Read Tulu ಲೂಕೆ 7 Bible Online

ಲೂಕೆ 7 - Tulu bible

ಲೂಕೆ 7

¹ಜನೊಕುಲು ಕೇನುಲೆಕ್ಕ ತನ ಪಾತೆರೊಲೆನ್ ಪಂಡ್ದ್ ಮುಗಿತಿ ಬೊಕ್ಕ ಯೇಸು ಕಪೆರ್ನೌಮುಗು ಬತ್ತೆ.

²ಅಲ್ಪ ಸೈನಿಕೆರೆನ ಶತಾಧಿಪತಿನ ಪ್ರೀತಿದ ಚಾಕ್ರಿದಾಯೆ ಒರಿ ಸೀಕ್‌ಡ್ದ್ ಸೈಪಿಲೆಕ್ಕ ಇತ್ತೆ.

³ಶತಾಧಿಪತಿ ಯೇಸುನ ಸುದ್ಧಿನ್ ಕೇಂಡ್ದ್, ಯೆಹೂದ್ಯೆರೆ ಹಿರಿಯೆರೆನ್ ಆಯ ಕೈತಲ್‌ ಕಡಪುಡ್ದು, “ತನ ಚಾಕ್ರಿದಾಯನ್ ಗುಣ ಮಲ್ಪೆರೆ ಬರೊಡು,” ಅಂದ್‌ದ್ ಆಯಡ ನಟ್ಟೊಂಡೆ.

⁴ಅಕುಲು ಯೇಸು ಕೈತಲ್‌ ಬತ್ತ್‌ದ್ ಎಂಕ್ಲೆನ ಶತಾಧಿಪತಿ ನಿನಡ್ದ್ ಇಂಚಿತ್ತಿ ಉಪಕಾರೊನು ಪಡೆವೆರೆ ತಕ್ಕದಾಯೆ ಆದುಲ್ಲೆ ಪಂಡ್ದ್ ನಟ್ಟೊಂಡೆರ್.

⁵ಆಯೆ ಎಂಕ್ಲೆ ಇಸ್ರಾಯೇಲ ಜನೊಕುಲೆನ್ ಪ್ರೀತಿ ಮಲ್ಪುನಾಯೆ. ಆಯೆನೇ ಎಂಕ್ಲೆನ ಸಭಾಮಂದಿರೊನು ಎಂಕ್ಲೆಗಾದ್ ಕಟ್ಟಾದಿನಾಯೆ ಅಂದ್‌ದ್ ದಿಂಜ ನಟ್ಟೊನ್ನಗ

⁶ಯೇಸು ಅಕ್ಲೆಡೊಪ್ಪ ಪೋಯೆ. ಆಯೆ ನನಲಾ ಇಲ್ಲಗ್ ಮುಟ್ಟಿಯೆರೆ ಒಂತೆ ದೂರ ಉಪ್ಪುನಗನೇ ಶತಾಧಿಪತಿ ಆಯ ಸ್ನೇಹಿತೆರೆನ್‌ ಆಯನ ಕೈತಲ್‌ ಕಡಪುಡ್ದು, “ಕರ್ತವಾ, ಭಂಗ ದೆತ್ತೊನೊಡ್ಚಿ. ಈ ಎನ ಮಾಡ್‌ದ ಉಲಯಿ ಬರ್ಪಿನಾತ್ ಯೋಗ್ಯತೆ ಎಂಕಿಜ್ಜಿ.

⁷ಈ ಕಾರಣೊಡ್ದು ಯಾನ್ ನಿನ ಕೈತಲ್‌ ಬರಿಯೆರೆ ಪಿರ ನರ್ಗಿಯೆ. ಆಂಡ ಈ ಒಂಜಿ ಪಾತೆರ ಪನ್ಲ, ಎನ ಬೇಲೆದಾಯಗ್ ಗುಣ ಆವು.

⁸ಯಾನ್ಲಾ ಬೊಕ್ಕೊರಿಯನ ಅಧಿಕಾರದ ಉಲಯಿ ಉಪ್ಪುನಾಯೆ. ಎನ ಕೈ ತಿರ್ತ್‌ಲಾ ಸಿಪಾಯಿಲು ಉಲ್ಲೆರ್; ಯಾನ್ ಅಕ್ಲೆಡ್ ಒರಿಯಗ್ ‘ಪೋ,’ ಪಂಡ್ಂಡ ಪೋಪೆ. ಬೊಕ್ಕೊರಿಯನ್ ‘ಬಲ,’ ಪಂಡ ಬರ್ಪೆ. ಎನ ಬೇಲೆದಾಯಗ್ ಇಂಚಿತ್ತಿನೆನ್ ಮಲ್ಪು,” ಪಂಡ್ಂಡ ಮಲ್ಪುವೆ.

⁹ಯೇಸು ಉಂದೆನ್ ಕೇಂಡ್ದ್ ಆಯನ ಬಗೆಟ್ ಅಚ್ಚಿರ ಆದ್ ತನ ಪಿರವುಡು ಬರೊಂದಿತ್ತಿನಾಕುಲೆಗ್ ತೂದು, “ಯಾನ್ ಇಂಚಿತ್ತಿ ಮಲ್ಲ ನಂಬಿಕೆನ್ ಇಸ್ರಾಯೇಲ್ ಜನೊಕುಲೆಡ್ಲಾ ತೂತುಜಿ ಅಂದ್‌ದ್ ಯಾನ್ ನಿಕ್ಲೆಗ್ ಪನ್ಪೆ,” ಪಂಡೆ.

¹⁰ಐಡ್ದ್ ಬೊಕ್ಕ ಆ ಶತಾಧಿಪತಿ ಕಡೆಡ್ದ್ ಬೈದಿನಾಕುಲು ಪಿರ ಇಲ್ಲಗ್ ಪೋದು ತೂನಗ ಚಾಕ್ರಿದಾಯೆ ಸೌಖ್ಯ ಆದಿತ್ತಿನೆನ್ ತೂಯೆರ್.

¹¹ಒಂತೆ ಸಮಯ ಆಯಿ ಬೊಕ್ಕ ಆಯೆ ನಾಯೀನ್ ಪನ್ಪಿ ಊರುಗು ಪೋಯೆ. ಆಯಡೊಪ್ಪ ಶಿಷ್ಯೆರ್‌ನಾಕುಲುಲಾ ಬೊಕ್ಕ ಮಸ್ತ್ ಜನೊಕುಲುಲಾ ಪೋವೊಂದಿತ್ತೆರ್.

¹²ಆಯೆ ಊರುದ ಬಾಕಿಲ್‌ದ ಕೈತಲ್‌ ಬನ್ನಗ ಒರಿ ಸೈತಿನಾಯನ್ ಪಿದಯಿ ಕನವೊಂದಿತ್ತೆರ್. ಉಂಬೆ ತನ ಅಪ್ಪೆಗ್ ಒರಿಯೇ ಮಗೆ; ಆಲ್ ಕಂಡನಿ ಸೈತಿನಾಲಾದಿತ್ತಲ್. ಆಲೆನ ಒಟ್ಟುಗು ಊರುದ ಮಸ್ತ್ ಜನ ಇತ್ತೆರ್.

¹³ಕರ್ತವೆ ಆಲೆನ್ ತೂದು ಕನಿಕರೊಡು, “ಬುಲ್ಪೊಡ್ಚಿ,” ಪಂಡ್ದ್

¹⁴ಚಟ್ಟದ ಕೈತಲ್‌ ಪೋದು ಅವೆನ್ ಮುಟ್ಟುನಗ ತುಂಬೊಂದಿತ್ತಿನಾಕುಲು ಉಂತಿಯೆರ್. ಯೇಸು ಪಂಡೆ, “ಜವನ್ಯಾ, ಯಾನ್ ನಿಕ್ಕ್ ಪನ್ಪೆ ಲಕ್ಕ್‌ಲ.”

¹⁵ಪಂಡಿನಪಗನೇ ಸೈತ್‌ದಿತ್ತಿನಾಯೆ ಲಕ್ಕ್‌ದ್ ಕುಲ್ಲೊಂದು ಪಾತೆರಿಯೆರೆ ಸುರು ಮಲ್ತೆ. ಬೊಕ್ಕ ಯೇಸು ಆಯನ ಅಪ್ಪೆಗ್ ಇಂದಾ, ನಿನ ಮಗೆ ಅಂದ್‌ದ್ ಆಯನ್ ಒಪ್ಪಿಸಾಯೆ.

¹⁶ಉಂದೆನ್ ತೂದು ಮಾತೆರ್ಲಾ ಪೋಡಿಗೆಡ್, “ಮಲ್ಲ ಪ್ರವಾದಿ ನಮಡ್ದ್ ಲಕ್ಕ್‌ದೆ. ದೇವೆರ್ ತನ ಜನೊಕುಲೆನ್ ರಕ್ಷಣೆ ಮಲ್ಪೆರೆ ಬೈದೆ,” ಅಂದ್‌ದ್ ದೇವೆರೆನ್ ಪುಗರಿಯೆರ್.

¹⁷ಈ ಸುದ್ಧಿ ಯೂದಾಯೊಡ್ಲಾ ಸುತ್ತಮುತ್ತದ ಮಾತ ಪ್ರಾಂತೊಲೆಡ್ಲಾ ಪರಡ್ಂಡ್.

¹⁸ಯೋಹಾನನ ಶಿಷ್ಯೆರ್ ನಡತಿ ಮಾತ ಸಂಗತಿಲೆನ್ ಆಯಗ್ ತೆರಿಪಾನಗ

¹⁹ಆಯೆ ತನ ಶಿಷ್ಯೆರೆಡ್ದ್ ಇರ್ವೆರೆನ್ ಲೆತ್ತ್‌ದ್, “ಬರ್ಪಿನಾಯೆ ಈಯೆನಾ, ಎಂಕುಲು ಬೊಕ್ಕೊರಿಯನ ಸಾದಿನ್ ತೂವೊಡಾ?” ಅಂದ್‌ದ್ ಕರ್ತವಡ ಕೇನಿಯೆರೆ ಅಕ್ಲೆನ್ ಕಡಪುಡಿಯೆ.

²⁰ಅಕುಲು ಆಯನ ಕೈತಲ್‌ ಬತ್ತ್‌ದ್, “ಬರ್ಪಿನಾಯೆ ಈಯೆನಾ? ಎಂಕುಲು ಬೊಕ್ಕೊರಿಯನ ಸಾದಿನ್ ತೂವೊಡಾ, ಅಂದ್‌ದ್ ಕೇನಿಯೆರೆಗಾದ್ ಸ್ನಾನಿಕೆ ಯೋಹಾನೆ ಎಂಕ್ಲೆನ್ ನಿನ ಕೈತಲ್‌ ಕಡಪುಡುದೆ,” ಪಂಡೆರ್.

²¹ಆ ಗಳಿಗೆಡ್ ಆಯೆ ಮಸ್ತ್ ಜನೊಕುಲೆನ್ ಸೀಕ್‌ಲೆಡ್ದ್, ದೆವ್ವದ ಉಪದ್ರೊಲೆಡ್ದ್, ದುರಾತ್ಮೊಲೆಡ್ದ್ ಬುಡ್ಪಾದ್ ಗುಣ ಮಲ್ತೊಂದಿತ್ತೆ; ಬೊಕ್ಕ ಮಸ್ತ್ ಜನ ಕುರುಡೆರೆಗ್ ಕಣ್ಣ್‌ನ್ ಒದಗಾದ್ ಕೊರಿಯೆ.

²²ಇಂಚ ಉಪ್ಪುನಗ ಆಯೆ ಅಕ್ಲೆಗ್, “ನಿಕುಲು ಪೋದು ತೂದು ಕೇಂಡಿನೆನ್ ಮಾತೆನ್ ಯೋಹಾನಗ್ ತೆರಿಪಾಲೆ. ಕುರುಡೆರೆಗ್ ಕಣ್ಣ್ ತೋಜುಂಡು, ಕುಂಟೆರೆಗ್ ಕಾರ್ ಬರ್ಪುಂಡು, ಕೊಷ್ಟದಾಕುಲು ಶುದ್ಧ ಆಪೆರ್, ಕೆಪ್ಪೆರೆಗ್ ಕೆಬಿ ಕೇನುಂಡು. ಸೈತಿನಾಕುಲು ಲಕ್ಕುವೆರ್, ಬಡವೆರೆಗ್ ಸುವಾರ್ತೆ ಸಾರುಂಡು.

²³ಎನ ಸಂಗತಿಡ್ ಸಂಶಯ ಮಲ್ಪಂದಿನಾಯೆನೇ ಭಾಗ್ಯವಂತೆ,” ಪಂಡ್ದ್ ಪಂಡೆ.

²⁴ಯೋಹಾನನ ದೂತೆರ್ ಪಿರ ಪೋಯಿನೆಡ್ದ್ ಬೊಕ್ಕ ಆಯೆ ಜನೊಕುಲೆ ಗುಂಪುಲೆಗ್ ಯೋಹಾನನ ಸಂಗತಿನ್ ಪನಿಯೆರೆ ಸುರು ಮಲ್ತೆ, “ನಿಕುಲು ಎಂಚಿನ ತೂವೊಡು ಅಂದ್‌ದ್ ಕಾಡ್‌ಗ್ ಪೋದಿತ್ತರ್? ಗಾಳಿಗ್ ಪಂದುನ ದಂಟ್‌ನಾ?

²⁵ಅವು ಅತ್ತಂದೆ ಎಂಚಿನ ತೂವೊಡು ಅಂದ್‌ದ್ ಪೋದಿತ್ತರ್? ನಯತ್ತ ಕುಂಟುನು ಪಾಡ್ದಿನ ನರಮಾನಿನಾ? ಐಶ್ವರ್ಯದ ವೈಭವೊಡು ಕುಂಟು ಪಾಡುನಾಕುಲು ಸಂಪೊತ್ತುಡು ಬದುಕುನಾಕುಲು ಅರಸುನ ಅರಮನೆಡ್ ಉಪ್ಪುವೆರತ್ತಾ?

²⁶ಅಪಗಾಂಡ ಒವೆನ್ ತೂಯೆರೆ ಪೋಯೆರ್? ಪ್ರವಾದಿನಾ? ಅಂದ್ ಪ್ರವಾದಿಡ್ದ್‌ಲಾ ಹೆಚ್ಚ್‌ದಾಯನ್ ತೂಯರ್ ಅಂದ್‌ದ್ ನಿಕ್ಲೆಗ್ ಪನ್ಪೆ.

²⁷‘ಇಂದಾ, ಎನ ದೂತನ್ ನಿನ ದುಂಬು ಕಡಪುಡ್ವೆ. ಈ ಪೋಪಿನ ಸಾದಿನ್ ಆಯೆ ಸಮ ಮಲ್ಪುವೆ,’ ಅಂದ್‌ದ್ ಏರೆನ ಬಗೆಟ್ ಗ್ರಂಥೊಡು ಬರೆತ್ಂಡಾ ಆ ನರಮಾನಿ ಉಂಬೆನೇ.

²⁸ಪೊಂಜೊವುಲೆಡ್ದ್ ಪುಟ್ಟಿನಾಕುಲೆಡ್ ಯೋಹಾನಡ್ದ್ ಮಲ್ಲಾಯೆ ಒರಿಲಾ ಇಜ್ಜೆ; ಆಂಡಲಾ ದೇವೆರೆ ರಾಜ್ಯೊಡು ಬಜೀ ಎಲ್ಯಾಯೆ ಯೋಹಾನಡ್ದ್‌ಲಾ ಮಲ್ಲಾಯೆ ಆದುಲ್ಲೆ,” ಅಂದ್‌ದ್ ನಿಕ್ಲೆಗ್ ಪನ್ಪೆ.

²⁹ಉಂದತ್ತಂದೆ ಜನೊಕುಲುಲಾ ಸುಂಕದಾಕುಲುಲಾ ಯೋಹಾನನ ಬೋಧನೆನ್ ಕೇಂಡ್ದ್ ಆಯಡ್ದ್ ದೀಕ್ಷಾಸ್ನಾನ ಮಲ್ತೊಂಡಿನೆಡ್ದ್ ದೇವೆರ್ ನೀತಿವಂತೆ ಅಂದ್‌ದ್ ಒಪ್ಪಿಯೊಂಡೆರ್.

³⁰ಆಂಡ ಪರಿಸಾಯೆರ್‌ಲಾ ನ್ಯಾಯಕಟ್ಟ್‌ದ ಬೋಧಕೆರ್‌ಲಾ ಆಯಡ ದೀಕ್ಷಾಸ್ನಾನ ಮಲ್ತೊನಂದೆ ಪೋಯಿನೆಡ್ದ್ ತನ್ಕುಲೆ ಬಗೆಟ್ ದೇವೆರೆ ಆಲೋಚನೆನ್ ತಿರಸ್ಕಾರ ಮಲ್ತೆರ್.

³¹ಬೊಕ್ಕ ಕರ್ತವೆ ಪಂಡಿನಿ, “ಈ ಕಾಲದ ಜನೊಕುಲೆನ್ ಏರೆಗ್ ಸಮ ಮಲ್ಪೊಲಿ? ಅಕುಲು ಏರೆಗ್ ಸಮ ಆಪೆರ್?

³²‘ಎಂಕುಲು ನಿಕ್ಲೆಗಾದ್ ಕೊಳಲ್ ಉರ್ತ ನಿಕುಲು ನಲ್ತ್‌ಜರ್, ನಿಕ್ಲೆಗ್ ಮುರೆಡಿಯ, ನಿಕುಲು ಬುಲ್ತುಜರ್,’ ಅಂದ್‌ದ್ ಪೇಂಟೆಡ್ ಕುಲ್ಲುದು ಒರಿ ಒರಿಯಗ್ ಬೊಬ್ಬೆ ಪಾಡುನ ಜೋಕುಲೆ ಲೆಕ್ಕ ತೋಜುವರ್.

³³ಎಂಚಂದ್ಂಡ ಸ್ನಾನಿಕೆ ಯೋಹಾನೆ ಬೈದೆ; ಆಯೆ ರೊಟ್ಟಿ ತಿನಂದಿನಾಯೆ, ಅಮಲ್‌ದ ದ್ರಾಕ್ಷಾರಸ ಪರಂದಿನಾಯೆ. ನಿಕುಲು ಆಯಗ್, ‘ದೆವ್ವ ಪತ್ತ್‌ದ್ಂಡ್,’ ಪನ್ಪರ್.

³⁴ನರಮಾನಿ ಮಗೆ ಬೈದೆ, ಆಯೆ ನುಪ್ಪು ನೀರ್‌ನ್ ದೆತ್ತೊನುನಾಯೆ ಆದುಲ್ಲೆ; ಅಪಗ ನಿಕುಲು, ‘ಇಂದಾ, ಇಂಬೆ ಬಂಜೆಲೆ, ಪರ್ಪೆಲೆ, ಸುಂಕದಾಕುಲೆ ಬೊಕ್ಕ ಪಾಪಿಷ್ಟೆರೆ ಸ್ನೇಹಿತೆ,’ ಅಂದ್‌ದ್ ಪನ್ಪರ್.

³⁵ಆಂಡ ಬುದ್ಧಿ ಪನ್ಪಿನವು ಅವು ನೀತಿದವು ನಿಜವಾಯಿನ ಗೇನೊಡು ದಿಂಜಿನಾಕುಲೆಡ್ದೇ ತೆರಿದ್ ಬರು,” ಅಂದ್‌ದ್ ಪಂಡೆ.

³⁶ಪರಿಸಾಯೆರೆಡ್ ಒರಿ ಯೇಸುನು ತನಡೊಪ್ಪ ವಣಸ್ ಮಲ್ಪೊಡಂದ್‌ದ್ ಕೇನೊನ್ನಗ

³⁷ಆಯೆ ಆ ಪರಿಸಾಯನ ಇಲ್ಲಗ್ ಪೋದು ವಣಸ್‌ಗ್ ಕುಲ್ಲಿಯೆ. ಅಪಗ ಆ ಊರುಡಿತ್ತಿ ಒಂಜಿ ಪಾಪಿ ಪೊಂಜೊವು, ಯೇಸು ಆ ಇಲ್ಲಡ್ ವಣಸ್‌ಗ್ ಕುಲ್ಲುದೆ ಅಂದ್‌ದ್ ತೆರಿಯೊಂದು ಒಂಜಿ ಮಸ್ತ್ ಬಿಲೆ ಇತ್ತಿ ಕಮ್ಮೆನದ ಎಣ್ಣೆದ ಕುಪ್ಪಿನ್ ಪತ್ತೊಂದು;

³⁸ಪಿರವುಡು ಆಯ ಕಾರಕೈತಲ್ ಉಂತುದು; ಬುಲ್ತೊಂದು ತನ ಕಣ್ಣೀರ್‌ಡ್ ಆಯ ಕಾರುಲೆನ್ ಚಂಡಿ ಮಲ್ತ್‌ದ್ ತನ ತರೆ ಕುಜಲ್‌ಡ್ದ್ ಒಚ್ಚಿದ್ ಐಕ್ ಮುತ್ತು ಕೊರ್ದು, ಆ ಎಣ್ಣೆನ್ ಪೂಜಿಯಲ್.

³⁹ಆಂಡ ಆಯನ್ ವಣಸ್‌ಗ್ ಲೈದಿನ ಪರಿಸಾಯೆ ಉಂದೆನ್ ತೂದು, “ಮೋಲು ಪಾಪಿ; ಉಂಬೆ ಪ್ರವಾದಿ ಆದಿತ್ತೆಡ ತನನ್ ಮುಟ್ಟಿನ ಈ ಪೊಂಜೊವು ಎಂಚಿತ್ತಿನಾಲ್, ಅಂದ್‌ದ್ ತೆರಿಯೊಂದುವೆ,” ಅಂದ್‌ದ್ ಎನ್ನಿಯೆ.

⁴⁰ಅಪಗ ಯೇಸು ಆಯಡ, “ಸೀಮೋನಾ, ಯಾನ್ ನಿಕ್ಕ್ ಪನೊಡಾಯಿನ ಒಂಜಿ ಪಾತೆರ ಉಂಡು.” ಐಕ್ ಆಯೆ, “ಅಂದ್ ಬೋಧಕಾ, ಪನ್ಲ,” ಪಂಡೆ.

⁴¹ಅಪಗ ಯೇಸು, “ಒಂಜಿ ಸಾವುಕಾರಗ್ ಇರ್ವೆರ್ ಸಾಲ ಕೊರೊಡಿತ್ತ್‌ಂಡ್. ಒರಿ ಐನೂದು ಬೊಳ್ಳಿದ ಪಾವೊಲಿ, ಬೊಕ್ಕೊರಿ ಐವ ಬೊಳ್ಳಿದ ಪಾವೊಲಿ ಕೊರೊಡಿತ್ತ್‌ಂಡ್.

⁴²ದೆತ್ತೊಂದಿನ ಕಾಸ್‌ನ್ ಪಿರ ಕೊರಿಯೆರೆ ಅಕ್ಲೆಗ್ ಗತಿ ಇಜ್ಜಂದಿನೆಡ್ದಾದ್ ಆ ಇರ್ವೆರೆ ಸಾಲೊನ್ಲಾ ಬುಡ್ದು ಬುಡಿಯೆ. ಅಪಗಾಂಡ ಅಕ್ಲೆಡ್ ಏರ್ ಆ ಸಾಹುಕಾರನ್ ಹೆಚ್ಚಾದ್ ಪ್ರೀತಿ ಮಲ್ಪುವೆರ್?” ಅಂದ್‌ದ್ ಕೇಂಡೆ.

⁴³ಸೀಮೋನೆ ಉತ್ತರ ಕೊರ್ದು, “ಏರೆಗ್ ಹೆಚ್ಚ್ ಕಾಸ್ ಬುಡಿಯೆನಾ ಆಯೆನೇ.” ಪಂಡ್ದ್ ಎನ್ನುವೆ ಪಂಡೆ. ಯೇಸು ಆಯಗ್, “ಈ ಸರಿಯಾದ್ ತೀರ್ಪು ಮಲ್ತ.”

⁴⁴ಆ ಪೊಂಜೊವುನ ಕಡೆಕ್ಕ್ ತೂದು ಸೀಮೋನಗ್, “ಈ ಪೊಂಜೊವುನು ತೂಯನಾ? ಯಾನ್ ನಿನ ಇಲ್ಲಗ್ ಬತ್ತಿನಪಗ ಈ ಎನ ಕಾರ್‌ಗ್ ನೀರ್ ಕೊರ್ತುಜ. ಆಂಡ ಮೋಲು ಎನ ಕಾರ್‌ಲೆನ್ ಕಣ್ಣೀರ್‌ಡ್ ದೆಕ್ಕ್‌ದ್ ತನ ತರೆಕುಜಲ್‌ಡ್ ಒರೆಸಿಯಲ್.

⁴⁵ಈ ಎಂಕ್ ಮುತ್ತು ಕೊರ್ಜ. ಮೋಲು ಯಾನ್ ಉಲಯಿ ಬತ್ತಿನೆಡ್ದಿಂಜಿ ಎನ ಕಾರ್‌ಗ್ ಮುತ್ತು ಕೊರ್ಪಿನೆನ್ ಬುಡ್ತುಜಲ್.

⁴⁶ಈ ಎನ ತರೆಕ್ ಎಣ್ಣೆ ಪೂಜಿಜ; ಮೋಲು ಕಮ್ಮೆನದ ಎಣ್ಣೆನ್ ಕಾರ್‌ಗ್ ಪೂಜಿಯಲ್.

⁴⁷ಇಂಚ ಉಪ್ಪುನಗ ಯಾನ್ ಪನ್ಪಿನಿ ದಾನೆಂದ್ಂಡ ಮೋಲು ಮಲ್ತಿ ಪಾಪ ಮಸ್ತ್ ಆಂಡಲಾ ಅವು ಮಾಪು ಆತ್ಂಡ್. ನೆಕ್ಕ್ ಕಾರಣ ಆಲ್ ತೋಜಾಯಿನ ಪ್ರೀತಿಯೇ. ಆಂಡ ಏರೆಗ್ ಒಂತೆ ಮಾಪು ಆತ್ಂಡ ಆಯೆ ತೋಜಾಯಿನ ಪ್ರೀತಿಲಾ ಒಂತೆನೇ ಆದುಂಡು.”

⁴⁸ಬೊಕ್ಕ ಆಯೆ ಆಲೆಗ್, “ನಿನ ಪಾಪೊಲು ಮಾಪು ಆತ್ಂಡ್,” ಅಂದ್‌ದ್ ಪಂಡೆ.

⁴⁹ಆಯನ ಒಟ್ಟುಗು ವಣಸ್‌ಗ್ ಕುಲ್ಲೊಂದಿತ್ತಿನಾಕುಲು, “ಪಾಪೊಲೆನ್ ಮಾಪು ಮಲ್ಪುನಾಯೆ ಉಂಬೆ ಏರ್?” ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್.

⁵⁰ಆಂಡ ಆಯೆ ಆ ಪೊಂಜೊವುಗು, “ನಿನ ನಂಬಿಕೆನೇ ನಿನನ್ ರಕ್ಷಣೆ ಮಲ್ತ್ಂಡ್, ಸಮಾಧಾನೊಡು ಪೋಲ,” ಅಂದ್‌ದ್ ಪಂಡೆ.