Read Tulu ಅಪೊ.ಕ್ರಿ 3 Bible Online

ಅಪೊ.ಕ್ರಿ 3 - Tulu bible

ಅಪೊ.ಕ್ರಿ 3

¹ಒಂಜಿ ದಿನ ಪೇತ್ರೆಲಾ ಯೋಹಾನೆಲಾ ಮಧ್ಯಾಹ್ನ ಮೂಜಿ ಗಂಟೆಗ್ ನಡಪುನ ಪ್ರಾರ್ಥನೆಗಾದ್ ದೇವಾಲಯೊಗು ಪೋಯೆರ್.

²ಅವುಲು ಪುಟ್ಟಿ ದಿನೊಡ್ದೇ ಕುಂಟೆ ಇತ್ತಿನಾಯನ್ ಕೆಲೆವೆರ್ ತುಂಬೊಂದು ಬತ್ತ್‌ದ್, ಆಯನ್ ದೇವಾಲಯದ ಪೊರ್ಲು ಬಾಕಿಲ್ ಪನ್ಪಿ ಬಾಕಿಲ್‌ದ ಬರಿಟ್ಟ್ ದಿನಾಲ ಬಿಕ್ಷೆ ನಟ್ಟೆರೆಗಾದ್ ಕುಲ್ಲಾವೊಂದಿತ್ತೆರ್.

³ಆಯೆ ದೇವಾಲಯದ ಉಲಯಿ ಪೋಪಿನ ಪೇತ್ರನ್ಲಾ ಯೋಹಾನನ್ಲಾ ತೂದು ಬಿಕ್ಷೆ ನಟ್ಟಿಯೆ.

⁴ಪೇತ್ರೆ, ಯೋಹಾನೆ ಇರ್ವೆರ್‌ಲಾ ಆಯನ್ ದೃಷ್ಟಿ ದೀದ್ ತೂಯೆರ್. ಪೇತ್ರೆ ಆಯಗ್, “ಎಂಕ್ಲೆನ್ ತೂಲ,” ಪಂಡೆ.

⁵ಆಯೆ ಅಕ್ಲೆಡ್ದ್ ದಾಲಾಂಡಲಾ ತಿಕ್ಕು ಅಂದ್‌ದ್ ಆಸೆಡ್ ಅಕ್ಲೆನ್ ಲಕ್ಷ ದೀದ್ ತೂಯೆ.

⁶ಅಪಗ ಪೇತ್ರೆ, “ಎನಡ ಬೊಳ್ಳಿ ಬಂಗಾರ್ ದಾಲಾ ಇಜ್ಜಿ, ಎನಡ ಇತ್ತಿನೆನ್ ನಿಕ್ಕ್ ಕೊರ್ಪೆ. ನಜರೇತ್‌ದ ಯೇಸು ಕ್ರಿಸ್ತನ ಪುದರ್‌ಡ್ ಲಕ್ಕ್‌ದ್ ನಡಪುಲ.” ಪಂಡ್ದ್

⁷ಆಯನ ಬಲ ಕೈ ಪತ್ತ್‌ದ್ ದೆರ್ತ್ತ್‌ದ್ ಲಕ್ಕಾಯೆ. ಅವ್ವೇ ಗಳಿಗೆಡ್ ಆಯನ ಕಾರ್‌ಗ್ಲಾ ಗಂಟ್‌ಗ್ಲಾ ಬಲ ಬತ್ತ್ಂಡ್.

⁸ಆಯೆ ಲೈತ್‌ದ್ ಉಂತುದು ನಡತೆ. ಬೊಕ್ಕ ನಡತೊಂದು ಲೈತೊಂದು ದೇವೆರೆನ್ ಪುಗರೊಂದು ಅಕ್ಲೆನ ಒಟ್ಟುಗು ದೇವಾಲಯದ ಉಲಯಿ ಪೋಯೆ.

⁹ಆಯೆ ನಡಪುನೆನ್ಲಾ ಬೊಕ್ಕ ದೇವೆರೆನ್ ಪುಗರುನೆನ್ಲಾ ಜನೊಕುಲು ಮಾತೆರ್ಲಾ ತೂದು,

¹⁰ಇಂಬೆ ದೇವಾಲಯದ ಪೊರ್ಲು ಬಾಕಿಲ್ ಪನ್ಪಿ ಬಾಕಿಲ್‌ದಲ್ಪ ಕುಲ್ಲುದು ಬಿಕ್ಷೆ ನಟ್ಟುನಾಯೆನೇ ಅಂದ್‌ದ್ ಆಯನ ಗುರ್ತ ಪತ್ತ್‌ದ್ ಆಯಗ್ ಗುಣ ಆದುಪ್ಪುನೆನ್ ತೂದು ಮಾತೆರ್ಲಾ ಸೋದ್ಯೊಡುಲಾ ಬೆರ್ಮೆಡ್‌ಲಾ ದಿಂಜ್‌ದ್ ಪೋಯೆರ್‌.

¹¹ಆಯೆ ಪೇತ್ರನ ಬೊಕ್ಕ ಯೋಹಾನನ ಕೈ ಪತ್ತೊಂದು ಉಂತೊಂದುಪ್ಪುನಗ ಅಚ್ಚಿರ ಪಡೆಯಿನ ಜನೊಕುಲು ಮಾತೆರ್ಲಾ ಸೊಲೊಮೋನು ಪನ್ಪಿ ಪುದರಿತ್ತಿನ ಮಂಟಪೊಗು ಗುಂಪುಗುಂಪಾದ್ ಪಾರ್ದ್ ಬತ್ತೆರ್.

¹²ಪೇತ್ರೆ ಉಂದೆನ್ ತೂದು ಜನೊಕುಲೆಗ್, “ಇಸ್ರಾಯೇಲ್ ಜನೊಕುಲೇ ನಿಕುಲು ದಾಯೆಗ್ ನೆಕ್ಕ್ ಅಚ್ಚಿರ ಪಡೆಪರ್? ನಿಕುಲು ಎಂಕ್ಲೆನೇ ದೃಷ್ಟಿ ದೀದ್ ತೂಪಿನಿ ದಾಯೆ? ಎಂಕುಲು ಸ್ವಂತ ಬಲೊಡ್ದಾವಡ್ ದೇವಭಕ್ತಿಡ್ದಾವಡ್ ಇಂಬ್ಯನ್ ನಡಪುಲೆಕ್ಕ ಮಲ್ತ ಅಂದ್‌ದ್ ಎನ್ನಡೆ.

¹³ನಮ ಪಿತೃಲಾಯಿ ಅಬ್ರಹಾಮು, ಇಸಾಕ್ ಯಾಕೋಬುನ ದೇವೆರ್ ತನ ಸೇವಕೆ ಆದುಪ್ಪು ಯೇಸುನು ಮೈಮೆ ಪಡೆಪಾದೆ. ನಿಕುಲು ಆಯನ್ ಅಧಿಕಾರಿಲೆಗ್ ಪತ್ತ್‌ದ್ ಕೊರಿಯರ್ ಬೊಕ್ಕ ಪಿಲಾತೆ ಆಯನ್ ಬುಡ್ಪಾವೊಡು ಅಂದ್‌ದ್ ನಿರ್ಧಾರ ಮಲ್ತಿನಪಗ ಆಯನ್ ಬೊಡ್ಚಿ ಅಂದ್‌ದ್ ತಡೆತರ್.

¹⁴ಯೇಸು ಪರಿಶುದ್ಧೆಲಾ ನೀತಿವಂತೆಲಾ ಆದಿತ್ತ್‌ಂಡಲಾ ಆಯನ್ ತಿರಸ್ಕಾರ ಮಲ್ತ್‌ದ್ ಕೊಲೆಗಾರನ್ ಬುಡುಗಡೆ ಮಲ್ಪೊಡು ಅಂದ್‌ದ್ ಪಿಲಾತಡ ನಟ್ಟೊಂಡರ್.

¹⁵ಜೀವದ ಅಧಿಪತಿನ್ ಕೆರ್ಪಾಯೆರ್. ಆಂಡ ದೇವೆರ್ ಆಯನ್ ಸೈತಿನಾಕುಲೆಡ್ದ್ ಲಕ್ಕಾಯೆ. ಈ ಸಂಗತಿಡ್ ಎಂಕುಲೇ ಸಾಕ್ಷಿಲು.

¹⁶ನಿಕುಲು ತೂದು ಗುರ್ತ ಪತ್ತಿನ ಈ ನರಮಾನಿ ಗುಣ ಆವೆರೆ ಕಾರಣ ಆಯೆ ಯೇಸುನ ಪುದರ್‌ಡ್ ದೀಯಿನ ನಂಬಿಕೆನೇ; ಆ ಯೇಸುನ ಪುದರ್ ಆಯನ್ ಬಲ ಪಡೆಪಾಂಡ್, ಅಂದ್, ಆಯಡ ಉಂಡಾಯಿನ ನಂಬಿಕೆನೇ ಇಂಬ್ಯನ್ ನಿಕ್ಲೆ ಎದುರು ಪೂರ ಗುಣ ಮಲ್ತ್ಂಡ್.

¹⁷“ಸಹೋದ್ರೆರೇ, ಅವು ಉಪ್ಪಡ್, ನಿಕುಲು ಆ ಕಾರ್ಯೊನು ತೆರಿಯಂದೆ ಮಲ್ತರ್ ಅಂದ್‌ದ್ ತೆರಿದೆ; ನಿಕ್ಲೆನ ಅಧಿಕಾರಿಲುಲಾ ತೆರಿಯಂದೆ ಮಲ್ತೆರ್.

¹⁸ಇಂಚ ಆಪುಂಡು ಅಂದ್‌ದ್ ದೇವೆರ್ ಸುರುಟ್ಟೇ ತೆರಿಪಾದಿತ್ತೆ. ಕ್ರಿಸ್ತೆ ಶ್ರಮೆ ಅನುಭವ ಮಲ್ತ್‌ದ್ ಸೈಯೊಡು ಅಂದ್‌ದ್ ಮಾತ ಪ್ರವಾದಿಲೆ ಬಾಯಿಡ್ದ್ ದುಂಬೇ ಪನ್ಪಾದಿನ ಪಾತೆರೊಲು ಇಂಚ ನಡಪಾಯೆ.

¹⁹ಅಂಚಾಯಿನೆಡ್ದ್ ದೇವೆರ್ ನಿಕ್ಲೆ ಪಾಪೊಲೆನ್ ಮಾಜಾದ್ ಬುಡ್ಪಿಲೆಕ್ಕ ನಿಕುಲು ಪಶ್ಚಾತಾಪ ಪಡೆದ್ ಆಯ ಕಡೆಕ್ಕ್ ತಿರ್ಗ್‌ಲೆ. ತಿರ್ಗಿಯರ್ಡ ದೇವೆರ್ ಕೊರ್ಪಿ ಸಮಾಧಾನದ ದಿನೊಕುಲು ಒದಗ್‌ದ್ ಬರು.

²⁰ಬೊಕ್ಕ ಆಯೆ ನಿಕ್ಲೆಗ್ ನೇಮಕ ಮಲ್ತಿ ಕ್ರಿಸ್ತೆ ಆದುಪ್ಪು ಯೇಸುನು ಕಡಪುಡ್ದು ಕೊರುವೆ.

²¹ಆಂಡ ಮಾತೆನ್ಲಾ ಸರಿ ಮಲ್ಪು ಕಾಲ ಬರ್ಪಿ ಮುಟ್ಟ ಯೇಸು ಪರಲೋಕೊಡೇ ಉಪ್ಪೊಡು. ಆ ಕಾಲದ ಸಂಗತಿಡ್ ದೇವೆರ್ ಪೂರ್ವೊಡ್ದಿಂಚಿ ತನ ಪರಿಶುದ್ಧ ಪ್ರವಾದಿಲೆ ಬಾಯಿಡ್ದೆ ಪನ್ಪಾದೆ.

²²ಮೋಶೆ ಇಂಚ ಪನ್ತೆ, ‘ದೇವೆರಾದುಪ್ಪು ಕರ್ತವೆ ಎನನ್ ತಯಾರ್ ಮಲ್ತಿಲೆಕ್ಕ ನಿಕ್ಲೆನ ಸಹೋದ್ರೆರೆಡ್ ಬೊಕ್ಕೊರಿ ಪ್ರವಾದಿನ್ ನಿಕ್ಲೆಗ್ ತಯಾರ್ ಮಲ್ತ್‌ದ್ ಕೊರುವೆ. ಆಯೆ ನಿಕ್ಲೆಗ್ ಪನ್ಪಿನ ಮಾತ ಪಾತೆರೊಲೆಗ್ ಕೆಬಿ ಕೊರ್ದು ಕೇನ್ಲೆ.

²³ಆ ಪ್ರವಾದಿನ ಪಾತೆರ ಕೇನಂದೆ ಉಪ್ಪುನ ಪ್ರತಿ ಒರಿಲಾ ನಮ ಜನೊಕುಲೆಡ್ದ್ ದೂರ ಆದ್ ನಾಶ ಆಪೆ,’ ಪನ್ಪಿನವೇ.

²⁴ಉಂದತ್ತಂದೆ ಸಮುವೇಲೆಲಾ ಆಯಡ್ದ್ ಬೊಕ್ಕ ಬತ್ತ್‌ದ್ ಪ್ರವಾದನೆ ಮಲ್ತಿನ ಮಾತ ಪ್ರವಾದಿಲುಲಾ ಈ ದಿನೊಕುಲೆ ವಿಷಯೊಡು ತೆರಿಪಾದೆರ್.

²⁵ನಿಕುಲು ಆ ಪ್ರವಾದಿಲೆ ಶಿಷ್ಯೆರ್, ದೇವೆರ್ ನಮ ಪಿತೃಲೆ ಒಟ್ಟುಗು ಮಲ್ತ್‌ದಿ ಒಡಂಬಡಿಕೆಗ್ ಬಾಧ್ಯೆರಾದುಲ್ಲರ್. ಆಯೆ ಅಬ್ರಹಾಮುಗು, ‘ನಿನ ಸಂತಾನೊಡ್ದು ಭೂಮಿದ ಮಾತ ಕುಟುಂಬೊಲೆಗ್ ಆಶೀರ್ವಾದ ತಿಕ್ಕು,’ ಅಂದ್‌ದ್ ಆ ಒಡಂಬಡಿಕೆನ್ ಮಲ್ತ್‌ದೆ ಅತ್ತಾ?

²⁶ಸುರು ನಿಕ್ಲೆಗಾದೇ, ದೇವೆರ್ ತನ ಸೇವಕನ್ ತಯಾರ್ ಮಲ್ತ್‌ದ್ ನಿಕ್ಲೆಡ್ ಒರಿ ಒರಿಯನ್ ಅಕುಲಾಕುಲೆ ಪಡಿಕೆಂತಿ ಗುಣೊಡ್ದು ತಿರ್ಗಾದ್ ನಿಕ್ಲೆನ್ ಆಶೀರ್ವಾದ ಮಲ್ಪೊಡು ಅಂದ್‌ದ್ ಯೇಸುನು ಕಡಪುಡ್ದೆ,” ಪಂಡ್ದ್ ಪಂಡೆ.