Read Tulu ಯೋಹಾನೆ 6 Bible Online

ಯೋಹಾನೆ 6 - Tulu bible

ಯೋಹಾನೆ 6

¹ಐಡ್ದ್ ಬೊಕ್ಕ ಯೇಸು ಗಲಿಲಾಯ ಕಡಲ್ದ ಆಯೆರೆಗ್ ಪೋಯೆ, ಐಕ್ ತಿಬೇರಿಯದ ಕಡಲ್ ಪಂಡ್ದ್‌ಲಾ ಪನ್ಪೆರ್.

²ಮಸ್ತ್ ಜನೊಕುಲು ಸೀಕ್‌ದಾಕುಲೆಡ್ ಮಲ್ತಿ ಕಾರ್ನಿಕೊಲೆನ್ ತೂದು ಯೇಸು ಬೆರಿಯೆ ಪೋವೊಂದಿತ್ತೆರ್.

³ಆಂಡ ಯೇಸು ಒಂಜಿ ಗುಡ್ಡೆದ ಮಿತ್ತ್ ಪೋದು ತನ ಶಿಷ್ಯೆರೆ ಒಟ್ಟುಗು ಕುಲ್ಲಿಯೆ.

⁴ಆ ಸಮಯೊಡು ಯೆಹೂದ್ಯೆರೆನ ಪಸ್ಕ ಪರ್ಬದ ದಿನ ಕೈತಲಾವೊಂದಿತ್ತ್ಂಡ್.

⁵ಇಂಚ ಉಪ್ಪುನಗ ಯೇಸು ತನ ಕೈತಲ್‌ ಬರ್ಪಿ ಜನೊಕುಲೆ ಗುಂಪುನು ತೂದು ಫಿಲಿಪ್ಪುಡ, “ಮೊಕ್ಲೆಗ್ ವಣಸ್ ನಮ ಒಲ್ತುಡ್ದು ದೆತ್ತೊನುಗ?” ಕೇಂಡೆ.

⁶ತಾನ್ ಮಲ್ಪೆರೆ ಇತ್ತಿನವು ತನ್ಕ್ ತೆರಿದಿತ್ತ್ಂಡಲಾ ಫಿಲಿಪ್ಪುನು ಪರೀಕ್ಷೆ ಮಲ್ಪೆರೆ ಈ ಪಾತೆರ ಪಂಡೆ.

⁷ಐಕ್ ಫಿಲಿಪ್ಪು, “ಒರಿಯೊರಿಯಗ್ ಒಂತೊಂತೆ ತಿಕ್ಕೊಡಾಂಡಲಾ ಇರ್ನೂದು ಬೊಳ್ಳಿದ ಪಾವೊಲಿದ ರೊಟ್ಟಿಲಾ ಯಾವಂದ್,” ಪಂಡೆ

⁸ಅಪಗ ಆಯನ ಶಿಷ್ಯೆರೆಡ್ ಸೀಮೋನು ಪೇತ್ರನ ಮೆಗ್ಯೆ ಅಂದ್ರೆಯೆ ಪಂಡೆ.

⁹“ಮುಲ್ಪ ಒರಿ ಆಣನ ಕೈತಲ್‌ ಐನ್ ಜವೆಗೋದಿದ ರೊಟ್ಟಿಲಾ ರಡ್ಡ್ ಮೀನ್‌ಲಾ ಉಂಡು. ಆಂಡ ಈತ್ ಜನೊಕುಲೆಗ್ ಅವು ಒಯಿಕಾವು.”

¹⁰ಇಂಚ ಪನ್ನಗ ಯೇಸು, “ಜನೊಕುಲೆನ್ ವಣಸ್‌ಗ್ ಕುಲ್ಲಾಲೆ.” ಪಂಡೆ. ಆ ಜಾಗ್‌ಡ್ ಎಡ್ಡೆ ಪಜಿರ್ ಬುಲೆದಿತ್ತ್‌ಂಡ್, ಜನೊಕುಲು ಕುಲ್ಲೊಂಡೆರ್. ಅಂಜೊವುಲೇ ಹೆಚ್ಚಿಕಡಿಮೆ ಐನ್ ಸಾರ ಇತ್ತೆರ್.

¹¹ಐಡ್ದ್ ಬೊಕ್ಕ ಯೇಸು ರೊಟ್ಟಿನ್ ದೆತ್ತೊಂದು ದೇವೆರೆನ್ ಸುಗಿತ್‌ದ್ ಕುಲ್ಲುದಿತ್ತಿನಾಕುಲೆಗ್ ಪಟ್ಟ್‌ದ್ ಕೊರಿಯೆ. ಐತ ಲೆಕ್ಕನೆ ಮೀನ್‌ನ್ಲಾ ಅಕ್ಲೆಗ್ ಬೋಡಾಯಿನಾತ್ ಪಟ್ಟ್‌ದ್ ಕೊರಿಯೆ.

¹²ಅಕುಲು ಬಂಜಾರ ತಿಂದಿನೆಡ್ದ್ ಬೊಕ್ಕ ಯೇಸು ತನ ಶಿಷ್ಯೆರೆಗ್, “ಒರಿದಿನೆನ್ ಒಟ್ಟು ಮಲ್ಪುಲೆ, ನೆಟ್ಟ್ ಒವುಲಾ ಹಾಳಾವೆರೆ ಬಲ್ಲಿ,” ಪಂಡೆ.

¹³ಆ ಐನ್ ಜವೆಗೋದಿದ ರೊಟ್ಟಿನ್ ಜನೊಕುಲು ತಿಂದ್‌ದ್, ಅಕುಲು ಒರಿದಿ ತುಂಡುಲೆನ್ ಒಟ್ಟು ಮಲ್ಪುನಗ ಪದ್ರಾಡ್ ಪುಡಯಿ ದಿಂಜಿಂಡ್.

¹⁴ಯೇಸು ಮಲ್ದಿನ ಈ ಕಾರ್ನಿಕೊನು ಅವುಲು ಇತ್ತಿನ ಜನೊಕುಲು ತೂದು, “ಲೋಕೊಗು ಬರೊಡಾಯಿ ಆ ಪ್ರವಾದಿ ಉಂಬೆನೇ ನಿಜ!” ಅಂದ್‌ದ್ ಪಂಡೊಂಡೆರ್

¹⁵ಅಪಗ ಯೇಸು, ಅಕುಲು ಬತ್ತ್‌ದ್ ತನನ್ ಲೆತ್ತೊಂದು ಪೋದು ಅರಸು ಮಲ್ಪುನ ಗೇನೊಡುಲ್ಲೆರ್ ಪನ್ಪಿನೆನ್ ತೆರಿಯೊಂದು, ಕುಡೊರ ತಾನ್ ಮದೆ ಆದ್ ಒರಿಯೇ ಗುಡ್ಡೆಗ್ ಪೋಯೆ.

¹⁶ಬೈಯದಗ ಯೇಸುನ ಶಿಷ್ಯೆರ್ ಕಡಲ್‌ದಡೆಗ್ ಪೋದು

¹⁷ಓಡ ಮಿತ್ತಾರ್ದ್ ಕಡಲ್ದ ಸಾದಿಯಾದ್ ಆಯೆರೆಗ್ ಕಪೆರ್ನೌಮುಗು ಪೋಯೆರ್. ಅಪಗನೆ ಕತ್ತಲೆ ಆದಿತ್ತ್ಂಡ್, ಆಂಡ ಯೇಸು ನನಲಾ ಅಕ್ಲೆನ ಕೈತಲ್‌ ಬತ್ತ್‌ತ್ತಿಜೆ

¹⁸ಆತ್‌ನೆಂಗೆ ಸುಳಿಗಾಳಿ ಬೀಜೊಂದು ಕಡಲ್ದ ನೀರ್ ಅಡಿಮೇಲ್ ಆವೊಂದಿತ್ತ್ಂಡ್

¹⁹ಅಕುಲು ಓಡೊನು ಒಚ್ಚೊಂದು ಹೆಚ್ಚಿಕಡಿಮೆ [4]ಮೂಜಿ ಇಜ್ಜಾಂಡ ನಾಲ್ ಮೈಲ್ ದೂರ ಪೋಯಿ ಬೊಕ್ಕ ಯೇಸು ಕಡಲ್ದ ಮೇಲ್‌ಡ್ ನಡತೊಂದು ಓಡದ ಕೈತಲ್‌ ಬರ್ಪಿನೆನ್ ತೂದು ಪೋಡಿಯೆರ್.

²⁰ಐಕ್ ಯೇಸು, “ಪೋಡ್ಯಡೆ, ಯಾನೇ.” ಅಂದ್‌ದ್ ಪಂಡೆ.

²¹ಅಪಗ ಯೇಸುನು ಓಡದ ಉಲಯಿ ದೆತ್ತೊನಿಯೆರೆಗ್ ಮನಸ್ ಮಲ್ತೆರ್, ಆ ಕ್ಷಣೊಟೇ ಓಡ ಅಕುಲು ಪೋಪಿ ಕರೆಕ್ ಮುಟ್ಟುಂಡು.

²²ಮನದಾನಿ ಕಡಲ್ದ ಆಪೆದ ಬರಿಟ್ಟ್ ಉಂತುದಿತ್ತಿ ಜನೊಕುಲು ಯೇಸುನು ನಾಡೊಂದಿತ್ತೆರ್. ಮುಲ್ಪ ಒಂಜಿ ಓಡ ಇತ್ತಿನತ್ತಂದೆ ಬೇತೆ ಓಡೊಲು ಇತ್ತ್‌ಜಿ ಅಂದ್‌ದ್ ಶಿಷ್ಯೆರ್ ಮಾತ್ರ ಪಿದಾಡ್ದ್ ಪೋಯಿನತ್ತಂದೆ, ಯೇಸು ತನ ಶಿಷ್ಯೆರೆಡೊಪ್ಪ ಓಡ ಮಿತ್ತಾರ್ದ್‌ಜೆ ಅಂದ್‌ದ್ ಅಕ್ಲೆಗ್ ತೆರಿದಿತ್ತ್‌ಂಡ್.

²³ಆಂಡ ಆತ್ ಪೊರ್ತುಗು ಬೇತೆ ಓಡೊಲು ತಿಬೇರಿಯೊಡ್ದು ಪಿದಾಡ್ದ್, ಯೇಸು ದೇವೆರೆನ್ ಸುಗಿತ್‌ದ್ ಜನೊಕುಲೆಗ್ ವಣಸ್ ಮಲ್ಪಾಯಿ ಜಾಗ್‌ದ ಕೈತಲ್ ಬತ್ತ್‌ದಿತ್ತ್ಂಡ್.

²⁴ಇಂಚ ಉಪ್ಪುನಗ ಯೇಸು ಅಲ್ಪ ಇಜ್ಜೆ, ಆಯ ಶಿಷ್ಯೆರ್‌ಲಾ ಇಜ್ಜೆರ್ ಪಂಡ್ದ್, ಆ ಜನೊಕುಲು ತೂದು ತನ್ಕುಲೆ ಎಲ್ಯ ಓಡೊಡು ಕುಲ್ಲೊಂದು ಯೇಸುನು ನಾಡೊಂದು ಕಪೆರ್ನೌಮುಗು ಬತ್ತೆರ್.

²⁵ಬೊಕ್ಕ ಕಡಲ್ದ ಅಂಚಿದ ಕರೆಟ್ ಉಂತುದಿತ್ತಿ ಯೇಸುನು ತೂದು, “ಗುರುಕುಲೇ, ಈರ್ ಏಪ ಇಡೆಗ್ ಬತ್ತರ್?” ಅಂದ್‌ದ್ ಕೇಂಡಿನೆಕ್ಕ್.

²⁶ಯೇಸು ಅಕ್ಲೆಡ, “ನಿಕ್ಲೆಗ್ ನಿಜಾದ್ ಪನ್ಪೆ, ನಿಕುಲು ತೂಯಿನ ಕಾರ್ನಿಕೊಲೆಡ್ದ್ ಅತ್ತ್, ಆಂಡ ಆ ರೊಟ್ಟಿ ತಿಂದ್‌ದ್ ಬಂಜಿ ದಿಂಜಿನೆಡ್ದೆ ಎನನ್ ನಿಕುಲು ನಾಡೊಂದುಲ್ಲರ್

²⁷ಬೆನ್ಲೆ, ಹಾಳಾದ್ ಪೋಪಿ ತಿನಸ್‌ಗಾದ್ ಬೆನೊಡ್ಚಿ, ನಿತ್ಯಜೀವೊಗು ಒರಿಯು ತಿನಸ್‌ಗಾದ್ ಬೆನ್ಲೆ. ಇಂಚಿತ್ತಿ ತಿನಸ್‌ನ್ ನರಮಾನಿ ಮಗೆ ನಿಕ್ಲೆಗ್ ಕೊರ್ಪೆ. ಐಕಾದೇ ಅಮ್ಮೆ ಆದುಪ್ಪು ದೇವೆರ್ ಆಯಗ್ ಮುದ್ರೆ ಪಾಡ್ದ್ ಅಧಿಕಾರ ಕೊರ್ತೆ.”

²⁸ಅಪಗ ಅಕುಲು ಆಯಡ, “ದೇವೆರೆಗ್ ಮೆಚ್ಚಿಗೆ ಆಪಿ ಕೆಲಸೊಲೆನ್ ಮಲ್ಪೊಡಾಂಡ ಎಂಕುಲು ದಾದ ಮಲ್ಪೊಡು?” ಪಂಡೆರ್.

²⁹ಯೇಸು ಉತ್ತರ ಕೊರ್ದು ಅಕ್ಲೆಗ್, “ದೇವೆರ್ ಮೆಚ್ಚುನ ಬೇಲೆ ದಾನೆಂದ್ಂಡ, ಆಯೆ ಕಡಪುಡ್ದು ಕೊರಿನಾಯನ್ ನಿಕುಲು ನಂಬುನವೇ,” ಪಂಡೆ.

³⁰ಐಕ್ ಅಕುಲು ಅಂಚಾಂಡ, “ಎಂಕುಲು ತೂದು ನಂಬುಲೆಕ್ಕ ವಾ ಕಾರ್ನಿಕೊನು ತೋಜಾಪಾವ? ಎಂಕ್ಲೆನ ಹಿರಿಯೆರ್ ಕಾಡ್‌ಡ್ ಮನ್ನ ತಿಂದೆರ್, ಅಂದ್‌ದ್ ಶಾಸ್ತ್ರೊಡು ಬರೆತ್ತ್ಂಡತ್ತಾ, ‘ಉಂದೆನ್ ಪರಲೋಕೊಡ್ದು ಅಕ್ಲೆಗ್ ಕೊರಿಯೆ.’ ಈ ವಾ ಬೇಲೆ ಮಲ್ಪುವ?” ಅಂದ್‌ದ್ ಕೇಂಡೆರ್.

³¹

³²ಯೇಸು ಅಕ್ಲೆಗ್, “ಯಾನ್ ನಿಕ್ಲೆಗ್ ನಿಜಾದ್ ಪನ್ಪೆ, ಮೋಶೆ ನಿಕ್ಲೆಗ್ ಪರಲೋಕೊಡ್ದು ರೊಟ್ಟಿ ಕೊರ್ತಿನಾಯೆ ಅತ್ತ್, ಎನ ಅಮ್ಮೆ ಪರಲೋಕೊಡ್ದು ನಿಜವಾಯಿನ ರೊಟ್ಟಿನ್ ನಿಕ್ಲೆಗ್ ಕೊರ್ಪೆ.

³³ದೇವೆರ್ ಕೊರ್ಪಿನ ಆ ರೊಟ್ಟಿ ಒವು ಪಂಡ, ಆಯೆ ಪರಲೋಕೊಡ್ದು ಜತ್ತ್‌ದ್ ಬತ್ತ್‌ದ್ ಲೋಕದ ಜನೊಕುಲೆಗ್ ಜೀವ ಕೊರ್ಪಿನವೇ,” ಅಂದ್‌ದ್ ಪಂಡೆ.

³⁴ಐಕ್ ಅಕುಲು, “ಕರ್ತವಾ, ಎಂಕ್ಲೆಗ್ ಆ ರೊಟ್ಟಿನ್ ಏಪಲಾ ಕೊರು,” ಪನ್ನಗ,

³⁵ಯೇಸು ಅಕ್ಲೆಗ್, “ಜೀವದ ರೊಟ್ಟಿ ಯಾನೇ, ಎನ ಕೈತಲ್ ಬರ್ಪಿನಾಯಗ್ ಏಪೊಗ್ಲಾ ಬಡವು ಆವಂದ್, ಎನನ್ ನಂಬುನಾಯಗ್ ಏಪೊಗ್ಲಾ ಬಾಜೆಲ್ ಆವಂದ್.

³⁶ನಿಕುಲು ಎನನ್ ತೂಯರ್ಡಲಾ ನಂಬುಜರ್ ಅಂದ್‌ದ್ ನಿಕ್ಲೆಗ್ ಪಂಡ್ದಿತ್ತೆ ಅತ್ತಾ?

³⁷ಅಮ್ಮೆ ಎಂಕ್ ಕೊರ್ಪಿನವು ಮಾತಲಾ ಎನ ಕೈತಲ್‌ ಬರು; ಬೊಕ್ಕ ಎನ ಕೈತಲ್‌ ಬರ್ಪಿನಾಕುಲೆಗ್ ಯಾನ್ ಕಂಡಿತಾದ್ ದಂಕ್‌ದ್ ಪಾಡಯೆ.

³⁸ದಾಯೆಗಂದ್ಂಡ ಎನ ಚಿತ್ತದ ಲೆಕ್ಕ ನಡಪೆರೆಗಾದ್ ಯಾನ್ ಬೈದಿಜಿ, ಎನನ್ ಕಡಪುಡ್ದಿನಾಯನ ಚಿತ್ತೊನು ಈಡೇರಿಸಾವೆರೆ ಪರಲೋಕೊಡ್ದು ಬೈದೆ. ಎನನ್ ಕಡಪುಡ್ದಿನಾಯನ ಚಿತ್ತ ದಾನೆಂದ್ಂಡ

³⁹ಆಯೆ ಕೈ ದೆರ್ತ್ತ್‌ದ್ ಕೊರಿನೆಟ್ಟ್ ಒರಿಯನ್ಲಾ ದಂಕ್‌ದ್ ಪಾಡಂದೆ, ಯಾನ್ ಕಡೆ ದಿನೊಟು ಜೀವೊಡು ಲಕ್ಕಾವೊಡು ಇನ್ಪಿನವೇ ಆಯ ಚಿತ್ತ.

⁴⁰ಮಗನ್ ತೂದು ಆಯನ್ ನಂಬುನ ಪ್ರತಿಯೊರಿಯಗ್ಲಾ ನಿತ್ಯಜೀವ ತಿಕ್ಕೊಡು ಪನ್ಪಿನವೇ ಎನ ಅಮ್ಮೆರೆನ ಚಿತ್ತ ಆದುಂಡು, ಬೊಕ್ಕ ಯಾನ್ ಕಡೆ ದಿನೊಟು ಆಯನ್ ಜೀವೊಡು ಲಕ್ಕಾವೆ,” ಪಂಡೆ.

⁴¹ಆಯೆ, “ಪರಲೋಕೊಡ್ದು ಜತ್ತ್‌ದ್ ಬತ್ತಿ ರೊಟ್ಟಿ ಯಾನೇ,” ಅಂದ್‌ದ್ ಪಂಡಿನೆಕ್ಕ್ ಯೆಹೂದ್ಯೆರ್ ಆಯನ ಸಂಗತಿಡ್ ಗುಣುಗುಟ್ಟುದು,

⁴²“ಉಂಬೆ ಯೋಸೇಫು ಮಗೆ ಯೇಸು ಅತ್ತಾ, ಆಯನ ಅಪ್ಪೆಅಮ್ಮನ್ ಎಂಕುಲು ತೆರಿದತ್ತಾ, ಇತ್ತೆ ಉಂಬೆ ಪರಲೋಕೊಡ್ದು ಬೈದೆ ಅಂದ್‌ದ್ ಪನ್ಪಿನಿ ಎಂಚ?” ಅಂದ್‌ದ್ ಪಂಡೆರ್.

⁴³ಐಕ್ ಯೇಸು ಅಕ್ಲೆಡ, “ನಿಕುಲು ನಿಕ್ಲೆನ ಉಲಯಿ ಗುಣುಗುಟ್ಟಡೆ.

⁴⁴ಎನನ್ ಕಡಪುಡ್ದು ಕೊರಿನ ಅಮ್ಮೆ ಲೆಪ್ಪಂದೆ ಏರ್ಲಾ ಎನ ಕೈತಲ್‌ ಬರಯೆರ್, ಬೊಕ್ಕ ಯಾನ್ ಆಯನ್ ಆ ಕಡೇ ದಿನೊಟು ಜೀವೊಡು ಲಕ್ಕಾವೆ.

⁴⁵‘ಅಕುಲು ಮಾತೆರ್ಲಾ ದೇವೆರೆಡ್ದ್ ಕಲ್ತಿನಾಕುಲಾದುಲ್ಲೆರ್,’ ಅಂದ್‌ದ್ ಪ್ರವಾದಿಲೆಡ್ ಬರೆತ್ಂಡ್. ಅಮ್ಮೆರೆಡ್ದ್ ಕೇಂಡ್ದ್ ಕಲ್ತಿನಾಕುಲು ಮಾತೆರ್ಲಾ ಎನ ಕೈತಲ್‌ ಬರ್ಪೆರ್.

⁴⁶ಏರಾಂಡಲಾ ಅಮ್ಮೆರೆನ್ ತೂತ ಪಂಡ್ಂಡ ನಂಬಡೆ. ದೇವೆರೆ ಕಡೆಡ್ದ್ ಬೈದಿನಾಯೆ ಒರಿಯೇ ಅಮ್ಮೆರೆನ್ ತೂತಿನಾಯೆ.

⁴⁷ಯಾನ್ ನಿಕ್ಲೆಗ್ ನಿಜಾದ್ ಪನ್ಪೆ, ನಂಬುನಾಯೆ ನಿತ್ಯಜೀವ ಪಡೆಪೆ.

⁴⁸ಜೀವ ಕೊರ್ಪಿ ರೊಟ್ಟಿ ಯಾನೇ.

⁴⁹ನಿಕ್ಲೆನ ಹಿರಿಯೆರ್ ಕಾಡ್‌ಡ್ ಮನ್ನ ತಿಂದ್‌ಂಡಲಾ ಸೈತ್‌ದ್ ಪೋಯೆರ್.

⁵⁰ಪರಲೋಕೊಡ್ದು ಜತ್ತ್‌ದ್ ಬರ್ಪಿ ರೊಟ್ಟಿ ಎಂಚಿನವು ಪಂಡ, ಅವೆನ್ ತಿಂದಿನಾಯೆ ಸೈಪಿನೇ ಇಜ್ಜಿ.

⁵¹ಪರಲೋಕೊಡ್ದು ಜತ್ತ್‌ದ್ ಬೈದಿ ಜೀವ ಕೊರ್ಪಿ ರೊಟ್ಟಿ ಯಾನೆ, ಈ ರೊಟ್ಟಿನ್ ಏರಾಂಡಲಾ ತಿಂದೆಡ ಆಯೆ ಏಪೊತ್ತುಗ್ಲಾ ಬದುಕುವೆ, ಬೊಕ್ಕ ಯಾನ್ ಕೊರ್ಪಿನ ರೊಟ್ಟಿ ಎನ ಮಾಸನೇ, ಅವೆನ್ ಲೋಕದ ಜನೊಕುಲೆಗ್ ಜೀವ ತಿಕ್ಕೊಡು ಅಂದ್‌ದ್ ಕೊರ್ಪೆ,” ಪಂಡೆ.

⁵²ಅಪಗ ಯೆಹೂದ್ಯೆರ್, “ಉಂಬೆ ತನ ಮಾಸೊನು ನಂಕ್ ತಿನಿಯೆರೆ ಎಂಚ ಕೊರ್ಪೆ?” ಅಂದ್‌ದ್ ತನ್ಕುಲೆ ಉಲಯಿ ಚರ್ಚೆ ಮಲ್ತೊಂಡೆರ್.

⁵³ಐಕ್ ಯೇಸು ಅಕ್ಲೆಡ, “ನಿಕ್ಲೆಗ್ ನಿಜಾದ್ ಪನ್ಪೆ, ನಿಕುಲು ನರಮಾನಿ ಮಗನ ಮಾಸೊನು ತಿನಂದೆ ಆಯನ ನೆತ್ತೆರ್‌ನ್ ಪರಂದೆ ಇತ್ತ್ಂಡ ನಿಕ್ಲೆನ ಉಲಯಿ ಜೀವ ಇಜ್ಜಿ.

⁵⁴ಎನ ಮಾಸೊನು ತಿಂದ್‌ದ್ ಎನ ನೆತ್ತೆರ್‌ನ್ ಪರ್ಪಿನಾಯೆ ನಿತ್ಯಜೀವೊನು ಪಡೆಪೆ. ಬೊಕ್ಕ ಆಯನ್ ಯಾನ್ ಕಡೇ ದಿನೊಟು ಜೀವೊಡು ಲಕ್ಕಾವೆ.

⁵⁵ದಾಯೆ ಪಂಡ ಎನ ಮಾಸನೇ ನಿಜವಾಯಿನ ತಿನಸ್, ಎನ ನೆತ್ತೆರ್ ನಿಜವಾಯಿನ ಬಾಜೆಲ್.

⁵⁶ಎನ ಮಾಸೊನು ತಿಂದ್‌ದ್ ಎನ ನೆತ್ತೆರ್‌ನ್ ಪರ್ಪಿನಾಯೆ ಎನಡೊಪ್ಪ ಉಪ್ಪುವೆ, ಯಾನ್ ಆಯಡೊಪ್ಪ ಉಪ್ಪುವೆ.

⁵⁷ಜೀವಸ್ವರೂಪೆ ಆದುಪ್ಪು ಅಮ್ಮೆ ಎನನ್ ಕಡಪುಡುದೆ ಯಾನ್ ಅಮ್ಮೆರೆಡ್ದ್ ಬದುಕುಲೆಕ್ಕನೆ; ಎನನ್ ತಿನ್ಪಿನಾಯೆ ಆಯೆಲಾ ಎನಡ್ದ್ ಬದುಕುವೆ.

⁵⁸ಪರಲೋಕೊಡ್ದು ಜತ್ತ್‌ದ್ ಬೈದಿ ರೊಟ್ಟಿ ಉಂದೇ. ನಿಕ್ಲೆನ ಹಿರಿಯೆರ್ ಮನ್ನ ತಿಂಡಲಾ ಸೈತೆರ್; ಉಂದು ಅಂಚತ್ತ್, ಈ ರೊಟ್ಟಿನ್ ತಿನ್ಪಿನಾಯೆ ಏಪೊತ್ತುಗ್ಲಾ ಬದುಕುವೆ,” ಪಂಡೆ

⁵⁹ಯೇಸು ಕಪೆರ್ನೌಮುದ ಸಭಾಮಂದಿರೊಡು ಬೋಧನೆ ಮಲ್ಪುನಗ ಉಂದೆನ್ ಪಂಡೆ.

⁶⁰ಆಯ ಶಿಷ್ಯೆರೆಡ್ ಮಸ್ತ್ ಜನ ಉಂದೆನ್ ಕೇಂಡ್ದ್, “ಉಂದು ಕಠಿಣದ ಪಾತೆರ, ಉಂದೆನ್ ಏರ್ಲಾ ಕೇನಯೆರ್?” ಅಂದ್‌ದ್ ಎನ್ನೊಂಡೆರ್.

⁶¹ಯೇಸು ತನ ಶಿಷ್ಯೆರ್ ಉಂದೆಕ್ಕಾದ್ ಗುಣುಗುಟ್ಟುವೆರ್ ಅಂದ್‌ದ್ ತಾನೆ ತೆರಿಯೊಂದು ಅಕ್ಲೆಡ, “ಈ ಪಾತೆರೊಲೆಡ್ದ್ ನಿಕ್ಲೆಗ್ ಬೇಜಾರ್ ಆಂಡ?

⁶²ಅಪಗಾಂಡ ನರಮಾನಿ ಮಗೆ ತಾನ್ ಸುರು ಇತ್ತಿ ನಡೆಗೇ ಏರ್ದ್ ಪೋಪಿನೆನ್ ನಿಕುಲು ತೂಯರ್ಡ, ದಾನೆ ಎನ್ನ್‌ವರ್?

⁶³ಆತ್ಮಡೇ ಜೀವ ಕೊರ್ಪಿನವು ಆತ್ಮನೇ. ಮಾಸ ಒಯಿಕ್‌ಲಾ ಬರಂದ್ ಯಾನ್ ನಿಕ್ಲೆಗ್ ಪಂಡಿ ಪಾತೆರೊಲೇ ಆತ್ಮಲಾ ಜೀವಲಾ ಆದುಂಡು

⁶⁴ಆಂಡ ನಿಕ್ಲೆಡ್ ಕೆಲೆವೆರ್ ಉಂದೆನ್ ನಂಬಂದಿನಾಕುಲಾದುಲ್ಲರ್,” ಪಂಡೆ. ನಂಬಂದಿನಾಕುಲು ಏರ್, ಬೊಕ್ಕ ತನನ್ ಪತ್ತ್‌ದ್ ಕೊರ್ಪಿನಾಯೆ ಏರಂದ್‌ದ್ ಯೇಸುಗು ಸುರುಡ್ದೇ ತೆರಿದಿತ್ತ್‌ಂಡ್.

⁶⁵ಬೊಕ್ಕ ಯೇಸು ಅಕ್ಲೆಡ, “ಅಮ್ಮೆರೆನ ಅಪ್ಪಣೆದಾಂತೆ ಎನ ಕೈತಲ್ ಬರಿಯೆರೆ ಸಾದ್ಯ ಇಜ್ಜಿ, ಅಂದ್‌ದ್ ಯಾನ್ ನಿಕ್ಲೆಗ್ ಸುರುಡ್ದೇ ಪನೊಂದಿತ್ತೆ,” ಪಂಡೆ.

⁶⁶ಆನಿಡ್ದ್ ಬೊಕ್ಕ ಆಯನ ಶಿಷ್ಯೆರೆಡ್ದ್ ಮಸ್ತ್ ಜನ ಆಯನ್ ಬುಡ್ದು ಪಿರ ಪೋಯೆರ್ ಬೊಕ್ಕ ಆಯನ ಒಟ್ಟುಗು ಪೋಯಿಜೆರ್.

⁶⁷ಯೇಸು ಉಂದೆನ್ ತೂದು ತನ ಪದ್ರಾಡ್ ಶಿಷ್ಯೆರೆಲೆಗ್ಲಾ, “ನಿಕುಲುಲಾ ಪೋವೊಡುಂದುಲ್ಲರಾ?” ಅಂದ್‌ದ್ ಕೇಂಡೆ.

⁶⁸ಐಕ್ ಸೀಮೋನು ಪೇತ್ರೆ, “ಕರ್ತವಾ, ನಿನನ್ ಬುಡ್ದು ಎಂಕುಲು ನನ ಬೇತೆ ಏರೆಡೊಪ್ಪ ಪೋವೊಲಿ? ನಿತ್ಯಜೀವ ಕೊರ್ಪಿನ ಪಾತೆರೊಲು ನಿನಡನೇ ಉಂಡು;

⁶⁹ಈ ದೇವೆರೆ ಪರಿಶುದ್ಧದಾಯೆನೇ ಪಂಡ್ದ್ ಎಂಕುಲು ನಂಬುದ ಬೊಕ್ಕ ತೆರಿದ.” ಅಂದ್‌ದ್ ಪಂಡೆ.

⁷⁰ಐಕ್ ಯೇಸು, “ಪದ್ರಾಡ್ ಮಂದಿ ಆಯಿ ನಿಕ್ಲೆನ್ ಯಾನ್ ಅಜತ್‌ದ್ ದೆತ್ತೊಂಡೆ ಅತ್ತಾ? ನಿಕ್ಲೆಡ್ಲಾ ಒರಿ ಸೈತಾನ ಮಗೆ ಉಲ್ಲೆ,” ಪಂಡೆ.

⁷¹ಯೇಸು ಸೀಮೋನು ಇಸ್ಕಾರಿಯೋತನ ಮಗೆ ಯೂದನ ಪರವಾದ್ ಈ ಪಾತೆರೊನು ಪಂಡೆ. ಉಂಬೆ ಆ ಪದ್ರಾಡ್ ಮಂದಿಡ್ ಒರಿ ಆದಿತ್ತ್‌ದ್ ದುಂಬಗ್ ಯೇಸುನು ಪತ್ತ್‌ದ್ ಕೊರ್ಪಿನಾಯೆ ಆಯೆ.