Read Tulu ರೋಮಾಯೆರೆಗ್ 8 Bible Online

ರೋಮಾಯೆರೆಗ್ 8 - Tulu bible

ರೋಮಾಯೆರೆಗ್ 8

¹ಅವೆಡ್ದಾವರ ಕ್ರಿಸ್ತ ಯೇಸುಡೊಪ್ಪ ಉಪ್ಪುನಾಕುಲೆಗ್ ಅಪರಾಧದ ತೀರ್ಪು ಇತ್ತೆ ಇಜ್ಜೇ ಇಜ್ಜಿ.

²ದಾಯೆ ಪಂಡ ಜೀವ ಉಂಡು ಮಲ್ಪುನ ಪರಿಶುದ್ಧಾತ್ಮಡ್ದ್ ಉಂಡಾಯಿ ನಿಯಮೊಲು ನಿನನ್ ಪಾಪ ಮರಣೊಲೆಗ್ ಕಾರಣ ಆಪಿನ ನಿಯಮೊಲೆಡ್ದ್ ಕ್ರಿಸ್ತ ಯೇಸುಡು ಬುಡುಗಡೆ ಮಲ್ತ್ಂಡ್.

³ಶರೀರಭಾವ ಬಲಹೀನ ಆದುಪ್ಪುನೆಡ್ದ್ ನ್ಯಾಯಕಟ್ಟ್‌ಗ್ ಮಲ್ಪೆರೆ ಆವಂದಿನೆನ್ ದೇವೆರೆ ಮಲ್ತೆ. ಆಯೆ ತನ ಸ್ವಂತ ಮಗನೇ ಕಡಪುಡ್ದು ಶರೀರಭಾವೊಡೇ ಉಪ್ಪು ಪಾಪೊನು ಖಂಡಿಸಾಯೆ; ಆಯೆ ನಮ ಪಾಪದ ಸ್ವಭಾವದಂಚಿನ ಸ್ವಭಾವೊಡೇ ಬತ್ತ್‌ದ್ ಪಾಪೊನು ದೆತ್ತ್‌ದ್ ಪಾಡಿಯೆ.

⁴ದೇವೆರ್ ಇಂಚ ಮಲ್ತಿನಿ ದಾಯೆಗಂದ್ಂಡ, ಶರೀರಭಾವೊಗು ಸರಿಯಾದ್ ಬದ್‌ಕಂದೆ, ಪರಿಶುದ್ಧಾತ್ಮಗ್ ಸರಿಯಾದ್ ಬದುಕುನಾಕುಲಾದ್ ನಮಡ ನ್ಯಾಯಕಟ್ಟ್‌ದ ನಿಯಮೊಲು ಪೂರ್ತಿ ಆವೆರೆ ಸಾದಿ ಆಂಡ್.

⁵ಶರೀರಭಾವೊಡು ಬದುಕುನಾಕುಲು ಐಕ್ ಸಮ್ಮಂಧವಾಯಿನೆತ್ತ ಮಿತ್ತ್ ಮನಸ್ ದೀಪೆರ್. ಆಂಡ ಪವಿತ್ರಾತ್ಮಭಾವೊಡು ಬದುಕುನಾಕುಲು ಪರಿಶುದ್ಧಾತ್ಮಗ್ ಸಮ್ಮಂಧವಾಯಿನೆತ್ತ ಮಿತ್ತ್ ಮನಸ್ ದೀಪೆರ್.

⁶ಶರೀರಭಾವೊಡು ನಡಪುಡುನವು ಮರಣೊಡು ಅಂತ್ಯ ಆಪುಂಡು. ಆಂಡ ಆತ್ಮಭಾವೊಡು ನಡಪುಡುನವು ಜೀವೊಡ್ಲಾ ಸಮಾಧಾನೊಡ್ಲಾ ಅಂತ್ಯ ಆಪುಂಡು.

⁷ಅಂಚಾದ್, ತನ್ಕುಲೆ ಶರೀರಭಾವೊಡು ನಡಪುಡುನಾಕುಲು ದೇವೆರೆಗ್ ವೈರಿಲಾಪೆರ್; ಅಕುಲು ದೇವೆರೆ ನಿಯಮೊಲೆನ್ ಕೈಕೊನುಜೆರ್, ಕೈಕೊನಿಯೆರೆ ಅಕ್ಲೆಗ್ ಆಪಿನವುಲಾ ಇಜ್ಜಿ.

⁸ಶರೀರಭಾವೊಡು ಬದುಕುನಾಕುಲು ದೇವೆರೆನ್ ಮೆಚ್ಚಾವೆರೆ ಆಪುಜಿ.

⁹ಆಂಡ ನಿಕುಲು ಶರೀರ ಪಂಡಿಲೆಕ್ಕ ನಡಪುಜರ್; ಪಗತೆಗ್ ನಿಕುಲು ದೇವೆರಾತ್ಮೆ ಪಂಡಿಲೆಕ್ಕ ನಡಪುವರ್. ಏರೆಗಾಂಡಲಾ ಕ್ರಿಸ್ತನ ಆತ್ಮ ಇಜ್ಜಾಂಡ ಆಯೆ ಕ್ರಿಸ್ತನಾಯೆ ಅತ್ತ್.

¹⁰ಆಂಡ ಕ್ರಿಸ್ತೆ ನಿಕ್ಲೆಡಿತ್ತ್‌ಂಡ, ನಿಕ್ಲೆ ಶರೀರ ಪಾಪದ ದಿಸೆಡ್ದ್ ಸೈತ್ ಪೋಂಡಲಾ, ನಿಕ್ಲೆನ ಆತ್ಮ ನೀತಿದ ದಿಸೆಡ್ದ್ ಜೀವದವು ಆದುಂಡು.

¹¹ಯೇಸುನು ಸೈತಿನಾಕುಲೆಡ್ದ್ ಜೀವೊಡು ಲಕ್ಕಾದಿನಾಯನ ಆತ್ಮ ನಿಕ್ಲೆಡ್ ಉಪ್ಪುನಾಂಡ, ಕ್ರಿಸ್ತ ಯೇಸುನು ಸೈತಿನಾಕುಲೆಡ್ದ್ ಲಕ್ಕಾಯಿನಾಯೆ ನಿಕ್ಲೆಡ್ ಉಪ್ಪು ತನ ಆತ್ಮಡ್ದ್ ನಿಕ್ಲೆ ಮರಣದ ಶರೀರೊನ್ಲಾ ಬದ್‌ಕಾವೆ.

¹²ಇಂಚ ಉಪ್ಪುನಗ ಸಹೋದ್ರೆರೇ, ನಮ ಹಂಗ್‌ಡುಲ್ಲ, ಆಂಡ ಪವಿತ್ರಾತ್ಮೊಗು ಸರಿಯಾದ್ ನಡಪುನ ಹಂಗ್‌ಡುಲ್ಲ ಅತ್ತಂದೆ ಶರೀರಭಾವೊಡು ಬದುಕೊಡು ಪನ್ಪಿ ಹಂಗ್‌ಡ್ ಇಜ್ಜ.

¹³ನಿಕುಲು ಶರೀರಭಾವೊಡು ಬದ್‌ಕಿಯರ್ಡ ಸೈಪಿನಿ ಕಂಡಿತ. ನಿಕುಲು ಪರಿಶುದ್ಧಾತ್ಮಡ್ದ್ ಶರೀರೊಡು ಆಪಿ ದುರಬ್ಯಾಸೊಲೆನ್ ನಾಶ ಮಲ್ಪುನಾಂಡ ಬದುಕುವರ್.

¹⁴ಏರೇರ್ ದೇವೆರೆ ಆತ್ಮೊಡ್ದು ನಡತೊನ್ವೆರಾ ಅಕುಲು ದೇವೆರೆ ಜೋಕುಲು.

¹⁵ನಿಕ್ಲೆಗ್ ದೇವೆರ್ ಕೊರ್ತಿನ ಆತ್ಮೆ ನಿಕ್ಲೆನ್ ನ್ಯಾಯಕಟ್ಟ್‌ದ ಗುಲಾಮೆರಾದ್ ಮಲ್ತ್‌ದ್ ಪೋಡಿಗೆಡ್ ಪಾಡುನವು ಅತ್ತ್; ಪಗತೆಗ್ ಈ ಆತ್ಮೆ ನಿಕ್ಲೆನ್ ದೇವೆರೆ ಜೋಕುಲಂದ್‌ದ್ ಮಲ್ಪುವೆ. ಈ ಆತ್ಮನ ಬಲೊಡ್ದು ನಮ ದೇವೆರೆನ್, “ಅಮ್ಮೆರೇ! ಎನ ಅಮ್ಮೆರೆ!” ಪಂಡ್ದ್ ಲೆಪ್ಪುವ.

¹⁶ನಮ ದೇವೆರೆ ಜೋಕುಲು ಆದುಲ್ಲ ಪನ್ಪಿನೆಕ್ಕ್ ಪವಿತ್ರಾತ್ಮೆನೇ ನಮ ಆತ್ಮದೊಟ್ಟಿಗೆ ಸಾಕ್ಷಿ ಪನ್ಪುಂಡು.

¹⁷ನಮ ಜೋಕುಲು ಆದುಲ್ಲಡ ಹಕ್ಕ್‌ದಾಕುಲಾದುಲ್ಲ, ದೇವೆರೆ ಹಕ್ಕ್‌ದಾಕುಲಾದುಲ್ಲ, ಅಂಚೆನೆ ಕ್ರಿಸ್ತಡೊಪ್ಪಲಾ ಹಕ್ಕ್‌ದಾಕುಲಾದುಲ್ಲ. ದಾಯೆಗಂದ್ಂಡ ಕ್ರಿಸ್ತನ ಭಾದೆಲೆಡ್ ನಮ ಪಾಲ್ ದೆತ್ತೊನುವಡ ಆಯ ಮೈಮೆಡ್ಲಾ ನಂಕ್ ಪಾಲುಂಡು.

¹⁸ಇತ್ತೆದ ಕಾಲೊಲೆಡ್ ನಂಕಾಪಿನ ಕಷ್ಟೊಲು ನಂಕ್ ದುಂಬಗ್ ತಿಕ್ಕುನ ಮೈಮೆದ ಎದುರುಡು ದಾಲಾ ಅತ್ತ್ ಪಂಡ್ದ್ ಯಾನ್ ಎನ್ನುವೆ.

¹⁹ದೇವೆರೆ ಜೋಕುಲೆಗ್ ತಿಕ್ಕುನ ಮೈಮೆ ಏಪ ತೋಜಿದ್ ಬರು ಅಂದ್‌ದ್ ಇಡೀ ಸೃಷ್ಟಿಲಾ ಆಸೆಡ್ ಕಾತೊಂದುಂಡು.

²⁰ಇಡೀ ಸೃಷ್ಟಿ ಬೊಡ್ಚಾಂದಿನೆಕ್ಕ್ ಒಳಗಾಂಡ್, ಇಂಚ ಒಳಗಾಯಿನಿ ಐತ ಸ್ವಂತ ಚಿತ್ತೊಡ್ದಾದ್ ಅತ್ತ್; ಅವೆನ್ ಉಂಡು ಮಲ್ತಿನಾಯನ ಚಿತ್ತೊಡ್ದೇ ಆಂಡ್.

²¹ಎಂಚ ಪಂಡ್ಂಡ ಈ ನಾಶಾಪಿನ ಗುಲಾಮತನೊಡ್ದು ಈ ಸೃಷ್ಟಿಲಾ ಒಂಜಿ ದಿನ ಬುಡುಗಡೆ ಆವು; ದೇವೆರೆ ಜೋಕುಲು ಆಪಿನ ಮೈಮೆದ ಬುಡುಗಡೆಟ್ ಪಾಲ್ ಪಡೆಯುನವೇ.

²²ಇನಿ ಮುಟ್ಟಲಾ ಇಡೀ ಸೃಷ್ಟಿ ಪೆದ್ಪಿ ಬೇನೆದಲೆಕ್ಕ ನರಕೊಂದುಂಡು ಪಂಡ್ದ್ ನಮ ತೆರಿದ.

²³ಉಂದು ಮಾತ್ರ ಅತ್ತಂದೆ ಸುರುತ್ತ ಫಲ ಆದುಪ್ಪು ಪರಿಶುದ್ಧಾತ್ಮನ ವರೊನು ಪಡೆಯಿ ನಮಾಂಡಲಾ ದೇವೆರೆ ಮಗನ ಸ್ಥಾನೊನು ಅಂದ್ಂಡ ಶರೀರೊಗು ಬರೊಡಾಯಿನ ಬುಡುಗಡೆನ್ ಕಾತೊಂದು ನಮ ಉಲಯಿ ನರಕೊಂದುಲ್ಲ.

²⁴ನಮ ರಕ್ಷಣೆ ಪಡೆಯಿನಕುಲಾಂಡಲಾ ನನಲಾ ಕಾತೊಂದುಲ್ಲ. ಕಾತೊಂದುಪ್ಪುನವು ನಂಕ್ ತೋಜಿದ್ ಬತ್ತಿತ್ತ್ಂಡಾ ನನಲಾ ಕಾತೊಂದುಪ್ಪುನು ದಾಯೆಗ್? ಬತ್ತ್‌ತ್ತಿನೆನ್ ಕಾತೊಂದುಪ್ಪೆರೆ ಉಂಡಾ?

²⁵ಆಂಡ ತೂವಂದಿನೆನ್ ನಮ ಕಾತೊಂದುಪ್ಪುನಾಂಡ, ತಾಳ್ಮೆಡ್ ಕಾತೊಂದುಪ್ಪುವ.

²⁶ಅಂಚೆನೇ ಪರಿಶುದ್ಧಾತ್ಮೆಲಾ ಬಲಹೀನೆರಾದುಪ್ಪು ನಂಕ್ ಸಹಾಯ ಮಲ್ಪುವೆ. ನಂಕ್ ಎಂಚ ಪ್ರಾರ್ಥನೆ ಮಲ್ಪೊಡಂದ್‌ದ್ ತೆರಿಯಂದಿನಪಗ ಪರಿಶುದ್ಧಾತ್ಮೆನೇ ಪನಿಯೆರೆ ಆವಂದಿ ನರಳಾಟೊಡ್ದು ನಂಕಾದ್ ನಟ್ಟೊನ್ವೆ.

²⁷ಆಂಡ ಉಡಲ್‌ನ್ ತೂಪಿನ ಪವಿತ್ರಾತ್ಮನ ಯೋಚನೆ ದಾನೆ ಪಂಡ್ದ್ ತೆರಿದುಂಡು. ಆ ಆತ್ಮೆ ದೇವೆರೆ ಚಿತ್ತೊಗು ಸರಿಯಾದ್ ದೇವಜನೊಕುಲೆಗಾದ್ ನಟ್ಟೊನ್ವೆ ಪಂಡ್ದ್ ಆಯೆ ತೆರಿದೆ.

²⁸ಉಂದತ್ತಂದೆ ದೇವೆರೆ ಸಂಕಲ್ಪೊಡ್ದು ಲೆಪ್ಪಾವೊಂದು ಪ್ರೀತಿ ಮಲ್ಪುನಾಕುಲೆನ ಎಡ್ಡೆಗ್ ಮಾತ ಕಾರ್ಯೊಲು ಅನುಕೂಲ ಆಪುಂಡು ಪಂಡ್ದ್ ನಂಕ್ ಗೊತ್ತುಂಡು.

²⁹ದಾಯೆಗಂದ್ಂಡ ದೇವೆರ್ ತನ ಮಗಕ್ಕ್ ಸುಮಾರ್ ಜನ ಸಹೋದ್ರೆರ್ ಇತ್ತ್‌ದ್ ಅಕ್ಲೆಡ್ ಆಯೆನೇ ಕಡೀರ್‌ದಾಯೆ ಆವೊಡು ಪಂಡ್ದ್ ಎನ್ನ್‌ದ್ ತಾನ್ ಏರೆನ್ ತನ್ನಾಕುಲು ಪಂಡ್ದ್ ದುಂಬು ತೆರಿಯೊಂಡೆನಾ ಅಕ್ಲೆನ್ ತನ ಮಗನಲೆಕ್ಕ ದುಂಬೇ ನೇಮಕ ಮಲ್ತೆ.

³⁰ಇಂಚ ಪ್ರತ್ಯೇಕ ಮಲ್ತ್‌ದಿನಾಕುಲೆನ್ ದೇವೆರ್ ಲೆತ್ತೆ; ಲೆತ್ತಿನಾಕುಲೆನ್ ತನಡೊಪ್ಪ ನೀತಿವಂತೆರ್ ಅಂದ್‌ದ್ ಅಕ್ಲೆಡೊಪ್ಪ ತನ ಮೈಮೆನ್ ಪಟ್ಟೊನಿಯೆ.

³¹ಅಂಚಾಂಡ ಈ ಸಂಗತಿಲೆಡ್ ನಮ ದಾನೆ ಪನ್ಕ? ದೇವೆರ್ ನಮ ಕಡೆಟ್ಟ್ ಉಲ್ಲೆಡ ನಂಕ್ ಎದುರು ಉಂತುನಾಯೆ ಏರ್?

³²ತನ ಸ್ವಂತ ಮಗನ್ ಜೋಕೆ ಮಲ್ಪಂದೆ ಆಯನ್ ನಂಕಾದ್ ಒಚ್ಚಿದ್ ಕೊರಿಯೆ ಅತ್ತಾ? ಮಗನ್ ಕೊರಿ ಬೊಕ್ಕ ಸಮಸ್ತೊನ್ಲಾ ನಂಕ್ ಕೊರಂದೆ ಉಪ್ಪೆನಾ?

³³ದೇವೆರ್ ಅಜತ್‌ದ್ ದೆತ್ತೊಂಡಿನಾಕುಲೆನ್ ಏರ್ ದೂರೊಲಿ? ಅಕ್ಲೆನ್ ದೇವೆರ್ ತಾನೇ ನೀತಿವಂತೆರ್ ಪಂಡ್ದ್ ತೀರ್ಪು ಮಲ್ತೆ ಅತ್ತಾ?

³⁴ಅಪರಾಧಿಲು ಪಂಡ್ದ್ ತೀರ್ಪು ಮಲ್ಪುನಾಕುಲು ಏರ್? ಕ್ರಿಸ್ತ ಯೇಸು ಮರಣೊನು ಪಡೆಯಿನತ್ತಂದೆ ಜೀವೊಡು ಲಕ್ಕ್‌ದ್ ದೇವೆರೆ ಬಲತ್ತ ಮರ್ಗಿಲ್‌ಡ್ ಇತ್ತ್‌ದ್ ನಂಕಾದ್ ಮದ್ಯಸ್ತಿಕೆ ಮಲ್ಪುನಾಯೆ ಆದುಲ್ಲೆ.

³⁵ಕ್ರಿಸ್ತನ ಪ್ರೀತಿಡ್ದ್ ಏರ್ ನಮನ್ ದೂರ ಮಲ್ಪೊಲಿ? ಕಷ್ಟನಾ, ಸಂಕಟನಾ, ಭಂಗನಾ, ಬಡವಾ, ಕುಂಟುದಾಂತೆ ಉಪ್ಪುನವ, ಅಪಾಯನಾ, ಮರಣನಾ?

³⁶ಶಾಸ್ತ್ರೊಡು ಇಂಚೆನೇ ಬರೆದುಂಡು, “ದೇವೆರೇ, ಎಂಕುಲು ನಿನಡ್ದಾದ್ ದಿನ ಇಡೀ ಮರಣದ ಪೋಡಿಗೆಡ್ ಉಲ್ಲ; ಕೆರಿಯೆರೆಗುಪ್ಪುನ ಕುರಿತ ಲೆಕ್ಕನೇ ಎಂಕುಲು ಉಲ್ಲ.”

³⁷ಕ್ರಿಸ್ತೆ ನಮನ್ ಪ್ರೀತಿ ಮಲ್ಪುನೆಡ್ದ್ ನಮ ಈ ಮಾತ ಸಂಗತಿಲೆಡ್ ಪೂರ್ತಿ ಜಯಶಾಲಿಲು ಆದುಲ್ಲ.

³⁸ಎಂಚಂದ್ಂಡ ಮರಣ ಆವಡ್, ಜೀವ ಆವಡ್, ದೇವದೂತೆರಾವಡ್, ದುರಾತ್ಮೊಲಾವಡ್, ಬಲೊಲು ಆವಡ್, ಇತ್ತೆದ ಸಂಗತಿಲು ಆವಡ್ ದುಂಬದ ಸಂಗತಿಲು ಆವಡ್, ಮಿತ್ತ್‌ದ ಲೋಕ ಆವಡ್, ತಿರ್ತ್‌ದ ಲೋಕ ಆವಡ್, ಬೇತೆ ವಾ ಸೃಷ್ಟಿ ಆವಡ್ ನಮನ್ ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್ ತೋಜಿದ್ ಬತ್ತಿ ದೇವೆರೆ ಪ್ರೀತಿಡ್ದ್ ದೂರ ಮಲ್ಪೆರೆಗ್ ಆವಂದ್ ಪಂಡ್ದ್ ಎಂಕ್ ನಿಗಂಟ್ ಉಂಡು.