Read Tulu ಅಪೊ.ಕ್ರಿ 7 Bible Online

ಅಪೊ.ಕ್ರಿ 7 - Tulu bible

ಅಪೊ.ಕ್ರಿ 7

¹ಅಪಗ ಪ್ರಧಾನಯಾಜಕೆ ಸ್ತೇಫನಡ, “ಈ ಪಾತೆರೊಲು ನಿಜನಾ?” ಅಂದ್‌ದ್ ಕೇಂಡಿನೆಕ್ಕ್,

²ಆಯೆ ಪಂಡಿನಿ, “ಸಹೋದ್ರೆರೇ, ಅಮ್ಮಾಡ್ಲೆ, ಕೇನ್ಲೆ, ನಮ ಮೂಲಪಿತೃ ಆದುಪ್ಪು ಅಬ್ರಹಾಮು ಹಾರಾನ್‌ಡ್ ಉಪ್ಪೊಡ್ದು ದುಂಬು ಮೆಸೊಪೊತಾಮ್ಯೊಡು ಮೈಮೆದ ದೇವೆರ್ ಆಯಗ್ ತೋಜಿದ್ ಬತ್ತೆ.

³‘ಈ, ನಿನ ದೇಶೊನು ನಿನ ಕುಟಂಬದಾಕುಲೆನ್ಲಾ ಬುಡ್ದು ಯಾನ್ ತೋಜಾವು ದೇಶೊಗು ಪಿದಾಡ್ದ್ ಪೋಲ,’ ಅಂದ್‌ದ್ ಪಂಡೆ.

⁴ಅಪಗ ಆಯೆ ಕಸ್ದೀಯೆರ್‌ನ ದೇಶೊಡ್ದು ಪಿದಾಡ್ದ್ ಪೋದು ಹಾರಾನ್‌ಡ್ ನಿಲೆ ಆಯೆ. ಆಯನ ಅಮ್ಮೆ ಸೈತಿ ಬೊಕ್ಕ ದೇವೆರ್ ಆಯನ್ ಅಲ್ತ್‌ಡ್ದ್ ನಿಕುಲು ಇತ್ತೆ ಉಪ್ಪುನ ದೇಶೊಗು ಬರ್ಪಿಲೆಕ್ಕ ಮಲ್ತೆ.

⁵ಉಂದೆಟ್ಟ್ ಆಯಗ್ ಕಾರ್ ದೀಪಿನಾತ್ ಜಾಗ್ ಇಜ್ಜಂದಿನಪಗ, ಈ ದೇಶೊನು ನಿಕ್ಕ್‌ಲಾ ನಿನಡ್ದ್ ಬೊಕ್ಕ ಬರ್ಪಿನ ಸಂತಾನೊಗ್ಲಾ ಹಕ್ಕಾದ್ ಕೊರ್ಪೆ ಅಂದ್‌ದ್ ಆಯೆ ಜೋಕುಲ್‌ದಾಂತಿನಾಯೆ ಆದುಪ್ಪುನಗ ವಾಗ್ದಾನ ಮಲ್ತೆ.

⁶ಅವು ಅತ್ತಂದೆ ದೇವೆರ್ ಆಯಗ್ ಪಂಡಿನಿ ದಾನೆಂದ್ಂಡ, ‘ನಿನ ಸಂತಾನದಾಕುಲು ಪರದೇಶದಾಕುಲು ಆದುಪ್ಪುವೆರ್. ಆ ಪರದೇಶದಾಕುಲು ಅಕ್ಲೆನ್ ಚಾಕ್ರಿದಾಕುಲಾದ್ ಮಲ್ತೊಂದು ನಾನೂದು ವರ್ಸ ಮುಟ್ಟ ಭಯಂಕರ ಕಷ್ಟೊಡು ನಡಪಾವೆರ್.

⁷ಬೊಕ್ಕ ನಿನ ಸಂತಾನದಾಕುಲೆನ್ ಚಾಕ್ರಿದಾಕುಲೆಲೆಕ್ಕ ಮಲ್ತ್‌ದಿನ ಪಿದಯಿದ ಜನೊಕುಲೆನ್ ಯಾನೇ ನ್ಯಾಯಾತೀರ್ಪು ಮಲ್ಪುವೆ ಅಂದ್‌ದ್ ದೇವೆರ್ ಪನ್ತೆ. ಐಡ್ದ್ ಬೊಕ್ಕ ಅಕುಲು ಪಿದಾಡ್ದ್ ಈ ಜಾಗ್‌ಡೇ ಎನ ಆರಾಧನೆ ಮಲ್ಪೆರ್.’

⁸ಅವು ಅತ್ತಂದೆ ದೇವೆರ್ ಆಯಗ್ ಒಂಜಿ ಸುನ್ನತಿ ಪನ್ಪಿನ ಒಡಂಬಡಿಕೆನ್ ನೇಮಕ ಮಲ್ತೆ. ಐಕಾದ್ ಅಬ್ರಹಾಮು ಇಸಾಕ್ ಪುಟ್ಟಿನ ಎನ್ಮನೇ ದಿನೊಟು ಆಯಗ್ ಸುನ್ನತಿ ಮಲ್ತೆ. ಇಸಾಕ್ ತನ ಮಗೆ ಯಾಕೋಬುಗ್ಲಾ ಸುನ್ನತಿ ಮಲ್ತೆ. ಬೊಕ್ಕ ಯಾಕೋಬುಲಾ ತನ ಪದ್ರಾಡ್ ಜೋಕುಲೆಗ್ಲಾ ಸುನ್ನತಿ ಮಲ್ತೆ. ಆ ಪದ್ರಾಡ್ ಆಣ್ ಜೋಕುಲೇ ಮೂಲ ಪಿತೃಲಾಯೆರ್.

⁹“ಈ ಮೂಲ ಪಿತೃಲು ಕಿಚ್ಚಿಮಚ್ಚರೊಡು ಯೋಸೇಫುನು ಐಗುಪ್ತೊಗು ಮಾರ್ದ್ ಬುಡಿಯೆರ್. ಅಲ್ಪ ದೇವೆರ್ ಆಯನ ಒಟ್ಟುಗು ಇತ್ತೆರ್.

¹⁰ಆಯಗ್ ಬತ್ತಿನ ಮಾತ ಕಷ್ಟೊಲೆಡ್ ಆಯನ್ ಬುಡ್ಪಾಯೆ. ಐಗುಪ್ತ ದೇಶದ ಅರಸು ಆದುಪ್ಪು ಫರೋಹನ ಎದುರುಡು ದಯಲಾ ಬುದ್ಧಿಲಾ ಇತ್ತಿನೆಡ್ದ್ ಆಯನ್ ಐಗುಪ್ತ ದೇಶೊಡ್ಲಾ ಬೊಕ್ಕ ತನ ಅರಮನೆದ ಮಿತ್ತ್‌ಲಾ ಮುಖ್ಯಸ್ಥೆ ಮಲ್ತ್ ಬುಡಿಯೆ.

¹¹ಅಪಗ ಐಗುಪ್ತ ಬೊಕ್ಕ ಕಾನಾನ್ ದೇಶೊಲೆಡ್ ಮಾತ ಕಡೆಟ್ಲಾ ಬರಗಾಲ ಬತ್ತ್‌ದ್ ಬಾರೀ ಕಷ್ಟ ಆಂಡ್. ನಮ ಪಿತೃಲೆಗ್ ತಿನರೆ ತಿನಸ್ ತಿಕ್ಕೊಂದಿತ್ತಿಜಿ.

¹²ಆಂಡ ಐಗುಪ್ತ ದೇಶೊಡು ದಾನ್ಯೊಲು ಉಂಡು ಅಂದ್‌ದ್ ಯಾಕೋಬು ತೆರಿದ್ ನಮ ಪಿತೃಲೆನ್ ಸುರು ಒಂಜಿ ಸರ್ತಿ ಅಡೆಗ್ ಕಡಪುಡಿಯೆ.

¹³ಅಕುಲು ರಡ್ಡನೆ ಸರ್ತಿ ಬನ್ನಗ ಯೋಸೇಫು ತನ ಪಲಯಾಡ್ಲೆಗ್ ಆಯೆ ಏರಂದ್‌ದ್ ತೆರಿಪಾಯೆ. ಬೊಕ್ಕ ಯೋಸೇಫುನ ಸಂತಾನ ಫರೋಹಗ್ ತೆರಿದ್ ಬತ್ತ್ಂಡ್.

¹⁴ಬೊಕ್ಕ ಯೋಸೇಫು ತನ ಅಮ್ಮೆ ಆದುಪ್ಪು ಯಾಕೋಬುನ್ಲಾ ತನ ಮಾತ ಸಂತಾನದಾಕುಲೆಡೊಪ್ಪ ಎಲ್ಪತೈನ್ ಜನೊನು ಲೆಪ್ಪುಡಾಯೆ.

¹⁵ಯಾಕೋಬು ಐಗುಪ್ತೊಗು ಪೋಯಿ ಬೊಕ್ಕ ಅಲ್ಪ ಆಯೆಲಾ ನಮ ಪಿತೃಲುಲಾ ಸೈತ್ ಪೋಯೆರ್.

¹⁶ಅಕ್ಲೆನ ಶರೀರೊನು ಸಿಕೇಮುಗು ದೆತ್ತೊಂದು ಪೋದು ಅಲ್ಪ ಹಮೋರನ ಜೋಕುಲೆಡ್ದ್ ಅಬ್ರಹಾಮು ಬೊಳ್ಳಿ ಕೊರ್ದು ದೆತ್ತೊಂದಿನ ಸಮಾಧಿಡ್ ದೀಯೆರ್.

¹⁷“ಆಂಡ ದೇವೆರ್ ಅಬ್ರಹಾಮುಗು ವಾಗ್ದಾನ ಮಲ್ತ್‌ದಿನ ಕಾಲ ಕೈತಲ್‌ ಬರೊಂದುಪ್ಪುನಗ ನಮ ಜನೊಕುಲು ಐಗುಪ್ತ ದೇಶೊಡು ದಿಂಜೊಂಡೆರ್.

¹⁸ಕಡೆಕ್ಕ್ ಯೋಸೇಫುನು ತೆರಿಯಂದಿನ ಬೇತೆ ಒರಿ ಅರಸು ಐಗುಪ್ತದ ಅಧಿಕಾರೊಗು ಬತ್ತೆ.

¹⁹ಈ ಅರಸು ನಮ ಜನೊಕುಲೆನ್ ಪಗೆ ಮಲ್ತ್‌ದ್ ಅಕ್ಲೆನ ಬಾಲೆಲೆನ್ ಜೀವೊಡು ಒರಿಪಾವೆರೆ ಬಲ್ಲಿ ಅಂದ್‌ದ್ ಪಿದಯಿ ಪಾಡ್ಪಾಯೆ. ನಮ ಪಿತೃಲೆನ್ ಮಸ್ತ್ ಭಂಗ ಬರ್ಪಾಯೆ;

²⁰ಆ ಸಮಯೊಡೇ ಮೋಶೆ ಪುಟ್ಟಿಯೆ. ಆಯೆ ದೇವೆರೆಗ್ ಪೊರ್ಲಗಂಟಾದಿತ್ತೆ. ಆಯನ್ ಅಮ್ಮೆರೆನ ಇಲ್ಲಡ್ ಮೂಜಿ ತಿಂಗೊಲು ತಾಂಕಿಯೆರ್;

²¹ಐಡ್ದ್ ಬೊಕ್ಕ ಆಯನ್ ಪಿದಯಿ ಪಾಡಿನಪಗ ಫರೋಹನ ಮಗಲ್ ಆಯನ್ ಪತ್ತೊಂದು ಪೋದು ತನ ಮಗಲೆಕ್ಕ ತಾಂಕಿಯಲ್.

²²ಮೋಶೆ ಐಗುಪ್ತ ದೇಶದ ಮಾತ ವಿದ್ಯೆಲೆನ್ ಕಲ್ತೊಂದು ಪಾತೆರೊಡ್ಲಾ ಕಾರ್ಯೊಡ್ಲಾ ಸಮರ್ಥೆ ಆದಿತ್ತೆ.

²³“ಆಯಗ್ ನಲ್ಪ ವರ್ಸ ಪ್ರಾಯ ಆದುಪ್ಪುನಗ ಇಸ್ರಾಯೇಲ್ ಸಂತಾನದಾಕುಲಾಯಿನ ತನ ಸಹೋದ್ರೆರೆನ್ ಪೋದು ತೂವೊಡು ಪನ್ಪಿನ ಆಸೆ ಆಯನ ಉಡಲ್‌ಡ್ ಆಂಡ್.

²⁴ಅಕ್ಲೆಡ ಒರಿಯಗ್ ಅನ್ಯಾಯ ಆಪಿನೆನ್ ಆಯೆ ತೂದು ಆಯಗ್ ಸಹಾಯ ಮಲ್ತ್‌ದ್ ತೊಂದರೆ ಕೊರ್ಪಿನ ಐಗುಪ್ತ್ಯನ್ ಕೆರ್ದ್ ಪಗೆ ತಿರಿಸಾಯೆ.

²⁵ಅಕ್ಲೆನ್ ಬುಡುಗಡೆ ಮಲ್ಪೆರೆ ದೇವೆರ್ ಮೋಸೆನ್ ಉಪಯೋಗ ಮಲ್ತೊಂದುಲೆ ಅಂದ್‌ದ್ ತನ ಸಹೋದ್ರೆರೆಗ್ ಗೊತ್ತಾವು ಅಂಚ ಎನ್ನಿಯೆ. ಆಂಡ ಅಕುಲು ಅಂಚ ತೆರಿಯೊಂಡಿಜೆರ್,

²⁶ಮನದಾನಿ ಇರ್ವೆರ್ ಇಸ್ರಾಯೇಲ್ಯೆರ್ ಲಡಯಿ ಮಲ್ತೊಂದುಪ್ಪುನಗ ಆಯೆ ಅಕ್ಲೆ ಎದುರಾದ್, ‘ಜನೊಕುಲೇ ನಿಕುಲು ಸಹೋದರೆರತ್ತಾ? ನಿಕುಲು ದಾಯೆಗ್ ಒರಿ ಒರಿಯಗ್ ಅನ್ಯಾಯ ಮಲ್ಪುವರ್,’ ಪಂಡ್ದ್ ಅಕ್ಲೆನ್ ಸಮಾಧಾನ ಮಲ್ಪೆರೆ ತೂಯೆ.

²⁷ಆಂಡ ಅನ್ಯಾಯ ಮಲ್ತಿನಾಯಡ್ದ್ ಒರಿ ಮೋಸೆನ್ ಪಿರ ನೂಕುದು ಪನ್ಪೆ, ‘ನಿನನ್ ಎಂಕ್ಲೆನ ಮಿತ್ತ್ ಅಧಿಪತಿಲಾ ನ್ಯಾಯಾಧಿಪತಿಲಾ ಮಲ್ತಿನಾಕುಲು ಏರ್?

²⁸ಕೋಡೆ ಆ ಐಗುಪ್ತ್ಯನ್ ಕೆರಿಲೆಕ್ಕ ಎನನ್ಲಾ ಕೆರೊಡು ಪಂಡ್ದುಲ್ಲನಾ?’ ಅಂದ್‌ದ್ ಆಯನ್ ನೂಕುದು ಬುಡಿಯೆ.

²⁹ಈ ಪಾತೆರೊನು ಕೇಂಡ್ದ್ ಮೋಶೆ ಪಾರ್‌ಪೋದು ಮಿದಿಯಾನ್ ದೇಶೊಡು ಪರ ಊರುದಾಯೆ ಆದಿತ್ತೆ. ಅಲ್ಪ ರಡ್ಡ್ ಆಣ್ ಜೋಕುಲು ಪುಟ್ಟಿಯೆರ್.

³⁰“ನಲ್ಪ ವರ್ಸ ಕರಿಬೊಕ್ಕ ಕರ್ತವನ ದೂತೆ ಸೀನಾಯಿ ಪರ್ವತದ ಕಾಡ್‌ದ ಪುದೆಲ್‌ಡ್ ಅರ್ಲುನ ತೂಟು ತೋಜಿಯೆ.

³¹ಮೋಶೆ ಅವೆನ್ ತೂದು ಅಚ್ಚಿರ ಆಯೆ. ಸಮ ತೂವೊಡು ಅಂದ್‌ದ್ ಕೈತಲ್‌ ಪೋನಗ,

³²‘ಯಾನ್ ನಿನ ಪಿತೃಲೆನ ದೇವೆರ್, ಅಬ್ರಹಾಮು ಇಸಾಕ್ ಯಾಕೋಬುನ ದೇವೆರ್,’ ಅಂದ್‌ದ್ ಕರ್ತವನ ಸ್ವರೊನು ಕೇಂಡೆ. ಅಪಗ ಮೋಶೆ ಕುಂಬರೊಂದು ಸಮ ತೂವೆರೆ ಧೈರ್ಯ ಮಲ್ತ್‌ಜೆ.

³³ಬೊಕ್ಕ ಕರ್ತವೆ ಆಯಗ್ ಪಂಡೆ, ‘ನಿನ ಕಾರ್‌ದ ಜೋಡುನು ದೆಪ್ಪು; ಈ ಉಂತುದಿನ ಜಾಗ್ ಪರಿಶುದ್ಧ ನೆಲ.

³⁴ಐಗುಪ್ತ ದೇಶೊಡುಪ್ಪುನ ಎನ ಜನೊಕುಲೆನ ಕಷ್ಟೊನು ತೂತೆ; ಅಕುಲು ನರಕುನೆನ್ ಕೇಂಡ್ದ್ ಅಕ್ಲೆನ್ ಬುಡ್ಪಾವೆರೆ ಜತ್ತ್‌ದ್ ಬೈದೆ. ಇತ್ತೆ ಬಲ, ನಿನನ್ ಐಗುಪ್ತೊಗು ಕಡಪುಡ್ವೆ,’ ಅಂದ್‌ದ್ ಪಂಡೆ.

³⁵“‘ನಿನನ್ ಎಂಕ್ಲೆನ ಮಿತ್ತ್ ಅಧಿಪತಿಲಾ ನ್ಯಾಯಾಧಿಪತಿಲಾ ಮಲ್ತಿನಾಕುಲು ಏರ್,’ ಅಂದ್‌ದ್ ತಿರಸ್ಕಾರ ಆತಿನ ಮೋಶೆಗ್ ದೇವೆರ್ ಪುದೆಲ್‌ಡ್ ತೋಜಿದ್ ಬತ್ತ್‌ದ್ ದೂತನ ಕೈಡ್ದ್ ಆಯನ್ ಅಧಿಪತಿಲಾ ಬುಡ್ಪಾವುನಾಯೆಲಾ ಮಲ್ತ್‌ದ್ ಕಡಪುಡಿಯೆ.

³⁶ಇಂಬೆ ಅಕ್ಲೆನ್ ಐಗುಪ್ತ ದೇಶೊಡ್ಲಾ ಕೆಂಪು ಕಡಲ್ ದಾಂಟ್‌ದ್ ನಲ್ಪ ವರ್ಸ ಮುಟ್ಟ ಕಾಡ್‌ಡ್ಲಾ ಕಾರ್ನಿಕೊಲೆನ್ಲಾ ಗುರ್ತೊಲೆನ್ಲಾ ಮಲ್ತೊಂದು ನಡಪಾವೊಂದು ಬತ್ತೆ.

³⁷ದೇವೆರ್ ಎನನ್ ತಯಾರ್ ಮಲ್ತಿಲೆಕ್ಕ ನಿಕ್ಲೆನ ಸಹೋದ್ರೆರೆಡ್ ಬೊಕ್ಕೊರಿ ಪ್ರವಾದಿನ್ ನಿಕ್ಲೆಗ್ ತಯಾರ್ ಮಲ್ತ್‌ದ್ ಕೊರುವೆ ಅಂದ್‌ದ್ ಈ ಮೋಶೆನೇ ಇಸ್ರಾಯೇಲ್ ಜನೊಕುಲೆಗ್ ಪಂಡಿನಾಯೆ.

³⁸ಈ ಮೋಶೆನೇ ಸೀನಾಯಿ ಪರ್ವತದ ಬರಿಟ್ಟ್ ದೂತನ ಒಟ್ಟುಗು ಪಾತೆರ್‌ದಿನಾಯೆಲಾ, ನಮ ಪಿತೃಲೆ ಒಟ್ಟುಗು ಕಾಡ್‌ದ ಸಭೆಟ್ ಮದ್ಯಸ್ಥೆ ಆದ್ ಇತ್ತಿನಾಯೆಲಾ ಜೀವ ಇತ್ತಿನ ಅಪ್ಪಣೆಲೆನ್ ದೇವೆರೆಡ್ದ್ ಸ್ವೀಕಾರ ಮಲ್ತ್‌ದ್ ಅವೆನ್ ನಂಕ್ ಕೊರಿನಾಯೆಲಾ ಆದುಲ್ಲೆ.

³⁹“ಆಂಡ ನಮ ಪಿತೃಲು ಆಯನ ಪಾತೆರೊಲೆನ್ ಕೇನುನೆಕ್ಕ್ ಮನಸ್‌ದಾಂತೆ ಆಯನ್ ತಿರಸ್ಕಾರ ಮಲ್ತ್‌ದ್ ತನ್ಕುಲೆ ಉಡಲ್‌ಡ್ ಕುಡ ಐಗುಪ್ತದ ಕಡೆಕ್ಕ್ ಮನಸ್ ದೀಯೆರ್.

⁴⁰ಅಕುಲು ಆರೋನಗ್, ‘ಐಗುಪ್ತ ದೇಶೊಡ್ದು ನಮನ್ ಲೆತ್ತೊಂದು ಬತ್ತಿನ ಆ ಮೋಶೆಗ್ ದಾನೆ ಆಂಡ್ ಅಂದ್‌ದ್ ಗೊತ್ತಿಜ್ಜಿ. ಐಡ್ದಾವರ ಎಂಕ್ಲೆನ ಎದುರುಡು ಪೋವೆರೆ ಒಂಜಿ ದೇವೆರೆನ್ ಮಲ್ತ್‌ದ್ ಕೊರ್ಲ,’ ಅಂದ್‌ದ್ ಪಂಡೆರ್.

⁴¹ಆ ದಿನೊಟು ಅಕುಲು ಒಂಜಿ ಬಸವನ ಮೂರ್ತಿನ್ ಮಲ್ತ್‌ದ್ ಐಕ್ ಬಲಿ ಅರ್ಪಣೆ ಕೊರ್ದು ತನ್ಕುಲೆನ ಕೈಡ್ದೇ ಮಲ್ತಿನ ವಸ್ತುಡು ಸಂತೋಷ ಪಡೆಯೆರ್.

⁴²ಆಂಡ ದೇವೆರ್ ಅಕ್ಲೆನ್ ತಿರಸ್ಕಾರ ಮಲ್ತ್‌ದ್ ಬಾನದ ನಕ್ಷತ್ರೊಲೆನ್ ಆರಾಧನೆ ಮಲ್ಪೆರೆ ಬುಡ್ದು ಬುಡಿಯೆ. ಪ್ರವಾದಿಲೆನ ಗ್ರಂಥೊಲೆಡ್ ಬರೆತಿ ಲೆಕ್ಕನೇ, ‘ಇಸ್ರಾಯೇಲ್ ಸಂತಾನದಾಕುಲೇ, ನಿಕುಲು ಕಾಡ್‌ಡ್ ನಲ್ಪ ವರ್ಸೊಡು ದಿನ ದೆಪ್ಪುನಗ ಪ್ರಾಣಿಲೆನ್ ಕೆರ್ದ್ ಎಂಕ್ ಬಲಿ ಕೊರ್ತರಾ, ಇಜ್ಜತ್ತಾ?

⁴³ಐತ ಬದಲಿಗ್ ಪೂಜೆ ಮಲ್ಪೊಡು ಅಂದ್‌ದ್ ಮಲ್ತೊಂದಿನ ಮೂರ್ತಿಲೆನ್, ಮೋಲೋಕುನ ಗುಡಾರೊನ್ಲಾ ರೋಂಫಾ ದೇವಿನ ನಕ್ಷತ್ರದ ಮೂರ್ತಿನ್ಲಾ ತುಂಬೊಂದು ಪೋಯರ್. ಅಂಚಾಯಿನೆಡ್ದ್ ಯಾನ್ ನಿಕ್ಲೆನ್ ಬಾಬೆಲ್‌ದ ಅಂಚಿದ ದಿಕ್ಕ್‌ಗ್ ಗಡಿಪಾರ್ ಮಲ್ಪುವೆ.’

⁴⁴“ಸಾಕ್ಷಿದ ಗುಡಾರ ಕಾಡ್‌ದ ಉಲಯಿ ನಮ ಪಿತೃಲೆನ ಕೈತಲ್ ಇತ್ತ್ಂಡ್. ದೇವೆರ್ ಮೋಶೆಡ ಪಂಡಿಲೆಕ್ಕನೇ ಅವ್ವೇ ರೀತಿಡ್ ಗುಡಾರೊನು ಮಲ್ಪಾವೊಡು ಅಂದ್‌ದ್ ನೇಮಕ ಮಲ್ತೆ.

⁴⁵ಅವ್ವೇ ಗುಡಾರೊನು ನಮ ಪಿತೃಲು ಪಡೆಯೆರ್; ಯೆಹೋಶುವೆ ನಮ ಪಿತೃಲೆನ್ ದುಂಬು ಕೊನೊ ಪೋದು ದೇವೆರ್ ಪಿದಯಿದ ಜನೊಕುಲೆನ್ ಅಕ್ಲೆಗಿತ್ತಿ ದೇಶೊಡ್ದು ನಮ ಪಿತೃಲೆ ಎದುರು ಪಿದಯಿ ಪಾಡ್ದ್ ದೇಶೊನು ಸ್ವಾದೀನ ಮಲ್ತ್‌ದ್ ಆ ಗುಡಾರೊನ್ಲಾ ಕನತೆರ್. ಅವು ದಾವೀದ ಕಾಲ ಮುಟ್ಟ ಅಲ್ಪನೇ ಇತ್ತ್ಂಡ್.

⁴⁶ದಾವೀದಗ್ ದೇವೆರೆ ಎದುರು ದಯ ತಿಕ್ಕಿನೆಡ್ದ್ ಯಾಕೋಬು ಗೊತ್ರದಾಕುಲೆಗ್ ಒಂಜಿ ದೇವಾಲಯೊನು ಕಟ್ಟಾಯೆರೆ ಒಂಜಿ ಅಪ್ಪಣೆ ಕೊರೊಡು ಅಂದ್‌ದ್ ದೇವೆರೆಡ ಕೇನೊಂಡೆ.

⁴⁷ಆಂಡ ಆ ದೇವಾಲಯೊನು ಕಟ್ಟಾಯಿನಾಯೆ ಸೊಲೊಮೋನೆ.

⁴⁸“ಆಂಡಲಾ ಸರ್ವಶಕ್ತೆ ದೇವೆರ್ ನರಮಾನಿ ಕೈಡ್ದ್ ಕಟ್ಟಾದಿನ ಇಲ್ಲಡ್ ನಿಲೆ ಆದುಪ್ಪುನಾಯೆ ಅತ್ತ್.

⁴⁹‘ಪರಲೋಕ ಎನ ಗದ್ದಿಗೆ, ಭೂಮಿ ಎನ ಪಾದಪೀಠ. ನಿಕುಲು ಎಂಕ್ ಎಂಚಿನ ಇಲ್ಲನ್ ಕಟ್ಟ್‌ದ್ ಕೊರುವರ್‌? ಎನ ವಿಶ್ರಾಂತಿಗ್ ತಕ್ಕದ ಜಾಗ್ ಒವ್ವು? ಎನ ಕೈ ಉಂದೆನ್ ಮಾತೆನ್ಲಾ ಉಂಡು ಮಲ್ತಿನಿ ಅತ್ತಾ?’ ಅಂದ್‌ದ್ ಪ್ರವಾದಿ ಪನ್ಪೆ.

⁵⁰

⁵¹“ಅರ್ಗಂಟ್ ಮಲ್ಪುನಾಕುಲೇ, ಉಡಲ್‌ಲಾ ಕಣ್ಣ್‌ಲಾ ಶುದ್ಧದಾಂತಿನಾಕುಲೇ, ನಿಕ್ಲೆನ ಪಿತೃಲು ಮಲ್ತಿ ಲೆಕ್ಕನೆ ನಿಕುಲುಲಾ ಏಪಲಾ ಪರಿಶುದ್ಧಾತ್ಮೊನು ವಿರೋಧ ಮಲ್ಪುನಾಕುಲೇ ಆದುಲ್ಲರ್.

⁵²ನಿಕ್ಲೆ ಪಿತೃಲೆಡ್ದ್ ಪ್ರವಾದಿಲೆಗ್ ಭಂಗ ಕೊರಂದಿನಾಕುಲು ಏರ್ ಉಲ್ಲೆರ್? ನೀತಿವಂತೆ ಬರ್ಪಿನ ವಿಷಯೊನು ತೆರಿಪಾಯಿನಾಕುಲೆನ್ ಕೆರಿಯರ್. ನಿಕುಲು ಇತ್ತೆ ಆಯನ್ ಒಚ್ಚಿದ್ ಕೊರ್ದು ಕುಡ ಕೆರ್ತಿನಾಕುಲಾಯರ್.

⁵³ದೂತೆರೆಡ್ದ್ ನ್ಯಾಯಕಟ್ಟ್ ಪಡೆದಿತ್ತ್‌ಂಡಲಾ ನಿಕುಲು ಐತ ಲೆಕ್ಕನೆ ನಡಪುಜರ್,” ಪಂಡೆ.

⁵⁴ಸ್ತೇಫನೆ ಪಂಡಿನ ಪಾತೆರೊಲೆನ್ ಕೇಂಡ್ದ್ ಅಕ್ಲೆ ಉಡಲ್ ಕಂತಿಲೆಕ್ಕ ಆಂಡ್. ಆಯ ಮಿತ್ತ್ ಗರ್ವೊಡು ಕೂಲಿ ಕಡೆಯೆರ್.

⁵⁵ಆಂಡ ಸ್ತೇಫನೆ ಪರಿಶುದ್ಧಾತ್ಮೊಡು ದಿಂಜಿದ್ ಆಯೆ ಪರಲೋಕೊಗು ಕಣ್ಣ್ ದೆರ್ತ್ತ್‌ದ್ ತೂನಗ ದೇವೆರೆ ಮೈಮೆನ್ಲಾ ದೇವೆರೆ ಬಲತ್ತ ಮರ್ಗಿಲ್‌ಡ್ ಉಂತುದಿನ ಯೇಸುನ್ಲಾ ತೂಯೆ.

⁵⁶ತೂಲೆ, ಪರಲೋಕ ಜತ್ತ್‌ದುಪ್ಪುನೆನ್‌ಲಾ ನರಮಾನಿ ಮಗೆ ದೇವೆರೆ ಬಲತ್ತ ಮರ್ಗಿಲ್‌ಡ್ ಉಂತುದಿನೆನ್ಲಾ ತೂಪೆ ಅಂದ್‌ದ್ ಪಂಡೆ.

⁵⁷ಆಂಡ ಅಕುಲು ಗಟ್ಟಿ ಸ್ವರೊಟ್ಟು ಬೊಬ್ಬೆ ಪಾಡ್ದ್ ಕೆಬಿ ಮುಚ್ಚೊಂದು ಒಟ್ಟಾದ್ ಆಯನ ಮಿತ್ತ್ ಬೂರಿಯೆರ್.

⁵⁸ಬೊಕ್ಕ ಆಯನ್ ಊರುದ ಪಿದಯಿ ನೂಕೊಂದು ಪೋದು ಕೆರಿಯೆರೆ ಕಲ್ಲ್ ದಕ್ಕಿಯೆರ್. ಸಾಕ್ಷಿದಾಕುಲು ತನ್ಕುಲೆನ ಕುಂಟುಲೆನ್ ದೆತ್ತ್‌ದ್ ಸೌಲು ಪನ್ಪಿ ಒರಿ ಜವನ್ಯನ ಕಾರ್‌ದ ಕೈತಲ್‌ ದೀಯೆರ್.

⁵⁹ಅಕುಲು ಸ್ತೇಫನನ ಮಿತ್ತ್ ಕಲ್ಲ್ ದಕ್ಕೊಂದು ಉಪ್ಪುನಗ ಆಯೆ ಕರ್ತವನ್ ಲೆತ್ತ್‌ದ್, “ಯೇಸು ಕರ್ತವ, ಎನ ಆತ್ಮೊನು ಸೇರಾವೊನ್ಲ,” ಅಂದ್‌ದ್ ಪ್ರಾರ್ಥನೆ ಮಲ್ತೆ.

⁶⁰ಆಯೆ ಮುಂಡುಬೂರ್ದು, “ಕರ್ತವಾ, ಈ ಪಾಪೊನು ಅಕ್ಲೆನ ಮಿತ್ತ್ ಪಾಡಡ,” ಅಂದ್‌ದ್ ಗಟ್ಟಿ ಸ್ವರೊಟ್ಟು ಬುಲ್ತೆ. ಉಂದೆನ್ ಪಂಡ್ದ್ ಪ್ರಾಣ ಬುಡಿಯೆ.