Read Tulu ಲೂಕೆ 2 Bible Online

ಲೂಕೆ 2 - Tulu bible

ಲೂಕೆ 2

¹ಆ ಕಾಲೊಡು ಇಡೀ ರಾಜ್ಯೊಡು ಖಾನೇಷ್‌ಮಾರಿ ಬರೆಪಾವೊಡು ಪನ್ಪಿ ಅಪ್ಪಣೆ ಚಕ್ರವರ್ತಿ ಆದಿತ್ತಿ ಔಗುಸ್ತಡ್ದ್ ಪಿದಾಡ್‌ಂಡ್.

²ಕುರೇನ್ಯೆ ಸುರಿಯ ದೇಶದ ಅಧಿಪತಿ ಆದುಪ್ಪುನಗ ಈ ಖಾನೇಷ್‌ಮಾರಿ ನಡತ್ಂಡ್.

³ಅಪಗ ಖಾನೇಷ್‌ಮಾರಿ ಬರೆಪಾವೆರೆಗಾದ್ ಮಾತೆರ್ಲಾ ತನ್ಕುಲೆ ಊರುಲೆಗ್ ಪಿದಾಡಿಯೆರ್.

⁴ಯೋಸೇಫುಲಾ ತಾನ್ ದಾವೀದ್ ಸಂತಾನದಾಯೆಲಾ ಗೋತ್ರದಾಯೆಲಾ ಆದಿತ್ತಿನೆಡ್ದ್ ಖಾನೇಷ್‌ಮಾರಿ ಬರೆಪಾವೆರೆಗಾದ್ ತನ್ಕ್ ನಿಚ್ಚಯ ಆದಿತ್ತಿ ಮರಿಯ ಒಟ್ಟುಗು ಗಲಿಲಾಯದ ನಜರೇತ್ ಪನ್ಪಿ ಊರುಡ್ದು ಪಿದಾಡ್ದ್ ಯೂದಾಯೊಡುಪ್ಪು ಬೇತ್ಲೆಹೇಮು ಪನ್ಪಿ ದಾವೀದನ ಊರುಗು ಪೋಯೆ. ಅಪಗ ಮರಿಯ ದಿಂಜಿದಿ ಬಂಜಿನಾಲ್ ಆದಿತ್ತಲ್.

⁵

⁶ಅಕುಲು ಅಲ್ಪ ಉಪ್ಪುನಗ ಆಲೆಗ್ ದಿನ ದಿಂಜಿಂಡ್.

⁷ಆಲ್ ತನ ಕಡೀರ ಆಣ್ ಬಾಲೆನ್ ಪೆದ್ದ್‌ದ್ ಕುಂಟುಡು ಸುತ್ತುದು ಬೈಪಣೆಡ್ ಜೆಪುಡಾಯಲ್. ದಾಯೆಗಂದ್ಂಡ ಅಕ್ಲೆಗ್ ಛತ್ರೊಡು ಓಲುಲಾ ಜಾಗ್ ತಿಕ್ಕಿಜಿ.

⁸ಆ ಊರುಡು ರಾತ್ರೆಡ್ ಕುರುಬೆರ್ ಕಂಡೊಡು ತನ್ಕುಲೆ ಕುರಿಕುಲೆ ಪುಂಡುನು ಕಾತೊಂದಿತ್ತೆರ್.

⁹ಅಪಗ ಕರ್ತವ ದೂತೆ ಬತ್ತ್‌ದ್ ಅಕ್ಲೆನ ಎದುರುಡು ಉಂತಿಯೆ. ಕರ್ತವ ಮೈಮೆ ಅಕ್ಲೆನ ಸುತ್ತ ದಿಂಜಿಂಡ್; ಅವೆನ್ ತೂದು ಅಕುಲು ಮಸ್ತ್ ಪೋಡಿಯೆರ್.

¹⁰ಆ ದೂತೆ ಅಕ್ಲೆಗ್, “ಪೋಡ್ಯಡೆ, ಕೇನ್ಲೆ, ಜನೊಕುಲೆಗ್ ಮಾತೆರೆಗ್ಲಾ ದಿಂಜ ಸಂತೋಷ ಉಂಡಾಪಿ ಎಡ್ಡೆ ವರ್ತಮಾನೊನು ತೆರಿಪಾವೆ.

¹¹ಅವು ದಾನೆಂದ್ಂಡ, ಈ ಗಳಿಗೆಡ್ ನಿಕ್ಲೆಗಾದ್ ದಾವೀದ್ ಊರುಡು ಒರಿ ರಕ್ಷಕೆ ಪುಟ್ಟುದೆ. ಆಯೆ ಕರ್ತವೆ ಆದುಪ್ಪು ಕ್ರಿಸ್ತೆನೇ.

¹²ನಿಕ್ಲೆಗ್ ಗೊತ್ತಾವೆರೆ ಗುರ್ತ ದಾನೆಂದ್ಂಡ, ಕುಂಟುಡು ಸುತ್ತುದಿನ ಒಂಜಿ ಬಾಲೆ ಬೈಪಣೆಡ್ ಜೆಯ್ದಿನೆನ್ ತೂವರ್,” ಅಂದ್‌ದ್ ಪಂಡೆ.

¹³ಅಪಗನೆ ಆ ದೂತಡೊಪ್ಪ ಪರಲೋಕೊಡ್ದು ಒಂಜಿ ಮಲ್ಲ ದೂತೆರೆಸೈನ್ಯ ತೋಜಿದ್ ಬತ್ತ್‌ದ್ ದೇವೆರೆನ್ ಪುಗರೊಂದು ಪಂಡೆರ್,

¹⁴“ಪರಲೋಕೊಡುಪ್ಪು ದೇವೆರೆಗ್ ಮೈಮೆ, ಭೂಲೋಕೊಡು ನರಮಾನಿಲೆಗ್ ಸಮಾಧಾನ. ದೇವೆರ್ ಅಕ್ಲೆನ್ ಮೆಚ್ಚುವೆರ್.”

¹⁵ದೂತೆರ್ ಅಕ್ಲೆನ ಕೈತಲ್‌ಡ್ದ್ ಪರಲೋಕೊಗು ಪೋಯಿ ಬೊಕ್ಕ ಕುರುಬೆರ್, “ನಮ ಇತ್ತೆನೇ ಬೇತ್ಲೆಹೇಮುಗು ಪೋದು ಕರ್ತವೆ ನಂಕ್ ತೆರಿಪಾಯಿ ಈ ಸಂಗತಿಲೆನ್ ತೂಕ ಲಕ್ಕ್‌ಲೆ,” ಅಂದ್‌ದ್ ಒರಿಯಡೊರಿ ಪಾತೆರೊಂದು,

¹⁶ಅಪಗನೆ ಮರಿಯನ್ಲಾ ಯೋಸೇಫುನ್ಲಾ ಬೈಪಣೆಡ್ ಜೆತ್ತ್‌ದಿತ್ತಿ ಆ ಬಾಲೆನ್ಲಾ ತೂಯೆರೆ ಪೋಯೆರ್.

¹⁷ಬಾಲೆನ್ ತೂಯಿ ಬೊಕ್ಕ ಅಕುಲು ಆ ಬಾಲೆದ ಬಗೆಟ್ ದೇವದೂತೆರ್ ತನ್ಕುಲೆಗ್ ಪಂಡಿ ಪಾತೆರೊನು ತೆರಿಪಾಯೆರ್.

¹⁸ಕುರುಬೆರ್ ಪಂಡಿನ ಪಾತೆರೊನು ಕೇಂಡಿನ ಮಾತೆರ್ಲಾ ಸೋದ್ಯ ಆಯೆರ್.

¹⁹ಆಂಡ ಮರಿಯ ಆ ಪಾತೆರೊಲೆನ್ ತನ ಉಡಲ್‌ಡ್ ದೀದ್ ಎನ್ನೊಂದಿತ್ತಲ್.

²⁰ಕುರುಬೆರ್ ತನ್ಕ್‌ಲೆಗ್ ದೂತೆರ್ ಪಂಡಿಲೆಕ್ಕ ಮಾತ ಸಂಗತಿಲೆನ್ ಕೇಂಡ್ದ್ ತೂದು ದೇವೆರೆನ್ ಪುಗರೊಂದುಲಾ ಸುಗಿತೊಂದುಲಾ ಪಿರ ಪೋಯೆರ್.

²¹ಆ ಬಾಲೆ ಪುಟ್ಟುದು ಎನ್ಮನೆ ದಿನೊಟು ಸುನ್ನತಿ ಮಲ್ಪು ದಿನತಾನಿ ಯೇಸು ಪಂಡ್ದ್ ಪುದರ್ ದೀಯೆರ್. ಬಾಲೆ ಗರ್ಭೊಡು ಉಂಡಾಪಿ ದುಂಬೇ ದೂತೆರ್ ಅವ್ವೇ ಪುದರ್‌ನ್ ದೀವೊಡು ಪಂಡ್ದಿತ್ತೆರ್.

²²ಮೋಶೆನ ನ್ಯಾಯಕಟ್ಟ್‌ದ ಪ್ರಕಾರ ಅಕ್ಲೆನ ಶುದ್ಧಾಚಾರದ ದಿನೊಕುಲು ಮುಗಿ ಬೊಕ್ಕ ಆ ಬಾಲೆನ್ ಯೆರೂಸಲೇಮುಗು ಲೆತ್ತೊಂದು ಪೋಯೆರ್.

²³ದಾಯೆಗ್ ಪಂಡ ಕಡೀರ ಆಣ್ ಬಾಲೆನ್ ಕರ್ತವಗ್ ಪರಿಶುದ್ಧದವು ಅಂದ್‌ದ್ ಅರ್ಪಣೆ ಮಲ್ಪೊಡಂದ್‌ದ್ ಕರ್ತವ ನ್ಯಾಯಕಟ್ಟ್‌ಡ್ ಬರೆದುಂಡು.

²⁴ಐಕಾದ್ ಕರ್ತವ ನ್ಯಾಯಕಟ್ಟ್ ಪಂಡಿಲೆಕ್ಕ ಒಂಜಿ ಜೋಡಿ ಪಾರಿವಾಳ ಇಜ್ಜಿಂಡ ರಡ್ಡ್ ಪಾರಿವಾಳದ ಕಿನ್ನಿಲೆನ್ ಬಲಿ ಕೊರೊಡಿತ್ತ್‌ಂಡ್.

²⁵ಆ ಸಮಯೊಡು ಯೆರೂಸಲೇಮುಡು ಸಿಮೆಯೋನೆ ಪನ್ಪಿ ಒರಿ ನರಮಾನಿ ಇತ್ತೆ. ಆಯೆ ನೀತಿವಂತೆಲಾ ಭಕ್ತಿದಾಯೆಲಾ ಆದಿತ್ತೆ. ಇಸ್ರಾಯೇಲ್ ಜನೊಕುಲೆನ ಸಂತೈಸಿಕೆ ಕೊರ್ಪಿನಾಯೆ ಏಪ ಬರುವೆ ಅಂದ್‌ದ್ ಕಾತೊಂದಿತ್ತೆ. ಆಯೆ ಪರಿಶುದ್ಧಾತ್ಮೊನು ಪಡೆದಿತ್ತೆ.

²⁶ಕರ್ತವೆ ಕಡಪುಡೊಡಾಯಿನ ಕ್ರಿಸ್ತನ್ ತೂವಂದೆ ಈ ಸೈಪುಜ ಅಂದ್‌ದ್ ಪರಿಶುದ್ಧಾತ್ಮೊಡ್ದು ಆಯಗ್ ಅಪ್ಪಣೆ ಆದಿತ್ತ್ಂಡ್.

²⁷ಆಯೆ ಪರಿಶುದ್ಧಾತ್ಮದ ಪ್ರೇರೆಣೆಡ್ದ್ ದೇವಾಲಯೊಗು ಬತ್ತೆ; ನ್ಯಾಯಕಟ್ಟ್‌ದ ಪ್ರಕಾರ ಯೇಸುನ ಅಪ್ಪೆಅಮ್ಮೆ ಬಾಲೆನ್ ದೇವಾಲಯದ ಉಲಯಿ ಲೆತ್ತೊಂದು ಬನ್ನಗ.

²⁸ಸಿಮೆಯೋನೆ ಬಾಲೆನ್ ತೂದು ತನ ಕೈಟ್ ದೆತ್ತೊಂದು ದೇವೆರೆನ್ ಪುಗರ್‌ದ್ ಪಂಡಿನಿ,

²⁹“ಕರ್ತವಾ, ನಿನ ಪಾತೆರ ನಡತ್ಂಡ್; ಇತ್ತೆ ಸಮಾಧಾನೊಡು ಪೋವೆರೆ ನಿನ ದಾಸಗ್ ಅಪ್ಪಣೆ ಆಂಡ್.

³⁰ಈ ನೇಮಕ ಮಲ್ತಿ ರಕ್ಷಕನ್ ಯಾನ್ ಕಣ್ಣಾರೆ ತೂಯೆ.

³¹ಮಾತ ಜನೊಕುಲೆಗ್ ತೋಜಿದ್ ಬರ್ಪಿಲೆಕ್ಕ ಆಯನ್ ಒದಗಾದ್ ಕೊರ್ತ.

³²ಆಯೆ ಪಿದಯಿದ ಜನೊಕುಲೆಗ್ ಗೇನ ಮೂಡುನ ಬೊಲ್ಪು, ನಿನ ಜನೊಕುಲಾಯಿ ಇಸ್ರಾಯೇಲ್ಯೆರೆಗ್ ಪುಗರಿಗೆ,” ಅಂದ್‌ದ್ ಪಂಡೆ.

³³ಆ ಬಾಲೆದ ಬಗೆಟ್ ಈ ಪಾತೆರೊಲೆನ್ ಕೇಂಡ್ದ್ ಬಾಲೆದ ಅಪ್ಪೆಲಾ ಅಮ್ಮೆಲಾ ಅಚ್ಚಿರ ಆಯೆರ್.

³⁴ಸಿಮೆಯೋನೆ ಅಕ್ಲೆನ್ ಆಶೀರ್ವದಿತ್‌ದ್ ಅಪ್ಪೆ ಆದುಪ್ಪು ಮರಿಯಗ್, “ಇಂದಾ, ಈ ಬಾಲೆ, ಇಸ್ರಾಯೇಲ್ಯೆರೆಡ್ ಮಸ್ತ್ ಜನ ಬೂರುನೆಕ್ಕ್‌ಲಾ ಲಕ್ಕುನೆಕ್ಕ್‌ಲಾ ಕಾರಣ ಆದುಪ್ಪುವೆ; ಬೊಕ್ಕ ಜನೊಕುಲು ಎದುರು ಪಾತೆರಿಯೆರೆಗ್ಲಾ ಗುರ್ತ ಆದುಪ್ಪುವೆ;

³⁵ಇಂಚ ಮಸ್ತ್ ಜನೊಕುಲೆನ ಉಡಲ್‌ದ ವಿಚಾರೊಲು ಪಿದಯಿ ಬರು. ಈ ಕಾರಣೊಗಾದ್ ಇಂಬೆ ಪುಟ್ಟುದೆ. ಉಂದತ್ತಂದೆ ನಿನ ಪ್ರಾಣೊಗು ಬರ್ಚಿ ಕಂತಿಲೆಕ್ಕ ಆವು,” ಅಂದ್‌ದ್ ಪಂಡೆ.

³⁶ಅಪಗ ಅಸೇರ್ ಜಾತಿದ ಫನುವೇಲ್‌ನ ಮಗಲಾಯಿ ಅನ್ನ ಪನ್ಪಿ ಒರ್ತಿ ಪ್ರವಾದಿನಿ ಇತ್ತಲ್. ಆಲ್ ಮಸ್ತ್ ಪ್ರಾಯದಾಲ್ ಆದಿತ್ತಲ್. ಆಲ್ ಮದ್ಮೆ ಆದ್ ಏಳ್ ವರ್ಸ ಮಾತ್ರ ಕಂಡನಿಡೊಪ್ಪ ಬದ್‌ಕ್‌ದ್ ಎಣ್ಪತ್ತನಾಲ್ ವರ್ಸ ವಿಧವೆ ಆದಿತ್ತಲ್.

³⁷ಆಲ್ ದೇವಾಲಯೊಡೇ ಇತ್ತ್‌ದ್ ಉಪವಾಸ ಪ್ರಾರ್ಥನೆ ಮಲ್ತೊಂದು ರಾತ್ರೆ ಪಗೆಲ್ ದೇವೆರೆ ಸೇವೆ ಮಲ್ತೊಂದಿತ್ತಲ್.

³⁸ಆಲ್ ಅವ್ವೇ ಗಳಿಗೆಡ್ ಕೈತಲ್‌ ಬತ್ತ್‌ದ್ ದೇವೆರೆಡ್ದ್ ಆಯಿ ಉಪಕಾರೊನು ನೆನೆತ್‌ದ್ ಪುಗರೊಂದು ಯೆರೂಸಲೇಮುದ ಬುಡುಗಡೆನ್ ಕಾತೊಂದಿತ್ತಿ ಮಾತೆರೆಡ ಈ ಬಾಲೆದ ಸಂಗತಿಡ್ ಪಾತೆರಿಯಲ್.

³⁹ಐಡ್ದ್ ಬೊಕ್ಕ ಅಕುಲು ಕರ್ತವ ನ್ಯಾಯಕಟ್ಟ್‌ಗ್ ಸರಿಯಾದ್ ಮಾತೆನ್ಲಾ ಮುಗಿತಿ ಬೊಕ್ಕ ಗಲಿಲಾಯೊಡುಪ್ಪು ನಜರೇತ್ ಪನ್ಪಿ ತನ್ಕುಲೆ ಊರುಗು ಪಿರ ಪೋಯೆರ್.

⁴⁰ಆ ಬಾಲೆ ಬಲತ್‌ದ್ ಗೇನೊಡು ದಿಂಜಿದ್ ಆತ್ಮೊಡು ಬಲ ಹೊಂದಿಯೆ, ಬೊಕ್ಕ ದೇವೆರೆ ದಯ ಆಯನ ಮಿತ್ತ್ ಇತ್ತ್ಂಡ್.

⁴¹ಆಯನ ಅಪ್ಪೆಅಮ್ಮೆ ಪ್ರತಿ ವರ್ಸಲಾ ಪಸ್ಕ ಪರ್ಬದ ಜಾತ್ರೆಗ್ ಯೆರೂಸಲೇಮುಗು ಪೋವೊಂದಿತ್ತೆರ್.

⁴²ಯೇಸು ಪದ್ರಾಡ್ ವರ್ಸದಾಯೆ ಆದುಪ್ಪುನಗ ಅಕುಲು ಪರ್ಬದ ಕಟ್ಟ್‌ದ ಪ್ರಕಾರ ಅಡೆಗ್ ಪೋಯೆರ್.

⁴³ಪರ್ಬದ ದಿನೊಲೆನ್ ಮುಗಿತ್‌ದ್ ಪಿರ ಬನ್ನಗ ಬಾಲೆ ಯೇಸು ಯೆರೂಸಲೇಮುಡೇ ಉಂತಿಯೆ. ಆಯನ ಅಪ್ಪೆಅಮ್ಮೆ ತೆರಿಯಂದೆ ಪೋಯೆರ್.

⁴⁴ಆಯೆ ಜಾತ್ರೆದ ಗುಂಪುಡು ಸೇರೊಂದೆ ಅಂದ್‌ದ್ ಎನ್ನ್‌ದ್ ಒಂಜಿ ದಿನತ ಪ್ರಯಾಣ ಮಲ್ತ್‌ದ್ ಕುಟುಂಬದಾಕುಲೆಡ್ಲಾ ಗುರ್ತ ಇತ್ತಿನಕುಲೆಡ್ಲಾ ಆಯನ್ ನಾಡ್‌ಂಡಲಾ ತಿಕ್ಕಿಜೆ.

⁴⁵ಅಕುಲು ಪಿರ ಯೆರೂಸಲೇಮುಗು ನಾಡೊಂದು ಪೋಯೆರ್.

⁴⁶ಮೂಜಿ ದಿನೊಡ್ದು ಬೊಕ್ಕ ಆಯನ್ ದೇವಾಲಯೊಡು ತೂಯೆರ್. ಆಯೆ ಬೋಧಕೆರೆ ನಡುಟು ಕುಲ್ಲೊಂದು ಅಕ್ಲೆನ ಬೋಧನೆನ್ ಕೇನೊಂದು ಪ್ರಶ್ನೆ ಮಲ್ತೊಂದಿತ್ತೆ.

⁴⁷ಆಯೆ ಪನ್ಪಿ ಪಾತೆರೊಲೆನ್ ಕೇಂಡಿನ ಮಾತೆರ್ಲಾ ಆಯನ ಬುದ್ಧಿಗ್ಲಾ ಉತ್ತರೊಗ್ಲಾ ಅಚ್ಚಿರ ಆಯೆರ್.

⁴⁸ಅಪ್ಪೆಲಾ ಅಮ್ಮೆಲಾ ಆಯನ್ ತೂದು ಸೋದ್ಯ ಆಯೆರ್; ಬೊಕ್ಕ ಆಯನ ಅಪ್ಪೆ ಮಗಾ, “ಈ ಎಂಕ್ಲೆಗ್ ದಾಯೆಗ್ ಇಂಚ ಮಲ್ತ? ನಿನ ಅಮ್ಮೆಲಾ ಯಾನ್ಲಾ ನಿನನ್ ಏತ್ ಚಿಂತೆಡ್ ನಾಡೊಂದು ಬತ್ತ.”

⁴⁹ಪಂಡಿನಪಗ ಆಯೆ, “ನಿಕುಲು ಎನನ್ ದಾಯೆಗ್ ನಾಡುವರ್? ಯಾನ್ ಎನ ಅಮ್ಮೆರೆ ಇಲ್ಲಡ್ ಉಪ್ಪೊಡು ಪನ್ಪಿನವು ನಿಕ್ಲೆಗ್ ತೆರಿದಿಜಾ?” ಅಂದ್‌ದ್ ಉತ್ತರ ಕೊರಿಯೆ.

⁵⁰ಆಂಡ ಅಕುಲು ಆಯೆ ಪಂಡಿನ ಪಾತೆರದ ಅರ್ಥೊನು ತೆರಿಜೆರ್.

⁵¹ಬೊಕ್ಕ ಆಯೆ ಅಕ್ಲೆಡೊಪ್ಪ ನಜರೇತ್ ಊರುಗು ಬತ್ತ್‌ದ್ ಅಕ್ಲೆಗ್ ಅಧೀನ ಆದಿತ್ತೆ. ಆಯನ ಅಪ್ಪೆ ಈ ಪಾತೆರೊಲೆನ್ ತನ ಉಡಲ್‌ಡ್ ದೀವೊಂಡಲ್.

⁵²ಯೇಸು ಬುದ್ಧಿಡ್ಲಾ ಶರೀರೊಡ್ಲಾ ಬಲತೊಂದು ಬತ್ತೆ; ಉಂದತ್ತಂದೆ ದೇವೆರೆನ ಬೊಕ್ಕ ನರಮಾನಿಲೆನ ದಯ ಆಯನ ಮಿತ್ತ್ ಹೆಚ್ಚಾವೊಂದು ಬತ್ತ್ಂಡ್.