Read Tulu ಲೂಕೆ 16 Bible Online

ಲೂಕೆ 16 - Tulu bible

ಲೂಕೆ 16

¹ಯೇಸು ತನ ಶಿಷ್ಯೆರೆಗ್ ಇಂಚ ಪಂಡೆ, “ಒರಿ ಐಶ್ವರ್ಯವಂತಗ್ ಒರಿ ಗುಮಾಸ್ತೆ ಇತ್ತೆ. ಆಯನ ಬಗೆಟ್, ಯಜಮಾನನ ಕೈತಲ್‌ ಬತ್ತ್‌ದ್‌, ‘ಇಂಬೆ ನಿನ ಆಸ್ತಿನ್ ಹಾಳ್ ಮಲ್ತೊಂದುಲ್ಲೆ,’ ಅಂದ್‌ದ್ ಏರಾ ದೂರು ಪಂಡೆರ್.

²ಯಜಮಾನೆ ಆಯನ್ ಲೆತ್ತ್‌ದ್ ಆಯಡ, ‘ಈ ಎನ ಆಸ್ತಿನ್ ಲೂಟಿ ಮಲ್ತೊಂದುಲ್ಲಂದ್‌ದ್ ನಿನ ಬಗೆಟ್ ಯಾನ್ ಕೇನೊಂದುಲ್ಲೆ. ಈ ಮಲ್ತೊಂದಿತ್ತಿ ಗುಮಾಸ್ತಿಕೆದ ಲೆಖ್ಖೊನು ಕೊರ್ಲ. ನನ ಈ ಎನ ಗುಮಾಸ್ತೆ ಆದುಪ್ಪೆರೆ ಸಾದ್ಯ ಇಜ್ಜಿ.’ ಪಂಡೆ.

³ಉಂದೆನ್ ಕೇಂಡ್ದ್, ‘ನನ ಯಾನ್ ದಾದ ಮಲ್ಪುನು? ಎನ ಯಜಮಾನೆ ಎನನ್ ಈ ಗುಮಾಸ್ತಿಕೆಡ್ ದೆತ್ತ್‌ದ್ ಬುಡ್ಪೆ ಅತ್ತಾ? ಗರ್ಪೆರೆ ಎಂಕ್ ತೀರಂದ್, ನಟ್ಟರೆ ಎಂಕ್ ನಾಚಿಗೆ ಆಪುಂಡು.

⁴ಈ ಗುಮಾಸ್ತಿಕೆಡ್ದ್ ಎನನ್ ದೆತ್ತಿ ಬೊಕ್ಕ ಜನೊಕುಲು ಎನನ್ ತನ್ಕುಲೆ ಇಲ್ಲದುಲಯಿ ಸೇರಾಯಿಜೆರ್ಡ ಎನ ಪರಿಸ್ಥಿತಿ ಭಯಂಕರ ಅವು,’ ಅಂದ್‌ದ್ ತನ ಉಲಯಿ ಎನ್ನೊಂದು,

⁵ತನ ಕರ್ತವಗ್ ಕೊರೊಡಾಯಿ ಸಾಲದಾಕುಲೆಡ್ ಒರಿ ಒರಿಯನ್ ಕೈತಲ್‌ ಲೆತ್ತ್‌ದ್ ಸುರುತ್ತಾಯಡ, ‘ಈ ಎನ ಧನಿಕ್ ಏತ್ ಸಾಲ ಕೊರೊಡು?’ ಅಂದ್‌ದ್ ಕೇಂಡೆ.

⁶ಐಕ್ ಆಯೆ, ‘ನೂದು ಡಬ್ಬಿ ಎಣ್ಣೆ,’ ಅಂದ್‌ದ್ ಪನ್ನಗ ಆಯಡ, ನಿನ ಬಿಲೆಪತ್ರಿಕೆನ್ ದೆತ್ತೊಂದು, ‘ಬೇಗ ಕುಲ್ಲೊಂದು ಐವ ಡಬ್ಬಿ ಅಂದ್‌ದ್ ಬರೆಲ,’ ಪಂಡೆ

⁷ಬೊಕ್ಕೊರಿಯನ್, ‘ಈ ಏತ್ ಸಾಲ ಕೊರೊಡು?’ ಅಂದ್‌ದ್ ಕೇನ್ನಗ ‘ನೂದು ಖಂಡಿಗೆ ಗೋದಿ,’ ಪಂಡೆ. ಆಯಡ, ‘ಈ ನಿನ ಬಿಲೆಪತ್ರಿಕೆನ್ ದೆತ್ತೊಂದು, ಎಣ್ಪ ಖಂಡಿಗೆ ಅಂದ್‌ದ್ ಬರೆಲ,’ ಪಂಡೆ

⁸ಯಜಮಾನೆ ಉಂದೆನ್ ಕೇಂಡ್ದ್ ಅನ್ಯಾಯ ಮಲ್ತಿ ಗುಮಾಸ್ತನ್ ಉಂಬೆ ಎಡ್ಡೆ ಮಲ್ತೆ ಅಂದ್‌ದ್ ಪುಗರಿಯೆ. ದಾಯೆ ಪಂಡ ಲೋಕದಾಕುಲು ಬೊಲ್ಪುದ ಜನೊಕುಲೆಡ್ದ್‌ಲಾ ಬುದ್ಧಿವಂತೆರಾದುಲ್ಲೆರ್.

⁹ಈ ಲೋಕೊಡುಪ್ಪುನಗ ಅನ್ಯಾಯದ ಕಾಸ್‌ಡ್ದ್ ಬಡವೆರೆಗ್ ಸಹಾಯ ಕೊರ್ದು ಸ್ನೇಹಿತೆರೆನ್‌ ಮಲ್ತೊನ್ಲೆ. ಇಂಚ ಮಲ್ತ್ಂಡ ನಿಕ್ಲೆನ ಕೈ ಬುಡ್ದು ಪೋನಗ ನಿಕ್ಲೆಗ್ ನಿತ್ಯ ಗುಡಾರೊಡು ಸೇರಾವೊನ್ವೆರ್ ಅಂದ್‌ದ್ ಯಾನ್ ಪನ್ಪೆ.

¹⁰ಒಂತೆಡ್ ನಂಬಿಕೆ ಇತ್ತಿನಾಯೆ ಮಸ್ತ್‌ಡ್ಲಾ ನಂಬಿಗೆದಾಯೆ ಆಪೆ. ಒಂತೆದೆಟ್ ಅನ್ಯಾಯಗಾರೆ ಆಂಡ ಮಸ್ತ್‌ದೆಟ್ಲಾ ಅನ್ಯಾಯಗಾರೆ ಆಪೆ.

¹¹ಇಂಚ ಉಪ್ಪುನಗ ಅನ್ಯಾಯದ ಆಸ್ತಿದ ಬಗೆಟ್ ನಿಕುಲು ನಂಬಿಕೆದಾಕುಲು ಆಯಿಜರ್ಡ ನಿಜವಾಯಿನ ಆಸ್ತಿನ್ ನಿಕ್ಲೆ ವಶೊಕ್ಕು ಏರ್ ಕೊರುವೆರ್?

¹²ಬೊಕ್ಕೊರಿಯನ ಸೊತ್ತುದ ಸಂಗತಿಡ್ ನಿಕುಲು ನಂಬಿಗಸ್ತೆರಾಯಿಜರ್ಡ ನಿಕ್ಲೆ ಸ್ವಂತದೆನ್ ನಿಕ್ಲೆಗ್ ಏರ್ ಕೊರುವೆರ್?

¹³ವಾ ಬೇಲೆದಾಯೆಲಾ, ರಡ್ಡ್ ಯಜಮಾನನ ಚಾಕ್ರಿ ಮಲ್ಪೆರೆ ಸಾದ್ಯ ಇಜ್ಜಿ. ಆಯೆ ಒರಿಯನ್ ಪಗೆ ಮಲ್ತ್‌ದ್ ಬೊಕ್ಕೊರಿಯನ್ ಪ್ರೀತಿ ಮಲ್ಪುವೆ. ಇಜ್ಜಾಂಡ ಒರಿಯನ್ ಎಡ್ಡೆ ಮಲ್ತೊಂದು ಬೊಕ್ಕೊರಿಯನ್ ತಾತ್ಸಾರ ಮಲ್ಪುವೆ. ನಿಕುಲು ದೇವೆರೆನ್ಲಾ ಕಾಸ್‌ನ್ಲಾ ಒಟ್ಟುಗು ಸೇವೆ ಮಲ್ಪೆರೆ ಆವಂದ್.”

¹⁴ಪರಿಸಾಯೆರ್ ಈ ಮಾತ ಪಾತೆರೊಲೆನ್ ಕೇಂಡ್ದ್ ತನ್ಕುಲು ಕಾಸ್‌ದಾಸೆ ಇತ್ತಿನಾಕುಲು ಆದಿತ್ತಿನೆಡ್ದ್ ಯೇಸುನು ಮಸ್ಕಿರಿ ಮಲ್ತೆರ್.

¹⁵ಅಪಗ ಆಯೆ ಅಕ್ಲೆಡ ಪಂಡಿನಿ ದಾನೆಂದ್ಂಡ, “ನರಮಾನಿಲೆ ಎದುರುಡು ನೀತಿವಂತೆರ್ ಅಂದ್‌ದ್ ನಿಕುಲು ತೋಜಾವೊನುನಾಕುಲು ನಿಕುಲು; ಆಂಡಲಾ ದೇವೆರ್ ನಿಕ್ಲೆ ಉಡಲ್‌ನ್ ತೆರಿದುಲ್ಲೆ. ನರಮಾನಿಲೆಡ್ ಮಿತ್ತ ಸ್ಥಾನದಾಯೆ ಅಂದ್‌ದ್ ಪನ್ಪಾವೊನುನವು ದೇವೆರೆ ದೃಷ್ಟಿಡ್ ಪೇಸಿಗೆ ಆದುಂಡು.

¹⁶“ನ್ಯಾಯಕಟ್ಟ್‌ಲಾ ಪ್ರವಾದಿಲುಲಾ ಯೋಹಾನನ ಮುಟ್ಟ ಮಾತ್ರ. ಐಡ್ದ್ ಬೊಕ್ಕ ದೇವೆರೆ ರಾಜ್ಯದ ಸುವಾರ್ತೆ ಸಾರಿಯೊಂದು ಉಂಡು. ಐಟ್ಟ್ ಮಾತೆರ್ಲಾ ಬಲತ್ಕಾರೊಡು ನೂರುವೆರ್.

¹⁷ಬಾನಲಾ ಭೂಮಿಲಾ ಆಳಿದ್ ಪೋಪಿನವು ಸುಲಭ. ಆಂಡ ನ್ಯಾಯಕಟ್ಟ್‌ದ ಒಂಜಿ ಸೊನ್ನೆಲಾ ಬೂರ್ದು ಪೋವಂದ್.

¹⁸“ತನ ಬೊಡೆದಿನ್ ಬುಡ್ದು ಬೊಕ್ಕೊರ್ತಿನ್ ಮದ್ಮೆ ಮಲ್ತೊನುನಾಯೆ ವ್ಯಭಿಚಾರ ಮಲ್ಪುನಾಯೆ ಆದುಲ್ಲೆ. ಬೊಕ್ಕ ಕಂಡನಿ ಬುಡ್ತಿನಲೆನ್ ಮದ್ಮೆ ಮಲ್ತೊನುನಾಯೆ ವ್ಯಭಿಚಾರ ಮಲ್ಪುನಾಯೆ ಆದುಲ್ಲೆ.

¹⁹“ಒರಿ ಐಶ್ಚರ್ಯವಂತೆ ಇತ್ತೆ. ಆಯೆ ಪೊರ್ಲುದ ನೇರಲೆ ಅಂಗಿನ್ಲಾ ನಾರ್‌ಮಡಿತ ಕುಂಟುನು ತುತ್ತೊಂದು ಪ್ರತಿದಿನಲಾ ಗನಸ್ಥಿಕೆಡ್ ಸುಖ ಸಂತೋಷ ಪಡೆಯೊಂದಿತ್ತೆ.

²⁰ಆಯನ ಇಲ್ಲದ ಬಾಕಿಲ್‌ದಲ್ಪ ಲಾಜರೆ ಪನ್ಪಿ ಒರಿ ನಟ್ಟುನಾಯೆ ಇತ್ತೆ. ಉಂಬೆ ಮೆಯಿ ನಿಲಿಕೆ ಗಜ್ಜಿ ಇತ್ತಿನಾಯೆ.

²¹ಐಶ್ಚರ್ಯವಂತನ ಮೇಜಿಡ್ದ್ ಬೂರಿನ ಮಡೆನ್ ತಿನೊಂದಿತ್ತೆ; ನಾಯಿಲು ಬತ್ತ್‌ದ್ ಆಯನ ಗಾಯೊಲೆನ್ ನಕ್ಕೊಂದಿತ್ತ.

²²ಇಂಚ ಉಪ್ಪುನಗ ಒಂತೆ ಸಮಯೊಡ್ದು ಬೊಕ್ಕ ಆ ನಟ್ಟುನಾಯೆ ಸೈತೆ; ದೂತೆರ್ ಆಯನ್ ದೆತ್ತೊಂದು ಪೋದು ಅಬ್ರಹಾಮುನ ತಿಗಲೆಗ್ ಒರಗಾಯೆರ್. ಆ ಐಶ್ವರ್ಯವಂತೆಲಾ ಸೈತೆ; ಆಯನ ಸೈತಿ ಕರ್ಮಕ್ರಿಯ ಆಂಡ್.

²³ಆಯೆ ಪಾತಾಳದುಲಯಿ ನರಕೊಂದು ಉಪ್ಪುನಗ ಕಣ್ಣ್ ದೆರ್ತ್ತ್‌ದ್ ದೂರೊಡ್ದು ಅಬ್ರಹಾಮುನ ತಿಗಲೆಗ್ ಒರಗೊಂದಿತ್ತಿ ಲಾಜರನ್ ತೂದು,

²⁴‘ಅಮ್ಮೆರೇ, ಅಬ್ರಹಾಮೋ, ಎನ ಮಿತ್ತ್ ಕನಿಕರ ಮಲ್ತ್‌ದ್ ಲಾಜರನ್ ಕಡಪುಡು. ಆಯೆ ತನ ಕೊಡಿ ಬಿರೆಲ್‌ನ್ ನೀರ್‌ಡ್ ಮುರ್ಕಾದ್ ಎನ ನಾಲಯಿನ್ ಪಸೆ ಮಲ್ಪಡ್; ಈ ಉರಿಟ್ಟ್ ಸಂಕಟ ಪಡೆಯೊಂದುಲ್ಲೆ,’ ಅಂದ್‌ದ್ ಬುಲ್ತೆ.

²⁵ಆಂಡ ಅಬ್ರಹಾಮು, ‘ಮಗಾ, ನಿನ ಬದ್‌ಕ್‌ಡ್ ಈ ಆಸೆ ಮಲ್ತಿನ ಮಾತ ಎಡ್ಡೆನ್ ಪಡೆತ; ಅಂಚೆನೇ ಲಾಜರೆಲಾ ಕಷ್ಟೊನು ಪಡೆತೆ ಪನ್ಪಿನೆನ್ ನೆನೆಪು ಮಲ್ಪುಲ. ಆಂಡ ಇತ್ತೆ ಆಯೆ ಮುಲ್ಪ ಸುಖ ಪಡೆಪೆ; ನಿಕ್ಕ್ ಅವುಲು ಸಂಕಟ.

²⁶ಉಂದು ಮಾತ್ರತ್ತಂದೆ ಎಂಕುಲೆಗ್ಲಾ ನಿಕ್ಲೆಗ್ಲಾ ನಡುಟು ಒಂಜಿ ಕಣಿ ಉಂಡು; ಅವೆಡ್ದಾವರ ಈ ಕಡೆಡ್ದ್ ನಿಕ್ಲೆನ ಕಡೆಕ್ಕ್ ಪೋಯೆರ್ ಸಾದ್ಯ ಇಜ್ಜಿ; ಬೊಕ್ಕ ಆ ಕಡೆಡ್ದ್ ಎಂಕ್ಲೆನ ಕಡೆಕ್ಕ್ ಏರ್ಲಾ ದಾಂಟ್ಯೆರೆ ಸಾದ್ಯ ಇಜ್ಜಿ,’ ಪಂಡೆ.

²⁷ಅಪಗ ಆಯೆ, ‘ಅಮ್ಮೆರೇ, ಅಂಚಾಂಡ ಲಾಜರನ್ ಎನ ಅಮ್ಮೆರೆನ ಇಲ್ಲಗ್ ಕಡಪುಡೊಡು ಅಂದ್‌ದ್ ನಿನಡ ನಟ್ಟೊನ್ವೆ.

²⁸ಎಂಕ್ ಐನ್ ಜನ ಪಲಯೆ ಮೆಗ್ಯಾಡ್ಲು ಉಲ್ಲೆರ್; ಅಕುಲುಲಾ ಈ ಬೇನೆದ ಜಾಗ್‌ಗ್ ಬರಂದಿಲೆಕ್ಕ ಲಾಜರೆ ತಾನ್ ತೂಯಿನೆನ್ ಅಕ್ಲೆಗ್ ಮಾತ ತೆರಿಪಾವಡ್,’ ಅಂದ್‌ದ್ ನಟ್ಟೊನ್ವೆ.

²⁹ಆಂಡ ಅಬ್ರಹಾಮು ಆಯಡ, ‘ಮೋಶೆನ ಬೊಕ್ಕ ಪ್ರವಾದಿಲೆ ಗ್ರಂಥೊಲು ಅಕ್ಲೆಡ ಉಂಡು; ಅವೆನ್ ಓದಡ್,’ ಪಂಡೆ.

³⁰ಐಕ್ ಆಯೆ, ‘ಅಮ್ಮೆರೇ, ಅಬ್ರಹಾಮೋ, ಅಂಚತ್ತ್; ಸೈತಿನಕಲೆನ ಕಡೆಡ್ದ್ ಒರಿ ಅಕ್ಲೆನ ಕೈತಲ್‌ ಪೋಂಡ ಒಂಜಿ ವೇಳೆ ಅಕುಲು ದೇವೆರೆ ಕಡೆಕ್ಕ್ ತಿರ್ಗ್‌ದ್ವೆರ್,’ ಪಂಡೆ.

³¹ಅಬ್ರಹಾಮು ಆಯಡ, ‘ಅಕುಲು ಮೋಶೆನಲಾ ಪ್ರವಾದಿಲೆ ಪಾತೆರೊನ್ಲಾ ಕೇನುಜೆರ್ಡ ಸೈತ್‌ದ್ ಪೋದಿತ್ತಿನಾಯೆ ಒರಿ ಜೀವ ಆದ್ ಲಕ್ಕ್ಂಡಲಾ ಅಕುಲು ನಂಬಯೆರ್,’” ಅಂದ್‌ದ್ ಪಂಡೆ.