Read Tulu ರೋಮಾಯೆರೆಗ್ 2 Bible Online

ರೋಮಾಯೆರೆಗ್ 2 - Tulu bible

ರೋಮಾಯೆರೆಗ್ 2

¹ಓ ನರಮಾನಿಯೇ, ಈ ಅವ್ವೇ ದುರಬ್ಯಾಸೊಡಿತ್ತ್‌ದ್, ನನೊರಿಯನ್ ತಪ್ಪುಗಾರೆ ಪಂಡ್ದ್ ತೀರ್ಪು ಮಲ್ಪುನ ಉಂದು ಸರಿಯ, ಉತ್ತರ ಪನಿಯೆರೆ ನಿಕ್ಕ್ ಸಾದಿ ಇಜ್ಜಿ. ಎಂಚಂದ್ಂಡ ಬೊಕ್ಕೊರಿಯನ್ ತಪ್ಪುಗಾರೆ ಪಂಡ್ದ್ ನಿನನ್ ಈಯೇ ತಪ್ಪುಗಾರೆ ಪಂಡ್ದ್ ತೀರ್ಪು ಮಲ್ತಿಲೆಕ್ಕ ಆಂಡತ್ತಾ?

²ಆಂಡ ಅಂಚಿತ್ತಿನೆನ್ ನಡಪಾವುನಾಕುಲೆನ ಸಂಗತಿಲೆಡ್ ದೇವೆರ್ ಮಲ್ಪುನ ತೀರ್ಪು ಸತ್ಯೊಗು ತಕ್ಕಾದೇ ಉಪ್ಪುಂಡು ಪಂಡ್ದ್ ತೆರಿದ.

³ಈ ಬೇತೆಕ್ಲೆನ್ ತೀರ್ಪು ಮಲ್ಪುನು ಎಂಚ? ಅವ್ವೇ ಕ್ರಿಯೊಲೆನ್ ಈಲಾ ಮಲ್ತೊಂದುಲ್ಲತ್ತಾ? ನಿಕ್ಕ್ ದೇವೆರೆನ ದಂಡನೆದ ತೀರ್ಪು ತಪ್ಪಾವೊಲಿ ಪಂಡ್ದ್ ಎನ್ನುವನಾ?

⁴ಆಯನ ಮಲ್ಲ ಕನಿಕರ, ತಾಳ್ಮೆ, ಅಳಿಯಂದಿ ಶಾಂತಿನ್ ಈ ಅಸಡ್ಡೆ ಮಲ್ಪುವನಾ? ದೇವೆರ್ ಕನಿಕರದಾಯೆ ಪಂಡ್ದ್ ಈ ಕಂಡಿತಾ ತೆರಿದ. ದಾಯೆಗಂದ್ಂಡ, ಆಯೆ ನಿನನ್ ಪಶ್ಚಾತಾಪೊಗು ನಡಪುಡಿಯೆರೆ ಪ್ರಯತ್ನ ಮಲ್ಪುವೆ.

⁵ಈ ನಿನ ಅಲ್ಪ ಬುದ್ಧಿನ್ಲಾ ಪಶ್ಚಾತಾಪದಾಂತಿನ ಉಡಲ್‌ನ್ಲಾ ಬೆರಿ ಪತ್ತೊಂದು ಉಪ್ಪುನೆಡ್ದ್ ನಿಕ್ಕಾದ್ ಈಯೇ ದೇವೆರೆ ಕೋಪೊನು ಕೂಡಾವೊಂದುಲ್ಲ. ದೇವೆರೆನ ಕೋಪಲಾ ನೀತಿದ ತೀರ್ಪುಲಾ ತೋಜಿದ್ ಬರ್ಪಿನ ದಿನೊಕುಲು ಬರು.

⁶ಆಯೆ ಒರಿ ಒರಿಯಗ್ ಆಯಾಯನ ಕ್ರಿಯೊಗು ತಕ್ಕ ಪ್ರತಿಫಲೊನು ಕೊರ್ಪೆ.

⁷ಏರ್ ಮೈಮೆ, ಮಾನ, ತಾಳ್ಮೆಲೆನ್ ಪಡೆಯೊಡು ಪಂಡ್ದ್ ಎಡ್ಡೆಂತಿನೆನ್ ಬೇಜಾರ್‌ದಾಂತೆ ಮಲ್ಪುವೆರಾ ಅಕ್ಲೆಗ್ ನಿತ್ಯಜೀವೊನು ಕೊರ್ಪೆ.

⁸ಏರ್ ತನ್ಕುಲೆ ಸ್ವಾರ್ಥೊಡು ಸತ್ಯದೆನ್ ಕೈಕೊನಂದೆ ಅನ್ಯಾಯೊನು ಕೈಕೊನುವೆರಾ, ಅಕ್ಲೆಗ್ ಕೋಪಲಾ ಉಗ್ರಲಾ ಬರ್ಪುಂಡು.

⁹ದುಷ್ಟತನೊನು ನಡಪಾವುನ ಪ್ರತಿಯೊಂಜಿ ನರಮಾನಿಗ್ ಕಷ್ಟಲಾ ಸಂಕಟಲಾ ಬರ್ಪುಂಡು. ದುಂಬತ್ತ ಯೆಹೂದ್ಯೆರೆಗ್ ಐಡ್ದ್ ಬೊಕ್ಕ ಪಿದಯಿದ ಜನೊಕುಲೆಗ್.

¹⁰ಆಂಡ ಎಡ್ಡೆಂತಿನೆನ್ ನಡಪಾವುನ ಒರಿ ಒರಿಯಗ್ ಮೈಮೆಲಾ, ಮಾನಲಾ, ಸಮಾಧಾನಲಾ ಉಂಡಾಪುಂಡು. ದುಂಬತ್ತ ಯೆಹೂದ್ಯೆರೆಗ್ ಐಡ್ದ್ ಬೊಕ್ಕ ಪಿದಯಿದ ಜನೊಕುಲೆಗ್.

¹¹ದೇವೆರೆಗ್ ಭೇದಭಾವ ಇಜ್ಜಿ.

¹²ಪಿದಯಿದ ಜನೊಕುಲೆಗ್ ಮೋಶೆನ ನ್ಯಾಯಕಟ್ಟ್ ಇಜ್ಜಿ, ಅಕುಲು ಪಾಪ ಮಲ್ಪುವೆರ್, ನ್ಯಾಯಕಟ್ಟ್‌ದಾಂತಿನಾಕುಲಾದೇ ನಾಶಾದ್ ಪೋಪೆರ್. ಯೆಹೊದ್ಯೆರೆಗ್ ನ್ಯಾಯಕಟ್ಟ್ ಉಂಡು. ಅಕುಲು ಪಾಪ ಮಲ್ಪುವೆರ್ ನಾಯ್ಯಕಟ್ಟ್‌ಗ್ ಸರಿಯಾದೇ ತೀರ್ಪಾವು.

¹³ದಾಯೆಗಂದ್ಂಡ, ನ್ಯಾಯಕಟ್ಟ್ ಕೇಂಡಿನೆಟ್ಟ್ ಏರ್ಲಾ ದೇವೆರೆ ಸನ್ನಿಧಾನೊಡು ನೀತಿವಂತೆರಾಪುಜೆರ್. ಆಂಡ ನ್ಯಾಯಕಟ್ಟ್‌ಡ್ ಪಂಡಿನೆನ್ ಮಲ್ಪುನೆಡ್ದ್ ಅಕುಲು ನೀತಿವಂತೆರ್ ಆಪೆರ್

¹⁴ಪಿದಯಿದ ಜನೊಕುಲೆಗ್ ನ್ಯಾಯಕಟ್ಟ್ ಇಜ್ಜಿ; ಆಂಡ ನ್ಯಾಯಕಟ್ಟ್‌ಡ್ ಪನ್ತಿನೆನ್ ಅಕುಲು ಸಹಜ ಸ್ವಭಾವೊಡು ಮಲ್ತೆರ್ಡ ಅಕ್ಲೆಡ್ ನ್ಯಾಯಕಟ್ಟ್ ಇಜ್ಜಿಡಲಾ ನ್ಯಾಯಕಟ್ಟ್ ಅಕುಲೇ ಆದುಲ್ಲೆರ್.

¹⁵ಎಂಚಂದ್ಂಡ ಅಕ್ಲೆನ ಉಡಲ್‌ಡ್ ನ್ಯಾಯಕಟ್ಟ್‌ದ ಅಪ್ಪಣೆ ಬರೆದುಂಡು. ನೆಕ್ಕ್ ಅಕ್ಲೆನ ಉಡಲ್‌ಲಾ ಸಾಕ್ಷಿ ಪನ್ಪುಂಡು. ಅಕ್ಲೆನ ಆಲೋಚನೆಲು ವಾದಿ ಪ್ರತಿವಾದಿಲೆಕ್ಕ, ಉಂದು ತಪ್ಪು, ಉಂದು ತಪ್ಪತ್ತ್, ಪಂಡ್ದ್ ತೋಜಾವುಂಡು.

¹⁶ಯಾನ್ ಸಾರಿಯುನ ಸುವಾರ್ತೆಡ್ ಪಂಡಿಲೆಕ್ಕ ದೇವೆರ್ ಯೇಸು ಕ್ರಿಸ್ತಡ್ದ್ ನರಮಾನಿಲೆನ ಗುಟ್ಟುಲೆನ್ ಗೊತ್ತು ಮಲ್ತ್‌ದ್ ನ್ಯಾಯತೀರ್ಪು ಮಲ್ಪು ದಿನ ಬರ್ಪುಂಡು. ಆ ದಿನೊಟು ಉಂದು ಮಾತಲಾ ತೆರಿದ್ ಬರು.

¹⁷ನಿನ ವಿಚಾರೊಡು ದಾನೆ? ಈ ನಿನನ್ ಯೆಹೂದ್ಯೆ ಪಂಡ್ದ್ ಪಂಡೊನುವನಾ? ಈ ನ್ಯಾಯಕಟ್ಟ್‌ದ ಮಿತ್ತ್ ಆಧಾರ ಮಲ್ತೊಂದು ದೇವೆರೆಗ್ ಸೇರ್ದಿನಾಯೆ ಅಂದ್‌ದ್ ಪುಗರೊನ್ವನಾ?

¹⁸ಆಯನ ಚಿತ್ತೊನು ತೆರಿದಿನಾಯೆಲಾ ನ್ಯಾಯಕಟ್ಟ್‌ದ ಬೋಧನೆ ಪಡೆದ್ ಉಂದು ತಕ್ಕ್‌ದವು ಅತ್ತಾ ಅಂದಾ ಪಂಡ್ದ್ ಗೊತ್ತು ಮಲ್ಪುನಾಯೆಲಾ ಆದುಲ್ಲ.

¹⁹ಉಂದೆಡ್ದಾದ್ ಈ ಕುರುಡೆರೆಗ್ ಸಾದಿ ತೋಜಾವುನಾಯೆಲಾ ಕತ್ತಲೆಡುಪ್ಪುನಾಕುಲೆಗ್ ಬೊಲ್ಪುಲಾ

²⁰ಬುದ್ಧಿದಾಂತಿನಾಕುಲೆಗ್ ಕಲ್ಪಾವುನಾಯೆಲಾ ದಾಲಾ ತೆರಿಯಂದಿನಾಕುಲೆಗ್ ಬೋಧಕೆಲಾ ಆದುಲ್ಲೆ ಪಂಡ್ದ್ ನಂಬೊಂದ. ನ್ಯಾಯಕಟ್ಟ್‌ಡ್ ಗೇನಲಾ ಸತ್ಯಲಾ ಪೂರ್ತಿ ಉಂಡು ಪಂಡ್ದ್ ಎನ್ನೊನುವ.

²¹ಇಂಚಾದುಪ್ಪುನಗ ನನೊರಿಯಗ್ ಬೋಧನೆ ಮಲ್ಪುನಾಯೆ, ಈ ನಿಕ್ಕ್ ಬೋಧನೆ ಮಲ್ತೊನಂದೆ ಉಲ್ಲನಾ? “ಕಂಡೊನಿಯೆರೆ ಬಲ್ಲಿ,” ಪಂಡ್ದ್ ಸಾರಿದ್ ಈ ಕಂಡೊನುವನಾ?

²²“ವ್ಯಭಿಚಾರ ಮಲ್ಪೆರೆ ಬಲ್ಲಿ,” ಪನ್ಪಿನಾಯೆ ಈ ವ್ಯಭಿಚಾರ ಮಲ್ಪುವನಾ? ಮೂರ್ತಿಲೆಡ್ ನಂಬಿಕೆದಾಂತಿನಾಯೆ ಈ ದೇವಸ್ಥಾನೊಡ್ದು ಕಂಡೊನುವನಾ?

²³ನ್ಯಾಯಕಟ್ಟ್‌ದ ಅಭಿಮಾನಿ ಆದುಪ್ಪು ಈ ನ್ಯಾಯಕಟ್ಟ್‌ನ್ ಮೀರ್‌ದ್ ದೇವೆರೆನ್ ಅವಮಾನ ಮಲ್ಪುವನಾ?

²⁴“ನಿಕ್ಲೆನ ದಿಸೆಡ್ದ್ ಪಿದಯಿದ ಜನೊಕುಲೆಡ್ ದೇವೆರೆ ಪುದರ್ ದೂಷಣೆಗ್ ಗುರಿ ಆಪುಂಡು ಪಂಡ್ದ್ ಬರೆತ್ಂಡತ್ತಾ.”

²⁵ಈ ನ್ಯಾಯಕಟ್ಟ್‌ನ್ ಕೈಕೊನುವಡ ನಿನ ಸುನ್ನತಿಗ್ ಬಿಲೆ ಉಂಡು; ಆಂಡ ಈ ನ್ಯಾಯಕಟ್ಟ್‌ನ್ ಕೈಕೊನುಜಡ ನಿಕ್ಕ್ ಸುನ್ನತಿ ಇತ್ತ್ಂಡಲಾ ಇಜ್ಜಾಂದಿಲೆಕ್ಕ ಆವು.

²⁶ಇಂಚಾದುಪ್ಪುನಗ ಸುನ್ನತಿದಾಂತಿನಾಯೆ ನ್ಯಾಯಕಟ್ಟ್‌ದ ನಿಯಮೊಲೆಗ್ ಸರಿಯಾದ್ ನಡತೆಡ, ಸುನ್ನತಿದಾಂತಿನಾಯೆ ಆದಿತ್ತ್‌ಂಡಲಾ ಸುನ್ನತಿ ಇತ್ತಿನಾಯಲೆಕ್ಕ ಲೆಖ್ಖೊಗು ಬರುವೆ.

²⁷ಆಯೆ ಶರೀರೊಡು ಸುನ್ನತಿದಾಂತಿನಾಯೆ ಆದಿತ್ತ್‌ದ್ ನ್ಯಾಯಕಟ್ಟ್‌ಡ್ ಬರೆತಿನೆನ್ ನಡಪಾವುನೆಟ್ಟ್ ಶಾಸ್ತ್ರಲಾ ಸುನ್ನತಿಲಾ ಇತ್ತ್‌ದ್ ನ್ಯಾಯೊನು ಮೀರ್‌ದ್ ನಡಪುನ ನಿನನ್ ಪಾಪಿ ಪಂಡ್ದ್ ತೀರ್ಪು ಮಲ್ಪುವೆ.

²⁸ಪಿದಯಿಡ್ ಮಾತ್ರ ಯೆಹೂದ್ಯೆ ಆದುಪ್ಪುನಾಯೆ ಯೆಹೂದ್ಯೆ ಅತ್ತ್; ಬೊಕ್ಕ ಪಿದಯಿ ಶರೀರೊಡು ಮಾತ್ರ ಮಲ್ತ್‌ದಿನ ಸುನ್ನತಿ ನಿಜವಾಯಿನ ಸುನ್ನತಿ ಅತ್ತ್.

²⁹ಆಂಡ ಉಲಯಿ ಯೆಹೂದ್ಯೆ ಆದುಪ್ಪುನಾಯೆನೇ ನಿಜ ಯೆಹೂದ್ಯೆ. ಬೊಕ್ಕ ಉಡಲ್‌ಡ್ ಆಪಿನ ಸುನ್ನತಿಯೇ ಸುನ್ನತಿ. ಬೊಕ್ಕ ಈ ಕಾರ್ಯ ದೇವೆರೆ ಆತ್ಮನ ಬೇಲೆ ಅತ್ತಂದೆ ಬರೆತಿ ನ್ಯಾಯಕಟ್ಟ್‌ದವು ಅತ್ತ್. ಇಂಚಿತ್ತಿ ಸುನ್ನತಿ ಇತ್ತಿನಾಯಗ್ ಬರ್ಪಿ ಪುಗರಿಕೆ ದೇವೆರೆಡ್ದೇ ಅತ್ತಂದೆ ನರಮಾನಿಲೆಡ್ದ್ ಬರ್ಪಿನವು ಅತ್ತ್.