Read Tulu ಮಾರ್ಕೆ 8 Bible Online

ಮಾರ್ಕೆ 8 - Tulu bible

ಮಾರ್ಕೆ 8

¹ಆ ದಿನೊಕುಲೆಡ್ ಜನೊಕುಲು ಕುಡ ಗುಂಪು ಕಟ್ಟೊಂದು ಬತ್ತೆರ್. ಅಪಗ ಅಕ್ಲೆಡ ತಿನಿಯೆರೆ ದಾಲಾ ಇಜ್ಜಂದಿನೆಡ್ದ್ ಯೇಸು ತನ ಶಿಷ್ಯೆರೆನ್ ಕೈತಲ್‌ ಲೆತ್ತ್‌ದ್,

²ಅಕ್ಲೆಡ ಪಂಡಿನಿ, “ಈ ಜನೊಕುಲೆನ್ ತೂದು ಕನಿಕರ ಆಪುಂಡು. ಮೊಕುಲು ಎನ ಕೈತಲ್‌ ಬತ್ತ್‌ದ್ ಮೂಜಿ ದಿನ ಆಪುಂಡು. ಮೊಕ್ಲೆಗ್ ವಣಸ್‌ಗ್ ದಾಲಾ ಇಜ್ಜಿ.

³ಮೊಕ್ಲೆನ್ ಉಪವಾಸೊಡು ಇಲ್ಲಗ್ ಕಡಪುಡುಂಡ ಸಾದಿಡ್ ಬರೆಲ್ದ್ ಪೋವೆರ್, ದಾಯೆಗಂದ್ಂಡ, ಮೊಕ್ಲೆಡ್ ಕೆಲೆವೆರ್ ದೂರೊಡ್ದು ಬೈದೆರತ್ತಾ,” ಅಂದ್‌ದ್ ಪಂಡಿನೆಕ್ಕ್,

⁴ಶಿಷ್ಯೆರ್, “ಈ ಕಾಡ್‌ಡ್ ಮೊಕ್ಲೆಗ್ ಬೋಡಿತ್ತಿನಾತ್ ರೊಟ್ಟಿಲೆನ್ ಒಲ್ತುಡ್ದು ಕನವೊಲಿ?” ಪಂಡೆರ್.

⁵ಆಯೆ, “ನಿಕ್ಲೆಡ ಏತ್ ರೊಟ್ಟಿಲು ಉಂಡು,” ಪಂಡ್ದ್ ಅಕ್ಲೆಡ ಕೇಂಡಿನೆಕ್ಕ್, “ಏಳ್ ಉಂಡು,” ಪಂಡೆರ್.

⁶ಅಪಗ ಯೇಸು ಜನೊಕುಲೆ ಗುಂಪುಗು ನೆಲತ್ತ ಮಿತ್ತ್ ಕುಲ್ಲೆರೆ ಅಪ್ಪಣೆ ಕೊರಿಯೆ. ಆ ಏಳ್ ರೊಟ್ಟಿನ್ ದೆತ್ತೊಂದು, ದೇವೆರೆನ್ ಸುಗಿತ್‌ದ್, ರೊಟ್ಟಿನ್ ಪೊಲ್ತುದು, ಪಟ್ಟೆರೆಗಾದ್ ತನ ಶಿಷ್ಯೆರೆ ಕೈಕ್ ಕೊರಿಯೆ. ಅಕುಲು ಗುಂಪುದಾಕುಲೆಗ್ ಪಟ್ಟ್‌ದ್ ಕೊರಿಯೆರ್.

⁷ಉಂದತ್ತಂದೆ ಅಕ್ಲೆಡ ಕೆಲವು ಎಲ್ಯ ಮೀನ್‌ಲಾ ಇತ್ತ್ಂಡ್. ಅವೆನ್ಲಾ ಆಯೆ ದೆತ್ತೊಂದು, ಸುಗಿತ್‌ದ್, ಉಂದೆನ್ಲಾ ಪಟ್ಟ್‌ದ್ ಕೊರ್ಲೆ ಅಂದ್‌ದ್ ಶಿಷ್ಯೆರೆಗ್ ಪಂಡೆ.

⁸ಅಕುಲು ವಣಸ್ ಮಲ್ತ್‌ದ್ ಬಂಜಾರ ಆಯೆರ್. ಒರಿದಿನ ತುಂಡುಲೆನ್ ಒಟ್ಟು ಮಲ್ಪುನಗ ಏಳ್ ಪುಡಯಿ ದಿಂಜಿಂಡ್.

⁹ಅವುಲು ವಣಸ್ ಮಲ್ತಿನಾಕುಲು ಹೆಚ್ಚಿಕಡಿಮೆ ನಾಲ್ ಸಾರ ಅಂಜೊವುಲು ಇತ್ತೆರ್.

¹⁰ಬೊಕ್ಕ ಆಯೆ ಅಕ್ಲೆನ್ ಕಡಪುಡ್ದು ಕೊರ್ದು ಅಪಗನೆ ತನ ಶಿಷ್ಯೆರೆನ್ ಲೆತ್ತೊಂದು, ಓಡೊನು ಮಿತ್ತಾರ್ದ್, ದಲ್ಮನೂಥ ಸೀಮೆಗ್ ಬತ್ತೆ.

¹¹ಐಡ್ದ್ ಬೊಕ್ಕ ಪರಿಸಾಯೆರ್ ಬತ್ತ್‌ದ್ ಆಯಡ ತರ್ಕ ಮಲ್ತೊಂದು, ಪರೀಕ್ಷೆ ಮಲ್ಪೆರೆಗಾದ್, ಈ ಬಾನೊಡು ಒಂಜಿ ಗುರ್ತ ತೋಜಾದ್ ಕೊರೊಡು ಅಂದ್‌ದ್ ಕೇನ್ನಪಗ

¹²ಯೇಸು ತನ ಆತ್ಮೊಡು ಬೇಜಾರಾದ್, “ಈ ಸಂತಾನ ಗುರ್ತೊನು ಬಯಕುನು ದಾಯೆಗ್? ನಿಕ್ಲೆಗ್ ನಿಜಾದ್ ಪನ್ಪೆ, ಈ ಸಂತಾನೊಗು ವಾ ಗುರ್ತಲಾ ತಿಕ್ಕಂದ್.” ಅಂದ್‌ದ್ ಪಂಡೆ.

¹³ಬೊಕ್ಕ ಅಕ್ಲೆನ್ ಬುಡ್ದು ಪಿರ ಓಡೊನು ಮಿತ್ತಾರ್ದ್ ಆಪೆ ಬರಿಕ್ಕ್ ಪೋಯೆ.

¹⁴ಶಿಷ್ಯೆರ್ ರೊಟ್ಟಿದ ಬುತ್ತಿ ಕಟ್ಟೊನಿಯೆರೆ ಮದತೆರ್. ಓಡೊಡು ಅಕ್ಲೆಡ ಒಂಜೇ ಒಂಜಿ ರೊಟ್ಟಿ ಮಾತ್ರ ಇತ್ತ್ಂಡ್.

¹⁵ಬೊಕ್ಕ ಯೇಸು ಅಕ್ಲೆಡ, “ಜಾಗ್ರತೆಡುಪ್ಪುಲೆ! ಪರಿಸಾಯೆರೆ ಬೊಕ್ಕ ಹೆರೋದನ ಪುಳಿಬಂದದ ಸಂಗತಿಡ್ ಎಚ್ಚರಿಕೆ ಆದುಪ್ಪುಲೆ,” ಅಂದ್‌ದ್ ಕಂಡಿತಾದ್ ಪನ್ನಗ

¹⁶ಅಕುಲು, “ನಮಡ ರೊಟ್ಟಿ ಇಜ್ಜಂದಿನೆಡ್ದೇ ಆಯೆ ಇಂಚ ಪನೊಂದುಲ್ಲೆ,” ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್.

¹⁷ಉಂದೆನ್ ತೆರಿದ್ ಯೇಸು, “ರೊಟ್ಟಿ ಇಜ್ಜತ್ತಾ ಪಂಡ್ದ್, ನಿಕ್ಲೆ ಉಲಯಿ ದಾಯೆಗ್ ಪಾತೆರುವರ್? ನಿಕ್ಲೆಗ್ ನನಲಾ ತೆರಿಯುಜಾ? ಅರ್ಥ ಆಪುಜ? ನಿಕ್ಲೆನ ಉಡಲ್ ಕಲ್ಲಾತ್ತ್‌ಂಡಾ?

¹⁸ನಿಕ್ಲೆಗ್ ಕಣ್ಣ್ ಇತ್ತ್‌ದ್‌ಲಾ ತೂಪುಜರಾ? ಕೆಬಿ ಇತ್ತ್‌ದ್‌ಲಾ ಕೇನುಜರಾ? ನಿಕ್ಲೆಗ್ ನೆನೆಪುಲಾ ಇಜ್ಜಾ?

¹⁹ಯಾನ್ ಐನ್ ರೊಟ್ಟಿ ಪೊಲ್ತುದು ಐನ್ ಸಾರ ಜನೊಕುಲೆಗ್ ಪಟ್ಟಿನಪಗ ತಿನಂದೆ, ಒರಿದಿನ ತುಂಡುಲೆಡ್, ಏತ್ ಪುಡಯಿ ಒಟ್ಟು ಮಲ್ತರ್?” ಅಂದ್‌ದ್ ಕೇಂಡಿನೆಕ್ಕ್ ಅಕುಲು, “ಪದ್ರಾಡ್,” ಪಂಡೆರ್.

²⁰“ಬೊಕ್ಕ ಆ ಏಳ್ ರೊಟ್ಟಿ ನಾಲ್ ಸಾರ ಜನೊಕುಲೆಗ್ ಪಟ್ಟಿನಪಗ, ಒರಿದಿನ ತುಂಡುಲೆಡ್, ಏತ್ ಪುಡಯಿ ಒಟ್ಟು ಮಲ್ತರ್?” ಅಂದ್‌ದ್ ಕೇಂಡಿನೆಕ್ಕ್ ಅಕುಲು, “ಏಳ್,” ಪಂಡೆರ್.

²¹ಅಪಗ ಯೇಸು ಅಕ್ಲೆಡ, “ನಿಕ್ಲೆಗ್ ನನಲಾ ಅರ್ಥ ಆಪುಜ,” ಅಂದ್‌ದ್ ಪಂಡೆ

²²ಬೊಕ್ಕ ಅಕುಲು ಬೆತ್ಸಾಯಿದ ಊರುಗು ಬತ್ತೆರ್. ಅಲ್ಪ ಜನೊಕುಲು ಒರಿ ಕುರುಡನ್ ಯೇಸುನ ಕೈತಲ್‌ ಲೆತ್ತೊಂದು ಬತ್ತ್‌ದ್, ಆಯನ್ ಮುಟ್ಟೊಡು ಅಂದ್‌ದ್ ಆಯಡ ನಟ್ಟೊಂಡೆರ್.

²³ಆಯೆ ಕುರುಡನ ಕೈ ಪತ್ತ್‌ದ್, ಊರುದ ಪಿದಯಿ ಲೆತ್ತೊಂದು ಪೋದು, ಆಯನ ಕಣ್ಣ್‌ಗ್ ಉಬ್ಬಿದ್, ಆಯನ ಮಿತ್ತ್ ಕೈ ದೀದ್, “ನಿಕ್ಕ್ ದಾದಾಂಡಲಾ ತೋಜುಂಡಾ?” ಅಂದ್‌ದ್ ಆಯಡ ಕೇಂಡೆ.

²⁴ಆಯೆ ತರೆ ದೆರ್ತ್ತ್‌ದ್ ತೂದು, “ಅಂದ್, ಎಂಕ್ ಜನೊಕುಲು ತೋಜುವೆರ್. ಅಕುಲು ನಡಪುನ ಮರತ ಲೆಕ್ಕ ತೋಜುವೆರ್,” ಅಂದ್‌ದ್ ಪಂಡೆ.

²⁵ಕುಡ ಯೇಸು ಆಯನ ಕಣ್ಣ್‌ದ ಮಿತ್ತ್ ಕೈ ದೀಯೆ. ಆಯೆ ಆಯನ ಕಣ್ಣ್ ಬುಡ್ದು ತೂನಗ ಆಯಗ್ ಗುಣ ಆದಿತ್ತ್ಂಡ್. ಬೊಕ್ಕ ಆಯಗ್ ಮಾತಲಾ ಸರಿಯಾದ್ ತೋಜ್ಂಡ್.

²⁶ಐಡ್ದ್ ಬೊಕ್ಕ ಯೇಸು, “ಈ ಊರುದುಲಯಿ ಪೋವೊಡ್ಚಿ,” ಪಂಡ್‌ದ್ ಆಯನ್ ಆಯನ ಇಲ್ಲಗ್ ಕಡಪುಡಿಯೆ.

²⁷ಯೇಸುಲಾ ಆಯನ ಶಿಷ್ಯೆರ್‌ಲಾ ಫಿಲಿಪ್ಪಿ ಕೈಸರೆಯ ಪನ್ಪಿ ಪಟ್ಟಣಲೆಡ್ ಸೇರ್ದಿನ ಗ್ರಾಮೊಲೆಗ್ ಪಿದಾಡಿಯೆರ್. ಸಾದಿಡ್ ಆಯೆ ತನ ಶಿಷ್ಯೆರೆಡ, “ಜನೊಕುಲು, ಎನನ್ ಏರ್ ಅಂದ್‌ದ್ ಪನ್ಪೆರ್?” ಅಂದ್‌ದ್ ಕೇಂಡಿನೆಕ್ಕ್

²⁸ಅಕುಲು ಆಯಡ, “ನಿನನ್ ಕೆಲೆವೆರ್ ಸ್ನಾನಿಕೆ ಯೋಹಾನೆ, ಪನ್ಪೆರ್. ಕೆಲೆವೆರ್ ಎಲೀಯೆ ಪನ್ಪೆರ್, ನನ ಕೆಲೆವೆರ್ ಪ್ರವಾದಿಲೆಡ್ ಒರಿ ಪನ್ಪೆರ್,” ಅಂದ್‌ದ್ ಪಂಡೆರ್.

²⁹ಆಯೆ ಅಕ್ಲೆಡ, “ಆಂಡ ನಿಕುಲು ಎನನ್ ಏರ್ ಅಂದ್‌ದ್ ಪನ್ಪರ್?” ಅಂದ್‌ದ್ ಕೇನ್ನಗ ಪೇತ್ರೆ, “ಈ ಬರೊಡಾಯಿನ ಕ್ರಿಸ್ತೆ,” ಅಂದ್‌ದ್ ಉತ್ತರ ಕೊರಿಯೆ.

³⁰ಐಕ್ ಆಯೆ, “ಎನ ಸಂಗತಿಡ್ ಏರೆಗ್ಲಾ ಪನಡೆ,” ಅಂದ್‌ದ್ ಶಿಷ್ಯೆರೆಗ್ ಕಂಡಿತಾದ್ ಪಂಡೆ.

³¹ಉಂದತ್ತಂದೆ, “ನರಮಾನಿ ಮಗೆ ಮಸ್ತ್ ಕಷ್ಟ ಅನುಭವ ಮಲ್ತ್‌ದ್ ಹಿರಿಯೆರೆಡ್ದ್‌ಲಾ ಪ್ರಧಾನಯಾಜಕೆರೆಡ್ದ್‌ಲಾ ಶಾಸ್ತ್ರಿಲೆಡ್ದ್‌ಲಾ ತಿರಸ್ಕಾರ ಮಲ್ತ್‌ದ್ ಕೆರ್ವೆರ್. ಮೂಜಿ ದಿನೊಡ್ದು ಬೊಕ್ಕ ಜೀವ ಆದ್ ಲಕ್ಕುವೆ,” ಅಂದ್‌ದ್ ಬೋಧನೆ ಕೊರಿಯೆರೆ ಸುರು ಮಲ್ತೆ.

³²ಆಯೆ ಈ ಪಾತೆರೊನು ಸ್ಪಷ್ಟಾದ್ ಪಂಡೆ. ಅಪಗ ಪೇತ್ರೆ ಆಯನ ಕೈ ಪತ್ತ್‌ದ್ ಬರಿಕ್ಕ್ ಲೆತ್ತ್‌ದ್ ಈ ಇಂಚ ಪನ್ಪಿನವು ಸರಿ ಅತ್ತ್ ಅಂದ್‌ದ್ ದಟ್ಟಿಯೆರೆ ಸುರು ಮಲ್ತೆ.

³³ಯೇಸು ಪಿಜಿರ್‌ದ್ ತನ ಶಿಷ್ಯೆರೆನ್ ತೂದು ಪೇತ್ರನ್ ದಟ್ಟಿದ್, “ಸೈತಾನ, ಎನ ದುಂಬು ಉಂತಡ, ನಿನ ಆಲೋಚನೆ ನರಮಾನಿನ ಆಲೋಚನೆ ಅತ್ತಂದೆ, ದೇವೆರೆನವು ಅತ್ತ್.”

³⁴ಬೊಕ್ಕ ಆಯೆ ತನ ಶಿಷ್ಯೆರೆಡೊಪ್ಪ ಜನೊಕುಲೆ ಗುಂಪುನು ಕೈತಲ್‌ ಲೆತ್ತ್‌ದ್, ಅಕ್ಲೆಡ ಪಂಡಿನಿ ದಾನೆಂದ್ಂಡ, “ಏರೆಗಾಂಡಲಾ ಎನ ಬೆರಿಯೆ ಬರಿಯೆರೆ ಮನಸಿತ್ತ್‌ಂಡ ಆಯೆ ತನನ್ ತಾನ್ ತಿರಸ್ಕಾರ ಮಲ್ತ್‌ದ್ ತನ ಕ್ರುಸ್ಸುನು ತುಂಬೊಂದು ಎನ ಬೆರಿಯೆ ಬರಡ್.

³⁵ತನ ಪ್ರಾಣೊನು ಒರಿಪಾವೊಡು ಅಂದ್‌ದ್ ಉಪ್ಪುನಾಯೆ ಅವೆನ್ ಕಳೆವೊನ್ವೆ, ಆಂಡ ಎಂಕಾದ್‌ಲಾ ಸುವಾರ್ತೆಗಾದ್‌ಲಾ ತನ ಪ್ರಾಣೊನು ಕಳೆವೊಂಡಿನಾಯೆ ಅವೆನ್ ಒರಿಪಾವೊನ್ವೆ.

³⁶ಒರಿ ನರಮಾನಿ ಇಡೀ ಲೋಕೊನು ಸಂಪಾದನೆ ಮಲ್ತೊಂಡೆಡಲಾ ತನ ಪ್ರಾಣೊನು ಹಾಳ್ ಮಲ್ತೊಂಡೆಡ ಆಯಗ್ ದಾದ ಪ್ರಯೋಜನ ಉಂಡು?

³⁷ಒರಿ ತನ ಪ್ರಾಣೊಗು ಎಂಚಿನ ಪಗತೆ ಕೊರೊಲಿ?

³⁸ವ್ಯಭಿಚಾರಿಲೆಕ್ಕ ಉಪ್ಪು ಈ ಪಾಪಿಷ್ಟ ಸಂತಾನೊಡು, ಏರಾಂಡಲಾ ಎನನ್ ಬೊಕ್ಕ ಎನ ಪಾತೆರೊಗು ನಾಚಿಗೆ ಮಲ್ತೊನುವೆನಾ ಆಯಗ್ ನರಮಾನಿ ಮಗೆಲಾ ತಾನ್ ತನ ಅಮ್ಮೆರೆನ ಮೈಮೆಡ್ ಪರಿಶುದ್ಧ ದೂತೆರೆಡೊಪ್ಪ ಬನ್ನಗ ನಾಚಿಗೆ ಮಲ್ಪೆ,” ಅಂದ್‌ದ್ ಪಂಡೆ.