Read Tulu 1 ಕೊರಿಂಥ್ಯೆರೆಗ್ 11 Bible Online

1 ಕೊರಿಂಥ್ಯೆರೆಗ್ 11 - Tulu bible

1 ಕೊರಿಂಥ್ಯೆರೆಗ್ 11

¹ಯಾನ್ ಕ್ರಿಸ್ತನ್ ತೂದು ನಡಪುಲೆಕ್ಕನೇ ನಿಕುಲು ಎನನ್ ತೂದು ನಡಪುಲೆ.

²ನಿಕುಲು ಮಾತೆಟ್ಲಾ ಎನನ್ ಎನ್ನೊಂದು ಯಾನ್ ನಿಕ್ಲೆಗ್ ತೆರಿಪಾಯಿನ ನಿಯಮೊಲೆನ್ ಕೈಕೊನುನೆಡ್ದ್ ನಿಕ್ಲೆನ್ ಪುಗುರುವೆ.

³ಆಂಡಲಾ ಒಂಜಿ ಸಂಗತಿನ್ ನಿಕುಲು ತೆರಿಯೊನೊಡು ಅಂದ್‌ದ್ ಎನ ಆಸೆ; ಅವು ದಾನೆ ಪಂಡ ಪ್ರತಿ ನರಮಾನಿಗ್ ಕ್ರಿಸ್ತೆ ತರೆ, ಪೊಂಜೊವುಗು ಅಂಜೊವೇ ತರೆ, ಕ್ರಿಸ್ತಗ್ ದೇವೆರೇ ತರೆ ಆದುಲ್ಲೆ.

⁴ತರೆ ಮುಚ್ಚೊಂದು ಪ್ರಾರ್ಥನೆ ಇಜ್ಜಿಡ ಪ್ರವಾದನೆ ಮಲ್ಪುನ ಅಂಜೊವು ತನ ತರೆ ಆದುಪ್ಪು ಕ್ರಿಸ್ತಗ್ ಅವಮಾನ ಮಲ್ಪುನಾಯೆ ಆದುಲ್ಲೆ.

⁵ತರೆ ಮುಚ್ಚೊನಂದೆ ಪ್ರಾರ್ಥನೆ ಇಜ್ಜಿಡ ಪ್ರವಾದನೆ ಮಲ್ಪುನ ಪೊಂಜೊವು ತನ ತರೆ ಆದುಪ್ಪು ಅಂಜೊವುಗು ಅವಮಾನ ಮಲ್ಪುವಲ್. ಪೊಂಜೊವು ತರೆ ಮುಚ್ಚೊನಂದೆ ಉಪ್ಪುನವು ತರೆ ಬೋರು ಮಲ್ತೊನವುಲಾ ಒಂಜೇ ಆದುಂಡು.

⁶ಆಲೆಗ್ ತರೆ ಮುಚ್ಚೊನಿಯೆರೆ ಆಪುಜಿಡ ಕುಜಲ್ ಕತ್ತೆರಡ್. ಆಂಡ ಕುಜಲ್ ಕತ್ತೆರುನವು ಇಜ್ಜಿಡ ಬೋರು ಮಲ್ತೊನವು ಆಲೆಗ್ ನಾಚಿಗೆದ ವಿಚಾರ ಆದುಪ್ಪುನಾಂಡ ತರೆ ಮುಚ್ಚೊನಡ್.

⁷ಅಂಜೊವು ದೇವೆರೆ ಪ್ರತಿರೂಪಲಾ ಮೈಮೆಲಾ ಆದುಪ್ಪುನೆಡ್ದ್ ತನ ತರೆನ್ ಮುಚ್ಚೊನಿಯೆರೆ ಬಲ್ಲಿ; ಆಂಡ ಪೊಂಜೊವು ಅಂಜೊವುನ ಮೈಮೆ ಆದುಲ್ಲಲ್.

⁸ಸುರುತ್ತ ಅಂಜೊವು ಪೊಂಜೊವುಡ್ದು ಉಂಡಾಯಿನಿ ಅತ್ತ್; ಪೊಂಜೊವು ಅಂಜೊವುಡ್ದು ಉಂಡಾಯಿನಿ.

⁹ಬೊಕ್ಕ ಅಂಜೊವು ಪೊಂಜೊವುಗಾದ್ ಉಂಡಾಯಿನಿ ಅತ್ತ್; ಪೊಂಜೊವುನು ಅಂಜೊವುಗಾದ್ ಉಂಡು ಮಲ್ತ್‌ದಿನಿ.

¹⁰ಅಂಚಾಯಿನೆಡ್ದ್ ದೂತೆರೆಗಾದ್ ಪೊಂಜೊವು ಅಂಜೊವುನ ಅಧಿಕಾರೊಗು ಒಳಗಾದುಪ್ಪು ಗುರ್ತಗಾದ್ ತನ ತರೆ ಮುಚ್ಚೊನಡ್.

¹¹ಆಂಡಲಾ ಕರ್ತವಡ್ ಅಂಜೊವು ಪೊಂಜೊವುದಾಂತೆ ಇಜ್ಜಿಡ ಪೊಂಜೊವು ಅಂಜೊವುದಾಂತೆ ಪರಿಪೂರ್ಣ ಆಪುಜೆರ್.

¹²ಪೊಂಜೊವು ಅಂಜೊವುಡ್ದ್ ಉಂಡಾಯಲ್; ಅಂಚೆನೇ ಅಂಜೊವು ಪೊಂಜೊವುಡ್ದಾದ್ ಪುಟ್ಟುವೆ; ಮಾತೆಕ್ಕ್‌ಲಾ ದೇವೆರೇ ಮೂಲ ಆದುಲ್ಲೆ.

¹³ನಿಕ್ಲೆ ಉಲಯಿ ನಿಕುಲೇ ನಿರ್ಧಾರ ಮಲ್ತೊನ್ಲೆ, ಪೊಂಜೊವು ತರೆ ಮುಚ್ಚೊನಂದೆ ದೇವೆರೆಗ್ ಪ್ರಾರ್ಥನೆ ಮಲ್ಪುನವು ಸರಿಯಾ?

¹⁴ಅಂಜೊವು ಉದ್ಧ ಕುಜಲ್ ಬುಡಿಯೆಡ ಅವು ಆಯಗ್ ಅವಮಾನ ಆದುಂಡು;

¹⁵ಆಂಡ ಪೊಂಜೊವುಗು ಉದ್ಧ ಕುಜಲ್ ಇತ್ತ್ಂಡ ಅವು ಆಲೆಗ್ ಮಾನದ ಸಂಗತಿ; ಕುಜಲ್ ಆಲೆಗ್ ಕೊಟ್ಟುದ ಬದಲಾದ್ ಕೊರ್ತಿನವು.

¹⁶ಒರಿ ಈ ಸಂಗತಿಡ್ ತರ್ಕ ಮಲ್ಪುವೆಡ ಇಂಚಿತ್ತಿ ಕ್ರಮೊಕುಲು ಎಂಕ್ಲೆಡ್ ಇಜ್ಜಿ, ಬೊಕ್ಕ ದೇವೆರೆ ಸಭೆಕ್ಲೆಡ್ಲಾ ಇಜ್ಜಿ ಅಂದ್‌ದ್ ತೆರಿಯೊನಡ್.

¹⁷ಯಾನ್ ಇಂಚ ನಿಕ್ಲೆಗ್ ಅಪ್ಪಣೆ ಮಲ್ಪುನೆಟ್ಟ್ ನಿಕ್ಲೆನ್ ಪುಗರುಜಿ; ದಾಯೆಗಂದ್ಂಡ ನಿಕುಲು ಸೇರ್ದ್ ಬರ್ಪಿನೆಟ್ಟ್ ಹಾಳ್ ಆಪಿನತ್ತಂದೆ ಎಡ್ಡೆ ಆಪುಜಿ.

¹⁸ಸುರುತ್ತವು ದಾನೆ ಪಂಡ ಸಭೆ ಆದ್ ಸೇರ್ದ್ ಬನ್ನಗ ನಿಕ್ಲೆಡ್ ಪಂಗಡೊಲು ಉಂಡಾಪುಂಡು ಅಂದ್‌ದ್ ಕೇಂಡ್ದೆ; ಬೊಕ್ಕ ಉಂದು ಒಂತೆ ಮಟ್ಟ್‌ಗ್ ಅಂದ್, ಅಂದ್‌ದ್ ನಂಬುವೆ.

¹⁹ನಿಕ್ಲೆಡ್ ಯೋಗ್ಯೆರ್ ಏರ್ ಅಂದ್‌ದ್ ತೆರಿದ್ ಬರ್ಪಿನೆಕ್ಕಾದ್ ನಿಕ್ಲೆ ಉಲಯಿ ಪಂಗಡೊಲು ಉಪ್ಪುನವು ಅವಶ್ಯನೇ.

²⁰ಆಂಡ ನಿಕುಲು ಮಾತ ಸೇರ್ದ್ ಬನ್ನಗ, ನಿಕುಲು ಉನ್ಪಿನ ಕರ್ತವ ಭೋಜನ ಅತ್ತ್.

²¹ವಣಸ್ ಮಲ್ಪುನಗ ಪ್ರತಿಯೊರಿಲಾ ತಾನ್ ಕನಯಿದಿನೆನ್ ನನೊರಿಯಡ್ದ್ ದುಂಬೇ ತಿನ್ಪೆ. ಇಂಚ ಒರಿ ಬಡವುಡುಪ್ಪುವೆ; ಒರಿ ಪರ್ದ್ ಅಮಲ್‌ಡುಪ್ಪುವೆ.

²²ದಾನೆ, ತಿನಿಯೆರೆಗ್ಲಾ ಪರಿಯೆರೆಗ್ಲಾ ನಿಕ್ಲೆಗ್ ಇಲ್ಲ್ ಇಜ್ಜಂದೆ ಉಲ್ಲರಾ? ಇಜ್ಜಿಡ ದೇವೆರೆ ಸಭೆನ್ ತಾತ್ಸಾರ ಮಲ್ತ್‌ದ್ ದಾಲಾದಾಂತಿನಾಕುಲೆಗ್ ಅವಮಾನ ಮಲ್ಪುವರಾ? ಯಾನ್ ನಿಕ್ಲೆಗ್ ದಾನೆ ಪನೊಡು? ನಿಕ್ಲೆನ್ ಪುಗರೊಡಾ? ಈ ವಿಚಾರೊಡು ಯಾನ್ ಪುಗರುಜಿ.

²³ಯಾನ್ ನಿಕ್ಲೆಗ್ ತೆರಿಪಾಯಿನ ಈ ಬೋಧನೆನ್ ಕರ್ತವಡ್ದ್ ಹೊಂದಿಯೆ. ಆವು ದಾನೆಂದ್ಂಡ, ಕರ್ತವೆ ಆದುಪ್ಪು ಯೇಸು ತನನ್ ಒಚ್ಚಿದ್ ಕೊರಿನ ರಾತ್ರೆಡ್ ರೊಟ್ಟಿನ್ ದೆತ್ತೊಂದು,

²⁴ದೇವೆರೆನ್ ಸುಗಿತ್‌ದ್, ಪೊಲ್ತುದು ಅಕ್ಲೆಗ್ ಕೊರ್ದು, “ಉಂದು ನಿಕ್ಲೆಗಾದ್ ಕೊರ್ತಿನ ಎನ ಶರೀರ. ಎನನ್ ನೆನೆಪು ಮಲ್ಪೆರೆಗಾದ್ ಇಂಚ ಮಲ್ಪುಲೆ.”

²⁵ಅಂಚೆನೆ ವಣಸ್ ಆಯಿ ಬೊಕ್ಕ ಆಯೆ ಅವ್ವೇ ರೀತಿಡ್ ಪಾತ್ರೆನ್ ದೆತ್ತೊಂದು, “ಈ ಪಾತ್ರೆ ಎನ ನೆತ್ತೆರೆಡ್ದ್ ಉಂಡಾತಿನ ಪೊಸ ಒಡಂಬಡಿಕೆನ್ ತೋಜಾವುಂಡು. ನಿಕುಲು ಉಂದೆಟ್ಟ್ ಪರ್ಪಿನಾತ್ ಸರ್ತಿ ಎನನ್ ನೆನೆಪು ಮಲ್ಪೆರೆಗಾದ್ರ ದೆತ್ತೊನ್ಲೆ,”

²⁶ನಿಕುಲು ಈ ರೊಟ್ಟಿನ್ ತಿಂದ್‌ದ್ ಈ ಪಾತ್ರೆಡ್ ಪರ್ಪಿನಾತ್ ಸರ್ತಿ ಕರ್ತವ ಮರಣೊನು ಆಯೆ ಬನ್ನೆಂಗೆ ಸಾರಿಯೊನ್ವರ್.

²⁷ಅಂಚಾಯಿನೆಡ್ದ್ ಏರಾಂಡಲಾ ಯೋಗ್ಯದಾಂತೆ ಈ ರೊಟ್ಟಿನ್ ತಿಂದೆಡ ಇಜ್ಜಿಡ ಕರ್ತವ ಪಾತ್ರೆಡ್ ಪರಿಯೆಡ, ಕರ್ತವ ಶರೀರೊಗ್ಲಾ ನೆತ್ತೆರ್‌‌ಗ್ಲಾ ಅಪರಾಧಿ ಆದುಪ್ಪೆ.

²⁸ಅಂಚಾಂಡ ಪ್ರತಿ ನರಮಾನಿ ತನನ್ ಪರೀಕ್ಷೆ ಮಲ್ತೊಂದಿನಾಯೆ ಆದ್ ಈ ರೊಟ್ಟಿನ್ ದೆತ್ತೊಂದು ತಿನಡ್, ಈ ಪಾತ್ರೆಡ್ ಪರಡ್.

²⁹ದಾಯೆಗಂದ್ಂಡ ಕರ್ತವ ಶರೀರೊಗು ಪಂಡ್ಂಡ ಸಭೆಟ್ ಯೋಗ್ಯೆದಾಂತೆ ತಿಂದ್‌ದ್ ಪರ್ಪಿನಾಯೆ ನ್ಯಾಯತೀರ್ಪುನು ಬರ್ಪಾವುನಾಯೆ ಆದುಪ್ಪುವೆ.

³⁰ಈ ಕಾರಣೊಡ್ದಾದ್ ನಿಕ್ಲೆಡ್ ಮಸ್ತ್ ಜನ ಬಲದಾಂತಿನಾಕುಲುಲಾ ಸೀಕ್‌ದಾಕುಲುಲಾ ಆದುಲ್ಲೆರ್, ಮಸ್ತ್ ಜನ ಸೈತೆರ್.

³¹ನಿಜಾದ್ ನಂಕ್ ನಮನೇ ವಿಚಾರಣೆ ಮಲ್ತೊಂಡಡ ನಮ ನ್ಯಾಯತೀರ್ಪುಗು ಗುರಿ ಆಪುಜ.

³²ಆಂಡ ನಮ ಕರ್ತವ ನ್ಯಾಯತೀರ್ಪುಗು ಒಳಗಾನಗ ಆಯೆ, ಲೋಕದಾಕುಲೆಡೊಪ್ಪ ಅಪರಾಧಿಲು ಪನ್ಪಿ ತೀರ್ಪು ಆಯೆರೆ ಬಲ್ಲಿ ಪಂಡ್ದ್ ನಂಕ್ ಶಿಕ್ಷೆನ್ ಕೊರ್ಪೆ.

³³ಅಂಚಾದ್ ಎನ ಸಹೋದ್ರೆರೇ, ಮೇಜಿಗ್ ಸೇರ್ದ್ ಬನ್ನಗ ಒರಿ ಒರಿಯಗ್ ಕಾತೊನ್ಲೆ.

³⁴ನಿಕುಲು ಸೇರ್ದ್ ಬನ್ನಗ ದೇವೆರೆ ನ್ಯಾಯತೀರ್ಪುಗು ಕಾರಣ ಆವಂದಿಲೆಕ್ಕ ಒರಿಯಗ್ ಬಡವು ಇತ್ತ್ಂಡ ಇಲ್ಲಡೇ ವಣಸ್ ಮಲ್ಪಡ್. ಒರಿದಿನ ಸಂಗತಿಲೆನ್ ಯಾನ್ ಬತ್ತಿನಪಗ ನೇಮಕ ಮಲ್ಪುವೆ.