Read Tulu ಲೂಕೆ 9 Bible Online

ಲೂಕೆ 9 - Tulu bible

ಲೂಕೆ 9

¹ಯೇಸು ಪದ್ರಾಡ್ ಶಿಷ್ಯೆರೆನ್ ಒಟ್ಟುಗು ಲೆತ್ತ್‌ದ್ ಅಕ್ಲೆಗ್ ಮಾತ ದೆವ್ವೊಲೆನ್ ಬುಡ್ಪಾವುನಲಾ ಸೀಕ್‌ಲೆನ್ ಗುಣ ಮಲ್ಪುನ ಬಲಲಾ ಅಧಿಕಾರಲಾ ಕೊರಿಯೆ.

²ದೇವೆರೆ ರಾಜ್ಯದ ಸಂಗತಿನ್ ಸಾರಿಯೆರೆಗ್ಲಾ, ಸೀಕ್‌ಡಿತ್ತಿನಾಕುಲೆನ್ ಗುಣ ಮಲ್ಪೆರೆಗ್ಲಾ ಅಕ್ಲೆನ್ ಕಡಪುಡ್ದು ಕೊರಿಯೆ.

³ಕಡಪುಡುನಪಗ ಯೇಸು ಅಕ್ಲೆಗ್ ಪಂಡಿನಿ ದಾನೆಂದ್ಂಡ, “ಸಾದಿಗ್ ದಾಲಾ ದೆತ್ತೊಂದು ಪೋವಡೆ, ಕೋಲು, ಜೋಳಿಗೆ, ರೊಟ್ಟಿ, ಕಾಸ್, ರಡ್ಡ್ ಅಂಗಿ ಬೊಡ್ಚಿ.

⁴ಉಂದತ್ತಂದೆ ನಿಕುಲು ವಾ ಇಲ್ಲಡ್ ಉಂತಿಯರಾ ಅವುಲೆ ಉಂತುಲೆ, ಆ ಊರು ಬುಡ ಮುಟ್ಟ, ಅಲ್ತ್‌ಡ್ದೇ ಪಿದಾಡ್‌ಲೆ.

⁵ಬೊಕ್ಕ ವಾ ಊರುದಾಕುಲಾವಡ್ ನಿಕ್ಲೆನ್ ಸೇರಾವಂದೆ ಪೋಂಡ ಆ ಊರುನು ಬುಡ್ದು ನಿಕುಲು ಪೋನಗ ಅಕ್ಲೆಗ್ ಸಾಕ್ಷಿಗಾದ್ ನಿಕ್ಲೆ ಕಾರ್‌ದ ಧೂಳುನು ಕುಡ್ತ್‌ದ್ ಪೋಲೆ,”

⁶ಅಪಗ ಅಕುಲು ಪಿದಾಡ್ದ್ ಪೋದು ಸುವಾರ್ತೆ ಸಾರಿಯೊಂದು ಸೀಕ್‌ದಾಕುಲೆನ್ ಗುಣ ಮಲ್ತೊಂದು ಊರುಡ್ದು ಊರು ಸಂಚಾರ ಮಲ್ತೆರ್.

⁷ಇಂಚ ಉಪ್ಪುನಗ ಗಲಿಲಾಯದ ಉಪರಾಜೆ ಆಯಿ ಹೆರೋದೆ ನಡತಿ ಸಂಗತಿಲೆನ್ ಕೇಂಡ್ದ್ ಗಡಿಬಿಡಿ ಆಯೆ. ದಾಯೆಗ್ ಪಂಡ ಕೆಲೆವೆರ್ ಯೋಹಾನೆ ಸೈತಿನಾಕುಲೆಡ್ದ್ ಲಕ್ಕ್‌ದ್ ಬೈದೆ, ಕೆಲೆವೆರ್ ಎಲೀಯೆ ತೋಜಿದ್ ಬೈದೆ, ಕೆಲೆವೆರ್ ಪರ ಕಾಲದ ಪ್ರವಾದಿಲೆಡ್ ಏರಾ ಒರಿ ಲಕ್ಕ್‌ದೆ ಅಂದ್‌ದ್ ಪನೊಂದಿತ್ತೆರ್.

⁸

⁹ಆಂಡ ಹೆರೋದೆ, “ಯೋಹಾನನ ತರೆ ಕಡ್ಪಾದಿನಿ ಯಾನೇ, ಇಂಬೆ ಏರ್ ಆದುಪ್ಪೆ? ಇಂಬ್ಯನ ಸಂಗತಿಡ್ ಬಾರಿ ಕೇನೋಂದುಲ್ಲೆತ್ತಾ?” ಅಂಚಾದ್ ಆಯನ್ ತೂವೊಡು ಅಂದ್‌ದ್ ಪ್ರಯತ್ನ ಮಲ್ತೆ.

¹⁰ಅಪೊಸ್ತಲೆರ್ ಪಿರ ಬತ್ತ್‌ದ್ ತನ್ಕುಲು ಮಲ್ತಿನೆನ್ ಯೇಸುಗು ಬುಡ್ಪಾದ್ ಒಂಜೊಂಜಾದ್ ಪನ್ನಗ ಆಯೆ ಅಕ್ಲೆನ್ ಬೆತ್ಸಾಯಿದ ಊರುಗು ಪ್ರತ್ಯೇಕಾದ್ ಲೆತ್ತೊಂದು ಪೋಯೆ.

¹¹ಆಂಡ ಜನೊಕುಲೆ ಗುಂಪು ಉಂದೆನ್ ತೆರಿದ್ ಆಯನ ಬೆರಿಯೆ ಬರಿಯೆರೆ ಸುರು ಮಲ್ತೆರ್, ಆಯೆ ಅಕ್ಲೆನ್ ಪ್ರೀತಿಡ್ ಎದುಕೊಂದು ದೇವೆರೆ ರಾಜ್ಯದ ವಿಚಾರೊಡು ಅಕ್ಲೆಡ ಪಾತೆರ ಪಂಡ್ದ್ ಸ್ವಸ್ಥ ಆವೊಡಾಯಿನಾಕುಲೆಗ್ ಗುಣ ಮಲ್ತೆ.

¹²ಪೊರ್ತು ಕಂತೊಂದು ಬತ್ತ್ಂಡ್. ಆ ಪದ್ರಾಡ್ ಮಂದಿ ಶಿಷ್ಯೆರ್ ಆಯನ ಕೈತಲ್‌ ಬತ್ತ್‌ದ್ ಜನೊಕುಲೆ ಗುಂಪುಗು ಅಪ್ಪಣೆ ಕೊರ್ಲ, “ಅಕುಲು ಸುತ್ತಮುತ್ತ ಉಪ್ಪು ಹಳ್ಳಿಲೆಗ್ ಪೋದು, ಅವುಲು ಇತ್ತ್‌ದ್ ವಣಸ್‌ಗ್ ಬೋಡಾಯಿನೆನ್ ದೆತ್ತೊನೆರೆ ಕಡಪುಡುಲ. ನಮ ಮುಲ್ಪ ಕಾಡ್ ಜಾಗ್‌ಡ್ ಉಲ್ಲತ್ತಾ,” ಅಂದ್‌ದ್ ಆಯಗ್ ಪನ್ನಗ

¹³ಆಯೆ, “ನಿಕುಲೇ ಅಕ್ಲೆಗ್ ವಣಸ್ ಕೊರ್ಲೆ ಪಂಡೆ.” ಐಕ್ ಅಕುಲು ಎಂಕ್ಲೆಡ, “ಐನ್ ರೊಟ್ಟಿ ರಡ್ಡ್ ಮೀನ್ ಬುಡ್ದು ಹೆಚ್ಚಿಗೆ ದಾಲಾ ಇಜ್ಜಿ. ಎಂಕುಲು ಪೋದು ಈತ್ ಮಾತ ಜನೊಕುಲೆಗ್ ವಣಸ್ ಬಿಲೆಕ್ ದೆತ್ತೊನೊಂದು ಬರೊಡಾ?” ಅಂದ್‌ದ್ ಪಂಡೆರ್.

¹⁴ಅಂಜೊವುಲೆ ಹೆಚ್ಚಿಕಡಿಮೆ ಐನ್ ಸಾರ ಜನ ಇತ್ತೆರ್. ಅಪಗ ಆಯೆ ತನ ಶಿಷ್ಯೆರೆಗ್, “ಮೊಕ್ಲೆನ್ ಒಂಜೊಂಜಿ ಪಂತೆಡ್ ಹೆಚ್ಚಿಕಡಿಮೆ ಐವ್ವ ಐವ್ವದಲೆಕ್ಕ ಕುಲ್ಲಾಲೆ,” ಅಂದ್‌ದ್ ಪಂಡೆ.

¹⁵ಅಕುಲು ಮಾತೆರೆನ್ ಕುಲ್ಲಾಯೆರ್.

¹⁶ಯೇಸು ಆ ಐನ್ ರೊಟ್ಟಿನ್ಲಾ ರಡ್ಡ್ ಮೀನ್‌ನ್ಲಾ ದೆತ್ತೊಂದು ಬಾನದಂಚಿ ತೂದು ದೇವೆರೆನ್ ಸುಗಿತ್‌ದ್ ಪೊಲ್ತುದು, ಶಿಷ್ಯೆರೆ ಕೈಕ್ ಕೊರ್ದು ಗುಂಪುಗು ಪಟ್ಟ್‌ಲೆ ಪಂಡೆ.

¹⁷ಅಕುಲು ಮಾತೆರ್ಲಾ ಉಂಡುದು ತೃಪ್ತಿ ಆಯೆರ್. ಕಡೆಕ್ಕ್ ಒರಿದಿನೆನ್ ಒಟ್ಟು ಮಲ್ಪುನಗ ಪದ್ರಾಡ್ ಪುಡಯಿ ದಿಂಜಿಂಡ್.

¹⁸ಒಂಜಾನೊಂಜಿ ದಿನ ಯೇಸು ಒರಿಯೇ ಪ್ರಾರ್ಥನೆ ಮಲ್ತೊಂದುಪ್ಪುನಗ ಆಯನ ಶಿಷ್ಯೆರ್ ಆಯಡೊಪ್ಪ ಇತ್ತೆರ್. ಆಯೆ ಅಕ್ಲೆಡ, “ಎನನ್ ಸಾಮಾನ್ಯ ಜನೊಕುಲು ಏರ್ ಅಂದ್‌ದ್ ಪನ್ಪೆರ್?” ಅಂದ್‌ದ್ ಕೇಂಡಿನೆಕ್ಕ್,

¹⁹ಅಕುಲು, “ನಿನನ್ ಸ್ನಾನಿಕೆ ಯೋಹಾನೆ ಪನ್ಪೆರ್, ಕೆಲೆವೆರ್ ಎಲೀಯೆ ಪನ್ಪೆರ್, ನನ ಕೆಲೆವೆರ್ ಆದಿದ ಪ್ರವಾದಿಲೆಡ್ ಏರಾ ಒರಿ ಸೈತಿನಾಕುಲೆಡ್ದ್ ಲಕ್ಕ್‌ದೆ ಪನ್ಪೆರ್,” ಅಂದ್‌ದ್ ಪಂಡೆರ್.

²⁰ಆಯೆ ಅಕ್ಲೆಡ, “ಆಂಡ ನಿಕುಲು ಎನನ್ ಏರಂದ್‌ದ್ ಪನ್ಪರ್? ಅಂದ್‌ದ್ ಕೇನ್ನಗ ಪೇತ್ರೆ ಈ ದೇವೆರೆಡ್ದ್ ಬರೊಡಾಯಿನ ಕ್ರಿಸ್ತೆ,” ಅಂದ್‌ದ್ ಉತ್ತರ ಕೊರಿಯೆ.

²¹ಅಪಗ ಆಯೆ ಉಂದೆನ್ ಏರೆಗ್ಲಾ ಪನಡೆ, ಅಂದ್‌ದ್ ಕಂಡಿತಾದ್ ಅಪ್ಪಣೆ ಕೊರಿಯೆ.

²²“ನರಮಾನಿ ಮಗೆ ಮಸ್ತ್ ಕಷ್ಟ ಅನುಭವ ಮಲ್ತ್‌ದ್ ಹಿರಿಯೆರೆಡ್ದ್‌ಲಾ ಪ್ರಧಾನಯಾಜಕೆರೆಡ್ದ್‌ಲಾ ಶಾಸ್ತ್ರಿಲೆಡ್ದ್‌ಲಾ ತಿರಸ್ಕಾರ ಆದ್ ಕೆರ್ದ್, ಮೂಜನೇ ದಿನೊಟು ಜೀವಾದ್ ಲಕ್ಕ್‌ದ್ ಬರೊಡಾಪುಂಡು,” ಅಂದ್‌ದ್ ಪಂಡೆ.

²³ಐಡ್ದ್ ಬೊಕ್ಕ ಆಯೆ ಮಾತೆರೆಗ್ಲಾ ಪಂಡಿನಿ ದಾನೆಂದ್ಂಡ, “ಏರೆಗಾಂಡಲಾ ಎನ ಬೆರಿಯೆ ಬರಿಯೆರೆ ಮನಸಿತ್ತ್‌ಂಡ ಆಯೆ ತನನ್ ತಾನ್ ತಿರಸ್ಕಾರ ಮಲ್ತ್‌ದ್ ದಿನಾಲ ತನ ಕ್ರುಸ್ಸುನು ತುಂಬೊಂದು ಎನ ಬೆರಿಯೆ ಬರಡ್.

²⁴ತನ ಪ್ರಾಣೊನು ಒರಿಪಾವೊಡು ಅಂದ್‌ದ್ ಉಪ್ಪುನಾಯೆ ಅವೆನ್ ಕಳೆವೊನ್ವೆ; ಆಂಡ ಎಂಕಾದ್ ತನ ಪ್ರಾಣೊನು ಕಳೆವೊಂಡಿನಾಯೆ ಅವೆನ್ ಒರಿಪಾವೊನ್ವೆ.

²⁵ಒರಿ ನರಮಾನಿ ಲೋಕೊನು ಸಂಪಾದನೆ ಮಲ್ತೊಂಡೆಡಲಾ ತನ ಪ್ರಾಣೊನು ಕಳೆವೊಂದು ಇಜ್ಜಿಡ ಹಾಳ್ ಮಲ್ತೊಂದು ಉಲ್ಲೆಡ ಆಯಗ್ ದಾದ ಪ್ರಯೋಜನ ಉಂಡು?

²⁶ಏರಾಂಡಲಾ ಎನನ್ ಬೊಕ್ಕ ಎನ ಪಾತೆರೊಗು ನಾಚಿಗೆ ಮಲ್ತೊನುವೆನಾ, ಆಯಗ್ ನರಮಾನಿ ಮಗೆ ತನ್ನಲಾ ತನ ಅಮ್ಮೆರೆಗ್ಲಾ ಪರಿಶುದ್ಧ ದೂತೆರೆಗ್ಲಾ ಉಪ್ಪುನ ಮೈಮೆಡೊಪ್ಪ ಬನ್ನಗ ನಾಚಿಗೆ ಮಲ್ಪೆ.

²⁷ನಿಕ್ಲೆಗ್ ನಿಜಾದ್ ಪನ್ಪೆ ಮುಲ್ಪ ಉಂತುದಿನಾಕುಲೆಡ್ದ್ ಕೆಲೆವೆರ್ ದೇವೆರೆ ರಾಜ್ಯೊನು ತೂವ ಮುಟ್ಟ, ಸೈಪುಜರ್,” ಅಂದ್‌ದ್ ಪಂಡೆ.

²⁸ಯೇಸು ಈ ಪಾತೆರೊಲೆನ್ ಪಂಡ್ದ್ ಸುಮಾರ್ ಎಣ್ಮ ದಿನೊಡ್ದು ಬೊಕ್ಕ ಪೇತ್ರನ್, ಯೋಹಾನನ್, ಯಾಕೋಬುನು ಮೊಕ್ಲೆನ್ ಲೆತ್ತೊಂದು ಪ್ರಾರ್ಥನೆ ಮಲ್ಪೆರೆ ಎತ್ತರದ ಗುಡ್ಡೆಗ್ ಪೋಯೆ.

²⁹ಆಯೆ ಪ್ರಾರ್ಥನೆ ಮಲ್ತೊಂದುಪ್ಪುನಗ ಆಯನ ಮೋನೆದ ರೂಪ ಬೇತೆ ಆಂಡ್. ಆಯನ ಕುಂಟು ಬೊಲ್ದು ಆದ್ ಮಿಂಚೊಂದು ಬತ್ತ್ಂಡ್.

³⁰ಉಂದತ್ತಂದೆ ಇರ್ವೆರ್ ಆಯಡೊಪ್ಪ ಪಾತೆರೊಂದಿತ್ತೆರ್. ಮೊಕುಲು ಏರ್ ಪಂಡ್ಂಡ ಮೋಶೆಲಾ ಎಲೀಯೆಲಾ.

³¹ಮೊಕುಲು ಪರಲೋಕದ ಮೈಮೆಡ್ ತೋಜಿದ್ ಯೆರೂಸಲೇಮುಡು ಆಯಡ ಮರಣದ ಸಂಗತಿಲೆನ್ ಪಾತೆರೊಂದಿತ್ತೆರ್.

³²ಈತ್‌ನೆಟ್ಟ ಪೇತ್ರೆಲಾ ಆಯಡೊಪ್ಪ ಇತ್ತಿನಾಕುಲುಲಾ ನಿದ್ರೆದ ಅಮಲ್‌ಡಿತ್ತೆರ್. ಆಂಡ ಎಚ್ಚರಿಕೆ ಆಯಿ ಬೊಕ್ಕ ಮೊಕುಲು ಯೇಸುನ ಮೈಮೆನ್ಲಾ ಆಯಡೊಪ್ಪ ಉಂತುದಿತ್ತಿ ಆ ಇರ್ವೆರ್ ನರಮಾನಿಲೆನ್ಲಾ ತೂಯೆರ್.

³³ಮೊಕುಲು ಯೇಸುನು ಬುಡ್ದು ಪೋವೊಂದುಪ್ಪುನಗ ಪೇತ್ರೆ ಯೇಸುಗು, “ಗುರೂ ನಮ ಮೂಲೇ ಉಪ್ಪುನವು ಎಡ್ಡೆ, ಮೂಜಿ ಗುಡಾರ ಕಟ್ಟ್‌ಗ, ನಿಕ್ಕೊಂಜಿ, ಮೋಶೆಗೊಂಜಿ, ಎಲೀಯಗೊಂಜಿ,” ಅಂದ್‌ದ್ ಪಂಡೆ. ಆಂಡ ತಾನ್ ಪಂಡಿನವು ದಾನೆ ಅಂದ್‌ದ್ ತನ್ಕೇ ಗೊತ್ತಾಯಿಜಿ.

³⁴ಆಯೆ ಉಂದೆನ್ ಪನೊಂದುಪ್ಪುನಗ ಅಕ್ಲೆನ ಮಿತ್ತ್ ಮುಗಲ್ ನಿರೆಲಾಂಡ್. ಅಕುಲು ಮುಗಲ್‌ದುಲಯಿ ಸೇರ್‌ನಗ ಪೋಡಿಯೆರ್.

³⁵ಆ ಮುಗಲ್‌ದ ಉಲಯಿಡ್ದ್, “ಇಂಬೆ ಎನ ಪ್ರೀತಿದ ಮಗೆ, ಯಾನ್ ಅಜತ್‌ದ್ ದೆತ್ತೊಂಡಿನಾಯೆ. ಇಂಬ್ಯನ ಪಾತೆರೊನು ಕೇನ್ಲೆ,” ಅಂದ್‌ದ್ ಒಂಜಿ ಸ್ವರ ಆಂಡ್.

³⁶ಆ ಸ್ವರ ಕೇಂಡಿ ಬೊಕ್ಕ ಯೇಸುನು ಮಾತ್ರ ತೂಯೆರ್. ತನ್ಕುಲು ತೂಯಿನ ಈ ಸಂಗತಿನ್ ಆ ಸಮಯೊಡು ಏರೆಗ್ಲಾ ತೆರಿಪಾವಂದೆ ಮನಿಪಂದೆ ಇತ್ತೆರ್.

³⁷ಮನದಾನಿ ಅಕುಲು ಗುಡ್ಡೆಡ್ದ್ ಜತ್ತ್‌ದ್ ಬನ್ನಗ ಜನೊಕುಲೆ ಗುಂಪು ಯೇಸುನು ಎದುಕೊನಿಯೆರ್.

³⁸ಗುಂಪುಡ್ದು ಒರಿ, “ಬೋಧಕಾ, ಎನ ಮಗನ ಮಿತ್ತ್ ದೃಷ್ಟಿ ದೀವೊಡು ಅಂದ್‌ದ್ ನಿನಡ ನಟ್ಟೊನ್ವೆ. ಎಂಕ್ ಉಂಬೆ ಒರಿಯೇ ಮಗೆ.

³⁹ಉಂಬ್ಯನ್ ದೆವ್ವ ಪತ್ತುಂಡು, ಪತ್ತಿನಪಗ ಬೊಬ್ಬೆ ಪಾಡ್ವೆ, ಬಾಯಿಡ್ದ್ ನುರೆ ಬನ್ನೆಟ್ಟ ಉಂಬ್ಯನ್ ಪುರೆಲ್ಪಾವುಂಡು; ಬೊಕ್ಕ ಬಾರಿ ಭಂಗ ಕೊರ್ದು ಪೊಡಿ ಪೊಡಿ ಮಲ್ಪಂದೆ ಬುಡ್ದು ಪೋಪುಜಿ.

⁴⁰ಅವೆನ್ ಬುಡ್ಪಾಯೆರೆ ನಿನ ಶಿಷ್ಯೆರೆಡ ನಟ್ಟೊಂಡೆ. ಆಂಡ ಅಕ್ಲೆಡ್ದ್ ಆವಂದೆ ಪೋಂಡು,” ಪಂಡೆ.

⁴¹ಐಕ್ ಯೇಸು, “ಓ! ನಂಬಿಕೆದಾಂತಿ ಮೂರ್ಖ ಸಂತಾನೊಲೇ, ನನ ಏತ್ ದಿನ ಯಾನ್ ನಿಕ್ಲೆಡೊಪ್ಪ ಇತ್ತ್‌ದ್ ನಿಕ್ಲೆನ್ ಸಹಿಸೊನೊಡು? ನಿನ ಮಗನ್ ಇಡೆ ಲೆತ್ತೊಂದು ಬಲ,” ಅಂದ್‌ದ್ ಪಂಡೆ.

⁴²ಆ ಆಣ್ ಬರೊಂದುಪ್ಪುನಗ ಆ ದೆವ್ವ ಆಯನ್ ನೆಲಕ್ ಬೂರ್ಪಾದ್ ಒದ್ದಾಟ ಮಲ್ಪಾಂಡ್. ಆಂಡ ಯೇಸು ಆ ದೆವ್ವೊಗು ದಟ್ಟಿದ್ ಆ ಆಣನ್ ಗುಣ ಮಲ್ತ್‌ದ್ ಆಯನ ಅಮ್ಮೆ ಕೈಟ್ ಕೊರಿಯೆ.

⁴³ಅವೆನ್ ತೂದು ಮಾತೆರ್ ದೇವೆರೆ ಮಲ್ಲಾದಿಗೆದ ಶಕ್ತಿನ್ ಪುಗರಿಯೆರ್. ಯೇಸು ಮಲ್ತಿನ ಮಾತ ಕಾರ್ನಿಕೊಲೆಗ್ ಮಾತೆರ್ ತೂದು ಅಚ್ಚಿರ ಆವೊಂದುಪ್ಪುನಗ ಆಯೆ ತನ ಶಿಷ್ಯೆರೆಗ್, “ಈ ಪಾತೆರೊಲೆನ್ ನಿಕ್ಲೆ ಉಡಲ್‌ಡ್ ದೀವೊನ್ಲೆ ಅಂದ್‌ದ್ ಪಂಡೆ. ದಾಯೆ ಪಂಡ ನರಮಾನಿ ಮಗನ್ ಜನೊಕುಲೆ ಕೈಕ್ ಒಚ್ಚಿದ್ ಕೊರ್ಪೆರ್,” ಅಂದ್‌ದ್ ಪಂಡೆ.

⁴⁴

⁴⁵ಅಕುಲು ಈ ಪಾತೆರೊನು ತೆರಿಜೆರ್. ಅವು ಅಕ್ಲೆಗ್ ಮದೆಯಾಯಿನೆಡ್ದ್ ಐತ ಅರ್ಥೊನು ತೆರಿಯಂದೆ ಪೋಯೆರ್. ಆ ಪಾತೆರದ ಬಗೆಟ್ ಅಕುಲು ಆಯಡ ಕೇನಿಯೆರೆ ಪೋಡಿಯೆರ್.

⁴⁶ಯೇಸುನ ಶಿಷ್ಯೆರೆಡ್ ಏರ್ ಮಲ್ಲಾಯೆ ಪನ್ಪಿ ಒಂಜಿ ತರ್ಕ ಪುಟ್ಟುಂಡು.

⁴⁷ಯೇಸು ಅಕ್ಲೆನ ಉಡಲ್‌ದ ಗೇನೊನು ತೆರಿದ್ ಒಂಜಿ ಎಲ್ಯ ಬಾಲೆನ್ ಪತ್ತೊಂದು ಆಯನ ಕೈತಲ್‌ ಉಂತಾದ್,

⁴⁸ಅಕ್ಲೆಗ್, “ಏರಾಂಡಲಾ ಎನ ಪುದರ್‌ಡ್ ಈ ಬಾಲೆನ್ ಸೇರಾವೊಂಡೆಡ, ಎನನ್ ಸೇರಾವೊಂಡಿಲೆಕ್ಕ ಆಂಡ್. ಬೊಕ್ಕ ಏರಾಂಡಲಾ ಎನನ್ ಸೇರಾವೊಂಡೆಡ ಎನನ್ ಅತ್ತ್, ಎನನ್ ಕಡಪುಡ್ದು ಕೊರಿನಾಯನೇ ಸೇರಾವೊಂಡಿಲೆಕ್ಕ. ದಾಯೆ ಪಂಡ ನಿಕ್ಲೆಡ್ ಮಾತೆರೆಡ್ ಏರ್ ಎಲ್ಯ ಆಪೆನಾ ಆಯೆನೇ ಮಲ್ಲಾಯೆ,” ಅಂದ್‌ದ್ ಪಂಡೆ.

⁴⁹ಐಕ್ ಯೋಹಾನೆ, “ಗುರೂ, ಏರಾ ಒರಿ ನಿನ ಪುದರ್‌ನ್ ಪಂಡ್ದ್ ದೆವ್ವ ಬುಡ್ಪಾವುನೆನ್ ಎಂಕುಲು ತೂದು ಆಯೆ ಎಂಕ್ಲೆನಾಯೆ ಅತ್ತಂದಿನೆಡ್ದ್ ಆಯಗ್ ಅಡ್ಡಿ ಮಲ್ತ,” ಪಂಡೆ.

⁵⁰“ಆಯಗ್ ಅಡ್ಡಿ ಮಲ್ಪಡೆ,” ಯೇಸು ಆಯಗ್ ಬೊಕ್ಕ ಬೇತೆ ಶಿಷ್ಯೆರೆಗ್, “ಏರ್ ನಿಕ್ಲೆನ್ ವಿರೋಧ ಮಲ್ಪುಜೆರಾ, ಅಕುಲು ನಿಕ್ಲೆ ಕಡೆತ್ತಾಕುಲೇ ಆದುಲ್ಲೆರ್,” ಅಂದ್‌ದ್ ಪಂಡೆ.

⁵¹ಯೇಸು ತಾನ್ ಪರಲೋಕೊಗು ಪೋಪಿನ ದಿನ ಕೈತಲ್‌ ಬನ್ನಗ ಯೆರೂಸಲೇಮುಗು ಪೋವೆರೆ ಮನಸ್ ದೃಢ ಮಲ್ತೊಂದು

⁵²ತನ ದೂತೆರೆನ್ ದುಂಬು ಕಡಪುಡಿಯೆ. ಮೊಕುಲು ಪಿದಾಡ್ದ್ ಆಯಗ್ ಬೋಡಾಯಿನೆನ್ ತಯಾರ್ ಮಲ್ಪೆರೆಗಾದ್ ಸಮಾರ್ಯದಾಕುಲೆನ ಒಂಜಿ ಹಳ್ಳಿಗ್ ಬತ್ತೆರ್.

⁵³ಆಂಡ ಆಯೆ ಯೆರೂಸಲೇಮುಗು ಪೋಪಿನಾಯೆ ಆದಿತ್ತಿನೆಡ್ದ್ ಆ ಸಮಾರ್ಯಾದಾಕುಲು ಆಯನ್ ಸೇರಾವೊಂಡಿಜೆರ್.

⁵⁴ಆಯನ ಶಿಷ್ಯೆರಾಯಿ ಯಾಕೋಬು, ಯೋಹಾನೆ ಉಂದೆನ್ ತೂದು, “ಸ್ವಾಮಿ, ಎಲೀಯೆ ಮಲ್ತಿ ಲೆಕ್ಕನೆ ಎಂಕುಲುಲಾ ಬಾನೊಡ್ದು ತೂ ಬೂರ್ದು ಮೊಕ್ಲೆನ್ ನಾಶ ಮಲ್ಪಡ್ ಅಂದ್‌ದ್ ಪನೊಡಾ,” ಅಂದ್‌ದ್ ಕೇನ್ನಗ

⁵⁵ಯೇಸು ಪಿಜಿರ್‌ದ್ ಅಕ್ಲೆನ್ ದಟ್ಟಿಯೆ. ನಿಕುಲು ಎಂಚಿತ್ತಿ ಆತ್ಮದಾಕುಲು ಅಂದ್‌ದ್ ತೆರಿದಿಜರಾ, ನರಮಾನಿ ಮಗೆ ನರಮಾನಿಲೆ ಪ್ರಾಣೊಲೆನ್ ನಾಶನ ಮಲ್ಪೆರೆ ಅತ್ತ್ ರಕ್ಷಣೆ ಮಲ್ಪೆರೆ ಬತ್ತೆ, ಅಂದ್‌ದ್ ಪಂಡೆ.

⁵⁶ಬೊಕ್ಕ ಅಕುಲು ಮಾತೆರ್ಲಾ ಬೇತೆ ಹಳ್ಳಿಗ್ ಪೋಯೆರ್.

⁵⁷ಅಕುಲು ಸಾದಿಡ್ ಪೋವೊಂದುಪ್ಪುನಗ ಏರಾ ಒರಿ ಯೇಸುಡ, “ಈ ಒಡೆಗ್ ಪೋಂಡಲಾ ಯಾನ್ ನಿನ ಬೆರಿಯೆ ಬರ್ಪೆ,” ಅಂದ್‌ದ್ ಪನ್ನಗ

⁵⁸ಯೇಸು ಆಯಗ್, “ಕುದ್‌ಕೆರ್‌ಲೆಗ್ ಮಾಟೆಲು ಉಂಡು; ಬಾನೊಡು ರಾಪಿನ ಪಕ್ಕಿಲೆಗ್ ಗೂಡುಲು ಉಂಡು; ಆಂಡ ನರಮಾನಿ ಮಗಕ್ಕ್ ತರೆ ದೀಪಿನಾತ್ ಜಾಗ್‌ಲಾ ಇಜ್ಜಿ ಅಂದ್‌ದ್ ಪಂಡೆ.”

⁵⁹ಆಯೆ ಬೊಕ್ಕೊರಿಯಡ, “ಎನ ಬೆರಿಯೆ ಬಲ.” ಅಂದ್‌ದ್ ಪನ್ನಗ ಆಯೆ, “ಕರ್ತವಾ, ಯಾನ್ ದುಂಬತ್ತ ಪೋದು ಎನ ಅಮ್ಮೆರೆನ್ ಕೌಂತ್‌ದ್ ಬರಿಯೆರೆ ಎಂಕ್ ಅಪ್ಪಣೆ ಆವೊಡು,” ಅಂದ್‌ದ್ ಪಂಡೆ.

⁶⁰ಆಂಡ ಯೇಸು ಆಯಗ್, “ಸೈತಿನಾಕುಲು ತನ್ಕುಲೆಡ್ ಸೈತ್ ಪೋತಿನಾಕುಲೆನ್ ಕೌಂಪಡ್. ಈ ಪೋದು ದೇವೆರೆ ರಾಜ್ಯೊನು ಸಾರಿಲ,” ಅಂದ್‌ದ್ ಪಂಡೆ.

⁶¹ನನೊರಿಲಾ ಕರ್ತವ, “ನಿನ ಬೆರಿಯೆ ಬರ್ಪೆ, ಆಂಡ ಅವೆಡ್ದುಂಬು ಎನ ಇಲ್ಲದಾಕುಲೆಗ್ ಪಂಡ್ದ್ ಬರಿಯೆರೆ ಅಪ್ಪಣೆ ಕೊರ್ಲ,” ಪಂಡೆ.

⁶²ಯೇಸು ಆಯಗ್, “ಏರಾಂಡಲಾ ನಾಯೆರ್‌ದ ಮಿತ್ತ್ ತನ ಕೈನ್ ದೀದ್ ಪಿರ ತೂಂಡ, ಆಯೆ ದೇವೆರೆ ರಾಜ್ಯೊಗು ತಕ್ಕದಾಯೆ ಅತ್ತ್,” ಪಂಡೆ.