Read Tulu ಮಾರ್ಕೆ 9 Bible Online

ಮಾರ್ಕೆ 9 - Tulu bible

ಮಾರ್ಕೆ 9

¹ಬೊಕ್ಕ ಯೇಸು ಅಕ್ಲೆಡ, “ನಿಕ್ಲೆಗ್ ನಿಜಾದ್ ಪನ್ಪೆ, ಮುಲ್ಪ ಉಂತುದಿನಾಕುಲೆಡ್ ಕೆಲೆವೆರ್ ದೇವೆರೆ ರಾಜ್ಯ ಬಲೊಟು ಬರ್ಪಿನೆನ್ ತೂವ ಮುಟ್ಟ, ಸೈಪುಜರ್,” ಅಂದ್‌ದ್ ಪಂಡೆ.

²ಆಜಿ ದಿನೊಡ್ದು ಬೊಕ್ಕ ಯೇಸು ಪೇತ್ರೆ, ಯಾಕೋಬೆ, ಯೋಹಾನೆ ಮೊಕ್ಲೆನ್, ಪ್ರತ್ಯೇಕಾದ್ ಒಂಜಿ ಎತ್ತರ ಗುಡ್ಡೆಗ್ ಲೆತ್ತೊಂದು ಪೋಯೆ. ಅಲ್ಪ ಅಕ್ಲೆನ ಕಣ್ಣೆದುರುಡು ಆಯನ ರೂಪ ಬೇತೆ ಆಂಡ್.

³ಆಯನ ಕುಂಟು ಮಿಂಚಿದ್ ಹಿಮತ್ತಲೆಕ್ಕ ಬೊಲ್ದಾಂಡ್. ಭೂಲೋಕೊದ ವಾ ಡೋಬಿದಾಯೆಗ್ಲಾ ಆತ್ ಬೊಲ್ದು ಮಲ್ಪೆರೆ ಆವಂದ್.

⁴ಬೊಕ್ಕ ಎಲೀಯೆಲಾ ಮೋಶೆಲಾ ಅಕ್ಲೆಗ್ ತೋಜಿದ್ ಬತ್ತ್‌ದ್ ಯೇಸುಡೊಪ್ಪ ಪಾತೆರೊಂದುಪ್ಪುನೆನ್ ಶಿಷ್ಯೆರ್ ತೂಯೆರ್.

⁵ಅಪಗ ಪೇತ್ರೆ ಯೇಸುಡ, “ಗುರೂ ನಮ ಮೂಲೇ ಉಪ್ಪುನವು ಎಡ್ಡೆ, ಮೂಜಿ ಗುಡಾರ ಕಟ್ಟ್‌ಗ, ನಿಕ್ಕೊಂಜಿ, ಮೋಶೆಗೊಂಜಿ, ಎಲೀಯಗೊಂಜಿ,” ಅಂದ್‌ದ್ ಪಂಡೆ.

⁶ತಾನ್ ಎಂಚಿನ ಪಾತೆರುವೆ ಅಂದ್‌ದ್ ಆಯಗ್ ತೆರಿದಿತ್ತಿಜಿ, ದಾಯೆಗ್ ಪಂಡ ಅಕುಲು ಬಾರಿ ಪೋಡಿದಿತ್ತೆರ್.

⁷ಆತ್‌ನೆಟ್ಟ ಮುಗಲ್ ಬತ್ತ್‌ದ್ ಅಕ್ಲೆನ ಮಿತ್ತ್ ನಿರೆಲಾಂಡ್. ಆ ಮುಗಲ್‌ದ ಉಲಯಿಡ್ದ್, “ಇಂಬೆ ಎನ ಪ್ರೀತಿದ ಮಗೆ, ಆಯನ ಪಾತೆರೊನು ಕೇನ್ಲೆ.” ಅಂದ್‌ದ್ ಒಂಜಿ ಮಲ್ಲ ಸ್ವರ ಆಂಡ್.

⁸ಅಪಗ ಸುತ್ತಲಾ ತೂನಗ, ಯೇಸು ಅತ್ತಂದೆ ಬೇತೆ ಏರೆನ್ಲಾ ತೂಯಿಜೆರ್.

⁹ಅಕುಲು ಆ ಗುಡ್ಡೆಡ್ದ್ ಜತ್ತ್‌ದ್ ಬರೊಂದುಪ್ಪುನಗ ಆಯೆ ಅಕ್ಲೆಗ್, “ನಿಕುಲು ತೂಯಿನೆನ್ ನರಮಾನಿ ಮಗೆ ಸೈತ್‌ದ್ ಜೀವಾದ್ ಲಕ್ಕ್‌ದ್ ಬನ್ನೆಟ್ಟ ಏರೆಗ್ಲಾ ತೆರಿಪಾವರೆ ಬಲ್ಲಿ,” ಅಂದ್‌ದ್ ಅಪ್ಪಣೆ ಕೊರಿಯೆ.

¹⁰ಅಕುಲು ಆ ಪಾತೆರೊನು ತನ್ಕುಲೆ ಉಲಯಿ ದೀವೊಂಡೆರ್. “ಸೈತ್‌ದ್ ಜೀವಾದ್ ಲಕ್ಕುನು ಪಂಡ ದಾದ?” ಅಂದ್‌ದ್ ಒರಿಯಗ್ ಒರಿ ಪಾತೆರೊಂಡೆರ್.

¹¹ಬೊಕ್ಕ ಅಕುಲು, “ಎಲೀಯೆ ಸುರುಟ್ಟು ಬರ್ಪಿನವು ಅಗತ್ಯ ಅಂದ್‌ದ್ ಶಾಸ್ತ್ರಿಲು ದಾಯೆಗ್ ಪನ್ಪೆರ್?” ಆಯಡ ಕೇಂಡೆರ್.

¹²ಐಕ್ ಯೇಸು ಅಕ್ಲೆಡ, “ಎಲೀಯೆ ಸುರುಟ್ಟು ಬತ್ತ್‌ದ್ ಮಾತೆನ್ ಸರಿ ಮಲ್ಪುನವು ನಿಜ. ಬೊಕ್ಕ ನರಮಾನಿ ಮಗೆ ಬಾರಿ ಕಷ್ಟೊನು ಸಹಿಸೊಂದು ತಿರಸ್ಕಾರ ಆವೊಡು ಅಂದ್‌ದ್ ಶಾಸ್ತ್ರೊಡು ದಾಯೆಗ್ ಬರೆತ್ಂಡ್?

¹³ಆಂಡ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ, ಎಲೀಯೆ ಬತ್ತೆ, ಶಾಸ್ತ್ರೊಡು ಬರೆದುಪ್ಪುನ ಪ್ರಕಾರ ಜನೊಕುಲು ತನ್ಕುಲೆ ಮನಸ್‌ಗ್ ಬತ್ತಿಲೆಕ್ಕ ಆಯಗ್ ಮಲ್ತೆರ್,” ಅಂದ್‌ದ್ ಪಂಡೆ.

¹⁴ಐಡ್ದ್ ಬೊಕ್ಕ ಒರಿದಿ ಶಿಷ್ಯೆರೆನ ಕೈತಲ್‌ ಬನ್ನಗ, ಸುತ್ತಲಾ ಜನೊಕುಲು ಬೊಕ್ಕ ಶಾಸ್ತ್ರಿಲು ಮಲ್ಲ ಗುಂಪುಡು ಉಂತುದು ಅಕ್ಲೆಡ ಚರ್ಚೆ ಮಲ್ಪುನೆನ್ ತೂಯೆರ್.

¹⁵ಅಪಗನೆ ಜನೊಕುಲೆ ಗುಂಪು ಯೇಸುನು ತೂದು, ಬಾರಿ ಅಚ್ಚಿರ ಆದ್, ಆಯನ ಕೈತಲ್‌ ಪಾರ್‌ಪೋದು, ಆಯಗ್ ವಂದನೆ ಮಲ್ತೆರ್.

¹⁶ಯೇಸು ಶಿಷ್ಯೆರೆಗ್, “ಮೊಕ್ಲೆಡೊಪ್ಪ ದಾದ ಚರ್ಚೆ ಮಲ್ತೊಂದುಲ್ಲರ್?” ಅಂದ್‌ದ್ ಕೇಂಡೆ.

¹⁷ಆ ಗುಂಪುಡ್ದು ಒರಿ, “ಬೋಧಕಾ, ಎನ ಮಗನ್ ನಿನ ಕೈತಲ್‌ ಲೆತ್ತೊಂದು ಬತ್ತೆ. ಆಯನ್ ಒಂಜಿ ಬಾಯಿಬರಂದಿ ದೆವ್ವ ಪತ್ತ್‌ದ್ಂಡ್.

¹⁸ಅವು ಆಯನ ಮಿತ್ತ್ ಬತ್ತ್ಂಡ ಆಯನ್ ನೆಲಕ್ ಬೂರ್ಪಾವುಂಡು. ಅಪಗ ಆಯೆ ನುರೆ ಜಪುಡಾವೊಂದು ಕಟಕಟ ಕೂಲಿ ಕಡೆವೊಂದು ಮರಕಟ್ಟ್‌ದ್ ಪೋಪೆ. ಅವೆನ್ ನಿನ ಶಿಷ್ಯೆರೆಡ ಬುಡ್ಪಾವೆರೆ ಪಂಡೆ. ಆಂಡ ಅಕ್ಲೆಡ್ದ್ ಆವಂದೆ ಪೋಂಡು.” ಅಂದ್‌ದ್ ಉತ್ತರ ಕೊರಿಯೆ.

¹⁹ಐಕ್ ಆಯೆ, “ಓ! ನಂಬಿಕೆದಾಂತಿ ಸಂತಾನೊಲೇ, ನನ ಏತ್ ದಿನ ಯಾನ್ ನಿಕ್ಲೆಡೊಪ್ಪ ಇತ್ತ್‌ದ್ ನಿಕ್ಲೆನ್ ಸಹಿಸೊನೊಡು? ಆಯನ್ ಎನ ಕೈತಲ್‌ ಕನಲೆ.” ಪಂಡೆ

²⁰ಅಪಗ ಅಕುಲು ಆ ಆಣನ್ ಯೇಸು ಕೈತಲ್‌ ಲೆತ್ತೊಂದು ಬತ್ತೆರ್. ಆಯನ್ ತೂಯಿ ಕೂಡ್ಲೆ, ಆ ದೆವ್ವ ಆ ಆಣನ್ ಮಸ್ತ್ ಒದ್ದಾಡ್ಪಾಂಡ್, ಆಯೆ ನೆಲಕ್ ಬೂರ್ದು, ನುರೆ ಜಪುಡಾವೊಂದು ಪೊರೆಲಿಯೆ.

²¹ಯೇಸು ಆಯನ ಅಮ್ಮೆರೆಡ, “ಉಂದು ಉಂಬ್ಯಗ್ ಏತ್ ಸಮಯೊಡ್ದಿಂಚಿ ಉಂಡು?” ಅಂದ್‌ದ್ ಕೇನ್ನಗ, ಆಯೆ ಪಂಡಿನಿ, “ಎಲ್ಯ ಬಾಲೆಡ್ದಿಂಚಿ ಉಂಡು.

²²ಬೊಕ್ಕ ಉಂಬ್ಯನ್‌ ಕೆರೊಡು ಅಂದ್‌ದ್ ಅಪಗಪಗ, ತೂಟುಲಾ ನೀರ್‌ಡ್ಲಾ ಬೂರ್ಪಾವುಂಡು. ನಿನಡ ಸಾದ್ಯ ಇತ್ತ್ಂಡ, ಎಂಕ್ಲೆನ ಮಿತ್ತ್ ಕನಿಕರ ದೀದ್ ಎಂಕ್ಲೆಗ್ ಸಹಾಯ ಮಲ್ಪುಲ,” ಪಂಡೆ

²³ಯೇಸು ಆಯಡ, “ನಿನಡ ಸಾದ್ಯ ಇತ್ತ್ಂಡ ಅಂದ್‌ದ್ ಪನ್ಪನಾ? ನಂಬುನಾಯಗ್ ಮಾತಲಾ ಸಾದ್ಯ,” ಅಂದ್‌ದ್ ಪಂಡೆ.

²⁴ಕೂಡ್ಲೆ ಆ ಆಣನ ಅಮ್ಮೆ, “ಯಾನ್ ನಿನನ್ ನಂಬುವೆ, ಎಂಕ್ ನಂಬಿಕೆ ಕಡಿಮೆ ಇತ್ತ್ಂಡಲಾ ಸಹಾಯ ಮಲ್ಪು.” ಅಂದ್‌ದ್ ಬುಲ್ತುದು ಪಂಡೆ.

²⁵ಅಪಗ ಯೇಸು ಜನೊಕುಲು ಗುಂಪು ಕಟ್ಟೊಂದು ಬಲ್ತೊಂದು ಅಕ್ಲೆನ ಕಡೆಕ್ಕ್ ಬರ್ಪಿನೆನ್ ತೂದು, ಆ ದೆವ್ವೊಗು ದಟ್ಟಿದ್, “ಓ ಕೆಬಿ ಕೇನಂದಿ ಕೆಪ್ಪ ಆತ್ಮಾ, ಇಂಬ್ಯನ್ ಬುಡ್ದು ಪೋಲ, ನನ ಆಯನ ಉಲಯಿ ಬರಡ,” ಯಾನ್ ನಿಕ್ಕ್ ಅಪ್ಪಣೆ ಕೊರ್ಪೆ ಪಂಡೆ

²⁶ಅಪಗ ಅವು ಅಬ್ಬರಿತ್‌ದ್ ಆಯನ್ ಒದ್ದಾಡ್ಪಾದ್ ಬುಡ್ದು ಪೋಂಡು. ಆ ಆಣ್ ಸೈತಿನಾಯೆಲೆಕ್ಕ ಬೂರ್ದಿನೆಡ್ದ್, ಕೆಲವು ಜನೊಕುಲು, “ಆಯೆ ಸೈತೆ,” ಅಂದ್‌ದ್ ಪಂಡೆರ್.

²⁷ಆಂಡ ಯೇಸು ಆಯನ್ ಕೈ ಪತ್ತ್‌ದ್ ಲಕ್ಕಾಯೆ. ಆಯೆ ಲಕ್ಕ್‌ದ್ ಉಂತಿಯೆ.

²⁸ಯೇಸು ಇಲ್ಲಗ್ ಬತ್ತಿನಪಗ ಆಯನ ಶಿಷ್ಯೆರ್, “ಅವೆನ್ ಬುಡ್ಪಾಯೆರೆ ಎಂಕ್ಲೆಡ್ದ್ ದಾಯೆಗ್ ಆಯಿಜಿ?” ಅಂದ್‌ದ್ ಆಯಡ ಗುಟ್ಟುಡು ಕೇಂಡೆರ್.

²⁹ಐಕ್ ಯೇಸು ಅಕ್ಲೆಡ, “ಈ ಜಾತಿಲು ದೇವೆರೆ ಪ್ರಾರ್ಥನೆಡ್ದ್‌ಲಾ ಉಪವಾಸೊಡ್ದುಲಾ ಅತ್ತಂದೆ ಬೇತೆ ಒಯಿಡ್ದ್‌ಲಾ ಬುಡ್ದು ಪೋಪುಜಾ.” ಅಂದ್‌ದ್ ಪಂಡೆ.

³⁰ಅಲ್ತ್‌ಡ್ದ್ ಅಕುಲು ಗಲಿಲಾಯ ಕಡತ್‌ದ್ ಪೋವೊಂದಿತ್ತೆರ್. ಅವು ಜನೊಕುಲೆಗ್ ಗೊತ್ತಾವೆರೆ ಬಲ್ಲಿ ಪಂಡ್ದ್ ಆಯಗ್ ಮನಸಿತ್ತ್‌ಂಡ್.

³¹ದಾಯೆಗ್ ಪಂಡ, ಆಯೆ ತನ ಶಿಷ್ಯೆರೆಗ್ ಬೋಧನೆ ಮಲ್ತೊಂದು, “ನರಮಾನಿ ಮಗನ್ ಜನೊಕುಲೆ ಕೈಕ್ ಒಚ್ಚಿದ್ ಕೊರ್ಪೆರ್. ಅಕುಲು ಆಯನ್ ಕೆರ್ವೆರ್; ಸೈತ್‌ದ್ ಮೂಜನೇ ದಿನೊಟು ಆಯೆ ಜೀವಾದ್ ಲಕ್ಕುವೆ,” ಅಂದ್‌ದ್ ಪಂಡೆ.

³²ಆಂಡ ಅಕ್ಲೆಗ್ ಈ ಪಾತೆರದ ಅರ್ಥ ಗೊತ್ತಾಯಿಜಿ, ಬೊಕ್ಕ ಅಕುಲು ಆಯಡ ಕೇನಿಯೆರೆ ಪೋಡಿಯೆರ್.

³³ಬೊಕ್ಕ ಅಕುಲು ಕಪೆರ್ನೌಮುಗು ಬತ್ತೆರ್. ಅಲ್ಪ ಆಯೆ ಇಲ್ಲ್‌ಡಿತ್ತಿನಪಗ, “ನಿಕುಲು ಸಾದಿಡ್ ದಾದ ಚರ್ಚೆ ಮಲ್ತೊಂದಿತ್ತರ್?” ಅಂದ್‌ದ್ ಶಿಷ್ಯೆರೆಡ ಕೇಂಡೆ.

³⁴ಅಕುಲು ಮನಿಪಂದೆ ಇತ್ತೆರ್, ದಾಯೆ ಪಂಡ ಅಕುಲು ಸಾದಿಡ್ ತನ್ಕುಲೆ ಉಲಯಿ ಏರ್ ಮಲ್ಲಾಯೆ ಅಂದ್‌ದ್ ಪಾತೆರೊಂದಿತ್ತೆರ್.

³⁵ಬೊಕ್ಕ ಯೇಸು ಕುಲ್ಲುದು, ತನ ಪದ್ರಾಡ್ ಶಿಷ್ಯೆರೆನ್ ಲೆತ್ತ್‌ದ್ ಅಕ್ಲೆಡ, “ಏರಾಂಡಲಾ ಸುರುತ್ತಾಯೆ ಆವೊಡಾಂಡ, ಆಯೆ ಮಾತೆರೆಡ್ದ್ ಕಡೆತಾಯೆ ಆದ್, ಮಾತೆರೆ ಚಾಕ್ರಿದಾಯೆ ಆದುಪ್ಪೊಡು,” ಅಂದ್‌ದ್ ಪಂಡೆ.

³⁶ಬೊಕ್ಕ ಒಂಜಿ ಎಲ್ಯ ಬಾಲೆನ್ ದೆತ್ತೊಂದು, ಅಕ್ಲೆನ ನಡುಟು ಉಂತಾದ್, ಅರ್ಂಟ್ ಪತ್ತ್‌ದ್,

³⁷ಅಕ್ಲೆಡ, “ಏರಾಂಡಲಾ ಎನ ಪುದರ್‌ಡ್ ಇಂಚಿತ್ತಿ ಎಲ್ಯ ಬಾಲೆನ್ ಸೇರಾವೊಂಡೆಡ, ಎನನ್ ಸೇರಾವೊಂಡಿಲೆಕ್ಕ ಆಂಡ್. ಬೊಕ್ಕ ಏರಾಂಡಲಾ ಎನನ್ ಸೇರಾವೊಂಡೆಡ ಎನನ್ ಅತ್ತ್, ಎನನ್ ಕಡಪುಡ್ದು ಕೊರಿನಾಯನೇ ಸೇರಾವೊಂಡಿಲೆಕ್ಕ ಆಂಡ್,” ಅಂದ್‌ದ್ ಪಂಡೆ.

³⁸ಯೋಹಾನೆ ಯೇಸುಗು, “ಗುರೂ, ಏರಾ ಒರಿ ನಿನ ಪುದರ್‌ನ್ ಪಂಡ್ದ್ ದೆವ್ವ ಬುಡ್ಪಾವುನೆನ್ ಎಂಕುಲು ತೂದು, ಆಯೆ ಎಂಕ್ಲೆನಾಯೆ ಅತ್ತಂದಿನೆಡ್ದ್ ಆಯಗ್ ಅಡ್ಡಿ ಮಲ್ತ,” ಪಂಡೆ.

³⁹ಐಕ್ ಯೇಸು, “ಅಡ್ಡಿ ಮಲ್ಪಡೆ, ಏರ್ಲಾ ಎನ ಪುದರ್‌ಡ್ ಮಲ್ಲಕಾರ್ಯೊನು ಮಲ್ತ್‌ದ್ ಅಪಗನೆ ಎನನ್ ದೂರುನಾಯೆ ಒರಿಲಾ ಇಜ್ಜೆ.”

⁴⁰ನಂಕ್ ವಿರೋಧ ಆದುಪ್ಪಂದಿನಾಯೆ, ನಮ ಕಡೆತಾಯೆ ಆದುಲ್ಲೆ.

⁴¹ನಿಕುಲು ಕ್ರಿಸ್ತನಾಕುಲು ಪಂಡ್ದ್, ನಿಕ್ಲೆಗ್ ಏರಾಂಡಲಾ ಎನ ಪುದರ್‌ಡ್ ಒಂಜಿ ಚೊಂಬು ನೀರ್‌ನ್ ಪರ್ಯೆರೆ ಕೊರಿಯೆಡ ಬರೊಡಾಯಿ ಪ್ರತಿಫಲ ಆಯಗ್ ತಪ್ಪುನೇ ಇಜ್ಜಿ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.

⁴²ಎನ ಮಿತ್ತ್ ನಂಬಿಕೆ ದೀಪಿನ ಈ ಎಲ್ಯಾಕುಲೆಡ್ ಒರಿಯಗ್ ಏರಾಂಡಲಾ ಅಡ್ಡಿ ಮಲ್ತೆಡ ಅಂಚಿನಾಯನ ಕಂಟೆಲ್‌ಗ್ ಬೀಸುನ ಕಲ್ಲ್ ಕಟ್ಟ್‌ದ್ ಕಡಲ್‌ಗ್ ಪಾಡೊನುನವೇ ಎಡ್ಡೆ.

⁴³ಉಂದತ್ತಂದೆ ನಿನ ಕೈ ನಿನನ್ ಪಾಪೊಗು ತಿಕ್ಕಾವುನಾಂಡ ಅವೆನ್ ಕಡ್ತ್‌ದ್ ದಕ್ಕ್‌ಲ. ರಡ್ಡ್ ಕೈ ಇತ್ತಿನಾಯೆ ಆದಿತ್ತ್‌ದ್, ತೆಕ್ಕಂದಿ ತೂ ಆಯಿನ ನರಕೊಡು ಬೂರುನೆಡ್ದ್, ಊನದಾಯೆ ಆದ್ ನಿತ್ಯಜೀವೊಡು ಸೇರುನವು ನಿಕ್ಕ್ ಏತೋ ಎಡ್ಡೆ.

⁴⁴[3]

⁴⁵ಬೊಕ್ಕ ನಿನ ಕಾರ್ ನಿನನ್ ಪಾಪೊಗು ತಿಕ್ಕಾವುನಾಂಡ ಅವೆನ್ ಕಡ್ತ್‌ದ್ ದಕ್ಕ್‌ಲ. ರಡ್ಡ್ ಕಾರ್ ಇತ್ತಿನಾಯೆ ಆದಿತ್ತ್‌ದ್ ನರಕೊಡು ಬೂರುನೆಡ್ದ್, ಕುಂಟೆ ಆದ್ ನಿತ್ಯಜೀವೊಡು ಸೇರುನವು ನಿಕ್ಕ್ ಏತೋ ಎಡ್ಡೆ.

⁴⁶[4]

⁴⁷ನಿನ ಕಣ್ಣ್ ನಿನನ್ ಪಾಪೊಗು ತಿಕ್ಕಾವುನಾಂಡ ಅವೆನ್ ಕೂಂತುದು ದಕ್ಕ್‌ಲ; ರಡ್ಡ್ ಕಣ್ಣ್ ಇತ್ತಿನಾಯೆ ಆದಿತ್ತ್‌ದ್ ನರಕೊಡು ಬೂರುನೆಡ್ದ್ ಒಂಜೇ ಕಣ್ಣ್ ಇತ್ತಿನಾಯೆ ಆದ್ ದೇವೆರೆ ರಾಜ್ಯೊಡು ಸೇರುನವು ನಿಕ್ಕ್ ಏತೋ ಎಡ್ಡೆ.

⁴⁸ನರಕೊಡು ಅಕ್ಲೆನ್ ತುಚ್ಚುನ ಪುರಿ ಸೈಪುಜಿ, ತೂ ತೆಕ್ಕುಜಿ.

⁴⁹“ಪ್ರತಿಯೊರಿಗ್ಲಾ ತೂ ಪನ್ಪಿ ಉಪ್ಪುದ ಹದೊನು ಕೊರೊಡು.

⁵⁰“ಉಪ್ಪು ಎಡ್ಡೆಂತಿನವೇ; ಆಂಡ ಉಪ್ಪು ಚಪ್ಪೆ ಆಂಡ, ಅವೆನ್ ಒಯಿಡ್ದ್ ರುಚಿ ಮಲ್ಪುವರ್? ಅಂಚಾದ್ ನಿಕ್ಲೆಡ್ ಉಪ್ಪು ಇತ್ತಿನಾಕುಲು ಆದುಪ್ಪುಲೆ, ಒರಿಯಡ ಒರಿ ಸಮಾಧಾನೊಡು ಉಪ್ಪುಲೆ,”