Read Tulu ಲೂಕೆ 19 Bible Online

ಲೂಕೆ 19 - Tulu bible

ಲೂಕೆ 19

¹ಯೇಸು ಯೆರಿಕೊ ಪಟ್ಟಣದ ಉಲಯಿ ಕಡತ್‌ದ್ ಪೋವೊಂದುಪ್ಪುನಗ

²ಅಲ್ಪ ಜಕ್ಕಾಯೆ ಪನ್ಪಿ ಒರಿ ನರಮಾನಿ ಇತ್ತೆ. ಆಯೆ ಸುಂಕದ ಗುತ್ತಿಗೆದಾಯೆಲಾ ಐಶ್ವರ್ಯವಂತೆಲಾ ಆದಿತ್ತೆ.

³ಆಯೆ ಯೇಸು ಏರಂದ್‌ದ್ ತೂವೆರೆ ಮನಸ್ ಮಲ್ತೆಡಲಾ ತಾನ್ ಕುದ್ಯ ಇತ್ತಿನೆಡ್ದ್ ಜನೊಕುಲೆ ಗುಂಪುಡ್ದು ತೋಜಂದೆ ಪೋಯೆ.

⁴ಐಡ್ದಾವರ ಆಯನ್ ತೂವೆರೆಗಾದ್ ಎದುರು ಪಾರ್‌ಪೋದು ಯೇಸು ಬರೊಂದುಪ್ಪು ಮಾರ್ಗೊಡು ಇತ್ತಿ ಗೋಳಿದ ಮರೊಕು ಮಿತ್ತರಿಯೆ.

⁵ಯೇಸು ಆ ಜಾಗ್‌ಗ್ ಬನ್ನಗ ಮಿತ್ತ್ ತೂದು ಜಕ್ಕಾಯ, “ಇತ್ತೆನೇ ಜತ್ತ್‌ದ್ ಬಲ, ಯಾನ್ ಇನಿ ನಿನ ಇಲ್ಲಡ್ ಉಂತುವೆ,” ಅಂದ್‌ದ್ ಆಯಡ ಪನ್ನಗ

⁶ಆಯೆ ಅಪಗನೆ ಮರೊಡ್ದು ಜತ್ತ್‌ದ್ ಯೇಸುನು ಮಸ್ತ್ ಸಂತೋಷೊಡು ಇಲ್ಲಗ್ ಲೆತ್ತೊಂದು ಪೋಯೆ.

⁷ಉಂದೆನ್ ತೂಯಿನಾಕುಲು ಮಾತೆರ್ ಗುಣುಗುಟ್ಟುದು, “ಉಂಬೆ ಪಾಪಿ ಆದುಪ್ಪುನಾಯನ ಒಟ್ಟುಗು ಉಂತಿಯರೆ ಪೋಪೆ,” ಅಂದ್‌ದ್ ಪಂಡೆರ್.

⁸ಆಂಡ ಜಕ್ಕಾಯೆ ಕರ್ತವಾ, “ತೂಲ, ಎನ ಆಸ್ತಿಡ್ ಅರ್ಧೊನು ಬಡವೆರೆಗ್ ಕೊರ್ಪೆ; ಬೊಕ್ಕ ಅನ್ಯಾಯೊಡು ಏರೆಗಾಂಡಲಾ ಮೋಸ ಮಲ್ತಿನವು ಉಂಡುಡ ಐತ ನಾಲ್ ಪಾಲ್ ದಾತ್ ಪಿರ ಕೊರ್ಪೆ,” ಅಂದ್‌ದ್ ಪಂಡೆ.

⁹ಉಂದೆನ್ ಕೇಂಡ್ದ್ ಯೇಸು ಆಯಗ್ ಪಂಡೆ, “ಇನಿಡ್ದೇ ಈ ಇಲ್ಲಗ್ ರಕ್ಷಣೆ ಆಂಡ್; ಉಂಬೆಲಾ ಅಬ್ರಹಾಮುನ ಸಂತಾನದಾಯೆ ಅತ್ತಾ?

¹⁰ನರಮಾನಿ ಮಗೆ ತತ್ತ್‌ದ್ ಪೋಯಿನೆನ್ ನಾಡಿಯೆರೆಲಾ ರಕ್ಷಣೆ ಮಲ್ಪೆರೆಲಾ ಬತ್ತೆ.”

¹¹ಶಿಷ್ಯೆರ್ ಈ ಪಾತೆರೊನು ಕೇನೊಂದುಪ್ಪುನಗ ಯೇಸು ಯೆರೂಸಲೇಮುದ ಕೈತಲ್‌ ಇತ್ತಿನೆಡ್ದ್‌ಲಾ ದೇವೆರೆ ರಾಜ್ಯ ಬೇಗ ಬರ್ಪುಂಡು ಅಂದ್‌ದ್ ಎನ್ನೊಂದಿತ್ತಿನೆಡ್ದ್‌ಲಾ ಆಯೆ ನನಲಾ ಒಂಜಿ ಉಪಕತೆನ್ ಪಂಡೆ.

¹²ಅವು ಇಂಚಾದುಂಡು, “ಒರಿ ಮಲ್ಲ ಕುಲತ ನರಮಾನಿ ತಾನ್ ರಾಜ್ಯಾಧಿಕಾರೊನು ಪಡೆಯೊಂದು ಪಿರ ಬರಿಯೆರೆ ದೂರ ದೇಶೊಗು ಪೋಯೆ.

¹³ಆಯೆ ಪೋಪಿನೆಡ್ದ್ ದುಂಬು ತನ ಬೇಲೆದಾಕುಲೆಡ್ ಪತ್ತ್ ಜನೊಕುಲೆನ್ ಲೆತ್ತ್‌ದ್ ಅಕ್ಲೆಗ್, ‘ಪ್ರತಿ ಒರಿಯಗ್ ಒಂಜಿ, ಒಂಜಿ ಬಂಗಾರ್‌ದ ಪಾವೊಲಿ ಕೊರ್ದು ಯಾನ್ ಬನ್ನೆಟ್ಟ ಬ್ಯಾರ ಮಲ್ತೊಂದುಪ್ಪುಲೆ,’ ಅಂದ್‌ದ್ ಪೋಯೆ.

¹⁴ಆ ಪಟ್ಟಣದ ಜನೊಕುಲು ಆಯನ್ ದೂರುದು, ‘ಎಂಕ್ಲೆನ ಮಿತ್ತ್ ರಾಜನ ಅಧಿಕಾರ ಮಲ್ಪುನವು ಎಂಕ್ಲೆಗ್ ಇಷ್ಟ ಇಜ್ಜಿ,’ ಅಂದ್‌ದ್ ರಾಯಭಾರಿಡ ಪನ್ಪಾದ್ ಕಡಪುಡಿಯೆರ್.

¹⁵ಬೊಕ್ಕ ಆಯೆ ರಾಜ್ಯೊನು ಪಡೆಯೊಂದು ಪಿರ ಬತ್ತೆ. ಆಯೆ ಪಣವುನು ಕೊರ್ತಿ ಬೇಲೆದಾಕುಲೆನ್ ಬ್ಯಾರೊಡ್ದು ಏತೇತ್ ಲಾಭ ಸಂಪಾದನೆ ಮಲ್ತೊಂದೆರ್ ಅಂದ್‌ದ್ ತೆರಿಯೆರೆಗಾದ್ ಅಕ್ಲೆನ್ ತನ ಕೈತಲ್‌ ಲೆಪ್ಪುಡಾಯೆ.

¹⁶ಸುರುತ್ತಾಯೆ ಬತ್ತ್‌ದ್, ‘ಯಜಮಾನ ಈ ಕೊರ್ತಿನ ಬಂಗಾರ್‌ದ ಪಾವೊಲಿಡ್ದ್ ಪತ್ತ್ ಬಂಗಾರ್‌ದ ಪಾವೊಲಿ ಸಂಪಾದನೆ ಮಲ್ತ್‌ದೆ,’ ಪನ್ನಗ

¹⁷ಆಯೆ ಆಯಡ, ‘ಪೊರ್ಲು ಆಂಡ್‌, ಎಡ್ಡೆ ಬೇಲೆದಾಯಾ, ಈ ಒಂತೆದೆಟ್ ನಂಬಿಗಸ್ತೆ ಆದಿತ್ತಿನೆಡ್ದ್ ಪತ್ತ್ ಗ್ರಾಮೊಲೆಗ್ ಅಧಿಕಾರಿ ಆದುಪ್ಪುಲ,’ ಅಂದ್‌ದ್ ಪಂಡೆ.

¹⁸ರಡ್ಡನೆದಾಯೆ ಬತ್ತ್‌ದ್, ‘ಯಜಮಾನ ಈ ಕೊರ್ತಿನ ಬಂಗಾರ್‌ದ ಪಾವೊಲಿಡ್ದ್ ಐನ್ ಬಂಗಾರ್‌ದ ಪಾವೊಲಿ ತಿಕ್ಕ್ಂಡ್,’ ಅಂದ್‌ದ್ ಪಂಡೆ.

¹⁹ಆಯೆ ಆ ಬೇಲೆದಾಯಡ, ‘ಈಲಾ ಐನ್ ಗ್ರಾಮೊಲೆ ಮಿತ್ತ್ ಅಧಿಕಾರಿ ಆಲ,’ ಅಂದ್‌ದ್ ಪಂಡೆ.

²⁰ಬೊಕ್ಕೊರಿ ಬತ್ತ್‌ದ್, ‘ಯಜಮಾನ ಇಂದಾ, ಈ ಕೊರ್ತಿನ ಬಂಗಾರ್‌ದ ಪಾವೊಲಿ. ಅವೆನ್ ಕುಂಟುಡು ಕಟ್ಟ್‌ದ್ ದೀಯೆ.

²¹ಈ ದೀವಂದಿನೆನ್ ದೆತ್ತೊಂದು ಪೋಪ; ಬಿತ್ತಂದಿನೆನ್ ಕೊಯ್ಪ; ಈ ಕಠಿಣ ನರಮಾನಿ, ಅಂದ್‌ದ್ ನಿಕ್ಕ್ ಪೋಡಿದ್ ಅವೆನ್ ಕುಂಟುಡು ಕಟ್ಟ್‌ದ್ ದೆಂಗಾದ್ ದೀಯೆ,’ ಪಂಡೆ.

²²ಐಕ್ ಆಯೆ, ‘ಈ ಪ್ರಯೋಜನದಾಂತಿ ಬೇಲೆದಾಯೆ, ನಿನ ಪಾತೆರದ ಮಿತ್ತೆ ನಿಕ್ಕ್ ತೀರ್ಪು ಕೊರ್ಪೆ. ಯಾನ್ ದೀವಂದೆ ಉಪ್ಪುನೆನ್ ದೆತ್ತೊಂದು ಪೋಪೆ, ಬಿರ್ಕಂದಿನೆನ್ ಕೊಯ್ಪಿನಾಯೆ ಕಠಿಣ ನರಮಾನಿ ಅಂದ್‌ದ್ ನಿಕ್ಕ್ ಗೊತ್ತ್‌ತ್ತಿಂಡತ್ತಾ?

²³ಈ ಎನ ಕಾಸ್‌ನ್ ಸಾಹುಕಾರನ ಕೈತಲ್‌ ಬಡ್ಡಿಗ್ ದಾಯೆಗ್ ಕೊರ್ಜ? ಯಾನ್ ಬತ್ತ್‌ದ್ ಅವೆನ್ ಬಡ್ಡಿಸಮೇತ ಆಯಡ ದೆತ್ತೊಂದುವೆ ಅತ್ತಾ?’ ಅಂದ್‌ದ್ ಪಂಡೆ.

²⁴ಕೈತಲ್‌ ಉಂತುದಿನಾಕುಲೆಡ, ‘ಆ ಬಂಗಾರ್‌ದ ಪಾವೊಲಿನ್ ಆಯಡ್ದ್ ದೆತ್ತೊಂದು ಪತ್ತ್ ಬಂಗಾರ್‌ದ ಪಾವೊಲಿ ಉಪ್ಪುನಾಯಗ್ ಕೊರ್ಲೆ,’ ಅಂದ್‌ದ್ ಪಂಡೆ.

²⁵ಆಂಡ ಅಕುಲು ಆಯಡ, ‘ಯಜಮಾನ, ಪತ್ತ್ ಬಂಗಾರ್‌ದ ಪಾವೊಲಿ ಆಯಡ ಉಂಡತ್ತಾ?’ ಅಂದ್‌ದ್ ಪಂಡೆರ್.

²⁶ಐಕ್ ಆಯೆ, ‘ಇತ್ತಿನಾಕುಲೆಗ್ ದೇವೆರ್ ಹೆಚ್ಚಾದ್ ಕೊರುವೆ, ಇಜ್ಜಂದಿನಾಯಡ ಇತ್ತಿನವುಲಾ ದೆತ್ತ್‌ದ್ ಬುಡ್ಪುಂಡು, ಪಂಡ್ದ್ ಪಂಡೆ.

²⁷ಬೊಕ್ಕ ಯಾನ್ ನಿಕ್ಲೆನ ಮಿತ್ತ್ ಅಧಿಕಾರ ಮಲ್ಪುನವು ಇಷ್ಟ ಇಜ್ಜಿ ಅಂದ್‌ದ್ ಪಂಡಿನ ಪಗೆನಾಕುಲೆನ್ ಎನ ಕೈತಲ್‌ ಕನತ್‌ದ್ ಎನ ಎದುರುಡು ಕೆರ್ದ್ ಪಾಡೊಡು,’” ಅಂದ್‌ದ್ ಪಂಡೆ.

²⁸ಯೇಸು ಈ ಪಾತೆರೊಲೆನ್ ಪಂಡಿ ಬೊಕ್ಕ ಘಟ್ಟ ಮಿರ್ತ್ತಾದ್ ಯೆರೂಸಲೇಮುಗು ದುಂಬು ದುಂಬು ಪೋಯೆ.

²⁹ಬೊಕ್ಕ ಆಯೆ ಇಪ್ಪೆದ ಪಾಡಿ ಇನ್ಪಿ ಗುಡ್ಡೆದ ಕೈತಲಿತ್ತಿ ಬೇತ್ಫಗೆಗ್ಲಾ ಬೇಥಾನ್ಯಗ್ಲಾ ಮುಟ್ಟಾನಗ ಅಲ್ಪ ಯೇಸು ಶಿಷ್ಯೆರೆಡ್ ಇರ್ವೆರೆನ್ ಲೆತ್ತ್‌ದ್,

³⁰“ನಿಕ್ಲೆನ ಎದುರು ತೋಜುನ ಹಳ್ಳಿಗ್ ಪೋಲೆ; ಐತ ಉಲಯಿ ಪೊಗ್ಗುನಗನೇ ಅಲ್ಪ ಕಟ್ಟ್‌ದುಪ್ಪು ಒಂಜಿ ಕತ್ತೆದ ಕಿನ್ನಿನ್ ತೂಪರ್; ಈತ್‌ನೆಟ್ಟ ಐತ ಮಿತ್ತ್ ಏರ್ಲಾ ಕುಲ್ಲುದಿಜೆರ್; ಅವೆನ್ ಗಿರ್ತ್‌ದ್ ಪತ್ತೊಂದು ಕನಲೆ.

³¹ಏರಾಂಡಲಾ ನಿಕ್ಲೆನ್, ದಾಯೆ ಗಿರ್ಪುವರ್ ಅಂದ್‌ದ್ ಕೇಂಡೆರ್ಡ, ಉಂದು ಕರ್ತವಗ್ ಬೋಡಾತ್ಂಡ್,” ಪಂಡ್ದ್ ಪನ್ಲೆ.

³²ಅಕುಲು ಇರ್ವೆರ್‌ಲಾ ಹಳ್ಳಿದುಲಯಿ ಪೋದು ಯೇಸು ತನ್ಕುಲೆಗ್ ಪಂಡಿಲೆಕ್ಕನೇ ತೂಯೆರ್.

³³ಅಕುಲು ಆ ಕತ್ತೆದ ಕಿನ್ನಿನ್ ಗಿರ್ತೊಂದುಪ್ಪುನಗ ಐತ ಧನಿ ಅಕ್ಲೆಡ, “ಈ ಕಿನ್ನಿನ್ ಗಿರ್ತ್‌ದ್ ದಾದ ಮಲ್ಪುವರ್?” ಅಂದ್‌ದ್ ಕೇಂಡಿನೆಕ್ಕ್

³⁴ಅಕುಲು, “ಉಂದು ಕರ್ತವಗ್ ಬೋಡಾತ್ಂಡ್,” ಅಂದ್‌ದ್ ಪಂಡೆರ್.

³⁵ಅವೆನ್ ಯೇಸುನ ಕೈತಲ್‌ ಕನತ್‌ದ್ ತನ್ಕುಲೆ ಕುಂಟುಲೆನ್ ಆ ಕತ್ತೆದ ಕಿನ್ನಿದ ಮಿತ್ತ್ ಪಾಡಿ ಬೊಕ್ಕ ಯೇಸುನು ಐತ ಮಿತ್ತ್ ಕುಲ್ಲಾಯೆರ್.

³⁶ಆಯೆ ಪೋವೊಂದುಪ್ಪುನಗ ಜನೊಕುಲು ತನ್ಕುಲೆ ಕುಂಟುಲೆನ್ ಸಾದಿಡ್ ಬುಡ್ಪಾಯೆರ್.

³⁷ಯೇಸು ಯೆರೂಸಲೇಮುಗು ಕೈತಲಾದ್ ಇಪ್ಪೆಗುಡ್ಡೆಡ್ದ್ ಜಪ್ಪುನ ಜಾಗ್‌ಗ್ ಬನ್ನಗ ಶಿಷ್ಯೆರ್‌ನಾಕುಲು ಸಂತೋಷ ಪಡೆದ್ ತನ್ಕುಲು ತೂಯಿನ ಮಾತ ಕಾರ್ನಿಕೊಲೆ ಬಗೆಟ್, “ಕರ್ತವ ಪುದರ್‌ಡ್ ಬರ್ಪಿನ ಅರಸುಗು ಆಶೀರ್ವಾದ, ಪರಲೋಕೊಡು ಸಮಾಧಾನ, ಮಿತ್ತ್‌ದ ಲೋಕೊಡು ಮೈಮೆ ಅಂದ್‌ದ್ ಮಲ್ಲ ಶಬ್ಧೊಡು ದೇವೆರೆನ್ ಪುಗರಿಯೆರೆ ಸುರು ಮಲ್ತೆರ್.”

³⁸

³⁹ಜನೊಕುಲೆ ಗುಂಪುದುಲಯಿ ಇತ್ತಿ ಪರಿಸಾಯೆರೆಡ್ ಕೆಲೆವೆರ್ ಯೇಸುಗು, “ಬೋಧಕಾ, ನಿನ ಶಿಷ್ಯೆರೆನ ಬಾಯಿ ಮುಚ್ಚಾಲ,” ಪಂಡ್ದ್ ಪಂಡಿನೆಕ್ಕ್

⁴⁰ಯೇಸು ಅಕ್ಲೆಡ, “ಮೊಕುಲು ಮನಿಪಂದೆ ಇತ್ತೆರ್ಡ ಈ ಕಲ್ಲ್‌ಲು ಬುಲ್ಪ,” ಪಂಡೆ.

⁴¹ಬೊಕ್ಕ ಯೇಸು ಕೈತಲಾನಗ ಯೆರೂಸಲೇಮು ಪಟ್ಟಣನ್‌ ತೂದು ಐತ ಸಂಗತಿಡ್ ಬುಲ್ತುದು,

⁴²“ಈ ಆಂಡಲಾ ಸಮಾಧಾನೊಗು ಬೋಡಿತ್ತಿನೆನ್ ಇನಿಯೇ ತೆರಿಯೊಂಡಡ ಏತೋ ಎಡ್ಡೆ ಇತ್ತ್ಂಡ್. ಆಂಡ ಇತ್ತೆ ಅವು ನಿನ ಕಣ್ಣ್‌ಗ್ ಮದೆ ಆತ್ಂಡ್.

⁴³ದೇವೆರ್ ನಿಕ್ಕ್ ದರ್ಶನ ಕೊರಿ ಗಳಿಗೆನ್ ಈ ತೆರಿಯೊಂಡಿಜ. ಐಡ್ದಾವರ ನಿನ ಪಗೆಮಾನಿಲು ಗುಂಪು ಕಟ್ಟ್‌ದ್ ನಿನ ಸುತ್ತಲಾ ಸೇರ್ದ್ ಮಾತ ಕಡೆಡ್ದ್‌ಲಾ ನಿನನ್ ಮುಚ್ಚಿದ್, ನಿನನ್ಲಾ ನಿನಡುಪ್ಪು ನಿನ ಬಾಲೆಲೆನ್ಲಾ ನೆಲ ಸಮ ಮಲ್ತ್‌ದ್ ಕಲ್ಲ್‌ದ ಮಿತ್ತ್ ಕಲ್ಲ್ ಉಂತಂದಿಲೆಕ್ಕ ಮಲ್ಪುನ ದಿನೊಕುಲು ನಿನ ಮಿತ್ತ್ ಬರು,” ಅಂದ್‌ದ್ ಪಂಡೆ.

⁴⁴

⁴⁵ಬೊಕ್ಕ ಯೇಸು ದೇವಾಲಯೊಗು ಪೋದು ಮಾರುನಾಕುಲೆನ್ ಗಿಡ್ಪೆರೆ ಸುರು ಮಲ್ತೆ.

⁴⁶ಅಕ್ಲೆಗ್, “ಎನ ಇಲ್ಲ್ ಪ್ರಾರ್ಥನೆದ ಇಲ್ಲ್ ಆದುಂಡು ಅಂದ್‌ದ್ ಬರೆತ್ಂಡ್, ಆಂಡ ನಿಕುಲು ಅವೆನ್ ಕಲ್ವೆರೆ ಮಾಟೆ ಮಲ್ತ್‌ದರ್,” ಅಂದ್‌ದ್ ಪಂಡೆ.

⁴⁷ಬೊಕ್ಕ ಆಯೆ ದಿನಾಲ ದೇವಾಲಯೊಡು ಬೋಧನೆನ್ ಮಲ್ತೊಂದಿತ್ತೆ. ಆತ್‌ನೆಟ್ಟ ಪ್ರಧಾನಯಾಜಕೆರ್‌ಲಾ ಶಾಸ್ತ್ರಿಲುಲಾ ಜನೊಕುಲೆನ ಮುಖ್ಯಸ್ಥೆರ್‌ಲಾ ಆಯನ್ ಕೆರಿಯೆರೆ ಗಳಿಗೆ ತೂವೊಂದಿತ್ತೆರ್,

⁴⁸ಆಂಡ ಜನೊಕುಲು ಮಾತೆರ್ ಆಯನ ಕೈತಲಿತ್ತ್‌ದ್ ಬೋಧನೆನ್ ಕೆಬಿ ಕೊರ್ದು ಕೇನೊಂದಿತ್ತಿನೆಡ್ದ್ ಯೇಸುನು ದಾದ ಮಲ್ಪೊಡಂದ್‌ದ್ ತೋಜಿಜಿ.