Read Tulu ಲೂಕೆ 24 Bible Online

ಲೂಕೆ 24 - Tulu bible

ಲೂಕೆ 24

¹ಆ ಪೊಂಜೊವುಲು ವಾರದ ಸುರುತ್ತ ದಿನೊಟು ಪುಲ್ಯ ಆನಗ ತನ್ಕುಲು ತಯಾರ್ ಮಲ್ತ್‌ದಿತ್ತಿ ಕಮ್ಮೆನದ ಎಣ್ಣೆನ್ ದೆತ್ತೊಂದು ಸಮಾಧಿಗ್ ಬತ್ತೆರ್.

²ಸಮಾಧಿ ಮುಚ್ಚಿದಿತ್ತಿನ ಕಲ್ಲ್ ಪೊರೆಲ್‌ದಿತ್ತೆನೆನ್ ತೂದು ಉಲಯಿ ಪೋಯೆರ್.

⁴ಅಕುಲು ಗಲಿಬಿಲಿ ಆಯೆರ್. ಅಪಗ ಮಿಂಚುನ ಅಂಗಿ ಪಾಡೊಂದಿತ್ತಿ ಇರ್ವೆರ್ ಅಂಜೊವುಲು ಅಕಸ್ಮತಾದ್ ಅಕ್ಲೆನ ಬರಿಟ್ಟೆ ಉಂತೊಂಡೆರ್.

⁵ಆ ಪೊಂಜೊವುಲು ಪೋಡಿದ್ ತನ್ಕುಲೆ ಮೋನೆಲೆನ್ ನೆಲಕ್ ಬಗ್ಗಾಯೆರ್. ಆ ಅಂಜೊವುಲು ಅಕ್ಲೆಗ್, “ಬದುಕುನಾಯನ್ ಸೈತಿನಾಕುಲೆ ಸಮಾಧಿಡ್ ನಾಡುನು ದಾಯೆಗ್?”

⁶ಆಯೆ ಮುಲ್ಪ ಇಜ್ಜೆ, ಆಯೆ ಜೀವಾದ್ ಲಕ್ಕ್‌ದೆ. ಆಯೆ ಗಲಿಲಾಯೊಡು ಇತ್ತಿನಪಗ ನರಮಾನಿ ಮಗನ್ ಪಾಪಿಷ್ಟೆರಾದುಪ್ಪು ನರಮಾನಿಲೆ ಕೈಕ್ ಒಪ್ಪಿಯಾದ್ ಕ್ರುಸ್ಸುಗ್ ಪಾಡ್ದ್ ಮೂಜನೇ ದಿನೊಟು ಲಕ್ಕ್‌ದ್ ಬರ್ಪಿನವು ಅಗತ್ಯ ಅಂದ್‌ದ್ ನಿಕ್ಲೆಗ್ ಪನ್ತಿನೆನ್ ನೆನೆಪು ಮಲ್ತೊನ್ಲೆ ಅಂದ್‌ದ್ ಪಂಡೆರ್.

⁷

⁸ಪೊಂಜೊವುಲು ಆಯನ ಪಾತೆರೊಲೆನ್ ನೆನೆಪುಗು ದೆತ್ತೊಂದು

⁹ಸಮಾಧಿಡ್ದ್ ಪಿರ ಬತ್ತ್‌ದ್ ಪತ್ತೊಂಜಿ ಜನ ಅಪೊಸ್ತಲೆರೆಗ್ಲಾ ಒರಿದಿನಾಕುಲೆಗ್ಲಾ ತೆರಿಪಾಯೆರ್.

¹⁰ಆ ಪೊಂಜೊವುಲು ಏರ್ ಅಂದ್ಂಡ ಮಗ್ದಲದ ಮರಿಯ, ಯೋಹನ್ನ, ಯಾಕೋಬುನ ಅಪ್ಪೆ ಆಯಿ ಮರಿಯ ಮೊಕುಲೇ. ಮೊಕ್ಲೆನ ಒಟ್ಟುಗಿತ್ತಿ ಪೊಂಜೊವುಲುಲಾ ಅಪೊಸ್ತಲೆರೆಗ್ ಈ ಸಂಗತಿಲೆನ್ ಪಂಡೆರ್.

¹¹ಅಕುಲು ನಂಬಿಜೆರ್; ಅಕ್ಲೆಗ್ ತಮಾಸೆದ ಪಾತೆರದ ಲೆಕ್ಕ ತೋಜ್ಂಡ್. ಆಂಡ ಪೇತ್ರೆ ಲಕ್ಕ್‌ದ್ ಸಮಾಧಿಗ್ ಪಾರ್‌ಪೋದು ಬಗ್ಗ್‌ದ್ ತೂಯೆ. ಅಲ್ಪ ಯೇಸುನ ಶರೀರೊಗು ಸುತ್ತುದಿನ ನಾರ್‌ದ ಕುಂಟುನು ಮಾತ್ರ ತೂದು ಅಚ್ಚಿರ ಆದ್ ಪಿದಾಡ್ದ್ ಪೋಯೆ.

¹²

¹³ಅವ್ವೇ ದಿನೊಟು ಶಿಷ್ಯೆರೆಡ್ ಇರ್ವೆರ್ ಯೆರೂಸಲೇಮುಗು ಏಳ್ ಮೈಲ್ ದೂರೊಡಿತ್ತಿ ಎಮ್ಮಾಹು ಪನ್ಪಿ ಹಳ್ಳಿಗ್ ಪೋವೊಂದುಪ್ಪುನಗ

¹⁴ನಡತಿ ಪ್ರತಿ ಒಂಜಿ ಕಾರ್ಯೊಲೆ ಬಗೆಟ್ ಪಾತೆರೊಂದಿತ್ತೆರ್.

¹⁵ಅಕುಲು ಪಾತೆರೊಂದು ಚರ್ಚೆ ಮಲ್ತೊಂದು ಪೋನಗ ಯೇಸು ಕೈತಲ್‌ ಬತ್ತ್‌ದ್ ಅಕ್ಲೆಡೊಪ್ಪ ಪೋಯೆ.

¹⁶ಆಂಡ ಅಕ್ಲೆಗ್ ಆಯನ ಗುರ್ತ ಪತ್ತಿಯೆರೆ ಆಯಿಜಿ. ಕಣ್ಣ್ ಕಟ್ಟಿಲೆಕ್ಕ ಆಂಡ್.

¹⁷ಯೇಸು ಅಕ್ಲೆಡ ನಿಕುಲು ಮಾರ್ಗೊಡು ಪೋವೊಂದು ಚರ್ಚೆ ಮಲ್ತ್‌ದ್ ಪಾತೆರೊಂದುಪ್ಪು ಈ ಸಂಗತಿಲು ದಾದ ಅಂದ್‌ದ್ ಕೇನ್ನಗ ಅಕುಲು ಮೋನೆ ಬಾಡ್‌ದಿನಕುಲಾದ್ ಉಂತಿಯೆರ್.

¹⁸ಅಕ್ಲೆಡ್ ಕ್ಲೆಯೋಫೆ ಪನ್ಪಿನಾಯೆ ಆಯಗ್ ಯೆರೂಸಲೇಮುಡು ಬುಡಾರ ಮಲ್ಪುನಾಕುಲೆಡ್ ನಿಕ್ಕ್ ಒರಿಯಗ್ ಮಾತ್ರ ಗೊತ್ತಿಜ್ಜಾ? ಅಂದ್‌ದ್ ಕೇನ್ನಗ

¹⁹ಆಯೆ ಅಕ್ಲೆಡ, “ವಾ ಸಂಗತಿಲು?” ಅಂದ್‌ದ್ ಕೇಂಡೆ. ಐಕ್ ಅಕುಲು, “ನಜರೇತ್‌ದ ಯೇಸುನ ಸಂಗತಿಲು. ಆಯೆ ದೇವೆರೆ ಎದುರುಡು ಬೊಕ್ಕ ಜನೊಕುಲೆ ಎದುರುಡು ಕಾರ್ಯೊಡ್ಲಾ ಪಾತೆರೊಡ್ಲಾ ಬಲ ಇತ್ತಿ ಪ್ರವಾದಿ ಆದಿತ್ತೆ.

²⁰ಆಯನ್ ಪ್ರಧಾನಯಾಜಕೆರ್‌ಲಾ ನಮ ಅಧಿಕಾರಿಲುಲಾ ಮರಣದ ನ್ಯಾಯತೀರ್ಪುಗು ಒಪ್ಪಿಸಾದ್ ಕ್ರುಸ್ಸುಗ್ ಪಾಡಾಯೆರ್.

²¹ಇಸ್ರಾಯೇಲ್ ಜನೊಕುಲೆನ್ ಬುಡ್ಪಾಯೆರೆ ತಕ್ಕಂತಿನಾಯೆ ಆಯೆನೇ ಅಂದ್‌ದ್ ಎಂಕುಲು ನಿರೀಕ್ಷೆ ಮಲ್ತೊಂದಿತ್ತ. ಉಂದು ಮಾತ್ರ ಅತ್ತಂದೆ ಆ ಕಾರ್ಯೊಲು ನಡತ್‌ದ್ ಇನಿಕ್ ಮೂಜನೇ ದಿನ;

²²ಆಂಡ ಕೆಲವು ಪೊಂಜೊವುಲು ಬೊಲ್ಪು ಆನಗ ಸಮಾಧಿದ ಕೈತಲ್‌ ಪೋದು

²³ಆಯನ ಶರೀರೊನು ತೂವಂದೆ ತನ್ಕುಲೆಗ್ ದೂತೆರ್ ದರ್ಶನ ಕೊರ್ದು ಯೇಸು ಜೀವಾದ್ ಲಕ್ಕ್‌ದೆ ಅಂದ್‌ದ್ ಪಂಡಿನೆನ್ ಅಕುಲು ತೆರಿಪಾದ್ ಎಂಕ್ಲೆಗ್ ಮಲ್ಲ ಅಚ್ಚಿರೊನು ಉಂಡು ಮಲ್ತೆರ್.

²⁴ಎಂಕ್ಲೆನ ಒಟ್ಟುಗು ಇತ್ತಿನಾಕುಲೆಡ್ದ್ ಕೆಲೆವೆರ್ ಸಮಾಧಿಗ್ ಪೋದು ಆ ಪೊಂಜೊವುಲು ಪಂಡಿಲೆಕ್ಕನೇ ತೂಯೆರ್; ಆಯನ್ ಮಾತ್ರ ತೂಯಿಜೆರ್,” ಅಂದ್‌ದ್ ಪಂಡೆರ್.

²⁵ಯೇಸು ಅಕ್ಲೆಗ್ ಬುದ್ಧಿದಾಂತಿನಾಕುಲೇ, ಪ್ರವಾದಿಲು ಪಂಡಿನೆನ್ ಮಾತೆನ್ ನಂಬುನ ಮಂದ ಉಡಲ್‌ದಾಕುಲೇ,

²⁶ಕ್ರಿಸ್ತೆ ಇಂಚಿತ್ತಿ ಭಂಗೊಲೆನ್ ಅನುಭವ ಮಲ್ತ್‌ದ್ ತನ ಮಲ್ಲ ಮೈಮೆದ ಸ್ಥಾನೊಗು ಪರಲೋಕೊಗು ಸೇರುನವು ಅಗತ್ಯದವು ಆದಿತ್ತ್‌ಂಡತ್ತಾ?

²⁷ಬೊಕ್ಕ ಯೇಸು ತನ ಬಗೆಟ್ ಮೋಶೆ ಬೊಕ್ಕ ಮಾತ ಪ್ರವಾದಿಲೆ ಶಾಸ್ತ್ರೊಡು ಬರೆತಿಲೆಕ್ಕ ಅವೆನ್ ಮಾತ ಅಕ್ಲೆಗ್ ಬುಡ್ಪಾದ್ ಪಂಡೆ.

²⁸ಅಕುಲು ಪೋವೊಂದುಪ್ಪುನ ಹಳ್ಳಿದ ಕೈತಲ್‌ ಬನ್ನಗ ಆಯೆ ನನಲಾ ದುಂಬು ಪೋಪಿಲೆಕ್ಕ ತೋಜ್ಂಡ್.

²⁹ಆಂಡ ಅಕುಲು ಬೈಯ ಆಂಡ್ ಪೊರ್ತು ಕಂತೊಂದು ಬತ್ತ್ಂಡ್ ಎಂಕ್ಲೆನ ಒಟ್ಟುಗು ತಡೆಲ ಅಂದ್‌ದ್ ಆಯಗ್ ಒತ್ತಾಯ ಮಲ್ಪುನಗ ಆಯೆ ಅಕ್ಲೆನ ಒಟ್ಟುಗು ಉಂತಿಯೆರೆ ಊರುದುಲಯಿ ಪೋಯೆ.

³⁰ಆಯೆ ಅಕ್ಲೆನ ಒಟ್ಟುಗು ವಣಸ್‌ಗ್ ಕುಲ್ಲುದಿನಪಗ ರೊಟ್ಟಿನ್ ದೆತ್ತೊಂದು ದೇವೆರೆನ್ ಸುಗಿತ್‌ದ್ ತುಂಡು ಮಲ್ತ್‌ದ್,

³¹ಅಕ್ಲೆಗ್ ಕೊರ್ನಗ ಅಕ್ಲೆನ ಕಣ್ಣ್‌ಲು ಜತ್ತ್ಂಡ್, ಯೇಸುನ ಗುರ್ತ ಪತ್ತಿಯೆರ್; ಆ ಸಮಯೊಡು ಆಯೆ ಅಕ್ಲೆನ ಕಣ್ಣ್‌ಗ್ ತೋಜಂದೆ ಪೋಯೆ.

³²ಐಡ್ದ್ ಬೊಕ್ಕ ಅಕುಲು ಒರಿಯಗ್ ಒರಿ ಆಯೆ ಸಾದಿಡ್ ಎಂಕ್ಲೆನ ಒಟ್ಟುಗು ಪಾತೆರ್‌ನಗಲಾ ಶಾಸ್ತ್ರೊಲೆ ಅರ್ಥೊನು ನಂಕ್ ಬುಡ್ಪಾದ್ ಪನ್ನಗಲಾ ಎಂಕುಲೆ ಉಡಲ್ ತೂ ಪೊತ್ತಿಲೆಕ್ಕ ಆಂಡತ್ತಾ ಪಂಡೆರ್.

³³ಅವ್ವೇ ಗಳಿಗೆಡ್ ಅಕುಲು ಇರ್ವೆರ್‌ಲಾ ಯೆರೂಸಲೇಮುಗು ಪಿರ ಪೋಯೆರ್. ಅಲ್ಪ ಪತ್ತೊಂಜಿ ಜನ ಶಿಷ್ಯೆರ್‌ಲಾ,

³⁴ಅಕ್ಲೆನ ಒಟ್ಟುಗು ಇತ್ತಿನಾಕುಲುಲಾ ಸೇರೊಂದು, ಕರ್ತವೆ ಲಕ್ಕ್‌ದಿನಿ ನಿಜ, ಆಯೆ ಸೀಮೋನಗ್ ತೋಜಿದ್ ಬತ್ತೆ ಅಂದ್‌ದ್ ಪನೊಂದಿತ್ತೆರ್.

³⁵ಉಂದೆನ್ ತೂದು ಆ ರಡ್ಡ್ ಶಿಷ್ಯೆರ್ ಸಾದಿಡ್ ನಡತಿ ಸಂಗತಿನ್ಲಾ ರೊಟ್ಟಿ ತುಂಡು ಮಲ್ಪುನೆನ್ ತೂದು ಆಯನ ಗುರ್ತ ಪತ್ತಿಯ ಪಂಡ್ದ್‌ಲಾ ಒರಿದಿನಾಕುಲೆಗ್ ತೆರಿಪಾಯೆರ್.

³⁶ಆ ರಡ್ಡ್ ಶಿಷ್ಯೆರ್ ಈ ಸಂಗತಿಡ್ ಪಾತೆರೊಂದುಪ್ಪುನಗ ಯೇಸುವೇ ಅಕ್ಲೆನ ನಡುಟು ಉಂತುದು ನಿಕ್ಲೆಗ್ ಸಮಾಧಾನ ಆವಡ್ ಅಂದ್‌ದ್ ಅಕ್ಲೆಗ್ ಪಂಡೆ.

³⁷ಅಕುಲು ತೂಯಿನವು ಆತ್ಮ ಅಂದ್‌ದ್ ಪೋಡಿದ್ ನಡಿಗಿಯೆರ್.

³⁸ಆಯೆ ಅಕ್ಲೆಡ, “ದಾಯೆಗ್ ಗಲಿಬಿಲಿ ಆಪರ್? ನಿಕುಲು ಉಡಲ್‌ಡ್ ಅಂಚ ದಾಯೆಗ್ ಎನ್ನುವರ್? ಎನ ಕೈ ಕಾರ್‌ಲೆನ್ ತೂಲೆ, ಯಾನೇ ಅತ್ತಾ. ಎನನ್ ಮುಟ್ಟುದು ತೂಲೆ,

³⁹ನಿಕ್ಲೆಗ್ ತೋಜುನ ಪ್ರಕಾರ ಎಂಕ್ ಮಾಸಲಾ ಎಲುಲಾ ಉಂಡು; ಅವು ಆತ್ಮೊಗು ಇಜ್ಜಿ,” ಅಂದ್‌ದ್ ಪಂಡೆ.

⁴⁰ಉಂದೆನ್ ಪಂಡಿ ಬೊಕ್ಕ ಆಯೆ ತನ ಕೈ ಕಾರ್‌ಲೆನ್ ಅಕ್ಲೆಗ್ ತೋಜಾಯೆ.

⁴¹ಆಂಡ ಅಕುಲು ಸಂತೋಷದ ದಿಸೆಟ್ಟ್ ನನಲಾ ನಂಬಂದೆ ಅಚ್ಚಿರ ಪಡೆಯೊಂದುಪ್ಪುನಗ ಆಯೆ ಅಕ್ಲೆಡ, “ತಿನಿಯೆರೆ ದಾದಾಂಡಲಾ ಮುಲ್ಪ ಉಂಡಾ?” ಅಂದ್‌ದ್ ಕೇಂಡೆ.

⁴²ಅಕುಲು ಕೈತಿ ಮೀನ್‌ದ ಒಂಜಿ ತುಂಡು ಆಯಗ್ ಕೊರಿಯೆರ್.

⁴³ಆಯೆ ದೆತ್ತೊಂದು ಅಕ್ಲೆನ ಎದುರುಡೆ ತಿಂದೆ.

⁴⁴ಬೊಕ್ಕ ಆಯೆ ಅಕ್ಲೆಡ, “ಯಾನ್ ನಿಕ್ಲೆಡೊಪ್ಪ ಉಪ್ಪುನಗ ಉಂದೆನ್ ಮಾತ ನಿಕ್ಲೆಗ್ ತೆರಿಪಾದಿಜೆನಾ? ಎನ ಬಗೆಟ್ ಮೋಶೆನ ನ್ಯಾಯಕಟ್ಟ್‌ಡ್ಲಾ ಪ್ರವಾದಿಲೆ ಗ್ರಂಥೊಲೆಡ್ಲಾ ಕೀರ್ತನೆಲೆಡ್ಲಾ ಬರೆತಿ ಮಾತ ನಡಪುನವು ಅಗತ್ಯ ಅಂದ್‌ದ್ ನಿಕ್ಲೆಗ್ ಪನ್ತೆ ಅತ್ತಾ?” ಪಂಡೆ.

⁴⁵ಬೊಕ್ಕ ಅಕ್ಲೆನ ಉಡಲ್‌ನ್ ಜತ್ತ್‌ದ್ ಶಾಸ್ತ್ರ ವಚನೊಲೆನ್ ತೆರಿಯೊನುಲೆಕ್ಕ ಆಯೆ ಅಕ್ಲೆಗ್ ಬುಡ್ಪಾದ್ ಪಂಡೆ.

⁴⁶ಯೇಸು ಅಕ್ಲೆಡ, “ಇಂಚೆನೆ ಬರೆತ್ಂಡ್ ಕ್ರಿಸ್ತೆ ಭಂಗ ಬತ್ತ್‌ದ್ ಸೈತ್‌ದ್ ಮೂಜನೇ ದಿನೊಟು ಜೀವಾದ್ ಲಕ್ಕ್‌ದ್ ಬರುವೆ.

⁴⁷ಬೊಕ್ಕ ಪಾಪೊಲೆ ಪರಿಹಾರೊಗಾದ್ ಮಾತೆರ್ಲಾ ಪಶ್ಚಾತಾಪ ಪಡೆಯೊಡು ಪನ್ಪಿ ಪಾತೆರ ಯೆರೂಸಲೇಮುಡ್ದು ಸುರು ಆದ್ ಸಮಸ್ತ ಭೂಲೋಕೊಡು ಉಪ್ಪುನ ಮಾತ ಜನಾಂಗದ ಜನೊಕುಲೆಗ್ ಆಯನ ಪುದರ್‌ಡ್ ಸಾರಿಯೊಡು ಪಂಡ್ದ್‌ಲಾ ಬರೆತ್ಂಡ್.

⁴⁸ಉಂದೆತ್ತ ಸಂಗತಿಡ್ ನಿಕುಲೇ ಸಾಕ್ಷಿ ಆದುಪ್ಪುವರ್.

⁴⁹ಇಂದಾ, ಎನ ಅಮ್ಮೆ ವಾಗ್ದಾನ ಮಲ್ತಿನ ಪರಿಶುದ್ಧಾತ್ಮೊನು ನಿಕ್ಲೆಗ್ ಕಡಪುಡ್ದು ಕೊರ್ಪೆ. ದೇವೆರ್ ಮಿತ್ತ್‌ದ ಲೋಕೊಡ್ದು ಆತ್ಮದ ಬಲ ಕೊರ್ಪಿನೆಂಗೆ ನಿಕುಲು ಯೆರೂಸಲೇಮುಡೇ ಕಾತೊಂದುಪ್ಪುಲೆ,” ಅಂದ್‌ದ್ ಪಂಡೆ.

⁵⁰ಬೊಕ್ಕ ಆಯೆ ಅಕ್ಲೆನ್ ಬೇಥಾನ್ಯ ಮುಟ್ಟ ಲೆತ್ತೊಂದು ಪೋಯೆ. ಯೇಸು ತನ ಕೈ ದೆರ್ತ್ತ್‌ದ್ ಅಕ್ಲೆನ್ ಆಶೀರ್ವಾದ ಮಲ್ತೆ.

⁵¹ಆಶೀರ್ವಾದ ಮಲ್ತೊಂದುಪ್ಪುನಗನೇ ಆಯೆ ಅಕ್ಲೆನ್ ಬುಡ್ದು, ಪರಲೋಕೊಗು ಏರ್ದ್ ಪೋಯೆ.

⁵²ಅಕುಲು ಆಯಗ್ ಆರಾಧನೆ ಮಲ್ತ್‌ದ್ ಬಾರಿ ಸಂತೋಷೊಡು ಯೆರೂಸಲೇಮುಗು ಪಿರ ಪೋಯೆರ್.

⁵³ಅವುಲು ಏಪಲಾ ದೇವಾಲಯೊಗು ಪೋದು ದೇವೆರೆನ್ ಪುಗರೊಂದಿತ್ತೆರ್.