Read Tulu ಲೂಕೆ 23 Bible Online

ಲೂಕೆ 23 - Tulu bible

ಲೂಕೆ 23

¹ಅಲ್ಪ ಸೇರ್ದಿನಾಕುಲು ಮಾತೆರ್ ಆಯನ್ ಪಿಲಾತನ ಕೈತಲ್‌ ಲೆತ್ತೊಂದು ಪೋದು.

²ಅಕುಲು ಉಂಬೆನೇ ರಕ್ಷಕೆ ಆದುಪ್ಪು ಕ್ರಿಸ್ತೆ ಪನ್ಪಿ ಒರಿ ಅರಸು ಪಂಡ್ದ್‌ಲಾ ಕೈಸರಗ್ ತೆರಿಗೆ ಕೊರಿಯೆರೆ ಬಲ್ಲಿ ಅಂದ್‌ದ್ ಅಡ್ಡಿ ಮಲ್ತ್‌ದ್ ಎಂಕ್ಲೆನ ದೇಶದ ಜನೊಕುಲೆನ ಮನಸ್‌ನ್ ಹಾಳ್ ಮಲ್ಪುನೆನ್ ತೂಯ ಅಂದ್‌ದ್ ಆಯನ ಮಿತ್ತ್ ದೂರು ಕೊರಿಯೆರ್.

³ಪಿಲಾತೆ ಆಯಡ, “ಈ ಯೆಹೂದ್ಯೆರೆ ಅರಸು ಅಂದಾ?” ಪಂಡ್ದ್ ಕೇನ್ನಗ ಯೇಸು, “ಈಯೆ ಪನೊಂದುಲ್ಲತ್ತಾ,” ಅಂದ್‌ದ್ ಪನ್ನಗ,

⁴ಪಿಲಾತೆ ಪ್ರಧಾನಯಾಜಕೆರೆಗ್ಲಾ ಜನೊಕುಲೆ ಗುಂಪುಗ್ಲಾ, “ಈ ನರಮಾನಿಗ್ ಶಿಕ್ಷೆ ಕೊರ್ಪಿಲೆಕ್ಕ ಅಂಚಿನ ತಪ್ಪು ದಾಲಾ ಎಂಕ್ ತೋಜುಜಿ ಪಂಡೆ.”

⁵ಐಕ್ ಅಕುಲು ಉಂಬೆ ಗಲಿಲಾಯೊಡು ಸುರು ಮಲ್ತ್‌ದ್ ಯೂದಾಯದ ಮುಟ್ಟಲಾ ಬೋಧನೆ ಮಲ್ತೊಂದು ಜನೊಕುಲೆ ನಡುಟು ಲಡಯಿ ಮಲ್ಪಾವೆ ಅಂದ್‌ದ್ ಒತ್ತುದು ಪಂಡೆರ್.

⁶ಉಂದೆನ್ ಪಿಲಾತೆ ಕೇಂಡ್ದ್ ಈ ನರಮಾನಿ ಗಲಿಲಾಯದಾಯೆ ಅಂದ್‌ದ್ ಗೊತ್ತಾದ್

⁷ಉಂಬೆ ಹೆರೋದನ ಅಧಿಕಾರೊಗು ಸೇರ್ದಿತ್ತಿನಾಯೆ ಅಂದ್‌ದ್ ಆಯನ್ ಹೆರೋದನ ಕೈತಲ್‌ ಕಡಪುಡಿಯೆ. ಹೆರೋದೆ ಆ ದಿನೊಕುಲೆಡ್ ಯೆರೂಸಲೇಮುಡೇ ಇತ್ತೆ.

⁸ಹೆರೋದೆ ಯೇಸುನು ತೂದು ಸಂತೋಷ ಪಡೆಯೆ. ಹೆರೋದೆ ಯೇಸುನ ಸಂಗತಿಡ್ ಮಸ್ತ್ ಸಂಗತಿಲೆನ್ ಕೇನಿನೆಡ್ದ್ ಆಯನ್ ತೂವೊಡು ಅಂದ್‌ದ್ ಮಸ್ತ್ ಸಮಯೊಡ್ದಿಂಚಿ ನಿರೀಕ್ಷೆ ಮಲ್ತೊಂದಿತ್ತೆ. ಆಯಡ್ದ್ ಒವ್ವಾಂಡಲಾ ಕಾರ್ನಿಕೊಲೆನ್ ತೂವೊಡು ಅಂದ್‌ದ್ ಎನ್ನ್‌ದಿತ್ತೆ.

⁹ಆಯೆ ಮಸ್ತ್ ಪಾತೆರೊಲೆಡ್ದ್ ಯೇಸುಗು ಪ್ರಶ್ನೆ ಮಲ್ತ್ಂಡಲಾ ಯೇಸು ಆಯಗ್ ದಾಲಾ ಉತ್ತರ ಕೊರ್ಜೆ.

¹⁰ಪ್ರಧಾನಯಾಜಕೆರ್‌ಲಾ ಶಾಸ್ತ್ರಿಲುಲಾ ಉಂತೊಂದು ಆಯನ ಮಿತ್ತ್ ಕಠಿಣಾದ್ ದೂರುನು ಪನೊಂದಿತ್ತೆರ್.

¹¹ಕಡೆಕ್ಕ್ ಹೆರೋದೆ ತನ ಸಿಪಾಯಿಲೆನ್ ಸೇರೊಂದು ಆಯಗ್ ತಿರಸ್ಕಾರಲಾ ಗೇಲಿಲಾ ಮಲ್ತ್‌ದ್ ಎಡ್ಡೆ ಅಂಗಿ ಪಾಡಾದ್ ಪಿಲಾತನ ಕೈತಲ್‌ ಪಿರ ಕಡಪುಡ್ದು ಕೊರಿಯೆ.

¹²ಅವ್ವೇ ದಿನೊಟು ಹೆರೋದೆಲಾ ಪಿಲಾತೆಲಾ ಒರಿಯಗ್ ಒರಿ ಸ್ನೇಹಿತೆರ್ ಆಯೆರ್; ಅವೆಡ್ದುಂಬು ಪಗೆಟಿತ್ತೆರ್.

¹³ಬೊಕ್ಕ ಪಿಲಾತೆ ಪ್ರಧಾನಯಾಜಕೆರೆನ್ಲಾ ಯೆಹೂದ್ಯೆರೆ ಅಧಿಕಾರಿಲೆನ್ಲಾ ಜನೊಕುಲೆನ್ಲಾ ಒಟ್ಟಾದ್ ಲೆಪ್ಡಾದ್,

¹⁴ಅಕ್ಲೆಡ ಪಂಡಿನಿ, “ಈ ನರಮಾನಿ ಜನೊಕುಲೆನ್ ತಪ್ಪು ಸಾದಿಗ್ ತಿರ್ಗಾವುನಾಯೆ ಅಂದ್‌ದ್ ಉಂಬ್ಯನ್ ಎನ ಕೈತಲ್‌ ಕನತ್‌ದ್ ದೂರು ಕೊರಿಯರ್. ಯಾನ್ ನಿಕ್ಲೆನ ಎದುರುಡೇ ವಿಚಾರಣೆ ಮಲ್ಪುನಗ ಉಂಬ್ಯಗ್ ಶಿಕ್ಷೆ ಕೊರ್ಪಿನಂಚಿನ ಒಂಜಿ ತಪ್ಪುಲಾ ಎಂಕ್ ತೋಜಿಜಿ;

¹⁵ಹೆರೋದಗ್ಲಾ ತೋಜಿಜಿ; ಆಯೆ ಉಂಬ್ಯನ್ ಪಿರ ಎಂಕ್ಲೆನ ಕೈತಲ್‌ ಕಡಪುಡುದೆ ಅತ್ತಾ. ಇಂದಾ, ಉಂಬೆ ಮರಣ ದಂಡನೆಗ್ ತಕ್ಕವಾಯಿನೆನ್ ಮಲ್ತಿನಾಯೆ ಅತ್ತ್;

¹⁶ಅವೆಡ್ದಾವರ ಯಾನ್ ಉಂಬ್ಯಗ್ ಹಾಕಾದ್ ಬುಡ್ದು ಬುಡ್ಪೆ,” ಪಂಡೆ.

¹⁷ಪಿಲಾತಗ್ ಪರ್ಬದ ಸಮಯೊಡು ಒರಿಯನ್ ಸೆರೆಮೆನೆಡ್ದ್ ಬುಡ್ದು ಕೊರ್ಪಿನ ಕ್ರಮ ಇತ್ತ್ಂಡ್.

¹⁸ಆಂಡ ಅಕುಲು, “ಆಯನ್ ಕೆರ್ಪಾಲ, ಎಂಕ್ಲೆಗ್ ಬರಬ್ಬನ್ ಬುಡ್ದು ಕೊರು,” ಅಂದ್‌ದ್ ಒಟ್ಟಾದ್ ಬೊಬ್ಬೆ ಪಾಡಿಯೆರ್.

¹⁹ಈ ಬರಬ್ಬನ್ ಪಟ್ಟಣೊಡು ಗಲಾಟೆ ಮಲ್ತ್‌ದ್ ಒರಿಯನ್ ಕೆರ್ತಿನೆಡ್ದ್ ಸೆರೆಮನೆಟ್ ಪಾಡ್ದ್ ಇತ್ತೆರ್.

²⁰ಪಿಲಾತಗ್ ಯೇಸುನು ಬುಡ್ಪಾವುನ ಮನಸ್ ಇತ್ತಿನೆಡ್ದ್ ಕುಡ ಅಕ್ಲೆಡ ಪಾತೆರಿಯೆ.

²¹ಆಂಡ ಅಕುಲು, “ಯೇಸುನು ಕ್ರುಸ್ಸುಗು ಪಾಡ್ಪಾಲ, ಕ್ರುಸ್ಸುಗು ಪಾಡ್ಪಾಲ,” ಅಂದ್‌ದ್ ಬೊಬ್ಬೆ ಪಾಡೊಂದಿತ್ತೆರ್.

²²ಮೂಜನೆ ಸರ್ತಿ ಅಕ್ಲೆಡ, “ದಾಯೆಗ್? ಅಂಚಿನ ದಾದ ಹಾಳ್ ಬೇಲೆ ಮಲ್ತ್‌ದೆ? ಎಂಕ್ ಆಯಡ ಮರಣದ ದಂಡನೆಗ್ ತಕ್ಕಂತಿ ಅಪರಾಧ ದಾಲಾ ತೋಜುಜಿ. ಐಡ್ದಾವರ ಉಂಬ್ಯನ್ ಹಾಕಾದ್ ಬುಡ್ದು ಬುಡ್ಪೆ,” ಅಂದ್‌ದ್ ಅಕ್ಲೆಗ್ ಪಂಡೆ.

²³ಆಂಡ ಅಕುಲು ಮಲ್ಲ ಅರಬಾಯಿ ದೀವೊಂದು, “ಆಯನ್ ಕ್ರುಸ್ಸುಗು ಪಾಡೊಡು,” ಅಂದ್‌ದ್ ಬಲವಂತ ಮಲ್ತೆರ್; ಅಕ್ಲೆನ ಅರಬಾಯಿ ಗೆಂದ್‌ಂಡ್.

²⁴ಪಿಲಾತೆ, “ನಿಕುಲು ಕೇಂಡೊಂಡಿ ಲೆಕ್ಕ ಆವಡ್,” ಅಂದ್‌ದ್ ಯೇಸುನು ಕೆರಿಯೆರೆ ತೀರ್ಪು ಕೊರಿಯೆ.

²⁵ಗಲಾಟೆ ಮಲ್ತ್‌ದ್ ಮಾನ್ಯ ಕೆರ್ದ್ ಸೆರೆಮನೆಟ್ ಇತ್ತಿ ಬರಬ್ಬನ್ ಅಕುಲು ಕೇಂಡೊಂಡಿ ಪ್ರಕಾರ ಬುಡ್ದು ಕೊರ್ದು ಯೇಸುನು ಅಕ್ಲೆ ಚಿತ್ತೊಗು ಒಚ್ಚಿದ್ ಕೊರಿಯೆ.

²⁶ಸಿಪಾಯಿಲು ಆಯನ್ ಲೆತ್ತೊಂದು ಪೋನಗ ಕಂಡೊಡ್ದು ಬರೊಂದಿತ್ತಿ ಕುರೇನೆ ಪೇಂಟೆದ ಸೀಮೋನೆ ಪನ್ಪಿನಾಯನ್ ಪತ್ತ್‌ದ್ ಕ್ರುಸ್ಸುನು ಆಯನ ಪುಗೆಲ್‌ಡ್ ದೀದ್ ಯೇಸುನ ಪಿರವುಡೆ ತುಂಬೊಂದು ಬರಿಯೆರೆ ಪಂಡೆರ್.

²⁷ಜನೊಕುಲುಲಾ ಪೊಂಜೊವುಲುಲಾ ಮಲ್ಲ ಗುಂಪಾದ್ ಆಯನ ಬೆರಿಯೆ ಪೋಯೆರ್. ಆ ಪೊಂಜೊವುಲು ತಿಗಲೆ ದರ್ತೊಂದು ಆಯಗಾದ್ ಬುಲ್ತೊಂದು ಇತ್ತೆರ್.

²⁸ಯೇಸು ಅಕ್ಲೆನ ಕಡೆಕ್ಕ್ ತಿರ್ಗ್‌ದ್, “ಯೆರೂಸಲೇಮುದ ಪೊಂಜೊವುಲೇ, ಎಂಕಾದ್ ಬುಲ್ಪೊಡ್ಚಿ; ನಿಕ್ಲೆಗಾದ್‌ಲಾ ನಿಕ್ಲೆನ ಜೋಕುಲೆಗಾದ್‌ಲಾ ಬುಲ್ಪುಲೆ.

²⁹ದಾಯೆಗಂದ್ಂಡ ಬಂಜಿನಾಕುಲು ಆವಂದಿನಾಕುಲುಲಾ ಮಿರೆ ಪೇರ್ ಪರ್ಪಾವಂದಿನಾಕುಲುಲಾ ಭಾಗ್ಯವಂತೆರ್ ಅಂದ್‌ದ್ ಜನೊಕುಲು ಪನ್ಪಿ ದಿನೊಕುಲು ಬರ್ಪುಂಡು.

³⁰ಆ ಕಷ್ಟದ ಕಾಲೊಡು ಜನೊಕುಲೆಗ್ ತಡೆವೊನೆರೆ ಬಲ ಇಜ್ಜಂದಿನಪಗ, ‘ಪರ್ವತಲೇ ಎಂಕ್ಲೆನ ಮಿತ್ತ್ ಬೂರ್ಲೆ!’ ಗುಡ್ಡೆಲೇ ‘ಎಂಕ್ಲೆನ್ ಮುಚ್ಚೊನ್ಲೆ!’ ಪನ್ಪರ್.

³¹ಮರ ಪಜ್ಜಿ ಉಪ್ಪುನಗನೇ ಇಂಚ ಮಾತ ಮಲ್ತ್ಂಡ ನುಂಗೆಲ್ ಮರೊಕು ದಾದ ಅವು?”

³²ಯೇಸುನ ಒಟ್ಟುಗು ಕೆರಿಯೆರೆ ಕಲ್ವೆರಾದಿತ್ತಿ ಬೇತೆ ಇರ್ವೆರೆನ್ ಲೆತ್ತೊಂದು ಪೋಯೆರ್.

³³ಅಕುಲು “ಕಪಾಲ,” ಪನ್ಪಿ ಜಾಗ್‌ಗ್ ಬನ್ನಗ ಅಲ್ಪ ಆಯನ್ಲಾ ಆ ಕಲ್ವೆರೆನ್ಲಾ ಕ್ರುಸ್ಸುಗು ಪಾಡಿಯೆರ್ ಒರಿಯನ್ ಬಲತ್ತ ಮರ್ಗಿಲ್‌ಡ್ ಬೊಕ್ಕೊರಿಯನ್ ದತ್ತ ಮರ್ಗಿಲ್‌ಡ್ ಪಾಡಿಯೆರ್.

³⁴ಅಪಗ ಯೇಸು, “ಅಮ್ಮೆರೇ, ಅಕ್ಲೆಗ್ ಮಾಪು ಮಲ್ಪು; ತನ್ಕುಲು ದಾದ ಮಲ್ಪುವೆರ್ ಪನ್ಪಿನೆನ್ ತೆರಿದಿಜೆರ್,” ಅಂದ್‌ದ್ ಪಂಡೆ. ಐಡ್ದ್ ಬೊಕ್ಕ ಆಯನ ಕುಂಟುನು ಪಾಲ್ ಮಲ್ತ್‌ದ್ ಚೀಟಿ ಪಾಡಿಯೆರ್.

³⁵ಜನೊಕುಲು ತೂವೊಂದೇ ಉಂತಿಯೆರ್. ಉಂದತ್ತಂದೆ ಅಧಿಕಾರಿಲು ಮಸ್ಕಿರಿ ಮಲ್ತ್‌ದ್, “ಆಯೆ ಬೇತೆಕ್ಲೆನ್ ಬಚವು ಮಲ್ತೆ. ಆಯೆ ದೇವೆರ್ ಅಜತ್ ದೆತ್ತೊಂಡಿ ಕ್ರಿಸ್ತೆ ಆದಿತ್ತೆಡ, ತನನ್ ತಾನೇ ಬಚವು ಮಲ್ತೊನಡ್ ಅಂದ್‌ದ್ ಗೇಲಿ ಮಲ್ತೆರ್.”

³⁶ಸಿಪಾಯಿಲು ಆಯನ್ ಗೇಲಿ ಮಲ್ತೆರ್. ಅಕುಲು ಆಯನ ಕೈತಲ್‌ ಬತ್ತ್‌ದ್ ಪುಳಿರಸೊನು ತೋಜಾದ್

³⁷“ಈ ಯೆಹೂದ್ಯೆರೆ ಅರಸು ಆದಿತ್ತಡ ನಿನನ್ ಬಚವು ಮಲ್ತೊನ್ಲ,” ಪಂಡೆರ್.

³⁸ಉಂದತ್ತಂದೆ ಆಯನ ಕ್ರುಸ್ಸುದ ಮಿತ್ತ್‌ಡ್ “ಯೆಹೂದ್ಯೆರೆ ಅರಸು,” ಅಂದ್‌ದ್ ಒಂಜಿ ಪಲಯಿಡ್ ಬರೆದ್ ಪಾಡ್ದ್ ಇತ್ತೆರ್.

³⁹ನೇಲಾದಿ ಆ ಕಲ್ವೆರೆಡ್ ಒರಿ ಆಯನ್ ದೂಷಣೆ ಮಲ್ತ್‌ದ್, “ಈ ಬರೊಡಾಯಿನ ಕ್ರಿಸ್ತೆ ಅತ್ತಾ, ನಿನನ್ ಬಚವು ಮಲ್ತೊನ್ಲ, ಎಂಕ್ಲೆನ್ಲಾ ಬಚವು ಮಲ್ಪು,” ಪಂಡೆ.

⁴⁰ಐಕ್ ರಡ್ಡನೆದಾಯೆ ಆಯನ್ ದಟ್ಟಿದ್, “ಈ ಉಂದೇ ನ್ಯಾಯತೀರ್ಪುಡು ಉಪ್ಪುನಗ ದೇವೆರೆಗ್ ಪೋಡಿಯುಜನ?

⁴¹ನಮಾಂಡಲಾ ನ್ಯಾಯದ ದಂಡನೆಡ್ ಉಪ್ಪುನವು ನ್ಯಾಯನೇ. ನಮ ಮಲ್ತಿನೆಕ್ಕ್ ತಕ್ಕ ಪ್ರತಿಫಲೊನು ಪಡೆಯೊಂದು ಉಲ್ಲ; ಉಂಬೆ ಅಂಚಿನ ದಾಲಾ ಮಲ್ತ್‌ಜೆ,” ಅಂದ್‌ದ್ ಪಂಡ್ದ್

⁴²“ಯೇಸೋ, ಈ ನಿನ ರಾಜ್ಯೊಗು ಬನ್ನಗ ಎನನ್ ನೆನೆಪು ಮಲ್ಪು,” ಪಂಡೆ.

⁴³ಐಕ್ ಯೇಸು, “ಇನಿಯೇ ಎನಡೊಪ್ಪ ಪರದೈಸೊಡು ಉಪ್ಪುವ ಅಂದ್‌ದ್ ನಿಕ್ಕ್ ಸತ್ಯಾದ್ ಪನ್ಪೆ,” ಪಂಡ್ದ್ ಉತ್ತರ ಕೊರಿಯೆ.

⁴⁴ಈತಾನಗ ಮಧ್ಯಾಹ್ನ ಆಂಡ್. ಸೂರ್ಯನ ದೊಂಬು ಮಾಜಿದ್ ಮೂಜಿ ಗಂಟೆ ಮುಟ್ಟ ಆ ದೇಶದ ಮಿತ್ತ್ ಕತ್ತಲೆ ಆಂಡ್; ಆತಿ ಪರಿಶುದ್ಧ ಆದುಪ್ಪು ದೇವಾಲಯದ ಪರದೆ ನಡುಟು ಪರಿದ್ ರಡ್ಡ್ ಪಾಲ್ ಆಂಡ್.

⁴⁵

⁴⁶ಐಡ್ದ್ ಬೊಕ್ಕ ಯೇಸು, “ಅಮ್ಮೆರೆ, ಎನ ಆತ್ಮೊನು ನಿನ ಕೈಕ್ ಒಪ್ಪಿಸಾವೆ,” ಅಂದ್‌ದ್ ಮಲ್ಲ ಸ್ವರೊಟ್ಟು ಬುಲ್ತೆ. ಉಂದೆನ್ ಪಂಡಿ ಬೊಕ್ಕ ಪ್ರಾಣ ಬುಡಿಯೆ.

⁴⁷ಶತಾಧಿಪತಿ ನಡತಿ ಸಂಗತಿನ್ ತೂದು, “ನಿಜಾದ್ ಈ ನರಮಾನಿ ನೀತಿವಂತೆ,” ಅಂದ್‌ದ್ ದೇವೆರೆನ್ ಪುಗರಿಯೆ.

⁴⁸ಈ ಸಂಗತಿನ್ ತೂವೆರೆ ಸೇರ್ದಿತ್ತಿ ಜನೊಕುಲು ನಡತಿ ಸಂಗತಿನ್ ತೂದು, ತಿಗಲೆ ದರ್ತೊಂದು ಪಿರ ಪೋಯೆರ್.

⁴⁹ಪೊಲಬು ಇತ್ತಿನಾಕುಲು ಮಾತೆರ್ ಗಲಿಲಾಯೊಡ್ದು ಬೈದಿನ ಪೊಂಜೊವುಲು ದೂರೊಡು ಉಂತೊಂದು ಈ ಸಂಗತಿನ್ ತೂವೊಂದಿತ್ತೆರ್.

⁵⁰ಅರಿಮಥಾಯೆ ಪನ್ಪಿ ಯೆಹೂದ್ಯೆರೆ ಪಟ್ಟಣದ ಒರಿ ನರಮಾನಿ ಇತ್ತೆ. ಆಯನ ಪುದರ್ ಯೋಸೇಫೆ, ಆಯೆ ಹಿರಿಸಭೆತಾಯೆ, ಎಡ್ಡೆಂತಿನಾಯೆ, ನೀತಿದಾಯೆ, ದೇವೆರೆ ರಾಜ್ಯೊನು ಎದುರು ತೂವೊಂದಿತ್ತಿನಾಯೆ ಆದಿತ್ತೆ. ಆಯೆ ಹಿರಿಸಭೆತಾಕುಲೆನ ಆಲೋಚನೆಗ್ಲಾ ಕೆಲಸೊಗ್ಲಾ ಒಪ್ಪಿಗೆ ಕೊರ್ತುಜೆ.

⁵¹

⁵²ಆಯೆ ಪಿಲಾತನ ಕೈತಲ್‌ ಪೋದು ಯೇಸುನ ಶರೀರೊನು ಎಂಕ್ ಕೊರ್ಲೆ ಅಂದ್‌ದ್ ನಟ್ಟೊಂಡೆ.

⁵³ಅವೆನ್ ಕ್ರುಸುಡ್ದ್ ಜಪುಡಾದ್ ನಾರ್‌ಮಡಿತ ಕುಂಟುಡು ಸುತ್ತುದು ತೋಡ್‌ದಿತ್ತಿನ ಕಲ್ಲ್‌ದ ಸಮಾಧಿಡ್ ದೀಯೆ. ಆ ಸಮಾಧಿಡ್ ಆತ್‌ನೆಟ್ಟ ಏರೆನ್ಲಾ ದೀದಿತ್ತಿಜೆರ್.

⁵⁴ಆನಿ ತಯಾರ್ ಮಲ್ಪು ದಿನ ಆದಿತ್ತ್‌ದ್ ಬೊಕ್ಕ ಸಬ್ಬತ್‌ದಿನ ಸುರು ಆವೆರೆ ಒಂತೆ ಪೊರ್ತು ಮಾತ್ರ ಇತ್ತ್ಂಡ್.

⁵⁵ಗಲಿಲಾಯೊಡ್ದು ಬತ್ತಿ ಪೊಂಜೊವುಲು ಆಯ ಬೆರಿಯೆ ಪೋದು, ಸಮಾಧಿನ್ಲಾ ಆಯ ಶರೀರೊನು ದೀತಿನ ರೀತಿನ್ಲಾ ತೂಯೆರ್;

⁵⁶ಇಲ್ಲಗ್ ಪಿರ ಪೋದು ಕಮ್ಮೆನ ದ್ರವ್ಯೊಲೆನ್ಲಾ ಕಮ್ಮೆನದ ಎಣ್ಣೆನ್ಲಾ ತಯಾರ್ ಮಲ್ತ್‌ದ್ ಅಪ್ಪಣೆದಲೆಕ್ಕ ಸಬ್ಬತ್‌ಡ್ ಮನಿಪಂದೆ ಇತ್ತೆರ್.