Read Tulu ಅಪೊ.ಕ್ರಿ 22 Bible Online

ಅಪೊ.ಕ್ರಿ 22 - Tulu bible

ಅಪೊ.ಕ್ರಿ 22

¹ಎಂಕುಲೆ ಸಹೋದ್ರೆರೇ ಬೊಕ್ಕ ಪಿತೃಲೆ, “ಇತ್ತೆ ಯಾನ್ ನಿಕ್ಲೆಗ್ ಪನ್ಪಿ ಪ್ರತಿವಾದೊನು ಕೇನ್ಲೆ.”

²ಆಯೆ ಇಬ್ರಿಯ ಭಾಷೆಡ್ ಪಾತೆರುನೆನ್ ಕೇನ್ನಗ ಅಕುಲು ಬೊಕ್ಕಲಾತ್ ಶಾಂತ ಆಯೆರ್.

³“ಯಾನ್ ಯೆಹೂದ್ಯೆ ಕಿಲಿಕ್ಯದ ತಾರ್ಸುಡು ಪುಟ್ಟುದಿನಾಯೆ, ಆಂಡ ಈ ಊರುಡೇ ಎಲ್ಯಡ್ದ್ ಮಲ್ಲ ಆತಿನಾಯೆ, ಗಮಾಲಿಯೇಲನ ಪಾದದಲ್ಪ ಎಂಕ್ಲೆ ಪಿತೃಲೆನ ನ್ಯಾಯಕಟ್ಟ್‌ದ ಪೂರ ಗೇನೊನು ಸೂಕ್ಷ್ಮಾದ್ ಪಡೆವೊಂದಿನಾಯೆ ಯಾನ್ ಆದುಲ್ಲೆ. ನಿಕುಲು ಇನಿ ದೇವೆರೆ ವಿಚಾರೊಡು ಅಭಿಮಾನಿಲು ಆದುಪ್ಪುನಂಚೆನೇ ಯಾನ್ ಅಭಿಮಾನಿ ಆದಿತ್ತೆ.

⁴ಈ ಮಾರ್ಗೊನು ಕೈಕೊನೊನಾಕುಲೆನ್ ಯಾನ್ ಭಂಗ ಕೊರೊಂದಿತ್ತೆ. ಅಂಜೊವುಲೆಗ್ಲಾ ಪೊಂಜೊವುಲೆಗ್ಲಾ ಕೋಳ ಪಾಡ್ಪಾದ್ ಅಕ್ಲೆನ್ ಸೆರೆಮನೆಗ್ ಪಾಡೊಂದಿತ್ತೆ. ಅಕ್ಲೆನ್ ಕೆರಿಯೆರೆಗ್ಲಾ ಪಿರ ಜಾರಂದೆ ಭಂಗ ಕೊರೊಂದಿತ್ತೆ.

⁵ಉಂದೆಕ್ಕ್ ಪ್ರಧಾನಯಾಜಕೆರ್‌ಲಾ ಹಿರಿಸಭೆತಾಕುಲುಲಾ ಸಾಕ್ಷಿ ಆದುಲ್ಲೆರ್. ಅಂಚಾಯಿನೆಡ್ದ್ ಯಾನ್ ದಮಸ್ಕೊಡುಪ್ಪುನ ಸಹೋದ್ರೆರೆಗ್ ಕಾಕಜಿನ್ ದೆತ್ತೊಂದು ಅಡೆಗ್ ಪೋತಿನಾಕಲೆನ್ ಕೋಳ ಪಾಡ್ದ್ ಶಿಕ್ಷೆ ಕೊರಿಯೆರೆ ಅಂದ್‌ದ್ ಯೆರೂಸಲೇಮುಗು ಕನವೊಡು ಅಂದ್‌ದ್ ಪಿದಾಡಿಯೆ.

⁶“ಯಾನ್ ಪ್ರಯಾಣ ಮಲ್ತೊಂದು ದಮಸ್ಕದ ಕೈತಲ್‌ ಬನ್ನಗ ಸುಮಾರ್ ಮಧ್ಯಾಹ್ನದ ಪೊರ್ತುಡು ಪಕ್ಕನೆ ಬಾನೊಡ್ದು ಒಂಜಿ ಮಲ್ಲ ಬೊಲ್ಪು ಎನ ಸುತ್ತಲಾ ಮಿಂಚಿಂಡ್.

⁷ಯಾನ್ ನೆಲಕ್ ಬೂರಿಯೆ. ಅಪಗ, ‘ಸೌಲಾ, ಸೌಲಾ, ಎಂಕ್ ದಾಯೆಗ್ ಭಂಗ ಕೊರ್ಪ?’ ಅಂದ್‌ದ್ ಎನಡ ಪನ್ಪಿ ಪಾತೆರೊನು ಕೇಂಡೆ.

⁸ಐಕ್ ಯಾನ್, ‘ಕರ್ತವಾ, ಈ ಏರ್?’ ಅಂದ್‌ದ್ ಕೇನ್ನಗ ಆಯೆ ಎನಡ, ‘ಈ ಭಂಗ ಕೊರ್ಪಿನ ನಜರೇತ್‌ದ ಯೇಸು ಯಾನೇ,’ ಪಂಡ್ದ್ ಪಂಡೆ

⁹ಎನಡೊಪ್ಪ ಇತ್ತಿನಾಕುಲು ಬೊಲ್ಪುನು ತೂಯೆರ್ ಅತ್ತಂದೆ ಎನಡೊಪ್ಪ ಪಾತೆರಿನಾಯನ ಸ್ವರೊನು ಕೇಂಡಿಜೆರ್.

¹⁰ಅಪಗ ಯಾನ್, ‘ಕರ್ತವಾ, ಯಾನ್ ದಾದ ಮಲ್ಪೊಡು?’ ಅಂದ್‌ದ್ ಕೇನ್ನಗ ಕರ್ತವೆ, ‘ಎಂಕ್ ಈ ಲಕ್ಕ್‌ದ್ ದಮಸ್ಕದ ಉಲಯಿ ಪೋಲ, ಈ ಮಲ್ಪೊಡಾಯಿನ ಬೇಲೆ ಅಲ್ಪ ನಿಕ್ಕ್ ತೆರಿದ್ ಬರು,’ ಅಂದ್‌ದ್ ಪಂಡೆ.

¹¹ಆ ಬೊಲ್ಪುದ ಪ್ರಭಾವೊಡ್ದು ಎಂಕ್ ಕಣ್ಣ್ ತೋಜಂದಿನೆಡ್ದ್ ಎನಡೊಪ್ಪ ಇತ್ತಿನಾಕುಲು ಎನನ್ ಕೈ ಪತ್ತ್‌ದ್ ದಮಸ್ಕದ ಉಲಯಿ ಲೆತ್ತೊಂದು ಪೋಯೆರ್.

¹²“ಅಲ್ಪ ಒರಿ ನ್ಯಾಯಕಟ್ಟ್‌ಲೆಗ್ ಸರಿಯಾದ್ ನಡಪುನ ಸದ್ಭಕ್ತೆ ಊರುದ ಯೆಹೂದ್ಯೆರೆಡ ಎಡ್ಡೆಂತಿನಾಯೆ ಅಂದ್‌ದ್ ಪುದರ್ ಪಡೆತಿನಾಯೆ ಅನನೀಯೆ ಪನ್ಪಿನಾಯೆ

¹³ಎನ ಕೈತಲ್‌ ಬತ್ತ್‌ದ್ ಉಂತುದು, ‘ಸಹೋದರೆ ಆದುಪ್ಪು ಸೌಲು ನಿಕ್ಕ್ ಕಣ್ಣ್ ತೋಜಡ್,’ ಅಂದ್‌ದ್ ಪಂಡೆ. ಪಂಡಿನಪಗನೆ ಎಂಕ್ ಕಣ್ಣ್ ತೋಜ್ಂಡ್. ಯಾನ್ ಆಯನ್ ತೂಯೆ.

¹⁴ಐಡ್ದ್ ಬೊಕ್ಕ ಆಯೆ ಪಂಡಿನಿ, ‘ನಮ ಪಿತೃಲೆ ದೇವೆರ್ ತನ ಚಿತ್ತೊನು ಈ ತೆರಿಯೊನೆಕ್ಕ್‌ಲಾ ಆ ನೀತಿವಂತನ್ ತೂಪಿನೆಕ್ಕ್‌ಲಾ ಆಯನ ಬಾಯಿಡ್ದ್ ಪಾತೆರೊನು ಕೇನುನೆಕ್ಕ್‌ಲಾ ನಿನನ್ ನೇಮಕ ಮಲ್ತ್‌ದೆ.

¹⁵ಈ ತೂತಿನ ಬೊಕ್ಕ ಕೇಂಡಿನ ಸಂಗತಿಲೆಗ್ಲಾ ಮಾತ ನರಮಾನಿಲೆ ಎದುರು ಸಾಕ್ಷಿಯಾದುಪ್ಪೊಡು.

¹⁶ಇತ್ತೆ ಈ ದಾಯೆ ತಡ ಮಲ್ಪುವ? ಲಕ್ಕ್‌ದ್ ಕರ್ತವ ಪುದರ್‌ನ್ ಅರಿಕೆ ಮಲ್ತ್‌ದ್ ನೀರ್‌ಡ್ ದೀಕ್ಷಾಸ್ನಾನ ಮಲ್ತೊಂದು ನಿನ ಪಾಪೊಲೆನ್ ದೆಕ್ಕೊನ್ಲಾ,’ ಅಂದ್‌ದ್ ಪಂಡೆ.

¹⁷“ಐಡ್ದ್ ಬೊಕ್ಕ ಯಾನ್ ಯೆರೂಸಲೇಮುಗು ಪಿರ ಬತ್ತ್‌ದ್ ದೇವಾಲಯದುಲಯಿ ಪ್ರಾರ್ಥನೆ ಮಲ್ತೊಂದುಪ್ಪುನಗ ದರ್ಶನೊಡು ಕರ್ತವನ್ ತೂಯೆ.

¹⁸ಆಯೆ ಈ, ‘ಆಯಿನಾತ್ ಬೇಗ ಯೆರೂಸಲೇಮುಡ್ದು ಪಿದಾಡ್ದ್ ಪೋಲ. ಎನ ವಿಚಾರೊಡು ಈ ಪನ್ಪಿನ ಸಾಕ್ಷಿನ್ ಅಕುಲು ತರಕೊನಯೆರ್,’ ಅಂದ್‌ದ್ ಪಂಡೆ.

¹⁹ಐಕ್ ಯಾನ್, ‘ಕರ್ತವಾ,’ ‘ಮಾತ ಸಭಾಮಂದಿರೊಲೆಡ್ ನಿನ ಮಿತ್ತ್ ನಂಬಿಕೆ ದೀತಿನಾಕುಲೆನ್ ಯಾನ್ ಸೆರೆಮನೆಕ್ ಪಾಡ್ದ್ ಹಾಕಾವೊಂದು ಇತ್ತೆ ಪನ್ಪಿನೆನ್ ಅಕುಲು ತೆರಿದೆರ್;

²⁰ಬೊಕ್ಕ ನಿನ ಸಾಕ್ಷಿ ಆದುಪ್ಪುನ ಸ್ತೇಫನನ ನೆತ್ತೆರ್ ಗುತ್ತಿನಪಗ ಯಾನ್ಲಾ ಕೈತಲ್‌ ಉಂತುದು ಒಪ್ಪಿಯೊಂದು ಆಯನ್ ಕೆರ್ತಿನಾಕುಲೆನ ಕುಂಟುಲೆನ್ ಕಾತೊಂದಿತ್ತೆ,’ ಅಂದ್‌ದ್ ಅಕ್ಲೆಗ್ ಗೊತ್ತುಂಡು.

²¹ಆಂಡ ಈ, ‘ಪೋಲ,’ ‘ಯಾನ್ ನಿನನ್ ದೂರೊಗು ಪಿದಯಿದ ಜನೊಕುಲೆ ಕೈತಲ್‌ ಕಡಪುಡ್ವೆ,’” ಅಂದ್‌ದ್ ಪಂಡೆ.

²²ಈ ಪಾತೆರದ ಮುಟ್ಟ ಅಕುಲು ಕೇನೊಂದಿತ್ತೆರ್; ಐಡ್ದ್ ಬೊಕ್ಕ ಆಯನ ಪಾತೆರೊಗು ಕೆಬಿ ಕೊರ್ಪಿನೆನ್ ಉಂತಾದ್, “ಆಯನ್ ಕೆರ್ಲೆ, ಆಯನ್ ಭೂಮಿಡ್ದ್ ದೆತ್ತ್ ಪಾಡ್ಲೆ, ಇಂಚಿ ನರಮಾನಿಗ್ ಜೀವದ ಅವಕಾಶೊನು ಕೊರಿಯೆರೆ ಬಲ್ಲಿ.”

²³ಅಂಚ ಅಕುಲು ಕಲ್ಕೊಂದು ಅಕ್ಲೆನ ಕುಂಟುಲೆನ್ ದಕ್ಕೊಂದು ಧೂಳು ರಟ್ಟಾವೊಂದು ಇತ್ತೆರ್.

²⁴ವಾ ಕಾರಣೊಡ್ದು ಆಯನ ವಿರೋಧಾದ್ ಬೊಬ್ಬೆ ಪಾಡ್ವೆರ್ ಅಂದ್‌ದ್ ಸಹಸ್ರಾಧಿಪತಿ ಗೊತ್ತು ಮಲ್ಪೆರೆ ಬೋಡಾದ್ ಆಯನ್ ಕೋಟೆದ ಉಲಯಿ ಕನತ್‌ದ್ ಚಾಟಿಡ್ ಪೆಟ್ಟ್ ಪಾಡ್ದ್ ಆಯಡ ಕೇನೊಡು ಅಂದ್‌ದ್ ಅಪ್ಪಣೆ ಕೊರಿಯೆ.

²⁵ಅಕುಲು ಪೌಲುನು ಬಗ್ಗಾದ್ ಬಲ್ಲ್‌ಡ್ ಕಟ್ಟ್‌ನಗ ಆಯೆ ತನ ಕೈತಲ್‌ ಉಂತುದಿನ ಶತಾಧಿಪತಿಡ, “ರೋಮಾಪುರತ್ತ ಮೂಲದಾಯೆ ಆದುಪ್ಪು ನರಮಾನಿನ್ ನ್ಯಾಯವಿಚಾರಣೆ ಮಲ್ಪಂದೆ ಚಾಟಿಡ್ ಹಾಕಾವುನವು ನ್ಯಾಯನಾ?” ಅಂದ್‌ದ್ ಕೇಂಡೆ.

²⁶ಶತಾಧಿಪತಿ ಈ ಪಾತೆರೊನು ಕೇಂಡ್ದ್ ಸಹಸ್ರಾಧಿಪತಿ ಕೈತಲ್‌ ಪೋದು, “ಈ ದಾನೆ ಮಲ್ಪೊಡಂದ್‌ದ್ ಎನೊಂದುಲ್ಲ? ಈ ನರಮಾನಿ ರೋಮಾಪುರತ್ತ ಮೂಲದಾಯೆ,” ಅಂದ್‌ದ್ ತೆರಿಪಾಯೆ.

²⁷ಅಪಗ ಸಹಸ್ರಾಧಿಪತಿ ಪೌಲುನ ಕೈತಲ್‌ ಬತ್ತ್‌ದ್, “ರೋಮಾಪುರತ್ತ ಮೂಲದಾಯೆನಾ? ಎಂಕ್ ಪನ್ಲ,” ಅಂದ್‌ದ್ ಆಯನ್ ಕೇಂಡೆ ಆಯೆ, “ಅಂದ್,” ಪಂಡೆ.

²⁸ಐಕ್ ಸಹಸ್ರಾಧಿಪತಿ, “ಯಾನ್ ದಿಂಜ ಕಾಸ್ ಕೊರ್ದು ಈ ಹಕ್ಕ್‌ನ್ ದೆತ್ತೊಂಡೆ,” ಅಂದ್‌ದ್ ಪನ್ನಗ, ಪೌಲೆ, “ಯಾನಾಂಡ ಮೂಲದಾಯೆ ಆದ್ ಪುಟ್ಟಿನಾಯೆ ಆದುಲ್ಲೆ,” ಪಂಡೆ.

²⁹ಆಯನ್ ಪೆಟ್ಟ್ ಪಾಡ್ದ್ ಕೇನಿಯೆರೆ ಬೈದಿನಾಕುಲು ಅಪಗನೆ ಆಯನ್ ಬುಡ್ದು ಬುಡಿಯೆರ್. ಅವು ಅತ್ತಂದೆ ಆಯನ್ ರೋಮಾಪುರತ್ತ ಮೂಲದಾಯೆ ಅಂದ್‌ದ್ ಸಹಸ್ರಾಧಿಪತಿಗ್ ತೆರಿದ್ ಬನ್ನಗ ಪೌಲುನು ಕಟ್ಟ್‌ದ್ ಪಾಡ್ದಿನಾಯೆ ತಾನೇ ಅಂದ್‌ದ್ ಪೋಡಿಯೊಂಡೆ.

³⁰ಪೌಲುನ ಮಿತ್ತ್ ಯೆಹೂದ್ಯೆರ್ ವಾ ತಪ್ಪು ಎನ್ನುವೆರ್ ಪನ್ಪಿನ ವಿಚಾರೊಡು ನಿಜವಾಯಿನ ಸಂಗತಿನ್ ತೆರಿಯೊಡು ಅಂದ್‌ದ್ ಸಹಸ್ರಾಧಿಪತಿ ಮನದಾನಿ ಆಯನ ಕೋಳ ದೆತ್ತ್‌ದ್ ಪ್ರಧಾನಯಾಜಕೆರೆನ್ಲಾ ಹಿರಿಸಭೆತಾಕುಲೆನ್ಲಾ ಸೇರ್ದ್ ಬರಿಯೆರೆ ಅಪ್ಪಣೆ ಕೊರ್ದು ಪೌಲುನು ಲೆತ್ತೊಂದು ಪೋದು ಅಕ್ಲೆನ ದುಂಬು ಉಂತಾಯೆ.