Read Tulu ಲೂಕೆ 4 Bible Online

ಲೂಕೆ 4 - Tulu bible

ಲೂಕೆ 4

¹ಯೇಸು ಪರಿಶುದ್ಧಾತ್ಮಡ್ ದಿಂಜಿದಿನಾಯೆ ಆದ್ ಯೊರ್ದಾನ್ ತುದೆಡ್ದ್ ಪಿರ ಬನ್ನಗ ಆತ್ಮ ಆಯನ್ ಕಾಡ್‌ಗ್ ಲೆತ್ತೊಂದು ಪೋಂಡು.

²ಅಲ್ಪ ಆಯಗ್ ನಲ್ಪ ದಿನ ಸೈತಾನಡ್ದ್ ಶೋಧನೆ ಆವೊಂದಿತ್ತ್ಂಡ್. ಆ ದಿನೊಕುಲೆಡ್ ಆಯೆ ದಾಲಾ ತಿನಂದೆ ಇತ್ತಿನೆಡ್ದ್ ಆಯಗ್ ಬಾರಿ ಬಡವಾಂಡ್.

³ಅಪಗ ಸೈತಾನೆ ಯೇಸುಗು, “ಈ ದೇವೆರೆ ಮಗೆ ಆದಿತ್ತಡ ಈ ಕಲ್ಲ್‌ನ್ ರೊಟ್ಟಿ ಆಪಿಲೆಕ್ಕ ಅಪ್ಪಣೆ ಕೊರ್ಲ,” ಪಂಡೆ

⁴ಐಕ್ ಯೇಸು ಆಯಗ್, “ನರಮಾನಿ ರೊಟ್ಟಿ ತಿಂದ್‌ಂಡ ಮಾತ್ರ ಬದುಕುಜೆ, ಅಂದ್‌ದ್ ಬರೆತ್ಂಡ್,” ಅಂದ್‌ದ್ ಉತ್ತರ ಕೊರಿಯೆ.

⁵ಐಡ್ದ್ ಬೊಕ್ಕ ಸೈತಾನೆ ಆಯನ್ ಮಲ್ಲ ಗುಡ್ಡೆಗ್ ಲೆತ್ತೊಂದು ಪೋದು ಒಂಜಿ ಕ್ಷಣತ ಉಲಯಿ ಲೋಕದ ಮಾತ ರಾಜ್ಯೊಲೆನ್ ಆಯಗ್ ತೋಜಾಯೆ.

⁶ಬೊಕ್ಕ ಸೈತಾನೆ ಆಯಗ್ ಪಂಡಿನಿ, “ನೆತ್ತ ಮಾತ ಅಧಿಕಾರೊನ್ಲಾ ಮೈಮೆನ್ಲಾ ನಿಕ್ಕ್ ಕೊರ್ಪೆ; ಅವು ಎಂಕ್ ಒಚ್ಚಿದ್ ಕೊರ್ತುಂಡು. ಉಂದೆನ್ ಎಂಕ್ ಮನಸ್ ಇತ್ತಿನಾಯಗ್ ಕೊರ್ಪೆ.

⁷ಈ ಎನ ಎದುರು ಅಡ್ಡಬೂರ್ದು ಆರಾಧನೆ ಮಲ್ತ್ಂಡ, ಉಂದು ಮಾತ ನಿನ್ನವು ಆಪುಂಡು,” ಪಂಡೆ.

⁸ಐಕ್ ಯೇಸು, “ನಿನ ದೇವೆರಾದುಪ್ಪು ಕರ್ತವಗ್ ಅಡ್ಡಬೂರ್ದು ಆಯನ್ ಒರಿಯನೇ ಆರಾಧನೆ ಮಲ್ಪೊಡಂದ್‌ದ್ ಬರೆತ್ಂಡ್,” ಅಂದ್‌ದ್ ಉತ್ತರ ಕೊರಿಯೆ.

⁹ಬೊಕ್ಕ ಸೈತಾನೆ ಯೇಸುನು ಯೆರೂಸಲೇಮುಗು ಲೆತ್ತೊಂದು ಪೋದು ದೇವಾಲಯದ ಗೋಪುರದ ಮಿತ್ತ್ ಉಂತಾದ್ ಆಯಗ್, “ಈ ದೇವೆರೆ ಮಗೆ ಆದಿತ್ತಡ ಮುಲ್ತುಡ್ದು ತಿರ್ತ್ ಲೈಪುಲ.

¹⁰ನಿನನ್ ಕಾಪೆರೆಗ್, ‘ದೇವೆರ್ ತನ ದೂತೆರೆಗ್ ಅಪ್ಪಣೆ ಕೊರುವೆ, ಬೊಕ್ಕ ನಿನ ಕಾರ್ ಕಲ್ಲ್‌ಗ್ ತಾಂಟಂದಿಲೆಕ್ಕ ಅಕುಲು ನಿನನ್ ಕೈಟ್ ದೆರ್ತ್ತ್ ಪತ್ತ್‌ವೆರ್ ಅಂದ್‌ದ್ ಬರೆತ್ಂಡ್,’” ಅಂದ್‌ದ್ ಪಂಡೆ.

¹¹

¹²ಐಕ್ ಯೇಸು, “ನಿನ ದೇವೆರಾದುಪ್ಪು ಕರ್ತವನ್ ಪರೀಕ್ಷೆ ಮಲ್ಪೆರೆ ಬಲ್ಲಿ ಪಂಡ್ದ್ ಬರೆತ್ಂಡ್,” ಅಂದ್‌ದ್ ಉತ್ತರ ಕೊರಿಯೆ.

¹³ಇಂಚ ತರತರೊಟು ಶೋಧನೆ ಮಲ್ತಿ ಬೊಕ್ಕ ಒಂತೆ ಸಮಯೊಗು ಸೈತಾನೆ ಆಯನ್ ಬುಡ್ದು ಪೋಯೆ.

¹⁴ಯೇಸು ಪರಿಶುದ್ಧಾತ್ಮದ ಬಲೊಡ್ದು ದಿಂಜಿದಿನಾಯೆ ಆದ್ ಗಲಿಲಾಯ ಸೀಮೆಗ್ ಪಿರ ಪೋಯೆ; ಆಯನ ಸುದ್ಧಿ ಕೈತಲಿತ್ತಿ ಮಾತ ಪ್ರಾಂತೊಲೆಡ್ ಪರಡ್ಂಡ್.

¹⁵ಆಯೆ ಅಲ್ಪದ ಸಭಾಮಂದಿರೊಲೆಡ್ ಬೋಧನೆ ಮಲ್ತೊಂದು ಬತ್ತೆ. ಮಾತೆರ್ಲಾ ಆಯನ್ ಪುಗರಿಯೆರ್.

¹⁶ಬೊಕ್ಕ ಆಯೆ ತಾನ್ ಪುಟ್ಟುದು ಬಲತಿ ನಜರೇತ್‌ಗ್ ಬತ್ತ್‌ದ್ ತನ ಕಟ್ಟ್‌ದ ಪ್ರಕಾರ ಸಬ್ಬತ್‌ದಿನೊಟು ಸಭಾಮಂದಿರೊಗು ಪೋದು ಓದೆರೆಗಾದ್ ಲಕ್ಕ್‌ದ್ ಉಂತಿಯೆ.

¹⁷ಅಪಗ ಪ್ರವಾದಿ ಯೆಶಾಯೆ ಗ್ರಂಥದ ಸುರುಳಿನ್ ಆಯನ ಕೈಕ್ ಕೊರ್ನಗ ಅವೆನ್ ಬುಡ್ಪಾದ್ ಬರೆದುಪ್ಪುನೆನ್ ತೂದು ಓದಿಯೆ; ಆ ಪಾತೆರ ದಾನೆಂದ್ಂಡ:

¹⁸“ಕರ್ತವ ಆತ್ಮ ಎನ ಮಿತ್ತ್ ಉಂಡು, ಆಯೆ ಎನನ್ ಬಡವೆರೆಗ್ ಸುವಾರ್ತೆನ್ ಸಾರಿಯೆರೆಗ್ ಅಭಿಷೇಕ ಮಲ್ತೆ, ಸೆರೆಮನೆಟ್ಟುಪ್ಪುನಾಕುಲೆಗ್ ಬುಡುಗಡೆ ಆಪಿನೆನ್ಲಾ ಕುರುಡೆರೆಗ್ ಕಣ್ಣ್ ತೋಜುನೆನ್ಲಾ ಮನಸ್ ಪೊಲಿದಿನಾಕುಲೆನ್ ಬುಡ್ಪಾದ್ ಕಡಪುಡಿಯೆರೆಗ್ಲಾ

¹⁹ಕರ್ತವೆ ನೇಮಕ ಮಲ್ತಿ ಶುಭವರ್ಸೊನು ಸಾರಿಯೆರೆಗ್ಲಾ ಆಯೆ ಎನನ್ ಕಡಪುಡುದೆ ಪನ್ಪಿನವೇ.”

²⁰ಓದಿ ಬೊಕ್ಕ ಆಯೆ ಆ ಸುರುಳಿನ್ ಸುತ್ತುದು ಸಭಾಮಂದಿರದ ಚಾಕ್ರಿದಾಯನ ಕೈಟ್ ಕೊರ್ದು ಕುಲ್ಲೊಂಡೆ. ಅಲ್ಪ ಇತ್ತಿ ಮಾತ ಜನೊಕುಲೆ ಕಣ್ಣ್‌ದ ದೃಷ್ಟಿ ಆಯನ ಮಿತ್ತೇ ಬೂರ್ದಿತ್ತ್‌ಂಡ್.

²¹ಅಪಗ ಯೇಸು, “ನಿಕುಲು ಎನ ಪಾತೆರೊನು ಕೇನೊಂದುಪ್ಪುನಗನೇ ಈ ಶಾಸ್ತ್ರದ ಪಾತೆರ ನಡತ್ಂಡ್,” ಅಂದ್‌ದ್ ಪನೊಂದುಪ್ಪುನಗ

²²ಮಾತೆರ್ಲಾ ಆಯನ್ ಪುಗರೊಂದು, ಆಯ ಬಾಯಿಡ್ದ್ ಪಿದಾಡು ದಯತ ಪಾತೆರೊಲೆಗ್ ಅಚ್ಚಿರ ಆದ್, “ಇಂಬೆ ಯೋಸೇಫು ಮಗೆ ಅತ್ತಾ?” ಅಂದ್‌ದ್ ಪಾತೆರೊಂಡೆರ್.

²³ಯೇಸು ಅಕ್ಲೆಗ್, “ನಿಕುಲಾಂಡಲಾ, ‘ವೈದ್ಯಾ ನಿನನ್ ಈಯೇ ಗುಣ ಮಲ್ತೊನು,’ ಪನ್ಪಿ ಗಾದೆನ್ಲಾ, ‘ಕಪೆರ್ನೌಮುಡು ಮಲ್ತಿ ಕಾರ್ಯೊಲೆನ್ ಎಂಕುಲು ಕೇಂಡ್ದ, ಅಂಚಿತ್ತಿನೆನ್ ಈ ನಿನ ಸ್ವಂತ ಜಾಗ್‌ಡ್ ಮಲ್ಪು,’ ಅಂದ್‌ದ್ ಪನುವರ್.

²⁴ನಿಕ್ಲೆಗ್ ನಿಜಾದ್ ಪನ್ಪೆ, ವಾ ಪ್ರವಾದಿಗ್ಲಾ ಆಯನ ಸ್ವಂತ ಊರುಡು ಮರ್ಯಾದಿ ತಿಕ್ಕುಜಿ.

²⁵ನಿಜಾದ್, ಎಲೀಯನ ಕಾಲೊಡು ಮೂಜಿ ವರ್ಸ ಆಜಿ ತಿಂಗೊಲು ಬಾನ ಮುಚ್ಚಿದ್ ಬರ್ಸ ಬರಂದೆ ಇಡೀ ದೇಶೊಡು ಮಲ್ಲ ಬರಗಾಲ ಉಂಡಾನಗ, ಇಸ್ರಾಯೇಲ್ ಜನೊಕುಲೆಡ್ ಏತೋ ಜನ ಕಂಡನಿ ಸೈತಿನಾಕುಲು ಇತ್ತಿನಿ ನಿಜ;

²⁶ಆಂಡ ಅಕ್ಲೆಡ್ ಏರೆ ಕೈತಲ್‌ಲಾ ದೇವೆರ್ ಎಲೀಯನ್ ಕಡಪುಡಂದೆ ಸೀದೋನು ದೇಶೊಗು ಸೇರ್ದಿನ ಸರೆಪ್ತ ಊರುಡಿತ್ತಿ ಒಂಜಿ ಕಂಡನಿ ಸೈತಿನಲೆನ ಕೈತಲ್‌ ಕಡಪುಡಿಯೆ.

²⁷ಬೊಕ್ಕ ಎಲೀಷ ಪನ್ಪಿ ಪ್ರವಾದಿ ಕಾಲೊಡು ಇಸ್ರಾಯೇಲ್ ಜನೊಕುಲೆಡ್ ಏತೋ ಜನ ಕೊಷ್ಟದಾಕುಲು ಇತ್ತೆರ್ಡಲಾ ಅಕ್ಲೆಡ್ ಒರಿಯಾಂಡಲಾ ಶುದ್ಧ ಆವಂದೆ ಸುರಿಯ ದೇಶದ ನಾಮಾನೆ ಮಾತ್ರ ಗುಣ ಆಯೆ,” ಅಂದ್‌ದ್ ಪಂಡೆ.

²⁸ಸಭಾಮಂದಿರೊಡು ಇತ್ತಿನಾಕುಲು ಮಾತೆರ್ ಈ ಪಾತೆರೊಲೆನ್ ಕೇಂಡ್ದ್ ಮಸ್ತ್ ಕೋಪೊಡು

²⁹ಲಕ್ಕ್‌ದ್ ಆಯನ್ ಊರುದ ಪಿದಯಿ ಗಿಡ್ತ್‌ದ್ ತನ್ಕುಲೆ ಊರುಡಿತ್ತಿ ಗುಡ್ಡೆದ ಕೊಡಿಕ್ಕ್ ನಡಪಾವೊಂದು ಪೋದು ಅಲ್ತ್‌ಡ್ದ್ ತಿರ್ತ್ ನೂಕುದು ಪಾಡೊಡು ಅಂದ್‌ದ್ ಇತ್ತೆರ್.

³⁰ಆಂಡ ಆಯೆ ಅಕ್ಲೆನ ಮದ್ಯೊಡ್ದು ತಪ್ಪಾವೊಂದು ಪೋಯೆ.

³¹ಐಡ್ದ್ ಬೊಕ್ಕ ಆಯೆ ಘಟ್ಟ ಜತ್ತ್‌ದ್ ಗಲಿಲಾಯೊಗು ಸೇರ್ದಿನ ಕಪೆರ್ನೌಮು ಪನ್ಪಿ ಊರುಗು ಬತ್ತೆ.

³²ಅಲ್ಪ ಸಬ್ಬತ್‌ದಿನೊಟು ಅಕ್ಲೆಗ್ ಬೋಧನೆ ಮಲ್ತೊಂದುಪ್ಪುನಗ, ಆಯನ ಪಾತೆರೊಲು ಅಧಿಕಾರದವು ಆದಿತ್ತಿನೆಡ್ದ್ ಅಕುಲು ಆಯನ ಬೋಧನೆನ್ ಕೇಂಡ್ದ್ ಅಚ್ಚಿರ ಆಯೆರ್.

³³ಆ ಸಭಾಮಂದಿರೊಡು ದೆವ್ವ ಪತ್ತ್‌ದಿನ ಒರಿ ನರಮಾನಿ ಇತ್ತೆ.

³⁴ಆ ದೆವ್ವ ಓ ನಜರೇತ್‌ದ ಯೇಸೋ, “ಎಂಕ್ಲೆನ ಸುದ್ಧಿ ನಿಕ್ಕ್ ದಾಯೆ? ಎಂಕ್ಲೆನ್ ನಾಶ ಮಲ್ಪೆರೆ ಬೈದನಾ? ಈ ಏರ್ ಅಂದ್‌ದ್ ಎಂಕ್ ಗೊತ್ತುಂಡು, ಈ ದೇವೆರೆ ಪರಿಶುದ್ಧದಾಯೆನೇ.” ಅಂದ್‌ದ್ ಅರಬಾಯಿ ದೀದ್ ಪಂಡ್ಂಡ್.

³⁵ಯೇಸು ಅವೆನ್ ದಟ್ಟಿದ್, “ಮನಿಪಂದೆ ಕುಲ್ಲು, ಉಂಬ್ಯನ್ ಬುಡ್ದು ಪೋಲ!” ಅಂದ್‌ದ್ ಪನ್ನಗ ಆ ದೆವ್ವ ಆಯನ್ ಮಗ್‌ರ್‌ಪಾದ್ ಆಯಗ್ ದಾಲಾ ಉಪದ್ರ ಮಲ್ಪಂದೆ ಬುಡ್ದು ಪೋಂಡು.

³⁶ಐಕ್ ಮಾತೆರ್ಲಾ ಅಚ್ಚಿರ ಆದ್, “ಉಂದು ಎಂಚಿತ್ತಿ ಪಾತೆರ ಆದುಪ್ಪು? ಉಂಬೆ ಅಧಿಕಾರೊಡುಲಾ ಬಲೊಡ್ದುಲಾ ದೆವ್ವೊಲೆಗ್ ಅಪ್ಪಣೆ ಕೊರ್ಪೆತ್ತಾ? ಐಕುಲು ಬುಡ್ದು ಪೋಪ,” ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್.

³⁷ಬೊಕ್ಕ ಆಯನ ಸುದ್ಧಿ ಸುತ್ತೊಡಿತ್ತಿ ಸೀಮೆದ ಮಾತ ಊರುಲೆಡ್ ಪರಡ್ಂಡ್.

³⁸ಬೊಕ್ಕ ಯೇಸು ಸಭಾಮಂದಿರೊಡ್ದು ಲಕ್ಕ್‌ದ್ ಸೀಮೋನನ ಇಲ್ಲಗ್ ಬತ್ತೆ. ಅಲ್ಪ ಸೀಮೋನನ ಮಾಮಿ ಜ್ವರೊಟು ಕಷ್ಟ ಬರ್ಪಿನೆಡ್ದ್ ಆಲೆನ್ ಗುಣ ಮಲ್ಪೊಡಂದ್‌ದ್ ಯೇಸುಡ ನಟ್ಟೊಂಡೆರ್.

³⁹ಆಯೆ ಆಲೆ ಕೈತಲ್‌ ಉಂತುದು ಆ ಜ್ವರೊನು ದಟ್ಟಿನಗ ಅವು ಆಲೆನ್ ಬುಡ್ದು ಪೋಂಡು. ಅಪಗನೆ ಆಲ್ ಲಕ್ಕ್‌ದ್ ಅಕ್ಲೆಗ್ ಉಪಚಾರ ಮಲ್ತಲ್.

⁴⁰ಪೊರ್ತು ಕಂತ್‌ನಗ ಆಯಿನಿ ದಾನೆಂದ್ಂಡ ತರತರತ ಸೀಕ್‌ದಾಕುಲೆನ್ ಆಯ ಕೈತಲ್‌ಗ್ ಲೆತ್ತೊಂದು ಬತ್ತೆರ್. ಆಯೆ ಪ್ರತಿ ಒರಿಯನ ಮಿತ್ತ್ ಕೈ ದೀದ್ ಅಕ್ಲೆನ್ ಮಾತೆರೆನ್ಲಾ ಗುಣ ಮಲ್ತೆ.

⁴¹ದೆವ್ವೊಲು, “ಈ ದೇವೆರೆ ಮಗೆ!” ಅಂದ್‌ದ್ ಅಬ್ಬರಿತ್‌ದ್ ಮಸ್ತ್ ಜನೊಕುಲೆನ್ ಬುಡ್ದು ಪೋಂಡು. ತಾನ್ ರಕ್ಷಕೆ ಆದುಪ್ಪು ಕ್ರಿಸ್ತೆ ಅಂದ್‌ದ್ ಐಕ್ಲೆಗ್ ತೆರಿದಿತ್ತಿನೆಡ್ದ್ ಆಯೆ ಐಕ್ಲೆನ್ ದಟ್ಟಿದ್ ಪಾತೆರಿಯೆರೆ ಬುಡ್ಜೆ.

⁴²ಬೊಲ್ಪು ಆನಗ ಆಯೆ ಪಿದಾಡ್ದ್ ಜನಮಾನಿದಾಂತಿನ ಜಾಗ್‌ಗ್ ಪೋಯೆ; ಜನೊಕುಲು ಗುಂಪುಗುಂಪಾದ್ ಆಯನ್ ನಾಡೊಂದು ಆಯೆ ಇತ್ತಿನಡೆಗ್ ಬತ್ತೆರ್. ಈ ಎಂಕ್ಲೆನ್ ಬುಡ್ದು ಪೋವಡ ಅಂದ್‌ದ್ ಆಯನ್ ತಡೆತೆರ್.

⁴³ಆಂಡ ಆಯೆ ಅಕ್ಲೆಗ್, “ಯಾನ್ ದೇವೆರೆ ರಾಜ್ಯದ ಸುವಾರ್ತೆ ಬೇತೆ ಬೇತೆ ಊರುಲೆಗ್ ಸಾರಿಯೊಡು. ಉಂದೆಕಾದೇ ಕಡಪುಡ್ದಿನಾಯೆ ಆದುಲ್ಲೆ,” ಅಂದ್‌ದ್ ಪಂಡೆ.

⁴⁴ಬೊಕ್ಕ ಆಯೆ ಯೂದಾಯ ದೇಶದ ಸಭಾಮಂದಿರೊಲೆಡ್ ಸುವಾರ್ತೆನ್ ಸಾರಿಯೊಂದಿತ್ತೆ.