Read Tulu ಲೂಕೆ 13 Bible Online

ಲೂಕೆ 13 - Tulu bible

ಲೂಕೆ 13

¹ಅವ್ವೆ ಪೊರ್ತುಡು ಕೆಲೆವೆರ್ ಯೇಸುನ ಕೈತಲ್ ಇತ್ತ್‌ದ್ ಪಿಲಾತೆ ಗಲಿಲಾಯದಾಕುಲೆನ ನೆತ್ತೆರ್‌ನ್ ಅಕುಲು ಬಲಿ ಕೊರಿನ ನೆತ್ತೆರ್‌ದ ಒಟ್ಟುಗು ಬೆರಕೆ ಮಲ್ತಿನೆನ್ ಯೇಸುಗು ತೆರಿಪಾಯೆರ್.

²ಐಕ್ ಆಯೆ ಅಕ್ಲೆಗ್, “ಆ ಗಲಿಲಾಯದಾಕುಲು ಅಂಚಿತ್ತಿ ಮಾನ್ಯ ಕೆರ್ಪಿನೆನ್ ಅನುಭವ ಮಲ್ತಿನೆಡ್ದ್ ಅಕ್ಲೆನ್ ಮಾತೆರೆನ್ ಗಲಿಲಾಯದಾಕುಲೆಡ್ದ್ ಪಾಪಿಷ್ಟೆರ್ ಅಂದ್‌ದ್ ಎನ್ನುವರಾ?

³ಇಜ್ಜಿ, ಅಂಚ ಎನ್ನಡೆ ಅಂದ್‌ದ್ ನಿಕ್ಲೆಗ್ ಪನ್ಪೆ. ಪಶ್ಚಾತಾಪ ಪಡೆಯಿಜರ್ಡ ನಿಕುಲು ಮಾತೆರ್ಲಾ ಅಂಚೆನೇ ನಾಶಾದ್ ಪೋಪರ್, ಇಜ್ಜಿಡ, ಸಿಲೊವಾಮುಡು ಗೋಪುರ ಬೂರ್ದು ಸೈತಿ ಪದಿನೆಣ್ಮ ಜನೊಕುಲು ಯೆರೂಸಲೇಮುಡುಪ್ಪು ಮಾತ ನರಮಾನಿಲೆಡ್ದ್ ಮಲ್ಲ ಪಾಪಿಷ್ಟೆರ್ ಅಂದ್‌ದ್ ಎನ್ನುವರಾ?

⁵ಅಂಚ ಅತ್ತ್; ನಿಕ್ಲೆಗ್ ಪನ್ಪೆ, ಪಶ್ಚಾತಾಪ ಪಡೆಯಿಜರ್ಡ ನಿಕುಲು ಮಾತೆರ್ ಅಕ್ಲೆನ ಲೆಕ್ಕ ನಾಶಾದ್ ಪೋಪರ್,” ಅಂದ್‌ದ್ ಪಂಡೆ.

⁶ಐಡ್ದ್ ಬೊಕ್ಕ ಆಯೆ ಒಂಜಿ ಉಪಕತೆನ್ ಪಂಡೆ ಅವು ದಾನೆಂದ್ಂಡ, “ಒರಿ ತನ ದ್ರಾಕ್ಷೆತೋಟೊಡು ಒಂಜಿ ಅಂಜೂರದ ಮರೊನು ನಡ್ಪಾದಿತ್ತೆ. ಐಟ್ಟ್ ಪರ್ಂದ್ ಉಂಡಾ ಅಂದ್‌ದ್ ನಾಡೊಂದು ಬತ್ತೆ. ಆಂಡ ಆಯಗ್ ತಿಕ್ಕಿಜಿ;

⁷ಆಯೆ ತೋಟದ ಬೇಲೆದಾಯಡ, ‘ತೂಲ, ಯಾನ್ ಮೂಜಿ ವರ್ಸೊಡ್ಚಿಂಚಿ ಈ ಅಂಜೂರದ ಮರೊಟು ಪರ್ಂದ್ ನಾಡ್ಯೆ. ಆಂಡ ಎಂಕ್ ಇದ ಮುಟ್ಟ ತಿಕ್ಕ್‌ಜಿ. ಉಂದೆನ್ ಕಡ್ತ್‌ದ್ ಪಾಡ್; ಉಂದೆಡ್ದ್ ಭೂಮಿ ದಾಯೆ ಬಂಜೆ ಆವೊಡು,’ ಪಂಡ್ದ್ ಪಂಡೆ.

⁸ಐಕ್ ಆ ಬೇಲೆದಾಯೆ, ‘ಕರ್ತವಾ, ಈ ವರ್ಸ ಉಂದೆನ್ ಬುಡ್ಕ; ಯಾನ್ ನೆತ್ತ ಸುತ್ತಲಾ ಗರ್ತ್‌ದ್ ಗೊಬ್ಬರ ಪಾಡುವೆ.

⁹ದುಂಬಗ್ ಕಾಯಿ ತೋಜಿಜಿಂಡ ಅವೆನ್ ಕಡ್ತ್ ದಕ್ಕ್‌ಗ,’” ಅಂದ್‌ದ್ ಉತ್ತರ ಕೊರಿಯೆ.

¹⁰ಸಬ್ಬತ್‌ದಿನೊಟು ಯೇಸು ಒಂಜಿ ಸಭಾಮಂದಿರೊಡು ಬೋಧನೆ ಮಲ್ತೊಂದಿತ್ತೆ.

¹¹ಅಲ್ಪ ಪದಿನೆಣ್ಮ ವರ್ಸೊಡ್ದಿಂಚಿ ದುರಾತ್ಮ ಪತ್ತ್‌ದಿತ್ತಿ ಒರ್ತಿ ಪೊಂಜೊವು ಇತ್ತಲ್. ಆಲ್ ಬಗ್ಗ್‌ದ್ ಪೋದು, ಸೊಂಟ ಸರ್ತ ಮಲ್ಪೆರೆ ಆವೊಂದು ಇಜ್ಜಾಂಡ್.

¹²ಯೇಸು ಆಲೆನ್ ತೂದು ಕೈತಲ್‌ ಲೆತ್ತ್‌ದ್ ಆಲೆಗ್, “ಅಮ್ಮಾ, ನಿಕ್ಕ್ ಸೀಕ್‌ಡ್ದ್ ಬುಡುಗಡೆ ಆಂಡ್,” ಪಂಡ್ದ್ ಆಲೆನ ಮಿತ್ತ್ ಕೈ ದೀಯೆ;

¹³ದೀಯಿ ಕೂಡ್ಲೆ ಆಲ್ ಸರ್ತ ಆಯಲ್, ದೇವೆರೆನ್ ಪುಗರಿಯಲ್.

¹⁴ಆ ಸಭಾಮಂದಿರದ ಅಧಿಕಾರಿ ನಡತಿ ಸಂಗತಿನ್ ತೂದು ಸಬ್ಬತ್‌ದಿನೊಟು ಯೇಸು ಸೀಕ್‌ಲೆನ್ ಗುಣ ಮಲ್ಪುವೆ ಅಂದ್‌ದ್ ಕೋಪೊಡು ಜನೊಕುಲೆಡ, “ಬೇಲೆ ಮಲ್ಪರೆ ಆಜಿ ದಿನೊಕುಲು ಉಂಡು; ಆ ದಿನೊಲೆಡೇ ನಿಕ್ಲೆನ ಸೀಕ್‌ಲೆನ್ ಗುಣ ಮಲ್ತೊನ್ಲೆ. ಸಬ್ಬತ್‌ದಿನೊಟು ಮಾತ್ರ ಬೊಡ್ಚಿ!” ಅಂದ್‌ದ್ ಪಂಡೆ.

¹⁵ಆ ಪಾತೆರೊನು ಕೇಂಡ್ದ್ ಕರ್ತವೆ ಅಕ್ಲೆಗ್, “ನಿಕುಲು ಕಪಟಿಲು, ನಿಕ್ಲೆಡ್ ಪ್ರತಿಯೊರಿಲಾ ಸಬ್ಬತ್‌ದಿನೊಟು ತನ ಬೋರಿನಾವಡ್ ಕತ್ತೆನಾವಡ್ ಬೈಪಣೆಡ್ದ್ ಗಿರ್ತ್‌ದ್ ನೀರ್ ಪರಿಯೆರೆಗಾದ್ ಕೊನೊಪರತ್ತಾ.

¹⁶ಅಂಚಾಂಡ ಪದಿನೆಣ್ಮ ವರ್ಸೊಡ್ದಿಂಚಿ ಸೈತಾನನ ಬಂಧನೊಡು ಇತ್ತಿನಾಲಾದ್ ಅಬ್ರಹಾಮುನ ವಂಶದಾಲಾದುಪ್ಪು ಆಲೆನ್ ಸಬ್ಬತ್‌ದಿನೊಟು ಈ ಕಷ್ಟೊಡ್ದು ಬುಡ್ಪಾವೆರೆ ಬಲ್ಲಿಯಾ?” ಪಂಡೆ

¹⁷ಈ ಪಾತೆರೊಲೆನ್ ಆಯೆ ಪನೊಂದುಪ್ಪುನಗ ಆಯನ ಮಾತ ಪಗೆಮಾನಿಲೆಗ್ ನಾಚಿಗೆ ಆಂಡ್; ಅಲ್ಪ ಸೇರ್ದಿತ್ತಿ ಜನೊಕುಲು ಮಾತೆರ್ಲಾ ಆಯಡ್ದ್ ಆಪಿನ ಮೈಮೆದ ಕಾರ್ಯೊಲೆನ್ ತೂದು ಸಂತೋಷ ಪಡೆಯೆರ್.

¹⁸ಬೊಕ್ಕ ಆಯೆ ಪಂಡಿನಿ, “ದೇವೆರೆ ರಾಜ್ಯ ಒಯಿಕ್ ಸಮ ಆದುಂಡು?

¹⁹ಅವೆನ್ ಯಾನ್ ಒಯಿಕ್ ಸಮ ಮಲ್ಪೊಲಿ? ಅವು ದಾಸೆಮಿದ ಬಿತ್ತ್‌ಗ್ ಸರಿ ಆದುಂಡು. ಒರಿ ನರಮಾನಿ ಅವೆನ್ ದೆತ್ತೊಂದು ಪೋದು ತನ ತೋಟೊಡು ಬಿತ್ತಿಯೆ; ಅವು ಮಲ್ಲ ಮರ ಆದ್ ಬಾನೊಡು ರಾಪಿನ ಪಕ್ಕಿಲು ಐತ ಗೆಲ್ಲ್‌ಲೆಡ್ ಗೂಡು ಕಟ್ಟ್‌ದ್ ವಾಸ ಮಲ್ಪುವ.”

²⁰ಬೊಕ್ಕ ಆಯೆ, “ದೇವೆರೆ ರಾಜ್ಯೊನು ಕುಡ ಒಯಿಕ್ ಸಮ ಮಲ್ಪೊಲಿ ಅಂದ್‌ದ್ ಪನ್ನಗ

²¹ಅವು ಪುಳಿ ಬಂದೊಗು ಸಮ ಆದುಂಡು. ಅವೆನ್ ಒಂಜಿ ಪೊಂಜೊವು ದೆತ್ತೊಂದು ಮೂಜಿ ಸೇರ್ ಬಂದೊಡು ಕಲತ್ ದೀಯಿನಪಗ ಆ ಬಂದ ಮಾತ ಪುಳಿ ಆಂಡ್ ಪಂಡೆ.”

²²ಯೇಸು ಊರೂರುಗ್ಲಾ ಗ್ರಾಮಗ್ರಾಮೊಗ್ಲಾ ಪೋದು ಬೋಧನೆ ಮಲ್ತೊಂದು ಯೆರೂಸಲೇಮುದಂಚಿ ಪೋವೊಂದಿತ್ತೆ.

²³ಅಪಗ ಒರಿ, “ಸ್ವಾಮಿ, ರಕ್ಷಣೆ ಹೊಂದುನಾಕುಲು ಒಂತೆ ಜನೊಕುಲು ಮಾತ್ರನಾ?” ಅಂದ್‌ದ್ ಕೇನ್ನಗ

²⁴ಆಯೆ ಅಕ್ಲೆಗ್, “ಇಕ್ಕಟ್ಟಾಯಿ ಬಾಕಿಲ್‌ಡ್ದ್ ಉಲಯಿ ಪೋವೆರೆ ಪೇಚಾಡ್ಲೆ. ದಾಯೆಗಂದ್ಂಡ ಮಸ್ತ್ ಜನ ಉಲಯಿ ಪೋವೆರೆ ತೂಪೆರ್, ಆಂಡ ಅಕ್ಲೆಡ್ದ್ ಪೋವೆರೆ ತೀರಂದ್ ಅಂದ್‌ದ್ ನಿಕ್ಲೆಗ್ ಪನ್ಪೆ.

²⁵ಇಲ್ಲದ ಧನಿ ಬಾಕಿಲ್ ಮುಚ್ಚಿ ಬೊಕ್ಕ ನಿಕುಲು ಪಿದಯಿ ಉಂತುದು ಬಾಕಿಲ್ ಬೊಟ್ಟೊಂದು ಕರ್ತವಾ, ‘ಎಂಕ್ಲೆಗ್ ಬಾಕಿಲ್ ಜಪ್ಪುಲೆ!’ ಅಂದ್‌ದ್ ಪನ್ನಗ ಆಯೆ ಉತ್ತರ ಕೊರ್ದು, ‘ನಿಕುಲು ಒಲ್ತಾಕುಲು, ನಿಕ್ಲೆನ ಗುರ್ತ ಎಂಕ್ ಗೊತ್ತಿಜ್ಜಿ,’ ಅಂದ್‌ದ್ ಪನುವೆ,

²⁶ಐಕ್ ನಿಕುಲು, ‘ಎಂಕುಲು ನಿನಡೊಪ್ಪ ಉನ್ತ, ಪರ್ತ, ಎಂಕ್ಲೆನ ಊರುಡು ಈ ಬೋಧನೆ ಮಲ್ತ್‌ದ,’ ಅಂದ್‌ದ್ ಪನಿಯೆರೆ ಸುರು ಮಲ್ಪುವರ್.

²⁷ಆಂಡ ಆಯೆ ನಿಕುಲು ಏರಾ, ‘ನಿಕ್ಲೆನ ಗುರ್ತ ಎಂಕಿಜ್ಜಿ, ಅನ್ಯಾಯ ಮಲ್ಪುನಾಕುಲೇ ನಿಕುಲು ಮಾತೆರ್ಲಾ ಎನನ್ ಬುಡ್ದು ಪೋಲೆ!’ ಅಂದ್‌ದ್ ಪನ್ಪೆ.

²⁸ಅಬ್ರಹಾಮು, ಇಸಾಕ್ ಯಾಕೋಬು ಬೊಕ್ಕ ಮಾತ ಪ್ರವಾದಿಲುಲಾ ದೇವೆರೆ ರಾಜ್ಯೊಡು ಉಪ್ಪುನೆನ್, ನಿಕ್ಲೆನ್ ಮಾತ್ರ ಪಿದಯಿ ಪಾಡ್ದಿನೆನ್ ನಿಕುಲು ತೂನಗ ನಿಕ್ಲೆಗ್ ಅಲ್ಪ ಅರಬಾಯಿಲಾ ಕೂಲಿ ಕಡೆಪಿನವುಲಾ ಉಪ್ಪುಂಡು.

²⁹ಮೂಡಯಿ ಪಡ್ಡಯಿ ಬಡಕಯಿ ತೆನ್‌ಕಯಿ ದಿಕ್ಕ್‌ಲೆಡ್ದ್ ಜನೊಕುಲು ಬತ್ತ್‌ದ್ ದೇವೆರೆ ರಾಜ್ಯೊಡು ವಣಸ್‌ಗ್ ಕುಲ್ಲುವೆರ್.

³⁰ಇಂದಾ, ಕಡೆಟ್ಟ್ ಇತ್ತಿನಾಕುಲು ಸುರುತ್ತಾಕುಲು ಆಪೆರ್ ಬೊಕ್ಕ ಸುರುಟಿತ್ತಿನಾಕುಲು ಕಡೆತ್ತಾಕುಲು ಆಪೆರ್.”

³¹ಅವ್ವೆ ಗಳಿಗೆಡ್ ಕೆಲವು ಜನ ಪರಿಸಾಯೆರ್ ಕೈತಲ್‌ ಬತ್ತ್‌ದ್, “ಯೇಸುಗು ಈ ಮುಲ್ತುಡ್ದು ಪಿದಾಡ್ದ್ ಪೋ. ದಾಯೆಗಂದ್ಂಡ ಹೆರೋದೆ ನಿನನ್ ಕೆರೊಡು ಅಂದ್‌ದ್ ಉಲ್ಲೆ,” ಅಂದ್‌ದ್ ಪಂಡೆರ್.

³²ಐಕ್ ಯೇಸು, “ನಿಕುಲು ಪೋಲೆ, ‘ಯಾನ್ ಇನಿಲಾ ಎಲ್ಲೆಲಾ ದೆವ್ವ ಪತ್ತ್‌ದಿನಕುಲೆನ್ ಬುಡ್ಪಾವೊಂದು ಸೀಕ್‌ಲೆನ್ ಗುಣ ಮಲ್ತೊಂದು ಇತ್ತ್‌ದ್ ಮೂಜನೇ ದಿನೊಟು ಬೇಲೆ ಪೂರ್ತಿ ಮಲ್ತ್‌ದ್ ಬರ್ಪೆ,’ ಅಂದ್‌ದ್ ಆ ಕುದ್‌ಕಗ್ ಪನ್ಲೆ.

³³ಎಂಚಲಾ ಯಾನ್ ಇನಿ ಎಲ್ಲೆ ಎಲ್ಲೆಂಜಿ ಮುಲ್ಪನೇ ಪ್ರಯಾಣ ಮಲ್ಪೊಡು; ಪ್ರವಾದಿ ಆದುಪ್ಪುನಾಯೆ ಯೆರೂಸಲೇಮು ಅತ್ತಂದೆ ಬೇತೆ ಓಲುಲಾ ಕೆರ್ಪಾವುನುನವು ಸಮ ಅತ್ತ್.

³⁴“ಯೆರೂಸಲೇಮೋ, ಯೆರೂಸಲೇಮೋ ಪ್ರವಾದಿಲೆ ಪ್ರಾಣ ದೆಪ್ಪುನಾಲೇ, ದೇವೆರ್ ನಿನ ಕೈತಲ್‌ ಕಡಪುಡ್ದು ಕೊರ್ತಿನಾಕುಲೆನ್ ಕಲ್ಲ್ ದಕ್ಕ್‌ದ್ ಕೆರ್ಪಿನಾಲೇ, ಕೋರಿ ತನ ಕಿನ್ನಿಲೆನ್ ರೆಂಕೆದ ಅಡಿಟ್ಟ್ ಕುಲ್ಲಾವುಲೆಕ್ಕ ನಿನ ಜೋಕುಲೆನ್ ಕುಲ್ಲಾಯೆರೆ ಎಂಕ್ ಏತೋ ಸರ್ತಿ ಮನಸಿತ್ತ್‌ಂಡ್. ಆಂಡ ನಿಕ್ಲೆಗ್ ಮನಸ್‌ದಾಂತೆ ಪೋಂಡು.

³⁵ತೂಲೇ, ನಿಕ್ಲೆನ ಆಲಯ ಕಾಲಿ ಆದ್ ಬೂರ್ದುಂಡು. ‘ಕರ್ತವ ಪುದರ್‌ಡ್ ಬರ್ಪಿನಾಯಗ್ ಆಶೀರ್ವಾದ,’ ಪಂಡ್ದ್ ಪನ್ಪಿನ ಮುಟ್ಟ ನಿಕುಲು ಎನನ್ ತೂಪಿನೇ ಇಜ್ಜಿ,” ಅಂದ್‌ದ್ ನಿಕ್ಲೆಗ್ ಪನ್ಪೆ ಪಂಡೆ.