Read Tulu ಲೂಕೆ 22 Bible Online

ಲೂಕೆ 22 - Tulu bible

ಲೂಕೆ 22

¹ಪುಳಿದಾಂತಿ ರೊಟ್ಟಿನ್ ತಿನ್ಪಿನ ಪಸ್ಕ ಪನ್ಪಿ ಪರ್ಬ ಕೈತಲಾನಗ

²ಪ್ರಧಾನಯಾಜಕೆರ್‌ಲಾ ಶಾಸ್ತ್ರಿಲುಲಾ ಯೇಸುನು ಕೆರೊಡು ಅಂದ್‌ದ್ ಆಲೋಚನೆ ಮಲ್ತೊಂದು ಜನೊಕುಲೆಗ್ ಪೋಡಿದ್ ತಕ್ಕ ಸಾದಿನ್ ನಾಡೊಂದಿತ್ತೆರ್.

³ಅಪಗ ಸೈತಾನೆ, ಪದ್ರಾಡ್ ಶಿಷ್ಯೆರೆಡ್ ಒರಿ ಇಸ್ಕಾರಿಯೋತ ಯೂದನ ಉಲಯಿ ಪೊಗ್ಗಿಯೆ.

⁴ಆಯೆ ಪ್ರಧಾನಯಾಜಕೆ ಬೊಕ್ಕ ಕಾವಲ್‌ದ ಮುಖ್ಯಸ್ಥನ ಕೈತಲ್‌ ಪೋದು ಯೇಸುನು ಪತ್ತ್‌ದ್ ಕೊರ್ಪಿನ ಉಪಾಯೊನು ಅಕ್ಲೆಡ ಪಾತೆರಿಯೆ.

⁵ಅಕುಲು ಸಂತೋಷೊಡು ನಿಕ್ಕ್ ಕಾಸ್ ಕೊರ್ಪ ಅಂದ್‌ದ್ ಒಪ್ಪಂದ ಮಲ್ತೆರ್.

⁶ಆಯೆ ಒಪ್ಪಿದ್ ಏರೆಗ್ಲಾ ತೆರಿಯಂದಿಲೆಕ್ಕ ಯೇಸುನು ಅಕ್ಲೆಗ್ ಪತ್ತ್‌ದ್ ಕೊರಿಯೆರೆ ಸಮಯೊನು ತೂವೊಂದಿತ್ತೆ.

⁷ಪುಳಿದಾಂತಿ ರೊಟ್ಟಿನ್ ತಿನ್ಪಿನ ಪರ್ಬ ಸುರು ಆದ್‌ ಪಸ್ಕದ ಕುರಿ ಕಡ್ಪುನ ದಿನ ಬತ್ತಿನಪಗ,

⁸ಯೇಸು ಪೇತ್ರಗ್ಲಾ ಯೋಹಾನಗ್ಲಾ, “ನಿಕುಲು ಪೋದು ನಮ ಪಸ್ಕದ ವಣಸ್ ಉನ್ಪಿಲೆಕ್ಕ ತಯಾರ್ ಮಲ್ಪುಲೆ,” ಅಂದ್‌ದ್ ಅಕ್ಲೆನ್ ಕಡಪುಡಿಯೆ.

⁹ಅಕುಲು ಆಯಡ, “ಎಂಕುಲು ಓಲು ತಯಾರ್ ಮಲ್ಪೊಡು,” ಅಂದ್‌ದ್ ಕೇನ್ನಗ,

¹⁰ಆಯೆ ಅಕ್ಲೆಗ್, “ತೂಲೆ, ನಿಕುಲು ಪೇಂಟೆದ ಉಲಯಿ ಪೋಯಿ ಬೊಕ್ಕ ಒರಿ ನರಮಾನಿ ನೀರ್ ದಿಂಜಿದಿ ಕೊಡಪಾನೊನು ತುಂಬೊಂದು ಪೋಪಿನಾಯೆ ನಿಕ್ಲೆನ ಎದುರು ಬರ್ಪೆ. ಆಯೆ ಪೋಪಿನ ಇಲ್ಲಗ್ ನಿಕುಲು ಆಯನ ಬೆರಿಯೆ ಪೋಲೆ.

¹¹‘ಆ ಇಲ್ಲದ ಯಜಮಾನಗ್ ಎಂಕ್ಲೆನ ಬೋಧಕೆ ತನ ಶಿಷ್ಯೆರೆಡೊಪ್ಪ ಪಸ್ಕದ ವಣಸ್‌ನ್ ಮಲ್ಪರೆ ಕೋಣೆ ಓಲು ಉಂಡು? ಅಂದ್‌ದ್ ನಿನಡ ಕೇನ್ವೆ,’ ಅಂದ್‌ದ್ ಪನ್ಲೆ.

¹²ಅಪಗ ಆಯೆ ತಕ್ಕ ಸಾಮಾನ್ ದೀದಿತ್ತಿ ಮೇಲುಪ್ಪರಿಗೆದ ಮಲ್ಲ ಕೋಣೆನ್ ನಿಕ್ಲೆಗ್ ತೋಜಾವೆ. ಅಲ್ಪ ವಣಸ್‌ಗ್ ತಯಾರ್ ಮಲ್ಪುಲೆ,” ಪಂಡ್ದ್ ಕಡಪುಡಿಯೆ.

¹³ಅಕುಲು ಪಿದಾಡ್ದ್ ಆಯೆ ತನ್ಕುಲೆಗ್ ಯೇಸು ಪಂಡಿಲೆಕ್ಕನೇ ಮಾತೆನ್ಲಾ ತೂದು, ಪಸ್ಕದ ವಣಸ್‌ನ್ ತಯಾರ್ ಮಲ್ತೆರ್.

¹⁴ಪಸ್ಕ ವಣಸ್ ಮಲ್ಪುನ ಸಮಯ ಬತ್ತಿನಪಗ ಯೇಸು ತನ ಪದ್ರಾಡ್ ಅಪೊಸ್ತಲೆರೆ ಒಟ್ಟುಗು ವಣಸ್‌ಗ್ ಕುಲ್ಲಿಯೆ.

¹⁵ಅಪಗ ಆಯೆ ಅಕ್ಲೆಗ್, “ಯಾನ್ ಕಷ್ಟ ಅನುಭವ ಮಲ್ಪುನೆಡ್ದ್ ದುಂಬು ನಿಕ್ಲೆನ ಒಟ್ಟುಗು ಈ ಪಸ್ಕದ ವಣಸ್‌ನ್ ಮಲ್ಪೆರೆ ಆಸೆ ಮಲ್ತೊಂದುಲ್ಲೆ.

¹⁶ಉಂದು ದೇವೆರೆ ರಾಜ್ಯೊಡು ಪೂರ್ತಿ ಆವ ಮುಟ್ಟ ಯಾನ್ ನನ ಮಿತ್ತ್ ಈ ವಣಸ್‌ನ್ ಮಲ್ಪುನೇ ಇಜ್ಜಿ,” ಅಂದ್‌ದ್ ಪಂಡೆ.

¹⁷ಯೇಸು ದ್ರಾಕ್ಷಾರಸತ್ತ ಪಾತ್ರೆನ್ ದೆತ್ತೊಂದು ದೇವೆರೆನ್ ಸುಗಿತ್‌ದ್, “ಉಂದೆನ್ ದೆತ್ತೊಂದು ನಿಕ್ಲೆಡ ಪಟ್ಟೊನ್ಲೆ.

¹⁸ಇನಿಡ್ದ್ ದೇವೆರೆ ರಾಜ್ಯ ಬರ್ಪಿನೆಟ್ಟ ಯಾನ್ ದ್ರಾಕ್ಷಾರಸೊನು ಪರ್ಪಿನೇ ಇಜ್ಜಿ,” ಅಂದ್‌ದ್ ನಿಕ್ಲೆಗ್ ಪನ್ಪೆ ಪಂಡೆ.

¹⁹ಐಡ್ದ್ ಬೊಕ್ಕ ಆಯೆ ರೊಟ್ಟಿನ್ ದೆತ್ತೊಂದು ಸುಗಿತ್‌ದ್ ಪೊಲ್ತುದು ಅಕ್ಲೆಗ್ ಕೊರ್ದು, “ಉಂದು ನಿಕ್ಲೆಗಾದ್ ಕೊರ್ತಿನ ಎನ ಶರೀರ. ಎನನ್ ನೆನೆಪು ಮಲ್ಪೆರೆಗಾದ್ ಇಂಚ ಮಲ್ಪುಲೆ,” ಪಂಡೆ.

²⁰ಅಂಚೆನೆ ವಣಸ್ ಆಯಿ ಬೊಕ್ಕ ಆಯೆ ಅವ್ವೇ ರೀತಿಡ್ ಪಾತ್ರೆನ್ ದೆತ್ತೊಂದು, “ಈ ಪಾತ್ರೆ ನಿಕ್ಲೆಗ್ ಬೋಡಾದ್ ಗುತ್ತುದಿನ ಎನ ನೆತ್ತೆರ್‌ಡ್ದ್ ಉಂಡಾತಿನ ಪೊಸ ಒಡಂಬಡಿಕೆನ್ ತೋಜಾವುಂಡು.”

²¹“ಆಂಡ ತೂಲೆ ಎನನ್ ಪತ್ತ್‌ದ್ ಕೊರ್ಪಿನಾಯೆ ಎನಡೊಪ್ಪ ಮೇಜಿದ ಮಿತ್ತ್ ಕೈ ದೀದ್ ವಣಸ್ ಮಲ್ತೊಂದುಲ್ಲೆ.

²²ನರಮಾನಿ ಮಗೆ ದೇವೆರೆನ ಯೋಜನೆದ ಲೆಕ್ಕ ಪಿದಾಡ್ದ್ ಪೋಪೆ ಸರಿ; ಆಂಡ ಆಯನ್ ಪತ್ತ್‌ದ್ ಕೊರ್ಪಿನ ನರಮಾನಿನ ಗತಿನ್ ದಾನೆಂದ್ ಪನೊಲಿ!” ಪಂಡೆ.

²³ಉಂದೆನ್ ಕೇಂಡ್ದ್ ಶಿಷ್ಯೆರ್ ಇಂಚಿತ್ತಿ ನೀಚ ಕೆಲಸೊನು ಮಲ್ಪುನಾಯೆ ಏರಾದುಲ್ಲೆ ಅಂದ್‌ದ್ ಒರಿಯನ್ ಒರಿ ಕೇನಿಯೆರೆ ಸುರು ಮಲ್ತೆರ್.

²⁴ಉಂದತ್ತಂದೆ ತನ್ಕುಲೆ ನಡುಟು ಏರ್ ಮಲ್ಲಾಯೆ ಪನ್ಪಿ ಬಗೆಟ್ ಅಕ್ಲೆನ ಉಲಯಿ ಚರ್ಚೆ ಪುಟ್ಟುಂಡು.

²⁵ಅಪಗ ಯೇಸು ಅಕ್ಲೆಗ್, “ಪಿದಯಿದ ಜನೊಕುಲೆ ಅರಸುಲು ಅಕ್ಲೆ ಮಿತ್ತ್ ದೊರೆತನ ನಡಪಾವೆರ್ ಬೊಕ್ಕ ಅಕ್ಲೆನ ಮಿತ್ತ್ ಅಧಿಕಾರ ನಡಪಾವೆರ್, ‘ಅಧಿಕಾರ ನಡಪಾವುನಾಕುಲು ಉಪಕಾರಿಲು,’ ಅಂದ್‌ದ್ ಪನ್ಪೆರ್.

²⁶ನಿಕುಲು ಅಂಚ ಉಪ್ಪೆರೆ ಬಲ್ಲಿ; ನಿಕ್ಲೆಡ್ ಮಲ್ಲಾಯೆ ಎಲ್ಯಾಯೆಲೆಕ್ಕ ಆದುಪ್ಪೊಡು, ಮುಖ್ಯಸ್ಥೆ ಚಾಕ್ರಿದಾಯಲೆಕ್ಕ ಆದುಪ್ಪೊಡು.

²⁷ಮಲ್ಲಾಯೆ ಏರ್? ಪಂತೆಡ್ ಕುಲ್ಲುದಿನಾಯೆನಾ ಇಜ್ಜಿಂಡ ಚಾಕ್ರಿ ಮಲ್ಪುನಾಯೆನಾ? ಪಂತೆಡ್ ಕುಲ್ಲುದಿನಾಯೆ ಅತ್ತಾ. ಆಂಡ ಯಾನ್ ನಿಕ್ಲೆ ನಡುಟು ಚಾಕ್ರಿ ಮಲ್ಪುನಾಯಲೆಕ್ಕ ಉಲ್ಲೆ.

²⁸“ನಿಕುಲು ಎನ ಶೋಧನೆಡ್ ಎನಡೊಪ್ಪ ಏಪೊಗ್ಲಾ ಇತ್ತಿನಾಕುಲು.

²⁹ಐಡ್ದಾವರ ಎನ ಅಮ್ಮೆ ಎಂಕ್ ರಾಜ್ಯೊನು ಆಳಿಯೆರೆ ಅಧಿಕಾರ ನೇಮಕ ಮಲ್ತಿ ಲೆಕ್ಕನೇ ಯಾನ್ಲಾ ನಿಕ್ಲೆಗ್ ನೇಮಕ ಮಲ್ಪುವೆ;

³⁰ಎನ ರಾಜ್ಯೊಡು ನಿಕುಲು ಎನ ಮೇಜಿಡ್ ವಣಸ್ ಮಲ್ಪುವರ್, ಪರ್ಪರ್; ಬೊಕ್ಕ ಗದ್ದಿಗೆಡ್ ಕುಲ್ಲೊಂದು ಇಸ್ರಾಯೇಲ್‌ದ ಪದ್ರಾಡ್ ಗೋತ್ರೊಲೆಗ್ ನ್ಯಾಯತೀರ್ಪು ಮಲ್ಪುವರ್.

³¹“ಸೀಮೋನಾ, ಸೀಮೋನಾ ಕೇನ್ಲ, ಸೈತಾನೆ ನಿನನ್ ಗೋದಿದಲೆಕ್ಕ ಪೊಡೆಪೊಡು ಅಂದ್‌ದ್ ಅಪ್ಪಣೆ ಕೇನೊಂಡೆ.

³²ಆಂಡ ನಿನ ನಂಬಿಕೆ ಕುಂದುದು ಪೋವೆರೆ ಬಲ್ಲಿ ಅಂದ್‌ದ್ ಯಾನ್ ನಿನ ಬಗೆಟ್ ದೇವೆರೆಡ ನಟ್ಟೊಂಡೆ; ಈ ಪರಿವರ್ತನೆ ಆಯಿ ಬೊಕ್ಕ ನಿನ ಸಹೋದ್ರೆರೆನ್ ದೃಢ ಮಲ್ಪುಲ,” ಅಂದ್‌ದ್ ಪಂಡೆ.

³³ಆಂಡ ಆಯೆ, “ಕರ್ತವಾ, ನಿನಡೊಪ್ಪ ಸೆರೆಮನೆಗ್ ಪೋವೆರೆಗ್ಲಾ ಸೈಯೆರೆಗ್ಲಾ ತಯಾರ್ ಆದುಲ್ಲೆ,” ಅಂದ್‌ದ್ ಪನ್ನಗ

³⁴ಯೇಸು ಆಯಡ, “ಪೇತ್ರ, ಯಾನ್ ನಿಕ್ಕ್ ಪನ್ಪೆ, ಆಯನ್ ತೆರಿಯಯೆ ಅಂದ್‌ದ್ ಮೂಜಿ ಸರ್ತಿ ಅರೆಂಜುನೆಟ್ಟ ಕೋರಿ ಕೆಲೆಪಂದ್,” ಪಂಡೆ.

³⁵ಬೊಕ್ಕ ಯೇಸು ಶಿಷ್ಯೆರೆಗ್, “ಯಾನ್ ನಿಕ್ಲೆನ್ ಕಾಸ್‌ದ ಚೀರವು, ಜೋಳಿಗೆ, ಜೋಡುದಾಂತೆ ಕಡಪುಡಿನಪಗ ನಿಕ್ಲೆಗ್ ದಾದಾಂಡಲಾ ಕಡಿಮೆ ಆತ್ಂಡಾ?” ಅಂದ್‌ದ್ ಕೇನ್ನಗ, “ಅಕುಲು ದಾಲಾ ಇಜ್ಜಿ,” ಅಂದ್‌ದ್ ಉತ್ತರ ಕೊರಿಯೆರ್.

³⁶ಐಕ್ ಆಯೆ, “ಇತ್ತೆ ಗಂಟ್ ಇತ್ತಿನಾಯೆ ಅವೆನ್ ದೆತ್ತೊನಡ್, ಜೋಳಿಗೆನ್ಲಾ ದೆತ್ತೊನಡ್, ಬೊಕ್ಕ ಕತ್ತಿ ಇಜ್ಜಾಂದಿನಾಯೆ, ತನ ಮಿತ್ತ್‌ದ ಕುಂಟು ಮಾರ್ದ್ ಒಂಜಿ ಕತ್ತಿ ದೆತ್ತೊನಡ್,

³⁷ದಾಯೆಗ್ ಪಂಡ ಆಯೆ, ‘ಅನ್ಯಾಯಗಾರೆರೆಡೊಪ್ಪ ಒರಿ ಪಂಡ್ದ್ ಗೆನ್ತ್‌ದ್ಂಡ್,’ ಅಂದ್‌ದ್ ಬರೆದುಪ್ಪುನ ಪಾತೆರ ನಡಪುಡೊಡು ಅಂದ್‌ದ್ ನಿಕ್ಲೆಗ್ ಪನ್ಪೆ; ಇತ್ತೆ ಎನ ವಿಷಯ ಅಂಚೆನೇ ಆವೊಂದುಂಡು,” ಪಂಡೆ

³⁸ಅಕುಲು ಆಯಡ, “ಕರ್ತವಾ, ಇಂದಾ ಮೂಲು ರಡ್ಡ್ ಕತ್ತಿಲು ಉಂಡು,” ಪನ್ನಗ ಆಯೆ ಅಕ್ಲೆಡ, “ಆತೆ ಯಾವು!” ಪಂಡೆ.

³⁹ಬೊಕ್ಕ ಯೇಸು ಏಪಲಾ ಪೋಪಿಲೆಕ್ಕ ಇಪ್ಪೆಗುಡ್ಡೆಗ್ ಪೋಯೆ. ಶಿಷ್ಯೆರ್‌ಲಾ ಆಯನ ಬೆರಿಯೆ ಪೋಯೆರ್.

⁴⁰ಆಯೆ ಏಪಲಾ ಪೋಪಿನ ಜಾಗ್‌ಗ್ ಬತ್ತಿನಪಗ ಅಕ್ಲೆಡ, “ನಿಕುಲು ಶೋಧನೆಗ್ ಬೂರಂದಿಲೆಕ್ಕ ದೇವೆರೆಡ ಪ್ರಾರ್ಥನೆ ಮಲ್ಪುಲೆ,” ಅಂದ್‌ದ್ ಪಂಡೆ.

⁴¹ಬೊಕ್ಕ ಆಯೆ ಅಕ್ಲೆನ್ ಬುಡ್ದು ಕಲ್ಲ್ ದಕ್ಕುನಾತ್ ದೂರ ಪೋದು ಮೊರಂಪೂರ್ದು ಪ್ರಾರ್ಥನೆ ಮಲ್ತ್‌ದ್

⁴²“ಅಮ್ಮೆರೇ, ನಿಕ್ಕ್ ಮನಸಿತ್ತ್‌ಂಡ ಈ ಕಷ್ಟ ಅನುಭವಿಪುನ ದುನ್ನೊನು ಎನಡ್ದ್ ದೆಪ್ಪುಲ, ಎಂಚಲಾ ಎನ ಚಿತ್ತ ಅತ್ತ್, ನಿನ ಚಿತ್ತನೇ ನಡಪಡ್,” ಅಂದ್‌ದ್ ಪ್ರಾರ್ಥನೆ ಮಲ್ತೆ.

⁴³ಅಪಗ ಪರಲೋಕೊಡ್ದು ಬತ್ತಿ ಒರಿ ದೂತೆ ಆಯಗ್ ತೋಜಿದ್ ಆಯನ್ ಬಲ ಪಡೆಪಾಯೆ.

⁴⁴ಆಯ ಮನಸ್‌ಡ್ ದುಃಖ ಇತ್ತ್‌ದ್ ಮಸ್ತ್ ಆಸಕ್ತಿಡ್ ಪ್ರಾರ್ಥನೆ ಮಲ್ತೊಂದುಪ್ಪುನಗ ಆಯನ ಬೆಗರ್ ನೆತ್ತೆರ್‌ದ ಮಲ್ಲ ಪನಿತ್ತ ಲೆಕ್ಕ ಭೂಮಿದ ಮಿತ್ತ್ ಬೂರ್‌ಂಡ್.

⁴⁵ಆಯೆ ಪ್ರಾರ್ಥನೆ ಮುಗಿತ್‌ದ್ ಶಿಷ್ಯೆರೆ ಕೈತಲ್‌ ಬನ್ನಗ ಅಕುಲು ದುಃಖೊಡು ಬಚ್ಚಿದ್ ನಿದ್ರೆ ಮಲ್ತೊಂದಿತ್ತಿನೆನ್ ತೂದು

⁴⁶ಅಕ್ಲೆಡ, “ನಿಕುಲು ನಿದ್ರೆ ಮಲ್ತೊಂದುಲ್ಲರಾ? ಲಕ್ಕ್‌ಲೆ, ಶೋಧನೆಗ್ ಬೂರಂದಿಲೆಕ್ಕ ಪ್ರಾರ್ಥನೆ ಮಲ್ಪುಲೆ,” ಅಂದ್‌ದ್ ಪಂಡೆ.

⁴⁷ಯೇಸು ನನಲಾ ಪಾತೆರೊಂದುಪ್ಪುನಗನೇ, ಜನೊಕುಲೆ ಗುಂಪು ಅಡೆಗ್ ಬತ್ತ್ಂಡ್. ಶಿಷ್ಯೆರೆಡ್ ಯೂದೆ ಪನ್ಪಿನಾಯೆ ಆ ಜನೊಕುಲೆ ಎದುರುಡಿತ್ತೆ. ಆಯೆ ಯೇಸುಗು ಮುತ್ತು ಕೊರಿಯೆರೆಗಾದ್ ಆಯನ ಕೈತಲ್‌ ಬನ್ನಗ

⁴⁸ಯೇಸು ಆಯಡ, “ಯೂದಾ, ನರಮಾನಿ ಮಗನ್ ಮುತ್ತು ಕೊರ್ದು ಪತ್ತ್‌ದ್ ಕೊರ್ಪನಾ?” ಅಂದ್‌ದ್ ಕೇಂಡೆ.

⁴⁹ಆಯನ ಶಿಷ್ಯೆರ್ ದುಂಬಗ್ ನಡಪುನೆನ್ ತೆರಿದ್, “ಕರ್ತವಾ, ಎಂಕುಲು ಕತ್ತಿಡ್ ಕಡ್ಪೊಡಾ?” ಅಂದ್‌ದ್ ಕೇಂಡೆರ್.

⁵⁰ಶಿಷ್ಯೆರೆಡ್ ಒರಿ ಪ್ರಧಾನಯಾಜಕನ ಬೇಲೆದಾಯಗ್ ಹಾಕ್‌ದ್ ಆಯನ ಬಲತ್ತ ಕೆಬಿನ್ ಕಡ್ತ್‌ದ್ ಬುಡಿಯೆ.

⁵¹ಆಂಡ ಯೇಸು, “ಈತೆಕೆ ಬುಡ್ಲೆ!” ಅಂದ್‌ದ್ ಆ ಕೆಬಿನ್ ಮುಟ್ಟುದು ಆಯನ್ ಗುಣ ಮಲ್ತೆ.

⁵²ಐಡ್ದ್ ಬೊಕ್ಕ ಯೇಸುನು ಪತ್ತಿಯೆರೆ ಬತ್ತಿ ಪ್ರಧಾನಯಾಜಕಗ್ಲಾ ದೇವಾಲಯದ ಕಾವಲ್‌ದ ಮುಖ್ಯಸ್ಥಗ್ಲಾ ಹಿರಿಯಾಕುಲೆಗ್ಲಾ, “ಒರಿ ಕಲ್ವನ್ ಪತ್ತಿಯೆರೆ ಬತ್ತಿಲೆಕ್ಕ ಕತ್ತಿನ್ಲಾ, ಸೋಂಟೆನ್ಲಾ ಪತ್ತೊಂದು ಎನನ್ ಪತ್ತಿಯೆರೆ ಬತ್ತರಾ?

⁵³ಯಾನ್ ದಿನಾಲ ದೇವಾಲಯೊಡು ನಿಕ್ಲೆಡೊಪ್ಪ ಉಪ್ಪುನಗ ನಿಕುಲು ಎನ ಮಿತ್ತ್ ಕೈ ಪಾಡ್ದ್‌ಜರ್; ಆಂಡ ಉಂದು ನಿಕ್ಲೆನ ಗಳಿಗೆಲಾ ಕತ್ತಲೆದ ಅಧಿಕಾರಲಾ ಆದುಂಡು.” ಪಂಡೆ.

⁵⁴ಬೊಕ್ಕ ಅಕುಲು ಆಯನ್ ಪತ್ತ್‌ದ್ ಪ್ರಧಾನಯಾಜಕನ ಇಲ್ಲದುಲಯಿ ಲೆತ್ತೊಂದು ಪೋಯೆರ್; ಪೇತ್ರೆ ದೂರೊಡ್ದು ಬೆರಿಯೆ ಪೋಯೆ.

⁵⁵ಜಾಲ್‌ದ ನಡುಟು ಅಕುಲು ತೂ ಪೊತ್ತಾದ್ ಕುಲ್ಲೊಂದುಪ್ಪುನಗ ಅಕ್ಲೆನ ಒಟ್ಟುಗು ಪೇತ್ರೆಲಾ ಕುಲ್ಲಿಯೆ.

⁵⁶ಆಯೆ ಬೊಲ್ಪುಗು ಮೋನೆ ಪಾಡ್ದ್ ಕುಲ್ಲೊಂದುಪ್ಪುನಗ ಒರ್ತಿ ಚಾಕ್ರಿದಾಲ್ ಆಯನ್ ಸರಿಯಾದ್ ತೂದು, “ಉಂಬೆಲಾ ನಜರೇತ್‌ದ ಯೇಸುಡೊಪ್ಪ ಇತ್ತಿನಾಯೆ.” ಅಂದಲ್.

⁵⁷ಆಂಡ ಪೇತ್ರೆ, “ಯಾನ್ ಆಯನ್ ತೆರಿಯಯೆ ಅಮ್ಮ,” ಅಂದ್‌ದ್ ಆರೆಂಜಿಯೆ.

⁵⁸ಒಂತೆ ಪೊರ್ತುಡ್ದು ಬೊಕ್ಕ ಬೊಕ್ಕೊರಿ ಆಯನ್ ತೂದು, “ಈಲಾ ಅಕ್ಲೆಡ್ ಒರಿ!” ಅಂದ್‌ದ್ ಪನ್ನಗ ಪೇತ್ರೆ, “ಅತ್ತಪ್ಪಾ,” ಪಂಡೆ.

⁵⁹ಹೆಚ್ಚಿಕಡಿಮೆ ಒಂಜಿ ಗಂಟೆ ಆಯಿ ಬೊಕ್ಕ ಬೊಕ್ಕೊರಿ, “ನಿಜಾದ್ ಉಂಬೆಲಾ ಆಯಡೊಪ್ಪ ಇತ್ತಿನಾಯೆ, ಉಂಬೆ ಗಲಿಲಾಯದಾಯೆನೇ,” ಅಂದ್‌ದ್ ನಿಗಂಟಾದ್ ಪಂಡೆ.

⁶⁰ಆಂಡ ಪೇತ್ರೆ, “ಈ ಎಂಚಿನ ಪನ್ಪನಾ ಎಂಕ್ ಗೊತ್ತಾಯಿಜಿ ಅಂದ್‌ದ್ ಪಂಡೆ.” ಆಯೆ ಈ ಪಾತೆರೊನು ಪನೊಂದುಪ್ಪುನಗನೇ ಕೋರಿ ಕಿಲೆತ್ತ್ಂಡ್.

⁶¹ಕರ್ತವೆ ಪಿರ ತಿರ್ಗ್‌ದ್ ಪೇತ್ರನ್ ದೃಷ್ಟಿ ದೀದ್ ತೂಯೆ. ಅಪಗ ಪೇತ್ರೆ, “ಕೋರಿ ಕಿಲೆಪುನೆಡ್ದ್ ದುಂಬು ಮೂಜಿ ಸರ್ತಿ ಕರ್ತವನ್ ತೆರಿಯಯೆ ಪನ್ಪ,” ಪಂಡಿನ ಪಾತೆರೊನು ಎನ್ನ್‌ದ್

⁶²ಪೇತ್ರೆ ಪಿದಯಿ ಪೋದು ಬಿಕ್ಕ್‌ಬಿಕ್ಕ್‌ದ್ ಬುಲ್ತೆ.

⁶³ಐಡ್ದ್ ಬೊಕ್ಕ ಯೇಸುನು ಪತ್ತಿನಾಕುಲು ಆಯಗ್ ಮಸ್ಕಿರಿ ಮಲ್ತ್‌ದ್ ಹಾಕಿಯೆರ್.

⁶⁴ಬೊಕ್ಕ ಆಯಗ್ ಮುಸ್ಕು ಪಾಡ್ದ್, “ನಿಕ್ಕ್ ಹಾಕಿನಾಕುಲು ಏರ್? ಅಂದ್‌ದ್ ಪ್ರವಾದನೆ ಪನ್ಲ,” ಅಂದ್‌ದ್ ಆಯಡ ಕೇಂಡೆರ್.

⁶⁵ಆಯಗ್ ನನಲಾ ದೂಷಣೆದ ಪಾತೆರೊನು ಪಂಡ್ದ್ ಸಸಾರ ಮಲ್ತೆರ್.

⁶⁶ಬೊಲ್ಪಾನಗ ಯೆಹೂದ್ಯೆರೆ ಹಿರಿಸಭೆತಾಕುಲುಲಾ ಪ್ರಧಾನಯಾಜಕೆರ್‌ಲಾ ಶಾಸ್ತ್ರಿಲುಲಾ ಸೇರ್ದ್ ಆಯನ್ ನ್ಯಾಯತೀರ್ಪುದ ಸಭೆಕ್ ಲೆತ್ತೊಂದು ಬತ್ತ್‌ದ್,

⁶⁷“ಈ ಕ್ರಿಸ್ತೆ ಆದುಲ್ಲನಾ? ಎಂಕ್ಲೆಗ್ ಪನ್ಲ,” ಪಂಡೆರ್. ಆಯೆ ಅಕ್ಲೆಡ, “ಯಾನ್ ನಿಕ್ಲೆಗ್ ಪಂಡ್ಂಡ ನಿಕುಲು ನಂಬುಜರ್.

⁶⁸ಯಾನ್ ನಿಕ್ಲೆಗ್ ಪ್ರಶ್ನೆ ಕೇಂಡ್‌ಂಡ ನಿಕುಲು ಉತ್ತರ ಕೊರ್ಪುಜರ್.

⁶⁹ಆಂಡ ಇನಿಡ್ದಿಂಚಿ ನರಮಾನಿ ಮಗೆ ಸರ್ವಶಕ್ತೆ ಆದುಪ್ಪು ದೇವೆರೆ ಬಲತ್ತ ಮರ್ಗಿಲ್‌ಡ್ ಕುಲ್ಲುದುಪ್ಪುವೆ,” ಅಂದ್‌ದ್ ಪಂಡೆ.

⁷⁰ಅಪಗ ಮಾತೆರ್ಲಾ, “ಅಂಚಾಂಡ ಈ ದೇವೆರೆ ಮಗೆನಾ,” ಅಂದ್‌ದ್ ಕೇನ್ನಗ, ಆಯೆ ಅಕ್ಲೆಗ್, “ಯಾನ್ ಆಯೆನೇ ಅಂದ್‌ದ್ ನಿಕುಲೇ ಪನ್ಪರ್.” ಪಂಡೆ.

⁷¹ಐಕ್ ಅಕುಲು, “ನಂಕ್ ಸಾಕ್ಷಿ ನನ ದಾಯೆಗ್ ಬೋಡು? ನಮನೇ ಆಯನ ಬಾಯಿಡ್ದ್ ಕೇಂಡತ್ತಾ,” ಅಂದ್‌ದ್ ಪಂಡೆರ್.