Read Tulu ಲೂಕೆ 12 Bible Online

ಲೂಕೆ 12 - Tulu bible

ಲೂಕೆ 12

¹ಐತ ಉಲಯಿ ಸಾರಸಾರ ಜನೊಕುಲು ಒರಿಯನ್ ಒರಿ ದೊಂಕು ಮುಟ್ಟ ಕೂಡ್ದುಪ್ಪುನಗ ಆಯೆ ಸುರುಟ್ಟು ತನ ಶಿಷ್ಯೆರೆಗ್ ಪನಿಯೆರೆ ಸುರು ಮಲ್ತಿನಿ ದಾನೆಂದ್ಂಡ, “ಕಪಟ ಇನ್ಪಿ ಪರಿಸಾಯೆರೆ ಪುಳಿಬಂದದ ಸಂಗತಿಡ್ ಎಚ್ಚರಿಕೆ ಆದುಪ್ಪುಲೆ.

²ಮದೆ ಆದುಪ್ಪು ಒವುಲಾ ತೋಜಿದ್ ಬರಂದೆ ಕುಲ್ಲಂದ್. ಪಿದಯಿ ಬರಂದೆ ಉಪ್ಪುನ ಒಂಜಿ ಗುಟ್ಟುಲಾ ಇಜ್ಜಿ.

³ಇಂಚ ಉಪ್ಪುನಗ ನಿಕುಲು ಕತ್ತಲೆಡ್ ಪಂಡಿನವು ಬೊಲ್ಪುಡು ಕೇನುಂಡು; ಬೊಕ್ಕ ನಿಕುಲು ಕೋಣೆದುಲಯಿ ಪಂಡಿನ ಗುಟ್ಟು ಮಾಳಿಗೆದ ಮಿತ್ತ್ ಸಾರುಂಡು.

⁴“ಎನ ಸ್ನೇಹಿತೆರಾಯಿ ನಿಕ್ಲೆಗ್ ಪನ್ಪೆ ಶರೀರೊನು ಕೆರ್ದ್ ಅವೆಡ್ದ್ ಮಿತ್ತ್ ದಾಲಾ ಮಲ್ಪಂದಿನಾಕುಲೆಗ್ ಪೋಡ್ಯಡೆ.

⁵ನಿಕುಲು ಏರೆಗ್ ಪೋಡಿಯೊಡು ಪನ್ಪಿನೆನ್ ಯಾನ್ ನಿಕ್ಲೆಗ್ ತೆರಿಪಾವೆ. ಕೆರಿ ಬೊಕ್ಕ ನರಕೊಗು ಪಾಡುನ ಅಧಿಕಾರ ಉಪ್ಪು ದೇವೆರೆಗ್ ಮಾತ್ರ ಪೋಡಿಯೊಡು; ಅಂದ್, ಆಯಗೇ ಪೋಡಿಯೊಡು ಅಂದ್‌ದ್ ನಿಕ್ಲೆಗ್ ಪನ್ಪೆ.

⁶“ಐನ್ ಗುರ್ಬ್ಬಿಲೆನ್ ರಡ್ಡ್ ದುಡ್ಡುಗು ಮಾರುವೆರತ್ತಾ? ಆಂಡ ಐಕ್ಲೆಡ್ ಒಂಜಾಂಡಲಾ ದೇವೆರೆಗ್ ಮದತ್ ಪೋಪುಜಿ.

⁷ಆತ್ ಮಾತ್ರ ಅತ್ತ್, ನಿಕ್ಲೆನ ತರೆಕುಜಲ್ ಮಾತಲಾ ಗೆನ್ತ್‌ದುಂಡು, ಪೋಡ್ಯಡೆ; ಮಸ್ತ್ ಗುರ್ಬ್ಬಿಲೆಡ್ದ್‌ಲಾ ನಿಕುಲು ಹೆಚ್ಚ್‌ದಾಕುಲು.

⁸“ಏರ್ ನರಮಾನಿಲೆ ಎದುರುಡು ತಾನ್ ಯೇಸುನಾಯೆ ಅಂದ್‌ದ್ ಒಪ್ಪಿಯೊನ್ವೆನಾ ನರಮಾನಿ ಮಗೆಲಾ ಆಯನ್ ದೇವೆರೆ ದೂತೆರೆ ಎದುರುಡು ತನ್ನಾಯೆ ಅಂದ್‌ದ್ ಒಪ್ಪಿಯೊನ್ವೆ.

⁹ಆಂಡ ಏರ್ ನರಮಾನಿಲೆ ಎದುರು ತಾನ್ ಯೇಸುನಾಯೆ ಅತ್ತ್ ಅಂದ್‌ದ್ ಪನ್ಪೆನಾ ಆಯನ್ ಯಾನ್ ದೇವೆರೆ ದೂತೆರೆ ಎದುರುಡು ಎನ್ನಾಯೆ ಅತ್ತ್ ಅಂದ್‌ದ್ ಪನ್ವೆ.

¹⁰“ನರಮಾನಿ ಮಗಕ್ಕ್ ದೂಷಣೆ ಮಲ್ತೆರ್ಡ ಪ್ರತಿ ಒರಿಯಗ್ಲಾ ಮಾಪು ಆಪುಂಡು. ಆಂಡ ಪರಿಶುದ್ಧಾತ್ಮೊಗು ವಿರೋಧಾದ್ ದೂಷಣೆ ಮಲ್ಪುನಾಯಗ್ ಮಾಪು ಇಜ್ಜಿ.

¹¹“ಅಕುಲು ನಿಕ್ಲೆನ್ ಸಭಾಮಂದಿರದ ಅಧಿಕಾರಿಲೆ ಬೊಕ್ಕ ಅಧಿಪತಿಲೆ ಎದುರುಡ್ಲಾ ಉಂತಾನಗ ದಾದ ಪನೊಡು, ಎಂಚ ಉತ್ತರ ಕೊರೊಡು ಅಂದ್‌ದ್ ಚಿಂತೆ ಮಲ್ಪಡೆ.

¹²ದಾಯೆಗಂದ್ಂಡ ನಿಕುಲು ಪನ್ಪಿನೆನ್ ಆ ಗಳಿಗೆಡ್ ಪರಿಶುದ್ಧಾತ್ಮೆನೇ ನಿಕ್ಲೆಗ್ ಕಲ್ಪಾದ್ ಕೊರ್ಪೆ.”

¹³ಅಪಗ ಜನೊಕುಲೆಡ್ ಒರಿ ಯೇಸುಡ, “ಬೋಧಕಾ, ಅಮ್ಮೆರೆನ ಆಸ್ತಿನ್ ಎಂಕ್ ಪಾಲ್ ಮಲ್ತ್ ಕೊರಿಯೆರೆ ಎನ ಪಲಯಡ ಪನ್ಲ,” ಅಂದ್‌ದ್ ಪಂಡೆ.

¹⁴ಅಪಗ ಆಯೆ, “ಓ ನರಮಾನಿಯೇ, ನಿಕ್ಲೆಗ್ ನ್ಯಾಯಾಧಿಪತಿಯಾದ್ ಪಾಲ್ ಮಲ್ಪೆರೆ ಎನನ್ ನೇಮಕ ಮಲ್ತಿನಾಕುಲು ಏರ್?” ಅಂದ್‌ದ್ ಆಯಡ ಕೇಂಡ್ದ್

¹⁵ಜನೊಕುಲೆಗ್, “ಮಾತ ದುರಾಶೆಲೆಗ್ ಎಚ್ಚರಿಕೆ ಆದಿತ್ತ್‌ದ್ ನಿಕ್ಲೆನ್ ಕಾತೊನ್ಲೆ. ಒರಿಯಗ್ ಏತ್ ಆಸ್ತಿ ಇತ್ತ್ಂಡಲಾ ಅವು ಆಯ ಜೀವನೊಗು ಆಧಾರ ಆಪುಜಿ,” ಪಂಡೆ.

¹⁶ಬೊಕ್ಕ ಒಂಜಿ ಉಪಕತೆನ್ ಪಂಡೆ, “ಒಂಜಾನೊಂಜಿ ಐಶ್ವರ್ಯವಂತನ ಭೂಮಿಡ್ ಎಡ್ಡೆ ಬುಲೆ ಬುಲೆಂಡ್.

¹⁷ಅಪಗ ಆಯೆ ತನ ಮನಸ್‌ಡ್, ‘ಯಾನ್ ದಾದ ಮಲ್ಪೊಡು? ಎನ ಬುಲೆನ್ ದಿಂಜಾದ್ ದೀವೆರೆ ಎಂಕ್ ಜಾಗ್ ಇಜ್ಜತ್ತಾ ಅಂದ್‌ದ್ ಆಲೋಚನೆ ಮಲ್ತ್‌ದ್ ಒಂಜಿ ಬೇಲೆ ಮಲ್ಪುವೆ.

¹⁸ಯಾನ್ ಎನ ಎಲ್ಯ ತುಪ್ಪೆನ್ ಗಿರ್ತ್‌ದ್ ಮಲ್ಲ ಮಲ್ತ್‌ದ್ ಐತ ಉಲಯಿ ಎನ ಮಾತ ಎಡ್ಡೆ ಹುಟ್ಟೊಳಿ ಸರಕುಲೆನ್ ದಿಂಜಾದ್ ದೀಪೆ.

¹⁹ಎನ ಪ್ರಾಣೊಗು ವರ್ಸಾನುಗಟ್ಲೆಗ್ ಬೋಡಾಯಿನಾತ್ ಎಡ್ಡೆ ಹುಟ್ಟೊಳಿ ಬೂರ್ದುಂಡು; ಬೋಡಾಯಿನಾತ್ ತಿನ್ಲ, ಪರ್ಲ, ಸುಖ ಪಡೆಲ ಅಂದ್‌ದ್ ತನ್ಕ್ ಪಂಡೊನ್ವೆ,’ ಅಂದ್‌ದ್ ಎನ್ನೊಂಡೆ.

²⁰ಆಂಡ ದೇವೆರ್ ಆಯಗ್, ‘ಓ ಬುದ್ಧಿದಾಂತಿನಾಯ, ಇನಿ ರಾತ್ರೆಗೇ ನಿನ ಪ್ರಾಣೊನು ನಿನಡ್ದ್ ಕೇನ್ವೆರ್ ಅಪಗ ಈ ಕೂಡಾದ್ ದೀತಿನವು ಏರೆಗ್ ಆಪುಂಡು?’ ಅಂದ್‌ದ್ ಪಂಡೆ.

²¹“ತನ್ಕಾದ್ ಗಂಟ್‌ಲೆನ್ ಕಟ್ಟೊಂದು ದೇವೆರೆ ಬಗೆಟ್ ಐಶ್ವರ್ಯವಂತೆ ಆವಂದಿನಾಯೆ ಬುದ್ಧಿದಾಂತಿನಾಯ ಲೆಕ್ಕನೇ ಆದುಪ್ಪುವೆ,” ಅಂದ್‌ದ್ ಪಂಡೆ.

²²ಬೊಕ್ಕ ಯೇಸು ತನ ಶಿಷ್ಯೆರೆಗ್ ಪಂಡಿನಿ ದಾನೆಂದ್ಂಡ, “ಈ ಕಾರಣೊಗಾದ್ ನಿಕ್ಲೆ ಪ್ರಾಣೊಗು ಒವೆನ್ ತಿನೊಡು, ಶರೀರದ ರಕ್ಷಣೆಗ್ ಒವೆನ್ ಪೊದೆತೊನೊಡು ಅಂದ್‌ದ್ ಚಿಂತೆ ಮಲ್ಪಡೆ ಅಂದ್‌ದ್ ನಿಕ್ಲೆಗ್ ಪನ್ಪೆ.

²³ವಣಸ್‌ಡ್ದ್ ಪ್ರಾಣ ಮಿತ್ತ್‌ದವು; ಅಂಗಿ ಕುಂಟುಡ್ದು ಶರೀರ ಮಿತ್ತ್‌ದವು ಆದುಂಡು.

²⁴ಕಕ್ಕೆಲೆನ್ ತೂಲೆ, ಐಕುಲು ಬಿತ್ತುಜ, ಕೊಯ್ಪುಜ, ಐಕ್ಲೆಗ್ ಗೋದಾಮುಲುಲಾ ಇಜ್ಜಿ, ತುಪ್ಪೆಲಾ ಇಜ್ಜಿ. ಆಂಡಲಾ ದೇವೆರ್ ಐಕ್ಲೆನ್ ತಾಂಕ್‌ದ್ ಕಾಪುವೆ. ಪಕ್ಕಿಲೆಡ್ಡ್ ನಿಕುಲು ಏತೋ ಹೆಚ್ಚ್‌ದಾಕುಲತ್ತಾ?

²⁵ಚಿಂತೆ ಮಲ್ತ್ ಮಲ್ತ್‌ದ್ ನಿಕ್ಲೆ ಶರೀರೊಡು ಒಂಜಿ ಮೊರಂಗೆ ಉದ್ಧ ಆವೆರೆ ಏರೆಡ್ದಾವು?

²⁶ಅವೆಡ್ದಾವರ ಎಲ್ಯದೆನ್ಲಾ ಮಲ್ಪೆರೆ ಆವಂದಿ ನಿಕುಲು ಬಾಕಿದ ಬಗೆಟ್ ಚಿಂತೆ ಮಲ್ಪುನು ದಾಯೆಗ್?

²⁷ಕಾಡ್‌ದ ಪೂ ಬುಲೆಪಿನ ರೀತಿನ್ ಲಕ್ಷ್ಯದೀದ್ ತೆರಿಲೆ, ಐಕುಲು ಬೆನ್ಪುಜ, ನೂಲು ನೆಯ್ಪುಜ, ಆಂಡಲಾ ಆ ಪೂಕುಲೆಡ್ ಒಂಜೆಕ್ಕ್ ಉಪ್ಪು ಅಲಂಕಾರ ಅರಸು ಆದುಪ್ಪು ಸೊಲೊಮೋನುಗು ತನ ಮಾತ ಮೈಮೆಡ್ ಉಪ್ಪುನಗಲಾ ಇತ್ತ್‌ಜಿ ಅಂದ್‌ದ್ ನಿಕ್ಲೆಗ್ ಪನ್ಪೆ.

²⁸ಓ ಒಂತೆ ನಂಬುನಾಕುಲೇ, ಇನಿ ಇತ್ತ್‌ದ್ ಎಲ್ಲೆ ದಿಕ್ಕೆಲ್‌ದ ಪಾಲಾಪಿ ಕಾಡ್‌ದ ಪಜಿರ್‌ಗ್ ದೇವೆರ್ ಇಂಚ ಪೊದೆಪಾವೆಡ ಅವೆಡ್ದ್ ಏತೋ ಹೆಚ್ಚಾದ್ ನಿಕ್ಲೆಗ್ ತುತ್ತಾದ್ ಪೊದೆಪಾವೆ.

²⁹“ಒವೆನ್ ತಿನೊಡು? ಒವೆನ್ ಪರೊಡು? ಅಂದ್‌ದ್ ಗಡಿಬಿಡಿ ಮಲ್ತ್‌ದ್ ಚಿಂತೆ ಮಲ್ಪಡೆ.

³⁰ಉಂದೆನ್ ಮಾತೆನ್ ಲೋಕದ ಜನೊಕುಲು ನಾಡುವೆರ್. ಉಂದು ಮಾತ ನಿಕ್ಲೆಗ್ ಬೋಡಂದ್‌ದ್ ನಿಕ್ಲೆನ ಅಮ್ಮೆರೆಗ್ ತೆರಿದುಂಡು.

³¹ದುಂಬತ್ತ ನಿಕುಲು ದೇವೆರೆ ರಾಜ್ಯೊನು ಬಯಕ್ಲೆ; ನೆತ್ತ ಒಟ್ಟಗು, ನಿಕ್ಲೆಗ್ ಮಾತಲಾ ತಿಕ್ಕುಂಡು.

³²“ಎಲ್ಯ ಪುಂಡೇ, ಪೋಡ್ಯಡ; ದಾಯೆಗಂದ್ಂಡ ನಿಕ್ಲೆಗ್ ರಾಜ್ಯೊನು ಕೊರಿಯೆರೆ ನಿಕ್ಲೆ ಪರಲೋಕೊಡುಪ್ಪು ಅಮ್ಮೆರೆಗ್ ಸಂತೋಷ ಉಂಡು.

³³ನಿಕ್ಲೆಡಿತ್ತಿನೆನ್ ಮಾರ್ದ್ ದಾಲದಾಂತಿನಾಕುಲೆಗ್ ದಾನ ಮಲ್ಪುಲೆ; ಹಾಳಾವಂದಿ ಮಲ್ಲ ಸಂಚಿಲೆನ್ ಮಲ್ತೊಂದು ಪರಲೋಕೊಡು ನಾಶಾವಂದಿ ಗಂಟ್‌ಲೆನ್ ಕಟ್ಟೊನ್ಲೆ. ಅಲ್ಪ ಕಲ್ವೆರ್ ಮುಟ್ಟ ಬರ್ಪುಜೆರ್. ಉದಲ್ ಪತ್ತ್‌ದ್ ನಾಶ ಆಪುಜಿ.

³⁴ನಿಕ್ಲೆನ ಗಂಟ್ ಇತ್ತಿನಲ್ಪನೇ ನಿಕ್ಲೆನ ಮನಸ್ ಉಪ್ಪುಂಡತ್ತಾ.

³⁵“ನಿಕ್ಲೆನ ಸೊಂಟದ ಪಟ್ಟಿ ಕಟ್ಟ್‌ದೇ ಉಪ್ಪಡ್; ನಿಕ್ಲೆನ ತುಡರುಲು ಅರ್ಲೊಂದೇ ಉಪ್ಪಡ್.

³⁶ನಿಕುಲಾಂಡಲಾ ತನ್ಕುಲೆ ಕರ್ತವೆ ಮದ್ಮೆದ ಲೇಸ್‌ಡ್ದ್ ಬತ್ತ್‌ದ್ ಬೊಟ್ಟಿ ಕೂಡ್ಲೆ ಬಾಕಿಲ್ ದೆಪ್ಪೆರೆ ಆಯನ್ ಕಾತೊನುನ ನರಮಾನಿಲೆ ಲೆಕ್ಕ ಆದುಪ್ಪುಲೆ.

³⁷ಕರ್ತವೆ ಬನ್ನಗ ವಾ ಚಾಕ್ರಿದಾಕುಲು ಎಚ್ಚರಿಕೆ ಆದುಪ್ಪುವೆರ್ ಅಂದ್‌ದ್ ತೂಪೆನಾ ಆ ಚಾಕ್ರಿದಾಕುಲು ಭಾಗ್ಯವಂತೆರ್. ಧನಿಯೇ ಸೊಂಟ ಪಟ್ಟಿ ಕಟ್ಟೊಂದು ಅಕ್ಲೆನ್ ವಣಸ್‌ಗ್ ಕುಲ್ಲಾದ್ ಕೈತಲ್‌ ಬತ್ತ್‌ದ್ ಅಕ್ಲೆನ ಚಾಕ್ರಿ ಮಲ್ಪುವೆ ಅಂದ್‌ದ್ ನಿಕ್ಲೆಗ್ ಸತ್ಯಾದ್ ಪನ್ಪೆ,

³⁸ಮದ್ಯ ರಾತ್ರೆಡಾವಡ್, ಪುಲ್ಯ ಕಾಂಡೆಡಾವಡ್ ಧನಿನ್ ಕಾತೊಂದುಪ್ಪು ಬೇಲೆದಾಕುಲು ಭಾಗ್ಯವಂತೆರ್.

³⁹ಕಲ್ವೆ ಬರ್ಪಿನ ಗಳಿಗೆ ಇಲ್ಲದ ಯಜಮಾನಗ್ ತೆರಿದಿತ್ತ್‌ಂಡ ಆಯೆ ಎಚ್ಚರಿಕೆಡ್ ಇತ್ತ್‌ದ್ ತನ ಇಲ್ಲಗ್ ಮಾಟೆ ದೆಪ್ಪೆರೆ ಬುಡ್ತುವಯೆ ಅಂದ್‌ದ್ ತೆರಿಯೊನ್ಲೆ.

⁴⁰ನಿಕುಲುಲಾ ತಯಾರಾದುಪ್ಪುಲೆ. ನಿಕುಲು ಎನ್ನಂದಿ ಗಳಿಗೆಡ್ ನರಮಾನಿ ಮಗೆ ಬರ್ಪೆ.”

⁴¹ಅಪಗ ಪೇತ್ರೆ, “ಸ್ವಾಮಿ, ಈ ಉಪಕತೆನ್ ಎಂಕ್ಲೆಗ್ ಮಾತ್ರ ಪನ್ಪನಾ? ಮಾತೆರೆಗ್ ಪನ್ಪನಾ?” ಅಂದ್‌ದ್ ಕೇನ್ನಗ

⁴²ಕರ್ತವೆ ಪಂಡಿನಿ ದಾನೆಂದ್ಂಡ, “ಪೊರ್ತು ಪೊರ್ತುಗು ವಣಸ್‌ಗ್ ಬೋಡಾಯಿನೆನ್ ಲತ್ತ್‌ದ್ ಕೊರಿಯೆರೆಗಾದ್ ಯಜಮಾನೆ ತನ ಇಲ್ಲದಾಕುಲೆನ ಮಿತ್ತ್ ನೇಮಕ ಮಲ್ತಿ ನಂಬಿಗೆದಾಯೆಲಾ ಬುದ್ಧಿವಂತೆಲಾ ಆದುಪ್ಪು ಆ ಬೇಲೆದಾಯೆ ಏರ್?

⁴³ಯಜಮಾನೆ ಪಿದಾಯಿ ಪೋದು ಬನ್ನಮುಟ್ಟ ಜವಾಬ್ದಾರಿಡ್ ಬೇಲೆ ಮಲ್ಪುನಾಯೆನೇ ಭಾಗ್ಯವಂತೆ.

⁴⁴ಅಂಚಿತ್ತಿನಾಯನ್ ಆಯೆ ತನ ಮಾತ ಆಸ್ತಿದ ಮಿತ್ತ್ ನೇಮಕ ಮಲ್ಪುವೆ,” ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.

⁴⁵ಆಂಡ ಆ ಬೇಲೆದಾಯೆ ತನ ಯಜಮಾನೆ ಬರಿಯೆರೆ ತಡ ಮಲ್ಪುವೆ ಅಂದ್‌ದ್ ತನ ಉಡಲ್‌ಡ್ ಎನ್ನೊಂದು ಆಣ್ ಪೊಣ್ಣು ಬೇಲೆದಾಕುಲೆನ್ ಹಾಕಿಯೆರೆಗ್ಲಾ ತಿಂದ್‌ದ್ ಪರಿಯೆರೆಗ್ಲಾ ಸುರು ಮಲ್ತೆಡ

⁴⁶ಆಯೆ ಎನ್ನಂದಿ ದಿನೊಟ್ಲಾ ತೆರಿಯಂದಿ ಗಳಿಗೆಡ್ಲಾ ಆ ಬೇಲೆದಾಯನ ಯಜಮಾನೆ ಬತ್ತ್‌ದ್ ಆಯಗ್ ಭಯಂಕರ ಪೆಟ್ಟ್ ಕೊರ್ಪಾದ್ ನಂಬಿಕೆದಾಂತಿನಾಕುಲೆಗ್ ಆವೊಡಾಯಿ ಗತಿನ್ ಮಲ್ಪುವೆ.

⁴⁷“ತನ ಕರ್ತವನ ಚಿತ್ತೊನು ತೆರಿದಿ ಆ ಚಾಕ್ರಿದಾಯೆ ತಯಾರ್ ಮಲ್ಪಂದೆ ಪೋಂಡ ಅತ್ತ್‌ಡ ಆಯನ ಚಿತ್ತದ ಲೆಕ್ಕ ನಡತಿಜೆಡ ಬಾರಿ ಪೆಟ್ಟ್ ತಿನ್ಪೆ.

⁴⁸ತೆರಿಯಂದಿನಾಯೆ ಪೆಟ್ಟ್‌ಲೆಗ್ ಯೋಗ್ಯವಾಯಿನೆನ್ ನಡಪಾದ್ ಒಂತೆ ಪೆಟ್ಟ್ ತಿನ್ಪೆ. ಏರೆಗ್ ಹೆಚ್ಚಿಗೆ ಆದ್ ಕೊರ್ತುಂಡಾ ಆಯನ ಕಡೆಡ್ದ್ ಹೆಚ್ಚಿಗೆದೆನೇ ನಿರೀಕ್ಷೆ ಮಲ್ಪುಂಡು; ಉಂದತ್ತಂದೆ ಏರೆನ ಪಾಲ್‌ಗ್ ಹೆಚ್ಚಿಗೆ ಆದ್ ಒಪ್ಪಿಸಾದುಂಡಾ ಆಯನ ಕಡೆಡ್ದ್ ಐಡ್ದ್ ಹೆಚ್ಚಿಗೆದೆನೇ ಕೇನ್ವೆರ್.

⁴⁹“ಯಾನ್ ಭೂಮಿದ ಮಿತ್ತ್ ತೂನು ಪಾಡೊಡು ಅಂದ್‌ದ್ ಬತ್ತೆ; ಅವು ಈತ್‌ನೆಟ್ಟ ಅರ್ಲ್‌ದ್‌ಂಡ ಎಂಕ್ ಏತೋ ಸಂತೋಷ!

⁵⁰ಆಂಡ ಯಾನ್ ಅನುಭವ ಮಲ್ಪುನ ಒಂಜಿ ಕಷ್ಟದ ದೀಕ್ಷಾಸ್ನಾನ ಉಂಡು, ಅವು ಆಪಿನೆಟ್ಟ ಯಾನ್ ಏತೋ ಇಕ್ಕಟ್ಟ್‌ಡ್ ಉಲ್ಲೆ.

⁵¹ಭೂಲೋಕೊಡು ಸಮಾಧಾನ ಉಂಡು ಮಲ್ಪೆರೆ ಬೈದೆ ಅಂದ್‌ದ್ ಎನ್ನುವರಾ? ಐಕ್ ಬೈದಿಜಿ, ಭೇದ ಉಂಡು ಮಲ್ಪೆರೆ ಬೈದೆ ಅಂದ್‌ದ್ ನಿಕ್ಲೆಗ್ ಪನ್ಪೆ.

⁵²ಎಂಚಂದ್ಂಡ ಇನಿಡ್ದ್ ಒಂಜೇ ಇಲ್ಲಡುಪ್ಪು ಐನ್ ಮಂದಿಲೆ ಉಲಯಿ ಇರ್ವೆರೆಗ್ ವಿರೋಧಾದ್ ಮೂವೆರ್. ಮೂವೆರಗ್ ವಿರೋಧಾದ್ ಇರ್ವೆರ್ ಒರಿ ಒರಿಯಗ್ ಭೇದ ಉಂಡಾಪುಂಡು.

⁵³ಮಗಕ್ಕ್ ವಿರೋಧಾದ್ ಅಮ್ಮೆ, ಅಮ್ಮೆರೆಗ್ ವಿರೋಧಾದ್ ಮಗೆ, ಮಗಲೆಗ್ ವಿರೋಧಾದ್ ಅಪ್ಪೆ, ಅಪ್ಪೆಗ್ ವಿರೋಧಾದ್ ಮಗಲ್. ಮರ್ಮಲೆಗ್ ವಿರೋಧಾದ್ ಮಾಮಿ, ಮಾಮಿಗ್ ವಿರೋಧಾದ್ ಮರ್ಮಲ್ ಇಂಚ ಒಂಜೇ ಇಲ್ಲಡ್ ಭೇದ ಉಂಡಾಪುಂಡು.”

⁵⁴ಬೊಕ್ಕ ಯೇಸು ಮಾತ ಜನೊಕುಲೆಗ್ ಪಂಡಿನಿ ದಾನೆಂದ್ಂಡ, “ಪಡ್ಡಯಿ ದಿಕ್ಕ್‌ಡ್ ಮುಗಲ್ ಲಕ್ಕುನೆನ್ ನಿಕುಲು ತೂಯಿ ಕೂಡ್ಲೆ ಗಾಳಿ ಬರ್ಸ ಬರ್ಪುಂಡು ಪನ್ಪರ್; ಅಂಚೆನೇ ಆಪುಂಡು.

⁵⁵ತೆನ್‌ಕಯಿ ದಿಕ್ಕ್‌ದ ಗಾಳಿ ಬೀಜ್‌ನಗ ಸೆಕೆ ಸುರು ಆಂಡ್ ಪನ್ಪರ್; ಅಂಚೆನೇ ಆಪುಂಡು.

⁵⁶ಕಪಟಿಲೇ, ನಿಕುಲು ಭೂಮಿ ಬಾನದ ಗುರ್ತೊನು ಪರೀಕ್ಷೆ ಮಲ್ಪೆರೆ ನಿಕ್ಲೆಗ್ ತೆರಿದುಪ್ಪುನಗ ಈ ಗಳಿಗೆನ್ ಪರೀಕ್ಷೆ ಮಲ್ಪೆರೆ ನಿಕ್ಲೆಗ್ ದಾಯೆಗ್ ಆಪುಜಿ?

⁵⁷“ಇಂಚಿತ್ತಿನವು ನೀತಿದವು, ಎಡ್ಡೆಂತಿನವು ಅಂದ್‌ದ್ ನಿಕುಲೇ ದಾಯೆ ತೀರ್ಪು ಮಲ್ತೊನುಜರ್?

⁵⁸ಈ ವಾದ ಮಲ್ಪುನಾಯಡೊಪ್ಪ ನ್ಯಾಯದ ಮುಖ್ಯಸ್ಥನಡೆ ಪೋವೊಂದುಪ್ಪುನಗ ಸಾದಿಡೇ ಆಯಡೊಪ್ಪ ರಾಜಿ ಮಲ್ತೊನುನೆಕ್ಕ್ ಪ್ರಯತ್ನ ಮಲ್ಪುಲ; ಇಜ್ಜಾಂಡ ಆಯೆ ನಿನನ್ ನ್ಯಾಯಾಧಿಪತಿನ ಕೈತಲ್‌ ಒಯ್ತೊಂದು ಪೋವೆ. ನ್ಯಾಯಾಧಿಪತಿ ನಿನನ್ ಸೆರೆಮನೆತ ಅಧಿಕಾರಿನ ವಶೊಕು ಒಚ್ಚಿದ್ ಕೊರಿಯೆರೆ ಯಾವು. ಸೆರೆಮನೆತ ಅಧಿಕಾರಿ ನಿನನ್ ಸೆರೆಮನೆಟ್ ಪಾಡ್ವೆ.

⁵⁹ಈ ಕಡೇ ಕಾಸ್‌ನ್ ಸಂದಾವು ಮುಟ್ಟ ಅಲ್ಪಡ್ದ್ ಪಿದಯಿ ಬರ್ಪಿನೇ ಇಜ್ಜಿ,” ಅಂದ್‌ದ್ ನಿಕ್ಕ್ ಪನ್ಪೆ.