Read Tulu ಯೋಹಾನೆ 7 Bible Online

ಯೋಹಾನೆ 7 - Tulu bible

ಯೋಹಾನೆ 7

¹ಈತ್ ಸಂಗತಿಲು ನಡತಿ ಬೊಕ್ಕ ಯೇಸು ಗಲಿಲಾಯೊಡು ಸಂಚಾರ ಮಲ್ತೊಂದಿತ್ತೆ, ಆಂಡ ಯೆಹೂದ್ಯೆರ್ ಆಯನ್ ಕೆರೊಡು ಅಂದ್‌ದ್ ಕಾತೊಂದಿತ್ತಿನೆಡ್ದ್ ಆಯಗ್ ಯೂದಾಯೊಡು ಸಂಚಾರ ಮಲ್ಪೆರೆ ಮನಸಿತ್ತ್‌ಜಿ.

²ಯೆಹೂದ್ಯೆರೆನ ಒಂಜಿ ಪರ್ಣಶಾಲೆದ ಪರ್ಬ ಪನ್ಪಿ ಒಂಜಿ ಜಾತ್ರೆ ಕೈತಲಾನಗ

³ಆಯನ ಮೆಗ್ಯಾಡ್ಲು ಆಯಡ, “ಅಪಗ ಈ ಮಲ್ಪು ಕಾರ್ಯೊಲೆನ್ ನಿನ ಶಿಷ್ಯೆರ್‌ಲಾ ತೂಪಿಲೆಕ್ಕ ಈ ಮುಲ್ತುಡ್ದು ಪಿದಾಡ್ದ್ ಯೂದಾಯೊಗು ಪೋ.

⁴ಪುದರ್ ಬರೊಡು ಪನ್ಪಿನಾಕುಲು ಏರಾಂಡಲಾ ತಾನ್ ಮಲ್ಪುನೆನ್ ಮದೆಟ್ ಮಲ್ಪುಜೆರತ್ತಾ, ಈ ಇಂಚಿತ್ತಿ ಕಾರ್ಯೊಲೆನ್ ಮಲ್ಪುನಾಯೆ ಆದಿತ್ತಿನೆಡ್ದ್ ಲೋಕೊಗು ತೋಜಾಪಾವೊನ್ಲ.” ಪಂಡೆರ್,

⁵ದಾಯೆಗಂದ್ಂಡ ಆಯ ಮೆಗ್ಯಾಡ್ಲುಲಾ ಆಯನ್ ನಂಬೊಂದಿತ್‌ಜೆರ್.

⁶ಯೇಸು ಅಕ್ಲೆಡ, “ಎನ ಪೋಪಿ ಗಳಿಗೆ ನನಲಾ ಬೈದಿಜಿ, ನಿಕ್ಲೆಗಾಂಡಲಾ ಮಾತ ಸಮಯಲಾ ಒಂಜೇ.

⁷ಲೋಕ ನಿಕ್ಲೆನ್ ಪಗೆ ಮಲ್ಪಂದ್, ಆಂಡ ಯಾನ್ ಮಲ್ಪು ಬೇಲೆಲು ಪಡಿಕೆಂತಿನವು ಅಂದ್‌ದ್ ಸಾಕ್ಷಿ ಪನ್ಪಿನೆಡ್ದ್, ಎನನ್ ಪಗೆ ಮಲ್ಪುಂಡು.

⁸ನಿಕುಲೇ ಜಾತ್ರೆಗ್ ಪೋಲೆ, ಎನ ಸಮಯ ನನಲಾ ಒದಗ್‌ದ್ ಬರಂದಿನೆಡ್ದಾದ್, ಯಾನ್ ಈ ಜಾತ್ರೆಗ್ ಇತ್ತೆ ಪೋಪುಜಿ.”

⁹ಉಂದೆನ್ ಪಂಡ್ದ್ ಯೇಸು ಗಲಿಲಾಯೊಡೇ ಉಂತಿಯೆ.

¹⁰ಆಂಡ ಆಯ ಮೆಗ್ಯಾಡ್ಲು ಜಾತ್ರೆಗ್ ಪೋಯಿ ಬೊಕ್ಕ ತಾನ್‌ಲಾ ಪೋಯೆ, ಆಂಡ ಜನೊಕುಲೆಗ್ ತೋಜುಲೆಕ್ಕ ಪೋವಂದೆ ದೆಂಗೊಂದು ಪೋಯೆ.

¹¹ಜಾತ್ರೆಡ್ ಯೆಹೂದ್ಯೆರೆ ಅಧಿಕಾರಿಲು, “ಯೇಸು ಓಲುಲ್ಲೆ?” ಪಂಡ್ದ್ ನಾಡೊಂದಿತ್ತೆರ್.

¹²ಬೊಕ್ಕ ಜನೊಕುಲೆ ಗುಂಪುಲೆಡ್ ಆಯನ ಸಂಗತಿಡ್ ಗುಸುಗುಸು ಪಾತೆರ ನಡತೊಂದಿತ್ತ್‌ಂಡ್. ಕೆಲೆವೆರ್, “ಆಯೆ ಎಡ್ಡೆಂತಿನಾಯೆ,” ಪಂಡೆರ್. ನನ ಕೆಲೆವೆರ್, “ಅತ್ತ್.” ಕೆಲೆವೆರ್, “ಆಯೆ ಜನೊಕುಲೆನ್ ತಪ್ಪು ಸಾದಿಗ್ ಒಯ್ಪುಪೆ,” ಪಂಡೆರ್.

¹³ಆಂಡ ಯೆಹೂದ್ಯೆರೆ ಅಧಿಕಾರಿಲೆ ಪೋಡಿಗೆಡ್ದ್ ಆಯ ಸಂಗತಿಡ್ ಹೆಚ್ಚ್ ಪಾತೆರಿಜೆರ್.

¹⁴ಜಾತ್ರೆದ ನಡುಟು ಯೇಸು ದೇವಾಲಯೊಗು ಪೋದು ಬೋಧನೆ ಮಲ್ತೊಂದಿತ್ತೆ.

¹⁵ಯೆಹೂದ್ಯೆರ್‌ ಐಕ್ ಅಚ್ಚಿರ ಆದ್, “ಬರವು ಕಲ್ಪಂದಿ ಉಂಬ್ಯಗ್ ಶಾಸ್ತ್ರೊಲು ತೆರಿದುಪ್ಪುನು ಎಂಚ?” ಪನೊಂದಿತ್ತೆರ್.

¹⁶ಐಕ್ ಯೇಸು, “ಯಾನ್ ಪನ್ಪಿನ ಬೋಧನೆ ಎನ್ನವು ಅತ್ತ್, ಎನನ್ ಕಡಪುಡ್ದಿನ ದೇವೆರೆನವೇ,

¹⁷ಆಯ ಚಿತ್ತದ ಲೆಕ್ಕ ನಡಪೆರೆ ಏರೆಗ್ ಮನಸುಂಡಾ ಅಕ್ಲೆಗ್ ಈ ಬೋಧನೆ ದೇವೆರೆಡ್ದ್ ಬೈದಿನವಾ, ಇಜ್ಜಿಂಡ ಎನ ಸ್ವಂತ ಅಧಿಕಾರೊಡ್ದು ಪಂಡಿನವಾ ಅಂದ್‌ದ್ ಗೊತ್ತಾವು.

¹⁸ತನ ಸ್ವಂತ ಅಧಿಕಾರೊಡ್ದು ಪನ್ಪಿನಾಯೆ ತನ್ಕ್ ಮಾನಾದಿಗೆ ಬರೊಡಂದ್‌ದ್ ಬಯಕುವೆ, ತನನ್ ಕಡಪುಡ್ದಿನಾಯಗ್ ಮಾನಾದಿಗೆ ಬರೊಡಂದ್‌ದ್ ಬಯಕುನಾಯೆ ಸತ್ಯವಂತೆ. ಆಯಡ ಅನ್ಯಾಯ ಇಜ್ಜಿ.

¹⁹ಮೋಶೆ ನಿಕ್ಲೆಗ್ ನ್ಯಾಯಕಟ್ಟ್ ಕೊರ್ತೆಡಲಾ ನಿಕ್ಲೆಡ್ ಒರಿಲಾ ನ್ಯಾಯಕಟ್ಟ್‌ದ ಲೆಕ್ಕ ನಡಪುಜರತ್ತಾ? ದಾಯೆ ಎನನ್ ಕೆರಿಯೆರೆ ತೂಪರ್‌?” ಅಂದ್‌ದ್ ಪಂಡೆ.

²⁰ಐಕ್ ಆ ಜನೊಕುಲು, “ನಿಕ್ಕ್ ದೆವ್ವ ಪತ್ತ್‌ದ್ಂಡ್! ನಿನನ್ ಕೆರಿಯೆರೆ ಏರ್ ತೂಪೆರ್?” ಪಂಡಿನೆಕ್ಕ್,

²¹ಯೇಸು ಅಕ್ಲೆಡ, “ಯಾನ್ ಒಂಜೇ ಕೆಲಸೊನು ಮಲ್ತ್‌ದಿನಿ, ಐಕ್ ನಿಕುಲು ಮಾತೆರ್ಲಾ ಅಚ್ಚಿರ ಆತರ್.

²²ಮೋಶೆನ ಕಟ್ಟ್ ಮೀರ್‌ಯೆರೆ ಬಲ್ಲಿ ಅಂದ್‌ದ್ ಒರಿ ಸಬ್ಬತ್‌ದಿನೊಟು ಸುನ್ನತಿ ಮಲ್ತೊನ್ವೆ ಪಂಡ್ದಾಂಡ ಒಂಜಿ ಆಣ್ ಬಾಲೆಗ್ ಸುನ್ನತಿನ್ ಸಬ್ಬತ್‌ದಿನತಾನಿಲಾ ಮಲ್ಪುವರ್. ಅವು ಮೋಶೆಡ್ದ್ ಬೈದಿನವು ಅಂದ್‌ದ್ ಯಾನ್ ಪನಯೆ ಅವು ಮೂಲಪಿತೃಲೆ ಕಾಲೊಡ್ದು ಬೈದಿನವು.

²³ಒರಿ ಆಣ್ ಬಾಲೆಗ್ ಸಬ್ಬತ್‌ದಿನೊಟು ಸುನ್ನತಿ ಮಲ್ಪುನೆಡ್ದ್ ಮೋಶೆ ಮಲ್ತಿ ನ್ಯಾಯಕಟ್ಟ್‌ಲೆನ್ ಮೀರುಜೆ, ಆಂಡ ಯಾನ್ ಸಬ್ಬತ್‌ದಿನೊಟು ಒರಿಯನ್ ಗುಣ ಮಲ್ತಿನೆಕ್ಕ್ ಎನ ಮಿತ್ತ್ ದಾಯೆಗ್ ಕೋಪ ಮಲ್ಪುವರ್?

²⁴ಮೋನೆಗ್ ತಕ್ಕ ನ್ಯಾಯತೀರ್ಪು ಮಲ್ಪಂದೆ, ನ್ಯಾಯವಾಯಿನ ತೀರ್ಪು ಮಲ್ಪುಲೆ,” ಅಂದ್‌ದ್ ಪಂಡೆ.

²⁵ಯೆರೂಸಲೇಮುಡು ಉಪ್ಪುನಾಕುಲೆಡ್ ಕೆಲೆವೆರ್, “ಅಕುಲು ಕೆರಿಯೆರೆ ನಾಡೊಂದಿತ್ತಿನಾಯೆ, ಇಂಬೆನೇ ಅತ್ತಾ?

²⁶ತೂಲೆ! ಇಂಬೆ ದಿಂಜ ಪಾತೆರುವೆ ಅತ್ತಾ? ಅಕುಲು ಆಯಗ್ ದಾಲಾ ಪನ್ಪುಜೆರ್‌! ಮುಖ್ಯಸ್ಥೆರ್ ಉಂಬೆನೇ ಬರೊಡಾಯಿ ಕ್ರಿಸ್ತೆ ಅಂದ್‌ದ್ ನಿಜಾದ್ ನಿಗಂಟ್ ಮಲ್ತೊಂದೆರಾ ದಾನೆ?

²⁷ಆಂಡ ಉಂಬೆ ಒಲ್ತಾಯೆ ಅಂದ್‌ದ್ ನಮ ತೆರಿದ, ಕ್ರಿಸ್ತೆ ಬನ್ನಗ ಆಯೆ ಒಲ್ತಾಯೆ ಅಂದ್‌ದ್ ಒರಿಯಗ್ಲಾ ತೆರಿಯಂದ್,” ಪಾತೆರೊಂದಿತ್ತೆರ್.

²⁸ಯೇಸು ಉಂದೆನ್ ತೆರಿದ್ ದೇವಾಲಯೊಡು ಬೋಧನೆ ಕೊರ್ದು ಗಟ್ಟಿಯಾದ್ ಪಂಡಿನಿ, “ಅಂದ್, ಎನನ್ ತೆರಿದರ್, ಯಾನ್ ಒಲ್ತಾಯೆಂದ್ ತೆರಿದರ್, ನಿಜನೇ ಆಂಡಲಾ ಯಾನ್ ಎನ್ನಾತೆಗೆ ಬೈದಿನಾಯೆ ಅತ್ತ್; ಎನನ್ ಕಡಪುಡ್ದಿನಾಯೆ ಸತ್ಯದಾಯೆ, ನಿಕುಲು ಆಯನ್ ತೆರಿದಿಜರ್.

²⁹ಯಾನ್ ಆಯನ್ ತೆರಿದೆ, ದಾಯೆಗಂದ್ಂಡ ಯಾನ್ ಆಯ ಕಡೆಡ್ದ್ ಬೈದಿನಾಯೆ ಎನನ್ ಆಯೆನೇ ಕಡಪುಡ್ದಿನಿ.”

³⁰ಅಪಗ ಆಯನ್ ಪತ್ತಿಯೆರೆ ತೂಯೆರ್, ಆಂಡಲಾ ಆಯನ್ ಪತ್ತುನ ಗಳಿಗೆ ಬರಂದೆ ಇತ್ತಿನೆಡ್ದ್ ಏರ್ಲಾ ಆಯನ ಮಿತ್ತ್ ಕೈ ಪಾಡಿಜೆರ್.

³¹ಜನೊಕುಲೆಡ್ ಮಸ್ತ್ ಜನ ಆಯನ್ ನಂಬುದು, “ಕ್ರಿಸ್ತೆ ಬನ್ನಗ, ಉಂಬೆ ಮಲ್ತಿನೆಡ್ದ್ ಹೆಚ್ಚ್ ಕಾರ್ನಿಕೊಲೆನ್ ಮಲ್ಪುವೆನಾ?” ಪಂಡೆರ್.

³²ಜನೊಕುಲು ಆಯನ ಸಂಗತಿಡ್ ಗುಸುಗುಸು ಪಾತೆರೊಂದಿನೆನ್ ಪರಿಸಾಯೆರ್ ಕೇನ್ನಗ, ಪ್ರಧಾನಯಾಜಕೆರ್‌ಲಾ ಪರಿಸಾಯೆರ್‌ಲಾ ಆಯನ್ ಪತ್ತಿಯೆರೆಗ್ ಸಿಪಾಯಿಲೆನ್ ಕಡಪುಡಿಯೆರ್.

³³ಅಪಗ ಯೇಸು ಅಕ್ಲೆಡ, “ನನ ಒಂತೆ ಸಮಯ ಯಾನ್ ನಿಕ್ಲೆಡೊಪ್ಪ ಇತ್ತ್‌ದ್, ಐಡ್ದ್ ಬೊಕ್ಕ ಎನನ್ ಕಡಪುಡ್ದಿನಾಯ ಕೈತಲ್‌ ಪೋಪೆ.

³⁴ನಿಕುಲು ಎನನ್ ನಾಡುವರ್, ಆಂಡ ನಿಕ್ಲೆಗ್ ತಿಕ್ಕಯೆ, ಯಾನ್ ಉಪ್ಪುನಡೆ ನಿಕ್ಲೆಗ್ ಬರಿಯೆರೆ ಆವಂದ್,” ಪಂಡೆ.

³⁵ಐಕ್ ಯೆಹೂದ್ಯೆರ್, “ಉಂಬೆ ನಂಕ್ ತಿಕ್ಕಂದಿಲೆಕ್ಕ ಒಡೆಗ್ ಪೋವೊಡು ಪಂಡ್‌ದುಲ್ಲೆ? ಗ್ರೀಕೆರೆ ಉಲಯಿ ಪರಡ್ದ್ ಪೋತಿ ನಮ್ಮಕುಲೆನ ಕೈತಲ್ ಪೋದು, ಗ್ರೀಕೆರೆಗ್ ಬೋಧನೆ ಮಲ್ಪೊಡುಂದುಲ್ಲೆನಾ?

³⁶ಎನನ್ ನಾಡುವರ್, ಆಂಡ ನಿಕ್ಲೆಗ್ ತಿಕ್ಕಯೆ, ಬೊಕ್ಕ ಯಾನ್ ಉಪ್ಪುನಡೆ ನಿಕ್ಲೆಗ್ ಬರಿಯೆರೆ ಆವಂದ್, ಆಯೆ ಪನ್ಪಿನ ಪಾತೆರ ಎಂಚಿನಾದುಪ್ಪು?” ತನ್ಕುಲೆ ಉಲಯಿ ಪಾತೆರೊಂಡೆರ್.

³⁷ಆ ಜಾತ್ರೆದ ಮಲ್ಲ ದಿನತ ಕಡೆ ದಿನೊಟು ಯೇಸು ಲಕ್ಕ್‌ದ್ ಉಂತುದು ಸಾರಿಯೊಂದು, “ಏರೆಗಾಂಡಲಾ ಬಾಜೆಲ್ ಆದಿತ್ತ್ಂಡ ಆಯೆ ಎನ ಕೈತಲ್‌ ಬತ್ತ್‌ದ್ ಪರಡ್.

³⁸ಎನನ್ ನಂಬುನಾಯನ ಬಂಜಿಡ್ದ್ ಶಾಸ್ತ್ರೊಡು ಪಂಡಿಲೆಕ್ಕ ‘ಜೀವ ಇತ್ತಿ ನೀರ್‌ದ ತುದೆಕುಲು ಪರತೊಂದು ಪೋವು,’” ಪಂಡೆ.

³⁹ಉಂದೆನ್ ಆಯೆ ತನನ್ ನಂಬುನಾಕುಲು ಹೊಂದಿಯೆರೆ ಉಪ್ಪು ಪರಿಶುದ್ಧಾತ್ಮನ ಬಗೆಟ್ ಪಂಡೆ. ಯೇಸು ನನಲಾ ತನ ಮೈಮೆದ ಗದ್ದಿಗೆನ್ ಪಡೆವಂದೆ ಇತ್ತಿನೆಡ್ದ್, ಪರಿಶುದ್ಧಾತ್ಮ ವರ ನನಲಾ ಬತ್ತಿತ್‌ಜಿ.

⁴⁰ಜನೊಕುಲೆಡ್ ಕೆಲೆವೆರ್ ಆ ಪಾತೆರೊಲೆನ್ ಕೇಂಡ್ದ್, “ನಿಜಾದ್‌ಲಾ ಉಂಬೆ ಬರೊಡಾಯಿ ಆ ಪ್ರವಾದಿ!” ಅಂದ್‌ದ್ ಪಂಡೆರ್.

⁴¹ಬೊಕ್ಕ ಕೆಲೆವೆರ್, “ಉಂಬೆ ಬರೊಡಾಯಿ ಕ್ರಿಸ್ತೆ ಪಂಡೆರ್. ನನ ಕೆಲೆವೆರ್ ಕ್ರಿಸ್ತೆ ಗಲಿಲಾಯೊಡ್ದು ಬರ್ಪಿನಿ ಎಂಚ?

⁴²ದಾವೀದನ ಸಂತಾನೊಡ್ದು ದಾವೀದೆ ಇತ್ತಿ ಬೇತ್ಲೆಹೇಮು ಪನ್ಪಿ ಗ್ರಾಮೊಡ್ದುಲಾ ಕ್ರಿಸ್ತೆ ಬರ್ಪೆ ಅಂದ್‌ದ್ ಶಾಸ್ತ್ರೊಡು ಉಂಡತ್ತಾ,” ಪಂಡೆರ್.

⁴³ಇಂಚ ಆಯನ ವಿಚಾರೊಡು ಜನೊಕುಲೆ ನಡುಟು ಭೇದ ಉಂಡಾಂಡ್.

⁴⁴ಅಕ್ಲೆಡ್ ಕೆಲೆವೆರ್ ಆಯನ್ ಪತ್ತೊಡು ಅಂದ್‌ದ್ ಇತ್ತೆರ್ಡಲಾ ಒರಿಲಾ ಆಯ ಮಿತ್ತ್ ಕೈ ಪಾಡ್ಜೆರ್.

⁴⁵ಐಡ್ದ್ ಬೊಕ್ಕ ಆ ಸಿಪಾಯಿಲು ಪ್ರಧಾನಯಾಜಕೆರೆ ಬೊಕ್ಕ ಪರಿಸಾಯೆರೆ ಕೈತಲ್‌ ಬನ್ನಗ ಮೊಕುಲು, “ನಿಕುಲು ದಾಯೆ ಆಯನ್ ಪತ್ತ್‌ದ್ ಕನತಿಜರ್?” ಅಕ್ಲೆಡ ಕೇಂಡಿನೆಕ್ಕ್,

⁴⁶ಆ ಸಿಪಾಯಿಲು, “ಆ ನರಮಾನಿ ಪಾತೆರಿಲೆಕ್ಕ ಏರ್ಲಾ ಏಪಲಾ ಪಾತೆರ್ದ್‌ಜೆರ್‌!” ಉತ್ತರ ಕೊರಿಯೆರ್.

⁴⁷ಐಕ್ ಪರಿಸಾಯೆರ್, “ನಿಕುಲುಲಾ ಮರ್ಲಾಯರಾ?

⁴⁸ಮುಖ್ಯಸ್ಥೆರೆಡಾವಡ್, ಪರಿಸಾಯೆರೆಡಾವಡ್ ಏರಾಂಡಲಾ ಆಯನ್ ನಂಬುದೆರಾ?

⁴⁹ಮೋಶೆನ ನ್ಯಾಯಕಟ್ಟ್‌ನ್ ತೆರಿಯಂದಿ ಈ ಪುಂಡು ಶಾಪ ದಿಂಜಿದಿನವೇ!” ಪಂಡೆರ್.

⁵⁰ಅಕ್ಲೆಡ್ ಒರಿ ನಿಕೋದೇಮೆ ಪನ್ಪಿನಾಯೆ, ದುಂಬು ಯೇಸು ಕೈತಲ್‌ ಬತ್ತ್‌ತ್ತಿನಾಯೆ

⁵¹ಆಯೆ ಅಕ್ಲೆಡ, “ಎಂಕ್ಲೆನ ನ್ಯಾಯಕಟ್ಟ್ ಸುರುಟ್ಟು ಒರಿಯನ್ ಪಿದುಕೊಂದು ಆಯೆ ಮಲ್ಪುನವು ದಾದ ಅಂದ್‌ದ್ ತೆರಿಯೊನಂದೆ ಆಯನ ಸಂಗತಿಡ್ ತೀರ್ಪು ಮಲ್ಪುನವು ಉಂಡಾ?” ಪಂಡಿನೆಕ್ಕ್,

⁵²ಅಕುಲು, “ಈಲಾ ಗಲಿಲಾಯದಾಯೆನಾ? ಗಲಿಲಾಯೊಡು ಪ್ರವಾದಿ ಪುಟ್ಟುನೇ ಇಜ್ಜಿ. ಶಾಸ್ತ್ರೊನು ನಾಡ್ದ್ ತೂಲ,” ಅಂದ್‌ದ್ ಪಂಡೆರ್.

⁵³ಬೊಕ್ಕ ಮಾತೆರ್ಲಾ ಅಕ್ಲಾಕ್ಲೆನ ಇಲ್ಲಗ್ ಪೋಯೆರ್.