Read Tulu ಯೋಹಾನೆ 4 Bible Online

ಯೋಹಾನೆ 4 - Tulu bible

ಯೋಹಾನೆ 4

¹ಯೇಸು ಯೋಹಾನಡ್ದ್ ಹೆಚ್ಚ್ ಶಿಷ್ಯೆರೆನ್ ಮಲ್ತೊಂದು ಅಕ್ಲೆಗ್ ದೀಕ್ಷಾಸ್ನಾನ ಮಲ್ಪಾವೊಂದುಲ್ಲೆ ಪನ್ಪಿ ಸುದ್ಧಿನ್ ಪರಿಸಾಯೆರ್ ಕೇಂಡ್ದೆರ್ ಅಂದ್‌ದ್ ಕರ್ತವಗ್ ತೆರಿನಗ

²ಆಯೆ ಯೂದಾಯೊನು ಬುಡ್ದು ಗಲಿಲಾಯೊಗು ಕುಡ ಪೋಯೆ. ಆಂಡಲಾ ಅಲ್ಪ ದೀಕ್ಷಾಸ್ನಾನ ಮಲ್ತೊಂದಿತ್ತಿನಿ ಯೇಸು ಅತ್ತ್. ಆಯನ ಶಿಷ್ಯೆರೇ ಮಲ್ತೊಂದಿತ್ತೆರ್.

⁴ಆಯೆ ಸಮಾರ್ಯೊನು ಕಡತ್‌ದ್ ಪೋವೊಡಾಂಡ್.

⁵ಪೋನಗ ಸಮಾರ್ಯ ಸೀಮೆಡಿತ್ತಿ ಸುಖರ್ ಪನ್ಪಿ ಊರುಗು ಬತ್ತೆ. ಅವು ಯಾಕೋಬು ತನ ಮಗೆ ಆಯಿ ಯೋಸೇಫುಗು ಕೊರ್ತಿನ ಜಾಗ್‌ದ ಕೈತಲಿತ್ತ್‌ಂಡ್.

⁶ಅಲ್ಪ ಯಾಕೋಬು ತೋಡಾದಿ ಒಂಜಿ ಗುವೆಲಿತ್ತ್‌ಂಡ್. ಯೇಸು ಸಾದಿಡ್ ನಡತ್‌ದ್ ಸೋತು ಪೋದು ಆ ಗುವೆಲ್ದ ಬರಿಟ್ಟ್ ಕುಲ್ಲೊಂಡೆ. ಹೆಚ್ಚಿಕಡಿಮೆ ಮಧ್ಯಾಹ್ನ ಆದಿತ್ತ್ಂಡ್.

⁷ಆಯನ ಶಿಷ್ಯೆರ್ ವಣಸ್‌ಗ್ ಬೋಡಾಯಿನೆನ್ ದೆತ್ತೊಂದು ಕನವೆರೆ ಊರುದ ಉಲಯಿ ಪೋದುಪ್ಪುನಗ ಸಮಾರ್ಯದ ಒಂಜಿ ಪೊಂಜೊವು ಆ ಗುವೆಲ್ದ ನೀರ್ ಒಯ್ಪೆರೆ ಬತ್ತಲ್. ಯೇಸು ಆಲೆಡ, “ಅಮ್ಮಾ, ಎಂಕ್ ಪರಿಯೆರೆ ನೀರ್ ಕೊರ್ಲ,” ಅಂದ್‌ದ್ ಕೇಂಡೆ.

⁸

⁹ಯೆಹೂದ್ಯೆರೆಗ್ಲಾ ಸಮಾರ್ಯದಾಕುಲೆಗ್ಲಾ ಹೊಕ್ಕು ಬಳಿಕೆದಾಂತಿನೆಡ್ದ್ ಆ ಸಮಾರ್ಯದಾಲ್ ಯೇಸುಡ, “ಯೆಹೂದ್ಯೆ ಆದುಪ್ಪು ಈ, ಸಮಾರ್ಯದಾಲಾಯಿ ಎನಡ ಪರಿಯೆರೆ ನೀರ್ ಎಂಚ ಕೇನ್ವ,” ಅಂದ್‌ದ್ ಪಂಡಲ್.

¹⁰ಐಕ್ ಯೇಸು, “ದೇವೆರ್ ಕೊರ್ಪಿನ ಉಡಿಗೆರೆ ದಾದ ಅಂದ್‌ದ್‌ಲಾ ನಿನಡ ಪರಿಯೆರೆ ನೀರ್ ಕೊರು ಅಂದ್‌ದ್ ಕೇಂಡಿನಾಯೆ ಏರಂದ್‌ದ್‌ಲಾ ನಿಕ್ಕ್ ತೆರಿದಿತ್ತ್‌ಂಡ ಆಯಡ ಈ ನಟ್ಟೊಂದ್ವ. ಆಯೆ ನಿಕ್ಕ್ ಜೀವದ ನೀರ್‌ನ್ ಕೊರ್ತ್ವೆ,” ಅಂದ್‌ದ್ ಪಂಡೆ.

¹¹ಆ ಪೊಂಜೊವು ಆಯಡ, “ಅಯ್ಯಾ, ನೀರ್ ದೆಪ್ಪೆರೆ ನಿನಡ ದಾಲಾ ಇಜ್ಜಿ, ಗುವೆಲ್ ಗುಂಡಿ ಉಂಡು. ಇಂಚ ಉಪ್ಪುನಗ ಆ ಜೀವದ ನೀರ್ ನಿಕ್ಕ್ ಓಲ್ತ್ ಬತ್ತ್ಂಡ್?

¹²ಎಂಕ್ಲೆನ ಹಿರಿಯಾಯೆ ಆಯಿ ಯಾಕೋಬುಡ್ದುಲಾ ಈ ಮಲ್ಲಾಯೆನಾ? ಆಯೆನೇ ಈ ಗುವೆಲ್‌ನ್ ಎಂಕ್ಲೆಗ್ ತೋಡ್ದು ಕೊರ್ತಿನಾಯೆ. ಆಯೆಲಾ ಆಯ ಜೋಕುಲುಲಾ ಕೈಕಂಜಿಲುಲಾ ಉಂದೇ ಗುವೆಲ್ದ ನೀರ್‌ನ್ ಪರಿಯೆರ್,” ಅಂದ್‌ದ್ ಪನ್ನಗ

¹³ಯೇಸು ಆಲೆಡ, “ಈ ನೀರ್‌ನ್ ಪರ್ಪಿನಾಕುಲೆಗ್ ಮಾತೆರೆಗ್ಲಾ ಕುಡ ಬಾಜೆಲ್ ಆವು.

¹⁴ಆಂಡ ಯಾನ್ ಕೊರ್ಪಿನ ನೀರ್‌ನ್ ಪರ್ಪಿನಾಕುಲೆಗ್ ಏಪೊಗ್ಲಾ ಬಾಜೆಲ್ ಆವಂದ್‌. ಯಾನ್ ಆಯಗ್ ಕೊರ್ಪಿನ ನೀರ್ ಆಯಡ ಉರ್ಕುನ ವಸರ್ ಆದಿತ್ತ್‌ದ್ ನಿತ್ಯಜೀವೊನು ಉಂಡು ಮಲ್ಪುಂಡು,” ಅಂದ್‌ದ್ ಪಂಡೆ.

¹⁵ಐಕ್ ಆ ಪೊಂಜೊವು, “ಕರ್ತವಾ, ಎಂಕ್ ಆ ನೀರ್‌ನ್ ಕೊರಿಯಡ ನನ ಮಿತ್ತ್ ಏಪೊಗ್ಲಾ ಎಂಕ್ ಬಾಜೆಲ್ ಆವಂದ್; ನೀರ್ ಒಯ್ಪರೆ ಈತ್ ದೂರ ಬರೊಡು ಪಂಡ್ದ್‌ಲಾ ಇಜ್ಜಿ,” ಅಂದ್‌ದ್ ಪಂಡಲ್.

¹⁶ಐಕ್ ಯೇಸು ಆಲೆಡ, “ಪೋದು. ನಿನ ಕಂಡನಿನ್ ಇಡೆಗ್ ಲೆತ್ತೊಂದು ಬಲ,” ಪಂಡೆ.

¹⁷ಐಕ್ ಆ ಪೊಂಜೊವು, “ಎಂಕ್ ಕಂಡನಿ ಇಜ್ಜೆ,” ಅಂದಲ್. ಯೇಸು ಆಲೆಡ, “ಎಂಕ್ ಕಂಡನಿ ಇಜ್ಜಿ ಅಂದ್‌ದ್ ಈ ಪಂಡಿನವು ಸರಿಯಾಯಿನ ಪಾತೆರ.

¹⁸ನಿಕ್ಕ್ ಐನ್ ಜನ ಕಂಡನಿಯಾಡ್ಲು ಇತ್ತೆರ್. ಇತ್ತೆ ಉಪ್ಪುನಾಯೆ, ನಿನ ಕಂಡನಿ ಅತ್ತ್, ಈ ಪಂಡಿನವು ನಿಜವಾಯಿನ ಸಂಗತಿ,” ಅಂದ್‌ದ್ ಪಂಡೆ.

¹⁹ಆ ಪೊಂಜೊವು ಆಯಡ, “ಕರ್ತವಾ, ಈ ಪ್ರವಾದಿ ಅಂದ್‌ದ್ ಎಂಕ್ ತೋಜುಂಡು.

²⁰ಎಂಕ್ಲೆನ ಹಿರಿಯಾಕುಲು ಈ ಗುಡ್ಡೆಡ್ ದೇವಾರಾಧನೆ ಮಲ್ತೊಂದಿತ್ತೆರ್. ಆಂಡ ನಿಕುಲು ಆರಾಧನೆ ಮಲ್ಪು ಜಾಗ್ ಯೆರೂಸಲೇಮು ಅಂದ್‌ದ್ ಪನ್ಪರ್.”

²¹ಅಪಗ ಯೇಸು ಆಲೆಡ, “ಅಮ್ಮಾ, ಯಾನ್ ಪನ್ಪಿ ಪಾತೆರೊನು ನಂಬು, ಒಂಜಿ ಕಾಲ ಬರ್ಪುಂಡು, ಆ ಕಾಲೊಡು ನಿಕುಲು ಅಮ್ಮೆರೆ ಆರಾಧನೆ ಮಲ್ಪೊಡಾಂಡ ಈ ಗುಡ್ಡೆಗ್ಲಾ ಪೋಪುಜರ್, ಯೆರೂಸಲೇಮುಗ್ಲಾ ಪೋಪುಜರ್.

²²ಬರೊಡಾಯಿ ರಕ್ಷಣೆ ಯೆಹೂದ್ಯೆರೆಡ್ದ್ ಬರ್ಪುಂಡು. ಅವೆಡ್ದಾವರ ಎಂಕುಲು ತೆರಿದಿನೆನೇ ಆರಾಧನೆ ಮಲ್ಪುನಾಕುಲಾದುಲ್ಲ. ನಿಕುಲು ತೆರಿಯಂದೆ ಉಪ್ಪುನೆನ್ ಆರಾಧನೆ ಮಲ್ಪುನಾಕುಲು.

²³ಐಡ್ದ್ ಹೆಚ್ಚಾದ್, ಸತ್ಯಭಾವೊಡು ಆರಾಧನೆ ಮಲ್ಪುನಾಕುಲು ಆತ್ಮದ ರೀತಿಡ್ ಸತ್ಯೊಗು ತಕ್ಕಂತಿ ದೇವಾರಾಧನೆ ಮಲ್ಪು ಕಾಲ ಬರ್ಪುಂಡು, ಅವು ಇತ್ತೆನೇ ಬೈದ್‌ಂಡ್. ದೇವಾರಾಧನೆ ಮಲ್ಪುನಾಕುಲು ಇಂಚಿತ್ತಿನಕುಲೇ ಆದುಪ್ಪೊಡು ಅಂದ್‌ದ್ ಬಯಕುವೆ ಅತ್ತಾ

²⁴ದೇವೆರ್ ಆತ್ಮಸ್ವರೂಪಿ, ಆಯನ್ ಆರಾಧನೆ ಮಲ್ಪುನಾಕುಲು ಆತ್ಮದ ರೀತಿಡ್ ಸತ್ಯೊಗು ಸರಿಯಾದ್ ಆರಾಧನೆ ಮಲ್ಪೊಡು,” ಅಂದ್‌ದ್ ಪಂಡೆ.

²⁵ಆ ಪೊಂಜೊವು ಆಯಡ, ಮೆಸ್ಸೀಯೆ (ಪಂಡ ಕ್ರಿಸ್ತೆ) ಬರ್ಪೆ ಅಂದ್‌ದ್ ಗೊತ್ತುಂಡು. ಆಯೆ ಬತ್ತಿ ಬೊಕ್ಕ ಎಂಕ್ಲೆಗ್ ಮಾತೆನ್ ತೆರಿಪಾವೆ ಅಂದ್‌ದ್ ಪನ್ನಗ

²⁶ಯೇಸು ಆಲೆಡ, “ನಿನಡ ಇತ್ತೆ ಪಾತೆರೊಂದುಪ್ಪು ಯಾನೇ ಆ ಮೆಸ್ಸೀಯೆ,” ಅಂದ್‌ದ್ ಪಂಡೆ.

²⁷ಅಪಗ ಆಯ ಶಿಷ್ಯೆರ್ ಬತ್ತ್‌ದ್ ಆಯೆ ಒಂಜಿ ಪೊಂಜೊವು ಒಟ್ಟುಗು ಪಾತೆರುನೆನ್ ತೂದು ಅಚ್ಚಿರ ಪಡೆಯೆರ್. ಆಂಡ ಆಯಡ, “ದಾದ ಬೋಡು? ಆಲೆಡ ದಾಯೆ ಪಾತೆರ್‌ವ?” ಅಂದ್‌ದ್ ಏರ್‌ಲಾ ಕೇಂಡಿಜೆರ್.

²⁸ಅಪಗ ಆ ಪೊಂಜೊವು ತನ ಕೊಡಪಾನೊನು ಅಲ್ಪನೇ ಬುಡ್ದು ಊರುದ ಉಲಯಿ ಪೋದು

²⁹ಜನೊಕುಲೆಡ, “ಅಲ್ಪ ಒರಿ ಉಲ್ಲೆ, ಯಾನ್ ಈತ್‌ನೆಟ್ಟ ಮಲ್ತಿನೆನ್ ಮಾತ ಎಂಕ್ ಪಂಡೆ. ಬತ್ತ್‌ದ್ ಆಯನ್ ತೂಲೆ, ಬರೊಡಾಯಿ ಕ್ರಿಸ್ತೆ ಆಯೆನೇ ಆದುಪ್ಪೊಡು,” ಅಂದ್‌ದ್ ಪನ್ನಗ

³⁰ಅಲ್ತ ಜನೊಕುಲು ಪಿದಾಡ್ದ್ ಯೇಸು ಕೈತಲ್ ಬತ್ತೆರ್.

³¹ಆತಾನಗ ಶಿಷ್ಯೆರ್, “ಗುರೂ, ವಣಸ್ ಮಲ್ಪುಲೆ ಅಂದ್‌ದ್ ಕೇನೊಂಡೆರ್!”

³²ಆಂಡ ಆಯೆ ಅಕ್ಲೆಡ, “ನಿಕ್ಲೆಗ್ ತೆರಿಯಂದಿನ ವಣಸ್ ತಿನರೆ ಎಂಕುಂಡು,” ಅಂದ್‌ದ್ ಪನ್ನಗ,

³³ಶಿಷ್ಯೆರ್, “ಆಯಗ್ ಏರಾಂಡಲಾ ವಣಸ್ ಕೊರಿಯೆರಾ ದಾನ್ನ?” ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್.

³⁴ಯೇಸು ಅಕ್ಲೆಡ, “ಎನನ್ ಕಡಪುಡ್ದಿನಾಯನ ಚಿತ್ತದ ಲೆಕ್ಕ ಮಲ್ತ್‌ದ್ ಮಲ್ಪುನವೇ ಎನ ವಣಸ್.

³⁵‘ಇನಿಡ್ದ್ ನಾಲ್ ತಿಂಗೊಲು ಕರಿನೆ ಸುಗ್ಗಿ ಕೊಯ್ಪಿ ಸಮಯ ಬರ್ಪುಂಡು ಅಂದ್‌ದ್ ಪನ್ಪರತ್ತ.’ ನಿಕುಲು ಕಣ್ಣ್ ದೆರ್ತ್ತ್‌ದ್ ಕಂಡೊಲೆನ್ ತೂಲೆ, ಅವು ಬುಲೆದ್ ಕೊಯ್ಪಿ ಸಮಯ ತಯಾರಾತ್ತ್‌ಂಡ್ ಅಂದ್‌ದ್ ನಿಕ್ಲೆಗ್ ಪನ್ಪೆ.

³⁶ಕೊಯ್ಪಿನಾಯಗ್ ಇತ್ತೆನೇ ಕೂಲಿ ತಿಕ್ಕುಂಡು. ಆಯೆ ನಿತ್ಯಜೀವೊಗು ಬುಲೆನ್ ಕೂಡಾದ್ ದೀಪೆ. ಇಂಚ ಬಿತ್ತುನಾಯಗ್ಲಾ ಕೊಯ್ಪಿನಾಯಗ್ಲಾ ಸಂತೋಷ ಆಪುಂಡು.

³⁷ಒರಿ ಬಿತ್ತುವೆ, ಬೊಕ್ಕೊರಿ ಕೊಯ್ಪೆ ಪನ್ಪಿ ಸತ್ಯ ಗಾದೆದ ಲೆಕ್ಕ ಆಂಡ್.

³⁸ನಿಕುಲು ಬೆನಂದಿ ಬುಲೆನ್ ಕೊಯ್ಯೆರೆಗಾದ್ ಯಾನ್ ನಿಕ್ಲೆನ್ ಕಡಪುಡಿಯೆ. ಬೇತೆಕ್ಲು ಬೆನ್ತೆರ್, ನಿಕುಲು ಅಕ್ಲೆನ ಕಷ್ಟೊಡು ಸೇರ್ದರ್,” ಅಂದ್‌ದ್ ಪಂಡೆ.

³⁹“ಯಾನ್ ಮಲ್ತಿನೆನ್ ಮಾತೆನ್ ಆಯೆ ಎಂಕ್ ತೆರಿಪಾಯೆ.” ಅಂದ್‌ದ್ ಸಾಕ್ಷಿ ಕೊರೊಂದುಪ್ಪು, ಆ ಪೊಂಜೊವುನ ಪಾತೆರೊಡ್ದು ಆ ಊರುದ ಸಮಾರ್ಯೆರ್ ಮಸ್ತ್ ಜನ ಆಯನ್ ನಂಬುನಾಕುಲಾಯೆರ್.

⁴⁰ಅವೆಡ್ದಾವರ ಆ ಸಮಾರ್ಯೆರ್ ಆಯ ಕೈತಲ್‌ ಬತ್ತ್‌ದ್, ಈ ಎಂಕ್ಲೆಡೊಪ್ಪ ಉಪ್ಪುಲ ಅಂದ್‌ದ್ ಆಯಡ ನಟ್ಟೊನ್ನಗ ಆಯೆ ರಡ್ಡ್ ದಿನ ಅಕ್ಲೆಡೊಪ್ಪ ಉಂತಿಯೆ.

⁴¹ಮಸ್ತ್ ಜನ ಆಯನ ಪಾತೆರ ಕೇಂಡ್ದ್ ನಂಬಿಯೆರ್.

⁴²ಆ ಊರುದ ಜನೊಕುಲು ಪೊಂಜೊವುಡ, “ಎಂಕುಲು ಆಯನ್ ನಂಬುನ ಕಾರಣ ಈ ಪಂಡಿನೆಡ್ದ್ ಮಾತ್ರ ಅತ್ತ್, ಎಂಕುಲು ಸ್ವತಃ ಕೆಬಿಟ್ ಕೇಂಡ್ದ್, ಇಂಬೆ ನಿಜಾದ್ ಲೋಕ ರಕ್ಷಕೆ ಆದುಪ್ಪು ಕ್ರಿಸ್ತೆ ಅಂದ್‌ದ್ ತೆರಿಯೊಂದ ಅಂದ್‌ದ್ ಪಂಡೆರ್.”

⁴³ರಡ್ಡ್ ದಿನ ಕರಿಬೊಕ್ಕ ಆಯೆ ಅಲ್ತ್‌ಡ್ದ್ ಪಿದಾಡ್ದ್ ಗಲಿಲಾಯೊಗು ಪೋಯೆ.

⁴⁴ದಾಯೆಗಂದ್ಂಡ, “ಪ್ರವಾದಿಗ್ ಆಯನ ಸ್ವಂತ ಊರುಡು ಮರ್ಯಾದಿ ಇಜ್ಜಿ,” ಅಂದ್‌ದ್ ಯೇಸು ತಾನೇ ಪಂಡೆ.

⁴⁵ಗಲಿಲಾಯದಾಕುಲುಲಾ ಯೆರೂಸಲೇಮುದ ಪರ್ಬೊಗು ಪೋದು ಆಯೆ ಅಲ್ಪ ಮಲ್ತಿನೆನ್ ಮಾತೆನ್ ತೂಯಿನೆಡ್ದ್ ಆಯೆ ಗಲಿಲಾಯೊಗು ಬತ್ತಿನಪಗ ಆಯನ್ ಕುಸಿಟ್ ಸ್ವೀಕಾರ ಮಲ್ತೆರ್.

⁴⁶ಐಡ್ದ್ ಬೊಕ್ಕ ಯೇಸು ನೀರ್‌ನ್ ದ್ರಾಕ್ಷಾರಸ ಮಲ್ತ್‌ದಿ ಗಲಿಲಾಯೊಡುಪ್ಪು ಕಾನಾ ಪನ್ಪಿ ಊರುಗು ಕುಡೊರ ಬತ್ತೆ. ಅಪಗ ಕಪೆರ್ನೌಮುಡುಪ್ಪು ಅರಮನೆದ ಒರಿ ಮುಖ್ಯಸ್ಥನ ಮಗೆ ಸೀಕ್‌ಡಿತ್ತೆ.

⁴⁷ಯೇಸು ಯೂದಾಯೊಡ್ದು ಗಲಿಲಾಯೊಗು ಬತ್ತಿ ಸುದ್ಧಿನ್ ಕೇಂಡ್ದ್ ಆ ಅಧಿಕಾರಿ ತನ ಮಗೆ ಸೈಯೆರೆ ಮುಟ್ಟ ಆದಿತ್ತಿನೆಡ್ದ್ ಯೇಸುನ ಕೈತಲ್‌ ಬತ್ತ್‌ದ್, ಈ ಬತ್ತ್‌ದ್ ಎನ ಮಗನ್ ಗುಣ ಮಲ್ಪೊಡು. ಅಂದ್‌ದ್ ನಟ್ಟೊಂಡೆ.

⁴⁸ಯೇಸು ಆಯಡ, “ನಿಕುಲು ಗುರ್ತೊಲೆನ್ಲಾ ಕಾರ್ನಿಕೊಲೆನ್ಲಾ ತೂಯಿಜರ್ಡ ನಂಬುನೇ ಇಜ್ಜಿ.” ಅಂದ್‌ದ್ ಪಂಡೆ.

⁴⁹ಐಕ್ ಆ ಮುಖ್ಯಸ್ಥೆ, “ಕರ್ತವಾ, ಎನ ಮಗೆ ಸೈಯೊಡ್ದು ದುಂಬು ಈ ಬರೊಡು,” ಅಂದ್‌ದ್ ಪನ್ನಗ,

⁵⁰ಯೇಸು ಆಯಗ್, “ನಿನ ಮಗೆ ಬದುಕುವೆ ಪೋಲ,” ಅಂದ್‌ದ್ ಉತ್ತರ ಕೊರಿಯೆ. ಆ ಮುಖ್ಯಸ್ಥೆ ಯೇಸು ತನ್ಕ್ ಪಂಡಿನ ಪಾತೆರೊನು ನಂಬುದು ಪಿದಾಡ್ದ್ ಪೋಯೆ.

⁵¹ಆಯೆ ಗುಡ್ಡೆ ಜತ್ತ್‌ದ್ ಪೋವೊಂದುಪ್ಪುನಗನೇ ಆಯನ ಚಾಕ್ರಿದಾಕುಲು ಎದುರು ಬತ್ತ್‌ದ್, “ನಿನ ಮಗೆ ಬದುಕಿಯೆ,” ಪಂಡೆರ್‌.

⁵²ಏತ್ ಗಂಟೆಗ್ ಗುಣ ಆಯೆ ಅಂದ್‌ದ್ ಅಕ್ಲೆಡ ಕೇನ್ನಗ ಅಕುಲು, “ಕೋಡೆ ಮಧ್ಯಾಹ್ನ ಒಂಜಿ ಗಂಟೆಗ್ ಆಯನ ಜ್ವರ ಬುಡ್ದು ಪೋಂಡು,” ಪಂಡೆರ್.

⁵³ಅಪಗ, “ನಿನ ಮಗೆ ಬದುಕುವೆ” ಅಂದ್‌ದ್ ಯೇಸು ಎಂಕ್ ಪಂಡಿನ ಗಳಿಗೆಡೇ ಉಂದು ನಡತ್ಂಡ್ ಅಂದ್‌ದ್ ಅಮ್ಮೆ ತೆರಿಯೊಂಡಿನೆಡ್ದ್ ಆಯೆಲಾ ಆಯ ಇಲ್ಲದಾಕುಲುಲಾ ಆಯನ್ ನಂಬಿಯೆರ್.

⁵⁴ಯೇಸು ಯೂದಾಯೊಡ್ದು ಗಲಿಲಾಯೊಗು ಕುಡ ಬತ್ತ್‌ದ್ ಈ ರಡ್ಡನೆ ಕಾರ್ನಿಕೊನು ಮಲ್ತೆ.