Read Tulu ರೋಮಾಯೆರೆಗ್ 1 Bible Online

ರೋಮಾಯೆರೆಗ್ 1 - Tulu bible

ರೋಮಾಯೆರೆಗ್ 1

¹ಯಾನ್ ಪೌಲು, ಯೇಸು ಕ್ರಿಸ್ತೆ ದಾಸೆಲಾ ಅಪೊಸ್ತಲೆ ಆವೆರೆ ಲೆಪ್ಪು ಇತ್ತಿನಾಯೆಲಾ ದೇವೆರೆ ಸುವಾರ್ತೆನ್ ಸಾರಿಯೆರೆ ನೇಮಕ ಆತಿನಾಯೆಲಾ ಆದುಲ್ಲೆ.

²ಆ ಸುವಾರ್ತೆನ್ ಸಾರಿದ್ ತೆರಿಪಾವೆ ಪಂಡ್ದ್ ದೇವೆರ್ ಮಸ್ತ್ ಅನಾದಿಕಾಲೊಡ್ದೇ ಪರಿಶುದ್ಧ ಶಾಸ್ತ್ರೊಡು ತನ ಪ್ರವಾದಿಲೆಡ್ದ್ ಪಾತೆರ ಕೊರ್ತೆ.

³ಈ ಸುವಾರ್ತೆ ದೇವೆರೆ ಮಗೆ ಆಯಿ ಯೇಸು ಕ್ರಿಸ್ತನ ವಿಷಯೊಡು ಆದುಂಡು. ಅವು ದಾನೆಂದ್ಂಡ ಆಯೆ ನರಮಾನಿ ಆದ್ ದಾವೀದನ ಸಂತಾನೊಡು ಪುಟ್ಟುದು; ಪರಿಶುದ್ಧ ಆತ್ಮೊಗು ಸರಿಯಾದ್ ಸೈತಿ ಬೊಕ್ಕ ಜೀವೊಡು ಲಕ್ಕಾಯಿನ ಮಲ್ಲ ಶಕ್ತಿಡ್ದಾದ್ ದೇವೆರೆ ಮಗೆ ಪಂಡ್ದ್ ತೆರಿದ್ ಬತ್ತಿನಾಯೆ ಆದುಲ್ಲೆ.

⁵ಆಯ ಪುದರ್‌ಗ್ ಬೋಡಾದ್ ಮಾತ ಪಿದಯಿದ ಜನೊಕುಲು ನಂಬುದು ಒಳಗಾಪಿಲೆಕ್ಕ ಎಂಕುಲು ಆಯಡ್ದ್ ದಯೊನ್ಲಾ ಅಪೊಸ್ತಲೆರೆನ ಉದ್ಯೋಗುನ್ಲಾ ಪಡೆಯ.

⁶ಉಂದೆಟ್ಟ್ ಯೇಸು ಕ್ರಿಸ್ತನಾಕುಲಾವೆರೆ ಲೆಪ್ಪು ಇತ್ತಿ ನಿಕುಲುಲಾ ಸೇರ್ದುಲ್ಲರ್.

⁷ಅಂಚೆನೆ ರೋಮಾಪುರೊಟ್ಟುಪ್ಪು ದೇವೆರೆ ಪ್ರೀತಿದಾಕುಲೆಗ್ಲಾ ಲೆಪ್ಪು ಆತಿ ದೇವಜನೊಕುಲೆಗ್ಲಾ ಮಾತೆರೆಗ್ ಬರೆಪಿನಿ ದಾನೆಂದ್ಂಡ, ನಮ ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್‌ಲಾ ನಿಕ್ಲೆಗ್ ದಯಲಾ ಸಮಾಧಾನಲಾ ಆವಡ್.

⁸ದುಂಬಾದ್ ಪನ್ಪಿನಿ ದಾನೆಂದ್ಂಡ, ನಿಕ್ಲೆನ ನಂಬಿಕೆ ಲೋಕೊಡು ಮಾತ ಕಡೆಟ್ಟ್ ತೆರಿದ್ ಬೈದಿನೆಡ್ದ್ ಯಾನ್ ನಿಕ್ಲೆಗಾದ್ ಯೇಸು ಕ್ರಿಸ್ತಡ್ ಎನ ದೇವೆರೆಗ್ ಉಪಕಾರ ಸಂದಾವೆ.

⁹ಆಯನ ಮಗನ ಸುವಾರ್ತೆನ್ ಸಾರಿಯೊಂದು, ಯಾನ್ ದಿಂಜಿದಿ ಆತ್ಮೊಡು ಆಯ ಸೇವೆನ್ ಮಲ್ತೊಂದುಲ್ಲೆ. ಪ್ರಾರ್ಥನೆ ಮಲ್ಪುನಗ ಮಾತ ಸಮಯೊಡು ಮದಪಂದೆ ನಿಕ್ಲೆಗಾದ್ ನಟ್ಟೊಂದುಲ್ಲೆ ಉಂದೆಕ್ಕ್ ದೇವೆರೆ ಎನ ಸಾಕ್ಷಿ.

¹⁰ನಿಕ್ಲೆ ಕೈತಲ್‌ ಬರಿಯೆರೆ ದೇವೆರೆ ದಯೊಟು ಎಂಕ್ ಎಂಚಾಂಡಲಾ ಮಾರ್ಗ ಆವೊಡು ಅಂದ್‌ದ್ ನಟ್ಟೊನ್ವೆ.

¹¹ಬೊಕ್ಕ ಎನಡ್ದ್ ನಿಕ್ಲೆಗ್ ಆತ್ಮೀಕ ವರ ಕೊರ್ದು ನಿಕ್ಲೆನ್ ದೃಢ ಮಲ್ಪೊಡು ಪಂಡ್ದ್ ಎಂಕ್ ದಿಂಜ ಆಸೆ ಉಂಡು.

¹²ದಾಯೆಗಂದ್ಂಡ ಎನ ನಂಬಿಕೆಡ್ದಾದ್ ನಿಕುಲುಲಾ, ನಿಕ್ಲೆ ನಂಬಿಕೆಡ್ದಾದ್ ಯಾನ್ಲಾ ಒರಿ ಒರಿಯಗ್ ಸಹಾಯ ಪಡೆಯೊಲಿ ಅಂದ್‌ದ್ ಯಾನ್ ಬಯಕುವೆ.

¹³ಸಹೋದ್ರೆರೇ, ಎನ ಬೇಲೆ ಬೇತೆ ಜನಾಂಗೊಲೆಡ್ ಆತ್ಮೀಕ ಆಶೀರ್ವಾದೊಲೆನ್ ಪಡೆಯಿಲೆಕ್ಕ, ನಿಕ್ಲೆಡ್ಲಾ ಆತ್ಮೀಕ ಆಶೀರ್ವಾದೊನು ತಿಕ್ಕುಲೆಕ್ಕ ನಿಕ್ಲೆ ಕೈತಲ್‌ ಬರೊಡು ಪಂಡ್ದ್ ಎನ್ನೊಂಡಲಾ ಇನಿ ಮುಟ್ಟಲಾ ಅಡ್ಡಿ ಬತ್ತ್ಂಡ್ ಪನ್ಪಿನ ವಿಚಾರ ನಿಕ್ಲೆಗ್ ತೆರಿದುಪ್ಪೊಡು ಪಂಡ್ದ್ ಬಯಕುವೆ.

¹⁴ದಾಯೆಗ್ ಪಂಡ ಗ್ರೀಕೆರೆಗ್ಲಾ, ಬೇತೆ ಜನಾಂಗದಾಕುಲೆಗ್ಲಾ, ಬುದ್ಧಿವಂತೆರೆಗ್ಲಾ, ಬುದ್ಧಿದಾಂತಿನಾಕುಲೆಗ್ಲಾ ಋಣ ಸಂದಾಯ ಮಲ್ಪುನ ಹಂಗ್‌ದಾಯೆ ಆದುಲ್ಲೆ.

¹⁵ಐಡ್ದಾವರ ರೋಮಾಪುರೊಟ್ಟುಪ್ಪು ನಿಕ್ಲೆಗ್ಲಾ ಸುವಾರ್ತೆನ್ ಸಾರಿಯೆರೆ ಉಮೇದ್‌ಡುಲ್ಲೆ.

¹⁶ಸುವಾರ್ತೆದ ವಿಚಾರೊಡು ಯಾನ್ ನಾಚಿಗೆ ಮಲ್ಪುನಾಯೆ ಅತ್ತ್. ಅವು ನಂಬುನಾಕುಲೆಗ್ ಮಾತೆರೆಗ್ಲಾ ರಕ್ಷಣೆಗಾದ್ ದೇವೆರೆನ ಬಲ ಆದುಂಡು. ದುಂಬತ್ತ ಯೆಹೂದ್ಯೆರೆಗ್ಲಾ ಐಡ್ದ್ ಬೊಕ್ಕ ಪಿದಯಿದ ಜನೊಕುಲೆಗ್ಲಾ.

¹⁷ಎಂಚಂದ್ಂಡ ದೇವೆರೆಡ್ದ್ ತಿಕ್ಕುನ ನೀತಿ ಸುವಾರ್ತೆಡ್ದ್ ತೋಜಿದ್ ಬರ್ಪುಂಡು. ಅವು ಸುರುಡ್ದು ಕಡೆ ಮುಟ್ಟಲಾ ನಂಬಿಕೆಡ್ದೇ ಆಪುಂಡು. “ನೀತಿವಂತೆ ನಂಬಿಕೆಡ್ದೇ ಬದುಕುವೆ,” ಪನ್ಪಿನ ಶಾಸ್ತ್ರದ ಪಾತೆರಲಾ ಉಂಡತ್ತಾ?

¹⁸ಕಾರಣ ದಾನೆಂದ್ಂಡ ಸತ್ಯೊನು ತೆರಿಯಂದಿಲೆಕ್ಕ ತಡೆಪಿನ ನರಮಾನಿಲೆನ ಮಾತ ತರತ ಪಾಪದ ಮಿತ್ತ್‌ಲಾ ಅನ್ಯಾಯದ ಮಿತ್ತ್‌ಲಾ ದೇವೆರೆ ಕೋಪ ಪರಲೋಕೊಡ್ದು ತೋಜಿದ್ ಬರ್ಪುಂಡು.

¹⁹ದಾಯೆಗಂದ್ಂಡ, ದೇವೆರೆ ವಿಚಾರೊಡು ತೆರಿಯೊಡಾಯಿನ ಸಂಗತಿಲೆನ್ ದೇವೆರೆ ಸೃಷ್ಟಿಡ್ ಅಕ್ಲೆಗ್ ತೋಜಾದ್ ಕೊರ್ತಿನೆಡ್ದ್ ಅಕ್ಲೆಗ್ ಅವು ಮಾತಲಾ ಸ್ಪಷ್ಟ ಆತ್ಂಡ್. ಅವೆನ್ ಅಕ್ಲೆಗ್ ದೇವೆರೇ ಸ್ದಷ್ಟಾದ್‌ ತೆರಿಪಾಯೆರ್‌.

²⁰ದೇವೆರ್ ಈ ಲೋಕೊನು ಉಂಡು ಮಲ್ದಿನೆಡ್ದಿಂಚಿ ಬಾನೊನ್ಲಾ ಭೂಮಿನ್ಲಾ ತೂತೆರ್. ಆಯನ ತೋಜಂದಿ ಗುಣೊಕುಲು ಅಂದ್ಂಡ ಆಯನ ನಿತ್ಯ ಶಕ್ತಿಲಾ ದೈವತ್ವಲಾ ಮಾತೆರೆಗ್ಲಾ ಸ್ಪಷ್ಟ ಆದುಂಡು; ದೇವೆರ್ ಉಂಡು ಮಲ್ತಿನ ಸಂಗತಿಲೆಡ್ ಅವು ತೆರಿದ್ ಬರ್ಪುಂಡು. ಅಂಚಾಯಿನೆಡ್ದ್ ಆ ಜನೊಕುಲೆಗ್ ವಾ ನೆವನಲಾ ಇಜ್ಜಿ.

²¹ದಾಯೆಗಂದ್ಂಡ ಅಕುಲು ದೇವೆರೆನ್ ತೆರಿದೆರ್ಡಲಾ; ಆಯಗ್ ಸಂದಾವೊಡಾಯಿನ ಮಾನೊನು ಅಕುಲು ಕೊರ್ಪುಜೆರ್; ಆಯ ಉಪಕಾರೊಲೆನ್ ನೆನೆತ್‌ದ್ ಸ್ತುತಿ ಮಲ್ಪುಜೆರ್. ಪಗತೆಗ್ ಅಕ್ಲೆ ಯೋಚನೆಲು ದಡ್ಡ್ ಆದಿತ್ತ್ಂಡ್ ಬೊಕ್ಕ ಅಕ್ಲೆನ ಬುದ್ಧಿದಾಂತಿನ ಉಡಲ್ ಕತ್ತಲೆಡ್ ದಿಂಜಿದುಂಡು.

²²ತನ್ಕುಲು ಬುದ್ಧಿವಂತೆರ್ ಅಂದ್‌ದ್ ಪನೊಂದು ಮೂರ್ಖೆರಾಯೆರ್.

²³ಬೊಕ್ಕ ನಾಶಾವಂದಿ ದೇವೆರೆ ಮೈಮೆನ್ ಬುಡ್ದು ಐತ ಪಗತೆಗ್ ನಾಶಾಪಿನ ನರಮಾನಿಲೆನ, ಪಕ್ಕಿಲೆನ, ಪ್ರಾಣಿಲೆನ ಅತ್ತ್‌ಡ ಸರ್ಪೊಲೆನ ಸಮ ಬೂರು ಮೂರ್ತಿಲೆನ್ ಮಲ್ಪುವೆರ್.

²⁴ಅಂಚಾದ್ ದೇವೆರ್ ಅಕ್ಲೆನ್ ಅಕ್ಲೆ ಉಡಲ್‌ದ ಆಸೆ ಮಲ್ಪು ದುರಾಶೆಲೆಡ್ ನಡತ್‌ದ್ ತನ್ಕ್‌ಲೆ ಶರೀರೊನು ಪಡ್ಕೆಂತಿನ ಕಾರ್ಯೊಗು ಒಪ್ಪಿಸಾದ್ ಕೊರ್ತೆ.

²⁵ಅಕುಲು ಸತ್ಯ ದೇವೆರೆನ್ ಬುಡ್ದು ಸುಳ್ಳುನು ಪತ್ತೊಂದು ಸೃಷ್ಟಿನ್ ಉಂಡು ಮಲ್ತಿನಾಯ ಪಗತೆಗ್ ಆಯಡ್ದ್ ಉಂಡಾಯಿನ ವಸ್ತುಲೆನ್ ಆರಾಧನೆ ಮಲ್ತ್‌ದ್ ಐಕ್ಲೆನ ಸೇವೆ ಮಲ್ಪುವೆರ್. ಸೃಷ್ಟಿಕರ್ತವೆ ಒರಿಯೇ, ಏಪೊಗ್ಲಾ ಪುಗರೊನಿಯೆರೆ ತಕ್ಕದಾಯೆ. ಆಮೆನ್.

²⁶ಅಕುಲು ಇಂಚ ಮಲ್ಪುನೆಡ್ದ್ ದೇವೆರ್ ಅಕ್ಲೆನ್ ನಾಚಿಗೆ ಪುಟ್ಟಾವು ದುರಾಶೆಲೆಗ್ ಒಚ್ಚಿದ್ ಕೊರಿಯೆ. ಅಕ್ಲೆ ಪೊಂಜೊವುಲು ತನ್ಕುಲೆ ಶರೀರದ ಸಂಬಂಧೊನು ಶರೀರೊಗು ವಿರೋಧ ಆದುಪ್ಪುನೆಕ್ಕ್ ಪಗತೆರ್.

²⁷ಅಂಚೆನೇ ಅಂಜೊವುಲು ಪೊಂಜೊವುನ ಒಟ್ಟುದ ಶರೀರ ಸಮ್ಮಂಧೊಲೆನ್ ಬುಡ್ದು ಒರಿ ಒರಿಯಗ್ ಶರೀರದ ದುರಾಶೆಗ್ ಒಳಗಾಯೆರ್. ಅಂಜೊವುಲು ಅಂಜೊವುಲೆ ಒಟ್ಟುಡು ಸಮ್ಮಂಧ ಮಲ್ತೊಂದು ತನ್ಕುಲೆ ಅಕ್ರಮೊಲೆಗಾದ್ ಬರೊಡಾಯಿನ ಶಿಕ್ಷೆಗ್ ತಕ್ಕದಾಕುಲಾಯೆರ್.

²⁸ಉಂದತ್ತಂದೆ ದೇವೆರೆ ಗೇನ ಅಕ್ಲೆಗ್ ಇಷ್ಟದಾಂತಿನೆಡ್ದ್ ದೇವೆರ್ ಅಕ್ಲೆನ್ ಅತ್ತಂದಿನ ನೀಚ ಬುದ್ಧಿಗ್ ಒಪ್ಪಿಸಾದ್ ಕೊರಿಯೆ. ಅಂಚಾದ್ ಅಕುಲು ಬೊಡ್ಚಾಂದಿನ ಕಾರ್ಯೊಲೆನ್ ಮಲ್ತೆರ್.

²⁹ಎಂಚಂದ್ಂಡ ಅಕುಲು ಮಾತ ತರತ ಅನ್ಯಾಯ, ದುರ್ಮಾರ್ಗ, ಲೋಬಿತನೊಡ್ದುಲಾ ದುಷ್ಟತನೊಡ್ದುಲಾ, ಕಿಚ್ಚಿ, ಕೊಲೆ, ಲಡಯಿ, ಮೋಸ, ಪಗೆ ಇಂಚಿತ್ತಿನೆಡ್ದ್ ದಿಂಜಿದಿನಕುಲಾಯೆರ್.

³⁰ಬೊಕ್ಕ ಅಕುಲು ಕೆಬಿ ಉರ್ಪುನಾಕುಲುಲಾ ಚಾಡಿ ಪನ್ಪಿನಾಕುಲುಲಾ ದೇವೆರೆ ಪಗೆನಾಕುಲುಲಾ ಸೊರ್ಕುದಾಕುಲುಲಾ ಅಹಂಕಾರಿಲುಲಾ ಬಡಾಯಿ ಕೊಚ್ಚುನಾಕುಲುಲಾ ಆದಿತ್ತ್‌ದ್ ಹಾಳ್ ಮಲ್ಪುನೆಕ್ಕಾದೇ ಬಯಕುವೆರ್. ಅಪ್ಪೆಅಮ್ಮನ ಪಾತೆರೊನು ಕೇನಂದಿನಾಕುಲುಲಾ

³¹ಬುದ್ಧಿದಾಂತಿನಾಕುಲುಲಾ ಪಾತೆರೊಗು ತಪ್ಪುನಾಕುಲುಲಾ, ಪ್ರೀತಿದಾಂತಿನಾಕುಲುಲಾ ಕನಿಕರದಾಂತಿನಾಕುಲುಲಾ ಆಯೆರ್.

³²ಈ ರೀತಿ ಬದುಕುನಾಕುಲೆಗ್ ಮರಣನೇ ಗತಿ; ದೇವೆರೆ ನಿಯಮೊನು ಅಕುಲು ತೆರಿದಿತ್ತ್ಂಡಲಾ ಅಕುಲು ಅವ್ವೆ ತಪ್ಪುನು ಮಲ್ಪುನತ್ತಂದೆ ತಪ್ಪು ಮಲ್ಪುನಾಕುಲೆನ್ಲಾ ಮೆಚ್ಚಾವೆರ್.