ದು ಪೋಲ,” ಅಂದ್‌ದ್ ಪಂಡ್ದಿತ್ತೆ.

⁹ಬೊಕ್ಕ ಯೇಸು ಆಯಡ, “ನಿನ ಪುದರ್ ಎಂಚಿನ?” ಅಂದ್‌ದ್ ಕೇಂಡಿನೆಕ್ಕ್ ಆಯೆ, “ಎನ ಪುದರ್ ‘ದಂಡ್,’ ದಾಯೆಗಂದ್ಂಡ, ಎಂಕುಲು ಮಸ್ತ್ ಜನ ಉಲ್ಲ,” ಅಂದ್‌ದ್ ಪಂಡೆ.

¹⁰ಎಂಕ್ಲೆನ್ ಈ ಸೀಮೆಡ್ದ್ ಗಿಡ್ತ್ ಬುಡೊಡ್ಚಿ ಅಂದ್‌ದ್ ಆಯಡ ನಟ್ಟೊಂಡ.

¹¹ಅಲ್ಪ ಗುಡ್ಡೆದ ಪುಡೆಟ್ಟ್ ಪಂಜಿದ ಮಲ್ಲ ಪುಂಡು ಮೇಯೊಂದಿತ್ತ್‌ಂಡ್.

¹²ಆ ದೆವ್ವೊಲು, “ಪಂಜಿಲೆ ಗುಂಪುದುಲಯಿ ಸೇರೊನಿಯೆರೆ ಎಂಕ್ಲೆನ್ ಕಡಪುಡ್ದು ಕೊರ್ಲ,” ಅಂದ್‌ದ್ ನಟ್ಟೊಂಡ.

¹³ಅಪಗ ಯೇಸು ಐಕ್ಲೆಗ್ ಅಪ್ಪಣೆ ಕೊರಿಯೆ. ಬೊಕ್ಕ ದೆವ್ವೊಲು ಪಿದಯಿ ಬತ್ತ್‌ದ್ ಪಂಜಿಲೆ ಉಲಯಿ ಪೊಗ್ಗಿಯ; ಪಂಜಿಲು ಪಾರ್ದ್ ಸಂದ್ ಜಾಗ್‌ಲೆಡ್ದ್ ಪೋದು ಕಡಲ್ದ ಉಲಯಿ ಬೂರ್ದು ದಮ್ಮು ಕಟ್ಟ್‌ದ್ ಸೈತ. ಹೆಚ್ಚಿಕಡಿಮೆ ರಡ್ಡ್ ಸಾರ ಪಂಜಿಲು ಇತ್ತ.

¹⁴ಪಂಜಿಲೆನ್ ಮೇಪಾವುನಕುಲು ಪಾರ್‌ಪೋದು ಊರುಡ್ಲಾ ಹಳ್ಳಿಲೆಡ್ಲಾ ನಡತಿ ಸಂಗತಿನ್ ತೆರಿಪಾಯೆರ್. ಜನೊಕುಲು ನಡತಿ ಸಂಗತಿ ದಾನೆಂದ್ ತೂಯೆರೆ ಬತ್ತೆರ್.

¹⁵ಯೇಸು ಇತ್ತಿನಡೆಗ್ ಬತ್ತ್‌ದ್ ಆ ದಂಡ್ ಇನ್ಪಿ ದೆವ್ವ ಪತ್ತ್‌ದಿನಾಯೆ, ಕುಂಟು ಪಾಡೊಂದು ಸ್ವಸ್ಥ ಬುದ್ಧಿಡ್ ಕುಲ್ಲುದಿನೆನ್ ತೂದು ಪೋಡಿಯೆರ್.

¹⁶ನಡತಿ ಸಂಗತಿಲೆನ್ ತೂಯಿನಾಕುಲು ಆ ದೆವ್ವ ಪತ್ತ್‌ದಿನಾಯಗ್ ಇಂಚ ಆಂಡ್ ಪನ್ಪಿನೆನ್ಲಾ ಪಂಜಿಲೆ ಸಂಗತಿನ್ಲಾ ತೆರಿಪಾನಗ

¹⁷ಅಕುಲು ಯೇಸುನು, ತನ್ಕುಲೆ ಸೀಮೆನ್ ಬುಡ್ದು ಪೋವೊಡು ಅಂದ್‌ದ್ ನಟ್ಟೊಂಡೆರ್.

¹⁸ಆಯೆ ಓಡೊನು ಮಿತ್ತಾನಗ ಆ ದೆವ್ವ ಪತ್ತ್‌ದಿನಾಯೆ, “ಯಾನ್ ನಿನಡೊಪ್ಪ ಉಪ್ಪುವೆ,” ಅಂದ್‌ದ್ ಯೇಸುಡ ನಟ್ಟೊಂಡೆ.

¹⁹ಆಂಡ ಯೇಸು ಆಯನ್ ಲೆತ್ತೊಂದು ಪೋಯೆರೆ ಒಪ್ಪಿಯಂದೆ ಆಯಡ, “ಈ ನಿನ ಇಲ್ಲಡೆಗ್ ನಿನ್ನಾಕುಲೆ ಕೈತಲ್‌ ಪೋದು, ಸ್ವಾಮಿ ನಿಕ್ಕ್ ಕರುಣೆ ತೋಜಾದ್ ನಿಕ್ಕ್ ಎಂಚೆಂಚಿನ ಉಪಕಾರೊನು ಮಲ್ತ್‌ದೆ,” ಅಂದ್‌ದ್ ತೆರಿಪಾಲ.

²⁰ಆಯೆ ಅಲ್ಪಡ್ದ್ ಪೋದು, ಯೇಸು ತನ್ಕ್ ಮಲ್ತಿನ ಉಪಕಾರೊನು ದೆಕಪೊಲಿ ಸೀಮೆಲೆಡ್ ಸಾರಿಯೆರೆ ಸುರು ಮಲ್ತೆ. ಮಾತೆರ್ಲಾ ಅಚ್ಚಿರ ಆಯೆರ್.

²¹ಯೇಸು ಪಿರ ಓಡೊಡು ಈಯೆರೆಗ್ ಕಡತ್‌ದ್ ಬತ್ತಿ ಬೊಕ್ಕ ಜನೊಕುಲು ಮಲ್ಲ ಗುಂಪಾದ್ ಆಯನ ಸುತ್ತಲಾ ಕೂಡಿಯೆರ್. ಆಯೆ ಕಡಲ ಬರಿಟ್ಟಿತ್ತೆ.

²²ಅಪಗ ಸಭಾಮಂದಿರದ ಅಧಿಕಾರಿಲೆಡ್ ಯಾಯಿರೆ ಪನ್ಪಿನಾಯೆ ಬತ್ತ್‌ದ್, ಯೇಸುನು ತೂದು ಆಯನ ಕಾರ್‌ಗ್ ಅಡ್ಡಬೂರ್ದು,

²³“ಎನ ಎಲ್ಯ ಮಗಲ್ ಇತ್ತೆ ಸೈಪಿನಂಚ ಉಲ್ಲಲ್. ಆಲ್ ಗುಣ ಆದ್ ಬದುಕುಲೆಕ್ಕ ಈ ಬತ್ತ್‌ದ್ ಆಲೆನ ಮಿತ್ತ್ ಕೈ ದೀವೊಡು,” ಅಂದ್‌ದ್ ನಟ್ಟೊಂಡೆ.

²⁴ಯೇಸು ಆಯ ಒಟ್ಟುಗು ಪೋಯೆ. ಬೊಕ್ಕ ಮಸ್ತ್ ಜನೊಕುಲು ಆಯನ್ ನೂಕೊಂದು ಆಯನ ಬೆರಿಯೆ ಪೋಯೆರ್.

²⁵ಐಡ್ದ್ ಬೊಕ್ಕ ಅಲ್ಪ ಪದ್ರಾಡ್ ವರ್ಸೊಡ್ದಿಂಚಿ ನೆತ್ತೆರ್ ತಮೆಲು ಸೀಕ್‌ಡಿತ್ತಿ ಒಂಜಿ ಪೊಂಜೊವು ಬತ್ತಲ್.

²⁶ಆಲ್ ಮಸ್ತ್ ವೈದ್ಯೆರೆಡ್ದ್ ಮರ್ದ್ ಮಲ್ತ್‌ದ್ ಗುಣ ಆವಂದೆ ಬಾರಿ ಕಷ್ಟೊನು ಸಹಿಸೊಂದು ಕೈಟಿತ್ತಿ ಮಾತ ಕಾಸ್‌ನ್ ಕಳೆವೊಂಡಲ್. ಸೀಕ್ ಕಡಿಮೆ ಆವಂದೆ ಹೆಚ್ಚೊಂದೇ ಪೋಂಡು.

²⁷ಆ ಪೊಂಜೊವು ಯೇಸುನ ಸುದ್ಧಿನ್ ಕೇಂಡ್ದ್, “ಯಾನ್ ಆಯನ ಕುಂಟುನು ಮುಟ್ಟುಂಡ, ಎಂಕ್ ಗುಣ ಆವು,” ಎನ್ನ್‌ದ್, ಗುಂಪುದ ಪಿರವುಡು ಬತ್ತ್‌ದ್ ಆಯನ ಕುಂಟುನು ಮುಟ್ಟಿಯಲ್.

²⁸

²⁹ಮುಟ್ಟಿ ಕೂಡ್ಲೆ ಆಲೆನ ನೆತ್ತೆರ್ ಪೋಪಿನ ಉಂತುಂಡು. ಎಂಕ್ ಉಪದ್ರ ಮಲ್ತೊಂದಿತ್ತಿ ಸೀಕ್‌ಡ್ದ್ ಗುಣ ಆಂಡ್ ಅಂದ್‌ದ್ ಆಲ್ ಅಪಗನೇ ಶರೀರೊಡು ತೆರಿಯೊಂಡಲ್.

³⁰ಆ ಗಳಿಗೆಡೇ ಯೇಸು ತನಡ್ದ್ ಬಲ ಪಿದಾಡ್ದ್ ಪೋಂಡು ಅಂದ್‌ದ್ ಅಪಗನೆ ಪಿರ ತಿರ್ಗ್‌ದ್, “ಎನ ಕುಂಟುನು ಏರ್ ಮುಟ್ಟಿನಿ?” ಅಂದ್‌ದ್ ಕೇನ್ನಗ

³¹ಆಯನ ಶಿಷ್ಯೆರ್ ಆಯಡ, “ಜನೊಕುಲು ನಿನನ್ ಒತ್ತುನೆನ್ ತೂಂಡಲಾ ಎನನ್ ಏರ್ ಮುಟ್ಟಿನಿ ಅಂದ್‌ದ್ ಪನ್ಪನಾ?” ಪಂಡೆರ್.

³²ಆಂಡ ಯೇಸು ಉಂದೆನ್ ತೆರಿಯೊನೊಡು ಪಂಡ್ದ್ ಸುತ್ತಲಾ ತೂವೊಂದುಪ್ಪುನಗ,

³³ಆ ಪೊಂಜೊವು, ತನ್ಕ್ ಆಯಿನೆನ್ ತೆರಿದ್ ಪೋಡಿದ್ ನಡುಗೊಂದು ಬತ್ತ್‌ದ್ ಆಯ ದುಂಬು ಅಡ್ಡಬೂರ್ದು, ಆಲೆಗ್ ನಡತಿ ನಿಜ ಸತ್ಯೊನು ಪಂಡಲ್.

³⁴ಆಯೆ ಆಲೆಗ್, “ಮಗಲೇ, ನಿನ ನಂಬಿಕೆನೇ ನಿನನ್ ಗುಣ ಮಲ್ತ್ಂಡ್. ಸಮಾಧಾನೊಡು ಪೋಲ, ನನ ಮಿತ್ತ್ ಈ ಸೀಕ್ ನಿಕ್ಕ್ ತೊಂದರೆ ಕೊರಂದ್,” ಅಂದ್‌ದ್ ಪಂಡೆ.

³⁵ಆಯೆ ನನಲಾ ಪಾತೆರೊಂದುಪ್ಪುನಗ ಸಭಾಮಂದಿರದ ಅಧಿಕಾರಿನ ಇಲ್ಲದಾಕುಲು ಬತ್ತ್‌ದ್ ಅಧಿಕಾರಿಡ, “ನಿನ ಮಗಲ್ ಸೈತಲ್, ನನ ದಾಯೆಗ್ ಗುರುಕು ತೊಂದರೆ ಕೊರ್ಪ,” ಪಂಡೆರ್.

³⁶ಅಕುಲು ಪಂಡಿನ ಪಾತೆರೊನು ಯೇಸು ಲಕ್ಷ ಮಲ್ಪಂದೆ ಸಭಾಮಂದಿರದ ಅಧಿಕಾರಿಡ, “ಪೋಡ್ಯಡ, ನಂಬಿಕೆ ಮಾತ್ರ ಉಪ್ಪಡ್,” ಪಂಡೆ.

³⁷ಬೊಕ್ಕ ಆಯೆ ಪೇತ್ರೆ, ಯಾಕೋಬು, ಯಾಕೋಬುನ ಮೆಗ್ಯೆ ಆದುಪ್ಪು ಯೋಹಾನೆ ಮೊಕ್ಲೆನ್ ಅತ್ತಂದೆ ಬೇತೆ ಏರೆನ್ಲಾ ತನಡೊಪ್ಪ ಲೆತ್ತೊಂದು ಪೋಯೆರೆ ಒಪ್ಪಿಗೆ ಕೊರ್ಜೆ.

³⁸ಅಕುಲು ಆ ಸಭಾಮಂದಿರದ ಅಧಿಕಾರಿನ ಇಲ್ಲಗ್ ಬನ್ನಗ ಆಯೆ, ಜನೊಕುಲು ಗೌಜಿ ಮಲ್ಪುನೆನ್, ಬೊಕ್ಕ ಅರಬಾಯಿ ದೀಪಿನಾಕುಲೆನ್ಲಾ ಬುಲ್ಪುನಾಕಲೆನ್ಲಾ ತೂಯೆ.

³⁹ಆಯೆ ಉಲಯಿ ಪೋದು, “ನಿಕುಲು ದಾಯೆಗ್ ಈತ್ ಗೌಜಿ ಮಲ್ತೊಂದು ಬುಲ್ತೊಂದುಲ್ಲರ್? ಪೊಣ್ಣು ಸೈದಿಜಲ್, ನಿದ್ರೆ ಮಲ್ತೊಂದು ಉಲ್ಲಲ್,” ಪನ್ನಗ

⁴⁰ಅಕುಲು ಆಯಗ್ ಗೇಲಿ ಮಲ್ತೆರ್. ಆಂಡ ಆಯೆ ಮಾತೆರೆನ್ಲಾ ಪಿದಯಿ ಕಡಪುಡ್ದು, ಆ ಪೊಣ್ಣನ ಅಪ್ಪೆನ್ಲಾ ಅಮ್ಮೆರೆನ್ಲಾ ತನಡೊಪ್ಪ ಇತ್ತಿನಾಕುಲೆನ್ಲಾ ಆ ಪೊಣ್ಣು ಜೆತ್ತ್‌ದಿನಡೆಗ್ ಲೆತ್ತೊಂದು ಪೋಯೆ.

⁴¹ಆ ಪೊಣ್ಣನ ಕೈ ಪತ್ತ್‌ದ್ ಆಲೆಡ, “ತಲಿಥಾ ಕೂಮ್,” ಅಂದ್‌ದ್ ಪಂಡೆ. “ಎಲ್ಯ ಪೊಣ್ಣೇ, ಲಕ್ಕ್‌ಲ,” ಅಂದ್‌ದ್ ನಿಕ್ಕ್ ಪನ್ಪೆ ಇನ್ಪಿನವು ಈ ಪಾತೆರದ ಅರ್ಥ.

⁴²ಅಪಗನೇ, ಆ ಪೊಣ್ಣು ಲಕ್ಕ್‌ದ್ ನಡಪೆರೆ ಸುರು ಮಲ್ತಲ್. ಆಲ್ ಪದ್ರಾಡ್ ವರ್ಸ ಪ್ರಾಯದಾಲ್. ಉಂದೆನ್ ತೂದು ಮಾತೆರ್ಲಾ ಅಚ್ಚಿರ ಆಯೆರ್.

⁴³ಯೇಸು ಅಕ್ಲೆಡ ಈ ವಿಷಯ ಏರೆಗ್ಲಾ ತೆರಿಯೆರೆ ಬಲ್ಲಿ ಪಂಡ್ದ್ ಕಂಡಿತಾದ್ ಅಪ್ಪಣೆ ಕೊರ್ದು, “ಆ ಪೊಣ್ಣಗ್ ವಣಸ್ ಮಲ್ಪಾಲೆ,” ಅಂದ್‌ದ್ ಪಂಡೆ.