Read Tulu ಯೋಹಾನೆ 1 Bible Online

ಯೋಹಾನೆ 1 - Tulu bible

ಯೋಹಾನೆ 1

¹ಆದಿಡ್ ವಾಕ್ಯ ಇತ್ತ್ಂಡ್, ಆ ವಾಕ್ಯ ದೇವೆರೆ ಕೈತಲ್ ಇತ್ತ್ಂಡ್, ಆ ವಾಕ್ಯ ದೇವೆರ್ ಆದಿತ್ತ್ಂಡ್.

²ಆ ವಾಕ್ಯ ಪನ್ಪಿನಾಯೆ ಆದಿಡ್ ದೇವೆರೆ ಕೈತಲ್ ಇತ್ತೆ.

³ಆಯಡ್ದ್ ಮಾತ ವಸ್ತುಲಾ ಉಂಡಾತ್ಂಡ್. ಉಂಡಾಯಿನ ವಸ್ತುಡು ಆಯೆದಾಂತೆ ಒಂಜಿಲಾ ಉಂಡಾಯಿಜಿ.

⁴ಆಯಡ ಜೀವ ಇತ್ತ್ಂಡ್, ಆ ಜೀವ ನರಮಾನಿಲೆಗ್ ಬೊಲ್ಪು ಆದಿತ್ತ್ಂಡ್.

⁵ಆ ಬೊಲ್ಪು ಕತ್ತಲೆಡ್ ಮಿಂಚೊಂದಿತ್ತ್‌ಂಡ್ ಕತ್ತಲೆ ಅವೆನ್ ದೆಂಗಾಯಿಜಿ.

⁶ದೇವೆರ್ ಒರಿ ನರಮಾನಿನ್ ಕಡಪುಡಿಯೆ. ಆಯನ ಪುದರ್ ಯೋಹಾನೆ. ಆ ಯೋಹಾನೆ ಸಾಕ್ಷಿಗಾದ್ ಬತ್ತೆ, ಮಾತೆರ್ಲಾ ನಂಬೊಡು ಅಂದ್‌ದ್ ಆ ಬೊಲ್ಪುದ ಸಂಗತಿಡ್ ಸಾಕ್ಷಿ ಕೊರಿಯೆರೆ ಬತ್ತೆ.

⁷

⁸ಆಯೆ ಆ ಬೊಲ್ಪು ಆದಿತ್ತಿಜೆ, ಆಂಡ ಆ ಬೊಲ್ಪುದ ಸಂಗತಿಡ್ ಸಾಕ್ಷಿ ಕೊರಿಯೆರೆಗಾದ್ ಬತ್ತೆ.

⁹ನಿಜವಾಯಿನ ಬೊಲ್ಪು ಲೋಕೊಗು ಬರಿಯೆರೆ ಇತ್ತ್ಂಡ್. ಆ ಬೊಲ್ಪೇ ಪ್ರತಿ ಒರಿಯಗ್ ಬೊಲ್ಪು ಕೊರ್ಪಿನವು ಆದಿತ್ತ್ಂಡ್.

¹⁰ಆಯೆ ಲೋಕೊಡಿತ್ತೆ. ಲೋಕ ಆಯಡ್ದೇ ಉಂಡಾಂಡ್, ಆಂಡಲಾ ಲೋಕ ಆಯನ್ ತೆರಿಯಿಜಿ.

¹¹ಆಯೆ ತನ ಸ್ವಂತದಾಕುಲೆ ಕೈತಲ್‌ ಬತ್ತೆ. ಆಂಡ ಆಯನ ಸ್ವಂತದಾಕುಲು ಆಯನ್ ಅಂಗೀಕಾರ ಮಲ್ತ್‌ಜೆರ್.

¹²ಆಂಡ ಏರೇರ್ ಆಯನ್ ಅಂಗೀಕಾರ ಮಲ್ತೊಂಡೆರಾ, ಆಯನ ಪುದರ್‌ಡ್ ನಂಬಿಕೆ ದೀಯೆರಾ ಅಕ್ಲೆಗ್ ದೇವೆರೆ ಬಾಲೆಲಾಪಿ ಅಧಿಕಾರ ಕೊರಿಯೆ.

¹³ಮೊಕುಲು ನೆತ್ತೆರ್‌ದ ಸಮ್ಮಂಧೊಡ್ದು ಆವಡ್, ಶರೀರ ಸಮ್ಮಂಧೊಡ್ದು ಆವಡ್, ನರಮಾನಿಲೆ ಸಂಕಲ್ಪೊಡ್ದು ಆವಡ್ ಪುಟ್ಟುದಿನಾಕುಲತ್ತ್ ಆಂಡ ದೇವೆರೆಡ್ದೇ ಪುಟ್ಟಿನಾಕುಲು.

¹⁴ಆ ವಾಕ್ಯ ಪನ್ಪಿನಾಯೆ ನರಮಾನಿ ರೂಪೊಡು ನಮ ನಡುಟು ಬದ್‌ಕಿಯೆ. ನಮ ಆಯನ ಮೈಮೆನ್ ತೂಯ. ಆ ಮೈಮೆ ಅಮ್ಮೆರೆಡ್ದ್ ಬತ್ತಿತ್ತಿ ಒರಿಯೇ ಮಗಕ್ಕ್ ಉಪ್ಪೊಡಾಯಿ ಮೈಮೆ. ಆಯೆ ದಯೊಟ್ಲಾ ಸತ್ಯೊಡ್ಲಾ ದಿಂಜಿದಿನಾಯೆ ಆದಿತ್ತೆ.

¹⁵ಯೋಹಾನೆ ಆಯ ಸಂಗತಿಡ್ ಸಾಕ್ಷಿ ಕೊರ್ಪೆ ಎಂಚಂದ್ಂಡ, “ಎನಡ್ದ್ ಬೊಕ್ಕ ಬರ್ಪಿನಾಯೆ, ಎನಡ್ದ್ ದುಂಬೇ ಇತ್ತಿನೆಡ್ದ್ ದುಂಬುದಾಯೆ ಆಯೆ, ಪಂಡ್ದ್ ಯಾನ್ ಪಂಡಿನಾಯೆ ಇಂಬೆನೇ.” ಬೊಬ್ಬೆ ದೀದ್ ಪಂಡೆ.

¹⁶ನಮ ಮಾತೆರ್ಲಾ ಆಯನ ದಿಂಜಿದಿ ದಯೊಟ್ಟು ದಯತ ಮಿತ್ತ್ ದಯ ಪಡೆವೊಂಡ.

¹⁷ದೇವೆರ್ ನ್ಯಾಯಕಟ್ಟ್‌ನ್ ಮೋಶೆಡ್ದ್ ಕೊರಿಯೆ, ಆಂಡ ದಯಲಾ ಸತ್ಯಲಾ ಯೇಸು ಕ್ರಿಸ್ತಡ್ದ್ ತಿಕ್ಕ್ಂಡ್.

¹⁸ದೇವೆರೆನ್ ಏರ್ಲಾ ಏಪಲಾ ತೂತುಜೆರ್. ಆಂಡ ಅಮ್ಮೆ ಮರ್ಗಿಲ್‌ಡುಪ್ಪು ಒರಿಯೇ ಮಗೆ ದೇವೆರೆನ ಗುರ್ತ ತೆರಿಪಾಯೆ.

¹⁹ಯೋಹಾನೆ ಕೊರಿನ ಸಾಕ್ಷಿ ದಾನೆಂದ್ಂಡ, ಯೆಹೂದ್ಯೆರ್ ಯೆರೂಸಲೇಮುಡ್ದು ಯಾಜಕೆರೆನ್ಲಾ ಲೇವಿಯೆರೆನ್ಲಾ ಯೋಹಾನನ ಕೈತಲ್ ಕಡಪುಡ್ದು, “ಈ ಏರ್,” ಅಂದ್‌ದ್ ಕೇಂಡಿನೆಕ್ಕ್,

²⁰ಯೋಹಾನೆ ಮದೆಮಲ್ಪಂದೆ, “ಯಾನ್ [1]ಕ್ರಿಸ್ತೆ ಅತ್ತ್,” ಅಂದ್‌ದ್ ಮಾತೆರೆ ಎದುರುಡ್ ಪಂಡೆ.

²¹“ಅಂಚಾಂಡ ಈ ಏರ್?” ಈ ಎಲೀಯೆನಾ? ಅಂದ್‌ದ್ ಅಕುಲು ಕೇನ್ನಗ, ಅತ್ತ್ ಪಂಡೆ. “ಈ ಬರಿಯೆರೆ ಇತ್ತಿ ಆ ಪ್ರವಾದಿಯಾ?” ಅಂದ್‌ದ್ ಕೇಂಡಿನೆಕ್ಕ್ “ಯೋಹಾನೆ ಅತ್ತ್,” ಪಂಡೆ.

²²ಅಪಗ ಅಕುಲು, “ಈ ಏರ್? ಎಂಕ್ಲೆನ್ ಕಡಪುಡ್ದಿನಾಕುಲೆಗ್ ಎಂಕುಲು ಉತ್ತರ ಕೊರೊಡತ್ತಾ; ನಿನ ಸಂಗತಿಡ್ ಈ ಎಂಚಿನ ಪನ್ಪ?” ಅಂದ್‌ದ್ ಕೇನ್ನಗ ಆಯೆ,

²³“ಪ್ರವಾದಿ ಯೆಶಾಯೆ ಪಂಡಿಲೆಕ್ಕ, ‘ಕರ್ತವ ಸಾದಿನ್ ಸರ್ತ ಮಲ್ಪುಲೆ,’ ಅಂದ್‌ದ್ ಕಾಡ್‌ಡ್ ಬೊಬ್ಬೆ ಪಾಡುನಾಯ ಸ್ವರ ಉಂಡು ಪಂಡ್ದ್ ಕೇನ್ದರತ್ತ? ಆ ಸ್ವರನೇ ಯಾನಾದುಲ್ಲೆ.”

²⁴ಬತ್ತಿತ್ತಿನಾಕುಲು ಪರಿಸಾಯೆರೆ ಕಡೆತ್ತಾಕುಲಾದಿತ್ತ್‌ದ್,

²⁵“ಈ ಕ್ರಿಸ್ತೆ ಆವಡ್, ಎಲೀಯೆ ಆವಡ್, ಆ ಪ್ರವಾದಿ ಆವಡ್ ಅತ್ತ್‌ಡ ನೀರ್‌ದ ದೀಕ್ಷಾಸ್ನಾನ ಎಂಚ ಕೊರೊಂದುಲ್ಲ?” ಅಂದ್‌ದ್ ಆಯಡ ಕೇಂಡೆರ್.

²⁶ಯೋಹಾನೆ ಅಕ್ಲೆಗ್, “ಯಾನ್ ಜನೊಕುಲೆಗ್ ನೀರ್‌ಡ್ ದೀಕ್ಷಾಸ್ನಾನ ಮಲ್ಪಾಯೆ, ಆಂಡ ನಿಕ್ಲೆಗ್ ತೆರಿಯಂದಿ ಒರಿ ನಿಕ್ಲೆನ ನಡುಟು ಉಂತೊಂದೆ.

²⁷ಆಯೆನೇ ಎನ ಬೆರಿಯೆ ಬರ್ಪಿನಾಯೆ. ಆಯ ಕಾರ್‌ದ ಜೋಡುದ ಪಟ್ಟಿನ್ ಗಿರ್ಪೆರೆಗ್ಲಾ ಯಾನ್ ಯೋಗ್ಯದಾಯೆ ಅತ್ತ್,” ಪಂಡೆ.

²⁸ಉಂದು ಮಾತ ಯೊರ್ದಾನ್ ತುದೆತ ಆಯೆರೆಡುಪ್ಪು ಬೇಥಾನ್ಯೊಡು ನಡತ್ಂಡ್. ಅಲ್ಪ ಯೋಹಾನೆ ನೀರ್‌ಡ್ ದೀಕ್ಷಾಸ್ನಾನ ಕೊರೊಂದಿತ್ತೆ.

²⁹ಮನದಾನಿ ಯೋಹಾನೆ ಯೇಸು ತನ ಕೈತಲ್‌ ಬರ್ಪಿನೆನ್ ತೂದು, “ಇಂದಾ, ಬಲಿ ಅರ್ಪಣೆಗಾದ್ ದೇವೆರ್ ನೇಮಕ ಮಲ್ತಿ ಕುರಿತ ಕಿನ್ನಿ, ಲೋಕದ ಪಾಪೊನು ತುಂಬೊಂದು ಪೋಪಿನಾಯೆ.

³⁰‘ಎನಡ್ದ್ ಬೊಕ್ಕ ಬರ್ಪಿನಾಯೆ, ಎನಡ್ದ್ ದುಂಬೇ ಇತ್ತಿನೆಡ್ದ್ ಎಂಕ್‌ ದುಂಬುದಾಯೆ ಆಯೆ,’ ಅಂದ್‌ದ್ ಯಾನ್ ನಿಕ್ಲೆಗ್ ಪನೊಂದಿತ್ತಿನವು ಇಂಬ್ಯನ ವಿಷಯೊಡೇ.”

³¹ಎಂಕ್‌ಲಾ ಆಯನ ಗುರ್ತ ಇತ್ತ್‌ಜಿ; ಆಂಡ ಆಯನ್ ಇಸ್ರಾಯೇಲ್ಯೆರೆಗ್ ತೆರಿಪಾವೆರೆಗಾದ್ ಯಾನ್ ನೀರ್‌ದ ದೀಕ್ಷಾಸ್ನಾನ ಕೊರಿಯೆರೆ ಬತ್ತೆ ಅಂದ್‌ದ್ ಪಂಡೆ.

³²ಉಂದತ್ತಂದೆ ಯೋಹಾನೆ ಸಾಕ್ಷಿ ಕೊರ್ದು ಪಂಡಿನಿ ದಾನೆಂದ್ಂಡ, “ದೇವೆರಾತ್ಮ ಪಾರಿವಾಳದ ರೂಪೊಡು ಬಾನೊಡ್ದು ತಿರ್ತ್ ಜಪ್ಪುನೆನ್ ತೂಯೆ. ಅವು ಆಯ ಮಿತ್ತ್ ನಿಲೆ ಆಂಡ್.

³³ಎಂಕ್‌ಲಾ ಆಯನ ಗುರ್ತ ಇತ್ತ್‌ಜಿ, ಆಂಡ ನೀರ್‌ದ ದೀಕ್ಷಾಸ್ನಾನ ಮಲ್ಪೆರೆಗಾದ್ ಎನನ್ ಕಡಪುಡ್ದಿನಾಯೆ, ‘ಏರೆ ಮಿತ್ತ್ ಆತ್ಮ ಬರ್ಪಿನೆನ್ ತೂಯನಾ ಆಯೆನೇ ಪರಿಶುದ್ಧಾತ್ಮಡ್ ದೀಕ್ಷಾಸ್ನಾನೊನು ಕೊರ್ಪಿನಾಯೆ,’ ಅಂದ್‌ದ್ ಎಂಕ್ ಪಂಡೆ.

³⁴ಯಾನ್ ಅವೆನ್ ತೂದು ಇಂಬೆನೇ ದೇವೆರೆ ಮಗೆ,” ಅಂದ್‌ದ್ ಸಾಕ್ಷಿ ಪಂಡೆ.

³⁵ಮನದಾನಿ ಕುಡ ಯೋಹಾನೆಲಾ ಆಯನ ಇರ್ವೆರ್ ಶಿಷ್ಯೆರೆಡೊಪ್ಪ ಉಂತೊಂದುಪ್ಪುನಗ

³⁶ಯೋಹಾನೆ ಅಲ್ಪ ತಿರ್ಗೊಂದಿತ್ತಿ ಯೇಸುನು ತೂದು, “ಇಂದಾ, ಬಲಿ ಅರ್ಪಣೆಗಾದ್ ದೇವೆರ್ ನೇಮಕ ಮಲ್ತ್‌ದಿನ ಕುರಿತ ಕಿನ್ನಿ!” ಅಂದ್‌ದ್ ಪಂಡೆ.

³⁷ಆ ಇರ್ವೆರ್ ಶಿಷ್ಯೆರ್ ಅವೆನ್ ಕೇಂಡ್ದ್ ಯೇಸುನ ಬೆರಿಯೆ ಪೋಯೆರ್.

³⁸ಯೇಸು ತಿರ್ಗ್‌ದ್ ಅಕುಲು ತನ ಬೆರಿಯೆ ಬರ್ಪಿನೆನ್ ತೂದು, “ನಿಕ್ಲೆಗ್ ದಾದ ಬೋಡು,” ಅಂದ್‌ದ್ ಕೇನ್ನಗ ಅಕುಲು, “ರಬ್ಬಿ” (ರಬ್ಬಿ ಪಂಡ್ಂಡ ಗುರು) “ಈ ಉಪ್ಪುನು ಒಲ್ಪ?” ಅಂದ್‌ದ್ ಕೇಂಡೆರ್.

³⁹ಐಕ್ ಯೇಸು, “ಬತ್ತ್‌ದ್ ತೂಲೆ,” ಅಂದ್‌ದ್ ಪನ್ನಗ ಅಕುಲು ಪೋದು ಆಯೆ ಉಪ್ಪು ಜಾಗ್‌ನ್ ತೂದು, ಆ ದಿನ ಆಯಡೊಪ್ಪ ಇತ್ತೆರ್. ಅಪಗ ಹೆಚ್ಚಿಕಡಿಮೆ ಬೈಯದ ನಾಲ್ ಗಂಟೆ ಆದಿತ್ತ್ಂಡ್.

⁴⁰ಯೋಹಾನನ ಪಾತೆರೊನು ಕೇಂಡ್ದ್ ಯೇಸು ಬೆರಿಯೆ ಪೋಯಿ ಆ ಇರ್ವೆರೆಡ್ ಒರಿ ಸೀಮೋನ ಪೇತ್ರನ ಮೆಗ್ಯೆ ಅಂದ್ರೆಯೆ.

⁴¹ಇಂಬೆ ದುಂಬತ್ತ ತನ ಪಲಯೆ ಸೀಮೋನನ್ ತೂದು ಆಯಡ ಪಂಡಿನಿ ದಾನೆಂದ್ಂಡ, “ಮೆಸ್ಸೀಯೆ ಎಂಕ್ಲೆಗ್ ತಿಕ್ಕಿಯೆ.” (ಮೆಸ್ಸೀಯೆ ಪಂಡ್ಂಡ ಕ್ರಿಸ್ತೆ)

⁴²ಆಯನ್ ಯೇಸು ಕೈತಲ್‌ ಲೆತ್ತೊಂದು ಬತ್ತೆ. ಯೇಸು ಆಯನ್ ತೂದು, “ಈ ಯೋಹಾನನ ಮಗೆ ಸೀಮೋನೆ ನನ ಮಿತ್ತ್ ಈ ಕೇಫ ಅಂದ್‌ದ್ ಲೆಪ್ಪಾವೊನುವ.” (ಕೇಫ ಪಂಡ್ಂಡ ಪೇತ್ರೆ).

⁴³ಮನದಾನಿ ಯೇಸು ಗಲಿಲಾಯೊಗು ಪೋವೊಡಂದ್‌ದ್ ಉಪ್ಪುನಗ ಫಿಲಿಪ್ಪುನ್ ತೂದು ಆಯಡ, “ಎನ ಬೆರಿಯೆ ಬಲ.” ಪಂಡೆ

⁴⁴ಫಿಲಿಪ್ಪೆ ಬೆತ್ಸಾಯಿದಾಯೆ ಅಂದ್ರೆಯೆಲಾ ಪೇತ್ರೆಲಾ ಅವ್ವೇ ಊರುದಾಕುಲು.

⁴⁵ಫಿಲಿಪ್ಪೆ ನತಾನಿಯೇಲನ್ ತೂದು ಆಯಡ, “ಏರೆ ವಿಷಯೊಡು ಮೋಶೆ ನ್ಯಾಯಕಟ್ಟ್‌ಲೆ ಬೊಕ್ಕ ಪ್ರವಾದಿಲು ಬರೆತೆರಾ, ಆಯೆ ಎಂಕ್ಲೆಗ್ ತಿಕ್ಕಿಯೆ. ಆಯೆ ಏರಂದ್ಂಡ ಯೋಸೇಫು ಮಗೆ ಆಯಿ ನಜರೇತ್‌ದ ಯೇಸು.” ಅಂದ್‌ದ್ ಪಂಡೆ.

⁴⁶ಅಪಗ ನತಾನಿಯೇಲೆ, “ಎಡ್ಡೆಂತಿನವು ದಾಲಾಂಡಲಾ ನಜರೇತ್‌ಡ್ದ್ ಬರಿಯೆರೆ ಉಂಡಾ?” ಪನ್ನಗ ಫಿಲಿಪ್ಪು “ಬತ್ತ್‌ದ್ ತೂಲ.” ಅಂದ್‌ದ್ ಪಂಡೆ.

⁴⁷ಯೇಸು ತನ ಕೈತಲ್‌ ಬರ್ಪಿ ನತಾನಿಯೇಲನ್ ತೂದು ಆಯ ಸಂಗತಿಡ್, “ಇಂದಾ, ಆಯೆ ನಿಜ ಇಸ್ರಾಯೇಲ್ಯೆ, ಆಯಡ ಕಪಟ ಇಜ್ಜಿ!” ಪಂಡೆ.

⁴⁸ನತಾನಿಯೇಲೆ, “ಎನ ಗುರ್ತ ನಿಕ್ಕ್ ಎಂಚ?” ಅಂದ್‌ದ್ ಯೇಸುಡ ಕೇಂಡಿನೆಕ್ಕ್ ಆಯೆ, “ಫಿಲಿಪ್ಪೆ ನಿನನ್ ಲೆಪ್ಪುನೆಡ್ದ್ ದುಂಬು, ಈ ಅಂಜೂರದ ಮರತ ಅಡಿಟ್ಟ್ ಉಪ್ಪುನಗ ಯಾನ್ ತೂಯೆ.” ಪಂಡೆ.

⁴⁹ಐಕ್ ನತಾನಿಯೇಲೆ, “ಓ ಗುರೂ, ಈ ದೇವೆರೆ ಮಗೆ, ಈಯೇ ಇಸ್ರಾಯೇಲ್ಯೆರೆ ಅರಸು!” ಪಂಡೆ.

⁵⁰ಐಕ್ ಯೇಸು, “ಆ ಅಂಜೂರದ ಮರತ ಅಡಿಟ್ಟ್ ಯಾನ್ ನಿನನ್ ತೂಯೆ ಅಂದ್‌ದ್ ನಿನಡ ಪಂಡಿನೆಡ್ದ್ ಈ ನಂಬುವನಾ? ಉಂದೆಡ್ದ್ ಮಲ್ಲ ಕಾರ್ಯೊಲೆನ್ ತೂವ.” ಪಂಡೆ.

⁵¹ಉಂದತ್ತಂದೆ ಕುಡ ಆಯಡ, “ಯಾನ್ ನಿಕ್ಕ್ ಸತ್ಯಾದ್ ಪನ್ಪೆ, ಪರಲೋಕ ಜತ್ತ್‌ದುಪ್ಪುನೆನ್ಲಾ ನರಮಾನಿ ಮಗ ಮಿತ್ತ್ ದೇವೆರೆ ದೂತೆರ್ ಏರ್ದ್ ಪೋಪಿನೆನ್ಲಾ ಜತ್ತ್‌ದ್ ಬರ್ಪಿನೆನ್ಲಾ ತೂವರ್.” ಅಂದ್‌ದ್ ಪಂಡೆ.