Read Tulu ರೋಮಾಯೆರೆಗ್ 5 Bible Online

ರೋಮಾಯೆರೆಗ್ 5 - Tulu bible

ರೋಮಾಯೆರೆಗ್ 5

¹ಅಂಚಾಂಡ ನಂಬಿಕೆಡ್ದ್ ನೀತಿವಂತೆರ್ ಅಂದ್‌ದ್ ತೀರ್ಪು ಆಯಿ ನಂಕ್, ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್ ದೇವೆರೆಡೊಪ್ಪ ಸಮಾಧಾನ ಉಂಡು.

²ಎಂಕ್ಲೆನ ನಂಬಿಕೆಡ್ದ್ ಈ ಪೊಸ ಜೀವನದ ಅನುಭವೊನು ಆಯನ ದಯೊಡ್ದು ಆಯಡ್ದ್ ಪಡೆಯೊಂಡ. ಅವೆನ್ ಎಂಕುಲು ಪುಗರ್‌ನಗ ಎಂಕ್ಲೆಗ್ ದೇವೆರೆ ಮೈಮೆಡ್ ಪಾಲ್‌ದಾರೆರಾಪಿನ ನಿರೀಕ್ಷೆ ಉಂಡಾಪುಂಡು

³ಉಂದು ಮಾತ್ರ ಅತ್ತಂದೆ ನಂಕ್ ಉಂಡಾಪಿ ಉಪದ್ರೊಲೆಡ್ಲಾ ಸಂತೋಷೊಡು ಉಲ್ಲ.

⁴ದಾಯೆ ಪಂಡ ಉಪದ್ರೊಡ್ದು ತಾಳ್ಮೆ ಪುಟ್ಟುಂಡು. ತಾಳ್ಮೆಡ್ದ್ ಜಯತ ಅನುಭವ ಪುಟ್ಟುಂಡು. ಅನುಭವೊಡ್ದು ನಿರೀಕ್ಷೆ ಪುಟ್ಟುಂಡು ಅಂದ್‌ದ್ ನಮ ತೆರಿದ.

⁵ಈ ನಿರೀಕ್ಷೆ ನಮಡ್ ನಿರಾಶೆ ಉಂಡು ಮಲ್ಪುಜಿ. ದಾಯೆಗಂದ್ಂಡ ನಂಕ್ ಕೊರ್ತಿನ ಪರಿಶುದ್ಧಾತ್ಮೊಡ್ದು ದೇವೆರ್ ತನ ಪ್ರೀತಿನ್ ನಮ ಉಡಲ್‌ಡ್ ಮೈತ್‌ದ್ ಕೊರ್ತೆ.

⁶ನಮ ಬಲದಾಂತಿನಾಕುಲು ಆದುಪ್ಪುನಗನೇ ನೇಮಕ ಆತಿ ಕಾಲೊಡು ಭಕ್ತಿದಾಂತಿನಾಕುಲೆಗಾದ್ ಯೇಸು ಕ್ರಿಸ್ತೆ ತನ ಪ್ರಾಣೊನೇ ಕೊರಿಯೆ.

⁷ನೀತಿವಂತೆರೆಗಾದ್ ಏರಾಂಡಲಾ ಪ್ರಾಣ ಕೊರ್ಪಿನವು ಅಪರೂಪ. ಉಪಕಾರ ಮಲ್ಪುನಾಯಗಾದ್ ಪ್ರಾಣ ಕೊರಿಯೆರೆ ಏರಾಂಡಲಾ ಧೈರ್ಯ ಮಲ್ತೆಡಲಾ ಮಲ್ಪೆ.

⁸ಆಂಡ ನಮ ಪಾಪಿಲಾದುಪ್ಪುನಗಲಾ ಕ್ರಿಸ್ತೆ ನಂಕಾದ್ ಪ್ರಾಣ ಕೊರಿನೆಟ್ಟ್ ದೇವೆರ್ ನಮ ಮಿತ್ತ್ ತನ್ಕ್ ಉಪ್ಪು ಪ್ರೀತಿನ್ ತೋಜಾದ್ ಕೊರ್ತೆ.

⁹ಇತ್ತೆ ನಮ ಆಯನ ನೆತ್ತೆರೆಡ್ದಾದ್ ನೀತಿವಂತೆರ್ ಅಂದ್‌ದ್ ತೀರ್ಪು ಆಯಿನೆಡ್ದ್ ದೇವೆರೆಡ್ದ್ ಬರ್ಪಿ ಕೋಪೊಡ್ದು ನಮನ್ ತಪ್ಪಾವೆ ಪನ್ಪಿನವು ಏತೋ ಸತ್ಯ ಆದುಂಡು.

¹⁰ನಮ ನಂಬುನೆಡ್ದ್ ದುಂಬು ದೇವೆರೆ ವೈರಿಲಾದಿತ್ತ. ಆಯನ ಮಗನ ಮರಣೊನು ನಂಬಿನೆಡ್ದ್ ನಮನ್ ಆಯಡೊಪ್ಪ ಸಂದಾನ ಮಲ್ತ್‌ದ್ ಸ್ನೇಹಿತೆರಾದ್‌ ಮಲ್ತೆ. ಇತ್ತೆ ದೇವೆರೆ ಸ್ನೇಹಿತೆರಾದುಪ್ಪುನ ಕ್ರಿಸ್ತನ ಜೀವನೊಡ್ದು ರಕ್ಷಣೆ ಪಡೆಯುನವು ಏತೋ ಸತ್ಯ ಆದುಂಡು.

¹¹ಈತ್ ಮಾತ್ರ ಅತ್ತ್; ಯೇಸು ಕ್ರಿಸ್ತಡ್ದ್ ಸಂದಾನ ಪಡೆದ್ ಮಾತ ಸಂಗತಿಲೆಡ್ ನಮ ದೇವೆರೆ ಸ್ನೇಹಿತೆರಾಯಿನೆಡ್ದ್ ಸಂತೋಷ ಮಲ್ಪುವ.

¹²ಈ ಸಂಗತಿ ದಾನೆಂದ್ಂಡ, ಒಂಜಿ ನರಮಾನಿಡ್ಡೇ ಪಾಪಲಾ ಪಾಪೊಡ್ದು ಮರಣಲಾ ಲೋಕದುಲಯಿ ಸೇರ್ದ್ಂಡ್. ಆದಾಮುಡ್ದಾದ್ ಪಾಪ ಈ ಲೋಕೊಗು ಸೇರ್‌ಂಡ್. ಮಾತೆರ್ ಪಾಪ ಮಲ್ತಿನೆಡ್ದ್ ಮರಣ ಮಾತೆರೆ ಉಲಯಿ ಬತ್ತ್ಂಡ್.

¹³ನ್ಯಾಯಕಟ್ಟ್ ಉಂಡಾಯಿನೆಡ್ದ್ ದುಂಬೇ ಪಾಪ ಲೋಕೊಡಿತ್ತ್‌ಂಡ್. ಆಂಡ ನ್ಯಾಯಕಟ್ಟ್ ಇಜ್ಜಾಂದೆ ಉಪ್ಪುನಗ ಪಾಪ ಲೆಖ್ಖೊಗು ಬರ್ಪುಜಿ.

¹⁴ಆಂಡಲಾ ಆದಾಮುನ ಕಾಲೊಡ್ದು ಮೋಶೆನ ಕಾಲ ಮುಟ್ಟಲಾ ಮರಣ ಆಳೊಂದಿತ್ತ್‌ಂಡ್. ಆದಾಮು ದೇವೆರೆ ಅಪ್ಪಣೆನ್ ಮೀರ್‌ದ್ ಮಲ್ತಿ ಪಾಪೊಗು ಸಮಾನ ಆದುಪ್ಪು ಪಾಪೊನು ಮಲ್ಪಂದೆ ಇತ್ತಿನಾಕುಲೆನ ಮಿತ್ತ್‌ಲಾ ಅವು ನಡತೊಂದಿತ್ತ್‌ಂಡ್. ಆ ಆದಾಮೆ ಬರೊಡಾಯಿ ಒರಿಯಗ್ ತೋಜಿದ್ ಬರ್ಪಿ ನರಮಾನಿ ಆದುಲ್ಲೆ.

¹⁵ಆಂಡ ಆ ಅಪರಾಧದ ಸಂಗತಿಗ್ಲಾ ದೇವೆರೆ ದಯತ ದಾನದ ಸಂಗತಿಗ್ಲಾ ಬಾರೀ ಹೆಚ್ಚಿಕಡಿಮೆ ಉಂಡು. ಎಂಚಂದ್ಂಡ ಆ ಒರಿಯನ ಅಪರಾಧೊಡ್ದು ಮಾತ ನರಮಾನಿಲು ಸೈತಿನವು ನಿಜ ಅಂದ್‌ದ್ ಆಂಡ, ದೇವೆರೆ ದಯೆಲಾ ಯೇಸು ಕ್ರಿಸ್ತೆ ಪನ್ಪಿ ಈ ಒರಿ ನರಮಾನಿನ ದಯೊಡ್ದು ತಿಕ್ಕುನ ವರಲಾ ಮಾತ ನರಮಾನಿಲೆಗ್ ಧಾರಾಳವಾದ್ ತಯಾರ್ ಉಂಡು ಪನ್ಪಿನವು ನಿಜ ಅತ್ತಾ?

¹⁶ಉಂದತ್ತಂದೆ ಪಾಪ ಮಲ್ತಿನ ಒರಿಯಡ್ದೇ ಬೊಡ್ಚಾಂದಿನ ಫಲ ಬತ್ತಿಲೆಕ್ಕ ಈ ವರ ಬೈದಿಜಿ. ಎಂಚಂದ್ಂಡ ಒರಿಯೇ ನರಮಾನಿನ ಪಾಪದ ದಿಸೆಡ್ದ್ ಸೈಯೊಡು ಪನ್ಪಿ ನಿರ್ಧಾರ ಉಂಡಾಂಡ್. ಆಂಡ ದೇವೆರೆ ದಯತ ದಾನಲಾ ಮಸ್ತ್ ಜನೊಕುಲೆ ಅಪರಾಧದ ಕಾರಣೊಡ್ದು ಉಂಡಾದ್ ಅಕ್ಲೆನ್ ನೀತಿವಂತೆರ್ ಅಂದ್‌ದ್ ನಿರ್ಧಾರ ಮಲ್ಪುನವು ಆದುಂಡು.

¹⁷ಒರಿ ನರಮಾನಿನ ಪಾಪೊಡ್ದಾದ್ ಮರಣೊಗು ಅಧಿಕಾರ ಬತ್ತ್ಂಡ್ ಪನ್ಪಿನವು ಸತ್ಯನೇ. ದೇವೆರ್ ಧಾರಾಳವಾದ್ ಅನುಗ್ರಹ ಮಲ್ಪುನ ದಯೆ ದಾನೊಲೆನ್ಲಾ ನೀತಿದವು ಪನ್ಪಿ ವರೊನ್ಲಾ ಪಡೆಯಿನಾಕುಲು ಯೇಸು ಕ್ರಿಸ್ತೆ ಪನ್ಪಿ ಒರಿ ನರಮಾನಿಡ್ದ್ ಜೀವೊಡಿತ್ತ್‌ದ್ ಆಳುನವು ಬೊಕ್ಕಲಾ ನಿಜ ಅತ್ತಾ?

¹⁸ಇಂಚ ಉಪ್ಪುನಗ ಒಂಜೇ ಅಪರಾಧೊಡ್ದು ಮಾತ ನರಮಾನಿಲೆಗ್ ಸೈಯೊಡು ಪನ್ಪಿ ನಿರ್ಧಾರ ಎಂಚ ಉಂಡಾಂಡ ಅಂಚೆನೇ ಒಂಜೇ ಎಡ್ಡೆ ಕಾರ್ಯೊಡ್ದು ಮಾತ ನರಮಾನಿಲೆಗ್ ನೀತಿವಂತೆರ್ ಪನ್ಪಿ ನಿರ್ಧಾರ ಉಂಡಾದ್ ಜೀವೊನು ಉಂಡು ಮಲ್ಪುಂಡು.

¹⁹ಒರಿಯನ ತಿರಸ್ಕಾರೊಡ್ದು ಮಾತೆರ್ಲಾ ಪಾಪಿಲು ಆಯೆರಾ ಅಂಚೆನೇ ಒರಿಯನ ಎಡ್ಡೆ ಮನಸ್‌ಡ್ದ್ ಮಾತೆರ್ಲಾ ನೀತಿವಂತೆರಾಪೆರ್.

²⁰ಅಪರಾಧೊಲು ಹೆಚ್ಚಾದ್ ತೋಜಿದ್ ಬರ್ಪಿಲೆಕ್ಕ ನ್ಯಾಯಕಟ್ಟ್ ನಡುಟು ಬತ್ತ್ಂಡ್. ಆಂಡ ಪಾಪ ಹೆಚ್ಚಿನಂಚೆನೇ ದೇವೆರೆ ದಯೆಲಾ ಹೆಚ್ಚಾದ್ ಬಲ ಆಂಡ್.

²¹ಅಂಚಾಂಡ ಪಾಪೊಡ್ದು ಮರಣ ಆಳುನಾಂಡ ದೇವೆರೆ ದಯೊಡ್ದು ನೀತಿ ಆಳುಂಡು, ನಮನ್ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್ ನಿತ್ಯಜೀವೊಗು ನಡಪುಡುಂಡು.