Read Tulu ಯೋಹಾನೆ 18 Bible Online

ಯೋಹಾನೆ 18 - Tulu bible

ಯೋಹಾನೆ 18

¹ಯೇಸು ಪ್ರಾರ್ಥನೆ ಮಲ್ತಿ ಬೊಕ್ಕ ತನ ಶಿಷ್ಯೆರೆಡೊಪ್ಪ ಕೆದ್ರೋನ್ ಕೆದುತ ಆಪೆ ಬರಿಕ್ಕ್ ಪೋಯೆ. ಅಲ್ಪ ಒಂಜಿ ತೋಟ ಇತ್ತ್ಂಡ್, ಐತ ಉಲಯಿ ಆಯೆಲಾ ಆಯ ಶಿಷ್ಯೆರ್‌ಲುಲಾ ಪೋಯೆರ್.

²ಯೇಸುಲಾ ಆಯ ಶಿಷ್ಯೆರ್‌ಲಾ ಅಪಗಾಪಗ ಈ ಜಾಗ್‌ಗ್ ಬರೊಂದಿತ್ತಿನೆಡ್ದ್ ಯೇಸುನು ಪತ್ತ್‌ದ್ ಕೊರ್ಪಿ ಯೂದಗ್ಲಾ ಆ ಜಾಗ್ ಗೊತ್ತಿತ್ತ್ಂಡ್.

³ಇಂಚ ಉಪ್ಪುನಗ ಯೂದೆ ಸಿಪಾಯಿಲೆ ಪಟ್ಲಾಮುಲೆನ್ಲಾ ಪ್ರಧಾನಯಾಜಕೆರೆ ಬೊಕ್ಕ ಪರಿಸಾಯೆರ್ ಕಡಪುಡಿ ಅಧಿಕಾರಿಲೆನ್ಲಾ ಲೆತ್ತೊಂದು ತೂಟೆ, ಕತ್ತಿ ಇಂಚಿನ ಆಯುಧೊಲೆನ್ ಪತ್ತೊಂದು ಅಡೆಗ್ ಬತ್ತೆ.

⁴ಅಪಗ ಯೇಸುಗು ತನ ಮಿತ್ತ್ ಬರ್ಪಿನವು ಮಾತಲಾ ಗೊತ್ತಾದ್, ಪಿದಯಿ ಬತ್ತ್‌ದ್ ನಿಕುಲು, “ಏರೆನ್ ನಾಡೊಂದುಲ್ಲರ್?” ಅಕ್ಲೆಡ ಕೇಂಡೆ.

⁵ಐಕ್ ಅಕುಲು, “ನಜರೇತ್‌ದ ಯೇಸುನು” ಪಂಡೆರ್. ಯೇಸು ಅಕ್ಲೆಡ, “ಯಾನೇ ಆಯೆ” ಪಂಡೆ. ಆಯನ್ ಪತ್ತ್‌ದ್ ಕೊರ್ಪಿ ಯೂದೆಲಾ ಅಕ್ಲೆನೊಟ್ಟುಗು ಉಂತುದಿತ್ತೆ.

⁶ಯೇಸು ಅಕ್ಲೆಡ, “ಯಾನೇ,” ಅಂದ್‌ದ್ ಪನ್ನಗ ಅಕುಲು ಪಿರಜಾರ್ದ್ ನೆಲತ್ತ ಮಿತ್ತ್ ಬೂರ್ಯೆರ್.

⁷ಯೇಸು ಕುಡ ಅಕ್ಲೆಡ, “ಏರೆನ್ ನಾಡೊಂದುಲ್ಲರ್?” ಅಂದ್‌ದ್ ಕೇನ್ನಗ, ಅಕುಲು, “ನಜರೇತ್‌ದ ಯೇಸುನು ನಾಡುವ,” ಪಂಡೆರ್.

⁸ಐಕ್ ಯೇಸು, “ಯಾನ್ ಆಯೆನೇ ಅಂದ್‌ದ್ ನಿಕ್ಲೆಗ್ ಪನ್ಪೆ ಅತ್ತಾ, ನಿಕುಲು ಎನನೇ ನಾಡುನಾಕುಲಾಂಡ ಮೊಕ್ಲೆನ್ ಪೋವೆರೆ ಬುಡ್ಲೆ,” ಪಂಡೆ.

⁹“ಈ ಎಂಕ್ ಕೊರಿನೆಟ್ಟ್ ಒರಿಯನ್ಲಾ ಯಾನ್ ಕಳೆವೊಂಡಿಜಿ,” ಅಂದ್‌ದ್ ಆಯೆ ಪಂಡಿನ ಪಾತೆರ ಪೂರ್ತಿ ಆವೊಡು ಅಂದ್‌ದ್ ಇಂಚ ಕೂಡುದು ಬತ್ತ್ಂಡ್.

¹⁰ಸೀಮೋನು ಪೇತ್ರಡ ಒಂಜಿ ಕತ್ತಿ ಇತ್ತ್ಂಡ್ ಅವೆನ್ ದೆತ್ತೊಂದು ಆಯೆ ಪ್ರಧಾನಯಾಜಕನ ಬೇಲೆದಾಯಗ್ ಹಾಕ್‌ದ್ ಆಯನ ಬಲತ್ತ ಕೆಬಿನ್ ಕಡ್ತೆ. ಆ ಬೇಲೆದಾಯನ ಪುದರ್ ಮಲ್ಕೆ.

¹¹ಅಪಗ ಯೇಸು ಪೇತ್ರಗ್, “ಕತ್ತಿನ್ ಬರಿಕ್ಕ್ ಪಾಡ್ಲ. ಅಮ್ಮೆ ಎಂಕ್ ಕೊರ್ತಿನ ಪಾತ್ರೆಡ್‌ ಯಾನ್ ಪರಿಯೆರೆ ಬಲ್ಲಿಯಾ?” ಅಂದ್‌ದ್ ಕೇಂಡೆ.

¹²ಐಡ್ದ್ ಬೊಕ್ಕ ಸಿಪಾಯಿಲೆ ಪಟ್ಲಾಮುಲಾ ಸಹಸ್ರಾಧಿಪತಿಲಾ ಯೆಹೂದ್ಯೆರೆ ಚಾಕ್ರಿದಾಕುಲುಲಾ ಯೇಸುನು ಪತ್ತ್‌ದ್ ಕಟ್ಟಿಯೆರ್.

¹³ಸುರುಟ್ಟು ಅನ್ನ ಕೈತಲ್‌ ಪೋಯೆರ್. ಅನ್ನೆ ಆ ವರ್ಸೊಡು ಪ್ರಧಾನಯಾಜಕೆ ಆಯಿ ಕಾಯಫನ ತಮ್ಮಲೆ ಆದಿತ್ತೆ.

¹⁴ಒರಿ ನರಮಾನಿ ಜನೊಕುಲೆಗಾದ್ ಸೈಪಿನವು ಎಡ್ಡೆಂದ್‌ದ್ ಯೆಹೂದ್ಯೆರೆಗ್ ಆಲೋಚನೆ ಕೊರ್ತಿನಾಯೆ ಆ ಕಾಯಫೆನೇ.

¹⁵ಸೀಮೋನು ಪೇತ್ರೆಲಾ ಬೊಕ್ಕೊರಿ ಶಿಷ್ಯೆಲಾ ಯೇಸುನ ಬೆರಿಯೆ ಪೋಯೆರ್. ಆ ಶಿಷ್ಯಗ್ ಪ್ರಧಾನಯಾಜಕನ ಗುರ್ತ ಇತ್ತಿನೆಡ್ದ್ ಯೇಸುಡೊಪ್ಪ ಪ್ರಧಾನಯಾಜಕನ ಜಾಲ್‌ಗ್ ಪೋಯೆ.

¹⁶ಪೇತ್ರೆ ಪಿದಯಿ ಬಾಕಿಲ್‌ದ ಕೈತಲ್ ಉಂತುದಿತ್ತಿನೆಡ್ದ್ ಪ್ರಧಾನಯಾಜಕನ ಗುರ್ತ ಇತ್ತಿ ಶಿಷ್ಯೆ ಪಿದಯಿ ಬತ್ತ್‌ದ್ ಬಾಕಿಲ್ ಕಾಪುನ ಚಾಕ್ರಿದಲೆಡ ಪಾತೆರ್‌ದ್ ಪೇತ್ರನ್ ಉಲಯಿ ಲೆತ್ತೊಂದು ಪೋಯೆ.

¹⁷ಅಪಗ ಬಾಕಿಲ್ ಕಾಪುನ ಚಾಕ್ರಿದಾಲ್, “ಈಲಾ ಯೇಸುನ ಶಿಷ್ಯೆರೆಡ್ ಒರಿ ಅತ್ತಾ?” ಅಂದ್‌ದ್ ಪೇತ್ರಡ ಕೇಂಡಿನೆಕ್ಕ್ ಆಯೆ, “ಯಾನ್ ಅತ್ತ್,” ಪಂಡೆ.

¹⁸ಅಪಗ ಚಳಿ ಇತ್ತಿನೆಡ್ದ್ ಚಾಕ್ರಿದಾಕುಲುಲಾ ಸಿಪಾಯಿಲುಲಾ ಕನಕ್‌ಡ್ ತೂ ಮಲ್ತ್‌ದ್ ಚಳಿ ಕಾಯ್ತೊಂದು ಉಪ್ಪುನಗ, ಪೇತ್ರೆಲಾ ಅಕ್ಲೆಡೊಪ್ಪ ಇತ್ತ್‌ದ್ ಚಳಿ ಕೈತೊಂದಿತ್ತೆ.

¹⁹ಅಪಗ ಪ್ರಧಾನಯಾಜಕೆ ಯೇಸುಡ ಆಯನ ಶಿಷ್ಯೆರೆ ಸಂಗತಿಡ್ಲಾ ಆಯ ಬೋಧನೆದ ಸಂಗತಿಡ್ಲಾ ಪ್ರಶ್ನೆ ಮಲ್ತೆ.

²⁰ಐಕ್ ಯೇಸು, “ಯಾನ್ ಲೋಕದ ಜನೊಕುಲೆ ಎದುರುಡು ಪಾತೆರ್‌ದೆ. ಮಾತ ಯೆಹೂದ್ಯೆರ್ ಸೇರು ಜಾಗ್ ಆಯಿ ಸಭಾಮಂದಿರೊಲೆಡ್ಲಾ ದೇವಾಲಯೊಲೆಡ್ಲಾ ಏಪಲಾ ಬೋಧನೆ ಮಲ್ತೊಂದೇ ಬೈದೆ. ಮದೆಟ್ ಒವೆನ್ಲಾ ಪಾತೆರ್‌ದಿಜಿ.

²¹ಎನನ್ ದಾಯೆ ಪ್ರಶ್ನೆ ಮಲ್ಪುವ? ಯಾನ್ ಪಾತೆರಿದಿನೆನ್ ಕೇಂಡಿನಾಕುಲೆಡ ವಿಚಾರ ಮಲ್ಪುಲ, ಯಾನ್ ಪಂತಿನವು ಮಾತ ಅಕ್ಲೆಗ್ ಗೊತ್ತುಂಡತ್ತಾ?” ಪಂಡೆ.

²²ಯೇಸು ಈ ಪಾತೆರೊನು ಪನ್ನಗ ಕೈತಲ್‌ ಉಂತುದಿತ್ತಿ ಅಧಿಕಾರಿಲೆಡ್ ಒರಿ ಆಯ ಕೆಪ್ಪೆಗ್ ಹಾಕ್‌ದ್, “ಪ್ರಧಾನಯಾಜಕಗ್ ಈ ಇಂಚ ಉತ್ತರ ಕೊರ್ಪನಾ?” ಪಂಡೆ.

²³ಯೇಸು ಆಯಗ್, “ಯಾನ್ ಪಾತೆರ್‌ನೆಟ್ಟ್ ದಾದಾಂಡಲಾ ದೋಷ ಇತ್ತ್ಂಡ ಆ ದೋಷ ಇಂಚಿತ್ತಿನವು ಅಂದ್‌ದ್ ಸಾಕ್ಷಿ ಪನ್ಲ. ಯಾನ್ ಪಾತೆರುನವು ಸರಿಯಾದ್ ಇತ್ತ್ಂಡ ಎಂಕ್ ದಾಯೆ ಹಾಕುವಾ?” ಅಂದ್‌ದ್ ಕೇಂಡೆ.

²⁴ಅಪಗ ಅನ್ನೆ ಆಯನ್ ಕಟ್ಟ್‌ದ್ ಪ್ರಧಾನಯಾಜಕೆ ಆಯಿ ಕಾಯಫ ಕೈತಲ್‌ ಕಡಪುಡ್ದು ಕೊರಿಯೆ.

²⁵ಇಂಚಿಡ್ದ್ ಸೀಮೋನೆ ಪೇತ್ರೆ ಉಂತೊಂದು ಚಳಿ ಕೈತೊಂದಿತ್ತೆ. ಅಪಗ ಅಲ್ಪ ಇತ್ತಿನಾಕುಲು ಆಯಡ, “ಈ ಯೇಸುನ ಶಿಷ್ಯೆರೆಡ್ ಒರಿ ಅತ್ತಾ?” ಅಂದ್‌ದ್ ಕೇನ್ನಗ, ಆಯೆ “ಯಾನ್ ಅತ್ತ್.” ಅಂದ್‌ದ್ ಆರೆಂಜಿಯೆ.

²⁶ಪ್ರಧಾನಯಾಜಕನ ಬೇಲೆದಾಕುಲೆಡ್, ಪೇತ್ರೆ ಕೆಬಿ ಕತೆರ್ದ್ ಪಾಡ್ದಿನಾಯನ ಸಮ್ಮಂಧದಾಯೆ ಆದಿತ್ತಿ ಒರಿ, “ಯಾನ್ ನಿನನ್ ತೋಟೊಡು ಆಯಡೊಪ್ಪ ಇತ್ತಿನೆನ್ ತೂತೆ ಅತ್ತಾ?” ಪಂಡೆ.

²⁷ಐಕ್ ಪೇತ್ರೆ ಕುಡ, “ಯಾನ್ ಅತ್ತ್,” ಪಂಡೆ. ಅಪಗನೆ ಕೋರಿ ಕಿಲೆತ್ತ್ಂಡ್.

²⁸ಐಡ್ದ್ ಬೊಕ್ಕ ಅಕುಲು ಯೇಸುನು ಕಾಯಫ ಕೈತಲ್‌ಡ್ದ್ ಅರಮನೆಕ್ ಲೆತ್ತೊಂದು ಪೋಯೆರ್. ಅಪಗ ಪುಲ್ಯ ಆದಿತ್ತ್ಂಡ್. ಅಕುಲು ತನ್ಕುಲೆಗ್ ಮೈಲೆ ಆದ್ ಪಸ್ಕದ ವಣಸ್ ಮಲ್ಪರೆ ಅಡ್ಡಿ ಆವು ಅಂದ್‌ದ್ ಅರಮನೆತ್ತ ಉಲಯಿ ಪೋಯಿಜೆರ್.

²⁹ಇಂಚ ಉಪ್ಪುನಗ ಪಿಲಾತೆ ಪಿದಾಯಿ ಅಕ್ಲೆನ ಕೈತಲ್‌ ಬತ್ತ್‌ದ್, “ಈ ನರಮಾನಿನ ಮಿತ್ತ್ ವಾ ದೂರುನು ಕನೈದರ್?” ಅಂದ್‌ದ್ ಕೇಂಡೆ.

³⁰ಅಕುಲು ಪಿಲಾತಗ್, “ಉಂಬೆ ಪಡಿಕೆಂತಿನಾಯೆ ಅತ್ತ್‌ಡ ಎಂಕುಲು ಉಂಬ್ಯನ್ ನಿಕ್ಕ್ ಒಪ್ಪಿಸದ್ವಯ,” ಅಂದ್‌ದ್ ಉತ್ತರ ಕೊರಿಯೆರ್.

³¹ಅಪಗ ಪಿಲಾತೆ ಅಕ್ಲೆಗ್, “ನಿಕುಲೇ ಆಯನ್ ಲೆತ್ತೊಂದು ಪೋದು ನಿಕ್ಲೆನ ನ್ಯಾಯಕಟ್ಟ್‌ದ ಪ್ರಕಾರ ಆಯಗ್ ತೀರ್ಪು ಮಲ್ಪುಲೆ,” ಪಂಡೆ. ಐಕ್ ಯೆಹೂದ್ಯೆರ್, “ಮರಣದ ಶಿಕ್ಷೆನ್ ಕೊರ್ಪಿ ಅಧಿಕಾರ ಎಂಕ್ಲೆಗ್ ಇಜ್ಜಿ” ಪಂಡೆರ್.

³²ನೆಡ್ದ್ ಯೇಸು ತಾನ್ ಎಂಚಿತ್ತಿ ಮರಣೊನು ಸೈಯೆರೆ ಉಲ್ಲೆ ಪನ್ಪಿ ಪಾತೆರೊಲು ನಡತ್ಂಡ್.

³³ಅಪಗ ಪಿಲಾತೆ ಕುಡ ಅರಮನೆತ್ತ ಉಲಯಿ ಪೋದು ಯೇಸುನು ಲೆತ್ತ್‌ದ್ ಆಯಡ, “ಈ ಯೆಹೂದ್ಯೆರೆ ಅರಸು ಅಂದಾ?” ಅಂದ್‌ದ್ ಕೇಂಡೆ.

³⁴ಐಕ್ ಯೇಸು, “ನಿನ್ನಾತೆಗೇ, ಈ ಉಂದೆನ್ ಪನೊಂದುಲ್ಲತ್ತಾ? ಬೊಕ್ಕೊರಿ ಎನ ಸಂಗತಿಡ್ ನಿಕ್ಕ್ ದಾಲಾ ಪನ್ತೆರಾ,” ಅಂದ್‌ದ್ ಕೇಂಡೆ.

³⁵ಐಕ್ ಪಿಲಾತೆ, “ಯಾನ್ ದಾನೆ ಯೆಹೂದ್ಯೆನಾ? ನಿನ ಸ್ವಂತ ಜನೊಕುಲುಲಾ ಪ್ರಧಾನಯಾಜಕೆರ್‌ಲುಲಾ ನಿನನ್ ಎಂಕ್ ಒಪ್ಪಿಸಾದೆರ್. ಈ ದಾದ ಮಲ್ತ್‌ದ?” ಅಂದ್‌ದ್ ಕೇಂಡಿನೆಕ್ಕ್

³⁶ಯೇಸು, “ಎನ ರಾಜ್ಯ ಈ ಲೋಕದವು ಅತ್ತ್, ಎನ ರಾಜ್ಯ ಈ ಲೋಕದವು ಆದಿತ್ತ್ಂಡ ಯಾನ್ ಯೆಹೂದ್ಯೆರೆ ಕೈಕ್ ತಿಕ್ಕ್‌ದ್ ಬೂರಂದಿಲೆಕ್ಕ ಎನ ಸೇವಕೆರ್ ಲಡಯಿ ಮಲ್ತ್‌ದ್ವೆರ್. ಆಂಡ ಎನ ರಾಜ್ಯ ಮುಲ್ತವು ಅತ್ತ್,” ಅಂದ್‌ದ್ ಉತ್ತರ ಕೊರಿಯೆ.

³⁷ಐಕ್ ಪಿಲಾತೆ, “ಅಂಚಾಂಡ ಈ ಅರಸು ಅಂದತ್ತಾ?” ಅಂದ್‌ದ್ ಪಂಡೆ. ಅಪಗ ಯೇಸು ಆಯಡ, “ಎನನ್ ಅರಸು ಅಂದ್‌ದ್ ಈಯೆ ಪಂಡ. ಯಾನ್ ಸತ್ಯದ ಸಂಗತಿಡ್ ಸಾಕ್ಷಿ ಕೊರಿಯೆರೆ ಪುಟ್ಟುದಿನಾಯೆ, ಐಕಾದೇ ಈ ಲೋಕೊಗು ಬೈದೆ. ಸತ್ಯೊಗು ಸೇರ್ದಿನಾಕುಲು ಮಾತೆರ್ ಎನ ಪಾತೆರೊಗು ಕೆಬಿ ಕೊರ್ಪೆರ್,” ಅಂದ್‌ದ್ ಉತ್ತರ ಕೊರಿಯೆ.

³⁸ಐಕ್ ಪಿಲಾತೆ, “ಸತ್ಯ ಪಂಡ ದಾದ?” ಅಂದ್‌ದ್ ಕೇಂಡೆ. ಉಂದೆನ್ ಪಂಡ್ದ್ ಪಿಲಾತೆ ಕುಡ ಯೆಹೂದ್ಯೆರೆ ಕೈತಲ್‌ ಬತ್ತ್‌ದ್, “ಎಂಕ್ ಆಯಡ ವಾ ಅಪರಾಧಲಾ ತೋಜಿದ್ ಬರ್ಪುಜಿ.

³⁹ಆಂಡ ಪಸ್ಕ ಪರ್ಬೊಡು ಯಾನ್ ಒರಿಯನ್ ನಿಕ್ಲೆಗ್ ಬುಡ್ದು ಕೊರ್ಪಿ ಕ್ರಮ ಉಂಡತ್ತಾ, ಯಾನ್ ಯೆಹೂದ್ಯೆರೆ ಅರಸುನು ಬುಡ್ದು ಕೊರ್ಪಿನವು ನಿಕ್ಲೆಗ್ ಇಷ್ಟನಾ?” ಅಂದ್‌ದ್ ಅಕ್ಲೆಡ ಕೇಂಡೆ.

⁴⁰ಐಕ್ ಅಕುಲು, “ಯೇಸುನು ಬೊಡ್ಚಿ, ಬರಬ್ಬನ್ ಬುಡ್ದು ಕೊರೊಡು!” ಅಂದ್‌ದ್ ಕುಡೊರ ಅರಬಾಯಿ ದೀದ್ ಪಂಡೆರ್. ಆ ಬರಬ್ಬೆ ಒರಿ ಕಲ್ವೆ ಆದಿತ್ತೆ.