Read Tulu 1 ಕೊರಿಂಥ್ಯೆರೆಗ್ 8 Bible Online

1 ಕೊರಿಂಥ್ಯೆರೆಗ್ 8 - Tulu bible

1 ಕೊರಿಂಥ್ಯೆರೆಗ್ 8

¹ಇತ್ತೆ ಮೂರ್ತಿಪೂಜೆಗ್ ನೈವೇದ್ಯ ಮಲ್ತಿನ ವಸ್ತುಲೆ ಬಗೆಟ್ ತೂಕ. ನಂಕ್ ಮಾತೆರೆಗ್ಲಾ ಗೇನ ಉಂಡು ಅಂದ್‌ದ್ ತೆರಿದ. ಉಂದು ಉಬ್ಬೆರುನೆಕ್ಕ್ ಕಾರಣ ಆಪುಂಡು, ಆಂಡ ಪ್ರೀತಿ ಆತ್ಮೀಕತೆನ್ ದೃಢ ಮಲ್ಪುಂಡು.

²ಉಂದೆನ್ ಮಾತ ತೆರಿದೆ ಅಂದ್‌ದ್ ಎನ್ನುನಾಯೆ ತಾನ್ ತೆರಿಯೊಡಾಯಿನ ರೀತಿಡ್ ನನಲಾ ತೆರಿದಿಜೆ.

³ಆಂಡ ಒರಿ ದೇವೆರೆನ್ ಪ್ರೀತಿ ಮಲ್ಪುವೆಡ, ಆಯನ್ ದೇವೆರ್ ತೆರಿಯೊನ್ವೆ.

⁴ಮೂರ್ತಿಪೂಜೆಗ್ ನೈವೇದ್ಯ ಮಲ್ತ್‌ದಿನ ವಸ್ತುಲೆನ್ ತಿನ್ಪಿನ ಬಗೆಟ್ ದಾನೆಂದ್ಂಡ, ಲೋಕೊಡು ಮೂರ್ತಿಪೂಜೆಲು ದಾಲಾ ಅತ್ತ್, ದೇವೆರ್ ಒರಿಯೇ, ಬೇತೆ ದೇವೆರ್ ಇಜ್ಜೆ ಅಂದ್‌ದ್ ತೆರಿದುಲ್ಲ.

⁵ಮಸ್ತ್ ದೇವೆರೆನ್ಲಾ ಕರ್ತವನ್ಲಾ ಪೂಜೆ ಮಲ್ಪುನಾಕುಲು ಉಲ್ಲೆರ್. ನಿಜನೇ; ಪರಲೋಕೊಡಾವಡ್, ಭೂಮಿದ ಮಿತ್ತಾವಡ್ ದೇವೆರ್ ಅಂದ್‌ದ್ ಎನ್ನೊನುನಾಕುಲು ಇತ್ತೆರ್ಡಲಾ

⁶ನಂಕ್ ಒರಿಯೇ ದೇವೆರ್ ಉಲ್ಲೆ; ಆಯೆ ಅಮ್ಮೆ ಆದುಪ್ಪುನಾಯೆನೇ; ಎಂಕುಲು ಆಯಗಾದ್ ಉಂಡಾದ್ ಬದುಕುವ. ಬೊಕ್ಕ ನಂಕ್ ಒರಿಯೇ ಕರ್ತವೆ; ಆಯೆ ಯೇಸು ಕ್ರಿಸ್ತೆನೇ; ಆಯಡ್ದ್ ಮಾತ ಉಂಡಾಂಡ್, ಎಂಕುಲುಲಾ ಆಯಡ್ದೇ ಜೀವೊಡುಲ್ಲ.

⁷ಆಂಡ ಈ ಬುದ್ಧಿ ಮಾತೆರೆಡ್ಲಾ ಇಜ್ಜಿ; ಕೆಲೆವೆರ್ ಇತ್ತೆಲಾ ಮೂರ್ತಿಲೆ ಕೈತಲ್‌ ಪೋಪಿನ ರೂಢಿಡ್ ಉಪ್ಪುನೆಡ್ದ್ ತನ್ಕುಲು ತಿನ್ಪಿನೆನ್ ಮೂರ್ತಿಗ್ ನೈವೇದ್ಯ ಮಲ್ತಿನವು ಅಂದ್‌ದ್ ಎನ್ನೊಂದು ತಿನ್ಪೆರ್; ಇಂಚ ಅಕ್ಲೆ ಮನಸಾಕ್ಷಿ ಬಲದಾಂತಿನವು ಆಯಿನೆಡ್ದ್ ಅಕುಲು ಅಶುದ್ಧೆರ್ ಅಂದ್‌ದ್ ಎನ್ನುವೆರ್.

⁸ಆಂಡ ತಿನ್ಪಿನವು ಎಂಕ್ಲೆನ್ ದೇವೆರೆ ಸನ್ನಿಧಿಗ್ ಸೇರಾವಂದ್. ತಿಂದ್‌ಜಿಡ ಎಂಕ್ಲೆಗ್ ಕಡಿಮೆ ಇಜ್ಜಿ, ತಿಂದ್‌ಂಡ ನಂಕ್ ಹೆಚ್ಚಿಗೆ ಆಪುಜಿ.

⁹ಆಂಡಲಾ ನಿಕ್ಲೆನ ಈ ಸ್ವತಂತ್ರ ನಂಬಿಕೆಡ್ ಬಲಹೀನೆರೆಗ್ ಒಂಜಿ ವೇಳೆ ಅಡ್ಡಿ ಆವು, ಎಚ್ಚರಿಕೆ ಆದುಪ್ಪುಲೆ.

¹⁰ಬುದ್ಧಿದಾಯೆ ಈ ದೇವಸ್ಥಾನೊಡು ವಣಸ್‌ಗ್ ಕುಲ್ಲುದುಪ್ಪುನಗ, ಬಲದಾಂತಿ ಮನಸ್‌ದ ಒರಿ ಸಹೋದರೆ ತೂಯೆಡ ಆಯೆಲಾ ಮೂರ್ತಿಗ್ ನೈವೇದ್ಯ ಮಲ್ತಿನ ವಸ್ತುಲೆನ್ ತಿನಿಯೆರೆ ಧೈರ್ಯ ಮಲ್ಪೆ ಅತ್ತಾ?

¹¹ಇಂಚ ನಿನ ಗೇನೊಡ್ದಾದ್ ಆ ಬಲದಾಂತಿ ಸಹೋದರೆ ಆತ್ಮೀಕ ರೀತಿಡ್ ನಾಶಾಪೆ ಅತ್ತಾ? ಆಯಗಾದ್‌ಲಾ ಕ್ರಿಸ್ತೆ ತನ ಜೀವ ಕೊರ್ತೆ ಅತ್ತಾ.

¹²ಇಂಚ ಉಪ್ಪುನಗ ನಿನ ಸಹೋದ್ರಗ್ ವಿರೋಧಾದ್ ಪಾಪ ಮಲ್ತ್‌ದ್ ಆಯ ಬಲದಾಂತಿ ಮನಸಾಕ್ಷಿಗ್ ಬೇನೆ ಕೊರಿಯಡ ಕ್ರಿಸ್ತಗ್ ವಿರೋಧಾದ್ ಪಾಪ ಮಲ್ಪುನಾಯೆ ಆದುಪ್ಪುವ.

¹³ಅಂಚಾದ್, ತಿನ್ಪಿನೆಟ್ ಎನ ಸಹೋದ್ರಗ್ ಅಡ್ಡಿ ಆಪಿನಾಂಡ ಯಾನ್ ಏಪೊಗ್ಲಾ ಮಾಸನೇ ತಿನಯೆ; ಯಾನ್ ಎನ ಸಹೋದ್ರಗ್ ಅಡ್ಡಿ ಆಯೆರೆ ಬಲ್ಲಿ ಅತ್ತಾ?