Read Tulu ಯೋಹಾನೆ 14 Bible Online

ಯೋಹಾನೆ 14 - Tulu bible

ಯೋಹಾನೆ 14

¹“ನಿಕ್ಲೆನ ಉಡಲ್ ತಳಮಳ ಆವಂದೆ ಉಪ್ಪಡ್.” “ದೇವೆರೆನ್ ನಂಬುಲೆ ಎನನ್ಲಾ ನಂಬುಲೆ.

²ಎನ ಅಮ್ಮೆರೆ ಇಲ್ಲಡ್ ಮಸ್ತ್ ಬುಡಾರೊಲು ಉಂಡು. ಇಜ್ಜಾಂದೆ ಇತ್ತ್‌ದ್ಂಡ ನಿಕ್ಲೆಗ್ ಪನ್ತ್‌ವೆ, ಯಾನ್ ನಿಕ್ಲೆಗ್ ಜಾಗ್ ತಯಾರ್ ಮಲ್ಪೆರೆ ಪೋವೊಂದುಲ್ಲೆ.

³ಯಾನ್ ಪೋದು, ನಿಕ್ಲೆಗ್ ಜಾಗ್ ತಯಾರ್ ಮಲ್ತಿ ಬೊಕ್ಕ, ಯಾನ್ ಉಪ್ಪು ಜಾಗ್‌ಡೇ ನಿಕುಲುಲಾ ಉಪ್ಪೊಡು ಪಂಡ್ದ್, ಕುಡ ಪಿರ ಬತ್ತ್‌ದ್ ನಿಕ್ಲೆನ್ ಲೆತ್ತೊಂದು ಪೋದು ಎನ್ನೊಟ್ಟುಗು ಸೇರಾವೊನುವೆ. ದಾಯೆಗಂದ್ಂಡ ಯಾನ್ ಉಪ್ಪುನ ಜಾಗ್‌ಡ್ ನಿಕುಲುಲಾ ಉಪ್ಪೊಡು.

⁴ಬೊಕ್ಕ ಯಾನ್ ಪೋಪಿ ಜಾಗ್‌ದ ಸಾದಿ ನಿಕ್ಲೆಗ್ ತೆರಿದುಂಡು,” ಪಂಡೆ.

⁵ತೋಮೆ ಯೇಸುಡ, “ಕರ್ತವಾ, ಈ ಒಡೆಗ್ ಪೋಪನಾ ಎಂಕ್ಲೆಗ್ ತೆರಿಯಂದ್, ಅಂಚಾಂಡ ಸಾದಿ ಎಂಚ ತೆರಿವು?” ಕೇಂಡೆ.

⁶ಐಕ್ ಯೇಸು ಆಯಡ, “ಯಾನೇ ಮಾರ್ಗಲಾ ಸತ್ಯಲಾ ಜೀವಲಾ ಆದುಲ್ಲೆ. ಯಾನ್ ಅತ್ತಂದೆ ಏರ್ಲಾ ಅಮ್ಮೆರೆ ಕೈತಲ್‌ ಬರ್ಪುಜೆರ್

⁷ನಿಕುಲು ಎನನ್ ತೆರಿದಿತ್ತರ್ಡ ಎನ ಅಮ್ಮೆರೆನ್ ತೆರಿದಿತ್ತ್‌ವರ್, ಇತ್ತೆಡ್ದ್ ಆಯನ್ ತೆರಿಯೊಂದುಲ್ಲರ್ ಬೊಕ್ಕ ಆಯನ್ ತೂತರತ್ತಾ,” ಪಂಡೆ.

⁸ಐಕ್ ಫಿಲಿಪ್ಪೆ ಯೇಸುಡ, “ಕರ್ತವಾ ಎಂಕ್ಲೆಗ್ ಅಮ್ಮೆರೆನ್ ತೋಜಾವು, ಎಂಕ್ಲೆಗ್ ಆತೇ ಯಾವು,” ಅಂದ್‌ದ್ ಪಂಡೆ.

⁹ಯೇಸು ಆಯಡ, “ಫಿಲಿಪ್ಪೋ, ಯಾನ್ ಈತ್ ದಿನ ನಿಕ್ಲೆಡೊಪ್ಪ ಇತ್ತ್‌ದ್‌ಲಾ ಈ ನನಲಾ ತೆರಿಯೊಂಡಿಜನಾ. ಎನನ್ ತೂತಿನಾಯೆ ಅಮ್ಮೆರೆನ್ ತೂತೆ ಅಂಚಾದ್ ಈ ಎಂಕ್ಲೆಗ್ ಅಮ್ಮೆರೆನ್ ತೋಜಾವು ಅಂದ್‌ದ್ ಪನ್ಪಿನಿ ಎಂಚ?”

¹⁰ಯಾನ್ ಅಮ್ಮೆ ಒಟ್ಟುಗು ಉಲ್ಲೆ, ಅಮ್ಮೆ ಎನೊಟ್ಟುಗು ಉಲ್ಲೆ ಪನ್ಪಿನೆನ್ ಈ ನಂಬುಜನಾ? ಯಾನ್ ನಿಕ್ಲೆಗ್ ಪನ್ಪಿ ಪಾತೆರೊಲು ಎನ್ನಾತೆಗ್ ಯಾನ್ ಪಾತೆರುಜಿ. ಅಮ್ಮೆ ಎನಡೊಪ್ಪ ಇತ್ತ್‌ದ್ ತನ ಕಾರ್ಯೊಲೆನ್ ನಡಪುಡುವೆ.

¹¹ಯಾನ್ ಅಮ್ಮೆ ಒಟ್ಟುಗು ಉಲ್ಲೆ, ಅಮ್ಮೆ ಎನ ಒಟ್ಟುಗು ಉಲ್ಲೆ ಪನ್ಪಿ ಪಾತೆರೊಲೆನ್ ನಂಬುಲೆ, ಇಜ್ಜಾಂಡ ಕಾರ್ಯೊಲೆನ್ ತೂದು ಎನ ಪಾತೆರೊಲೆನ್ ನಂಬುಲೆ.

¹²ನಿಕ್ಲೆಗ್ ನಿಜಾದ್ ಪನ್ಪೆ, ಎನನ್ ನಂಬುನಾಯೆ ಯಾನ್ ಮಲ್ಪು ಕಾರ್ಯೊಲೆನ್ ತಾನ್‌ಲಾ ಮಲ್ಪುವೆ, ಬೊಕ್ಕ ಅವೆಡ್ದ್ ಮಲ್ಲ ಮಲ್ಲಕಾರ್ಯೊಲೆನ್ಲಾ ಮಲ್ಪುವೆ. ದಾಯೆ ಪಂಡ ಯಾನ್ ಅಮ್ಮೆರೆ ಕೈತಲ್‌ ಪೋಪೆ.

¹³ಉಂದತ್ತಂದೆ ನಿಕುಲು ಎನ ಪುದರ್‌ಡ್ ಎಂಚಿಂಚಿನ ನಟ್ಟೊಂಡರ್ಡ, ಅವೆನ್ ಮಲ್ತ್ ಕೊರ್ಪೆ. ಇಂಚ ಮಗಡ್ದ್ ಅಮ್ಮೆರೆಗ್ ಮೈಮೆ ಉಂಡಾಪುಂಡು.

¹⁴ನಿಕುಲು ಎನ ಪುದರ್‌ಡ್ ದಾದಾಂಡಲಾ ನಟ್ಟೊನುವರ್ಡ ಅವೆನ್ ಮಲ್ತ್ ಕೊರ್ಪೆ.

¹⁵“ನಿಕುಲು ಎನನ್ ಪ್ರೀತಿ ಮಲ್ಪುನಾಕುಲಾಂಡ ಎನ ಅಪ್ಪಣೆನ್ ಕೈಕೊಂದು ನಡಪುವರ್.

¹⁶ಅಪಗ ಯಾನ್ ಅಮ್ಮೆರೆಡ ನಟ್ಟೊನ್ವೆ. ಆಯೆ ನಿಕ್ಲೆಗ್ ನನೊಂಜಿ ಆದರಿಪುನಾಯನ್ ಕೊರ್ದು ಆಯೆ ಏಪೊಗ್ಲಾ ನಿಕ್ಲೆಡೊಪ್ಪ ಉಪ್ಪುಲೆಕ್ಕ ಕೊರ್ಪೆ.

¹⁷ಆ ಆದರಿಪುನಾಯೆ ಏರ್ ಪಂಡ್ಂಡ ಸತ್ಯದ ಆತ್ಮೆನೇ. ಲೋಕದಾಕುಲು ಆಯನ್ ತೂವಂದೆಲಾ ತೆರಿಯಂದೆಲಾ ಉಪ್ಪುನೆಡ್ದ್, ಅಕ್ಲೆಗ್ ತಿಕ್ಕುಜೆ. ನಿಕುಲು ಆಯನ್ ತೆರಿದರ್, ಎಂಚಂದ್ಂಡ ಆಯೆ ನಿಕ್ಲೆಡೊಪ್ಪ ತಡೆದ್‌ ಬೊಕ್ಕ ನಿಕ್ಲೆನ ಉಲಯಿ ಉಪ್ಪುವೆ.

¹⁸“ಯಾನ್ ನಿಕ್ಲೆನ್ ದಿಕ್ಕ್‌ದಾಂತಿನಾಕುಲೆ ಲೆಕ್ಕ ಬುಡ್ಪುಜಿ. ನಿಕ್ಲೆನ ಕೈತಲ್‌ ಬರ್ಪೆ.

¹⁹ನನ ಒಂತೆ ಸಮಯ ಆಯಿ ಬೊಕ್ಕ ಲೋಕ ಎನನ್ ತೂಪುಜಿ, ಆಂಡ ನಿಕುಲು ಎನನ್ ತೂವರ್. ಯಾನ್ ಬದುಕುನೆಡ್ದ್ ನಿಕುಲುಲಾ ಬದುಕುವರ್.

²⁰ಯಾನ್ ಎನ ಅಮ್ಮೆರೆಡ್ ನಿಕುಲು ಎನಡ್ ಬೊಕ್ಕ ಯಾನ್ ನಿಕ್ಲೆಡ್ ಉಪ್ಪುನೆನ್ ನಿಕುಲು ಆ ದಿನೊಟು ತೆರಿವೊನ್ವರ್.

²¹“ಎನ ಅಪ್ಪಣೆನ್ ಪಡೆವೊಂದು ಅವೆನ್ ಕೈಕೊಂದು ನಡಪುನಾಯೆನೇ ಎನನ್ ಪ್ರೀತಿ ಮಲ್ಪುವೆ. ಎನನ್ ಪ್ರೀತಿ ಮಲ್ಪುನಾಯೆ ಎನ ಅಮ್ಮೆರೆಗ್ ಪ್ರೀತಿದಾಯೆ ಆದುಪ್ಪುವೆ. ಯಾನ್ಲಾ ಆಯನ್ ಪ್ರೀತಿ ಮಲ್ತ್‌ದ್, ಆಯಗ್ ತೋಜಿದ್ ಬರ್ಪೆ,” ಅಂದ್‌ದ್ ಪಂಡೆ.

²²ಯೂದೆ, (ಉಂಬೆ ಇಸ್ಕಾರಿಯೋತ ಯೂದೆ ಅತ್ತ್) ಯೇಸುಡ, “ಕರ್ತವಾ, ಈ ಲೋಕೊಗು ನಿನನ್ ತೋಜಾಪಾವಂದೆ ಎಂಕ್ಲೆಗ್ ಮಾತ್ರ ದಾಯೆಗ್ ತೋಜಾಪಾವ?” ಅಂದ್‌ದ್ ಕೇಂಡಿನೆಕ್ಕ್

²³ಯೇಸು ಆಯಡ, “ಏರಾಂಡಲಾ ಎನನ್ ಪ್ರೀತಿ ಮಲ್ಪುವೆಡ ಎನ ಪಾತೆರೊಲೆನ್ ಕೈಕೊಂದು ನಡಪುವೆ. ಆಯನ್ ಎನ ಅಮ್ಮೆ ಪ್ರೀತಿ ಮಲ್ಪುವೆ, ಬೊಕ್ಕ ಎಂಕುಲು ಇರ್ವೆರ್‌ಲಾ ಆಯ ಕೈತಲ್‌ಗ್ ಬತ್ತ್‌ದ್ ಆಯಡೊಪ್ಪ ಬುಡಾರ ಮಲ್ತೊನ್ವ.

²⁴ಎನನ್ ಪ್ರೀತಿ ಮಲ್ಪಂದೆ ಉಪ್ಪುನಾಯೆ ಎನ ಪಾತೆರೊಲೆನ್ ಕೈಕೊನೊಂದು ನಡಪುಜೆ, ನಿಕುಲು ಕೇನುನ ಪಾತೆರೊಲು ಎನ್ನವು ಅತ್ತ್, ಎನನ್ ಕಡಪುಡಿ ಅಮ್ಮೆರೆನವೇ ಆದುಂಡು.

²⁵“ಈ ಪಾತೆರೊಲೆನ್ ಯಾನ್ ನಿಕ್ಲೆನ ಒಟ್ಟುಗು ಉಪ್ಪುನಗನೇ ಪನ್ತೆ.

²⁶ಆಂಡ, ಎನ ಪುದರ್‌ಡ್ ಅಮ್ಮೆ ಕಡಪುಡ್ದು ಕೊರ್ತಿ ಆದರಿಪುನಾಯೆ ಪರಿಶುದ್ಧಾತ್ಮೆನೇ, ನಿಕ್ಲೆಗ್ ಮಾತೆನ್ ಬೋಧನೆ ಮಲ್ತ್‌ದ್, ಯಾನ್ ನಿಕ್ಲೆಗ್ ಪನ್ತಿನೆನ್ ಮಾತೆನ್ಲಾ ನಿಕ್ಲೆನ ನೆನೆಪುಗು ಕನಪೆ.

²⁷“ಸಮಾಧಾನೊನು ನಿಕ್ಲೆಗ್ ಬುಡ್ದು ಪೋಪೆ. ಎನ ಸಮಾಧಾನೊನು ನಿಕ್ಲೆಗ್ ಕೊರ್ಪೆ. ಲೋಕ ಕೊರ್ಪಿ ರೀತಿಡ್ ಯಾನ್ ನಿಕ್ಲೆಗ್ ಕೊರ್ಪುಜಿ. ನಿಕ್ಲೆನ ಉಡಲ್ ತಳಮಳ ಆವಂದೆ ಪೋಡಿಯಂದೆ ಉಪ್ಪಡ್.

²⁸‘ಯಾನ್ ಪೋದು ಕುಡ ನಿಕ್ಲೆನ ಕೈತಲ್‌ ಬರ್ಪೆ.’ ಅಂದ್‌ದ್ ಪನ್ತಿನೆನ್ ನಿಕುಲು ಕೇಂಡ್ದರ್. ನಿಕುಲು ಎನನ್ ಪ್ರೀತಿ ಮಲ್ಪುನಾಕುಲಾಂಡ, ಯಾನ್ ಅಮ್ಮೆರೆ ಕೈತಲ್‌ ಪೋಪಿ ಸಂಗತಿಡ್ ಸಂತೋಷ ಪಡೆತ್ವರ್, ದಾಯೆ ಪಂಡ ಅಮ್ಮೆ ಎನಡ್ದ್ ಮಲ್ಲಾಯೆ.

²⁹ಉಂದು ಮಾತ ಆನಗ ನಿಕುಲು ಎನನ್ ನಂಬೊಡು ಪಂಡ್ದ್, ಮಾತ ಆವೊಡ್ದುಂಬೇ ಯಾನ್ ನಿಕ್ಲೆಗ್ ಪನ್ಪೆ.

³⁰ನನ ಯಾನ್ ನಿಕ್ಲೆಡೊಪ್ಪ ಹೆಚ್ಚ್ ಪಾತೆರುಜಿ, ದಾಯೆ ಪಂಡ ಭೂಲೋಕದ ಅಧಿಪತಿ ಬರ್ಪೆ. ಆಯಗ್ ಸಂಬಂಧ ಪಡೆಯಿನ ದಾಲಾ ಎನಡ ಇಜ್ಜಿ.

³¹ಆಂಡಲಾ ಯಾನ್ ಅಮ್ಮೆರೆನ್ ಪ್ರೀತಿ ಮಲ್ಪುವೆ ಅಂದ್‌ದ್ ಲೋಕೊಗು ತೆರಿದುಪ್ಪೊಡು ಅಂದ್‌ದ್ ಅಮ್ಮೆ ಎಂಕ್ ಕೊರಿ ಅಪ್ಪಣೆಗಾದ್ ಉಂದೆನ್ ಮಲ್ಪುವೆ. ಲಕ್ಕ್‌ಲೆ, ನಮ ಮುಲ್ತುಡ್ದು ಪೋಯಿ.”