Read Tulu ರೋಮಾಯೆರೆಗ್ 16 Bible Online

ರೋಮಾಯೆರೆಗ್ 16 - Tulu bible

ರೋಮಾಯೆರೆಗ್ 16

¹ಯಾನ್ ಕೆಂಕ್ರೇಯ ಸಭೆತ ಸೇವಕಿ ಆದುಪ್ಪು ಸಹೋದ್ರಿ ಫೊಯಿಬೆನ್ ನಿಕ್ಲೆನ ಕೈತಲ್‌ಗ್ ಕಡಪುಡ್ವೆ.

²ದೇವಜನೊಕುಲೆಗ್ ತಕ್ಕ ಇತ್ತಿಲೆಕ್ಕನೆ ಆಲೆನ್ ಕರ್ತವಡ್ ಸೇರಾಲೆ. ಆಲೆಗ್ ದಾಲಾಂಡಲಾ ನಿಕ್ಲೆಡ್ದ್ ಸಹಾಯ ಬೋಡಾಂಡ ಮಲ್ಪುಲೆ. ಆಲ್ ಎಂಕ್‌ಲಾ ಮಸ್ತ್ ಜನೊಕುಲೆಗ್ಲಾ ಸಹಾಯ ಮಲ್ತ್‌ದಲ್.

³ಕ್ರಿಸ್ತ ಯೇಸುನ ಸೇವೆಡ್ ಎನ ಜತೆಸೇವಕೆರಾದಿತ್ತಿನ ಅಕ್ವಿಲಗ್ಲಾ ಪ್ರಿಸ್ಕಿಲಗ್ಲಾ ಎನ ವಂದನೆಲು.

⁴ಅಕುಲು ಎನ ಜೀವೊಗಾದ್ ಅಪಾಯೊನು ಎದುರಿಸಾಯೆರ್. ಯಾನ್ ಅಕ್ಲೆಗ್ ಋಣಿ ಆದುಲ್ಲೆ. ಯಾನ್ ಮಾತ್ರತ್ತಂದೆ, ಮಾತ ಪಿದಯಿದ ಜನೊಕುಲೆ ಸಭೆತಾಕುಲುಲಾ ಪುಗರುವೆರ್. ಅಪೊಸ್ತಲೆರೆಡ್ ಅಕ್ಲೆನ್ ಮಾತೆರ್ಲಾ ತೆರಿದೆರ್ ಬೊಕ್ಕ ಅಕುಲು ಎನಡ್ದ್ ದುಂಬು ಕ್ರೈಸ್ತೆರಾತೆರ್.

⁵ಅಕ್ಲೆ ಇಲ್ಲಡ್ ಕೂಡ್ದು ಬರ್ಪಿನ ಸಭೆತಾಕುಲೆಗ್ಲಾ ವಂದನೆಲು. ಆಸ್ಯ ಸೀಮೆಡ್ ಕ್ರಿಸ್ತನ್ ನಂಬಿನ ಎನ ಸುರುತ್ತ ಪ್ರೀತಿದ ಸ್ನೇಹಿತೆ ಎಪೈನೇತಗ್ಲಾ ವಂದನೆ

⁶ನಿಕ್ಲೆಗಾದ್ ಮಸ್ತ್ ಪ್ರಯಾಸ ಬುಡಿನ ಮರಿಯಗ್ ವಂದನೆ

⁷ಎನಡೊಪ್ಪ ಸೆರೆಮನೆಟ್ ಇತ್ತಿನ ಅಂದ್ರೋನಿಕಗ್ಲಾ ಯೂನ್ಯಗ್ಲಾ ವಂದನೆಲು. ಅಪೊಸ್ತಲೆರೆಡ್ ಅಕ್ಲೆನ್ ಮಾತೆರ್ಲಾ ತೆರಿದರ್ ಬೊಕ್ಕ ಅಕುಲು ಎನಡ್ದ್ ದುಂಬು ಕ್ರೈಸ್ತೆರಾತೆರ್.

⁸ಕರ್ತವಡ್ ಎನ ಪ್ರೀತಿದ ಅಂಪ್ಲೀಯಗ್ಲಾ ವಂದನೆ

⁹ಕ್ರಿಸ್ತ ಸೇವೆಡ್ ಎಂಕುಲೆ ಜತೆಸೇವಕೆ ಉರ್ಬಾನಗ್ಲಾ ಎನ ಪ್ರೀತಿದ ಸ್ತಾಖುಗ್ಲಾ ವಂದನೆಲು.

¹⁰ಕ್ರಿಸ್ತನ ಸೇವೆಡ್ ಯೋಗ್ಯದಾಯೆ ಆದುಪ್ಪು ಅಪೆಲ್ಲಗ್ ವಂದನೆ ಅರಿಸ್ತೊಬೂಲುನ ಇಲ್ಲದಾಕುಲೆಗ್ ವಂದನೆಲು.

¹¹ಎನ ಸಂಬಂಧಿಕೆ ಆದುಪ್ಪು ಹೆರೋದಿಯಗ್ಲಾ ನಾರ್ಕಿಸ್ಸ್‌ನ ಇಲ್ಲಡ್ ಕರ್ತವಡ್ ಉಪ್ಪುನಾಕುಲೆಗ್ಲಾ ವಂದನೆಲು.

¹²ಕರ್ತವ ಸೇವೆಡುಪ್ಪುನ ತ್ರುಫೈನಗ್ಲಾ ತ್ರುಫೋಸಗ್ಲಾ ವಂದನೆಲು. ಕರ್ತವಗಾದ್ ಮಸ್ತ್ ಪ್ರಯಾಸ ಬುಡ್ತಿನ ಪ್ರೀತಿದ ಪೆರ್ಸೀಸಗ್ಲಾ ವಂದನೆ

¹³ಕರ್ತವ ಭಕ್ತೆರೆಡ್ ಅಜತ್‌ದಿನಾಯೆ ಆದುಪ್ಪು ರೂಫಗ್ಲಾ ಎಂಕ್ ಅಪ್ಪೆಲೆಕ್ಕ ಇತ್ತಿ ಆಯ ಅಪ್ಪೆಗ್ಲಾ ವಂದನೆಲು.

¹⁴ಅಸುಂಕ್ರೀತಗ್ಲಾ ಫ್ಲೆಗೋನುಗ್ಲಾ ಹೆರ್ಮಾನುಗ್ಲಾ ಪತ್ರೋಬುಗ್ಲಾ ಹೆರ್ಮೇಯೆಗ್ಲಾ ಅಕ್ಲೆಡೊಪ್ಪ ಉಪ್ಪುನ ಮಾತ ಸಹೋದರೆರೆಗ್ಲಾ ವಂದನೆಲು.

¹⁵ಫಿಲೊಲೋಗುಗ್ಲಾ ಯೂಲ್ಯಗ್ಲಾ ನೇರ್ಯಗ್ಲಾ ಆಯನ ಮೆಗ್ದಿಗ್ಲಾ ಒಲುಂಪಸ್‌ಗ್ಲಾ ಅಕ್ಲೆಡೊಪ್ಪ ಉಪ್ಪುನ ಮಾತ ದೇವಜನೊಕುಲೆಗ್ಲಾ ವಂದನೆಲು.

¹⁶ಒರಿಯಗ್ ಒರಿ ಪರಿಶುದ್ಧದ ಮುದ್ದು ಕೊರ್ದು ವಂದಿತೊನ್ಲೆ. ಮುಲ್ತ ಕ್ರಿಸ್ತನ ಸಭೆತಾಕುಲು ಅಕ್ಲೆನ ವಂದನೆಲೆನ್ ತೆರಿಪಾದೆರ್.

¹⁷ಎನ ಸಹೋದ್ರೆರೇ, ನಿಕುಲು ಕಲ್ತೊಂಡಿ ಬೋಧನೆಗ್ ವಿರೋಧಾದ್ ಭೇದ ಆತಂಕ ಮಲ್ಪುನಾಕುಲೆ ಮಿತ್ತ್ ಕಣ್ಣ್ ದೀದ್ ಅಕ್ಲೆಡ್ದ್ ದೂರ ಉಪ್ಪುಲೆ ಪಂಡ್ದ್ ನಿಕ್ಲೆಡ ನಟ್ಟೊನ್ವೆ.

¹⁸ಇಂಚ ಮಲ್ಪುನಾಕುಲು ನಮ ಕರ್ತವೆ ಆದುಪ್ಪು ಕ್ರಿಸ್ತನ ಸೇವೆನ್ ಮಲ್ಪಂದೆ ತನ್ಕುಲೆ ಬಂಜಿದ ಸೇವೆನೇ ಮಲ್ಪುನಾಕುಲು. ಅಕುಲು ಪೊರ್ಲುದ ಪುಗರಿಕೆದ ಪಾತೆರೊಲೆಡ್ದ್ ತೆರಿಯಂದಿ ಜನೊಕುಲೆನ ಉಡಲ್‌ನ್ ಮೋಸೊಗು ಪಾಡ್ವೆರ್

¹⁹ನಿಕ್ಲೆನ ತಗ್ಗ್‌ತನ ಮಾತೆರೆಗ್ ಗೊತ್ತಿತ್ತ್‌ನೆಡ್ದ್ ಉಂದೆನ್ ಬರೆತೆ. ನಿಕ್ಲೆನ ಸಂಗತಿಡ್ ಸಂತೋಷ ಪಡೆಪೆ. ನಿಕುಲು ಎಡ್ಡೆಂತಿನೆಟ್ಟ್ ಬಿರ್ಸೆರ್ ಹಾಳ್‌ದೆಟ್ಟ್ ಕಪಟದಾಂತಿನಾಕುಲು ಆದುಪ್ಪೊಡು ಅಂದ್‌ದ್ ಬಯಕುವೆ.

²⁰ಸಮಾಧಾನದ ದೇವೆರ್ ಬೇಗೊಡು ಸೈತಾನನ್ ನಿಕ್ಲೆ ಕಾರಡಿಕ್ ಪಾಡ್ದ್ ದೊಂಕಾವೆ. ನಮ ಕರ್ತವೆ ಆದುಪ್ಪು ಯೇಸುನ ದಯ ನಿಕ್ಲೆಡೊಪ್ಪ ಉಪ್ಪಡ್.

²¹ಎನ ಜತೆಸೇವಕೆ ತಿಮೋಥಿ, ನಿಕ್ಲೆಗ್ ವಂದನೆಲೆನ್ ತೆರಿಪಾದೆ. ಅಂಚೆನೇ ಸಂಬಂಧಿಕೆರಾಯಿನ ಲೂಕ್ಯೆಲಾ ಯಾಸೋನುಲಾ ಸೋಸಿಪತ್ರೆಲಾ ವಂದನೆಲೆನ್ ಪನ್ಪೆರ್.

²²ಈ ಪತ್ರಿಕೆನ್ ಬರೆತಿ ತೆರ್ತಿಯೆ ಇನ್ಪಿ ಯಾನ್ ನಿಕ್ಲೆಗ್ ಕರ್ತವಡ್ ವಂದನೆಲೆನ್ ತೆರಿಪಾವೆ.

²³ಸಭೆ ಒಟ್ಟಾದ್ ಸೇರ್ದ್ ಬರ್ಪಿ ಇಲ್ಲದ ಗಾಯೆಲಾ ನಿಕ್ಲೆಗ್ ವಂದನೆ ಪನ್ಪೆ. ಈ ಊರುದ ಖಜಾನೆದ ಮುಖ್ಯಸ್ಥೆ ಆದುಪ್ಪು ಎರಸ್ತೆಲಾ ನಮ ಸಹೋದರೆ ಕ್ವರ್ತೆಲಾ ವಂದನೆ ಪನ್ಪೆರ್. ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತ ದಯ ನಿಕ್ಲೆ ಮಾತೆರೆಡೊಪ್ಪ ಉಪ್ಪಡ್. ಆಮೆನ್.

²⁵ದೇವೆರೆಗ್ ಮೈಮೆ ಆವಡ್. ಪಿರಾಕ್‌ದ ಕಾಲೊಲೆಡ್ ವರ್ಸಾನುಗಟ್ಟಲೆ ಮದೆ ಆದಿತ್ತಿನ ಮರ್ಮೊಲು ಇತ್ತೆ ತೋಜಿದ್ ಬತ್ತಿಲೆಕ್ಕ, ಯಾನ್ ನಿಕ್ಲೆಗ್ ಸಾರಿನ ಯೇಸು ಕ್ರಿಸ್ತನ ಸುವಾರ್ತೆಗ್ ತಕ್ಕ ನಿಕ್ಲೆಡ್ ಉಂಡಾಯಿನ ನಂಬಿಕೆಡ್ ಸ್ಥಿರಾದ್ ಉಂತುಲೆ. ಇತ್ತೆ ಆ ಮರ್ಮ ಪ್ರವಾದಿಲೆ ಬರವುಡ್ದ್ ತೆರಿದ್ ಬತ್ತ್ಂಡ್. ಬೊಕ್ಕ ಮಾತ ಜನಾಂಗೊಲುಲಾ ಅವೆನ್ ಕೇನುಲೆಕ್ಕಲಾ ಐಕ್ ತಗ್ಗ್‌ದಿನಾಕುಲಾದ್ ಉಪ್ಪುಲೆಕ್ಕಲಾ ನಿತ್ಯ ದೇವೆರೆ ಅಪ್ಪಣೆಡ್ದ್‌ಲಾ ಅವು ಮಾತೆರೆಗ್ ತೋಜಿದ್ ಬತ್ತ್ಂಡ್.

²⁷ಒರಿಯೇ ಸರ್ವಜ್ಞಾನಿ ಆದುಪ್ಪು ನಿತ್ಯ ದೇವೆರೆಗ್ ಯೇಸು ಕ್ರಿಸ್ತಡ್ದ್ ಏನಿತ್ಯೇನಿಗ್ಲಾ ಮಾನ ಮೈಮೆ ಉಂಡಾವಡ್, ಆಮೆನ್.