Read Tulu 1 ಕೊರಿಂಥ್ಯೆರೆಗ್ 6 Bible Online

1 ಕೊರಿಂಥ್ಯೆರೆಗ್ 6 - Tulu bible

1 ಕೊರಿಂಥ್ಯೆರೆಗ್ 6

¹ನಿಕ್ಲೆಡ್ ಒರಿಯಗ್ ಸಹೋದ್ರನ ಮಿತ್ತ್ ವ್ಯಾಜ್ಯ ಉಂಡುಡ ನ್ಯಾಯತೀರ್ಪುಗು ದೇವಜನೊಕುಲೆ ದುಂಬು ಪೋವಂದೆ, ನೀತಿಕೆಟ್ಟಿನಾಕುಲೆ ಎದುರು ಪೋಯೆರೆ ನಿಕ್ಲೆಗ್ ಧೈರ್ಯ ಎಂಚ ಬತ್ತ್ಂಡ್?

²ದೇವಜನೊಕುಲು ಲೋಕೊನು ತೀರ್ಪು ಮಲ್ಪುನಾಕುಲು ಅಂದ್‌ದ್ ನಿಕ್ಲೆಗ್ ಗೊತ್ತಿಜ್ಜಾ? ಲೋಕೊಗು ನಿಕ್ಲೆಡ್ದ್ ತೀರ್ಪು ಆಪಿನವು ಆಂಡ, ನಿಕುಲು ಬಜೀ ಎಲ್ಲ್ಯ ಸಂಗತಿಲೆನ್ ತೀರ್ಪು ಮಲ್ಪೆರೆ ಆವಂದಿನಾಕುಲಾ?

³ದೂತೆರೆನ್ಲಾ ನಮ ತೀರ್ಪು ಮಲ್ಪುವ ಅಂದ್‌ದ್ ನಿಕ್ಲೆಗ್ ಗೊತ್ತಿಜ್ಜಾ? ಅಂಚಾಂಡ ಈ ಲೋಕದ ವ್ಯಾಜ್ಯೊಲೆನ್ ತೀರ್ಪುನವು ಮಲ್ಲೆನಾ?

⁴ಅಂಚಾಂಡ ಲೋಕದಜೀವ ಸಮ್ಮಂಧೊಡು ನಿರ್ಧಾರ ಮಲ್ಪು ಕಾರ್ಯೊಲು ನಿಕ್ಲೆಡ ಇತ್ತ್ಂಡ, ತೀರ್ಪು ಮಲ್ಪೆರೆ ಸಭೆಟ್ ಮಾನ ಪಡೆವಂದಿನಾಕುಲೆ ಎದುರು ಅವೆನ್ ದೆತ್ತೊಂದು ಪೋಪರಾ?

⁵ನಿಕ್ಲೆಗ್ ನಾಚಿಗೆ ಆವೊಡು ಅಂದ್‌ದ್ ಇಂಚ ಪಾತೆರ್‌ವೆ. ಸಹೋದರೆರೆ ಉಲಯಿದ ವ್ಯಾಜ್ಯೊನು ತೀರ್ಪೆರೆ ನಿಕ್ಲೆ ನಡುಟು ಏರ್ಲಾ ಒರಿ ಬುದ್ಧಿವಂತೆ ಇಜ್ಜೆನಾ?

⁶ಸಹೋದರೆ ತನ ಸಹೋದ್ರನ ಮಿತ್ತ್ ವ್ಯಾಜ್ಯ ಮಲ್ಪುನು ಅತ್ತಂದೆ ಅವೆನ್ ನಂಬಿಕೆದಾಂತಿನಾಕುಲೆ ಎದುರು ಕೊನೊಪಿನವು ಸರಿಯಾ?

⁷ನಿಕ್ಲೆ ಉಲಯಿಡ್ ವ್ಯಾಜ್ಯೊಲು ಇತ್ತ್ಂಡ ನಿಕುಲು ಸೋತಿನಾಕುಲು ಪನ್ಪಿನೆಕ್ಕ್ ಗುರ್ತ. ಅವೆಡ್ದ್ ಅನ್ಯಾಯೊನು ತಾಳೊನುನವು ಎಡ್ಡೆ ಅತ್ತಾ? ಆಸ್ತಿ ನಷ್ಟೊನು ತಾಳೊಂದು ಸಮಾಧಾನೊಡು ಉಪ್ಪುನವು ಎಡ್ಡೆ ಅತ್ತಾ?

⁸ಐತ ಬದಲ್‌ಗ್ ನಿಕುಲು ಅನ್ಯಾಯ ಮಲ್ಪುವರ್, ಬೇತೆಕ್ಲೆನ ಆಸ್ತಿ ಸುಲಿಗೆ ಮಲ್ಪುವರ್; ಅವುಲಾ ಸಹೋದ್ರೆರೆಗ್ ಇಂಚ ಮಲ್ಪುವರ್.

⁹ಅನ್ಯಾಯಗಾರೆರ್ ದೇವೆರೆ ರಾಜ್ಯೊಗು ಹಕ್ಕ್‌ದಾರೆರ್ ಆಪುಜೆರ್ ಅಂದ್‌ದ್ ನಿಕ್ಲೆಗ್ ತೆರಿದಿಜಾ? ಮೋಸೊಗು ಗುರಿ ಆವೊಡ್ಚಿ, ಹಾದ್ರದಾಕುಲು, ಮೂರ್ತಿಪೂಜೆ ಮಲ್ಪುನಾಕುಲು, ವ್ಯಭಿಚಾರಿಲು, ಪುರುಷಗಾಮಿಲು,

¹⁰ಕಲ್ವೆರ್, ಲೋಭಿಲು, ಪರ್ಪೆಲೆರ್, ನೆರ್ಪಿನಾಕುಲು, ಸುಲಿಗೆ ಮಲ್ಪುನಾಕುಲು ಮೊಕ್ಲೆಡ್ ಒರಿಯಗ್ಲಾ ದೇವೆರೆ ರಾಜ್ಯದ ಹಕ್ಕ್ ತಿಕ್ಕಂದ್.

¹¹ನಿಕ್ಲೆಡ್ ಕೆಲೆವೆರ್ ಇಂಚಿತ್ತಿನಾಕುಲಾದುಲ್ಲರ್; ಆಂಡಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಪುದರ್‌ಡ್ ಎಂಕುಲೆ ದೇವೆರೆ ಆತ್ಮೊಡು ಶುದ್ಧರಾಯರ್, ದೇವಜನೊಕುಲಾಯರ್, ನೀತಿವಂತೆರ್ ಪನ್ಪಿ ತೀರ್ಪು ಪಡೆಯರ್.

¹²ಕೆಲೆವೆರ್ ಇಂಚ ಪನೊಲಿ, “ಎಂಕ್ ಮಾತೆನ್ಲಾ ಮಲ್ಪುನ ಸ್ವತಂತ್ರ ಉಂಡು.” ಆಂಡ ಮಾತಲಾ ಪ್ರಯೋಜನೊಗು ಬೂರುಜಿ. “ಎಂಕ್ ಮಾತೆನ್ಲಾ ಮಲ್ಪುನ ಸ್ವತಂತ್ರ ಉಂಡು.” ಆಂಡ ಯಾನ್ ಒಯಿಕ್‌ಲಾ ಒಳಗಾಪುಜಿ.

¹³ಕೆಲೆವೆರ್ ಇಂಚ ಪನೊಲಿ, “ತಿನ್ಪಿನ ವಸ್ತುಲು ಬಂಜಿಗಾದ್‌ಲಾ ಬಂಜಿ ತಿನ್ಪಿನ ವಸ್ತುಲೆಗಾದ್‌ಲಾ ಉಂಡು.” ಆಂಡ ದೇವೆರ್ ಉಂದೆನ್ಲಾ ಅವೆನ್ಲಾ ದೆತ್ತ್‌ದ್ ಪಾಡ್ವೆ. ಆಂಡ ಶರೀರ ಹಾದ್ರೊಗಾದ್ ಉಪ್ಪುನವು ಅತ್ತ್, ಕರ್ತವಗಾದ್ ಉಂಡು ನಮ ಶರೀರೊಲುಲಾ ಆಯನ ಸೇವೆಗಾದ್ ಉಂಡು.

¹⁴ದೇವೆರ್ ಕರ್ತವನ್ ಲಕ್ಕಾಯಿ ಲೆಕ್ಕನೇ, ನಮನ್ಲಾ ತನ ಬಲೊಡ್ದು ಲಕ್ಕಾವೆ.

¹⁵ನಿಕ್ಲೆ ಶರೀರೊಲು ಕ್ರಿಸ್ತನ ಅಂಗೊಲಾದ್ ಉಲ್ಲ ಅಂದ್‌ದ್ ನಿಕ್ಲೆಗ್ ತೆರಿದಿಜಾ? ಅಂಚಾದ್ ಯಾನ್ ಕ್ರಿಸ್ತನ ಅಂಗೊಲಾದ್ ಉಪ್ಪುನೆನ್ ದೆತ್ತ್‌ದ್ ಸೂಳೆನ ಅಂಗೊಲಾದ್ ಮಲ್ಪೊಲಿಯಾ? ಏಪೊಗ್ಲಾ ಮಲ್ಪೆರೆ ಬಲ್ಲಿ.

¹⁶ಸೂಳೆಡೊಪ್ಪ ಕೂಡೊನುನಾಯೆ ಆಲೆಡೊಪ್ಪ ಒಂಜೇ ಶರೀರ ಆದುಪ್ಪುವೆ ಅಂದ್‌ದ್ ಗೊತ್ತಿಜ್ಜಾ? “ಅಕುಲು ಇರ್ವೆರ್ ಒಂಜೇ ಶರೀರ ಆದುಲ್ಲೆರ್.” ಅಂದ್‌ದ್ ದೇವೆರ್ ಪನ್ಪೆ ಅತ್ತಾ?

¹⁷ಆಂಡ ಕರ್ತವನ್ ಕೂಡೊನುನಾಯೆ ಆಯಡೊಪ್ಪ ಒಂಜೇ ಆತ್ಮ ಆದುಲ್ಲೆ.

¹⁸ಹಾದ್ರೊಗು ದೂರ ಆದುಪ್ಪುಲೆ, ನರಮಾನಿ ಮಲ್ಪುನ ಬೇತೆ ಮಾತ ಪಾಪ ಕೆಲಸೊಲು ಶರೀರೊಗು ತೊಂದರೆ ಆಪುಜಿ. ಆಂಡ ಹಾದ್ರ ಮಲ್ಪುನಾಯೆ ತನ ಶರೀರೊಗು ತೊಂದರೆ ಆಪಿನ ಪಾಪೊನು ಮಲ್ಪುವೆ.

¹⁹ದೇವೆರೆಡ್ದ್ ನಿಕ್ಲೆಡ್ ನಿಲೆ ಆದುಪ್ಪುನ ಪರಿಶುದ್ಧಾತ್ಮೊಗು ನಿಕ್ಲೆ ಶರೀರ ದೇವಾಲಯ ಆದುಂಡು ಅಂದ್‌ದ್ ನಿಕ್ಲೆಗ್ ತೆರಿಯಂದಾ? ನಿಕುಲು ನಿಕ್ಲೆನ ಸ್ವಂತ ಸೊತ್ತು ಅತ್ತ್.

²⁰ನಿಕುಲು ಮಸ್ತ್ ಕ್ರಯೊಕು ದೆತ್ತೊಂಡಿನಾಕುಲು; ಅಂಚಾಯಿನೆಡ್ದ್ ನಿಕ್ಲೆ ಶರೀರೊಡ್ದು ದೇವೆರೆಗ್ ಮೈಮೆ ಪಡೆಪಾಲೆ.