Read Tulu ಲೂಕೆ 11 Bible Online

ಲೂಕೆ 11 - Tulu bible

ಲೂಕೆ 11

¹ಯೇಸು ಒಂಜಿ ಜಾಗ್‌ಡ್ ಪ್ರಾರ್ಥನೆ ಮಲ್ತ್‌ದ್ ಮುಗಿಪುನಗ ಆಯನ ಶಿಷ್ಯೆರೆಡ್ ಒರಿ ಕೇನ್ವೆ, “ಕರ್ತವ, ಯೋಹಾನೆ ತನ ಶಿಷ್ಯೆರೆಗ್ ಕಲ್ಪಾಯಿ ಲೆಕ್ಕ ಎಂಕುಲೆಗ್ಲಾ ಪ್ರಾರ್ಥನೆ ಮಲ್ಪುನೆನ್ ಕಲ್ಪಾಲ,” ಅಂದ್‌ದ್ ಪಂಡೆ.

²ಯೇಸು ಅಕ್ಲೆಗ್, “ನಿಕುಲು ಪ್ರಾರ್ಥನೆ ಮಲ್ಪುನಗ, ‘ಪರಲೋಕೊಡುಪ್ಪು ಎಂಕುಲೆ ಅಮ್ಮೆರೇ, ನಿನ ಪುದರ್ ಪರಿಶುದ್ಧ ಆವಡ್. ನಿನ ರಾಜ್ಯ ಬರಡ್.

³ಎಂಕುಲೆ ದಿನದಿನತ ಪಡಿನ್ ಪ್ರತಿ ದಿನಲ ಕೊರ್ಲ.

⁴ಎಂಕ್ಲೆಗ್ ತಪ್ಪು ಮಲ್ತಿನಾಕುಲೆಗ್ ಪ್ರತಿ ಒರಿಯನ್ ಎಂಕುಲು ಮಾಪು ಮಲ್ಪುಲೆಕ್ಕ, ಎಂಕ್ಲೆನ ಪಾಪೊಲೆನ್ಲಾ ಮಾಪು ಮಲ್ಪುಲ. ಎಂಕ್ಲೆನ್ ಶೋಧನೆದುಲಯಿ ಸೇರಾವಂದೆ ತಪ್ಪಾಲ,’” ಅಂದ್‌ದ್ ಪಂಡೆ.

⁵ಬೊಕ್ಕ ಅಕ್ಲೆಗ್ ಪಂಡಿನಿ ದಾನೆಂದ್ಂಡ, “ನಿಕ್ಲೆಡ್ ಒರಿಯಗ್ ಸ್ನೇಹಿತೆ ಉಪ್ಪುನಗ, ಆಯೆ ಮದ್ಯ ರಾತ್ರೆಡ್ ಆಯ ಕೈತಲ್‌ ಪೋದು, ‘ಅಣ್ಣಾ, ಎಂಕ್ ಮೂಜಿ ರೊಟ್ಟಿಲೆನ್ ಸಾಲ ಕೊರ್ಲ.

⁶ಎನ ಸ್ನೇಹಿತೆ ಒರಿ ಪ್ರಯಾಣ ಮಲ್ತ್‌ದ್ ಎನ ಕೈತಲ್‌ ಬೈದೆ; ಆಯಗ್ ವಣಸ್ ಮಲ್ಪಾವೆರೆ ಎನಡ ದಾಲಾ ಇಜ್ಜಿ!’ ಅಂದ್‌ದ್ ಪನ್ನಗ

⁷ಆ ಸ್ನೇಹಿತೆ, ‘ಎಂಕ್ ತೊಂದರೆ ಕೊರೊಡ್ಚಿ; ಇತ್ತೆ ಬಾಕಿಲ್ ಪಾಡ್ದೆ; ಎನ ಎಲ್ಯ ಜೋಕುಲು ಎನಡೊಪ್ಪ ಜೆಯಿದೆರ್; ಯಾನ್ ಲಕ್ಕ್‌ದ್ ನಿಕ್ಕ್ ಕೊರಿಯೆರೆ ಆವಂದ್,’ ಅಂದ್‌ದ್ ಉಲಯಿಡ್ದೇ ಉತ್ತರ ಕೊರಿಯೆಡಲಾ ಕೊರೊಲಿ.

⁸ಆಂಡ ಸ್ನೇಹಿತಗಾದ್ ಲಕ್ಕ್‌ದ್ ಕೊರಂದೆ ಇತ್ತ್ಂಡಲಾ ಆಯನ ಕಿರಿಕಿರಿತ ದಿಸೆಟ್ಟ್ ಲಕ್ಕ್‌ದ್ ಕೇಂಡಿನಾತ್ ಆಯಗ್ ಕೊರ್ಪೆ.

⁹ಅಂಚೆನೇ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ: ಕೇನೊನ್ಲೆ, ಅಪಗ ನಿಕ್ಲೆಗ್ ಒದಗುಂಡು; ನಾಡ್‌ಲೆ, ಅಪಗ ನಿಕ್ಲೆಗ್ ತಿಕ್ಕುಂಡು; ಬೊಟ್ಟುಲೆ, ಅಪಗ ನಿಕ್ಲೆಗ್ ಜಪ್ಪುಂಡು.

¹⁰ದಾಯೆಗಂದ್ಂಡ ಕೇನುನ ಪ್ರತಿಯೊರಿಯಗ್ಲಾ ಕೊರ್ಪುಂಡು, ನಾಡುನಾಯಗ್ ತಿಕ್ಕುಂಡು, ಬೊಟ್ಟುನಾಯಗ್ ಜಪ್ಪುಂಡು.

¹¹ನಿಕ್ಲೆಡ್ ಅಮ್ಮೆ ಆದಿತ್ತಿನಾಯೆ ಮೀನ್ ಕೇನುನ ಮಗಕ್ಕ್ ಮೀನ್ ಕೊರಂದೆ ಉಚ್ಚುನು ಕೊರುವೆನಾ?

¹²ಅತ್ತ್‌ಡ ತೆತ್ತಿನ್ ಕೇಂಡ್‌ಂಡ ಚೇಲ್‌ನ್ ಕೊರ್ಪೆನಾ?

¹³ಅಂಚಾಂಡ ಪಡಿಕೆಂತಿನಕುಲಾಯಿ ನಿಕುಲು ನಿಕ್ಲೆನ ಜೋಕುಲೆಗ್ ಎಡ್ಡೆ ವಸ್ತುಲೆನ್ ಕೊರ್ಪಿನಕುಲಾಂಡ ಪರಲೋಕೊಡುಪ್ಪು ನಿಕ್ಲೆನ ಅಮ್ಮೆ ತನಡ ಕೇನುನಾಕುಲೆಗ್ ಏತೋ ಹೆಚ್ಚಾದ್ ಪರಿಶುದ್ಧಾತ್ಮನ ವರೊಕ್ಲೆನ್ಲಾ ಕೊರುವೆತ್ತಾ?” ಅಂದ್‌ದ್ ಪಂಡೆ.

¹⁴ಒಂಜಿ ದಿನ ಆಯೆ ಬಾಯಿಬರಂದಿ ದೆವ್ವೊನು ಬುಡ್ಪಾವೊಂದಿತ್ತೆ. ಆ ದೆವ್ವ ಬುಡ್ದು ಪೋಯಿ ಬೊಕ್ಕ ಪೊಟ್ಟೆ ಪಾತೆರಿಯೆ; ಐಕ್ ಜನೊಕುಲು ಅಚ್ಚಿರ ಆಯೆರ್.

¹⁵ಆಂಡ ಅಕ್ಲೆಡ್ ಕೆಲೆವೆರ್, “ಇಂಬೆ ದೆವ್ವೊಲೆ ಮುಖ್ಯಸ್ಥೆ ಆಯಿ ಬೆಲ್ಜೆಬೂಲಡ್ದ್ ದೆವ್ವೊಲೆನ್ ಬುಡ್ಪಾವೆ,” ಅಂದ್‌ದ್ ಪಂಡೆರ್.

¹⁶ಬೇತೆ ಕೆಲೆವೆರ್ ಆಯನ್ ಪರೀಕ್ಷೆ ಮಲ್ಪೆರೆಗಾದ್ ಈ ಬಾನೊಡು ಒಂಜಿ ಗುರ್ತೊನು ತೋಜಾದ್ ಕೊರೊಡು ಅಂದ್‌ದ್ ಯೇಸುಡ ಕೇಂಡೆರ್.

¹⁷ಆಯೆ ಅಕ್ಲೆನ ಆಲೋಚನೆಲೆನ್ ತೆರಿದ್ ಅಕ್ಲೆಗ್ ಪಂಡಿನಿ ದಾನೆಂದ್ಂಡ, “ತನ್ಕುಲೆ ಉಲಯಿ ಭೇದ ಇತ್ತಿ ರಾಜ್ಯೊಲು ಹಾಳಾಪುಂಡು.

¹⁸ಅಂಚೆನೇ ಸೈತಾನೆ ತನಡನೇ ಭೇದ ಪುಟ್ಟಾವೊಂಡೆಡ ಆಯನ ರಾಜ್ಯ ಎಂಚ ಒರಿವು? ನಿಕುಲು ಬೆಲ್ಜೆಬೂಲನ ಬಲೊಡ್ದು ಯಾನ್ ದೆವ್ವೊಲೆನ್ ಬುಡ್ಪಾವೆ ಪನ್ಪರ್.

¹⁹ಯಾನ್ ಬೆಲ್ಜೆಬೂಲನ ಬಲೊಡ್ದು ದೆವ್ವೊಲೆನ್ ಬುಡ್ಪಾವುನಾಂಡ ನಿಕ್ಲೆನಾಕುಲು ಏರೆನ ಬಲೊಟು ಬುಡ್ಪಾವೆರ್? ಅಂಚಾಯಿನೆಡ್ದ್ ಅಕುಲೇ ನಿಕ್ಲೆಗ್ ನ್ಯಾಯತೀರ್ಪು ಮಲ್ಪುನಾಕುಲು ಆಪೆರ್.

²⁰ಯಾನ್ ದೇವೆರೆ ಬಲೊಡ್ದೇ ದೆವ್ವೊಲೆನ್ ಬುಡ್ಪಾವುನಾಂಡ ದೇವೆರೆ ರಾಜ್ಯ ನಿಕ್ಲೆ ಕೈತಲೇ ಬತ್ತ್‌ಂಡತ್ತಾ.

²¹ಒರಿ ಬಲವಂತೆ ಮಾತ ಆಯುಧೊಲೆನ್ ಪತ್ತೊಂದು ತನ ಇಲ್ಲನ್ ಕಾತೊಂದಿತ್ತೆಡ ಆಯನ ಇಲ್ಲದ ವಸ್ತುಲು ಜೋಕೆಡೇ ಉಪ್ಪುಂಡು.

²²ಆಂಡ ಆಯಡ್ದ್ ಬಲವಂತೆ ಆಯನ್ ಸೋಪಾಯಿ ಬೊಕ್ಕ ಸುರುತ್ತಾಯೆ ನಂಬೊಂದು ಇತ್ತಿ ಆಯುಧೊಲೆನ್ ತಾನ್ ದೆತ್ತೊಂದು ತಾನ್ ಲೂಟಿ ಮಲ್ತಿನೆನ್ ಪಟ್ಟ್‌ದ್ ಕೊರ್ಪೆ.

²³“ಎನ ಪಕ್ಷ ಪತ್ತಂದಿನಾಯೆ ಎಂಕ್ ವಿರೋಧಿ. ಎನ ಜತೆಟ್ ಸೇರಂದಿನಾಯೆ ಚಲ್ಲಾಪಿಲ್ಲಿ ಮಲ್ಪುನಾಯೆ ಆದುಲ್ಲೆ.”

²⁴“ದೆವ್ವ ನರಮಾನಿನ್ ಬುಡ್ದು ಪೋಯಿ ಬೊಕ್ಕ ನಿಲೆ ನಾಡೊಂದು ನೀರ್ ಇಜ್ಜಾಂದಿ ಜಾಗ್‌ಡ್ ತಿರ್ಗುವ, ನಿಲೆ ತಿಕ್ಕಂದಿನೆಡ್ದ್ ಅವು ‘ಯಾನ್ ಬುಡ್ದು ಬೈದಿನ ಎನ ಇಲ್ಲಗ್ ಪಿರ ಪೋಪೆ ಅಂದ್‌ದ್ ಪನೊಂದು ಬರ್ಪ,’

²⁵ಆ ಇಲ್ಲ್ ಅಡ್ತ್‌ದ್ ಸಿಂಗಾರ ಮಲ್ತಿನೆನ್ ತೂದು ಕುಡ ಪೋದು

²⁶ತನಡ್ದ್ ಪಡಿಕೆಂತಿನ ಬೇತೆ ಏಳ್ ದೆವ್ವೊಲೆನ್ ಲೆತ್ತೊಂದು ಬರ್ಪುಂಡು. ಐಕುಲು ಉಲಯಿ ಪೊಗ್ಗುದು ಅಲ್ಪ ವಾಸ ಮಲ್ಪುವ. ಅಪಗ ಆ ನರಮಾನಿನ ಕಡೆತ ಸ್ಥಿತಿ ದುಂಬುಡ್ದು ಪಡಿಕೆಂತಿನವು ಆದುಪ್ಪುಂಡು,” ಪಂಡೆ.

²⁷ಯೇಸು ಈ ಪಾತೆರೊಲೆನ್ ಪನೊಂದುಪ್ಪುನಗ ಜನೊಕುಲೆ ನಡುಡ್ದು ಒಂಜಿ ಪೊಂಜೊವು, “ನಿನನ್ ತುಂಬೊಂಡಿ ಬಂಜಿಲಾ ಈ ಪರಿ ಮಿರೆಲಾ ಭಾಗ್ಯದವು!” ಅಂದ್‌ದ್ ಪಂಡಲ್.

²⁸ಯೇಸು ಆಲೆಗ್ ಅಂಚ ಪನಡ, “ದೇವೆರೆ ಪಾತೆರೊನು ಕೇಂಡ್ದ್ ಐಕ್ ಸರಿಯಾದ್ ನಡಪುನಾಕುಲೆ ಭಾಗ್ಯವಂತೆರ್,” ಪಂಡೆ.

²⁹ಜನೊಕುಲು ಗುಂಪುಗುಂಪಾದ್ ಬರೊಂದುಪ್ಪುನಗ ಯೇಸು ಪನಿಯೆರೆ ಸುರು ಮಲ್ತಿನವು ದಾನೆಂದ್ಂಡ, “ಈ ಸಂತಾನ ಹಾಳ್ ಸಂತಾನನೇ; ಉಂದು ಗುರ್ತೊನು ತೂವೊಡು ಅಂದ್‌ದ್ ಬಯಕುಂಡು; ಆಂಡ ಯೋನಗ್ ಆಯಿನ ಗುರ್ತನೇ ಅತ್ತಂದೆ ಬೇತೆ ಒವುಲಾ ಗುರ್ತ ನೆಕ್ಕ್ ತಿಕ್ಕಂದ್,”

³⁰ಎಂಚಂದ್ಂಡ ಯೋನೆ ನಿನವೆದಾಕುಲೆಗ್ ಒಂಜಿ ಗುರ್ತ ಆದಿತ್ತೆನಾ, ಅಂಚೆನೇ ನರಮಾನಿ ಮಗೆಲಾ ಈ ಸಂತಾನೊಗು ಒಂಜಿ ಗುರ್ತ ಆದುಪ್ಪುವೆ.

³¹ತೆನ್‌ಕಯಿ ದೇಶದ ರಾಣಿ ನ್ಯಾಯತೀರ್ಪುನಪಗ ಈ ಸಂತಾನದೊಟ್ಟುಗು ಉಂತುದು ಮೊಕ್ಲೆನ್ ಅಪರಾಧಿಲು ಅಂದ್‌ದ್ ಪನ್ಪಲ್; ಆಲ್ ಸೊಲೊಮೋನನ ಗೇನೊನು ತೆರಿಯೊನಿಯೆರೆ ಭೂಮಿದ ಕಟ್ಟಕಡೆಡ್ದ್ ಬತ್ತಲ್; ಆಂಡ ಮುಲ್ಪ ಸೊಲೊಮೋನಡ್ದ್‌ಲಾ ಮಲ್ಲಾಯೆ ಉಲ್ಲೆ.

³²ನ್ಯಾಯತೀರ್ಪುಡು ನಿನವೆ ಪಟ್ಟಣದಾಕುಲು ಈ ಸಂತಾನದೊಪ್ಪ ಉಂತುದು ಮೊಕ್ಲೆನ್ ಅಪರಾಧಿಲು ಅಂದ್‌ದ್ ಪನುವೆರ್. ಅಕುಲು ಯೋನೆ ಸಾರಿನ ಪಾತೆರೊಲೆನ್ ಕೇಂಡ್ದ್ ಪಶ್ಚಾತಾಪ ಪಡೆಯೆರ್. ಆಂಡ ಮುಲ್ಪ ಯೋನಡ್ದ್‌ಲಾ ಮಲ್ಲಾಯೆ ಉಲ್ಲೆ.

³³“ಏರ್ಲಾ ತುಡರ್‌ನ್ ಪೊತ್ತಾದ್ ಮದೆಟಾವಡ್ ಕಲಸೆದುಲಯಿ ಆವಡ್ ದೀಪುಜೆರ್. ಇಲ್ಲದುಲಯಿ ಬರ್ಪಿನಾಕುಲೆಗ್ ಬೊಲ್ಪು ತೋಜುಲೆಕ್ಕ ದೀಪಕಂಬದ ಮಿತ್ತ್ ದೀಪೆರತ್ತಾ?

³⁴ಕಣ್ಣ್ ಶರೀರೊಗು ತುಡರ್ ಆದುಂಡು. ನಿನ ಕಣ್ಣ್ ಸರ್ತ ಇತ್ತ್ಂಡ ನಿನ ಇಡೀ ಶರೀರಲಾ ಬೊಲ್ಪಾದುಪ್ಪುಂಡು. ಅವು ಹಾಳ್ ಆದಿತ್ತ್ಂಡ ನಿನ ಶರೀರಲಾ ಕತ್ತಲೆ ಆದುಪ್ಪುಂಡು.

³⁵ಅಂಚಾದುಪ್ಪುನಗ ನಿನ ಉಲಯಿಡುಪ್ಪುನ ಬೊಲ್ಪು ಕತ್ತಲೆ ಆವಂದಿಲೆಕ್ಕ ಜಾಗ್ರತೆಡ್ ತೂವೊನ್ಲ.

³⁶ನಿನ ಶರೀರ ಇಡೀ ಬೊಲ್ಪು ಆದಿತ್ತ್‌ದ್ ಒಂಜಿ ಭಾಗೊಡ್ಲಾ ಕತ್ತಲೆ ಆದುಪ್ಪಂದೆ ತುಡರ್‌ದ ಲೆಕ್ಕ ಎಡ್ಡೆ ಅರ್ಲ್‌ದ್ ಬೊಲ್ಪು ಕೊರ್ಪಿಲೆಕ್ಕನೇ ಬೊಲ್ಪಾದುಪ್ಪುಲ.”

³⁷ಯೇಸು ಪಾತೆರೊಂದುಪ್ಪುನಗ ಒರಿ ಪರಿಸಾಯೆ ಆಯನ್ ವಣಸ್‌ಗ್ ಬರೊಡಂದ್‌ದ್ ಕೇಂಡೊನ್ನಗ ಆಯೆ ಉಲಯಿ ಪೋದು ವಣಸ್‌ಗ್ ಕುಲ್ಲಿಯೆ.

³⁸ಆಂಡ ಪರಿಸಾಯೆರೆ ಪದ್ಧತಿ ಪ್ರಕಾರ ಯೇಸು ವಣಸ್‌ಡ್ದ್ ದುಂಬು ಕೈ ದೆಕ್ಕಂದೆ ವಣಸ್‌ಗ್ ಕುಲ್ಲಿನೆನ್ ತೂದು ಅಚ್ಚಿರ ಆಯೆರ್.

³⁹ಕರ್ತವೆ ಆಯಗ್, “ಪರಿಸಾಯೆರಾಯಿ ನಿಕುಲು ಕಂಚಿದ ಬಟ್ಟಲ್ದ ಪಿದಾಯಿದ ಭಾಗೊನು ಮಾತ್ರ ದೆಕ್ಕುವರ್; ಆಂಡ ನಿಕ್ಲೆನ ಉಲಯಿದ ಭಾಗ ದುರಾಸೆಡ್ದ್‌ಲಾ ಹಾಳ್ ಬುದ್ಧಿಡ್ದ್‌ಲಾ ದಿಂಜಿದುಂಡು.

⁴⁰ಬುದ್ಧಿದಾಂತಿನಾಕುಲೇ, ದೇವೆರ್ ಪಿದಯಿದ ಭಾಗೊನು ಮಲ್ತಿ ಲೆಕ್ಕನೆ ಉಲಯಿದ ಭಾಗೊನ್ಲಾ ಮಲ್ತ್‌ದೆ ಅತ್ತಾ? ಅಂದ್‌ದ್ ಪಂಡೆ.

⁴¹ಆಂಡಲಾ ಉಲಯಿ ಇತ್ತಿನೆನ್ ಬಡವೆರೆಗ್ ದಾನ ಮಲ್ಪುಲೆ; ಅಪಗ ಮಾತಲಾ ನಿಕ್ಲೆಗ್ ಶುದ್ಧಾದುಪ್ಪುಂಡು.

⁴²“ಅಯ್ಯೋ ಪರಿಸಾಯೆರೇ, ನಿಕ್ಲೆನ ಗತಿ ದಾನೆಂದ್ ಪನೊಡು? ನಿಕುಲು ಪುದಿನ, ಮೆತ್ತೆ, ಸದಪು ಇಂಚಿತ್ತಿ ಮಾತ ಕಾಯಿಕಜಿಪುಲೆಡ್ದ್ ಪತ್ತೆಟ್ಟ್ ಒಂಜಿ ಪಾಲ್ ಕೊರ್ಪರ್ ಸರಿ; ಆಂಡ ನ್ಯಾಯೊನ್ಲಾ ದೇವೆರೆ ಪ್ರೀತಿನ್ಲಾ ಮದತ್‌ದ್ ಬುಡ್ತರ್ ಉಂದೆನ್ಲಾ ನಿಕುಲು ಮಲ್ಪೊಡಿತ್ತ್‌ಂಡ್ ಅವೆನ್ ಬುಡಿಯೆರೆ ಬಲ್ಲಿ.

⁴³“ಅಯ್ಯೋ ಪರಿಸಾಯೆರೇ, ಸಭಾಮಂದಿರೊಡು ಮಲ್ಲಸ್ಥಾನೊಲು, ಅಂಗಡಿ ಸಾದಿಲೆಡ್ ವಂದನೆಲು ನಿಕ್ಲೆಗ್ ಇಷ್ಟ ಆದುಂಡು.

⁴⁴ನಿಕ್ಲೆನ ಗತಿ ದಾನೆಂದ್ ಪನೊಡು? ನಿಕುಲು ನೆಲ ಸಮ ಆತಿ ಸಮಾಧಿದ ಲೆಕ್ಕ ಉಲ್ಲರ್; ಐತ ಮಿತ್ತ್ ನಡಪುನ ಜನೊಕುಲೆಗ್ ಅವು ಸಮಾಧಿ ಅಂದ್‌ದ್ ತೆರಿಯಂದ್.”

⁴⁵ಉಂದೆನ್ ಕೇಂಡ್ದ್ ಒರಿ ನ್ಯಾಯಶಾಸ್ತ್ರಿ ಆಯಗ್, “ಬೋಧಕಾ, ಈ ಪಾತೆರೊಲೆನ್ ಪನ್ಪಿನೆಡ್ದ್ ಎಂಕ್ಲೆನ್ ಹಲ್ಕಿ ಮಲ್ತಿಲೆಕ್ಕ ಆಂಡ್,” ಅಂದ್‌ದ್ ಪನ್ನಗ

⁴⁶ಯೇಸು ಅಕ್ಲೆಗ್, “ನ್ಯಾಯಶಾಸ್ತ್ರಿಲೇ, ನಿಕ್ಲೆನ ಗತಿನ್ ದಾನೆಂದ್ ಪನೊಡು? ನಿಕುಲು ಜನೊಕುಲೆ ಮಿತ್ತ್ ತುಂಬೆರೆ ತೀರಂದಿ ಪುದೆಕ್ಲೆನ್ ತುಂಬಾವರ್; ನಿಕುಲಾಂಡಲಾ ಆ ಪುದೆಕ್ಲೆನ್ ನಿಕ್ಲೆನ ಒಂಜಿ ಬಿರೆಲ್‌ಡ್ದ್‌ಲಾ ಮುಟ್ಟುಜರ್.

⁴⁷ನಿಕ್ಲೆನ ಗತಿನ್ ದಾನೆಂದ್ ಪನೊಡು? ನಿಕುಲು ಪ್ರವಾದಿಲೆ ಸಮಾಧಿಲೆನ್ ಕಟ್ಟುವರ್; ಅಕ್ಲೆನ್ ಕೆರಿನಾಕುಲು ನಿಕ್ಲೆನ ಹಿರಿಯೆರ್;

⁴⁸ಇಂಚ ಉಪ್ಪುನಗ ನಿಕ್ಲೆನ ಹಿರಿಯೆರ್ ಮಲ್ತಿನೆಕ್ಕ್ ನಿಕುಲೇ ಸಾಕ್ಷಿ ಆದುಲ್ಲರ್; ಅತ್ತಂದೆ ಅಕ್ಲೆನ ಬೇಲೆಲೆನ್ ನಿಕುಲು ಮಲ್ತಿಲೆಕ್ಕ ಆಂಡ್. ಅಕುಲು ಪ್ರವಾದಿಲೆನ್ ಕೆರಿಯೆರ್; ನಿಕುಲು ಗೋರಿಲೆನ್ ಕಟ್ಟುವರ್.

⁴⁹ಅಂಚಾಯಿನೆಡ್ದಾವರ ದೇವೆರೆ ಬುದ್ಧಿ ಪನ್ಪಿನಿ ದಾನೆಂದ್ಂಡ, ‘ಯಾನ್ ಅಕ್ಲೆನ ಕೈತಲ್‌ ಪ್ರವಾದಿಲೆನ್ಲಾ ಅಪೊಸ್ತಲೆರೆನ್ಲಾ ಕಡಪುಡ್ವೆ. ಅಕ್ಲೆಡ್ ಕೆಲೆವೆರೆನ್ ಕೆರುವೆರ್, ಭಂಗಲಾ ಕೊರುವೆರ್.’

⁵⁰ಇಂಚ ಲೋಕದ ಆದಿಡ್ದ್ ಹೇಬೇಲ್‌ನ ನೆತ್ತೆರೆಡ್ದ್ ಸುರುವಾದ್ ಬಲಿಪೀಠದ ಬೊಕ್ಕ ದೇವಾಲಯದ ಮದ್ಯೊಡು ಕೆರ್ದ್ ಪಾಡಿ ಜಕರೀಯನ ನೆತ್ತೆರ್ ಮುಟ್ಟ ಮಾತ ಪ್ರವಾದಿಲೆನ ನೆತ್ತೆರ್‌‌ಲೆಗ್ಲಾ ಈ ಸಂತಾನದಾಕುಲೇ ಉತ್ತರ ಕೊರೊಡು. ಅಂದ್, ಈ ಸಂತಾನದಾಕುಲೇ ಉತ್ತರ ಕೊರೊಡು ಅಂದ್‌ದ್ ನಿಕ್ಲೆಗ್ ಪನ್ಪೆ.

⁵¹

⁵²“ಅಯ್ಯೋ ನ್ಯಾಯಶಾಸ್ತ್ರಿಲೇ, ಗೇನೊಗು ಸಾದನ ಆದುಪ್ಪು ಬೀಗದ ಕೈನ್ ದೆತ್ತ್ ದೀತರ್; ನಿಕುಲಾಂಡಲಾ ಉಲಯಿ ಪೋಯಿಜರ್; ಪೋಪಿನಾಕುಲೆಗ್ಲಾ ಅಡ್ಡಿ ಮಲ್ಪುವರ್,” ಅಂದ್‌ದ್ ಪಂಡೆ.

⁵³ಬೊಕ್ಕ ಆಯೆ ಅಲ್ತ್‌ಡ್ದ್ ಬುಡ್ದು ಬನ್ನಗ ಶಾಸ್ತ್ರಿಲು ಬೊಕ್ಕ ಪರಿಸಾಯೆರ್ ಆಯನ್ ಮಸ್ತ್ ವಿರೋಧ ಮಲ್ತ್‌ದ್ ಆಯಡ ತರತರತ ಪ್ರಶ್ನೆ ಕೇನೊಂದಿತ್ತೆರ್.

⁵⁴ಆಯನ ಬಾಯಿ ಪಾತೆರೊಡು ತಪ್ಪು ತಿಕ್ಕೊಡು ಅಂದ್‌ದ್ ಕಾತೊಂದಿತ್ತೆರ್.