Read Tulu ಯೋಹಾನೆ 3 Bible Online

ಯೋಹಾನೆ 3 - Tulu bible

ಯೋಹಾನೆ 3

¹ಪರಿಸಾಯೆರೆಡ್ ಯೆಹೂದ್ಯೆರೆ ಹಿರಿಸಭೆತ ಒರಿ ಅಧಿಕಾರಿ ನಿಕೋದೇಮು ಪನ್ಪಿನಾಯೆ ಇತ್ತೆ.

²ಆಯೆ ರಾತ್ರೆಡ್ ಯೇಸುನ ಕೈತಲ್‌ ಬತ್ತ್‌ದ್ ಆಯಡ, “ಗುರುಕುಲೇ, ಈ ದೇವೆರೆ ಕಡೆಡ್ದ್ ಬೈದಿನ ಬೋಧಕೆ ಅಂದ್‌ದ್ ತೆರಿದುಲ್ಲ. ಈ ಮಲ್ತ್‌ದ್ ತೋಜಾವುನ ಕಾರ್ನಿಕೆದ ಕಾರ್ಯೊಲೆನ್ ದೇವೆರೆ ಸಹಾಯದಾಂತೆ ಏರೆಡ್ದ್‌ಲಾ ಮಲ್ಪೆರೆ ಆವಂದ್.” ಅಂದ್‌ದ್ ಪಂಡೆ.

³ಐಕ್ ಯೇಸು, “ಯಾನ್ ನಿಕ್ಕ್ ನಿಜಾದ್ ಪನ್ಪೆ, ಒರಿ ಪೊಸತ್ತಾದ್ ಪುಟ್ಟುಜೆಡ ಆಯೆ ದೇವೆರೆ ರಾಜ್ಯೊನು ತೂಪಿನೆ ಇಜ್ಜಿ.” ಅಂದ್‌ದ್ ಪಂಡೆ.

⁴ನಿಕೋದೇಮು ಆಯಡ, “ನರಮಾನಿ ಪರಬೆ ಆಯಿ ಬೊಕ್ಕ ಪೊಸತ್ತಾದ್ ಪುಟ್ಟುನವು ಎಂಚ? ಆಯೆ ತನ ಅಪ್ಪೆ ಬಂಜಿಡ್ ಸೇರ್ದ್ ಕುಡೊರ ಪುಟ್ಯರೆ ಸಾದ್ಯನಾ?” ಅಂದ್‌ದ್ ಕೇಂಡೆ.

⁵ಐಕ್ ಯೇಸು, “ಯಾನ್ ನಿಕ್ಕ್ ನಿಜಾದ್ ಪನ್ಪೆ, ಒರಿ ನೀರ್‌ಡ್ದ್‌ಲಾ ಆತ್ಮೊಡ್ದುಲಾ ಪುಟ್ಟುಜೆಡ ದೇವೆರೆ ರಾಜ್ಯೊಗು ಸೇರಯೆ.

⁶ಶರೀರೊಡ್ದು ಪುಟ್ಟಿನವು ಶರೀರನೇ, ಆತ್ಮೊಡ್ದು ಪುಟ್ಟಿನವು ಆತ್ಮನೇ.

⁷‘ನಿಕುಲು ಪೊಸತ್ತಾದ್ ಕುಡ ಪುಟ್ಟೊಡು,’ ಅಂದ್‌ದ್ ಯಾನ್ ನಿಕ್ಕ್ ಪಂಡಿನೆಡ್ದ್ ಅಚ್ಚಿರ ಪಡೆವೊಡ್ಚಿ.

⁸ಗಾಳಿ ಮನಸ್ ಬತ್ತಿನಡೆ ಬೀಜುಂಡು, ಈ ಐತ ಶಬ್ಧೊನು ಕೇನ್ವ. ಆಂಡ ಅವು ಒಲ್ತು ಬರ್ಪುಂಡು ಒಡೆಗ್ ಪೋಪುಂಡು ನಿಕ್ಕ್ ತೆರಿಯಂದ್; ಅಂಚೆನೇ ಆತ್ಮಡ್ದ್ ಪುಟ್ಟಿನಾಯೆ ಐತ ಲೆಕ್ಕನೇ,” ಅಂದ್‌ದ್ ಪಂಡೆ.

⁹ಐಕ್ ನಿಕೋದೇಮು, “ಉಂದು ಆಪಿನಿ ಎಂಚ?” ಅಂದ್‌ದ್ ಕೇನ್ನಗ,

¹⁰ಯೇಸು ಆಯಗ್ ಪಂಡಿನಿ ದಾನೆಂದ್ಂಡ, “ಈ ಇಸ್ರಾಯೇಲ್ಯೆರೆ ಬೋಧಕೆ ಆದ್‌ಲಾ ನಿಕ್ಕ್ ಉಂದು ತೆರಿದಿಜಾ?

¹¹ಯಾನ್ ನಿಕ್ಕ್ ಸತ್ಯಾದ್ ಪನ್ಪೆ, ಎಂಕುಲು ತೆರಿದಿನೆನ್ ಪಾತೆರ್‌ವ. ತೂಯಿನೆಕ್ಕ್ ಸಾಕ್ಷಿ ಕೊರ್ಪ, ನಿಕುಲು ಎಂಕ್ಲೆನ ಸಾಕ್ಷಿನ್ ನಂಬುಜರ್.

¹²ಯಾನ್ ಭೂಲೋಕೊಡು ನಡಪು ಕಾರ್ಯೊಲೆ ಬಗೆಟ್ ನಿಕ್ಲೆಗ್ ಪನ್ನಗ ನಿಕುಲು ನಂಬಂದೆ ಪೋಂಡ ಪರಲೋಕದ ಕಾರ್ಯೊಲೆ ಬಗೆಟ್ ನಿಕ್ಲೆಗ್ ಪಂಡ್ಂಡ ಎಂಚ ನಂಬರ್?

¹³ಪರಲೋಕೊಡ್ದು ಜತ್ತ್‌ದ್ ಬತ್ತಿನಾಯೆನೇ ಅಂದ್ಂಡ ನರಮಾನಿ ಮಗೆನೇ ಅತ್ತಂದೆ ಬೇತೆ ಏರ್ಲಾ ಪರಲೋಕೊಗು ಪೋತಿನಾಯೆ ಇಜ್ಜೆ.”

¹⁴“ಉಂದತ್ತಂದೆ ಜನೊಕುಲು ತೂದು ಬದ್‌ಕ್‌ದ್ ಒರಿಯೊಡು ಅಂದ್‌ದ್ ಕಾಡ್‌ಡ್ ಪ್ರವಾದಿ ಆಯಿ ಮೋಶೆ ಸರ್ಪೊನು ಎತ್ತರೊಡು ದೀತಿ ಲೆಕ್ಕನೇ.

¹⁵ನರಮಾನಿ ಮಗನ್ಲಾ ನಂಬುನಾಕುಲೆಗ್ ಮಾತೆರೆಗ್ಲಾ ನಿತ್ಯಜೀವ ಪಡೆವೊಡು ಅಂದ್‌ದ್ ಎತ್ತರೊಡು ದೀಪಾವೊಡು.

¹⁶ದೇವೆರ್ ಲೋಕದ ಮಿತ್ತ್ ಏತೋ ಪ್ರೀತಿ ದೀದ್ ತನ ಒರಿಯೇ ಮಗನ್ ಕೊರಿಯೆ, ಆಯನ್ ನಂಬುನ ಒರಿಲಾ ನಾಶ ಆವಂದೆ ಮಾತೆರ್ಲಾ ನಿತ್ಯಜೀವೊನು ಪಡೆಯೊಡು ಅಂದ್‌ದ್ ಆಯನ್ ಕೊರಿಯೆ.

¹⁷ದೇವೆರ್ ತನ ಮಗನ್ ಲೋಕೊಗು ಕಡಪುಡ್ದಿನವು ಲೋಕೊನು ತೀರ್ಪು ಮಲ್ಪೆರೆ ಅತ್ತ್, ಆಂಡ ಮಗಡ್ದ್ ಲೋಕೊನು ರಕ್ಷಣೆ ಮಲ್ಪೆರೆ ಕಡಪುಡಿಯೆ.

¹⁸“ಆಯನ್ ನಂಬುನಾಯಗ್ ನ್ಯಾಯತೀರ್ಪು ಆಪುಜಿ. ಆಂಡ ನಂಬಂದಿನಾಯಗ್ ದೇವೆರೆ ಒರಿಯೇ ಮಗನ ಪುದರ್‌ನ್ ನಂಬಂದಿನೆಡ್ದ್ ಅಪಗನೇ ನ್ಯಾಯತೀರ್ಪು ಆದ್ ಪೋಂಡು.

¹⁹ಆ ನ್ಯಾಯತೀರ್ಪು ದಾನೆಂದ್ಂಡ, ಬೊಲ್ಪು ಲೋಕೊಗು ಬತ್ತಿತ್ತ್‌ಂಡಲಾ ನರಮಾನಿಲೆ ಬೇಲೆಲು ಹಾಳ್ ಆದುಪ್ಪುನೆಡ್ದ್ ಅಕುಲು ಬೊಲ್ಪುಡ್ದು ಹೆಚ್ಚಿಗೆ ಕತ್ತಲೆನೇ ಪ್ರೀತಿ ಮಲ್ತೆರ್.

²⁰ಹಾಳ್ ಬೇಲೆ ಮಲ್ಪುನಾಕುಲು ಬೊಲ್ಪುನು ಪಗೆ ಮಲ್ಪುವೆರ್, ಅಕುಲು ಬೊಲ್ಪುಗು ಬರ್ಪುಜೆರ್ ದಾಯೆಗಂದ್ಂಡ ಅಕ್ಲೆನ ಹಾಳ್ ಕೆಲಸೊಲೆನ್ ಬೊಲ್ಪು ತೋಜಾದ್ ಕೊರ್ಪುಂಡು.

²¹ಆಂಡ ಸತ್ಯದ ಬೆರಿಯೆ ಪೋಪಿನಾಯೆ ತಾನ್ ದೇವೆರೆಡ್ದ್ ನಡಪಾವೊಂದು ತನ ಕಾರ್ಯೊಲೆನ್ ಮಲ್ತೆ ಪಂಡ್ದ್ ತೋಜಿದ್ ಬರ್ಪಿಲೆಕ್ಕ ಬೊಲ್ಪುಗು ಬರ್ಪೆ.”

²²ಐಡ್ದ್ ಬೊಕ್ಕ ಯೇಸು ತನ ಶಿಷ್ಯೆರೆ ಒಟ್ಟುಗು ಯೂದಾಯ ಸೀಮೆಗ್ ಪೋದು ಅಲ್ಪ ಅಕ್ಲೆಡೊಪ್ಪ ಇತ್ತ್‌ದ್ ನೀರ್‌ದ ದೀಕ್ಷಾಸ್ನಾನ ಮಲ್ಪಾವೊಂದಿತ್ತೆ.

²³ಯೋಹಾನೆಲಾ ಸಲಿಮೂರುದ ಕೈತಲುಪ್ಪು ಐನೊನು ಪನ್ಪಿ ಜಾಗ್‌ಡಿತ್ತ್‌ದ್ ದೀಕ್ಷಾಸ್ನಾನ ಮಲ್ಪಾವೊಂದಿತ್ತೆ. ಅಲ್ಪ ದಿಂಜ ನೀರಿತ್ತ್‌ಂಡ್, ಜನೊಕುಲು ಬತ್ತ್‌ದ್ ದೀಕ್ಷಾಸ್ನಾನ ದೆತ್ತೊನೊಂದಿತ್ತೆರ್.

²⁴ಉಂದು ಆಯಿನಿ ಯೋಹಾನನ್ ಸೆರೆಮನೆಕ್ ಪಾಡುನೆಡ್ದ್ ದುಂಬು.

²⁵ಇಂಚ ಉಪ್ಪುನಗ ಯೋಹಾನನ ಶಿಷ್ಯೆರೆಡ್ ಕೆಲೆವೆರೆಗ್ ಯೆಹೂದ್ಯೆರೆಡೊಪ್ಪ ಶುದ್ಧಾಚಾರದ ಸಂಗತಿಡ್ ಚರ್ಚೆ ನಡತ್ಂಡ್.

²⁶ಅಪಗ ಅಕುಲು ಯೋಹಾನನ ಕೈತಲ್‌ ಬತ್ತ್‌ದ್ ಆಯಡ, “ಗುರುಕುಲೇ, ಯೊರ್ದಾನ್ ತುದೆತ ಆಯೆರೆಡ್ ನಿನಡೊಪ್ಪ ಇತ್ತಿನಾಯನ ಸಂಗತಿಡ್ ಈ ಸಾಕ್ಷಿ ಕೊರಿಯತ್ತಾ, ಆಯೆಲಾ ನೀರ್‌ದ ದೀಕ್ಷಾಸ್ನಾನ ಕೊರ್ಪೆ ಆಯನ ಕೈತಲ್‌ ಮಾತೆರ್ಲಾ ಪೋವೊಂದುಲ್ಲೆರ್!” ಅಂದ್‌ದ್ ಪನ್ನಗ

²⁷ಯೋಹಾನೆ, “ದೇವೆರ್ ಪರಲೋಕೊಡ್ದು ದಯ ಮಲ್ತ್ ಕೊರ್ಪಿನವು ಅತ್ತಂದೆ ನರಮಾನಿಗ್ ಹೆಚ್ಚಿಗೆದವು ದಾಲಾ ತಿಕ್ಕಂದ್.

²⁸‘ಯಾನ್ ಕ್ರಿಸ್ತೆ ಅತ್ತ್. ಆಯನ ದುಂಬುಡ್ದು ಕಡಪುಡ್ದಿನಾಯೆ ಆದುಲ್ಲೆ,’ ಅಂದ್‌ದ್ ಯಾನ್ ಪಂಡಿನೆಕ್ಕ್ ನಿಕುಲೇ ಸಾಕ್ಷಿ.

²⁹ಮದ್ಮಲ್ ಉಪ್ಪುನಾಯೆನೇ ಮದ್ಮಯೆ. ಆಂಡಲಾ ಮದ್ಮಯನ ಸ್ನೇಹಿತೆ ಆಯ ಕೈತಲ್‌ ಉಂತೊಂದು ಆಯನ ಪಾತೆರೊಲೆನ್ ಕೇಂಡ್ದ್ ಮದ್ಮಯನ ಸ್ವರೊಕ್ಕು ಸಂತೋಷ ಪಡೆಪೆ ಅತ್ತಾ. ನೆತ್ತ ಲೆಕ್ಕನೆ ಎಂಕುಪ್ಪು ಸಂತೋಷ ಪೂರ್ತಿ ಆಂಡ್.

³⁰ಆಯೆ ಹೆಚ್ಚಾವೊಡು, ಯಾನ್ ತಗ್ಗೊಡು,” ಅಂದ್‌ದ್ ಪಂಡೆ.

³¹“ಮಿತ್ತ್‌ಡ್ದ್ ಬರ್ಪಿನಾಯೆ ಮಾತೆರೆ ಮಿತ್ತ್ ಉಲ್ಲೆ, ಭೂಲೋಕೊಡು ಪುಟ್ಟಿನಾಯೆ ಭೂಲೋಕದಾಯೆ ಆದಿತ್ತ್‌ದ್ ಭೂಲೋಕದ ಪಾತೆರೊಲೆನ್ ಪಾತೆರ್‌ವೆ, ಪರಲೋಕೊಡ್ದು ಬರ್ಪಿನಾಯೆ ಮಾತೆರೆಡ್ದ್ ಮಿತ್ತ್‌ದಾಯೆ.

³²ತಾನ್ ತೂದು ಕೇಂಡಿನೆಕ್ಕ್ ಸಾಕ್ಷಿ ಕೊರ್ಪೆ. ಆಂಡ ಆಯನ ಸಾಕ್ಷಿನ್ ಏರ್ಲಾ ನಂಬಿಜೆರ್.

³³ಆಯ ಸಾಕ್ಷಿನ್ ನಂಬಿನಾಯೆ ದೇವೆರ್ ಸತ್ಯವಂತೆ ಪನ್ಪಿ ಪಾತೆರೊನು ಮುದ್ರೆ ಒತ್ತುದಿನಾಯೆ ಆದುಲ್ಲೆ.

³⁴ಎಂಚಂದ್ಂಡ ದೇವೆರ್ ಏರೆನ್ ಕಡಪುಡುದೆನಾ ಆಯಗ್ ಧಾರಾಳಾದ್ ಆತ್ಮೊನು ಕೊರ್ತಿನೆಡ್ದ್ ಆಯೆ ದೇವೆರೆ ಪಾತೆರೊಲೆನೇ ಪಾತೆರ್‌ವೆ.

³⁵ಅಮ್ಮೆ ಆದುಪ್ಪು ದೇವೆರ್ ತನ ಮಗನ್ ಪ್ರೀತಿ ಮಲ್ತ್‌ದ್ ಮಾತೆನ್ ಆಯ ಕೈಟ್ ಕೊರ್ತೆ.

³⁶ಆಯನ ಮಗನ್ ನಂಬುನಾಯಗ್ ನಿತ್ಯಜೀವ ಉಂಡು ಆಯನ್ ನಂಬಂದಿನಾಯೆ ನಿತ್ಯಜೀವೊನು ತೂಪಿನೆ ಇಜ್ಜಿ. ದೇವೆರೆ ಕೋಪ ಆಯನ ಮಿತ್ತ್ ನಿಲೆ ಆದುಂಡು.”