Read Tulu ಲೂಕೆ 15 Bible Online

ಲೂಕೆ 15 - Tulu bible

ಲೂಕೆ 15

¹ಯೇಸುನ ಬೋಧನೆನ್ ಕೇನಿಯೆರೆ ಮಸ್ತ್ ಸುಂಕದಾಕುಲುಲಾ ಪಾಪಿಲುಲಾ ಆಯನ ಕೈತಲ್‌ ಬರೊಂದಿತ್ತೆರ್.

²ಉಂದೆನ್ ತೂದು ಪರಿಸಾಯೆರ್‌ಲಾ ಶಾಸ್ತ್ರಿಲುಲಾ, “ಉಂಬೆ ಪಾಪಿಲೆನ್ ಸೇರಾವೊಂದು ಅಕ್ಲೆಡೊಪ್ಪ ವಣಸ್ ಮಲ್ಪುವೆ,” ಅಂದ್‌ದ್ ಗುಣುಗುಟೊಂದಿತ್ತೆರ್.

³ಅಪಗ ಯೇಸು ಅಕ್ಲೆಗ್ ಒಂಜಿ ಉಪಕತೆನ್ ಪಂಡೆ.

⁴ಅವು ದಾನೆಂದ್ಂಡ, “ನಿಕ್ಲೆಡ್ ಒರಿ ನರಮಾನಿಗ್ ನೂದು ಕುರಿಕುಲು ಉಪ್ಪುನಗ ಐಟ್ಟ್ ಒಂಜಿ ಕುರಿ ತತ್ತ್‌ದ್ ಪೋಂಡ ಆಯೆ ಸೊನ್ಪತೊಂರ್ಬೊನು ಕಾಡ್‌ಡ್ ಬುಡ್ದು ತತ್ತ್ ಪೋಯಿ ಕುರಿ ತಿಕ್ಕುನೆಟ್ಟ ನಾಡೊಂದು ಪೋಪುಜೆನಾ?

⁵ತಿಕ್ಕಿಬೊಕ್ಕ ಆಯೆ ಸಂತೋಷೊಡು ಅವೆನ್ ತನ ಪುಗೆಲ್‌ಡ್ ದೀವೊಂದು

⁶ಇಲ್ಲಗ್ ಬತ್ತ್‌ದ್ ಸ್ನೇಹಿತೆರೆನ್‌ ನಿರೆಕರೆತಾಕುಲೆನ್ ಸೇರಾವೊಂದು, ‘ತತ್ತ್‌ದ್ ಪೋಯಿ ಕುರಿ ತಿಕ್ಕ್ಂಡ್ ಎನಡೊಪ್ಪ ಸಂತೋಷ ಮಲ್ಪುಲೆ,’ ಪನ್ಪೆ.

⁷ಐತ ಲೆಕ್ಕನೆ ದೇವೆರೆ ಕಡೆಕ್ಕ್ ಬರಿಯೆರೆ ಅಗತ್ಯದಾಂತಿ ಸೊನ್ಪತೊಂರ್ಬ ಮಂದಿ ನೀತಿವಂತೆರೆಡ್ದ್ ಒರಿ ಪಾಪಿ ಪಶ್ಚಾತಾಪ ಪಡೆಂಡ ಪರಲೋಕೊಡು ಸಂತೋಷ ಉಂಡಾಪುಂಡು.

⁸“ಅಂಚೆನೇ ಒಂಜಿ ಪೊಂಜೊವುಡ ಪತ್ತ್ ಪಾವೊಲಿಡ್ ಒಂಜಿ ಪಾವೊಲಿ ದಕ್ಕ್‌ದ್ ಪೋಂಡ, ತುಡರ್ ಪೊತ್ತಾದ್ ಇಲ್ಲನ್ ಅಡ್ತ್‌ದ್ ಅವು ತಿಕ್ಕುನೆಟ್ಟ ಜಾಗ್ರತೆಡ್ ನಾಡುವೊಲತ್ತಾ?

⁹ತಿಕ್ಕಿಬೊಕ್ಕ ಆಲ್ ತನ ಸ್ನೇಹಿತೆರೆನ್‌ ನಿರೆಕರೆತಾಕುಲೆನ್ ಸೇರಾವೊಂದು, ‘ದಕ್ಕ್‌ದ್ ಪೋಯಿ ಪಾವೊಲಿ ತಿಕ್ಕ್ಂಡ್ ನಿಕುಲು ಎನಡೊಪ್ಪ ಸಂತೋಷ ಮಲ್ಪುಲೆ,’ ಪನ್ಪಲತ್ತಾ?

¹⁰ಐತ ಲೆಕ್ಕ ಒರಿ ಪಾಪಿ ಪಶ್ಚಾತಾಪ ಪಡೆಂಡ ಪರಲೋಕೊಡು ದೇವೆರೆ ದೂತೆರೆ ಎದುರುಡು ಸಂತೋಷ ಆಪುಂಡು.” ಪಂಡ್ದ್ ನಿಕ್ಲೆಗ್ ಪನ್ಪೆ.

¹¹ನನಲಾ ಆಯೆ ಪಂಡಿನಿ ದಾನೆಂದ್ಂಡ, “ಒರಿಯಗ್ ರಡ್ಡ್ ಜೋಕುಲಿತ್ತೆರ್.

¹²ಐಟ್ಟ್ ಎಲ್ಯಾಯೆ ಅಮ್ಮೆರೆಡ, ‘ಅಮ್ಮೆರೇ, ಆಸ್ತಿಡ್ ಎಂಕ್ ಬರೊಡಾಯಿ ಪಾಲ್‌ನ್ ಕೊರ್ಲ,’ ಅಂದ್‌ದ್ ಕೇನ್ನಗ ಅಮ್ಮೆ ಬದ್‌ಕ್‌ನ್ ಅಕ್ಲೆಗ್ ಪಾಲ್ ಮಲ್ತ್‌ದ್ ಕೊರಿಯೆ.

¹³ಒಂತೆ ದಿನೊಡ್ದು ಬೊಕ್ಕ ಆ ಎಲ್ಯ ಮಗೆ ಆ ಪಾಲ್‌ನ್ ದೆತ್ತೊಂದು ದೂರ ದೇಶೊಗು ಪೋಯೆ. ಅಲ್ಪ ಪಟಿಂಗತನೊಟು ಬದ್‌ಕ್‌ದ್ ತನಡ ಇತ್ತಿನೆನ್ ಮಾತ ಕಾಲಿ ಮಲ್ತೊಂಡೆ.

¹⁴ಇಂಚ ಆಯೆ ಗತಿದಾಂತಿನಾಯೆ ಆದುಪ್ಪುನಗ ಆ ದೇಶೊಡು ಮಲ್ಲ ಬರಗಾಲ ಬತ್ತ್ಂಡ್.

¹⁵ಅಪಗ ಆಯೆ ಆ ದೇಶದ ಒರಿಯ ಇಲ್ಲಡ್ ಬೇಲೆಗ್ ಸೇರೊಂಡೆ. ಆ ನರಮಾನಿ ಪಂಜಿಲೆನ್ ಮೇಪಾಯೆರೆ ಆಯನ್ ಕಂಡೊಗು ಕಡಪುಡಿಯೆ.

¹⁶ಆಯಗ್ ಮಸ್ತ್ ಬಡವು ಆನಗ ಪಂಜಿಲು ತಿನೊಂದಿತ್ತಿನ ತೌಡುನು ತಿಂದ್‌ದ್ ಬಡವುನು ತಗ್ಗಾವೆ ಅಂದ್‌ದ್ ಎನ್ನಿಯೆ; ಆಂಡ ತಿನಿಯೆರೆ ಏರ್ಲಾ ಆಯಗ್ ದಾಲಾ ಕೊರ್ಜೆರ್.

¹⁷ಅಪಗ ಆಯಗ್ ಬುದ್ಧಿ ಬತ್ತ್‌ದ್ ಆಯೆ, ‘ಎನ ಅಮ್ಮೆರೆ ಇಲ್ಲಡ್ ಏತೋ ಜನ ಬೇಲೆದಾಕುಲೆಗ್ ಬೋಡಾಯಿನಾತ್ ವಣಸ್ ಉಂಡು, ಯಾನ್ ಮುಲ್ಪ ಬಡವುಡು ಸೈಯೊಂದುಲ್ಲೆ.

¹⁸ಯಾನ್ ಲಕ್ಕ್‌ದ್ ಎನ ಅಮ್ಮೆರೆನ ಕೈತಲ್‌ ಪೋದು, “ಅಮ್ಮೆರೇ, ಪರಲೋಕದ ದೇವೆರೆಗ್ಲಾ ನಿಕ್ಕ್‌ಲಾ ವಿರೋಧಾದ್ ಪಾಪ ಮಲ್ತ್‌ದೆ; ನನ ಯಾನ್ ನಿನ ಮಗೆ ಅಂದ್‌ದ್ ಲೆಪ್ಪಾವೊನಿಯೆರೆ ಯೋಗ್ಯತೆ ಎಂಕಿಜ್ಜಿ,

¹⁹ಎನನ್ ನಿನ ಬೇಲೆದಾಕುಲೆಡ್ ಒರಿಯಲೆಕ್ಕ ದೀವೊನ್ಲ,” ಅಂದ್‌ದ್ ಪನ್ಪೆ.’

²⁰ಅಂಚ ಎನ್ನೊಂದು ಲಕ್ಕ್‌ದ್ ತನ ಅಮ್ಮೆರೆನ ಕೈತಲ್‌ಗ್ ಬತ್ತೆ. ಆಂಡ ಆಯೆ ನನಲಾ ದೂರೊಡು ಉಪ್ಪುನಗ ಅಮ್ಮೆ ಆಯನ್ ತೂದು ಉಡಲ್ ಕರಗ್‌ದ್ ಪಾರ್‌ಪೋದು ಆಯನ್ ಅರಾದ್ ಪತ್ತ್‌ದ್ ಆಯಗ್ ಮುತ್ತ ಕೊರಿಯೆ.

²¹ಆಂಡ ಮಗೆ ಆಯಗ್, ‘ಅಮ್ಮೆರೇ,’ ‘ಪರಲೋಕದ ದೇವೆರೆ ವಿರೋಧಲಾ ನಿನ ವಿರೋಧಲಾ ಪಾಪ ಮಲ್ತ್‌ದೆ; ಯಾನ್ ನಿನ ಮಗೆ ಅಂದ್‌ದ್ ಪನಿಯೆರೆ ಯೋಗ್ಯತೆ ಎಂಕಿಜ್ಜಿ,’ ಅಂದ್‌ದ್ ಪಂಡೆ.

²²ಆಂಡ ಅಮ್ಮೆ ತನ ಬೇಲೆದಾಕುಲೆನ್ ಲೆತ್ತ್‌ದ್, ‘ಮಗಕ್ಕ್ ಎಡ್ಡೆಂತಿನ ಅಂಗಿನ್ ತುತ್ತಾಲೆ. ಉಂಬ್ಯನ ಕೈಕ್ ಉಂಗಿಲ ಪಾಡ್ಲೆ. ಕಾರ್‌ಗ್ ಜೋಡು ಪಾಡ್ಲೆ.

²³ಚರ್ಬಿದ ಕುರಿ ಕಡ್ಪುಲೆ, ಪರ್ಬ ಮಲ್ಪುಗ, ಸಂತೋಷ ಮಲ್ಪುಗ.

²⁴ಈ ಮಗೆ ಸೈತ್ ಪೋದಿತ್ತೆ, ಇತ್ತೆ ಆಯೆ ಕುಡ ಬದ್‌ಕ್‌ದ್ ಬೈದೆ; ಪೋಲಿ ಪೋದಿತ್ತೆ, ತಿಕ್ಕಿಯೆ,’ ಅಂದ್‌ದ್ ಪಂಡೆ. ಬೊಕ್ಕ ಅಕುಲು ಸಂತೋಷ ಮಲ್ಪೆರೆ ಸುರು ಮಲ್ತೆರ್.

²⁵ಆ ಪೊರ್ತುಡು ಆಯನ ಮಲ್ಲ ಮಗೆ ಕಂಡೊಡು ಕೆಲಸೊಡು ಇತ್ತೆ. ಆಯೆ ಇಲ್ಲ್ ಮುಟ್ಟುನಗ ವಾದ್ಯೊನ್ಲಾ ನಲಿಪುನೆನ್ಲಾ ಕೇಂಡೆ.

²⁶ಬೇಲೆದಾಕುಲೆಡ, ‘ಉಂದು ದಾದ ಆವೊಂದುಂಡು?’ ಅಂದ್‌ದ್ ಕೇಂಡೆ.

²⁷ಐಕ್ ಬೇಲೆದಾಯೆ ಆಯಗ್, ‘ನಿನ ಮೆಗ್ಯೆ ಬೈದೆ; ಆಯೆ ಎಡ್ಡೆಡ್ ಬತ್ತಿನೆಕ್ಕ್ ನಿನ ಅಮ್ಮೆ ಚರ್ಬಿದ ಕುರಿ ಕಡ್ಪಾದೆ,’ ಪಂಡೆ.

²⁸ಉಂದೆನ್ ಕೇಂಡ್ದ್ ಆಯಗ್ ಕೋಪ ಬತ್ತ್‌ದ್ ಇಲ್ಲದುಲಯಿ ಪೋವಂದೆ ಉಂತಿಯೆ. ಅಪಗ ಆಯನ ಅಮ್ಮೆ ಪಿದಾಯಿ ಬತ್ತ್‌ದ್ ಆಯಡ ಉಲಯಿ ಬರಿಯೆರೆ ನಟ್ಟೊಂಡೆ.

²⁹ಆಂಡ ಆಯೆ ತನ ಅಮ್ಮೆರೆಗ್, ‘ತೂಲ, ಈತ್ ವರ್ಸ ಚಾಕ್ರಿದಾಯಲೆಕ್ಕ ನಿಕ್ಕ್ ಸೊಂದಿಯೆ, ಬೊಕ್ಕ ಯಾನ್ ನಿನ ಅಪ್ಪಣೆನ್ ಏಪಲಾ ಮೀರ್‌ದಿಜಿ. ಆಂಡ ಎಂಕ್ ಎನ ಸ್ನೇಹಿತೆರೆಡೊಪ್ಪ ಸಂತೋಷ ಮಲ್ಪೆರೆ ಒಂಜಿ ಏಡ್‌ನಾಂಡಲಾ ಕೊರ್ತುಜ.

³⁰ಆಂಡ ಈ ನಿನ ಮಗೆ ಸೂಳೆಲೆನ್ ಕಟ್ಟೊಂದು ನಿನ ಬದ್‌ಕ್‌ನ್ ಹಾಳ್ ಮಲ್ತ್ ಬುಡ್ತಿನಾಯಗ್ ಚರ್ಬಿದ ಕುರಿ ಕಡ್ಪಾಯ,’ ಪಂಡೆ.

³¹ಐಕ್ ಅಮ್ಮೆ, ‘ಮಗಾ,’ ‘ಈ ಏಪಲಾ ಎನಡೊಪ್ಪ ಉಲ್ಲ, ಎನ್ನವು ಮಾತಲಾ ನಿನ್ನವೇ.

³²ಆಂಡ ಉಲ್ಲಾಸ ಮಲ್ಪುನವು ಸಂತೋಷ ಪಡೆಪಿನವು ನ್ಯಾಯದವೇ. ದಾಯೆ ಪಂಡ ಈ ನಿನ ಮೆಗ್ಯೆ ಸೈತ್ ಪೋದಿತ್ತೆ, ಇತ್ತೆ ಬದ್‌ಕ್‌ದ್ ಬೈದೆ; ಪೋಲಿ ಪೋದಿತ್ತೆ, ತಿಕ್ಕಿಯೆ ಅಂದ್‌ದ್ ಪಂಡೆ.’”