Read Tulu ಅಪೊ.ಕ್ರಿ 27 Bible Online

ಅಪೊ.ಕ್ರಿ 27 - Tulu bible

ಅಪೊ.ಕ್ರಿ 27

¹ಎಂಕುಲು ಇತಾಲ್ಯಗ್ ಕಡಲ್ದ ಪ್ರಯಾಣ ಮಲ್ತೊಂದು ಪೋವೊಡು ಅಂದ್‌ದ್ ತೀರ್ಮಾನ ಆಯಿನೆಡ್ದ್ ಬೊಕ್ಕ ಪೌಲುನ್ಲಾ ಬೇತೆ ಕೆಲವು ಕೈದ್‌ಡಿತ್ತಿನಾಕುಲೆನ್ಲಾ ಚಕ್ರವರ್ತಿನ ಪಟಾಲ್‌ಗ್ ಸೇರ್ದಿನ ಜೂಲಿಯಸ್ ಪನ್ಪಿ ಒರಿ ಶತಾಧಿಪತಿಗ್ ಒಪ್ಪಿಸಾಯೆರ್.

²ಎಂಕುಲು ಒಂಜಿ ಕಪ್ಪಲ್‌ನ್ ಮಿತ್ತಾರ್ದ್ ಅಲ್ತ್‌ಡ್ದ್ ಪಿದಾಡಿಯ. ಆ ಕಪ್ಪಲ್ ಅದ್ರಮಿತ್ತಿಡ್ದ್ ಬತ್ತ್‌ದಿತ್ತ್ಂಡ್ ಬೊಕ್ಕ ಆಸ್ಯ ಪ್ರದೇಶದ ಕರಾವಳಿದ ಜಾಗೊಲೆಗ್ ಪೋವರೆ ತಯಾರ್ ಆದಿತ್ತ್ಂಡ್. ಮಕೆದೋನ್ಯೊಗು ಸೇರ್ದಿನ ಥೆಸ್ಸಲೋನಿಕದ ಅರಿಸ್ತಾರ್ಕೆ ಎಂಕುಲೆ ಒಟ್ಟುಗು ಇತ್ತೆ.

³ಮನದಾನಿ ಎಂಕುಲು ಸೀದೋನುಗು ಮುಟ್ಟಿಯ. ಜೂಲಿಯಸ್ ಪೌಲುಗು ದಯೆ ತೋಜಾವುನಾಯೆ ಆದಿತ್ತೆ. ಆಯನ್ ಸ್ನೇಹಿತೆರೆ ಕೈತಲ್‌ ತಿಕ್ಕರೆ ಸ್ವತಂತ್ರ ಕೊರಿಯೆ. ಈ ಸ್ನೇಹಿತೆರ್ ಆಯಗ್ ಬೋಡಿತ್ತಿನೆನ್ ಒದಗಾಯೆರ್.

⁴ಅಲ್ತ್‌ಡ್ದ್ ಪಿದಾಡ್ನಗ ಎದುರು ಗಾಳಿ ಬೀಜೊಂದಿತ್ತಿನೆಡ್ ಕುಪ್ರ ದ್ವೀಪೊದ ಮದೆಟ್ ತೇಲಾದ್ ಬತ್ತ.

⁵ಕಿಲಿಕ್ಯಗ್ಲಾ ಪಂಫುಲ್ಯಗ್ಲಾ ಎದುರುಡಿತ್ತಿನ ಕಡಲ್‌ನ್ ದಾಂಟ್‌ದ್ ಲುಕೀಯ ಸೀಮೆಡುಪ್ಪು ಮುರಗ್ ಬತ್ತ.

⁶ಅಲ್ಪ ಅಲೆಕ್ಸಾಂದ್ರಿಯೊಡ್ದು ಬೈದಿನ ಇತಾಲ್ಯಗ್ ಪೋವೊಂದಿತ್ತಿನ ಕಪ್ಪಲ್‌ನ್ ಶತಾಧಿಪತಿ ತೂದು ಎಂಕ್ಲೆನ್ ಐಟ್ಟ್ ಮಿತ್ತರ್ಪಾಯೆ.

⁷ಕೆಲವು ದಿನ ಬಾರಿ ನಿಧಾನೊಡು ಪ್ರಯಾಣ ಮಲ್ತ. ಎದುರು ಗಾಳಿ ಭಯಂಕರ ಬೀಜೊಂದು ಇತ್ತಿನೆಡ್ದಾವರ ಎಂಕುಲು ಕ್ನೀದೊಗು ಮುಟ್ಟಿಯೆರೆ ಕಷ್ಟ ಆಂಡ್. ಆ ಮಾರ್ಗೊಡು ನನ ದುಂಬು ಪ್ರಯಾಣ ಮಲ್ಪರೆ ಎಂಕ್ಲೆಗ್ ಸಾದ್ಯ ಆಯಿಜಿ. ಆಯಿನೆಡ್ದಾವರ ಎಂಕುಲು ಸಲ್ಮೋನೆ ಮುಟ್ಟ ಇತ್ತಿನ ಕ್ರೇತ್ ದ್ವೀಪದ ದಕ್ಷಿಣ ಭಾಗೊಗು ಕಡಲ್ದ ಪ್ರಯಾಣ ಮಲ್ತ.

⁸ಎಂಕುಲು ಬಾರೀ ಪ್ರಯಾಸೊಡು ಕರಾವಳಿಡೇ ನೌಕಾಯಾನ ಮಲ್ತ. ಅಲ್ತ್‌ಡ್ದ್ ಎಂಕುಲು ಪೊರ್ಲು ಬಂದರ್ ಪನ್ಪಿ ಜಾಗ್‌ಗ್ ಬತ್ತ. ಲಸಾಯ ಪಟ್ಟಣ ಐತ ಮುಟ್ಟೊಡೇ ಇತ್ತ್ಂಡ್.

⁹ಇಂಚ ಸುಮಾರ್ ಸಮಯ ಕರಿದಿತ್ತ್‌ಂಡ್. ಮಲ್ಲ ಉಪವಾಸದ ದಿನ ಕಡತ್ ಪೋದಿತ್ತ್‌ಂಡ್, ಕಡಲ್ ಪ್ರಯಾಣ ಮಲ್ಪುನ ಪೋಡಿಗೆದವು ಆಯಿನೆಡ್ದ್

¹⁰ಪೌಲು ಅಕ್ಲೆಡ, “ಜನೊಕುಲೇ, ಈ ಪ್ರಯಾಣೊಡು ನಂಕ್ ಬಾರಿ ತೊಂದರೆ ಉಂಡು ಅಂದ್‌ದ್ ಎಂಕ್ ತೋಜುಂಡು. ಕಪ್ಪಲ್‌ಗ್ ಬೊಕ್ಕ ಕಪ್ಪಲ್‌ಡಿತ್ತಿನ ಸಾಮಾನುಲು ಪೂರ ನಷ್ಟ ಅವು, ನಮ ಪ್ರಾಣಲಾ ನಾಶಾದ್ ಪೋವರೆ ಸಾದ್ಯ ಉಂಡು,” ಅಂದ್‌ದ್ ಎಚ್ಚರಿಕೆ ಕೊರಿಯೆ.

¹¹ಪೌಲು ಪಂಡಿನ ಪಾತೆರೊಗು ಶತಾಧಿಪತಿ ಹೆಚ್ಚಾದ್ ಲಕ್ಷ ಕೊರಂದೆ ನಾವಿಕನ ಬೊಕ್ಕ ಕಪ್ಪಲ್‌ದ ಧನಿನ ಪಾತೆರೊನು ನಂಬಿಯೆ.

¹²ಈ ಬಂದರ್ ಚಳಿಕಾಲೊಡು ಉಂತಿಯೆರೆ ಯೋಗ್ಯದಾಂತಿನವು ಆದಿತ್ತಿನೆಡ್ದ್, ಹೆಚ್ಚಾಯಿನಾಕುಲು ದುಂಬು ಪ್ರಯಾಣ ಮಲ್ತ್‌ದ್ ಫೊಯಿನಿಕ್ಸೆಗ್ ಪೋದು ಅಲ್ಪನೇ ಚಳಿಕಾಲೊನು ಕಳೆವೊಡು ಪಂಡ್ದ್ ಅಭಿಪ್ರಾಯ ಮಲ್ತೆರ್. ಉಂದು ಕ್ರೇತ್ ದ್ವೀಪೊಡು ತೆನ್‌ಕಯಿ-ಪಡ್ಡಯಿ ಬೊಕ್ಕ ಬಡಕಯಿ-ಪಡ್ಡಯಿಗ್ ಮೋನೆ ಮಲ್ತ್‌ದಿನ ಬಂದರ್ ಆದಿತ್ತ್ಂಡ್.

¹³ತೆನ್‌ಕಯಿದ ಗಾಳಿ ಮೆಲ್ಲೊಡು ಬೀಜ್‌ನಗ ಎಂಕ್ಲೆಗ್ ಬೋಡಾಪಿನ ಗಾಳಿ ತಿಕ್ಕ್ಂಡ್ ಅಂದ್‌ದ್ ಎನ್ನ್‌ದ್ ಲಂಗರ್ ದೆರ್ತ್ತ್‌ದ್ ಕ್ರೇತ್ ದ್ವೀಪದ ಕರಾವಳಿಡೇ ಕಡಲ್ದ ಪ್ರಯಾಣ ಮಲ್ತ.

¹⁴ಒಂತೆ ಪೊರ್ತು ಆಯಿ ಬೊಕ್ಕ ಬಡಕಯಿ-ಮೂಡಯಿ ಪನ್ಪಿ ಸುಳಿಗಾಳಿ ಆ ದ್ವೀಪದ ಮಿತ್ತ್‌ಡ್ದ್ ದರ್ತ್‌ಂಡ್.

¹⁵ಆ ದರ್ಪಾಟೊಗು ಕಪ್ಪಲ್ ತಿಕೊಂದು ಗಾಳಿಗ್ ಎದುರು ಉಂತೆರೆ ಆವಂದೆ ಗಾಳಿ ನೂಕೊಂದು ಪೋಂಡು.

¹⁶ಕ್ಲೌಡ ಪನ್ಪಿನ ಒಂಜಿ ಎಲ್ಯ ದ್ವೀಪೊದ ಬರಿಯೆ ಪೋವೊಂದುಪ್ಪುನಗ ಕಪ್ಪಲ್‌ಡಿತ್ತಿನ ಓಡೊನು ಬಾರಿ ಕಷ್ಟೊಡು ಉಲಯಿ ದೀಯ.

¹⁷ಅವೆನ್ ಮಿತ್ತ್ ದೆರ್ತಿ ಬೊಕ್ಕ ಬಲ್ಲ್‌ಡ್ ಕಪ್ಪಲ್‌ದ ಅಡಿ ಬಿಗಿತೆರ್. ಐಡ್ದ್ ಬೊಕ್ಕ ಸುರ್ತಿಸ್ ಪನ್ಪಿನ ಕಲ್ಲ್‌ಪೊಯ್ಯೆ ತಿಕ್ಕ್‌ದ್ ಬೂರುಂಡು ಅಂದ್‌ದ್ ಪೋಡಿದ್ ಪಾಯಿನ್ ಸಡಿಲ್ ಮಲ್ತ್‌ದ್ ಗಾಳಿ ನೂಕೊಂದು ಪೋಂಡು.

¹⁸ಮನದಾನಿ ಗಾಳಿ ಜೋರಾದ್ ಬೀಜಿನೆಡ್ದ್ ಜನೊಕುಲು ಕಪ್ಪಾಲ್‌ಡಿತ್ತಿನ ಸಾಮಾನುಲೆನ್ ಪೂರ ದಕ್ಕೊಂದಿತ್ತೆರ್.

¹⁹ಮೂಜನೇ ದಿನೊಟು ಕಪ್ಪಲ್‌ದ ಅಡ್ಡ ಮರೊನು ಕೈಡ್ದೇ ಪಿದಯಿ ದೆರ್ತ್ತ್ ಪಾಡಿಯೆರ್.

²⁰ದಿಂಜ ದಿನ ಮುಟ್ಟ ಸೂರ್ಯೆ ಆವಡ್ ನಕ್ಷತ್ರೊಲಾವಡ್ ಎಂಕ್ಲೆಗ್ ತೋಜಂದೆ ಮಲ್ಲ ಬಿರುಗಾಳಿಲಾ ಎಂಕುಲೆ ಮಿತ್ತ್ ದರ್ತಿನೆಡ್ದ್ ತಪ್ಪಾವೊನ್ವ ಪನ್ಪಿನ ನಿರೀಕ್ಷೆಲಾ ಆನಿಡ್ದ್ ಇಜ್ಜಾಂದೆ ಪೋಂಡು.

²¹ಅಕುಲು ದಿಂಜ ದಿನ ವಣಸ್‌ದಾಂತೆ ಇತ್ತಿ ಬೊಕ್ಕ ಪೌಲು ಅಕ್ಲೆ ನಡುಟು ಉಂತೊಂದು “ಜನೊಕುಲೇ ನಿಕುಲು ಕ್ರೇತೊಡ್ದು ಪಿದಾಡ್ದ್ ಈ ಕಷ್ಟನಷ್ಟೊಲೆಗ್ ಗುರಿ ಆವಂದಿಲೆಕ್ಕ ಎನ ಪಾತೆರೊನು ಕೇನೊಡಿತ್ತ್‌ಂಡ್.

²²ಇತ್ತೆ ನಿಕುಲು ಧೈರ್ಯೊಡು ಉಪ್ಪೊಡು ಅಂದ್‌ದ್ ನಿಕ್ಲೆಗ್ ಪನ್ಪೆ; ಕಪ್ಪಲ್ ನಷ್ಟ ಆದ್ ಪೋವು ಆಂಡ ಒರಿಯನಲಾ ಪ್ರಾಣ ನಷ್ಟ ಆವಂದ್.

²³ಯಾನ್ ವಾ ದೇವೆರೆನ್ ನಂಬುದು ಸೇವೆ ಮಲ್ಪುವೆನಾ ಅವ್ವೇ ದೇವೆರೆಡ್ದ್ ಒರಿ ದೂತೆ ಕೋಡೆ ರಾತ್ರೆಡ್ ಎನ ಕೈತಲ್‌ ಉಂತುದು,

²⁴‘ಪೌಲು ಪೋಡ್ಯಡ, ಈ ಚಕ್ರವರ್ತಿನ ಎದುರು ಉಂತೊಡು; ಉಂದತ್ತಂದೆ ನಿನ ಒಟ್ಟುಗು ಈ ಕಪ್ಪಲ್‌ಡ್ ಪ್ರಯಾಣ ಮಲ್ಪುನಾಕುಲೆನ ಮಾತೆರೆನ ಪ್ರಾಣೊನು ದೇವೆರ್ ದಯ ತೋಜಾದ್ ಒರಿಪಾದೆ,’ ಅಂದ್‌ದ್ ಪಂಡೆ.

²⁵ಅಂಚಾಯಿನೆಡ್ದ್ ಜನೊಕುಲೆ, ಧೈರ್ಯವಾದುಪ್ಪುಲೆ. ಎಂಕ್ ಪಂಡಿಲೆಕ್ಕನೇ ಆಪುಂಡು ಅಂದ್‌ದ್ ದೇವೆರೆನ್ ನಂಬುವೆ.

²⁶ಆಂಡ ನಮ ಒವ್ವಾಂಡ ಒಂಜಿ ದ್ವೀಪದ ಬರಿ ಸೇರೊಡು,” ಅಂದ್‌ದ್ ಪಂಡೆ.

²⁷ಪದ್ನಾಲನೆ ರಾತ್ರೆ ಬತ್ತಿ ಬೊಕ್ಕ ಎಂಕುಲು ಆದ್ರಿಯ ಕಡಲ್ಡ್ ಅಂಚಿ ಇಂಚಿ ತೆಲಾವೊಂದು ಪೋವೊಂದುಪ್ಪುನಗ ಸುಮಾರ್ ನಡು ರಾತ್ರೆಡ್ ನಾವಿಕೆರ್ ಬತ್ತ್‌ದ್ ಭೂಮಿಗ್ ಕೈತಲಾಯೆರ್ ಅಂದ್‌ದ್ ಎನ್ನ್‌ದ್

²⁸ಲಪ್ಪು ಗುಂಡುನು ಜಪುಡಾದ್ ನಲ್ಪ ಮೀಟರ್ ಉದ್ಧ ಅಂದ್‌ದ್ ತೂಯೆರ್. ಒಂತೆ ಪೊರ್ತುಡ್ದು ಬೊಕ್ಕ ಅಕುಲು ಕುಡ ಲಪ್ಪು ಗುಂಡುನು ಜಪುಡ್ದು ತೂನಗ ಮುಪ್ಪ ಮೀಟರ್ ಉದ್ಧ ಅಂದ್‌ದ್ ಗೊತ್ತಾಂಡ್.

²⁹ಪಾದೆದ ಜಾಗ್‌ನ್ ತಾಂಟುವ ಅಂದ್‌ದ್ ಪೋಡಿದ್ ಕಪ್ಪಲ್‌ದ ಪಿರವುಡ್ದು ನಾಲ್ ಲಂಗರ್ ಬುಡ್ದು ಏಪ ಬೊಲ್ಪಾವು ಅಂದ್‌ದ್ ಪ್ರಾರ್ಥನೆ ಮಲ್ತೊಂದಿತ್ತೆರ್.

³⁰ಆಂಡ ನಾವಿಕೆರ್ ದುಂಬುಡು ಲಂಗರ್ ಪಾಡೊಡು ಪನ್ಪಿನ ನೆವೊಡ್ದು ಓಡೊನು ಕಡಲ್ಡ್ ಜಪುಡಾದ್ ಕಪ್ಪಲ್‌ನ್ ಬುಡ್ದು ತಪ್ಪಾವೊನಿಯೆರೆ ಪ್ರಯತ್ನ ಮಲ್ಪುನಗ

³¹ಪೌಲು ಶತಾಧಿಪತಿಗ್ಲಾ ಸಿಪಾಯಿಲೆಗ್ಲಾ, “ಮೊಕುಲು ಕಪ್ಪಲ್‌ಡ್ ಉಂತುಜೆರ್ಡ ನಿಕ್ಲೆ ಪ್ರಾಣ ಒರಿಯಂದ್,” ಅಂದ್‌ದ್ ಪಂಡೆ.

³²ಅಪಗ ಸಿಪಾಯಿಲು ಓಡದ ಬಲ್ಲ್‌ನ್ ಕಡ್ತ್‌ದ್ ಅವು ಬೂರ್ದು ಪೋಪಿಲೆಕ್ಕ ಮಲ್ತೆರ್.

³³ಪುಲ್ಯ ಆಪಿನಾತೆಗ್ ಪೌಲು ದಾಲಾಂಡಲಾ ತಿನಸ್ ದೆತ್ತೊನೊಡು ಅಂದ್‌ದ್ ಮಾತೆರ್‌ನ್ಲಾ ಒತ್ತಾಯ ಮಲ್ತೆ, “ನಿಕುಲು ಈ ಪೊರ್ತುಗು ಪದ್ನಾಲ್ ದಿನೊಡ್ದಿಂಚಿ ಕಾತೊಂದು ತಿನಸ್ ದಾಲಾ ದೆತ್ತೊನಂದೆ ಉಪವಾಸೊಡೇ ಉಪ್ಪುನೆಡ್ದಾದ್

³⁴ತಿನಸ್ ದೆತ್ತೊನೊಡು ಅಂದ್‌ದ್ ನಿಕ್ಲೆಡ ಕೇನೊನ್ವೆ. ಉಂದು ನಿಕ್ಲೆನ ಜೀವ ರಕ್ಷಣೆಗ್ ಅಗತ್ಯ. ನಿಕ್ಲೆನ ಏರೆನಲಾ ತರೆಡ್ದ್ ಒಂಜಿ ಕುಜಲ್‌ಲಾ ತಾಲಂದ್,” ಪಂಡೆ.

³⁵ಅಂಚ ಪಂಡ್ದ್ ಒಂತೆ ರೊಟ್ಟಿನ್ ದೆತ್ತೊಂದು ಮಾತೆರೆನ ಎದುರುಡು ದೇವೆರೆನ್ ಸುಗಿತ್‌ದ್ ಅವೆನ್ ಪೊಲ್ತುದು ತಿನಿಯೆರೆ ಸುರು ಮಲ್ತೆ.

³⁶ಅಪಗ ಮಾತೆರ್ಲಾ ಧೈರ್ಯ ಮಲ್ತೊಂದು ಅಕುಲುಲಾ ತಿನಸ್‌ನ್ ದೆತ್ತೊಂದು ತಿಂದೆರ್.

³⁷ಎಂಕುಲು ಮಾತ ಕೂಡ್ದು ಆ ಕಪ್ಪಲ್‌ಡ್ ಇರ್ನೂತ ಎಳ್ಪತ್ತಾಜಿ ಜನ ಇತ್ತ.

³⁸ಬೋಡಾಯಿನಾತ್ ತಿಂದಿ ಬೊಕ್ಕ ಗೋದಿನ್ ಕಡಲ್‌ಗ್ ದಕ್ಕ್‌ದ್ ಕಪ್ಪಲ್‌ನ್ ಹಗುರ ಮಲ್ತೆರ್.

³⁹ಪುಲ್ಯ ಆಯಿ ಬೊಕ್ಕ ಆ ದೇಶದ ಗುರ್ತ ತಿಕ್ಕಿಜಿ. ಆಂಡ ಪೊಯ್ಯೆದ ದಡತ್ತ ಮಿತ್ತ್ ಕಪ್ಪಲ್‌ನ್ ಕೊನುಪೋಯೆರೆ ಆಲೋಚನೆ ಮಲ್ತೆರ್.

⁴⁰ಬೊಕ್ಕ ಅಕುಲು ಲಂಗರ್‌ಲೆನ್ ಕಡ್ತ್‌ದ್ ಕಡಲ್‌ಡೇ ಬುಡ್ದು ಚುಕ್ಕಾಣಿದ ಬಲ್ಲ್‌ಲೆನ್ ಗಿರ್ತ್‌ದ್ ಮಲ್ಲ ಕುಂಟುನು ಗಾಳಿಗ್ ದೆರ್ತ್ತ್ ಕಟ್ಟ್‌ದ್ ಕಪ್ಪಲ್‌ನ್ ಕರೆಕ್ ನಡಪಾಯೆರ್.

⁴¹ಆಂಡ ನಡುಟು ಪೊಯ್ಯೆದ ರಾಶಿಗ್ ಕಪ್ಪಲ್ ತಾಂಟ್‌ದ್ ಕಪ್ಪಲ್‌ಗ್ ದುಂಬು ಪೋವರೆ ಆಯಿಜಿ ಬೊಕ್ಕ ಮಲ್ಲ ಮಲ್ಲ ಶೆರೆಕ್ಕುಲು ಕಪ್ಪಲ್‌ದ ಪಿರವುಡು ಲಂಗರ್‌ಗ್ ಹಾಕ್‌ದ್ ಕಪ್ಪಲ್ ಚೂರ್ಚೂರ್ ಆಯೆರೆ ಸುರು ಆಂಡ್. ಪಿರವುದ ಮರ್ಗಿಲ್ ಅಲೆತ್ತ ರಭಸೊಗು ದರಿಯೊಂದು ಬತ್ತ್ಂಡ್.

⁴²ಆಂಡ ಬಂದಿವಾನೆರೆಡ್ ಕೆಲೆವೆರ್ ನೀಂದ್‌ದ್ ತಪ್ಪಾವೊನುವೆರ್ ಅಂದ್‌ದ್ ಸಿಪಾಯಿಲು ಅಕ್ಲೆನ್ ಕೆರೊಡು ಅಂದ್‌ದ್ ಆಲೋಚನೆ ಮಲ್ತೆರ್.

⁴³ಆಂಡ ಶತಾಧಿಪತಿ ಪೌಲುನು ಒರಿಪಾವೊಡು ಅಂದ್‌ದ್ ಆಸೆ ಮಲ್ತ್‌ದ್ ಅಕ್ಲೆನ ಆಲೋಚನೆಲೆನ್ ಬೊಡ್ಚಿ ಅಂದ್‌ದ್ ನೀಂದೆರೆ ಆಪಿನಾಕಲು ಕಪ್ಪಲ್‌ಡ್ದ್ ಲೈತ್‌ದ್ ಬೇಗನೇ ಕಡಲ್ದ ಕರೆಕ್ ಪೋವೊಡು ಅಂದ್‌ದ್ ಅಪ್ಪಣೆ ಕೊರಿಯೆ.

⁴⁴ಬಂದಿವಾನೆರೆಡ್ ಕೆಲೆವೆರ್ ಪಲಯಿದ ಮಿತ್ತ್, ಕೆಲೆವೆರ್ ಕಪ್ಪಲ್‌ದ ತುಂಡುದ ಮಿತ್ತ್ ನೀಂದ್‌ದ್ ಪೋವೊಡು ಅಂದ್‌ದ್ ಅಪ್ಪಣೆ ಕೊರಿಯೆ. ಈ ರೀತಿಡ್ ಮಾತೆರ್ಲಾ ಜಾಗ್ರತೆಡ್ ಸೈಯಂದೆ ಕರೆಕ್ ಸೇರಿಯೆರ್.