Read Tulu 1 ಕೊರಿಂಥ್ಯೆರೆಗ್ 9 Bible Online

1 ಕೊರಿಂಥ್ಯೆರೆಗ್ 9 - Tulu bible

1 ಕೊರಿಂಥ್ಯೆರೆಗ್ 9

¹ಯಾನ್ ಸ್ವತಂತ್ರೆ ಅತ್ತಾ? ಯಾನ್ ಅಪೊಸ್ತಲೆ ಅತ್ತಾ? ನಮ ಕರ್ತವೆ ಆದುಪ್ಪು ಯೇಸುನು ತೂಯಿನಾಯೆ ಅತ್ತಾ? ಯಾನ್ ಕರ್ತವ ಸೇವೆಡ್ ಮಲ್ತಿ ಬೇಲೆದ ಪ್ರತಿಫಲ ನಿಕುಲೇ ಅತ್ತಾ?

²ಬೇತೆಕ್ಲೆಗ್ ಯಾನ್ ಅಪೊಸ್ತಲೆ ಅತ್ತ್‌ಡಲಾ ನಿಕ್ಲೆಗಾಂಡಲಾ ಅಪೊಸ್ತಲೆ ಆದುಲ್ಲೆ. ದಾಯೆಗಂದ್ಂಡ ಕರ್ತವಡ್ ಎನ ಅಪೊಸ್ತಲ ಕೆಲಸೊಗು ನಿಕುಲೇ ಎನ ಮುದ್ರೆ ಆದುಲ್ಲರ್.

³ಎನನ್ ವಿಚಾರಣೆ ಮಲ್ಪುನಾಕುಲೆಗ್ ಉಂದೇ ಎನ ಉತ್ತರ.

⁴ಎಂಕ್ಲೆಗ್ ಉನಿಯೆರೆ, ಪರಿಯೆರೆ ಅಧಿಕಾರ ಇಜ್ಜಾ?

⁵ಬೊಡೆದಿನ್ ಒಟ್ಟುಗು ಲೆತ್ತೊಂದು ಪೋಯೆರೆ ಒರಿದಿನ ಅಪೊಸ್ತಲೆರೆಲೆಕ್ಕಲಾ ಕರ್ತವ ಸಹೋದ್ರೆರೆಲೆಕ್ಕಲಾ, ಕೇಫಲೆಕ್ಕಲಾ ಎಂಕ್ಲೆಗ್ ಹಕ್ಕ್ ಇಜ್ಜಾ.

⁶ಅತ್ತ್‌ಡ, ಕೈಬೇಲೆ ಮಲ್ಪಂದೆ ಜೀವನ ಮಲ್ಪೆರೆ ಬೇತೆಕ್ಲೆಗ್ ಹಕ್ಕ್ ಇತ್ತಿಲೆಕ್ಕನೆ, ಎಂಕ್‌ಲಾ ಬಾರ್ನಬಗ್ಲಾ ಹಕ್ಕ್ ಇಜ್ಜಾ?

⁷ಯುದ್ಧೊಗು ಏರಾಂಡಲಾ ತನ ಸ್ವಂತ ಖರ್ಚಿಡ್ ಪೋಪೆನಾ? ದ್ರಾಕ್ಷೆತೋಟ ಮಲ್ತಿನಾಯೆ ಐತ ಫಲೊನು ತಿನಂದೆ ಉಪ್ಪುನವು ಉಂಡಾ? ಕೈಕಂಜಿ ತಾಂಕಿನಾಯೆ ಐತ ಪೇರ್‌ದ ವಸ್ತುಲೆಡ್ ಜೀವನ ಮಲ್ಪಂದೆ ಉಪ್ಪೆನಾ?

⁸ಯಾನ್ ಪಂಡಿನವು ಲೋಕರೂಢಿದ ಪಾತೆರ ಆದುಂಡಾ? ನ್ಯಾಯಕಟ್ಟ್‌ಲೆಡ್ಲಾ ಉಂದೆನೇ ಪನ್ಪುಂಡತ್ತಾ?

⁹“ಕೆಯಿ ದೊಂಕುನ ಬೋರಿದ ಬಾಯಿನ್ ಕಟ್ಟಿಯೆರೆ ಬಲ್ಲಿ,” ಅಂದ್‌ದ್ ಮೋಶೆನ ನ್ಯಾಯಕಟ್ಟ್‌ಡ್ ಬರೆತ್ಂಡ್. ದೇವೆರ್ ಬೋರಿಲೆಗಾದ್ ಚಿಂತೆ ಮಲ್ಪುವೆನಾ? ಅತ್ತ್‌ಡ, ನಂಕಾದ್ ಪನ್ಪೆನಾ?

¹⁰ಅಂದ್, ಕಂಡಿತಾದ್ ನಂಕಾದ್ ಬರೆತ್ಂಡ್. ದಪ್ಪುನಾಯೆ ತನ್ಕ್ ಪಾಲ್ ತಿಕ್ಕುಂಡು ಅಂದ್‌ದ್ ಭರವಸೊಡು ದಪ್ಪುವೆ. ಒಕ್ಕುನಾಯೆ ತನ್ಕ್ ಪಾಲ್ ತಿಕ್ಕುಂಡು ಪಂಡ್ದೇ ಭರವಸೊಡು ಒಕ್ಕುವೆ.

¹¹ಎಂಕುಲು ನಿಕ್ಲೆಗಾದ್ ಆತ್ಮಸಮ್ಮಂಧವಾಯಿನ ಬಿತ್ತ್‌ನ್ ಬಿತ್ತಿ ಬೊಕ್ಕ ನಿಕ್ಲೆಡ್ದ್ ಲೋಕಸಮ್ಮಂಧವಾಯಿನೆನ್ ಎಂಕುಲು ಕೊಯ್ಪಿನವು ಮಲ್ಲೆನಾ?

¹²ಈ ಹಕ್ಕ್ ಬೇತೆಕ್ಲೆಗ್ ನಿಕ್ಲೆ ಮಿತ್ತ್ ಉಪ್ಪುನಾಂಡ, ಎಂಕ್‌ಲಾ ಬಾರ್ನಬಗ್ಲಾ ಏತೋ ಹೆಚ್ಚ್ ಉಪ್ಪೊಡತ್ತಾ. ಆಂಡಲಾ ಎಂಕುಲು ಈ ಹಕ್ಕ್‌ನ್ ತೋಜಾವಂದೆ ಕ್ರಿಸ್ತನ ಸುವಾರ್ತೆಗ್ ತಡೆ ಆಯೆರೆ ಬಲ್ಲಿ ಅಂದ್‌ದ್ ಮಾತೆನ್ ಸಹಿಸೊಂಡ.

¹³ದೇವಾಲಯದ ಚಾಕ್ರಿದಾಕುಲು ದೇವಾಲಯದ ಸಂಪೊತ್ತುಡೇ ಬದುಕುವೆರ್ ಅಂದ್‌ದ್ ಬಲಿಪೀಠದ ಸೇವೆಡುಪ್ಪುನಾಕುಲು ಆ ಬಲಿಪೀಠಗ್ ಬರ್ಪಿನೆಟ್ಟ್ ಪಾಲ್‌ದಾರೆರ್ ಆದುಲ್ಲೆರ್ ಪಂಡ್ದ್‌ಲಾ ನಿಕ್ಲೆಗ್ ಗೊತ್ತಿಜ್ಜಾ?

¹⁴ಅಂಚೆನೇ ಸುವಾರ್ತೆ ಸಾರಿಯುನಾಕುಲು ಸುವಾರ್ತೆಡೇ ಜೀವನ ಮಲ್ಪೊಡಂದ್‌ದ್ ಕರ್ತವೆ ಅಪ್ಪಣೆ ಕೊರ್ತೆ.

¹⁵ಯಾನ್, ಈ ಹಕ್ಕ್‌ಲೆಡ್ ಒಂಜೆನ್ಲಾ ತೋಜಪಾದಿಜಿ; ಎನ ವಿಷಯೊಡ್ಲಾ ಇಂಚೆನೇ ಎಂಕ್ ತಿಕ್ಕೊಡು ಅಂದ್‌ದ್ ಈ ಸಂಗತಿಲೆನ್ ಬರೆತಿಜಿ. ಅವೆಡ್ದ್ ಸೈಪಿನವೇ ಎಂಕ್ ಎಡ್ಡೆ. ಪುಗರೊನಿಯೆರೆಗ್ ಎಂಕುಪ್ಪುನ ಈ ಅವಕಾಶೊನು ಏರ್ಲಾ ದೆತ್ತ್ ಪಾಡಿಯೆರೆ ಬಲ್ಲಿ.

¹⁶ಯಾನ್ ಸುವಾರ್ತೆ ಸಾರಿಯೆಡಲಾ ಪುಗರೊನಿಯೆರೆ ಎಂಕ್ ಅವಕಾಶನೇ ಇಜ್ಜಿ. ಸಾರಿಯೊಡೇ ಅಂದ್‌ದ್ ಎಂಕ್ ಒತ್ತಾಯ ಉಂಡು. ಯಾನ್ ಸಾರಿಯಂದೆ ಇತ್ತ್ಂಡ ಎನ ಗತಿನ್ ದಾನೆ ಪನೊಲಿ?

¹⁷ಉಂದೆನ್ ಯಾನ್ ಮನಸ್ ಕೊರ್ದು ಮಲ್ಪುವೆಡ ಎಂಕ್ ಉಡಿಗೆರೆ ತಿಕ್ಕುಂಡು; ಬೊಕ್ಕೊರಿಯನ ಇಷ್ಟದಂಚ ಮಲ್ತ್ಂಡ ಜವಾಬ್ದಾರಿಕೆ ಎಂಕ್ ಕೊರ್ತಿನವು ಆದುಂಡು.

¹⁸ಅಪಗ ಎಂಕ್ ತಿಕ್ಕು ಉಡಿಗೆರೆ ಎಂಚಿನವು? ಯಾನ್ ಸುವಾರ್ತೆ ಸಾರಿನಗ ಐಡ್ದ್ ಜೀವನ ಮಲ್ಪುನ ಹಕ್ಕ್‌ನ್ ಉಪಯೋಗ ಮಲ್ಪಂದೆ ಎಡ್ಡೆ ರೀತಿಡ್ ಸುವಾರ್ತೆ ಸಾರಿಯುನನೇ ಎನ ಪ್ರತಿಫಲ.

¹⁹ಯಾನ್ ಮಾತ ಸಂಗತಿಡ್ ಸ್ವತಂತ್ರೆ ಆದಿತ್ತ್‌ಂಡಲಾ ಹೆಚ್ಚಿನಾಕುಲೆನ್ ರಕ್ಷಣೆಗ್ ನಡಪಾಯೆರೆಗಾದ್ರ ಎನನ್ ಯಾನ್ ಮಾತೆರೆಗ್ಲಾ ಗುಲಾಮೆ ಆದ್ ಮಲ್ತೊಂಡೆ.

²⁰ಯೆಹೂದ್ಯೆರೆನ್ ರಕ್ಷಣೆಗ್ ನಡಪಾಯೆರೆಗಾದ್ರ ಯೆಹೂದ್ಯೆರೆಗ್ ಯಾನ್ ಒರಿ ಯೆಹೂದ್ಯೆ ಆಯೆ. ಯಾನ್ ಮೋಶೆನ ನ್ಯಾಯಕಟ್ಟ್‌ಲೆಗ್ ಅಡಿಯಾಳ್ ಆಯಿನಾಯೆ ಅತ್ತ್‌ಡಲಾ ಕಟ್ಟ್‌ಲೆಗ್ ಅಡಿಯಾಳ್ ಆಯಿನಾಕುಲೆನ್ ರಕ್ಷಣೆಗ್ ನಡಪಾಯೆರೆಗಾದ್ರ ಯಾನ್ಲಾ ಕಟ್ಟ್‌ಲೆಗ್ ಅಡಿಯಾಳ್ ಆತಿನಾಯೆ ಆಯೆ.

²¹ಯಾನ್ ದೇವೆರೆ ನ್ಯಾಯಕಟ್ಟ್‌ದಾಂತಿನಾಯೆ ಅತ್ತ್, ಕ್ರಿಸ್ತನ ಕಟ್ಟ್‌ಗ್ ಅಡಿಯಾಳ್ ಆತಿನಾಯೆನೇ; ಆಂಡಲಾ ಮೋಶೆನ ಕಟ್ಟ್‌ದಾಂತಿನಾಕುಲೆನ್ ರಕ್ಷಣೆದ ಮಾರ್ಗೊಗು ನಡಪಾಯೆರೆಗಾದ್ರ ಯಾನ್ ಅಕ್ಲೆಗ್ ಕಟ್ಟ್‌ದಾಂತಿನಾಯಲೆಕ್ಕನೆ ಆಯೆ

²²ಬಲಹೀನೆರೆನ್ ರಕ್ಷಣೆಗ್ ನಡಪಾಯೆರೆಗಾದ್ರ ಯಾನ್ ಬಲಹೀನೆ ಆಯೆ. ಎಂಚಾಂಡಲಾ ಕೆಲೆವೆರೆನ್ ರಕ್ಷಣೆ ಮಲ್ಪೆರೆ ಮಾತೆರೆಗ್ ಮಾತಲಾ ಆಯೆ.

²³ಯಾನ್ ಬೇತೆಕ್ಲೆ ಒಟ್ಟುಗು ಸುವಾರ್ತೆದ ಫಲೊಟು ಪಾಲ್‌ದಾರೆ ಆಯೆರೆ ಬೋಡಾದ್ ಉಂದೆನ್ ಮಾತ ಸುವಾರ್ತೆಗಾದೇ ಮಲ್ಪುವೆ.

²⁴ಓಟದ ರಂಗಸ್ಥಳೊಟು ಬಲ್ಪುನಾಕುಲು ಮಾತೆರ್ಲಾ ಪಾರಿಯೆರ್ಡಲಾ ಒರಿಯಗ್ ಮಾತ್ರ ಇನಾಮು ತಿಕ್ಕುಂಡು ಅಂದ್‌ದ್ ಗೊತ್ತಿಜ್ಜಾ? ನಿಕುಲುಲಾ ಇನಾಮು ತಿಕ್ಕೆರೆಗಾದ್ರನೇ ಪಾರ್‌ಲೆ.

²⁵ಐಟ್ಟ್ ಪೊರ್‌ಂಬುನಾಕುಲು ಮಾತ ಸಂಗತಿಡ್ಲಾ ಮಿತಿಟ್ ಉಪ್ಪುವೆರ್. ಅಕುಲು ನಾಶಾದ್ ಪೋಪಿ ಜಯಮಾಲೆನ್ ಪಡೆಯೆರೆಗಾದ್ರ ಪೊರ್‌ಂಬುವೆರ್. ನಮ ಆಂಡಲಾ ನಾಶಾವಂದಿನ ಜಯಮಾಲೆಗಾದ್ರ ಪೊರ್ಂಬುನಾಕುಲಾದುಲ್ಲ.

²⁶ಅಂಚಾಯಿನೆಡ್ದ್ ಯಾನ್ಲಾ ಗೊತ್ತುಗುರಿದಾಂತಿನಾಯಲೆಕ್ಕ ಪಾರುಜಿ; ಯಾನ್ ಗಾಳಿಗ್ ಗುದ್ದುನಾಯೆ ಆದುಪ್ಪಂದೆ ಗೆಂದೊಡಂದ್ದೇ ಗುದ್ದುವೆ.

²⁷ಬೇತೆಕ್ಲೆಗ್ ಸುವಾರ್ತೆನ್ ಪ್ರಚಾರ ಮಲ್ತ್‌ದ್ ಯಾನೇ ಯೋಗ್ಯದಾಂತಿನಾಯೆ ಆದ್ ತೋಜಿದ್ ಬರ್ಪೆನಾ ಇನ್ಪಿ ಪೋಡಿಗೆಡ್ ಎನ ಶರೀರೊನು ಪೊಡಿಮಲ್ತ್‌ದ್ ಎನ ವಶೊಕ್ಕು ಮಲ್ತೊನ್ವೆ.