Read Tulu ರೋಮಾಯೆರೆಗ್ 13 Bible Online

ರೋಮಾಯೆರೆಗ್ 13 - Tulu bible

ರೋಮಾಯೆರೆಗ್ 13

¹ತನ ಮಿತ್ತ್ ಉಪ್ಪುನ ದೇಶದ ಅಧಿಕಾರಿಲೆಗ್ ಪ್ರತಿ ಒರಿಲಾ ಅಧೀನ ಆವೊಡು. ದಾಯೆಗಂದ್ಂಡ ಮಾತ ಅಧಿಕಾರ ದೇವೆರೆಡ್ದೇ, ಬೊಕ್ಕ ಇತ್ತೆದ ಅಧಿಕಾರಿಲೆನ್ ದೇವೆರೇ ಅಕ್ಲೆನ ಸ್ಥಾನೊಡು ದೀತೆ.

²ಅಂಚಾಯಿನೆಡ್ದ್ ಅಧಿಕಾರಿಲೆಗ್ ಎದುರು ಉಂತುನಾಯೆ ದೇವೆರ್ ನೇಮಕ ಮಲ್ತ್‌ದಿನೆಕ್ಕ್ ಎದುರು ಉಂತಿಲೆಕ್ಕನೆ. ಬೊಕ್ಕ ಇಂಚ ಮಲ್ಪುನಾಯೆ ಆಯನ ಮಿತ್ತ್ ತೀರ್ಪುನು ಬರ್ಪಾವೊನುನಾಯೆ ಆದುಲ್ಲೆ.

³ಎಡ್ಡೆ ಮಲ್ಪುನಾಕುಲೆಗ್ ಅಧಿಕಾರಿಲೆ ಪೋಡಿಗೆ ಉಪ್ಪುಜಿ; ಹಾಳ್ ಮಲ್ಪುನಾಕುಲೆಗೇ ಮಾತ್ರ ಪೋಡಿಗೆ. ಅಧಿಕಾರೊಡುಪ್ಪುನಾಕುಲೆಗ್ ಪೋಡಿಯಂದಿಲೆಕ್ಕ ಈ ಉಪ್ಪೊಡಂದ್‌ದ್ ಬಯಕುವನಾ? ಅಂಚಾಂಡ ಎಡ್ಡೆಂತಿನೆನ್ ಮಲ್ಪುಲ, ಅಪಗ ಅಕುಲು ನಿನನ್ ಪುಗರುವೆರ್.

⁴ಅಕುಲು ನಿನ ಎಡ್ಡೆಗಾದ್ರ ಬೇಲೆ ಮಲ್ಪುನ ದೇವೆರೆ ಸೇವಕೆರಾದುಲ್ಲೆರ್. ಆಂಡ ಹಾಳ್ ಮಲ್ಪುನಾಯೆ ಆದಿತ್ತಡ ಅಕ್ಲೆಗ್ ಪೋಡಿಲ. ದಾಯೆಗಂದ್ಂಡ ಶಿಕ್ಷೆ ಕೊರ್ಪಿನ ಅಧಿಕಾರ ಅಕ್ಲೆಗ್ ಕಂಡಿತಾದ್‌ಲಾ ಉಂಡು. ಈ ಬೊಡ್ಚಾಂದಿನೆನ್ ಮಲ್ತಡ ಪೋಡಿಯೊಡು, ಆಯೆ ಪೊಕ್ಕಡೆ ಕೈತ ಕತ್ತಿನ್ ಪತ್ತ್‌ದಿಜೆ, ಆಯೆ ದೇವೆರೆ ಸೇವಕೆ ಆದಿತ್ತ್‌ದ್ ಬೊಡ್ಚಾಂದಿನೆನ್ ಮಲ್ಪುನಾಕುಲೆ ಮಿತ್ತ್ ದೇವೆರೆ ಶಿಕ್ಷೆನ್ ಜಾರಿ ಮಲ್ಪುವೆ.

⁵ಅಂಚಾಯಿನೆಡ್ದ್ ನಿಕುಲು ಅಧಿಕಾರಿಲೆಗ್ ತಗ್ಗ್‌ದಿನಾಕುಲಾದ್ ಉಪ್ಪುಲೆ ದೇವೆರೆ ಶಿಕ್ಷೆದ ಪೋಡಿಗೆಗಾದ್ ಮಾತ್ರ ಅತ್ತಂದೆ ನಿಕ್ಲೆ ಎಡ್ಡೆ ಮನಸಾಕ್ಷಿಗಾದ್‌ಲಾ ಅಂಚ ಮಲ್ಪುಲೆ.

⁶ಅಧಿಕಾರಿಲು ತನ್ಕುಲೆ ಕರ್ತವ್ಯೊಲೆನ್ ಮಲ್ಪುನಗ ದೇವೆರೆ ಸೇವಕೆ ಆದ್ ಬೇಲೆ ಮಲ್ಪುನೆಡ್ದ್, ನಿಕುಲು ಸಂದಾವೊಡಾಯಿನ ತೆರಿಗೆನ್ ಕ್ರಮ ಆದ್ ಕಟ್ಟೊಡು.

⁷ಅಂಚಾದ್ ಅಕ್ಲೆಗ್ ಸಂದಾವೊಡಾಯಿನೆನ್ ಸಂದಾಲೆ; ಏರೆಗ್ ತೆರಿಗೆನ ಅಕ್ಲೆಗ್ ತೆರಿಗೆ, ಏರೆಗ್ ಸುಂಕನ ಅಕ್ಲೆಗ್ ಸುಂಕೊನು; ಏರೆಗ್ ಪೋಡಿಯಾವೊಡು ಅಕ್ಲೆಗ್ ಪೋಡಿಗೆನ್, ಏರೆಗ್ ಮಾರ್ಯಾದಿಯಾ ಅಕ್ಲೆಗ್ ಮಾರ್ಯಾದಿನ್ ಸಂದಾಲೆ.

⁸ಒರಿಯನ್ ಒರಿ ಪ್ರೀತಿ ಮಲ್ಪೊಡು ಪನ್ಪಿನ ಒಂಜೇ ಋಣ ನಿಕ್ಲೆಗುಪ್ಪಡ್. ಉಂದೆನ್ ಕೈಕೊನುನಾಯೆ ನ್ಯಾಯಕಟ್ಟ್‌ಲೆನ್ ಕೈಕೊನುನಾಯೆ ಆದುಲ್ಲೆ.

⁹ಎಂಚಂದ್ಂಡ, “ವ್ಯಭಿಚಾರ ಮಲ್ಪೆರೆ ಬಲ್ಲಿ; ಮಾನ್ಯ ಕೆರಿಯೆರೆ ಬಲ್ಲಿ; ಕಂಡೊನಿಯೆರೆ ಬಲ್ಲಿ; ನನೊರಿಯನ ಸೊತ್ತುನು ಆಸೆ ಮಲ್ಪೆರೆ ಬಲ್ಲಿ,” ಪನ್ಪಿನ ಈ ಮಾತ ಅಪ್ಪಣೆಲು, “ನಿನ ನಿರೆತಾಯನ್ ನಿನಲೆಕ್ಕನೇ ಪ್ರೀತಿ ಮಲ್ಪುಲ” ಪನ್ಪಿ ಒಂಜೇ ಅಪ್ಪಣೆಡ್ ಸೇರ್ದುಂಡು.

¹⁰ನಿಕುಲು ಬೇತೆಕ್ಲೆನ್ ಪ್ರೀತಿ ಮಲ್ಪುನಾಂಡ ಅಕ್ಲೆಗ್ ಅಪಕಾರ ಮಲ್ಪಯರ್. ಅಂಚಾಂಡ ಪ್ರೀತಿ ಮಲ್ಪುನು ಅಂದ್ಂಡ ಇಡೀ ನ್ಯಾಯಕಟ್ಟ್‌ನೇ ಕೈಕೊನುನವು ಆದುಂಡು.

¹¹ಬೊಕ್ಕ ನಮ ನಿದ್ರೆಡ್ದ್ ಎಚ್ಚರಿಕೆ ಆವೊಡಾಯಿನ ಸಮಯ ಕೈತಲ್‌ ಬತ್ತ್ಂಡ್ ಅಂದ್‌ದ್ ತೆರಿನೆಡ್ದ್ ಉಂದೆನ್ ಮಾತ ಮಲ್ಪುಲೆ. ದಾಯೆಗಂದ್ಂಡ ನಂಕ್ ರಕ್ಷಣೆ ತಿಕ್ಕುನ ಸಮಯ ನಮ ಸುರುಟ್ಟು ನಂಬಿನ ಪೊರ್ತುಡ್ದುಲಾ ಇತ್ತೆ ಮಸ್ತ್ ಕೈತಲಾತ್ತ್ಂಡ್.

¹²ರಾತ್ರೆ ಹೆಚ್ಚ್ ಮಟ್ಟ್‌ಗ್ ಕರಿಂಡ್, ಪಗೆಲ್ ಕೈತಲಾತ್ತ್ಂಡ್. ಕತ್ತಲೆಗ್ ಸೇರ್ದಿನ ಕ್ರಿಯೊಲೆನ್ ಉಂತಾದ್ ಬೊಲ್ಪುಡು ಲಡಯಿ ಮಲ್ಪುನೆಕ್ಕಾದ್ರ ತಯಾರ್ ಆದ್ ಆಯುಧೊಲೆನ್ ಪತ್ತೊನುಗ.

¹³ಪಗೆಲ್‌ದ ಬೊಲ್ಪುಡು ಉಪ್ಪುನಾಕುಲೆ ಲೆಕ್ಕ ನಮ ಸರಿಯಾದ್ ನಡಪುಗ. ನಾಚಿಗೆದ ಕೆಲಸೊಲೆಡಾವಡ್, ಬೊಡ್ಚಾಂದಿ ತಮ್ಮಣ, ಪರ್ಪಾಟ, ಅನೀತಿದ ಕಾರ್ಯೊಡಾವಡ್, ಲಡಯಿ, ಕಿಚ್ಚಿಮಚ್ಚರೊಲೆಡಾವಡ್ ಪೊರ್ತು ಕಳೆವಂದೆ ಪಗೆಲ್‌ದಾಕುಲೆ ತಕ್ಕ ಮಾನಸ್ಥೆರಾದ್ ನಡಪುಗ.

¹⁴ಶರೀರದ ಆಸೆ ಪೂರ ಮಲ್ಪುನೆಕ್ಕಾದ್ ಚಿಂತೆ ಮಲ್ಪಂದೆ, ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ್ ಹೊಂದೊನ್ಲೆ.