Read Tulu ರೋಮಾಯೆರೆಗ್ 10 Bible Online

ರೋಮಾಯೆರೆಗ್ 10 - Tulu bible

ರೋಮಾಯೆರೆಗ್ 10

¹ಎನ ಸಹೋದ್ರಾ, ಎನ ಸ್ವಂತ ಜನೊಕುಲು ರಕ್ಷಣೆ ಪಡೆಯೊಡು ಅಂದ್‌ದ್ ಎನ ಉಡಲ್‌ದ ಆಸೆ ಆದುಂಡು. ಅಕ್ಲೆಗಾದ್ ಯಾನ್ ದೇವೆರೆಡ ಪ್ರಾರ್ಥನೆಡ್ ನಟ್ಟೊನ್ವೆ!

²ದಾಯೆಗಂದ್ಂಡ, ಅಕ್ಲೆಡ ದೇವೆರೆನ ಆಸಕ್ತಿ ಉಂಡು ಅಂದ್‌ದ್ ಯಾನ್ ಅಕ್ಲೆ ಬಗೆಟ್ ಸಾಕ್ಷಿ ಕೊರ್ಪೆ. ಆಂಡಲಾ ಅಕ್ಲೆ ಆಸಕ್ತಿ ಗೇನೊಗು ಸರಿಯಾದ್ ಇಜ್ಜಿ.

³ಅಕುಲು ದೇವೆರೆ ನೀತಿನ್ ತೆರಿಯಂದೆ ಸ್ವಂತ ನೀತಿನ್ ಸ್ಥಾಪನೆ ಮಲ್ಪೆರೆ ತೂದು ದೇವೆರೆ ನೀತಿಗ್ ಅಧೀನೆರ್ ಆಯಿಜೆರ್.

⁴ನಂಬುನಾಕುಲೆಗ್ ಮಾತೆರೆಗ್ಲಾ ನೀತಿ ತಿಕ್ಕುಲೆಕ್ಕ ಕ್ರಿಸ್ತೆ ನ್ಯಾಯಕಟ್ಟ್‌ನ್ ಅಂತ್ಯ ಮಲ್ತೆ.

⁵ಮೋಶೆಲಾ ನ್ಯಾಯಕಟ್ಟ್‌ಡ್ದ್ ಆಪಿ ನೀತಿದ ಬಗೆಟ್, “ಅವೆನ್ ಕೈಕೊನುನಾಯೆನೇ ಐಡ್ದ್ ಬದುಕುವೆ,” ಅಂದ್‌ದ್ ಬರೆಪೆ.

⁶ಆಂಡ ನಂಬಿಕೆಡ್ದ್ ಆಪಿ ನೀತಿ ಇಂಚೆನೆ ಪನ್ಪುಂಡು, “ಕ್ರಿಸ್ತನ್ ತಿರ್ತ್ ಲೆತ್ತೊಂದು ಬರಿಯೆರೆ, ಏರ್ ಪರಲೋಕೊಗು ಏರ್ದ್ ಪೋವೆರ್?” ಅಂದ್‌ದ್ ನಿನ ಉಡಲ್‌ಡ್ ಪನಡ,

⁷“ಕ್ರಿಸ್ತನ್ ಸೈತಿನಾಕುಲೆಡ್ದ್ ಲಕ್ಕಾವೊಂದು ಬರಿಯೆರೆ ಏರ್ ಪಾತಾಳೊಗು ಜತ್ತ್‌ದ್ ಪೋವೆರ್?” ಪಂಡ್ದಾವಡ್ ನಿನ ಉಡಲ್‌ಡ್ ಪನಡ.

⁸ಆಂಡ ಅವು ಎಂಚಿನ ಪನ್ಪುಂಡು, “ದೇವೆರೆ ಪಾತೆರ ನಿನ ಕೈತಲೇ ಉಂಡು. ಅವು ನಿನ ಬಾಯಿಡ್ಲಾ ನಿನ ಉಡಲ್‌ಡ್ಲಾ ಉಂಡು. ಆ ಪಾತೆರ ಎಂಕುಲು ಸಾರುನ ನಂಬಿಕೆದ ಪಾತೆರನೇ.”

⁹ಅವು ದಾನೆ ಪಂಡ ಈ ಯೇಸುನು ಕರ್ತವೆ ಅಂದ್‌ದ್ ಬಾಯಿಡ್‌ ಅರಿಕೆ ಮಲ್ತ್‌ದ್ ದೇವೆರ್ ಆಯನ್ ಸೈತಿನಾಕುಲೆಡ್ದ್ ಲಕ್ಕಾಯೆ ಅಂದ್‌ದ್ ನಿನ ಉಡಲ್‌ಡ್ದ್ ನಂಬಿಯಡ ನಿಕ್ಕ್ ರಕ್ಷಣೆ ಆಪುಂಡು.

¹⁰ಅಂದ್, ಈ ಉಡಲ್‌ಡ್ದ್ ನಂಬುಂಡ ನೀತಿವಂತೆ ಆಪ. ಬಾಯಿಡ್ದ್ ಅರಿಕೆ ಮಲ್ತ್ಂಡ ನಿಕ್ಕ್ ರಕ್ಷಣೆ ಆಪುಂಡು.

¹¹“ಆಯ ಮಿತ್ತ್ ನಂಬಿಕೆ ದೀಪಿನಾಯೆ ಏರ್ಲಾ ನಾಚಿಗೆಡ್ ಬೂರಯೆ,” ಅಂದ್‌ದ್ ಶಾಸ್ತ್ರೊಡು ಪನ್ಪುಂಡು.

¹²ಉಂದು ಮಾತೆರೆಗ್ಲಾ ಸೇರುನ ಪಾತೆರ ದಾಯೆಗಂದ್ಂಡ ಯೆಹೂದ್ಯೆರೆಗ್ಲಾ ಗ್ರೀಕೆರೆಗ್ಲಾ ವಾ ಭೇದಲಾ ಇಜ್ಜಿ. ದೇವೆರ್ ಮಾತೆರೆಗ್ಲಾ ಕರ್ತವೆ ಆದುಲ್ಲೆ, ಬೊಕ್ಕ ಆಯಡ ನಟ್ಟೊನುನ ಪ್ರತಿ ಒರಿಯನ್ಲಾ ವಿಶೇಷ ಆದ್ ಆಶೀರ್ವದಿಪುವೆ.

¹³ಶಾಸ್ತ್ರೊಡು ಪಂಡಿಲೆಕ್ಕ, “ಕರ್ತವ ಪುದರ್‌ನ್ ಲೆತ್ತ್‌ದ್ ಏರ್ ಅರಿಕೆ ಮಲ್ಪುವೆರಾ, ಅಕ್ಲೆಗ್ ಮಾತೆರೆಗ್ ರಕ್ಷಣೆ ಆವು.”

¹⁴ಆಂಡ ಅಕುಲು ನಂಬಂದೆ ಇತ್ತೆರ್ಡ ಆಯಗ್ ನಟ್ಟೊನೊನು ಎಂಚ? ಬೊಕ್ಕ ಅಕುಲು ಸುವಾರ್ತೆ ಕೇಂಡಿಜೆರ್ಡ ನಂಬುನು ಎಂಚ? ಸಾರಿದ್ ಪನ್ಪಿನಾಯೆ ಇಜ್ಜಾಂಡ ಕೇನುನು ಎಂಚ?

¹⁵ಬೊಕ್ಕ ಸಾರಿಯುನಾಕುಲೆನ್ ಕಡಪುಡಂದೆ ಎಂಚ ಸಾರಿಯೊಲಿ? ಶಾಸ್ತ್ರೊಡು ಬರೆತ್ಂಡ್, “ಸುವಾರ್ತೆನ್ ಸಾರಿಯೊಂದು ಬರ್ಪಿನಾಕುಲೆನ ಪಾದ ಏತ್ ಪೊರ್ಲು.”

¹⁶ಆಂಡಲಾ ಮಾತೆರ್ಲಾ ಸುವಾರ್ತೆಗ್ ಕೆಬಿ ಕೊರ್ತುಜೆರ್. ಯೆಶಾಯೆ ಪನ್ಪೆ “ಕರ್ತವ ಎಂಕುಲು ಸಾರಿನ ಸುವಾರ್ತೆನ್ ಏರ್ ನಂಬಿಯೆರ್?”

¹⁷ಆಂಡ ಕ್ರಿಸ್ತನ ಪಾತೆರೊನು ಸಾರಿಯುನೆಡ್ದ್ ಸುವಾರ್ತೆನ್ ಕೇನ್ವರ್. ಅವೆನ್ ಕೇಂಡಿನೆಡ್ದ್ ನಂಬಿಕೆ ಪುಟ್ಟುಂಡು.

¹⁸ಆಂಡ ಯಾನ್ ಕೇನ್ವೆ: ಅಕುಲು ಸುವಾರ್ತೆನ್ ಕೇನುಜೆರ್ ಪನ್ಪಿನವು ಸತ್ಯನಾ? ಅಕುಲು ಕಂಡಿತಾದ್‌ಲಾ ಕೇಂಡ್ದೆರ್ ದಾಯೆಗಂದ್ಂಡ ಶಾಸ್ತ್ರೊಡು ಬರೆತ್ಂಡ್ “ಸಾರಿಯುನಾಕುಲೆ ಸ್ವರ ಇಡೀ ಲೋಕೊಗು ಪಸರ್ಂಡ್; ಅಕ್ಲೆ ಪಾತೆರ ಭೂಮಿದ ಕಡೆ ಮುಟ್ಟ ಮುಟ್ಟುಂಡು.”

¹⁹ಕುಡಲಾ ಯಾನ್ ಕೇನ್ವೆ: ಇಸ್ರಾಯೇಲ್ಯೆರೆಗ್ ಅರ್ಥ ಆತಿಜ? ಉಂದೆಕ್ಕ್ ಮೋಶೆ ಸುರುತ್ತಾಯೆ ಆದ್ ಉತ್ತರ ಕೊರ್ಪೆ “ಜನಾಂಗ ಆದುಪ್ಪಂದಿನಾಕುಲೆಡ್ದ್ ಅಕ್ಲೆಡ್ ಮತ್ಸರ ಪುಟ್ಟಾವೆ. ಬುದ್ಧಿದಾಂತಿ ಮೂರ್ಖೆರೆಡ್ದ್ ಎನ ಜನೊಟು ಕೋಪ ಲಕ್ಕಾವೆ.”

²⁰ಯೆಶಾಯೆ ನನಲಾ ಧೈರ್ಯ ಆದ್ ಪನ್ಪೆ “ಎನನ್ ನಾಡಂದಿನಾಕುಲೆಗ್ಲಾ ಯಾನ್ ತಿಕ್ಕಿಯೆ; ಎನ ಬಗೆಟ್ ಕೇನಂದಿನಾಕುಲೆಗ್ಲಾ ಯಾನ್ ತೋಜಾವೊಂಡೆ.”

²¹ಆಂಡ ಇಸ್ರಾಯೇಲ್ಯೆರೆ ಬಗೆಟ್ ಆಯೆ ಪನ್ಪೆ, “ಎನ ಪಾತೆರೊಗು ಬಗ್ಗಂದಿ ಅಡ್ಡ ಪಾತೆರುನ ಈ ಜನಾಂಗೊನು ಯಾನ್ ದಿನ ಇಡೀ ಕೈ ನೀಡ್ದ್ ಲೆತ್ತೊಂದುಲ್ಲೆ,” ಪನ್ಪೆ.