Read Tulu ಲೂಕೆ 17 Bible Online

ಲೂಕೆ 17 - Tulu bible

ಲೂಕೆ 17

¹ಯೇಸು ತನ ಶಿಷ್ಯೆರೆಡ ಪಂಡಿನಿ, “ಜನೊಕುಲೆನ್ ಶೋಧನೆಗ್ ನಡಪಾವುನ ಸಂಗತಿಲು ಬರಂದೆ ಉಪ್ಪಂದ್; ಆಂಡಲಾ ಅವು ಏರೆಡ್ದ್ ಬರ್ಪುಂಡಾ ಆಯನ ಗತಿನ್ ದಾನೆಂದ್ ಪನೊಲಿ?

²ಆಯೆ ಈ ಎಲ್ಯಾಕುಲೆಡ್ ಒರಿಯಗ್ ತೊಂದರೆ ಕೊರ್ಪಿನೆಡ್ದ್ ತನ ಕಂಟೆಲ್‌ಗ್ ಮಲ್ಲ ಬೀಸುನ ಕಲ್ಲ್ ಕಟ್ಟ್‌ದ್ ಕಡಲ್‌ಗ್ ಪಾಡೊನುನವೇ ಎಡ್ಡೆ ಅಂದ್‌ದ್ ತೋಜುಂಡು.

³ನಿಕ್ಲೆನ ಬಗೆಟ್ ಎಚ್ಚರಿಕೆ ಆದುಪ್ಪುಲೆ. ನಿನ ಸಹೋದರೆ ಪಾಪ ಮಲ್ತ್ಂಡ ಆಯಗ್ ದಟ್ಟಿಲ. ಆಯೆ ಪಶ್ಚಾತಾಪ ಪಡೆಂಡ ಆಯನ ಪಾಪೊನು ಮಾಪು ಮಲ್ಪು.

⁴ನಿನ ಸಹೋದರೆ ಒಂಜಿ ದಿನೊಟು ಏಳ್ ಸರ್ತಿ ನಿಕ್ಕ್ ಪಾಪ ಮಲ್ತೆಡ, ಆಯೆ ಏಳ್ ಸರ್ತಿ ನಿನ ಕೈತಲ್‌ ಬತ್ತ್‌ದ್, ‘ಯಾನ್ ಪಶ್ಚಾತಾಪ ಪಡೆಪೆ,’ ಎನನ್ ಮಾಪು ಮಲ್ಪುಲ ಪಂಡ್ಂಡ ಆಯನ್ ಮಾಪು ಮಲ್ಪುಲ.”

⁵ಅಪೊಸ್ತಲೆರ್ ಕರ್ತವಡ, “ಎಂಕ್ಲೆನ ನಂಬಿಕೆನ್ ಬಲ ಮಲ್ಪುಲ,” ಪಂಡೆರ್.

⁶ಐಕ್ ಕರ್ತವೆ ಪಂಡಿನಿ, “ದಾಸೆಮಿ ಬಿತ್ತ್‌ದಾತ್ ನಂಬಿಕೆ ಇತ್ತ್ಂಡ, ‘ಈ ಅರ್ತಿದ ಮರೊಕು ಬೇರ್‌ದೊಟ್ಟಿಗೆ ಕಡಲ್ಡ್ ಬೂರ್ಲ’ ಅಂದ್‌ದ್ ಪಂಡಡ, ಅವುಲಾ ನಿಕ್ಲೆನ ಪಾತೆರೊನು ಕೇನುಂಡು.

⁷“ನಿಕ್ಲೆಡ್ ಏರೆಗಾಂಡಲಾ ದಪ್ಪುನ ಅತ್ತ್‌ಂಡ ಕುರಿ ಮೇಪಾವು ಚಾಕ್ರಿದಾಯೆ ಇತ್ತ್ಂಡ ಆಯೆ ಕಂಡೊಡ್ದು ಇಲ್ಲಗ್ ಬತ್ತಿ ಕೂಡ್ಲೆ, ಬೇಲೆದಾಯಗ್ ಇತ್ತೆನೇ ಬತ್ತ್‌ದ್ ವಣಸ್‌ಗ್ ಕುಲ್ಲು ಅಂದ್‌ದ್ ಪನ್ಪೆನಾ?

⁸ಇಜ್ಜಿ, ಅಂಚ ಪನಂದೆ, ‘ಈ ಎನ ವಣಸ್ ತಯಾರ್ ಮಲ್ಪು ಯಾನ್ ವಣಸ್ ಮಲ್ತ್‌ದ್ ಬರ್ಪಿನೆಟ್ಟ ಎನ ಚಾಕ್ರಿ ಮಲ್ಪುಲ; ಐಡ್ದ್ ಬೊಕ್ಕ ಈ ವಣಸ್ ಮಲ್ಪುಲ,’ ಅಂದ್‌ದ್ ಪನ್ಪೆ ಅತ್ತಾ?

⁹ತಾನ್ ಅಪ್ಪಣೆ ಮಲ್ತಿ ಬೇಲೆ ಮುಗಿ ಬೊಕ್ಕ ಚಾಕ್ರಿದಾಯಗ್ ನಿನಡ್ದ್ ಉಪಕಾರ ಆಂಡ್ ಅಂದ್‌ದ್ ಆಯಗ್ ಪನ್ಪೆನಾ? ಇಂಚೆನೆ ನಿಕ್ಲೆನ ಸಂಗತಿಲಾ.

¹⁰ನಿಕ್ಲೆಗ್ ಅಪ್ಪಣೆ ಕೊರಿನವು ಮಾತೆನ್ಲಾ ಮಲ್ತಿ ಬೊಕ್ಕ, ‘ಎಂಕುಲು ಚಾಕ್ರಿದಾಕುಲು ದಾಲಾ ಪ್ರಯೋಜನದಾಂತಿನಾಕುಲು, ಎಂಚಂದ್ಂಡ ಮಲ್ಪೊಡಾಯಿನೆನ್ ಮಾತ್ರ ಎಂಕುಲು ಮಲ್ತ, ಪನ್ಲೆ ಅಂದ್‌ದ್ ಪಂಡೆ.’”

¹¹ಯೇಸು ಸಮಾರ್ಯ ಗಲಿಲಾಯೊನು ಕಡತ್‌ದ್ ಯೆರೂಸಲೇಮುಗು ಪೋಯೆ.

¹²ಒಂಜಿ ಹಳ್ಳಿಗ್ ಬತ್ತಿನಪಗ ಪತ್ತ್ ಜನ ಕೊಷ್ಟದಾಕುಲು ಆಯಡ್ದ್ ದೂರೊಡು ಉಂತುದು

¹³“ಯೇಸೋ, ಗುರೂ, ಎಂಕ್ಲೆನ ಮಿತ್ತ್ ಕನಿಕರ ತೋಜಾಲ!” ಪಂಡ್ದ್ ಬುಲ್ತುದು ಪಂಡೆರ್.

¹⁴ಯೇಸು ಅಕ್ಲೆನ್ ತೂದು, “ನಿಕುಲು ಪೋದು ಯಾಜಕೆರ್‌ಗ್ ಮೆಯಿ ತೋಜಾಲೆ,” ಅಂದ್‌ದ್ ಪಂಡೆ. ಅಕುಲು ಪೋನಗನೇ ಶುದ್ಧ ಆಯೆರ್.

¹⁵ಅಕ್ಲೆಡ್ ಒರಿ ತನ್ಕ್ ಗುಣ ಆದುಪ್ಪುನೆನ್ ತೂದು ಮಲ್ಲ ಶಬ್ಧೊಡು ದೇವೆರೆನ್ ಪುಗರ್‌ದ್ ಪಿರ ಬತ್ತ್‌ದ್,

¹⁶ಯೇಸುನ ಪಾದೊಲೆಗ್ ಅಡ್ಡಬೂರ್ದು ಸೊಲ್ಮೆ ಸಂದಾದ್ ಸುಗಿತೆ. ಆಯೆ ಸಮಾರ್ಯದಾಯೆ.

¹⁷ಯೇಸು ಉಂದೆನ್ ತೂದು, “ಪತ್ತ್ ಜನ ಶುದ್ಧ ಆಯೆರತ್ತಾ ಬಾಕಿದ ಒಂರ್ಬ ಜನ ಓಲ್ಲೆರ್?

¹⁸ದೇವೆರೆಗ್ ಮೈಮೆ ಕೊರಿಯೆರೆ ಪರದೇಶದಾಯೆ ಅತ್ತಂದೆ ಬೇತೆ ಏರ್ಲಾ ಪಿರ ಬತ್ತಿಜೆರತ್ತಾ?” ಅಂದ್‌ದ್ ಪಂಡ್ದ್

¹⁹ಯೇಸು ಆಯಡ, “ಲಕ್ಕ್‌ದ್ ಪೋಲ, ನಿನ ನಂಬಿಕೆ ನಿನನ್ ಗುಣ ಮಲ್ತ್ಂಡ್,” ಅಂದ್‌ದ್ ಪಂಡೆ.

²⁰ದೇವೆರೆ ರಾಜ್ಯ ಏಪ ಬರ್ಪುಂಡು ಅಂದ್‌ದ್ ಪರಿಸಾಯೆರ್ ಆಯಡ ಕೇನ್ನಗ ಆಯೆ ಅಕ್ಲೆಡ “ದೇವೆರೆ ರಾಜ್ಯ ಡಂಭಾಚಾರೊಡು ಬರ್ಪುಜಿ.

²¹ಇಂದಾ, ‘ಮೂಲುಂಡು,’ ಅಂದಾ, ‘ಅವುಲುಂಡು,’ ಅಂದ್‌ದ್ ಏರೆಗ್ಲಾ ಪನಿಯೆರೆ ಆಪುಜಿ, ದಾಯೆಗ್ ಪಂಡ ದೇವೆರೆ ರಾಜ್ಯ ಅವು ನಿಕ್ಲೆ ಉಲಯಿ ಉಂಡು ಅಂದ್‌ದ್ ತೆರಿಯೊನ್ಲೆ,” ಅಂದ್‌ದ್ ಉತ್ತರ ಕೊರಿಯೆ.

²²ಬೊಕ್ಕ ಯೇಸು ತನ ಶಿಷ್ಯೆರೆಡ ಪಂಡಿನಿ ದಾನೆಂದ್ಂಡ, “ಒಂಜಿ ಕಾಲ ಬರ್ಪುಂಡು, ಐಟ್ಟ್ ನಿಕುಲು ನರಮಾನಿ ಮಗನ ದಿನೊಕುಲೆಡ್ ಒಂಜಿ ದಿನೊನು ತೂವೊಡು ಅಂದ್‌ದ್ ಆಸೆ ಮಲ್ತರ್ಡಲಾ ಅವೆನ್ ತೂವಂದೆ ಉಪ್ಪುವರ್.

²³ಜನೊಕುಲು ನಿಕ್ಲೆಗ್ ಆಯೆ ‘ಅವುಲುಲ್ಲೆ,’ ‘ಮೂಲುಲ್ಲೆ,’ ಅಂದ್‌ದ್ ಪಂಡ್ಂಡ ನಿಕುಲು ನಂಬೊಡ್ಚಿ, ಅಕ್ಲೆನ ಬೆರಿ ಪತ್ತುನಲಾ ಬೊಡ್ಚಿ.

²⁴ಮಿಂಚಿ ಮಿಂಚೊಂದು ಬಾನೊಡು ಒಂಜಿ ಕಡೆಡ್ದ್ ಬೊಕ್ಕೊಂಜಿ ಕಡೆಕ್ಕ್ ಎಂಚ ಬೊಲ್ಪು ಕೊರ್ಪುಂಡಾ ಅಂಚೆನೇ ನರಮಾನಿ ಮಗೆ ತನ ದಿನೊಟು ತೋಜುವೆ.

²⁵ಆಂಡ ದುಂಬತ್ತ ಆಯೆ ಮಸ್ತ್ ಕಷ್ಟೊಲೆನ್ ಅನುಭವ ಮಲ್ತ್‌ದ್ ಈ ಕಾಲದ ಜನೊಕುಲೆಡ್ದ್ ತಿರಸ್ಕಾರ ಪಡೆವೊಡು.

²⁶ನೋಹನ ದಿನೊಕುಲೆಡ್ ಎಂಚ ಇತ್ತ್ಂಡ ಅಂಚೆನೇ ನರಮಾನಿ ಮಗನ ದಿನೊಟುಲಾ ನಡಪುಂಡು.

²⁷ನೋಹೆ ಕಪ್ಪಲ್‌ಡ್ ಸೇರಿನ ದಿನ ಮುಟ್ಟ ಜನೊಕುಲು ಉನೊಂದಿತ್ತೆರ್, ಪರೊಂದಿತ್ತೆರ್, ಬೊಕ್ಕ ಮದ್ಮೆ ಮಲ್ತೊಂದಿತ್ತೆರ್ ಮದ್ಮೆ ಮಲ್ತ್ ಕೊರೊಂದಿತ್ತೆರ್. ಆ ಸಮಯೊಡು ಮಲ್ಲ ಬೊಲ್ಲ ಬತ್ತ್‌ದ್ ಮಾತೆರೆನ್ ನಾಶ ಮಲ್ತ್ಂಡ್.

²⁸ಬೊಕ್ಕ ಲೋಟನ ದಿನೊಟು ನಡತಿ ಪ್ರಕಾರ ನಡಪುಂಡು. ಅಕುಲು ಉನೊಂದಿತ್ತೆರ್, ಪರೊಂದಿತ್ತೆರ್, ದೆತ್ತೊನೊಂದಿತ್ತೆರ್, ಮಾರೊಂದಿತ್ತೆರ್, ನಡೊಂದಿತ್ತೆರ್, ಕಟ್ಟೊಂದಿತ್ತೆರ್.

²⁹ಆಂಡ ಲೋಟೆ ಸೋದೋಮು ಪಟ್ಟಣನ್‌ ಬುಡ್ದು ಪೋಯಿ ಬೊಕ್ಕ ಬಾನೊಡ್ದು ತೂ ಬೊಕ್ಕ ಗಂಧಕೊಲು ಬೂರ್ದು ಅಕ್ಲೆನ್ ಮಾತೆರೆನ್ ನಾಶ ಮಲ್ತ್ಂಡ್.

³⁰ನರಮಾನಿ ಮಗೆ ತೋಜಿದ್ ಬರ್ಪಿ ದಿನೊಟು ಅವ್ವೇ ರೀತಿಡ್ ಉಪ್ಪು.

³¹“ಆ ದಿನೊಟು ಮಾಳಿಗೆಡ್ ಉಪ್ಪುನಾಯೆ ಇಲ್ಲದುಲಯಿ ತನ ವಸ್ತುಲೆನ್ ದೆತ್ತೊನಿಯೆರೆ ತಿರ್ತ್ ಜಪ್ಪೆರೆ ಬಲ್ಲಿ; ಅವ್ವೇ ಪ್ರಕಾರ ಕಂಡೊಡು ಉಪ್ಪುನಾಯೆಲಾ ಪಿರ ಇಲ್ಲಡೆ ಪೋಯೆರೆ ಬಲ್ಲಿ.

³²ಲೋಟನ ಬೊಡೆದಿನ್ ನೆನೆಪು ಮಲ್ತೊನ್ಲೆ.

³³ತನ ಪ್ರಾಣೊನು ಒರಿಪಾವೊಡು ಅಂದ್‌ದ್ ಉಪ್ಪುನಾಯೆ ಅವೆನ್ ಕಳೆವೊನ್ವೆ. ಪ್ರಾಣೊನು ಕಳೆವೊಂಡಿನಾಯೆ ಅವೆನ್ ಒರಿಪಾವೊನ್ವೆ.

³⁴ಆ ರಾತ್ರೆಡ್ ಒಂಜೇ ಮಂಚವುದ ಮಿತ್ತ್ ಇರ್ವೆರ್ ಜೆತ್ತ್‌ದ್ದುಪ್ಪುನಗ; ಒರಿಯನ್ ದೆತ್ತೊನುವೆರ್, ಬೊಕ್ಕೊರಿಯನ್ ಬುಡ್ಪೆರ್.

³⁵ಇರ್ವೆರ್ ಪೊಂಜೊವುಲು ಒಂಜೇ ಕಲ್ಲ್‌ಡ್ ಬೀಸೊಂದುಪ್ಪುವೆರ್; ಒರ್ತಿನ್ ದೆತ್ತೊನ್ವೆರ್ ಒರ್ತಿನ್ ಬುಡ್ಪೆರ್.”

³⁶ಇರ್ವೆರ್ ಕಂಡೊಡು ಉಪ್ಪುವೆರ್, ಒರಿಯನ್ ದೆತ್ತೊನ್ವೆರ್, ಒರಿಯನ್ ಬುಡ್ಪೆರ್.

³⁷ಈ ಪಾತೆರೊಗು ಶಿಷ್ಯೆರ್‌ಲು, “ಕರ್ತವಾ, ಅವು ಒಲ್ಪ ಆಪುಂಡು?” ಅಂದ್‌ದ್ ಕೇನ್ನಗ ಆಯೆ ಅಕ್ಲೆಗ್, “ಪುಣೊಕುಲು ಓಲುಂಡಾ ಅಲ್ಪನೇ ಗಿಡಿಕುಲು ಕೂಡುಂಡು,” ಅಂದ್‌ದ್ ಪಂಡೆ.