Read Tulu ಲೂಕೆ 21 Bible Online

ಲೂಕೆ 21 - Tulu bible

ಲೂಕೆ 21

¹ಯೇಸು ತರೆ ದೆರ್ತ್ತ್‌ದ್ ತೂದು ಐಶ್ವರ್ಯವಂತೆರ್ ಕಾಣಿಕೆನ್ ಕಾಣಿಕೆ ಪೆಟ್ಟಿಗೆಡ್ ಪಾಡುನೆನ್ ತೂಯೆ.

²ಒಂಜಿ ಬಡ ವಿಧವೆ ಬತ್ತ್‌ದ್ ರಡ್ಡ್ ಕಾಸ್‌ನ್ ಪಾಡುನೆನ್ ತೂಯೆ.

³ನಿಕ್ಲೆಗ್ ಸತ್ಯಾದ್ ಪನ್ಪೆ, “ಈ ಬಡ ವಿಧವೆ ಮಾತೆರೆಡ್ದ್ ಹೆಚ್ಚ್ ಪಾಡ್ದಲ್.

⁴ಎಂಚಂದ್ಂಡ ಮಾತೆರ್ ತನ್ಕುಲೆಗ್ ಒರಿದಿನೆಟ್ಟ್ ಪಾಡ್ದೆರ್. ಮೋಲಾಂಡಲಾ ತನ ಬಡತನೊಡ್ಲಾ ತನಡಿತ್ತಿ ಬದ್‌ಕ್‌ನೇ ಕೊರ್ದು ಬುಡಿಯಲ್,” ಅಂದ್‌ದ್ ಪಂಡೆ.

⁵ಶಿಷ್ಯೆರ್ ಕೆಲೆವೆರ್ ದೇವಾಲಯದ ಬಗೆಟ್ ಅವು ಪೊರ್ಲುದ ಕಲ್ಲ್‌ಲೆಡ್ದ್‌ಲಾ ಕಾಣಿಕೆಲೆಡ್ದ್‌ಲಾ ಅಲಂಕಾರ ಆದುಂಡು ಪನೊಂದುಪ್ಪುನಗ

⁶ಯೇಸು ಅಕ್ಲೆಗ್, “ನಿಕುಲು ಉಂದೆನ್ ಮಾತ ತೂಪರತ್ತಾ? ಮುಲ್ಪ ಕಲ್ಲ್‌ದ ಮಿತ್ತ್ ಕಲ್ಲ್ ಒರಿಯಂದೆ ಮಾತ ಬೂರ್ದು ಪೋಪಿ ದಿನೊಕುಲು ಬರ್ಪುಂಡು,” ಅಂದ್‌ದ್ ಪಂಡೆ.

⁷ಅಪಗ ಅಕುಲು ಬೋಧಕಾ, “ಅಂಚಾಂಡ ಉಂದು ಏಪ ಆವು? ಬೊಕ್ಕ ಉಂದು ಆಪಿ ಸಮಯದ ಗುರ್ತ ಎಂಚಿನ ಆದುಪ್ಪು,” ಅಂದ್‌ದ್ ಕೇಂಡೆರ್.

⁸ಅಪಗ ಯೇಸು ಅಕ್ಲೆಗ್, “ನಿಕುಲು ಮೋಸೊಗು ಬಲಿ ಆವಂದಿಲೆಕ್ಕ ತೂವೊನ್ಲೆ. ಕೆಲೆವೆರ್ ಬತ್ತ್‌ದ್ ಎನ ಪುದರ್ ದೆತ್ತೊಂದು, ‘ಯಾನೇ ಕ್ರಿಸ್ತೆ,’ ಪನೊಂದು ‘ಆ ಕಾಲ ಕೈತಲಾಂಡ್’ ಪಂಡ್ದ್‌ಲಾ ಪನ್ವೆರ್; ಅಕ್ಲೆನ ಬೆರಿಯೆ ಪೋವಡೆ.

⁹ಉಂದತ್ತಂದೆ ಲಡಯಿಲಾ ಗಡಿಬಿಡಿಲಾ ಆಪಿನೆನ್ ನಿಕುಲು ಕೇನ್ನಗ ಪೋಡ್ಯಡೆ; ದಾಯೆ ಪಂಡ ಇಂಚಿತ್ತಿ ಗುರ್ತೊಲು ದುಂಬು ತೋಜಿದ್ ಬರ್ಪಿನವು ಅಗತ್ಯ; ಆಂಡಲಾ ಅಪಗನೆ ಅಂತ್ಯಕಾಲ ಬರ್ಪುಜಿ.”

¹⁰ಬೊಕ್ಕ ಆಯೆ ಅಕ್ಲೆಡ ಪಂಡಿನಿ ದಾನೆಂದ್ಂಡ, “ಜನಾಂಗದ ವಿರೋಧಾದ್ ಜನಾಂಗೊಲುಲಾ; ರಾಜ್ಯೊಗು ವಿರೋಧಾದ್ ರಾಜ್ಯೊಲುಲಾ ಲಕ್ಕುಂಡು.

¹¹ಬೊಕ್ಕ ಮಲ್ಲ ಭೂಕಂಪೊಲು ಆಪುಂಡು; ಅಲ್ಪಲ್ಪ ಬರಗಾಲ, ಉಪದ್ರೊಲು ತೋಜಿದ್ ಬರ್ಪುಂಡು; ಭಯಂಕರ ಘಟನೆಲು, ಬಾನೊಡು ಮಲ್ಲ ಗುರ್ತೊಲು ತೋಜಿದ್ ಬರ್ಪುಂಡು.

¹²ಆಂಡ ಉಂದು ಮಾತ ನಡಪುನೆಡ್ದ್ ದುಂಬು ಎನ ಪುದರ್‌ಗಾದ್ ಅಕುಲು ನಿಕ್ಲೆನ್ ಪತ್ತ್‌ದ್ ಸಭಾಮಂದಿರದ ಬೊಕ್ಕ ಸೆರೆಮನೆತ ಅಧಿಕಾರಿಲೆನ ವಶೊಕ್ಕು ಕೊರುವೆರ್. ನಿಕ್ಲೆನ್ ಅರಸುಲೆ ಎದುರುಡು ಅಧಿಕಾರಿಲೆ ಎದುರುಡು ಲೆತ್ತೊಂದು ಪೋದು ಭಂಗ ಬರ್ಪಾವೆರ್.

¹³ಉಂದು ನಿಕ್ಲೆಗ್ ಸಾಕ್ಷಿ ಪನಿಯೆರೆ ಅನುಕೂಲ ಆಪುಂಡು.

¹⁴ನಿಕುಲು ದಾದ ಉತ್ತರ ಕೊರೊಡು ಪನ್ಪಿ ಬಗೆಟ್ ಎಂಕುಲು ಸುರುಟ್ಟೇ ಆಲೋಚನೆ ಮಲ್ಪುಜ ಅಂದ್‌ದ್ ನಿಕ್ಲೆನ ಉಡಲ್‌ಡ್ ನಿಚ್ಚಯ ಮಲ್ತೊನ್ಲೆ.

¹⁵ದಾಯೆ ಪಂಡ ನಿಕ್ಲೆನ ಮಾತ ಪಗೆನಾಕುಲು ಎದುರುಂತಿಯೆರೆಲಾ ಎದುರು ಪಾತೆರಿಯೆರೆಲಾ ಆವಂದಿ ಬಾಯಿನ್ಲಾ ಬುದ್ಧಿನ್ಲಾ ಯಾನೇ ನಿಕ್ಲೆಗ್ ಕೊರ್ಪೆ.

¹⁶ಆಂಡ ಅಪ್ಪೆ ಅಮ್ಮಾಡ್ಲು, ಪಲಯೆ, ಮೆಗ್ಯಾಡ್ಲು, ಕುಟುಂಬದಾಕುಲು, ಸ್ನೇಹಿತೆರ್ ನಿಕ್ಲೆನ್ ಒಚ್ಚಿದ್ ಕೊರುವೆರ್; ಬೊಕ್ಕ ನಿಕ್ಲೆಡ್ ಕೆಲೆವೆರೆನ್ ಕೆರ್ಪಾವೆರ್.

¹⁷ಎನ ಪುದರ್‌ಗಾದ್ ಮಾತೆರ್ಲಾ ನಿಕ್ಲೆನ್ ಪಗೆ ಮಲ್ಪುವೆರ್.

¹⁸ಆಂಡಲಾ ನಿಕ್ಲೆನ ತರೆಕುಜಲ್ ಒಂಜಿಲಾ ತಿರ್ತ್ ಬೂರಂದ್.

¹⁹ನಿಕ್ಲೆ ತಾಳ್ಮೆಡ್‌ ನಿಕ್ಲೆ ಪ್ರಾಣೊಲೆನ್ ಒರಿತೊನುವರ್.

²⁰“ಆಂಡ ಸೈನ್ಯೊಲು ಯೆರೂಸಲೇಮು ಪಟ್ಟಣದ ಸುತ್ತಲಾ ಉಪ್ಪುನೆನ್ ನಿಕುಲು ತೂನಗ ಅವು ಅಂತ್ಯಾಪಿನ ಕಾಲ ಮುಟ್ಟ ಬತ್ತ್‌ಂಡ್‌ಂದ್ ತೆರಿಯೊನ್ಲೆ.

²¹ಅಪಗ ಯೂದಾಯೊಡು ಉಪ್ಪುನಾಕುಲು ಪರ್ವತೊಲೆಗ್ ಪಾರ್ದ್ ಪೋವಡ್; ಪಟ್ಟಣೊಡು ಇತ್ತಿನಾಕುಲು ಪಿದಾಡ್ದ್ ಪೋವಡ್; ಹಳ್ಳಿದಾಕುಲು ಪೇಂಟೆದ ಉಲಯಿ ಪೋವಂದೆ ಉಪ್ಪಡ್.

²²ದಾಯೆಗಂದ್ಂಡ ಬರೆತಿನವು ಮಾತ ನಡಪೆರೆಗಾದ್ ‘ಅವು ನ್ಯಾಯತೀರ್ಪುದ ದಿನೊಕುಲು ಆದುಂಡು.’

²³ಆ ದಿನೊಟು ಬಂಜಿನಾಕುಲೆಗ್ಲಾ, ಬಾಲೆಗ್ ಮಿರೆ ಕೊರ್ಪಿ ಅಪ್ಯಾಡ್ಲೆಗ್ಲಾ ಬರ್ಪಿ ಕಷ್ಟೊನು ಪನಿಯೆರೆ ತೀರಂದ್. ಭೂಮಿದ ಮಿತ್ತ್ ಮಲ್ಲ ಭಂಗಲಾ ಈ ಜನೊಕುಲೆ ಮಿತ್ತ್ ಕೋಪಲಾ ಉಪ್ಪು.

²⁴ಅಕುಲು ಕತ್ತಿದ ಬಾಯಿಗ್ ಬೂರ್ವೆರ್; ಅಕ್ಲೆನ್ ಮಾತ ಬೇತೆ ದೇಶೊಲೆಗ್ ಸೆರೆ ಪತ್ತ್‌ದ್ ಕೊನೊವೆರ್; ಪಿದಯಿದ ಜನೊಕುಲೆನ ಸಮಯ ಮುಗಿಯುನ ಮುಟ್ಟ ಯೆರೂಸಲೇಮು ಪಟ್ಟಣ ಪಿದಯಿದ ಜನೊಕುಲೆಡ್ದ್ ತೊರ್ಪಾಟೊಗು ಬಲಿಯಾಪುಂಡು.

²⁵“ಉಂದತ್ತಂದೆ ಸೂರ್ಯೆ ಚಂದ್ರೆ ನಕ್ಷತ್ರೊಲೆಡ್ ಗುರ್ತೊಲು ತೋಜುಂಡು. ಭೂಮಿದ ಮಿತ್ತ್ ಕಡಲ್ದ ಬೊಕ್ಕ ಸೆರೆಕ್ಕುಲೆ ಶಬ್ಧೊಡ್ದು ಜನೊಕುಲೆಗ್ ದಿಕ್ಕ್ ತೋಜಂದೆ ಸಂಕಟ ಉಂಡಾಪುಂಡು.

²⁶ಬಾನದ ಶಕ್ತಿ ಪಂದ್‌ದ್ ಪೋಪಿನೆಡ್ದ್ ನರಮಾನಿಲು ಪೋಡಿಗೆ ಪತ್ತ್‌ದಿನಾಕುಲಾದ್ ಲೋಕೊಡು ದಾದ ಆಪುಂಡು ಅಂದ್‌ದ್ ಎದುರು ತೂವೊಂದು ಜೀವ ಪೋಯಿಲೆಕ್ಕ ಆವು.

²⁷ಅಪಗ ನರಮಾನಿ ಮಗೆ ಬಲೊಟ್ಲಾ ಬಾರಿ ಮೈಮೆಡ್ಲಾ ಮುಗಲ್‌ಡ್ ಬರ್ಪಿನೆನ್ ತೂಪರ್.

²⁸ಆಂಡ ಉಂದು ಆವೊಡ್ದುಂಬೇ ಮಿತ್ತ್ ತೂಲೆ, ನಿಕ್ಲೆನ ತರೆ ದೆರ್ಪುಲೆ, ನಿಕ್ಲೆನ ಬುಡುಗಡೆ ಕೈತಲಾತ್ತ್ಂಡ್,” ಅಂದ್‌ದ್ ಪಂಡೆ.

²⁹ಆಯೆ ಅಕ್ಲೆಗ್ ಒಂಜಿ ಉಪಕತೆ ಪಂಡೆ, “ಅಂಜೂರದ ಮರೊನು ತೂಲೆ.

³⁰ಅವು ತೆಗ್‌ಲ್‌ನಗ ಇತ್ತೆ ಅರೆಗಾಲ ಬತ್ತ್ಂಡ್ ಅಂದ್‌ದ್ ನಿಕುಲಾದೆ ತೆರಿಯೊನ್ವರ್.

³¹ಅಂಚೆನೇ ಉಂದೆನ್ ತೂನಗ ದೇವೆರೆ ರಾಜ್ಯ ಕೈತಲುಂಡು, ಅಂದ್‌ದ್ ತೆರಿಯೊನ್ಲೆ.

³²ಮಾತ ಆಪಿನೆಟ್ಟ ಈ ಸಂತಾನ ಆಳಿದ್ ಪೋಪಿನೇ ಇಜ್ಜಿ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.

³³ಬಾನಲಾ ಭೂಮಿಲಾ ಆಳಿದ್ ಪೋವು, ಆಂಡ ಎನ ಪಾತೆರೊಲು ಆಳಿದ್ ಪೋಪಿನೆ ಇಜ್ಜಿ.

³⁴“ನಿಕ್ಲೆನ ಬಗೆಟ್ ಜಾಗ್ರತೆ ಆದುಪ್ಪುಲೆ. ಬಂಜಾರ ವಣಸ್‌ಡ್ದ್‌ಲಾ ಅಮಲ್‌ಡ್ದ್‌ಲಾ ಲೋಕದ ಚಿಂತೆಲೆಡ್ದ್‌ಲಾ ನಿಕ್ಲೆ ಉಡಲ್ ದುನ್ನ ಆದಿತ್ತಿನೆಡ್ದ್,

³⁵ಆ ದಿನ ಗೊತ್ತಿಜ್ಜಂದೆನೆ ಒರನೆ ಇಡೀ ಭೂಮಿಡುಪ್ಪುನಾಕುಲೆ ಮಾತೆರೆ ಮಿತ್ತ್ ಉರ್ಲುದ ಲೆಕ್ಕನೆ ಬರು.

³⁶ಅಂಚಾಯಿನೆಡ್ದ್ ಉಂದು ಆಪಿನವು ಮಾತೆಕ್ ತಪ್ಪಾವೊನಿಯೆರೆಲಾ ನರಮಾನಿ ಮಗನ ಎದುರುಡು ಉಂತಿಯೆರೆಗ್ಲಾ ನಿಕುಲು ಪೂರ್ತಿ ಶಕ್ತಿವಂತೆರ್ ಆಪಿಲೆಕ್ಕ ಮಾತ ಕಾಲೊಡ್ಲಾ ದೇವೆರೆಡ ನಟ್ಟೊಂದು ಎಚ್ಚರಿಕೆ ಆದುಪ್ಪುಲೆ,” ಅಂದ್‌ದ್ ಪಂಡೆ.

³⁷ಆಯೆ ಪಗೆಲ್ಡ್ ದೇವಾಲಯೊಡು ಬೋಧನೆ ಮಲ್ತೊಂದು ರಾತ್ರೆಡ್ ಪೇಂಟೆದ ಪಿದಯಿ ಪೋದು ಇಪ್ಪೆಗುಡ್ಡೆಡ್ ತಡೆಯೆ.

³⁸ಜನೊಕುಲು ಮಾತೆರ್ ಆಯನ ಬೋಧನೆನ್ ಕೇನಿಯೆರೆ ಕಾಂಡೆ ದೇವಾಲಯೊಗು ಬರೊಂದಿತ್ತೆರ್.