Read Tulu ರೋಮಾಯೆರೆಗ್ 6 Bible Online

ರೋಮಾಯೆರೆಗ್ 6 - Tulu bible

ರೋಮಾಯೆರೆಗ್ 6

¹ಅಪಗಾಂಡ ದಾದ ಪನ್ಕ? ದೇವೆರೆ ದಯೆ ಹೆಚ್ಚಾವಡ್ ಅಂದ್‌ದ್ ನಮ ಪಾಪ ಮಲ್ತೊಂದೆ ಉಪ್ಪುಗನಾ? ಏಪೊಗ್ಲಾ ಉಪ್ಪೆರೆ ಬಲ್ಲಿ?

²ಪಾಪದ ಪಾಲ್‌ಗ್ ಸೈತಿನಕುಲಾಯಿ ಎಂಕುಲು ನನ ಐಟ್ಟೇ ಬದುಕುನು ಎಂಚ?

³ಕ್ರಿಸ್ತ ಯೇಸುಡೊಪ್ಪ ಸೇರೊನಿಯೆರೆ ದೀಕ್ಷಾಸ್ನಾನ ಮಲ್ತೊಂಡಿನಕುಲಾಯಿ ಎಂಕುಲು ಮಾತೆರ್ ಆಯ ಮರಣೊಡು ಪಾಲ್‌ದಾರೆರ್ ಆವೆರೆ ದೀಕ್ಷಾಸ್ನಾನ ಪಡೆವೊಂದ ಪನ್ಪಿನವು ನಿಕ್ಲೆಗ್ ತೆರಿದಿಜಾ?

⁴ಇಂಚ ಉಪ್ಪುನಗ ನಮ ದೀಕ್ಷಾಸ್ನಾನ ಮಲ್ತೊಂಡಿನಪಗ ಆಯ ಮರಣೊಡು ಪಾಲ್‌ದಾರೆರಾದ್ ಆಯಡೊಪ್ಪ ಕೌಂತುದಿನಾಕುಲಾಯ. ಐಡ್ದಾವರ ಕ್ರಿಸ್ತೆ ಸೈತ್‌ದ್ ಅಮ್ಮೆರೆನ ಮೈಮೆಡ್ದ್ ಜೀವೊಡು ಲಕ್ಕಾಯಿ ಲೆಕ್ಕನೆ ನಮಲಾ ಜೀವೊಡು ಲಕ್ಕ್‌ದ್ ಪೊಸಬೆರಾದ್ ನಡತೊನೊಡು.

⁵ಎಂಚಂದ್ಂಡ ಆಯ ಮರಣೊಡು ನಮ ಆಯಡೊಪ್ಪ ಒಂಜಾಯಿ ಬೊಕ್ಕ, ಆಯ ಲೆಕ್ಕನೇ ಸೈತಿನಾಕುಲೆಡ್ದ್ ಜೀವೊಡು ಲಕ್ಕ್‌ದ್ ಆಯಡೊಪ್ಪ ಒಂಜಾದುಪ್ಪುವ.

⁶ನಮ ಪಾಪದ ಶರೀರಭಾವ ನಾಶಾದ್ ನಮ ನನಲಾ ಪಾಪದ ವಶೊಟ್ಟುಪ್ಪಂದಿಲೆಕ್ಕ ಪರ ನರಮಾನಿನ್ ಕ್ರಿಸ್ತಡೊಪ್ಪ ಕ್ರುಸ್ಸುಗು ಪಾಡ್ದ್ ಆತ್ಂಡ್ ಪಂಡ್ದ್ ನಂಕ್ ಗೊತ್ತುಂಡು. ನಮ ನನ ಪಾಪೊಗು ಗುಲಾಮೆರಾದ್ ಇಜ್ಜ.

⁷ಸೈತಿನಾಯೆ ಪಾಪದ ವಶೊಡ್ದು ಬುಡುಗಡೆ ಪಡೆತೆ.

⁸ಉಂದತ್ತಂದೆ ನಮ ಕ್ರಿಸ್ತಡೊಪ್ಪ ಸೈತಿ ಪಕ್ಷೊಡು ಆಯಡೊಪ್ಪ ಬದುಕುವ ಅಂದ್‌ದ್ ನಂಬುವ.

⁹ಕ್ರಿಸ್ತೆ ಸೈತಿ ಬೊಕ್ಕ ಜೀವಾದ್ ಲಕ್ಕ್‌ದ್ ಬತ್ತ್‌ತ್ತಿನೆಡ್ದ್ ಆಯೆ ನನ ದುಂಬಗ್ ಸೈಯೆರೆ ಉಪ್ಪುನಾಯೆ ಅತ್ತ್.

¹⁰ಮರಣ ನನ ಏಪೊಗ್ಲಾ ಆಯನ್ ಆಳುಜಿ ಪನ್ಪಿನವು ನಂಕ್ ತೆರಿದ್‌ಂಡ್. ಆಯೆ ಸೈತಿನವು ಒಂಜೇ ಸರಿ, ಅವು ಪಾಪದ ಪಾಲ್‌ಗ್. ಆಯೆ ಬದುಕುನವು ದೇವೆರೆಗಾದೇ.

¹¹ಅವ್ವೇ ಪ್ರಕಾರ ನಿಕುಲುಲಾ ನಿಕ್ಲೆನ್ ಕ್ರಿಸ್ತ ಯೇಸುಡೊಪ್ಪ ಪಾಪದ ಪಾಲ್‌ಗ್ ಸೈತಿನಾಕುಲುಲಾ ದೇವೆರೆಗಾದ್ ಬದುಕುನಾಕುಲುಲಾ ಅಂದ್‌ದ್ ಎನ್ನೊನ್ಲೆ.

¹²ಇಂಚಾದುಪ್ಪುನಗ ಸೈಯ್ಯೊಡಾಯಿನ ನಿಕ್ಲೆನ ಶರೀರದ ಮಿತ್ತ್ ಪಾಪ ಆಳಂದೆ ಉಪ್ಪಡ್, ನಿಕುಲು ಶರೀರದ ದುರಾಶೆಗ್ ಗುಲಾಮೆರಾವೊಡ್ಚಿ.

¹³ಉಂದು ಮಾತ್ರ ಅತ್ತಂದೆ ನಿಕುಲು ನಿಕ್ಲೆನ ಅಂಗೊಲೆನ್ ಪಾಪೊಗು ಒಪ್ಪಿಯಾವುನಕುಲಾದ್ ಪಡಿಕೆ ಉದ್ದೇಶೊಲೆಗಾದ್ ಉಪಯೋಗ ಮಲ್ಪಡೆ. ಮರಣೊಡ್ದು ಜೀವೊಗು ಬೈದಿನಾಕುಲೆ ಲೆಕ್ಕ ನಿಕ್ಲೆನ್ ದೇವೆರೆಗ್ ಒಚ್ಚಿದ್ ಕೊರ್ಲೆ; ಬೊಕ್ಕ ನೀತಿದ ಕಾರ್ಯೊಲೆಗಾದ್ ಉಪಯೋಗ ಆಪಿಲೆಕ್ಕ ನಿಕ್ಲೆ ಇಡೀ ಶರೀರೊನು ಆಯ ವಶೊಕ್ಕು ಕೊರ್ಲೆ.

¹⁴ದಾಯೆ ಪಂಡ ಪಾಪ ನಿಕ್ಲೆ ಮಿತ್ತ್ ಅಧಿಕಾರ ನಡಪಾವುಜಿ. ನಿಕುಲು ನ್ಯಾಯಕಟ್ಟ್‌ಗ್ ಒಳಗಾಯಿನಾಕುಲತ್ತ್. ದಯೊಕು ಒಳಗಾಯಿನಾಕುಲು ಆದುಲ್ಲರ್ ಆತೇ.

¹⁵ಅಪಗಾಂಡ ದಾನೆ? ನಮ ನ್ಯಾಯಕಟ್ಟ್‌ಗ್ ಒಳಗಾಯಿನಾಕುಲತ್ತ್. ದಯೊಕು ಒಳಗಾಯಿನಾಕುಲು ಪಂಡ್ದ್ ಪಾಪೊನು ಮಲ್ಪೊಲಿಯಾ? ಏಪೊಗ್ಲಾ ಮಲ್ಪೆರೆ ಬಲ್ಲಿ.

¹⁶ನಿಕುಲು ಏರೆಗಾಂಡಲಾ ಗುಲಾಮೆರಾದ್ ಆಯೆ ಪಂಡಿನೆನ್ ಮಾತ ಕೇನಿಯೆರೆ ನಿಕ್ಲೆನ್ ಒಚ್ಚಿದ್ ಕೊರ್ಪರಾ ಆ ಯಜಮಾನಗೇ ಗುಲಾಮೆರ್ ಆದುಪ್ಪುವರ್ ಪಂಡ್ದ್ ನಿಕ್ಲೆಗ್ ತೆರಿದಿಜಾ? ಪಾಪೊಗು ಗುಲಾಮೆರ್ ಆಂಡ ಮರಣನೇ ಫಲ, ನಂಬಿಕೆಡ್ದ್ ತಗ್ಗ್‌ತನೊಗು ಗುಲಾಮೆರ್ ಆಯರ್ಡ ನೀತಿಯೇ ಫಲ.

¹⁷ಆಂಡ ನಿಕುಲು ಪಿರವುಡು ಪಾಪೊಗು ಗುಲಾಮೆರ್ ಆದಿತ್ತರ್ಡಲಾ ನಿಕ್ಲೆಗ್ ಕಲ್ಪಾಯಿ ಬೋಧನೆಲೆಗ್ ನಿಕುಲು ಉಡಲ್‌ಡ್ದ್ ಅಧೀನರಾಯರ್. ಪಾಪೊಲೆಡ್ದ್ ಬುಡುಗಡೆ ಆದ್ ನೀತಿಗ್ ಗುಲಾಮೆರ್ ಆಯಿನೆಡ್ದ್ ದೇವೆರೆಗ್ ಉಪಕಾರ ಆವಡ್.

¹⁹ನಿಕ್ಲೆನ ಶರೀರದ ಬಲಹೀನತೆದ ದಿಸೆಡ್ದ್ ಲೋಕದ ರೀತಿಡ್ ಪಾತೆರ್‌ವೆ. ಅನ್ಯಾಯ ಮಲ್ಪೆರೆ ನಿಕ್ಲೆನ ಅಂಗೊಲೆನ್ ಬಂಡ್‌ತನೊಗ್ಲಾ ಅನ್ಯಾಯೊಗ್ಲಾ ಎಂಚ ಗುಲಾಮೆರಾದ್ ಒಚ್ಚಿದ್ ಕೊರಿಯರಾ ಅಂಚೆನೆ ಇತ್ತೆ ಪರಿಶುದ್ಧೆರ್ ಆಪಿಲೆಕ್ಕ ನಿಕ್ಲೆನ ಅಂಗೊಲೆನ್ ನೀತಿಗ್ ಅಡಿಯಾಳಾದ್ ಒಪ್ಪಿಸಾಲೆ.

²⁰ನಿಕುಲು ಪಾಪೊಗು ಗುಲಾಮೆರಾದುಪ್ಪುನಗ ನೀತಿದ ಹಂಗ್‌ದಾಕುಲಾದಿತ್ತಿಜರ್.

²¹ಆಂಡ ನಿಕುಲು ಅಪಗ ಮಲ್ತಿ ಕಾರ್ಯೊಲೆಡ್ದ್ ನಿಕ್ಲೆಗಾಯಿ ಫಲ ದಾನೆ? ಇತ್ತೆ ಐತ ಸಂಗತಿಡ್ ನಿಕ್ಲೆಗ್ ನಾಚಿಗೆ ಉಂಡತ್ತಾ? ಕಡೆಕ್ಕ್ ಐಕ್ಲೆಡ್ದ್ ಬರ್ಪಿನಿ ಮರಣ ಅತ್ತಾ?

²²ಇತ್ತೆ ಆಂಡಲಾ ನಿಕುಲು ಪಾಪೊಡ್ದು ಬುಡುಗಡೆ ಪಡೆದ್ ದೇವೆರೆಗ್ ಗುಲಾಮೆರ್ ಆಯಿನೆಡ್ದ್ ಪರಿಶುದ್ಧೆರಾಪಿನವೇ ನಿಕ್ಲೆಗ್ ಫಲ. ಕಡೆಕ್ಕ್ ತಿಕ್ಕುನಂಚಿನವು ನಿತ್ಯಜೀವ.

²³ದಾಯೆಗಂದ್ಂಡ ಪಾಪ ಕೊರ್ಪಿನ ಸಂಬಳ ಮರಣ. ದೇವೆರೆಡ್ದ್ ಧರ್ಮಾರ್ಥ ತಿಕ್ಕುನ ಉಡಿಗೆರೆ ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡುಪ್ಪುನ ನಿತ್ಯಜೀವ.