Read Tulu 1 ಕೊರಿಂಥ್ಯೆರೆಗ್ 13 Bible Online

1 ಕೊರಿಂಥ್ಯೆರೆಗ್ 13 - Tulu bible

1 ಕೊರಿಂಥ್ಯೆರೆಗ್ 13

¹ಯಾನ್ ನರಮಾನಿಲೆ ಭಾಷೆಲೆನ್ಲಾ ದೂತೆರೆ ಭಾಷೆಲೆನ್ಲಾ ಪಾತೆರಿಯೆಡ ಎನಡ ಪ್ರೀತಿ ಇಜ್ಜಾಂಡ ಯಾನ್ ಶಬ್ಧ ಮಲ್ಪುನ ಕಂಚಿಲಾ ಗಣಗಣ ಆಪಿನ ತಾಳಲಾ ಮಾತ್ರ ಆದುಲ್ಲೆ.

²ಎಂಕ್ ಪ್ರವಾದನೆದ ವರ ಇತ್ತ್ಂಡಲಾ ಮಾತ ಗೇನ ಇತ್ತ್ಂಡಲಾ ಮಾತ ಮರ್ಮೊಲೆನ್ ತೆರಿದಿತ್ತ್ಂಡಲಾ ಪರ್ವತೊಲೆನ್ ಲಕ್ಕಾವುನಾತ್ ಮಲ್ಲ ನಂಬಿಕೆ ಇತ್ತ್ಂಡಲಾ ಎನಡ ಪ್ರೀತಿ ಇಜ್ಜಾಂಡ ದಾಲಾ ಇಜ್ಜಾಂದಿನಾಯೆ ಆದುಲ್ಲೆ.

³ಎಂಕುಪ್ಪು ಮಾತ ಬದ್‌ಕ್‌ನ್ ಧರ್ಮಾದ್ ಕೊರಿಯೆರ್ಡಲಾ ಎನ ಶರೀರೊನು ಪೊತ್ತಾವೆರೆ ಒಚ್ಚಿದ್ ಕೊರಿಯೆಡಲಾ ಎನಡ ಪ್ರೀತಿ ಇಜ್ಜಾಂಡ ಎಂಕ್ ದಾಲಾ ಪ್ರಯೋಜನ ಇಜ್ಜಿ.

⁴ಪ್ರೀತಿ ತಾಳೊನುಂಡು; ಪ್ರೀತಿ ದಯದಾಕ್ಷಿಣ ತೋಜಾವುಂಡು; ಪ್ರೀತಿ ಮಚ್ಚರ ಪಡೆವುಜಿ; ಬೂಟು ಮಲ್ಪುಜಿ; ಉಬ್ಬೆರೊನುಜಿ;

⁵ಪ್ರೀತಿ ಮರ್ಯಾದಿ ತೆಟ್ಟ್‌ದ್ ನಡಪುಜಿ, ತನನೇ ನಾಡುಜಿ; ಕೋಪ ಮಲ್ತೊನುಜಿ, ತಪ್ಪುಮಲ್ತಿನೆನ್ ಮದಪುಂಡು.

⁶ಅನ್ಯಾಯೊನು ತೂದು ಸಂತೋಷ ಮಲ್ಪಂದೆ, ಸತ್ಯೊಗು ಜಯ ಆಪಿನೆನ್ ತೂದು ಸಂತೋಷ ಮಲ್ಪುಂಡು;

⁷ಪ್ರೀತಿ ಮಾತೆನ್ಲಾ ಮನಸ್‌ಡೇ ಸಹಿಸೊಂಡು, ಮಾತೆನ್ಲಾ ನಂಬುಂಡು, ಮಾತೆನ್ಲಾ ಭರವಸೆ ಮಲ್ಪುಂಡು, ಮಾತೆನ್ಲಾ ತಡೆತೊನುಂಡು.

⁸ಪ್ರೀತಿ ಏಪಲಾ ಬೂರ್ದು ಪೋಪುಜಿ, ಪ್ರವಾದನೆಲಾಂಡಲಾ ಉಂತುದು ಪೋವು; ಬೇತೆ ಬೇತೆ ಭಾಷೆಲು ಮುಗಿಯು, ಗೇನಲಾ ಆಳಿದ್ ಪೋವು.

⁹ನಮ ಒಂತೊಂತೆನೇ ತೆರಿಯೊನ್ವ; ಒಂತೊಂತೆನೇ ಪ್ರವಾದನೆ ಮಲ್ಪುವ.

¹⁰ಆಂಡ ಪರಿಪೂರ್ಣವಾಯಿನವು ಬರ್ಪಿನಪಗ ಒಂತೊಂತೆ ಇತ್ತಿನವು ಇಜ್ಜಾಂದೆ ಪೋವು.

¹¹ಯಾನ್ ಬಾಲೆ ಆದುಪ್ಪುನಗ ಬಾಲೆದ ಲೆಕ್ಕನೇ ಪಾತೆರಿಯೆ. ಬಾಲೆದ ಲೆಕ್ಕನೇ ಎನ್ನಿಯೆ, ಬಾಲೆದ ಲೆಕ್ಕನೇ ಆಲೋಚನೆ ಮಲ್ತೆ. ಪ್ರಾಯೊಗು ಬನ್ನಗ ಬಾಲೆದೆನ್ ಬುಡ್ದು ಬುಡಿಯೆ.

¹²ಇತ್ತೆ ನಮ (ದೇವೆರೆ ಮೋನೆನ್) ಕನ್ನಡಿಡ್ ತೋಜುಲೆಕ್ಕನೆ ತೂಪ; ಆಂಡ ಬೊಕ್ಕ ಎದುರೆದುರು ತೂವ. ಇತ್ತೆ ಎಂಕ್ ಒಂತೊಂತೆನೆ ತೆರಿದುಂಡು; ಆಂಡ ಅಪಗ ದೇವೆರ್ ಎನನ್ ತೆರಿಯೊನುಲೆಕ್ಕ ಯಾನ್ಲಾ ಪೂರ್ತಿ ಆದ್ ತೆರಿಯೊನ್ವೆ.

¹³ಇತ್ತೆ ನಂಬಿಕೆ, ಭರವಸ, ಬೊಕ್ಕ ಪ್ರೀತಿ, ಉಂದು ಮೂಜಿ ಮಾತ್ರ ಒರಿಯುಂಡು. ಆಂಡ ಐಟ್ಟ್ ಮಾತೆಟ್ಟ್ ಮಲ್ಲವು ಪ್ರೀತಿಯೇ.