Read Tulu ಯೋಹಾನೆ 9 Bible Online

ಯೋಹಾನೆ 9 - Tulu bible

ಯೋಹಾನೆ 9

¹ಯೇಸು ಪೋವೊಂದುಪ್ಪುನಗ ಒಂಜಿ ಪುಟ್ಟು ಕುರುಡನ್ ತೂಯೆ.

²ಆಯನ ಶಿಷ್ಯೆರ್, “ಓ ಗುರೂ, ಉಂಬೆ ಕುರುಡೆ ಆದ್ ಪುಟ್ಟಿಯೆರೆ ಏರ್ ಪಾಪ ಮಲ್ತ್‌ದಿನಿ? ಉಂಬೆನಾ, ಉಂಬ್ಯನ ಅಪ್ಪೆಅಮ್ಮೆನಾ?” ಆಯಡ ಕೇಂಡೆರ್.

³ಐಕ್ ಯೇಸು, “ಉಂಬೆಲಾ ಪಾಪ ಮಲ್ತ್‌ಜೆ, ಉಂಬ್ಯನ ಅಪ್ಪೆಅಮ್ಮೆಲಾ ಪಾಪ ಮಲ್ತ್‌ಜೆರ್, ದೇವೆರೆ ಕಾರ್ಯೊಲು ಉಂಬ್ಯಡ ತೋಜಿದ್ ಬರಿಯೆರೆ ಇಂಚ ಆಂಡ್.

⁴ಎನನ್ ಕಡಪುಡ್ದಿನಾಯನ ಕಾರ್ಯೊಲೆನ್ ಪಗೆಲ್‌ಗೆ ಮಲ್ಪೊಡು ರಾತ್ರೆ ಬರ್ಪುಂಡು, ಅವು ಬತ್ತಿ ಬೊಕ್ಕ ಏರೆಗ್ಲಾ ಬೇಲೆ ಮಲ್ಪೆರೆ ಆಪುಜಿ

⁵ಯಾನ್ ಲೋಕೊಡು ಉಪ್ಪುನಗ, ಲೋಕೊಗು ಬೊಲ್ಪು ಆದುಲ್ಲೆ,” ಅಂದ್‌ದ್ ಪಂಡೆ.

⁶ಉಂದೆನ್ ಪಂಡಿ ಬೊಕ್ಕ ನೆಲಕ್ ಉಬ್ಬಿದ್, ಆ ಉಬ್ಬಿನೀರ್‌ಡ್ದ್ ಕೆಸರ್ ಲೇಪ ಮಲ್ತ್‌ದ್, ಆ ಲೇಪೊನು ಕುರುಡನ ಕಣ್ಣ್‌ಗ್ ಪೂಜಿದ್

⁷ಆಯಡ, “ಈ ಸಿಲೋವ ಕೆದುಕು ಪೋದು ದೆಕ್ಕೊನ್ಲ,” ಪಂಡೆ. (ಸಿಲೋವಾ ಪನ್ಪಿ ಪಾತೆರೊಗು “ಕಡಪುಡ್ದಿನಾಯೆ” ಅಂದ್‌ದ್ ಅರ್ಥ). ಆಯೆ ಪೋದು ದೆಕ್ಕೊಂದು ಪಿರ ಬನ್ನಗ ಕಣ್ಣ್ ತೋಜುನಾಯೆ ಆದ್ ಬತ್ತೆ.

⁸ಅಪಗ ನಿರೆಕರೆತಾಕುಲು ಆಯೆ ನಟ್ಟುನಾಯೆ ಆದಿತ್ತಿನೆನ್ ಸುರುಟ್ಟು ತೂತಿನಾಕುಲು “ಉಂಬೆ ಕುಲ್ಲೊಂದಿತ್ತಿ ಆ ನಟ್ಟುನಾಯೆ ಅತ್ತಾ,” ಪಂಡೆರ್.

⁹ಕೆಲೆವೆರ್, ಅಂದ್ “ಆಯೆನೇ, ಪಂಡೆರ್; ನನ ಕೆಲೆವೆರ್, ಆಯೆ ಉಂಬೆ ಅತ್ತ್, ಆಯ ಲೆಕ್ಕ ಉಲ್ಲೆ,” ಪಂಡೆರ್. ಆಂಡ ಆ ಕುರುಡೆ, “ಯಾನ್ ಆಯೆನೇ.” ಪಂಡೆ.

¹⁰ಅಪಗ ಅಕುಲು ಆಯಡ, “ನಿಕ್ಕ್ ಕಣ್ಣ್‌ದ ದೃಷ್ಟಿ ಎಂಚ ಬತ್ತ್ಂಡ್?” ಅಂದ್‌ದ್ ಆಯಡ ಕೇಂಡಿನೆಕ್ಕ್,

¹¹“ಯೇಸು ಪನ್ಪಿನಾಯೆ ಒರಿ ಉಲ್ಲೆತ್ತಾ, ಆಯೆನೆ ಉಬ್ಬಿನೀರ್‌ಡ್ ಮಣ್ಣ್‌ದ ಲೇಪ ಮಲ್ತ್‌ದ್ ಎನ ಕಣ್ಣ್‌ಗ್ ಪೂಜಿದ್ ‘ಸಿಲೋವ ಕೆದುಕು ಪೋದು ದೆಕ್ಕೊನ್ಲ,’ ಪಂಡೆ. ಯಾನ್ ಪೋದು ದೆಕ್ಕೊಂಡೆ, ಕಣ್ಣ್‌ದ ದೃಷ್ಟಿ ಬತ್ತ್ಂಡ್,” ಪಂಡೆ

¹²ಅಪಗ ಅಕುಲು ಆಯಡ, “ಆಯೆ ಓಲುಲ್ಲೆ?” ಅಂದ್‌ದ್ ಆಯಡ ಕೇಂಡಿನೆಕ್ಕ್ ಆಯೆ, “ಎಂಕ್ ಗೊತ್ತಿಜ್ಜಿ.” ಅಂದ್‌ದ್ ಪಂಡೆ.

¹³ಐಡ್ದ್ ಬೊಕ್ಕ ಕುರುಡೆ ಆದಿತ್ತ್‌ದ್ ದೃಷ್ಟಿ ಬತ್ತಿ ಉಂಬ್ಯನ್ ಪರಿಸಾಯೆರೆ ಕೈತಲ್‌ ಲೆತ್ತೊಂದು ಪೋಯೆರ್.

¹⁴ಯೇಸು ಮಣ್ಣ್‌ದ ಲೇಪ ಪಾಡ್ದ್ ಆಯಗ್ ಕಣ್ಣ್‌ದ ದೃಷ್ಟಿ ಕೊರ್ತಿನ ದಿನ ಸಬ್ಬತ್‌ದಿನ ಆದಿತ್ತ್ಂಡ್.

¹⁵ಅವೆಡ್ದಾವರ ಆ ಪರಿಸಾಯೆರ್‌ಲಾ ಆಯನ್ ವಿಚಾರ ಮಲ್ತ್‌ದ್, “ನಿಕ್ಕ್ ಎಂಚ ಕಣ್ಣ್ ತೋಜ್ಂಡ್?” ಅಂದ್‌ದ್ ಕೇಂಡೆರ್. ಆಯೆ ಅಕ್ಲೆಡ, “ಮಣ್ಣ್‌ದ ಲೇಪ ಎನ ಕಣ್ಣ್‌ಗ್ ಪೂಜಿಯೆ. ಯಾನ್ ದೆಕ್ಕೊಂಡೆ, ಇತ್ತೆ ಎಂಕ್ ಕಣ್ಣ್ ತೋಜುಂಡು,” ಅಂದ್‌ದ್ ಉತ್ತರ ಕೊರಿಯೆ.

¹⁶ಆ ಪರಿಸಾಯೆರೆಡ್ ಕೆಲೆವೆರ್, “ಈ ನರಮಾನಿ ದೇವೆರೆಡ್ದ್ ಬೈದಿನಾಯೆ ಆದುಪ್ಪಯೆ ದಾಯೆಗ್ ಪಂಡ ಆಯೆ ಸಬ್ಬತ್‌ದಿನೊನ್ಲಾ ಗೆನ್ಪುಜೆ.” ಪಂಡೆರ್. ನನ ಕೆಲೆವೆರ್, “ಇಂಚಿತ್ತಿ ಕಾರ್ನಿಕೊಲೆನ್ ಪಾಪಿ ಆಯಿ ನರಮಾನಿನ ಕೈಡ್ದ್ ಮಲ್ಪೆರೆ ಎಂಚಾವು?” ಪಂಡೆರ್. ಇಂಚ ಅಕ್ಲೆ ಉಲಯಿ ಭೇದ ಉಂಡಾಂಡ್.

¹⁷ಅಕುಲು ಕುಡ ಗುಣ ಆಯಿನ ಕುರುಡಡ, ಆಯೆ ನಿಕ್ಕ್ ಕಣ್ಣ್ ಕೊರಿನೆಡ್ದ್ ಈ ಆಯ ಸಂಗತಿಡ್ ದಾನೆ ಪನ್ಪ? ಅಂದ್‌ದ್ ಕೇನ್ನಗ ಗುಣ ಆಯಿನ ಕುರುಡೆ, “ಆಯೆ ನಿಜವಾದ್ ಒಂಜಿ ಪ್ರವಾದಿ ಆದುಲ್ಲೆ,” ಅಂದ್‌ದ್ ಪಂಡೆ.

¹⁸ಆಂಡ ಕಣ್ಣ್ ಬತ್ತಿನಾಯನ ಸಂಗತಿಡ್ ಆ ಯೆಹೂದ್ಯೆರ್, ಉಂಬೆ ಕುರುಡೆ ಆದಿತ್ತೆ, ಇತ್ತೆ ಕಣ್ಣ್ ತೋಜುನಾಯೆ ಆಯೆ ಅಂದ್‌ದ್ ನಂಬಂದೆ, ಆಯನ ಅಪ್ಪೆಅಮ್ಮಾಡ್ಲೆನ್ ಲೆಪ್ಡಾದ್,

¹⁹“ಉಂಬೆ ನಿಕ್ಲೆನ ಮಗೆನಾ, ಆಯೆ ಪುಟ್ಟುನಗನೇ ಕುರುಡೆ ಆದಿತ್ತೆನಾ? ಇತ್ತೆ ಆಯಗ್ ದೃಷ್ಟಿ ಎಂಚ ಬತ್ತ್ಂಡ್?” ಅಂದ್‌ದ್ ಅಕ್ಲೆಡ ಕೇಂಡೆರ್.

²⁰ಆಯ ಅಪ್ಪೆಅಮ್ಮೆ, “ಉಂಬೆ ಎಂಕ್ಲೆನ ಮಗೆನೇ ಬೊಕ್ಕ ಆಯೆ ಕುರುಡೆ ಆದ್ ಪುಟ್ಟುದಿತ್ತೆ ಪಂಡ್ದ್‌ಲಾ ಎಂಕ್ಲೆಗ್ ಗೊತ್ತುಂಡು.

²¹ಆಂಡ ದೃಷ್ಟಿ ಎಂಚ ಬತ್ತ್ಂಡ್ ಅಂದ್‌ದ್ ಎಂಕ್ಲೆಗ್ ತೆರಿದ್‌ಜೆ. ದೃಷ್ಟಿ ಏರ್ ಕೊರಿಯೆರ್ ಪಂಡ್ದ್‌ಲಾ ಎಂಕ್ಲೆಗ್ ತೆರಿದ್‌ಜೆ. ಉಂಬ್ಯಡನೇ ಕೇನ್ಲೆ, ಉಂಬೆ ಪ್ರಾಯದಾಯೆ ಅತ್ತಾ, ಉಂಬೆನೇ ತನ ವಿಷಯೊನು ಪನ್ಪೆ,” ಅಂದ್‌ದ್ ಉತ್ತರ ಕೊರಿಯೆರ್.

²²ಆಯನ ಅಪ್ಪೆಅಮ್ಮೆ ಯೆಹೂದ್ಯೆರೆಗ್ ಪೋಡಿನೆಡ್ದ್ ಇಂಚ ಪಂಡೆರ್. ದಾಯೆ ಪಂಡ, ಏರಾಂಡಲಾ ಯೇಸುನು “ಕ್ರಿಸ್ತೆ” ಅಂದ್‌ದ್ ನಂಬಿಯೆರ್ಡ, ಅಂಚಿತ್ತಿನಾಯಗ್ ಸಭೆಡ್ದ್ ಪಿದಯಿ ಪಾಡೊಡು ಅಂದ್‌ದ್ ಯೆಹೂದ್ಯೆರ್ ಅವೆಡ್ದುಂಬು ತೀರ್ಮಾನ ಮಲ್ತ್‌ದಿತ್ತೆರ್.

²³“ಉಂಬೆ ಪ್ರಾಯದಾಯೆ, ಉಂಬ್ಯಡನೇ ಕೇನ್ಲೆ,” ಅಂದ್‌ದ್ ಆಯ ಅಪ್ಪೆಅಮ್ಮೆ ಪಂಡಿನೆಕ್ಕ್ ಉಂದೇ ಕಾರಣ.

²⁴ಅಕುಲು ಪುಟ್ಟುಡೇ ಕುರುಡೆ ಆದಿತ್ತಿ ನರಮಾನಿನ್ ಕುಡ ಲೆತ್ತ್‌ದ್, “ಈ ದೇವೆರೆಗ್ ಮೈಮೆ ಕೊರ್ಲ; ಆ ನರಮಾನಿ ಪಾಪಿಷ್ಟೆ ಅಂದ್‌ದ್ ಎಂಕುಲು ತೆರಿದ,” ಪನ್ನಗ

²⁵ಆ ಕುರುಡೆ, “ಆಯೆ ಪಾಪಿಷ್ಟೆನಾ ದಾನ್ನ ಎಂಕ್ ತೆರಿದ್‌ಜಿ, ಆಂಡ ಒಂಜಿ ಮಾತ್ರ ಗೊತ್ತುಂಡು, ಯಾನ್ ಕುರುಡೆ ಆದಿತ್ತೆ, ಇತ್ತೆ ಎಂಕ್ ಕಣ್ಣ್ ತೋಜುಂಡು,” ಪಂಡೆ.

²⁶ಅಕುಲು ಆಯಡ, “ನಿಕ್ಕ್ ಆಯೆ ದಾದ ಮಲ್ತೆ, ನಿಕ್ಕ್ ದೃಷ್ಟಿ ಎಂಚ ಕೊರಿಯೆ?” ಅಂದ್‌ದ್ ಕೇಂಡಿನೆಕ್ಕ್

²⁷ಆ ಕುರುಡೆ, “ಯಾನ್ ನಿಕ್ಲೆಗ್ ಅಪಗನೆ ಪಂತೆ ಅತ್ತಾ, ನಿಕುಲು ಕೇಂಡ್ದ್‌ಜರ್, ದಾಯೆ ಕುಡ ಕುಡ ಕೇನೊಂದುಲ್ಲರ್? ದಾನೆ, ನಿಕ್ಲೆಗ್ಲಾ ಆಯನ ಶಿಷ್ಯೆರ್ ಆವೆರೆ ಮನಸ್ ಉಂಡಾ?” ಪಂಡೆ.

²⁸ಐಕ್ ಅಕುಲು ಆಯಗ್ ನೆರ್ದ್, “ಈ ಆ ನರಮಾನಿನ ಶಿಷ್ಯೆ, ಎಂಕುಲು ಮೋಶೆನ ಶಿಷ್ಯೆರ್.

²⁹ಮೋಶೆಡ ದೇವೆರ್ ಪಾತೆರ್‌ದೆ ಎಂಕುಲು ತೆರಿದ, ಆಂಡ ಉಂಬೆ ಒಲ್ತುಡ್ದು ಬತ್ತಿನಾಯೆ ಅಂದ್‌ದ್ ಎಂಕ್ಲೆಗ್ ತೆರಿದ್‌ಜಿ,” ಪಂಡೆರ್.

³⁰ಐಕ್ ಆ ಕುರುಡೆ, “ಆಯೆ ಎನ ಕಣ್ಣ್‌ಗ್ ದೃಷ್ಟಿ ಕೊರಿಯೆ ಬೊಕ್ಕ ಆಯೆ ಒಲ್ತುಡ್ದು ಬೈದಿನಿ ಅಂದ್‌ದ್ ನಿಕ್ಲೆಗ್ ತೆರಿಯಂದಿನ ಬಾರಿ ಅಚ್ಚಿರದ ಸಂಗತಿ!

³¹ಪಾಪಿಷ್ಟೆರೆನ ಪ್ರಾರ್ಥನೆನ್ ದೇವೆರ್ ಕೇನುಜೆ. ದೇವೆರೆ ಭಕ್ತೆರಾದ್, ದೇವೆರೆ ಚಿತ್ತದ ಲೆಕ್ಕ ನಡಪುನಾಯನ ಪ್ರಾರ್ಥನೆನ್ ಕೇನ್ವೆ ಎಂಕುಲು ತೆರಿದ.

³²ಪುಟ್ಟು ಕುರುಡಗ್ ಏರಾಂಡಲಾ ದೃಷ್ಟಿ ಕೊರ್ತಿನೆನ್ ಲೋಕದ ಆದಿಡ್ದ್ ಏರ್ಲಾ ಕೇಂಡ್ದ್‌ಜೆರ್.

³³ಉಂಬೆ ದೇವೆರೆಡ್ದ್ ಬೈದಿನಾಯೆ ಆದಿತ್ತಿಜೆಡ, ಇಂಚಿತ್ತಿ ಕೆಲಸೊಲೆನ್ ಮಲ್ತುದ್ವಯೆ,” ಪಂಡೆ.

³⁴ಉಂದೆನ್ ಕೇಂಡ್ದ್ ಅಕುಲು, “ಈ ಪಾಪೊಡೇ ಪುಟ್ಟುದು ಬುಲೆದಿನಾಯೆ, ಎಂಕ್ಲೆಗ್ ಬೋಧನೆ ಮಲ್ಪುವನಾ?” ಅಂದ್‌ದ್ ಆಯನ್ ಸಭೆಡ್ದ್ ಪಿದಯಿ ಪಾಡಿಯೆರ್.

³⁵ಆಯನ್ ಪಿದಾಯಿ ಪಾಡ್ದೆರ್ ಅಂದ್‌ದ್ ಯೇಸು ತೆರಿದ್ ಆಯನ್ ನಾಡ್ದ್ ತಿಕ್ಕ್‌ನಗ, “ಈ ನರಮಾನಿ ಮಗನ್ ನಂಬುವನಾ?” ಅಂದ್‌ದ್ ಕೇಂಡೆ.

³⁶ಐಕ್ ಆಯೆ, “ಆಯೆ ಏರ್ ಕರ್ತವಾ, ತೆರಿಪಾಂಡ ಕಂಡಿತ ನಂಬುವೆ,” ಪಂಡೆ.

³⁷ಐಕ್ ಯೇಸು, “ಈ ಆಯನ್ ತೂತ ಅತ್ತಂದೆ ನಿನಡ ಇತ್ತೆ ಪಾತೆರೊಂದುಪ್ಪು ಯಾನೇ ಆಯೆ.” ಪಂಡೆ.

³⁸ಆಯೆ, “ಅಂದ್ ಕರ್ತವಾ, ನಂಬುವೆ! ಅಂದ್‌ದ್ ಆಯಗ್ ಅಡ್ಡಬೂರ್ಯೆ.”

³⁹ಅಪಗ ಯೇಸು, “ಕುರುಡೆರೆಗ್ ದೃಷ್ಟಿ ಕೊರಿಯೆರೆ ಬೊಕ್ಕ ಕಣ್ಣ್ ಇತ್ತಿನಾಕುಲೆಗ್ ಕುರುಡೆರ್ ಆವೊಡು ಅಂದ್‌ದ್ ಯಾನ್ ನ್ಯಾಯತೀರ್ಪುಗಾದ್ ಈ ಲೋಕೊಗು ಬೈದೆ.”

⁴⁰ಈ ಪಾತೆರೊನು ಆಯ ಕೈತಲ್ ಇತ್ತಿ ಪರಿಸಾಯೆರ್ ಕೇಂಡ್ದ್, “ಎಂಕುಲುಲಾ ಕುರುಡೆರಾ?” ಅಂದ್‌ದ್ ಕೇಂಡಿನಪಗ

⁴¹ಯೇಸು ಅಕ್ಲೆಡ, “ನಿಕುಲು ಕುರುಡೆರ್ ಆದಿತ್ವರ್ಡ, ನಿಕ್ಲೆಗ್ ಪಾಪ ಇತ್ತ್‌ದ್ವಂದ್, ನಿಕ್ಲೆಗ್ ಕಣ್ಣ್ ತೋಜುಂಡು, ಅಂದ್‌ದ್ ಪನೊಂದುಪ್ಪುನೆಡ್ದ್ ನಿಕುಲು ಪಾಪಿಲು ಆದುಲ್ಲರ್.”