Read Tulu ಅಪೊ.ಕ್ರಿ 12 Bible Online

ಅಪೊ.ಕ್ರಿ 12 - Tulu bible

ಅಪೊ.ಕ್ರಿ 12

¹ಆ ಸಮಯೊಡೇ ಅರಸು ಹೆರೋದೆ ಸಭೆತ ಕೆಲವು ಜನೊಕುಲೆಗ್ ಭಂಗ ಕೊರಿಯೆರೆ ಸುರು ಮಲ್ತೆ.

²ಯೋಹಾನನ ಪಲಯೆ ಯಾಕೋಬುನು ಕತ್ತಿಡ್ದ್ ಕೆರ್ಪಾಯೆ.

³ಯೆಹೂದ್ಯೆರೆಗ್ ಸಂತೋಷ ಆಂಡ್ ಅಂದ್‌ದ್ ಗೊತ್ತಾಯಿನೆಡ್ದ್ ಪೇತ್ರನ್ಲಾ ಪತ್ತಿಯೆರೆ ಪೋಯೆರ್. ಉಂದು ಆತಿನಿ ಯೆಹೂದ್ಯೆರೆನ ಪುಳಿ ಇಜ್ಜಂದಿ ರೊಟ್ಟಿಲೆ ಪರ್ಬದ ಸಮಯೊಡು.

⁴ಆಯನ್ ಪಸ್ಕ ಪರ್ಬೊಡ್ದು ಬೊಕ್ಕ ಜನೊಕುಲೆ ಎದುರು ಉಂತಾವೊಡು ಪನ್ಪಿನ ಆಲೋಚನೆಡ್ದ್ ಸೆರೆಮನೆಟ್ ಪಾಡ್ದ್‌ ಆಯನ್ ಕಾಪೆರೆ ನಾಲ್ವೆರ್ ನಾಲ್ವೆರ್ ಸೈನಿಕೆರಿತ್ತಿನ ನಾಲ್ ಗುಂಪುಲೆ ವಶೊಕು ಕೊರಿಯೆ.

⁵ಪೇತ್ರೆ ಸೆರೆಮನೆಟ್ಟ್‌ ಉಪ್ಪುನಗ ಸಭೆತಾಕುಲು ಆಯಗಾದ್ ಇಡೆ ಬುಡಂದೆ ದೇವೆರೆಡ ಪ್ರಾರ್ಥನೆ ಮಲ್ತೊಂದಿತ್ತೆರ್.

⁶ಹೆರೋದೆ ಪೇತ್ರನ್ ಜನೊಕುಲೆನ ಎದುರು ಉಂತಾವೊಡು ಪಂಡ್ದ್ ಆ ರಾತ್ರೆಡ್ ರಡ್ಡ್ ಸರಪೊಳಿಡ್ದ್ ಆಯನ್ ಕಟ್ಟ್ ದೀದ್ ರಡ್ಡ್ ಸೈನಿಕೆರೆ ನಡುಟು ನಿದ್ರೆ ಮಲ್ತೊಂದಿತ್ತೆ. ಕಾಪುನಾಕುಲು ಬಾಕಿಲ್‌ದವುಲು ಉಂತುದು ಸೆರೆಮನೆನ್ ಕಾತೊಂದಿತ್ತೆರ್.

⁷ಒರನೆ ಕರ್ತವ ದೂತೆ ಪೇತ್ರನ ಎದುರು ಉಂತಿಯೆ. ಆಯೆ ಇತ್ತಿನ ಕೋಣೆಡ್ ಬೊಲ್ಪಾಂಡ್. ಆಯೆ ಪೇತ್ರ ಮರ್ಗಿಲ್‌ಗ್ ತಟ್ಟ್‌ದ್ ಲಕ್ಕಾದ್, “ಬೇಗ ಲಕ್ಕ್‌ಲ,” ಪಂಡೆ. ಅಪಗನೆ ಆಯನ ಕೈಕ್ ಪಾಡ್ದಿನ ಸಂಕಲೆ ಕದೆಲ್‌ದ್ ಬೂರ್‌ಂಡ್.

⁸ಆ ದೂತೆ ಆಯಗ್ ಸೊಂಟ ಕಟ್ಟೊಂದು, ನಿನ ಜೋಡು ತಿಕ್ಕಾವೊನ್ಲ ಅಂದ್‌ದ್ ಪನ್ನಗ ಆಯೆ ಅಂಚೆನೇ ಮಲ್ತೆ. ನಿನ ಮೇಲ್ ಅಂಗಿನ್ ಪಾಡೊಂದು ಎನ ಪಿರವುಡು ಬಲ ಅಂದ್‌ದ್ ಪಂಡೆ.

⁹ಪೇತ್ರೆ ಆಯನ ಬೆರಿಯೇ ಪೋವೊಂದು ದೂತಡ್ದ್ ನಡತಿನ ಸಂಗತಿ ನಿಜವಾಯಿನವು ಅಂದ್‌ದ್ ತೆರಿಯಂದೆ ತಾನ್ ತೂಯಿನವು ದರ್ಶನ ಅಂದ್‌ದ್ ಎನ್ನೊಂಡೆ.

¹⁰ಅಕುಲು ಸುರುತ್ತಲಾ ರಡ್ಡನೆದಲಾ ಕಾಪುನಾಕುಲೆನ್ ಕಡತ್‌ದ್ ಪೇಂಟೆಗ್ ಪೋಪಿನ ಕರ್ಬದ ಬಾಕಿಲ್‌ಗ್ ಬನ್ನಗ ಅವು ತನ್ನಾತೆಗ್ ತಾನೇ ಜತ್ತ್ಂಡ್. ಅಕುಲು ಪಿದಯಿ ಬತ್ತ್‌ದ್ ಒಂಜಿ ಓಣಿನ್ ಕಡತ್‌ದ್ ಪೋಯಿ ಬೊಕ್ಕ; ಅಪಗನೆ ಆ ದೂತೆ ಆಯನ್ ಬುಡ್ದು ಪೋಯೆ.

¹¹ನಡತಿನ ಸಂಗತಿ ಪೇತ್ರಗ್ ಬೊಕ್ಕ ತೆರಿದ್, “ಕರ್ತವೆ ತನ ದೂತನ್ ಕಡಪುಡ್ದು ಹೆರೋದ್ಯ ಕೈಡ್ದ್‌ಲಾ ಯೆಹೂದ್ಯೆರೆ ಜನೊಕುಲೆಡ್ದ್‌ಲಾ ಮಾತ ಬರ್ಪಿನ ಕಷ್ಟೊಡ್ದುಲಾ ಬುಡ್ಪಾಯೆ,” ಅಂದ್‌ದ್ ನಿಜಾದ್ ಎಂಕ್ ತೆರಿದ್ ಬತ್ತ್ಂಡ್.

¹²ಐಡ್ದ್ ಬೊಕ್ಕ ಆಯೆ ಆಲೋಚನೆ ಮಲ್ತೊಂದು ಮಾರ್ಕೆ ಪನ್ಪಿನ ಯೋಹಾನನ ಅಪ್ಪೆ ಆಯಿ ಮರಿಯನ ಇಲ್ಲಗ್ ಪೋಯೆ. ಅಲ್ಪ ಮಸ್ತ್ ಜನ ಸೇರೊಂದು ಪ್ರಾರ್ಥನೆ ಮಲ್ತೊಂದಿತ್ತೆರ್.

¹³ಪೇತ್ರೆ ಬಾಕಿಲ್ ಬೊಟ್ಟುನಗ ರೋದ ಪನ್ಪಿನ ಒರ್ತಿ ಚಾಕ್ರಿದಾಲ್ ತೂವೆರೆ ಬತ್ತಲ್

¹⁴ಆಲ್ ಪೇತ್ರನ ಸ್ವರತ್ತ ಗುರ್ತ ಪತ್ತ್‌ದ್ ಸಂತೋಷೊಡು ಬಾಕಿಲ್‌ನ್ ಜಪ್ಪಂದೆ ಉಲಯಿ ಪಾರ್‌ಪೋದು ಪೇತ್ರೆ ಬಾಕಿಲ್‌ದ ಎದುರು ಉಂತುದೆ ಅಂದ್‌ದ್ ತೆರಿಪಾಯಲ್.

¹⁵ಅಕುಲು ಆಲೆಗ್ ನಿಕ್ಕ್ ಮರ್ಲ್ ಪತ್ತ್‌ದ್ಂಡ್ ಅಂದ್‌ದ್ ಪಂಡೆರ್ ಆಂಡ ಆಲ್ ಯಾನ್ ಸತ್ಯವಾದ್ ಪನ್ಪೆ ಅಂದ್‌ದ್ ಪನೊಂದುಪ್ಪುನಗ, ಅಕುಲು ಆಯನ ದೂತೆ ಆದುಪ್ಪೊಡು ಅಂದ್‌ದ್ ಪಂಡೆರ್.

¹⁶ಆಂಡ ಪೇತ್ರೆ ನನಲಾ ಬಾಕಿಲ್ ಬೊಟ್ಟೊಂದೆ ಉಪ್ಪುನಗ ಅಕುಲು ಬಾಕಿಲ್ ಜತ್ತ್‌ದ್ ಆಯನ್ ತೂದು ಸೋದ್ಯ ಆಯೆರ್.

¹⁷ಆಂಡ ಆಯೆ ಅಕ್ಲೆಗ್ ಮನಿಪಂದೆ ಉಪ್ಪರೆ ಕೈಸನ್ನೆ ಮಲ್ತೆ. ತನನ್ ಕರ್ತವೆ ಸೆರೆಮನೆಡ್ದ್ ಪಿದಯಿ ಲೆತ್ತೊಂದು ಬತ್ತಿನ ವಿಷಯೊನು ಒಂಜೊಂಜಾದ್ ತೆರಿಪಾದ್ ಈ ವಿಷಯೊಲೆನ್ ಯಾಕೋಬುಗ್ಲಾ ಸಹೋದರೆರೆಗ್ಲಾ ತೆರಿಪಾಲೆ ಅಂದ್‌ದ್ ಬೇತೆ ಜಾಗ್‌ಗ್ ಪೋವರೆ ಅಲ್ತ್‌ಡ್ದ್ ಪಿದಾಡಿಯೆ.

¹⁸ಮನದಾನಿ ಪೇತ್ರೆ ಇಜ್ಜಾಂದಿನ ತೂದು ಅಲ್ಪ ಕಾಪುನಾಕುಲೆಗ್ ಪೋಡಿಗೆ ಆಂಡ್.

¹⁹ಹೆರೋದೆ ಆಯನ್ ಓಲೋಲು ನಾಡ್‌ಂಡಲಾ ಆಯೆ ತಿಕ್ಕಂದಿನೆಡ್ದ್ ಕಾಪುನಾಕುಲೆಗ್ ಮರಣದ ದಂಡನೆ ಕೊರಿಯೆ. ಐಡ್ದ್ ಬೊಕ್ಕ ಆಯೆ ಯೂದಾಯೊಡ್ದು ಕೈಸರೆಯಗ್‌ ಪೋದು ಅಲ್ಪ ಇತ್ತೆ.

²⁰ಆ ಸಮಯೊಡು ತೂರ್ ಬೊಕ್ಕ ಸೀದೋನ್ ಜನೊಕುಲೆ ಮಿತ್ತ್ ಹೆರೋದನ ಬಾರಿ ಕೋಪ ಇತ್ತಿನೆನ್ ತೂದು, ಅಕುಲು ಒಂಜೇ ಮನಸ್‌ಡ್ ಆಯ ಕೈತಲ್‌ ಬತ್ತ್‌ದ್ ಅರಸುನ ಅರಮನೆದ ಅಧಿಕಾರಿ ಆದುಪ್ಪುನ ಬ್ಲಾಸ್ತನ್ ಮೆಚ್ಚಾದ್ ಸಮಾಧಾನ ಆವೊಡು ಅಂದ್‌ದ್ ಅರಸುನು ಕೇನೊಂಡೆರ್. ದಾಯೆಗ್ ಪಂಡ, ಅಕ್ಲೆನ ಸೀಮೆಗ್ ಹೆರೋದನ ಸೀಮೆಡ್ದ್ ದಾನ್ಯ ಬರೊಂದಿತ್ತ್‌ಂಡ್.

²¹ಒಂಜಿ ದಿನ ನಿಗಂಟ್ ಮಲ್ತೆ. ಆ ದಿನ ಹೆರೋದೆ ರಾಜಕುಂಟುನು ಪಾಡೊಂದು ರಾಜಾಸನದ ಮಿತ್ತ್ ಕುಲ್ಲುದು ಅಕ್ಲೆಗ್ ಭಾಷಣ ಮಲ್ತೆ.

²²ಉಂದು ನರಮಾನಿನ ಪಾತೆರ ಅತ್ತ್ ದೇವೆರೆನವೇ ಆದುಂಡು ಪಂಡ್ದ್ ಬೊಬ್ಬೆ ಪಾಡಿಯೆರ್.

²³ಆ ಮೈಮೆನ್ ದೇವೆರೆಗ್ ಕೊರಂದಿನೆಡ್ದ್ ಕರ್ತವ ದೂತೆ ಆ ಗಳಿಗೆಡೇ ಸೀಕ್‌ಡ್ ಪಾಡ್ದ್ ಆಯೆ ಪುರಿ ಬೂರ್ದ್ ಸೈತೆ.

²⁴ಆಂಡ ದೇವೆರೆ ಪಾತೆರ ಜನೊಕುಲೆಗ್ ಪನೊಂದಿತ್ತಿನೆಡ್ದ್ ನಂಬುನಾಕುಲು ನನಲಾ ಹೆಚ್ಚೊಂದು ಬತ್ತೆರ್.

²⁵ಬಾರ್ನಬೆ ಸೌಲೆ ಅಕ್ಲೆನ ಸೇವೆ ತೀರಿಸಾದ್ ಮಾರ್ಕೆ ಪನ್ಪಿನ ಮೇಲ್‌ಪುದರ್ ಇತ್ತಿ ಯೋಹಾನನ್ ಲೆತ್ತೊಂದು ಯೆರೂಸಲೇಮುಡ್ದು ಪಿರ ಬತ್ತೆರ್.