Read Tulu ಅಪೊ.ಕ್ರಿ 2 Bible Online

ಅಪೊ.ಕ್ರಿ 2 - Tulu bible

ಅಪೊ.ಕ್ರಿ 2

¹ಪಂಚಾಶತಮ[1] ಪರ್ಬದ ದಿನ ಬನ್ನಗ ಅಕುಲು ಮಾತೆರ್ಲಾ ಒಂಜೇ ಮನಸ್‌ಡ್ ಒಂಜಿ ಜಾಗ್‌ಡ್ ಸೇರ್ದಿತ್ತೆರ್.

²ಅಪಗ ಬಿರುಗಾಳಿ ಬೀಜುನಂಚ ಬಾನೊಡು ಒಂಜಿ ಶಬ್ಧ ಉಂಡಾದ್ ಅಕುಲು ಕುಲ್ಲುದಿತ್ತಿನ ಇಲ್ಲಡ್ ದಿಂಜಿದ್ ಪೋಂಡು.

³ಬೊಕ್ಕ ಅರ್ಲೊಂದಿತ್ತಿ ತೂತ ಲೆಕ್ಕಂತಿನ ನಾಲಯಿಲು ಪಾಲ್ ಆದ್ ಅಕ್ಲೆಗ್ ತೋಜಿದ್ ಅವು ಒರಿ ಒರಿಯನ ಮಿತ್ತ್ ಕುಲ್ಲುಂಡು.

⁴ಅಪಗ ಅಕುಲು ಮಾತೆರ್ಲಾ ಪರಿಶುದ್ಧಾತ್ಮದ ಶಕ್ತಿಡ್ ದಿಂಜಿದ್ ಬೇತೆ ಬೇತೆ ಭಾಷೆಲೆಡ್ ಪಾತೆರಿಯೆರೆ ಸುರು ಮಲ್ತೆರ್.

⁵ಬಾನದ ತಿರ್ತ್ ಉಪ್ಪು ಮಾತ ಜನಾಂಗೊಲೆಡ್ದ್ ಬೈದಿನ ಭಕ್ತೆರಾಯಿ ಯೆಹೂದ್ಯೆರ್, ಯೆರೂಸಲೇಮುಡು ಒಟ್ಟಾದಿತ್ತೆರ್.

⁶ಆ ಮಲ್ಲ ಸ್ವರೊನು ಕೇಂಡ್ದ್ ಜನೊಕುಲೆನ ಒಂಜಿ ಮಲ್ಲ ಗುಂಪು ಸೇರ್ದ್ ಬತ್ತ್‌ದ್ ಪ್ರತಿ ಒರಿಯಡ ತನ್ಕುಲೆ ಭಾಷೆಡ್ ಪಾತೆರುನೆನ್ ಕೇಂಡ್ದ್ ಅಚ್ಚಿರೊಡು ದಿಂಜಿದ್ ಪೋಯೆರ್. ಮಾತೆರ್ಲಾ ಬೆಚ್ಚಿದ್ ಒರಿಯಡೊರಿ ಪಂಡಿನಿ ದಾನೆಂದ್ಂಡ, “ಇಂದಾ, ಪಾತೆರೊಂದುಪ್ಪುನ ಮೊಕುಲು ಗಲಿಲಾಯದಾಕುಲ್ಲತ್ತಾ?

⁷

⁸ಆಂಡ ನಮ ಸ್ವಂತ ಭಾಷೆಡೇ ಮೊಕುಲು ಪಾತೆರುನೆನ್ ಕೇನೊಂದುಲ್ಲತ್ತಾ ಉಂದು ಎಂಚ?

⁹ನಮ್ಮ ನಡುಟು ಪಾರ್ಥ್ಯೆರ್, ಮೇದ್ಯೆರ್, ಎಲಾಮ್ಯೆರ್, ಮೆಸೊಪೊತಾಮ್ಯೆರ್, ಯೂದಾಯೆರ್, ಕಪ್ಪದೋಕ್ಯೆರ್, ಪೊಂತ, ಆಸ್ಯ,

¹⁰ಫ್ರುಗ್ಯ, ಪಂಫುಲ್ಯ, ಐಗುಪ್ತ, ಕುರೇನೆದ ಬರಿಟ್ಟುಪ್ಪು ಲಿಬ್ಯ ಈ ಜಾಗ್‌ಡುಪ್ಪುನಾಕಲುಲಾ ರೋಮುಡ್ದು ಬತ್ತಿ ಪ್ರಯಾಣಿಕೆರ್, ಐಟ್ಟ್ ಕೆಲೆವೆರ್ ಪುಟ್ಟು ಯೆಹೂದ್ಯೆರ್, ಬಾಕಿದಾಕುಲು ಮತೊಕು ಸೇರ್ದಿನಾಕುಲುಲಾ ಕ್ರೇತ್ಯೆರ್, ಅರಾಬ್ಯೆರ್ ಆದುಪ್ಪು ನಮ್ಮಕುಲು ನಮ ಭಾಷೆಡೇ ದೇವೆರೆನ ಮಲ್ಲಕಾರ್ಯೊಲೆ ಬಗೆಟ್ ಪನ್ಪಿನೆನ್ ಕೇನೊಂದುಲ್ಲತ್ತಾ,” ಅಂದ್‌ದ್ ಪಂಡೆರ್.

¹¹

¹²ಮಾತೆರ್ಲಾ ಅಚ್ಚಿರೊಡು, “ಉಂದು ದಾನೆ ಆದುಪ್ಪು?” ಅಂದ್‌ದ್ ಒರಿಯಡೊರಿ ಕೇನೊಂದಿತ್ತೆರ್.

¹³ಕೆಲೆವೆರ್, “ಮೊಕುಲು ಪೊಸ ದ್ರಾಕ್ಷಾರಸ ಪರ್ದ್ ಅಮಲಾತೆರ್,” ಅಂದ್‌ದ್ ಗೇಲಿ ಮಲ್ತೆರ್.

¹⁴ಅಪಗ ಪೇತ್ರೆ ಪತ್ತೊಂಜಿ ಜನ ಅಪೊಸ್ತಲೆರೆ ಒಟ್ಟುಗು ಉಂತುದು ಮಲ್ಲ ಸ್ವರೊಟ್ಟು ಅಕ್ಲೆಗ್ ಇಂಚ ಬೋಧನೆ ಪನಿಯೆರೆ ಸುರು ಮಲ್ತೆ. “ಯೆಹೂದ್ಯೆರೇ, ಯೆರೂಸಲೇಮುಡುಪ್ಪು ಮಾತ ಜನೊಕುಲೇ, ಈ ಸಂಗತಿ ದಾನೆ ಅಂದ್‌ದ್ ನಿಕ್ಲೆಗ್ ಗೊತ್ತಾಪಿಲೆಕ್ಕ ಎನ ಪಾತೆರೊಗು ಕೆಬಿ ಕೊರ್ಲೆ.

¹⁵ನಿಕುಲು ಎನ್ನಿಲೆಕ್ಕ ಮೊಕುಲು ಅಮಲೇರ್ದಿನಕುಲತ್ತ್‌, ಇತ್ತೆ ಕಾಂಡೆ ಒಂರ್ಬ ಗಂಟೆ ಆತಿನಾತೆ.

¹⁶ಆಂಡ ಈ ಪೊರ್ತು ಮೂಲು ನಡತೊಂದಿತ್ತಿನ ಬಗೆಟ್ ಯೋವೆಲ್ ಪ್ರವಾದಿಡ್ದ್ ಪಂಡಿನವೇ,

¹⁷‘ಕಡೇ ದಿನೊಟು ಯಾನ್ ಮಾತ ಜನೊಕುಲೆ ಮಿತ್ತ್ ಎನ ಆತ್ಮೊನು ಕಡಪುಡುವೆ. ನಿಕ್ಲೆ ಅಂಜೊವುಲ್ಲಾ ಪೊಂಜೊವುಲ್ಲಾ ಪ್ರವಾದನೆ ಮಲ್ಪೆರ್, ನಿಕ್ಲೆ ಜವನ್ಯೆರ್ ದರ್ಶನೊಲೆನ್ ತೂಪೆರ್, ನಿಕ್ಲೆನ ಹಿರಿಯಾಕುಲೆಗ್ ಕನ ಕಟ್ಟು.

¹⁸ಉಂದತ್ತಂದೆ ಆ ದಿನೊಟು ಎನ ದಾಸೆರೆ ಮಿತ್ತ್‌ಲಾ ದಾಸಿಯೆರೆ ಮಿತ್ತ್‌ಲಾ ಎನ ಆತ್ಮೊನು ಕಡಪುಡ್ದು ಅಕುಲುಲಾ ಪ್ರವಾದನೆ ಮಲ್ಪೆರ್.

¹⁹ಕರ್ತವೆ ಕುಡೊರ ಬರ್ಪಿನ ಗಂಭಿರದ ದಿನ ಬರ್ಪಿನೆಕ್ಕ್ ದುಂಬು ಯಾನ್ ಬಾನೊಡು ಕಾರ್ನಿಕೊಲೆನ್ ತೋಜಾವೆ, ಭೂಮಿಡ್ಲಾ ಗುರ್ತೊಲೆನ್ ಉಂಡು ಮಲ್ಪುವೆ, ನೆತ್ತೆರ್, ತೂ ಬೊಕ್ಕ ಮಿತ್ತ್ ಪೋಪಿನ ಪುಗೆ ಮಾತ ಉಪ್ಪು, ಸೂರ್ಯೆ ಕತ್ತಲೆ ಆವು, ಚಂದ್ರೆ ನೆತ್ತೆರ್‌ದಂಚ ಕೆಂಪಾವು.

²⁰

²¹ಆಂಡ ಕರ್ತವ ಪುದರ್‌ನ್ ಲೆಪ್ಪುನಾಕುಲೆಗ್ ರಕ್ಷಣೆ ಆವು,’ ಅಂದ್‌ದ್ ದೇವೆರ್ ಪನ್ಪೆ.

²²“ಇಸ್ರಾಯೇಲ್ ಜನೊಕುಲೇ, ಎನ ಪಾತೆರೊಲೆನ್ ಕೇನ್ಲೆ, ನಿಕ್ಲೆಗ್ ತೆರಿದುಪ್ಪುಲೆಕ್ಕ ದೇವೆರ್ ನಜರೇತ್‌ದ ಯೇಸುನ ಕೈಡ್ದ್ ಬಲತ್ತ ಕಾರ್ಯೊಲೆನ್ಲಾ ಕಾರ್ನಿಕೊಲೆನ್ಲಾ ಗುರ್ತೊಲೆನ್ಲಾ ನಿಕ್ಲೆ ಉಲಯಿ ಮಲ್ತಿನೆಡ್ದ್ ಆಯೆ ನಿಕ್ಲೆಗ್ ಮೆಚ್ಚಿಗೆ ಆತಿನಾಯೆ ಪಂಡ್ದ್ ನಿಕ್ಲೆಗ್ ತೋಜಾದ್ ಕೊರಿಯೆ.

²³ಆ ಯೇಸು, ದೇವೆರೆನ ಯೋಜನೆದ ಪ್ರಕಾರ ನಿರ್ಧಾರ ಆತಿನೆಡ್ದ್ ನಿಕುಲು ಅನ್ಯಾಯಗಾರೆರೆ ಕೈಕ್ ಕೊರ್ದು ಆಯನ್ ಕ್ರುಸ್ಸುಗ್ ಪಾಡ್ದ್ ಕೆರಿಯರ್.

²⁴ಆಂಡ ದೇವೆರ್ ಆಯನ್ ಮರಣದ ಬೇನೆಡ್ದ್ ಬುಡ್ಪಾದ್ ಲಕ್ಕಾಯೆ. ದಾಯೆಗಂದ್ಂಡ, ಆಯನ್ ಮರಣ ಬಂಧನೊಡು ದೀಯೆರೆ ಸಾದ್ಯ ಇಜ್ಜಾಂಡ್.

²⁵ಆಯನ ಸಂಗತಿಡ್ ದಾವೀದೆ, ‘ಕರ್ತವೆ ಏಪಲಾ ಎನ ಎದುರುಡೇ ಉಪ್ಪುನೆನ್ ತೂವೊಂದಿತ್ತೆ, ಯಾನ್ ಪಂದಂದಿಲೆಕ್ಕ ಆಯೆ ಎನ ಬಲತ್ತ ಮರ್ಗಿಲ್‌ಡೇ ಉಲ್ಲೆ.

²⁶ಅಂಚಾಯಿನೆಡ್ದ್ ಎನ ಉಡಲ್ ಸಂತೋಷೊಡುಂಡು; ಎನ ನಾಲಯಿ ಆನಂದೊಡು ಪಾತೆರೊಂದುಂಡು; ಎನ ಶರೀರ ನಿರೀಕ್ಷೆಡ್ ನಿಲೆ ಆದುಂಡು.

²⁷ದಾಯೆಗಂದ್ಂಡ, ಈ ಎನ ಜೀವಾತ್ಮೊನು ಪಾತಾಳೊಡು ಬುಡ್ಪುಜ. ನಿನ ಮೋಕೆದಾಯಗ್ ಕುರಿಯುನ ಅವಸ್ಥೆನ್‌ ತೋಜಾವುಜ.

²⁸ಜೀವದ ಸಾದಿನ್ ಎಂಕ್ ತೆರಿಪಾಯ. ನಿನ ಎದುರು ಯಾನ್ ಸಂತೋಷೊಡು ಉಪ್ಪುಲೆಕ್ಕ ಮಲ್ಪುವ,’ ಅಂದ್‌ದ್ ಪನ್ತೆ.

²⁹“ಸಹೋದ್ರೆರೇ, ಆಂಡ ಪೂರ್ವಜೆರ್ ಆದಿತ್ತಿನ ದಾವೀದನ ಸಂಗತಿಡ್ ಯಾನ್ ಧೈರ್ಯ ಮಲ್ತ್‌ದ್ ನಿಕ್ಲೆಡೊಪ್ಪ ಪಾತೆರೊಲಿ ಅವು ದಾನೆಂದ್ಂಡ ಆಯೆ ಸೈತಿ ಬೊಕ್ಕ ಆಯನ್ ಸಮಾಧಿ ಮಲ್ತೆರ್. ಆಯನ ಸಮಾಧಿ ಇನಿ ಮುಟ್ಟಲಾ ನಮ್ಮಲ್ಪನೇ ಉಂಡು.

³⁰ದಾವೀದೆ ಪ್ರವಾದಿ ಆದಿತ್ತ್‌ದ್ ನಿನ ಸಂತತಿಡೇ ಯಾನ್‌ ಒರಿಯನ್ ನಿನ ಗದ್ದಿಗೆಡ್ ಕುಲ್ಲಾವೆ ಪಂಡ್ದ್ ದೇವೆರ್ ಆಜ ಪಾಡ್ದ್ ಪನ್ತಿನೆನ್ ತೆರಿದಿನಾಯೆ ಆದ್‌

³¹ದುಂಬಗ್ ಆಪಿನೆನ್ ತೆರಿದ್ ಕ್ರಿಸ್ತನ ಪುನರುತ್ಥಾನದ ಬಗೆಟ್‌ ಆಯೆ ಪಾತಾಳೊಡೆ ಒರಿಯುಜೆ; ಆಯನ ಶರೀರೊನು ಕುರಿಯೆರೆ ಬುಡ್ಪುಜಿ ಪಂಡ್ದ್‌ಲಾ ಪಂಡೆ.

³²“ಈ ಯೇಸುನೇ ದೇವೆರ್ ಲಕ್ಕಾಯೆ ಉಂದೆಕ್ಕ್ ಎಂಕುಲು ಮಾತೆರ್ಲಾ ಸಾಕ್ಷಿದಾಕುಲಾದುಲ್ಲ.

³³ಯೇಸು ದೇವೆರೆ ಬಲತ್ತ ಕೈಡ್ದ್ ಮಿತ್ತ ಸ್ಥಾನೊಗು ಏರ್ದ್ ಪೋದು ವಾಗ್ದಾನ ಮಲ್ತ್‌ದಿನ ಪರಿಶುದ್ಧಾತ್ಮ ವರೊನು ಅಮ್ಮೆರೆಡ್ದ್ ಪಡೆದ್ ಎಂಕುಲೆ ಮಿತ್ತ್ ಮೈತ್‌ದ್ ನಿಕುಲು ಇತ್ತೆ ತೂಪಿನಲಾ ಕೇನುನಲಾ ಅವ್ವೇ ಆದುಂಡು.

³⁴ಪರಲೋಕೊಗು ಏರ್ದ್ ಪೋತಿನಿ ದಾವೀದೆ ಅತ್ತ್. ತಾನೇ ಪನ್ತಿನ ಪಾತೆರ ದಾನೆಂದ್ಂಡ, ‘ಯಾನ್ ನಿನ ವೈರಿಲೆನ್ ನಿನ ಪಾದಪೀಠ ಮಲ್ಪುನ ಮುಟ್ಟ ಎನ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂದುಪ್ಪುಲ, ಅಂದ್‌ದ್ ಕರ್ತವೆ ಎನ ಕರ್ತವಡ ಪಂಡೆ.’

³⁵

³⁶“ಅಂಚಾಯಿನೆಡ್ದ್ ನಿಕುಲು ಕ್ರುಸ್ಸುಗು ಪಾಡ್ಪಾಯಿನ ಈ ಯೇಸುನೇ, ದೇವೆರ್ ಕರ್ತವೆ ಆದ್‌ಲಾ ಕ್ರಿಸ್ತೆ ಆದ್‌ಲಾ ಮಲ್ತೆ ಪನ್ಪಿನ ಪಾತೆರ ಇಸ್ರಾಯೇಲ್ಯೆರೆನ ಗೋತ್ರದಾಕುಲೆಗ್ ಮಾತೆರೆಗ್‌ ಸರಿಯಾದ್ ತೆರಿದುಪ್ಪಡ್,” ಅಂದ್‌ದ್ ಪಂಡೆ.

³⁷ಉಂದೆನ್ ಕೇಂಡ್ದ್ ಅಕ್ಲೆ ಉಡಲ್‌ಗ್ ಹಾಕಿಲೆಕ್ಕ ಆಂಡ್. ಅಕುಲು ಪೇತ್ರಗ್ಲಾ ಬಾಕಿದ ಅಪೊಸ್ತಲೆರೆಗ್ಲಾ, “ಸಹೋದರೆರೆ, ಇತ್ತೆ ಎಂಕುಲು ದಾನೆ ಮಲ್ಪೊಡು,” ಅಂದ್‌ದ್ ಕೇಂಡೆರ್.

³⁸ಪೇತ್ರೆ ಅಕ್ಲೆಗ್, “ನಿಕ್ಲೆನ ಪಾಪೊಲು ಪರಿಹಾರ ಆವರೆಗಾದ್ರ ನಿಕುಲು ಮಾತೆರ್ಲಾ ಪಶ್ಚಾತಾಪ ಪಡೆದ್ ಯೇಸು ಕ್ರಿಸ್ತನ ಪುದರ್‌ಡೇ ದೀಕ್ಷಾಸ್ನಾನ ಮಲ್ತೊನ್ಲೆ, ಅಪಗ ನಿಕುಲು ಪರಿಶುದ್ಧಾತ್ಮನ ವರೊನು ಹೊಂದುವರ್, ಅಂದ್‌ದ್ ಪಂಡೆ.

³⁹ಆ ವಾಗ್ದಾನ ನಿಕ್ಲೆಗ್ಲಾ ನಿಕ್ಲೆನ ಜೋಕುಲೆಗ್ಲಾ ದೂರದಾಕುಲೆಗ್ಲಾ ಬೊಕ್ಕ ನಮ ದೇವೆರಾದುಪ್ಪು ಕರ್ತವೆ ತನ ಕಡೆಕ್ಕ್ ಲೆಪ್ಪುನಾತ್ ಜನೊಕುಲೆಗ್ಲಾ ಉಂಡು.” ಅಂದ್‌ದ್ ಪಂಡೆ.

⁴⁰ಪೇತ್ರೆ ನನಲಾ ಕೆಲವು ಪಾತೆರೊಲೆಡ್ದ್ ಅಕ್ಲೆಗ್ ಎಚ್ಚರಿಕೆ ಕೊರ್ದು, “ಮೊಡಂಕ್ ಬುದ್ಧಿದ ಈ ಸಂತಾನೊಡ್ದು ತಪ್ಪಾವೊನ್ಲೆ,” ಪಂಡ್ದ್ ನಟ್ಟೊಂಡೆ.

⁴¹ಅಪಗ ಆಯ ಪಾತೆರೊನು ಒಪ್ಪಿನಾಕುಲು ನೀರ್‌ದ ದೀಕ್ಷಾಸ್ನಾನ ಮಲ್ತೊಂಡೆರ್. ಆ ದಿನೊಟು ಸುಮಾರ್ ಮೂಜಿ ಸಾರ ಜನ ಅಕ್ಲೆ ಒಟ್ಟುಗು ಸೇರಿಯೆರ್.

⁴²ಮೊಕುಲು ಅಪೊಸ್ತಲೆರೆನ ಬೋಧನೆನ್ ಕೇನುನೆಟ್ಲಾ ಸಹೋದ್ರೆರೆನ ಅನ್ಯಮನ್ಯೊಡು ರೊಟ್ಟಿ ಪೊಲ್ಪುನೆಟ್ಲಾ ಪ್ರಾರ್ಥನೆಡ್ಲಾ ನಿಲೆ ಆದಿತ್ತೆರ್.

⁴³ಮಾತ ಜನೊಕುಲೆಗ್ಲಾ ಪೋಡಿಗೆ ಪತ್ತ್ಂಡ್. ಮಸ್ತ್ ಕಾರ್ನಿಕೊಲುಲಾ, ತೋಜಿದ್ ಬರ್ಪಿ ಕಾರ್ಯೊಲುಲಾ ಅಪೊಸ್ತಲೆರೆ ಕೈಡ್ದ್ ನಡತ್ಂಡ್.

⁴⁴ನಂಬಿನಾಕುಲು ಮಾತೆರ್ಲಾ ಒಟ್ಟುಗು ಇತ್ತ್‌ದ್ ತನ್ಕುಲೆಡಿತ್ತಿನೆನ್ ಸಂತೋಷೊಡು ಪಟ್ಟೊಂದು ಜೀವನ ಮಲ್ತೊಂದಿತ್ತೆರ್.

⁴⁵ತನ್ಕುಲೆ ಭೂಮಿ ಆಸ್ತಿಲೆನ್ಲಾ ವಸ್ತುಲೆನ್ಲಾ ಮಾರ್ದ್ ಬತ್ತಿ ಕಾಸ್‌ನ್ ಮಾತೆರೆಗ್ಲಾ ಅಕಲ್ನಕಲ್ನ ಅಗತ್ಯೊಗು ತಕ್ಕ ಪಟ್ಟ್‌ದ್ ಕೊರೊಂದಿತ್ತೆರ್.

⁴⁶ಅಕುಲು ದಿನಾಲ ಒಂಜೇ ಮನಸ್ಸಾದ್ ದೇವಾಲಯೊಡು ಕೂಡೊಂದಿತ್ತೆರ್. ಅಕ್ಲೆನ ಇಲ್ಲ್ ಇಲ್ಲಡ್ ರೊಟ್ಟಿ ಪೊಲ್ತುದು ಸಂತೋಷೊಡ್ಲಾ ಶುದ್ಧ ಮನಸ್‌ಡ್ಲಾ ವಣಸ್ ಮಲ್ತೊಂದಿತ್ತೆರ್.

⁴⁷ದೇವೆರೆಗ್ ಸ್ತುತಿ ಮಲ್ಪುನಾಕುಲುಲಾ ಮಾತ ಜನೊಕುಲೆ ದಯೊನು ಪಡೆಯೊಂದಿತ್ತೆರ್‌. ಪ್ರತಿ ದಿನ ಹೆಚ್ಚೆಚ್ಚ ಜನೊಕುಲು ರಕ್ಷಣೆ ಪಡೆಯೊಂದು, ಕರ್ತವೆ ಅಕ್ಲೆನ್ ಮಾತೆರೆನ್ಲಾ ಕೂಟೊಗು ಕೂಡಾವೊಂದಿತ್ತೆ.