Read Tulu ಅಪೊ.ಕ್ರಿ 24 Bible Online

ಅಪೊ.ಕ್ರಿ 24 - Tulu bible

ಅಪೊ.ಕ್ರಿ 24

¹ಐನ್ ದಿನೊಡ್ದು ಬೊಕ್ಕ ಪ್ರಧಾನಯಾಜಕೆ ಅನನೀಯೆ ಸಭೆತ ಹಿರಿಯಾಕುಲೆಡ್ ಕೆಲೆವೆರೆನ್ ಬೊಕ್ಕ ತೆರ್ತುಲೆ ಪನ್ಪಿ ಒರಿ ವಕೀಲನ್ ಲೆತ್ತೊಂದು ಪೋದು ದೇಶಾಧಿಪತಿ ಎದುರುಡು ಪೌಲುನ ಮಿತ್ತ್ ದೋಷರೋಪಣೆ ಮಲ್ಪೆರೆ ಪೋಯೆರ್.

²ಪೌಲುನು ಲೆತ್ತಿ ಬೊಕ್ಕ ತೆರ್ತುಲೆ ಆಯನ ಮಿತ್ತ್ ತಪ್ಪು ಅಪವಾದನೆ ಮಲ್ಪೆರೆ ಸುರು ಮಲ್ತ್‌ದ್ ಇಂಚ ಪಂಡೆ, “ಮಾನ್ಯ ಫೇಲಿಕ್ಸ! ನಿನ ರಾಜ್ಯೊಡು ಎಂಕ್ಲೆಗ್ ಸಮಾಧಾನ ಉಂಡು. ನಿನ ಪರಾಂಬರಿಕೆಡ್ದ್ ಈ ದೇಶದ ಜನೊಕುಲೆಗ್ ಮಾತ ರೀತಿಡ್ಲಾ ಮಾತ ಜಾಗ್‌ಡ್ಲಾ ಸುದಾರ್ನೆಲು ಆಪುಂಡು.

³ಎಂಕುಲು ಮಾತ ಜಾಗೊಲೆಡ್ಲಾ ನಿನ ಉಪಕಾರೊನು ಪುಗರ್‌ದ್ ಒಪ್ಪಿಯೊನ್ವ.

⁴ಆಂಡ ನಿನನ್ ಹೆಚ್ಚಾದ್ ಬೇಜಾರ್ ಮಲ್ಪುನೆಕ್ಕ್ ಮನಸ್‌ದಾಂತೆ ನಮ ಎಲ್ಯ ರೀತಿಡ್ ಪನ್ಪಿನ ಪಾತೆರೊಲೆನ್ ದಯ ದೀದ್ ಕೇನೊಡು ಅಂದ್‌ದ್ ನಟ್ಟೊನ್ವ;

⁵ಈ ನರಮಾನಿ ಲೋಕೊಡು ಮಾತ ಕಡೆಟ್ಲಾ ಉಪ್ಪುನ ಮಾತ ಯೆಹೂದ್ಯೆರೆಡ್ ಲಡಯಿ ಲಕ್ಕಾವುನಾಯೆ ಪಂಡ್ದ್‌ಲಾ ನಜರೇತ್‌ದಾಕುಲೆನ ಮತತ ಮುಖ್ಯಸ್ಥೆ ಪಂಡ್ದ್‌ಲಾ ಎಂಕ್ಲೆಗ್ ತೋಜಿದ್ ಬತ್ತ್ಂಡ್.

⁶ಉಂದತ್ತಂದೆ ಇಂಬೆ ದೇವಾಲಯೊನು ಭ್ರಷ್ಟ ಮಲ್ಪೆರೆ ಪ್ರಯತ್ನ ಮಲ್ತೆ; ಅಂಚಾಯಿನೆಡ್ದ್ ಇಂಬ್ಯನ್ ಎಂಕುಲು ಪತ್ತಿಯ.

⁷ಆಂಡ ಸಹಸ್ರಾಧಿಪತಿ ಆದಿತ್ತಿನ ಲೂಸಿಯೆ ಬತ್ತ್‌ದ್ ಬಲತ್ಕಾರ ಮಲ್ತ್‌ದ್ ಆಯನ್ ಎಂಕುಲೆ ಕೈತಲ್‌ಡ್ದ್ ಬುಡ್ಪಾದ್ ಕೊನೊಯೆ.

⁸ಇಂಬ್ಯನ್ ಈಯೇ ವಿಚಾರಣೆ ಮಲ್ತಡ ಎಂಕುಲು ಇಂಬ್ಯನ ಮಿತ್ತ್ ಪನ್ಪಿನ ಈ ತಪ್ಪುಲು ಮಾತ ನಿಜನಾ ಸುಳ್ಳಾ ಅಂದ್‌ದ್ ಇಂಬ್ಯಡ್ದೇ ತೆರಿಯೊನೊಲಿ,” ಅಂದ್‌ದ್ ಪಂಡೆ.

⁹ಅಪಗ ಯೆಹೂದ್ಯೆರ್ ಈ ಸಂಗತಿಲು ನಿಜ ಅಂದ್‌ದ್ ಅಕುಲುಲಾ ಆ ದೋಷಾರೋಪಣೆ ಮಲ್ಪುನೆಟ್ಟ್ ಸೇರಿಯೆರ್.

¹⁰ದೇಶಾಧಿಪತಿ ಫೇಲಿಕ್ಸ್ ಪೌಲುಗು ಕೈಸನ್ನೆ ಮಲ್ತ್‌ದ್ ಪಾತೆರಿಯೆರೆ ಸೂಚನೆ ಕೊರಿಯೆ. ಅಪಗ ಪೌಲು ಇಂಚ ಪಂಡೆ, “ಈ ದಿಂಜ ವರ್ಸೊಡ್ದು ಈ ದೇಶದ ಜನೊಕುಲೆಗ್ ನ್ಯಾಯಾಧಿಪತಿ ಆದುಲ್ಲ ಅಂದ್‌ದ್ ಎಂಕುಲು ತೆರಿದ್ ಯಾನ್ ಧೈರ್ಯೊಡು ಪ್ರತಿವಾದ ಮಲ್ಪುವೆ,

¹¹ಯಾನ್ ದೇವೆರೆನ್ ಆರಾಧನೆ ಮಲ್ಪುನೆಕ್ಕ್ ಯೆರೂಸಲೇಮುಗು ಪೋದು ಪದ್ರಾಡ್ ದಿನ ಮಾತ್ರ ಆಂಡ್ ಅಂದ್‌ದ್ ಈಯೇ ತೆರಿಯುವ;

¹²ದೇವಾಲಯೊಡು ಯಾನ್ ಏರೆಡಲಾ ವಾದ ವಿವಾದ ಇಜ್ಜಾಂಡ ಸಭಾಮಂದಿರೊಡು ಜನೊಕುಲೆ ಗುಂಪು ಕೂಡಾದಿಜಿ ಅಂಚೆನೆ ಬೇತೆ ಊರುಡ್ಲಾ ಗುಂಪು ಕೂಡಾದಿನ ಮೊಕುಲು ತೂತುಜೆರ್.

¹³ಉಂದತ್ತಂದೆ ಮೊಕುಲು ಇತ್ತೆ ಎನ ಮಿತ್ತ್ ಪನ್ಪಿನ ತಪ್ಪುಲೆನ್ ನಿಜ ಅಂದ್‌ದ್ ತೋಜಾಯೆರೆ ಆಪುಜಿ.

¹⁴ಒಂಜೆನ್ ಮಾತ್ರ ನಿನ ಎದುರು ಒಪ್ಪಿಯೊನ್ವೆ, ಅವು ದಾನೆ ಪಂಡ, ಆ ಮಾರ್ಗದ ಹಿಂಬಾಲಕೆ ಆದ್ ಯಾನ್ ಎಂಕ್ಲೆನ ಪಿತೃ ಆಯಿ ದೇವೆರೆನ್ ಆರಾಧನೆ ಮಲ್ಪುವೆ, ಆ ಮಾರ್ಗ ಸರಿಯತ್ತ್ ಅಂದ್‌ದ್ ಯೆಹೂದ್ಯೆರ್ ಪನ್ಪೆರ್. ಆಂಡ ನ್ಯಾಯಕಟ್ಟ್‌ಡ್ಲಾ ಪ್ರವಾದಿಲೆ ಗ್ರಂಥೊಲೆಡ್ ಬರೆದುಪ್ಪುನ ಮಾತ ವಿಚಾರೊಲೆನ್ ನಂಬುವೆ.

¹⁵ಉಂದತ್ತಂದೆ ನೀತಿವಂತೆರೆಗ್ಲಾ ನೀತಿಕೆಟ್ಟಿನಾಕುಲೆಗ್ಲಾ ಸೈತಿನಾಕುಲೆಡ್ದ್ ಲಕ್ಕುವೆರ್ ಅಂದ್‌ದ್ ಮೊಕುಲು ದೇವೆರೆಡ್ ನಿರೀಕ್ಷೆಡುಪ್ಪುಲೆಕ್ಕನೆ ಯಾನ್ಲಾ ದೇವೆರೆ ಮಿತ್ತ್ ಆಸೆ ದೀದ್ ನಿರೀಕ್ಷೆ ಮಲ್ಪುವೆ.

¹⁶ಈ ಕಾರಣೊಡ್ದಾವರ, ದೇವೆರೆ ಎದುರುಲಾ ನರಮಾನಿಲೆ ಎದುರುಲಾ ಏಪಲಾ ಕಲೆದಾಂತಿ ಮನಸಾಕ್ಷಿ ಉಪ್ಪುಲೆಕ್ಕ ಪೇಚಾಡುವೆ.

¹⁷“ಕೆಲವು ವರ್ಸೊಡ್ದು ಬೊಕ್ಕ ಯಾನ್ ಎನ ಸ್ವಂತ ದೇಶೊಗು ದಾನಧರ್ಮೊನು ಕೊರಿಯೆರೆಲಾ ಕಾಣಿಕೆನ್ ಅರ್ಪಣೆ ಮಲ್ಪೆರೆಲಾ ಯೆರೂಸಲೇಮುಗು ಬತ್ತೆ.

¹⁸ಯಾನ್ ಶುದ್ಧ ಮಲ್ತೊಂಡಿನಾಯೆ ಆದ್ ಅವೆನ್ ಒಪ್ಪಿಯಾನಗ ಎನನ್ ದೇವಾಲಯೊಡು ಯೆಹೂದ್ಯೆರ್ ತೂಯೆರ್; ಎನ ಒಟ್ಟುಗು ಜನತ ಗುಂಪು ಇತ್ತ್‌ಜಿ; ಗಲಾಟೆಲಾ ಇತ್ತ್‌ಜಿ,

¹⁹ಆಂಡ ಆಸ್ಯ ಪ್ರದೇಶೊಡ್ದು ಬೈದಿನ ಕೆಲವು ಯೆಹೂದ್ಯೆರ್ ತೂದಿತ್ತೆರ್; ಎನ ಮಿತ್ತ್ ದಾಲಾಂಡಲಾ ಇತ್ತ್ಂಡ ಅಕುಲೇ ನಿನ ದುಂಬು ತಪ್ಪು ಪನಿಯೆರೆ ಇಡೆಗ್ ಬರೊಡಿತ್ತ್‌ಂಡ್;

²⁰ಯಾನ್ ಯೆರೂಸಲೇಮುಡು ಹಿರಿಸಭೆತ ಎದುರುಡು ಉಂತಿನಪಗ ಅಕ್ಲೆಗ್ ಎನ ಮಿತ್ತ್ ತಪ್ಪು ತೋಜಿದ್ ಬತ್ತ್ಂಡ ಮೊಕುಲೆ ಪನಡ್.

²¹ಯಾನ್ ಮೊಕ್ಲೆ ನಡುಟು ಉಂತುದು ಪುನರುತ್ಥಾನದ ಸಂಗತಿಡ್ ನಂಬುವೆ ಅಂದ್‌ದ್ ಸಾರಿನೆಕ್ಕ್ ಎನ ವಿಚಾರಣೆ ಆಪುಂಡು. ಬೇತೆ ದಾಲಾ ಅನ್ಯಾಯ ತೂತೆರ್ಡ ಅಕುಲೇ ಪನಡ್.”

²²ಆಂಡ ಫೇಲಿಕ್ಸೆ ಕರ್ತವ ಮಾರ್ಗೊನು ತಕ್ಕ ಮಟ್ಟ್‌ಗ್ ತೆರಿದಿನಾಯೆ ಆದಿತ್ತ್‌ಂಡಲಾ ಅಕ್ಲೆಗ್ ಸಹಸ್ರಾಧಿಪತಿ ಲೂಸಿಯೆ ಬತ್ತಿ ಬೊಕ್ಕ “ನಿಕ್ಲೆನ ಕಾರ್ಯೊನು ತೀರ್ಮಾನ ಮಲ್ಪುವೆ,” ಅಂದ್‌ದ್ ವಿಚಾರಣೆ ತಡೆ ಮಲ್ತೆ.

²³ಅಪಗ ಆಯೆ ಶತಾಧಿಪತಿಗ್, ಪೌಲು ಸೆರೆಮನೆಟ್ ಉಪ್ಪಡ್. ಆಂಡ ಆಯನ್ ಒಂತೆ ಸಡಿಲ್ ಬುಡ್ಲ. ಬೊಕ್ಕ ಆಯನ ಉಪಚಾರ ಮಲ್ಪೆರೆ ಆಯನ ಸ್ವಂತ ಜನೊಕುಲೆಡ್ ಏರೆಗ್ಲಾ ಅಡ್ಡಿ ಮಲ್ಪೆರೆ ಬಲ್ಲಿ ಅಂದ್‌ದ್ ಅಪ್ಪಣೆ ಕೊರಿಯೆ.

²⁴ಕೆಲವು ದಿನೊಡ್ದು ಬೊಕ್ಕ ಫೇಲಿಕ್ಸೆ ಯೆಹೂದ್ಯೆದಿ ಆಯಿ ತನ ಬೊಡೆದಿ ದ್ರುಸಿಲ್ಲಡೊಪ್ಪ ಬತ್ತ್‌ದ್ ಪೌಲುನು ಲೆಪ್ಪುಡ್ದು ಕ್ರಿಸ್ತ ಯೇಸುಡ್ ದೀಪಿ ನಂಬಿಕೆದ ಸಂಗತಿನ್ ಆಯಡ ಕೇಂಡೆ.

²⁵ಆಂಡ ನೀತಿದ ಬಾಳ್ವೆ, ಸ್ವಸ್ಥ ಬುದ್ಧಿ ಬೊಕ್ಕ ದುಂಬಗ್ ಬರಿಯೆರೆ ಇತ್ತಿನ ನ್ಯಾಯ ವಿಚಾರಣೆದ ವಿಷಯೊಲೆನ್ ಪಾತೆರ್‌ನಗ ಫೇಲಿಕ್ಸೆ ಪೋಡಿದ್ ಸದ್ಯೊಗು ಪೋಲ; ಎಂಕ್ ಸಮಯ ತಿಕ್ಕಿನಪಗ ನಿನನ್ ಲೆಪ್ಪುಡಾವೆ ಅಂದ್‌ದ್ ಪಂಡೆ.

²⁶ಉಂದತ್ತಂದೆ ಆಯಗ್ ಪೌಲುಡ್ದು ಕಾಸ್ ತಿಕ್ಕು ಅಂದ್‌ದ್ ನಿರೀಕ್ಷೆ ಇತ್ತ್ಂಡ್, ಅಪಗಪಗ ಲೆಪುಡಾದ್ ಆಯನ ಒಟ್ಟಗು ಸಂಭಾಷಣೆ ಮಲ್ತೊಂದಿತ್ತೆ.

²⁷ರಡ್ಡ್ ವರ್ಸ ದಿಂಜಿ ಬೊಕ್ಕ ಫೇಲಿಕ್ಸನ ಸ್ಥಾನೊಗು ಪೊರ್ಕಿಯ ಫೆಸ್ತೆ ಬತ್ತೆ. ಫೇಲಿಕ್ಸೆ ಯೆಹೂದ್ಯೆರೆನ ಪ್ರೀತಿನ್ ಗೆಂದೊನೊಡು ಪನ್ಪಿ ಆಸೆಡ್ದ್ ಪೌಲುನು ಅಂಚೆನೇ ಸೆರೆಮನೆಟ್ ಬುಡ್ದು ಪೋಯೆ.